### مشاهد اجتماعية مموسقة ###


بسم الله الرحمن الرحيم

الاخوة والأخوات الأعزاء

أعضاء قروب الغالي " أبو نواف "ـ




السلام عليكم ورحمة الله وبركاته 
 
والشهر عليكم مبارك <<= بدري

وأعاننا الله واياكم على صيامه وقيامه وتقبله منا

أما قبل

 أوصيكم ونفسي بالمحافظة على صلاة التراويح والقيام في الأيام القادمة لكي نتحرى ليلة القدر والتي هي خير ٌ من ألف شهر

وانتم يالحريم الا رحتوا تصلون في المسجد لاتقعدون    "  تجرجرون " معكم مبزرتكم 

 واللي عندها مبزرة ولا " تسقم " عنهم ،  تصلي في البيت لأن بعض الحريم الله يهديهن مخلين مصليات النساء كنها صالة الألعاب حقت داجن من كثر صجة البزارين ولجتهم 

وفقنا الله وإياكم الى كل مايحب ويرضى


مشاهد

توطئة  

ترددت كثيراً قبل أن أرسل هذا الموضوع..ه
لأنها المرّة الأولى التي أطرق فيها هذا النوع من الكتابة  ، وأعترف أن هذه المشاهد تطلّبت مني

 " عصفاً ذهنياً كثيرا "
و إستنزفت " جهداً فكرياً " كبيرا .. ه
ولذا أتمنى أن تنال شيئاً من رضاكم

 وإن لم يكن ذلك

 فأتمنى أن تجدوا في البوح الفوتغرافي

مايمحو عنكم ندم القراءة


مشاهد

1

" خــــــوش طــــــوع "
مشاهد

وقام الصْبح متأخر
وناظر ساعته وإلا
عقاربها ثمان إلا

وصاح بصوته العالي
يابنت اكوي لي شماغي
وجيبي ثوبي ونعالي
وسجّاده
  بيصلي الفجر كالعادة   !!ه

بسرعه قبل مايرفع
مديري " العلة " التوقيع
وتضيع الترقيه وآضيع

ه– يا احمد قبل ما أنسى
ترى جارك ابو ميسا

فقير ومعوز ومحتاج
يبي له مأكل ومشرب
يبي له ملبس ٍ وعلاج
عطه من هالزكاة اللي
ياروحي أنت….ه

ــ صبر يابنت

وش اللي أنت ؟؟
فلوسي كلها راحت في اسهم
سابك ونادك
وفالكهرب وفي الاسمنت  !!ه

أنا ماقلت ياتغريد ..
زميلي نايف المسكين

بيتزوّج وهو " أعرج "ه
عقب يومين ! ه

أنا ماقلت ياتغريد ..
رفيقي صالح الأعور
يبي يناظر هلال العيد ه

أنا ماقلت ياتغـــ ـ ـ ـ ـ

ــ بس ه


ترى هذا الحكي مْصْيبه

ـ وش اللي صار ؟ ه

ـ حرام تجرّح صيامك
بــ هـالغيبه

خذ شماغك وخذ ثوبك
وقل لي اغسله بكره
على فكره !ه
يا أحمد ليش ماحجيت الى هالحين ؟
ترى التسويف ماينفع
الا من جاتك السكرة ه

ـ ترى مليت هالسيرة ه
انا كم قلت لك بصبر
ومكّه كلها زحمه ه
وعالم مابها رحمه
عسى في الصبر لي خيره

*** وراح أحمد وصل شغله ***

ــ هلا ياحسين .. ه
بشّرني عن احوالك

ــ بخير ٍ طاب لي فالك ..ه
أقول احمد ..ه
سمعت انك ببتتزوّج
يابو " وجهين " ه

ــ وجعّ .. اقصر .. ه
من اللي قال لك يالشين ؟ ه

ــ سمعت وبس ..ه
ولكن ماتصوّرتك ..ه
أنانيّ .. و .. بهالنيّة ه

ــ ياشيخ احسن بي ظنونك
قسم ماهيب انانية
أبد والله ..
وربي كان قصدي يوم اعدد
أتّبع سنّة
نبي الله !!ه

2

"عندما تـُــقـلب الحقائق "

مشاهد

ــ شفت انا البارح
بريدك ياحقير ه
شفت انا كل الرسايل
والفضايح ..ه
والهوايل
ياصغير !! ه

شفت نثرك في تهاني
وشفت شعر في هدير
شفت أمانيك لـ أماني
وشفت اغانيك بـ أثير

شفت وعدك لـلهنوف
وشفتك ودك للعنود
شفت تهنيتك لنوف
وشفت تعزيتك خلود

شفت حلمك في بيان
وشفت لومك في هدى
شفت بيتك في بنان
وشفت كرتك في ندى

وشفت ميّ ..وشفت فيّ
وشفت هند . .وابتهاج

وشفت بيت ٍ فـ الرمال
وشفت دبلة " فالخيال "
وشفت صفحة ـ يانذل ـ مكتوب فيها
بالوهم " عقد الزواج "

واللي خافي ….

ــ بس كافي .. ه

بس كافي ..

ماهو ذنبي ياعبير
ان لك قلب ٍ صغير
بس انا اللي به سكنت

ماهو ذنبي ياعبير
ان لي قلب ٍ كبير
تسكنه عشرين بنت !! ه

3

" أقنعة الكتابة "

مشاهد

ــ الو : حصه

ــ هلاوسهلا

ــ قضيت مألفة قصة
ولا أحلى

ــ صدق والله ؟ وش العنوان ؟

ــ " زواج بن الفقر عباس
من أحلى بنت للسلطان " ه

ــ عطيني موجز القصة
عطيني بس لو نصه

ــ " قبل أزمان
سكن في ديرة المرجان
ولد محبوب
لطيف وطيّب وحساس
وكل الناس له اصحاب
واسم هذا الولد عباس
وكانت شغلته حطاب

وفي كل ليله يجي لأمه
ونفسه حيل منغمّه
ويرجيها تدوّر له
عروس تشاركه همّه

وفقره والحزن والجوع
وبعد اسبوع
صدر مرسوم للسلطان
يقول ان درّة الازمان

بتتزوّج

وتبي قيمة مهرها بيت
مابه بيت يشبه له
أبد في ديرة المرجان

وجو الحكـّـام والتجار
جو من كل هالامصار
كل ٍ طالب ٍ يدها
يسوقون الذهب والماس

أحد بيته من الفضة
وأحد بيته من الياقوت
وأحد بيته من الالماس

وفجأة بين هالعالم
دخل عباس ه
وطلب يد درة الازمان ه

وذهل هالناس ه
وصاح بصوته السلطان

ولكن مهرها بيت ٍ بيت عنك ه
يارمز المسغبة
والجوع
والإفلاس

ــ ولكن بيتها عندي بنيته من … ه

ــ من الياقوت والمرجان والالماس ؟ ه

ــ ولو انك تهكّم بي
بنيت البيت من كنز ٍ يفوق الماس
بنيت البيت من نزف الشعور
وثورة الاحساس ه

ــ وقالت درّة الازمان عطني البيت ياعباس ه

ــ خذي يادرة الازمان .. ه

أحبك كثر فقري والشقى والجوع والحرمان
………… أحبك كثر مابتّ اليالي طــــــــــاوي ٍ ظامي
أحبك كثر همي والالم والياس والاحزان
………… أحبك كثر ماغتالت يدين اهل الغنى احلامي

وقالت درة الازمان : ه

ـ يبه مابي ذهب ونحاس
ولا ابغى بيوت من ألماس
انا مابغى سوى قلب ٍه
حنون ٍ دافي ٍ حسّاس
انا مابغى سوى عبّاس .."ه

ـ وهذا موجز القصة ه
انا اسمع امي تنادي
فمان الله ياحصة .. ه

ــ هلا يمه ..ه

ـ هلا بك يادوا فوادي

ــ ترى جالك خطيب اليوم يالينه
حبيب وطيب وشهم
وكريم وسمعته زينه

ـ أنا اعرفه ؟

ـ تعرفينه .. ه

ولد هاله

ــ ولد هاله !! ه
أنا مابغاه
ولوك يوه
تبغينه !! ه
فقير وحالته حاله
وانا طبعي تعرفينه
أقيس الشخص برياله !!ه

4

  عندما تُـصنع النياشين "
من دماء المساكين "ه

مشاهد

ــ الو : وين العميد حجاب

ــ هلا بك ياللواء شباب
وش الاخبار..

ــ بسرعة داهموا يالله
ثلاث أوكار للإرهاب

ــ ثلاث اوكار ..ه
ياستّار !!ه
على أمرك ..ه

ــ بسرعة حضّروا عندي الملازم نور

ــ هلا بك يالملازم نور :ه

ــ هلا بك يالعميد حجاب

ــ بسرعة داهموا يالله
ثلاث اوكار للإرهاب

ــ ثلاث اوكار ياستار !!ه
على أمرك ..
انا طالع توصي شي
عميد حجاب ..

ــ في حفظ الله
ولاتنسى تصك الباب

***

ــ الو : أهلين رقيب حسين

ــ هلا بك يالملازم نور

ــ أبد ابغاك تاخذ لك
ثمانيا جنود ..
وتروح الحين
للمحدود
بسرعة داهموا يالله
ثلاث اوكار للإرهاب
ولا تنسى العريف : عقاب

ــ على امرك .. توصي شيّ

ــ سلامتكم ..

ــ سلامتنا !!

*** وعقب ساعات ***

ــ الو أهلا ملازم نور

ــ هلا بك يالرقيب حسين
وش الاخبار ؟

ـــ ذبحنا كل ابو الاشرار
ولكن العريف عقاب
وقع منصاب
وصالح قاتل باصرار
وصابه نار
وأما سرور
قتل منهم ثلاثة بس
جاه كسور
وأبو منقاش
في الانعاش
وعبدالله ..ه

ــ يكفّي بس
وطنا كلنا فداً له
عن اذنك يارقيب حسين
مدامي عندها موعد مع الدكتور
في دلة !!ه

*** ومن بكره ***

ــ الو : أهلاً عميد حجاب

ــ هلا بك يالملازم نور

ــ أنا مدري تصفحتَ الجرايد أو …ه

ــ وش القصة ..؟؟

ــ أبد فيها خبر منشور …ه

ــ وش نصة ..؟؟

ــ "ثلاث اوكار للإرهاب
تسقط في يد الامنْ
بقيادة العميد حجاب "ه
ومعه منشور
صورة لك
وصورة لي
وصورة للواء شبّاب !!ه

5

" لكل مقام ٍ مقال !!ه "

مشاهد

ـ فهمتوا الدر س ياشطار ؟

ـ عده تكفى لنا " ياستاد " ه

ــ تعب صوتي من التكرار
وكثر الشرح لك مافاد !! ه
وتوّ الدرس ماخلّص
بقى التقييم
وش اسمك ياللي في الآخر ؟

ــ أنا ابراهيم

ـ أبوك اللي موظّف في الادارة ؟ ه

ـ لا ! ه
ابويه يشتغل فرّاش فالدارة ه

ــ أجل جاوب ؟ ه


س من اللي قاد جيش المسلمين بموقعة حطّين ؟

ــ أنا ماكنت حاضر شرح
هذا الدرس يا" استاد " ه
مريض وصار لي غايب

 يجي يومين ه
ولكني أظنه
" طارقُ بنُ زيادْ " ه

ــ خطأ .. " ظنك " ه
ياوجه البوم ! ه
وترى اقرب لك المريخ
من نجحـَتك فالتاريخ
يابرهوم .. يافاااااشل ه

ــ وش اسمك ياللي في الاول ؟

ــ أنا خالد بن نواف بن فيصل ! ه

ــ  هلااااااا والله

  وش أخبارك عساك بخير ؟  ه
بعد إذنك انا بسأل سؤال صغيْر ه

س من اللي قاد جيش المسلمين بموقعة حطّين
صلاح الدين
هو والا
صلاح الدين ؟ !! ه

ــ جـ أظن انه صلاح الدين ه

ــ بطل .. أحسنت ياخالد
ولك خمسين من خمسين ..ه
ولا تنسى تسلم لي على الوالد !!ه

وتقبلوا فائق التحية والتقدير

أخوكم : أبو طارق

سبحان الله وبحمده .. سبحان الله العظيم


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

### مشاهد اجتماعية مموسقة ###

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول