مصطلحات حساويه 2


هااااااااااااااااااااي قروب …. شخباركم ؟؟ شمسوييين ؟؟؟ ان شالله تمام
كتبت مره عن المصطلحات الحساويه .. كانكم تذكرون …
و وعدتكم اني اسوي لكم جزء ثاني … و اسوي لكم امثال حساويه
المهم …
اليوم انا جايه وفي جعبتي.. مصطلحات حساويه 2 خخخخخخخ … يعني تكمله للجزء الاول
تعرفون جدتي -الله يطول بعمرها- عندنا زايره هالاسبوع .. عاد انا استغليت الفرصه و تربعت جنبها .. و مسكت القلم والورقه .. و بديت اسحب منها .. الكلمات
يالله نبدأ
مخنود : يعني كسلان .. يعني اذا مثلا كلمت واحده بالتلفون .. و سمعت صوتها كأنها توها صاحيه من النوم او صوتها كسلان .. يقولون .. ايش فيك مخنوده
ملهوق : مع شد الواو .. مشي حالك .. يعني مثلا تقول لواحد ايش في شغلك ملهوق .. يعني ماهو مضبوط
مديرع : مع كسر الدال و الياء … معناتها واحد مفتوحه ازرار قميصه من قدام ..و شكله ماهو مضبوط
مسركل : يعني متعدل و هندامه تمام
هتل = متهتمل : يعني واحد غير مهندم .. متبهذل شكله
قظاره : يعني باديه كبيره .. يقولون .. حطي المرق في القظاره
كمشه : ملعقه
فضيخ : واحد غير جدي في حياته .. وماغير يكركر و يضحك .. بالعربي موسع صدره
كديج : يعني واحد معتوه و مفهي
متبربد :  واحد تعبان جسمه من الحراره .. يعني اذا طلع الواحد للشمس ..و كان مررره حر .. يرجع البيت و يحس جسمه تعبان و مبهدل
مستهوي : يقولونها للشخص المزكم .. و فيه نزلة برد
حواطه = سواعه : مع شد الواو ..هي  الحرمه اللي ما تقعد في بيتها .. بس طالعه تتمشى و تسير من بيت لبيت
كنديه : بشد الياء .. الغرفه اللي في منتصف الدرج .. لاهي فوق ولا تحت .. بالعربي مثل غرفة عمتي
عسو : مكنسه من عذق النخل
دراز : فلفل حار
ماصخه : ثقيلة دم
صم حصمصم : يقولونها للبنت اللي بس ساكته .. يقولون لها .. هذي البنت صم الحصمصم
بجت : وصف للدجاجه في بعض اوضاعها يعني باضت .. و يقولونها اهل منطقة الكووت .. يعني مو كل الحساويه
سبابيج : سيقان .. يقولونها .. مثلا .. يا يمه مدي سبابيجك .. يعني مدي سيقانك او رجولك
زوليه : سجاده
تدوده = تبهبه = طارت بوهته .. : تلعثم .. يعني .. امممممممممم  مادري كيف اشرحها ..
متشاغبه: .. يعني خايفه ..او قلبها يودي و يجيب .. مثلا ..وحده متشاغبه على ولدها لانه تأخر عن البيت .. يعني تفكر . ياربي وين راح . لايكون صار له شي ..
مرتخي : مرتاح
تطرب : بشد الطاء و الراء .. فرحانه او تتباهى به .. مثلا يقولون .. هذي الام تتطرب على ولدها .. يعني مستانسه عليه
دلاغ : شراب .. جوارب
باق : يعني سرق .. باق الولد الحلاوه .. يعني سرقها
و بسسسسس
الى لقاء اخر مع امثال خاصه جدا للحساويه

حقوق الطبع و النسخ محفوظه ل NoT 4SaLe


أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مصطلحات حساويه 2

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول