مذكرات مخفه ..


وجه يطالع العنوان ويقول مهوب أنا .. مهوب أنا )
<- يرحم امكم صدقوه .. مايكفي أنه قزم يصير مخفه بعد؟! ..

لكن للأمانه ياجماعة الخير .. أنا هاليومين أمر بحالة نفسيه سيئة جداً جداً ..
لأني عشت طول عمري أعطي العالم نظرات واقول ..
[ مسكين مخفه .. يوووه مسكين على نياته .. يارجال زلبه سبيكه .. أنت حمار مع احترامي لك .. ماشفت غبي مثلك ] ..
لكن سبحان اللي يغير ولا يتغير .. لأني قبل يومين جاني واحد من ربعي ..
وقالي اسمع ياملف .. تراك مسوي ذيب وذبيب وخفيف دم ..
وانت أصلاً مخفه وماصل وحنا نماشيك عشان نطقطق عليك ..
بكيت بحسرة على عمري الضايع وأنا عايش بين الذئاب البشريه تنهش في لحمي ..
على أني كنت مستبعد أنها تنهش لأني شين لكن أنا الي اكتب الموضوع وأنا حر باللي اقوله ..
عقب البكوه قلت له .. وش دراك اني مخفه وغبي؟! .. قالي تذكر طفولتك وبتعرف ..
على العموم بدون مقدمات إليكم حكايتي الحزينة <- بدون مقدمات؟!

سلطان سلطان أبي ألعب معكم كنبيوتر .. أخوي يلتفت على ربعه عطوه أي يد مفصوله .. خلوه يسكت ذا البزر .. وفعلاً آخذ اليد وأنسجم وأتشقق وأنا ألعب .. عقب مايخلص أخوي وربعه لعب .. يطفون الكمبيوتر بدون مراعاة لشعور طفل قاعد يلعب ومسوي منسجم .. وكل الي علي أني اجدع اليد واروح اتفرج على مدرسة الكونغ فو همن يخلص واروح لأخوي يقالي بقلد حركاتهم .. وبطبيعة الحال عشانه هو الكبير أخليه يصفقني لين اصيح همن اطلع واخليه .. فعلاً أنا غبي .. لأني ما كنت مثل باقي المبزره اصدق شي واكذب شي .. لأ كل شي في أفلام الكرتون صدق .. حتى سالفة اني اغمض عيوني واحس بالضربة قبل ماتجيني .. كنت مقتنع أنها صدق .. واكذب عليكم لو قلت اني مكذبها الحين <- منيب مخفه ابد ابد .. لدرجة أني في يوم من الأيام ابلشت اخوي عشان اغمض عنده ويجي يطقني وأوخر .. ويقولي ياملف ياحبيبي هذي لعب .. هذي أفلام كرتون .. وأنا اقوله لأ أنا سويتها مع الشغاله <- حتى الشغاله تسلك له .. ويرجع اخوي يحاول يقنعني وأنا راسي يابس إلا تجي تحاول تطقني وانا بأوخر .. قالي طيب وياليته ما قالها .. كل الأحقاد والضغائن الي كان يكنها لي من يوم أنولدت إلى ساعته طلعها فيني .. وأنا مثل الأبله مغمض عيوني واصيح وألفلف يمين يسار .. لين طحت على الأرض وهو خذ ياتمزيع .. وأنا اقوله خلاص خلاص .. وهو يقولي هااااه صدقت ياكلب؟! .. هاااه اقتنعت ياقرد؟! .. وأنا للحين مغمض لين أغمى علي .. وصحيت وأنا في المستشفى ( باين ان اخوي ماقصر معي ابد ) .. معاناتي مع ذكائي لم تقف عند أي حد عفواً معاناتي مع غبائي .. لدرجة أني في يوم من الأيام قررت أصير ولد شطور وأحفظ أغنية البداية حقت النمر المقنع يقالي بكشخ بها قدام ربعي .. ولكن كالعاده أخوي مايخليني في حالي .. جاني وأقنعني أن الأغنية تقول [ لا يكون الموز فيها إلا للأبطال ] .. واقوله لأ ياسلطان [ لايكون الفوز فيها إلا للأبطال ] .. بكل بساطة يقول أنا الكبير وأنا افهم منك .. وفعلاً من نبل أخلاقي اقتنع واصدق .. مرت الأيام وحفظت الأغنية .. وناداني أخوي عنده ربعه .. وقالي غن لنا أغنية النمر المقنع .. اكذب عليكم لو ماقلت لك اني تشققت يوم اخوي ناداني .. لأني اخيراً حسيت اني بسوي شي يفاخر بي فيه قدام ربعه .. بدأت أغني لين وصلت المقطع الي يقول [ لايكون الموز فيها إلا للأبطال ] .. وما أن نطقت بتلك الكلمات .. إلا وربع أخوي غاشين ضحك .. وهو يقول ماقلت لكم ماقلت لكم .. وأنا لايعلو وجهي سوا إبتسامة عريضه .. لأني فسرت ضحكهم على أنهم سعيدين أن فيه طفل على قدي .. حافظ أنشودة قويه مثل ذي .. لكن بعد مرور السنين .. أكتشفت أن أخوي قايلن لهم .. أن عيارة ملف ببيتنا قرد .. وعشان اثبت لكم هالشي .. بناديه يغني لكم اغنية النمر المقنع وشوفوا وش بيقول .. أنا عارف أن حالتي يرثى لها .. لكن مابعد شفتوا شي .. أخوي ذا عقوبة من ربي مهوب أخو .. حدود دلاختي ياجماعة غير معروفه حتى الآن .. يعني فيه ناس واجد يتمتعون بالدلاخه .. لكن مهوب كل شي يمر عليهم وهم يضحكون ومايدرون وين الله حاطهم فيه .. أنا أصلاً ما ادري هل أنا كنت دلخ .. ولا أخوي وصخ ونذل لدرجة كبيرة .. لأني اذكر في يوم من الأيام كان عندنا رحلة مدرسية لملاهي الروضة .. فستأذنت الوكيل أني اجي من البيت للملاهي بدون ما اجي للمدرسة .. لأن بيتنا قريب من الملاهي مره مره .. فقالي أوكي ياملف .. لكن الساعه ( 9 ) تصير هناك ولا محنب مدخلينك .. فعلاً جا صباح ذاك اليوم فقالي أبوي خل أخوك يوديك .. قلت طيب .. خذاني أخوي وحطني بالمدرسة ومشى .. عقبها بساعتين ما ادري إلا أبوي في وجهي يتفل علي ويسفل فيني قدام الله وخلقه .. وأنا خانقتني العبره خبركم اتهزئ على شي مدري وشو .. سحبني ابوي مع يدي ووداني البيت .. قالي ارق فوق وبجيك .. رقيت وألقا أخوي قاعد في الصالة ومجبس يده .. ويرقى أبوي مع خيزرانه .. وقالي سؤال واحد ياقرد .. ليه تلفلف الدركسون وأخوك يسوق لين صدم؟! .. ( وجه ملف مابقى تعبير ماطلع فيه ) .. فعلاً ياجماعه اختلطت مشاعري لدرجة أني ضيعت ماعرفت وش اسوي .. هل أصيح من الغبنه؟! .. وإلا أضحك على لعانة أخوي؟! .. وإلا انكر شي ماسويته؟! .. وإلا اتأسف واثبت دلاختي؟! .. قالي أبوي يالله رد ياحيوان؟! .. مر أخوي من جنبي وهمس بأذني قائلاً .. قله انك ماقصدت واخليك تلعب معي بالسوبر نينتندو .. وبكل دلاخه .. قلت ما دريت أن فيه سيارات بالشارع .. هذا آخر شي اذكره لأني تلزخت بالخيزارنه لين بغيت اموت .. وما اخفيك سراً ( ترى أخوي ما لعبني نينتندو إلى الآن ) .. كني بكم تقولون اسكت خلاص تقطعت قلوبنا .. عاد وش اقول وأنا الي قاعد انقلكم معاناتي .. صدقوني اني احس ان الكيبورد مهوب مطول .. على نهاية الموضوع برميه بالزباله .. لأنه غدا كنه بحر من الدموع الي تقوطر عليه .. تصوروا ياجماعة الخير .. مره من المرات كنت قاعد اتفرج على اخوي وهو يلعب كمبيوتر وطبعاً هذا الطبيعي .. قلت له سلطان ممكن تدق لي على رقم بيت جيرانا ابي اكلم محمد اقوله يجي عشان نلعب انا وياه مراجيح .. قالي انقلع انقلع منيب فاضي لك .. وبصراحة نشبت له لين وافق الله يجزاه خير .. جبت له التلفون ويوم جا يدق .. قالي اسمع يمكن يرد عليك عمي ناصر .. وبيحاول يصرفك عشان خالهم جايهم من حايل .. لاتطيع انشب له لين يعطيك محمد طيب؟! .. قلت ايه طيب لاتوصيني اصلاً انا طفشان مره مره .. رفع السماعه ودق على ( 999 ) وعطانياها .. ورجع يكمل لعب بالكمبيوتر .. ردوا علي قلت .. ألوو عمي ناصر؟! ، كيف حالك؟! ، شخبارك؟! .. ممكن أكلم محمد؟! .. قالي يا بابا ياحبيبي لاتدق على هالرقم مره ثانيه .. قلت لأ أنا ابي محمد بس شوي بقوله شي وخلاص .. قال ياشاطر لاتدق على هالرقم مره ثانيه .. ونشبت للعسكري وقعدت أنا وياه في جدال ( هات محمد رد محمد ) .. لين قالي ناد ماما ولا بابا .. ناديت امي وكلمته واعتذرت ولفت علي .. قالت داق على مين انت .. قلت جيرانا ابي محمد .. هزئتني أمي لين قالت بس .. وبطبيعة الحال أخوي فاقعها ضحك وعايش جوه .. والله انه ابن كلب .. إلا على طاري ابن كلب .. ذات مره كان رايق وقالي تعال ألعب معي سوبر ستار سوكر ( شريط كورة ) .. قلت طيب وقعدت ألعب ألعب .. لين جاب قول قلت له والله انك فنان يا ابن الكلب .. لف علي قالي وشو؟! ، وش قلت؟! .. قلت له والله انك فنان يا ابن الكلب .. فجأة ماطلع لي إلا غباره .. همن رجع لي مره ثانيه .. قالي ارق فوق ابوي يبيك .. رحت لأبوي قلت سم يبه؟! ، تبيني اهمزك؟! <- على نياتي بقووه .. قالي اخوك ابن وشو؟! .. قلت ابن كلب .. قالي أخوك سلطان ابن كلب؟! .. قلت ايه فنان الكمبيوتر ابن الكلب .. قالي من ابوه؟! .. قلت أنت ابوه وش هالسؤال يايبه؟! .. قالي وهو وش؟! .. قلت بلا دلاخه عاد .. هو ابن كلب .. قال أنا أبوه وهو ابن كلب ، يعني أنا كلب؟! .. قلت يوووه توني ادري ان معناها كذا .. تسطرت قليلاً لكن اني صرت متعود ولله الحمد .. ( أنا لا اعلم هل هالدلاخه الي فيني مرض مزمن وإلا وش القصه؟! ) .. لأني بعد هالسوالف الي صارت وبعد ماكبرت كم سنه .. وصرت أمون على اخوي وصرت مؤهل أني ألعب معه كمبيوتر يومياً .. ما زلت دلخ ومخفه .. تصدقون المفروض أني اغير يوزري من ملف شقراء إلى مهف شقراء .. أعتقد راكب علي بقوه .. لأني ماتوقعت اني دلخ لدرجة .. أني ألعب مع اخوي مباراة بالسوني .. والنتيجة (2 – 1) لي وحنا بآخر المباراة .. اتفاجئ أن أخوي يحط ستارت ويقول ثواني بروح للحمام عزكم الله .. اقوله طيب رح .. طبعاً باب الغرفه اقصى يمين الغرفه .. واسلاك السوني اقصى يسار الغرفة .. مدري وش الي يخلي أخوي يمر من عندها ويطق السلك برجله لين يطفى .. همن يروح يدور عند الحمام ويرجع .. ويقول يووووه طفى؟! ، من الي طفاه؟! .. وأنا أرد بدلاخه مدري من الي طفاه .. يقولي خلاص خلاص لاتزعل نعيد المباراة .. شفتوا ياجماعة أني حمار وثور وكل الحيوانات الي ماتعرف تفكر راكبه علي .. تصدقون خويي يوم يقول اني مخفه أنه صادق .. وشلون توني استوعب هالشي .. ما عاد لي خلق اكمل .. لأني اخاف اكمل همن انتحر من ضيقة الصدر .. اخاف اقولكم وش مسوي فيني اخوي الأسبوع الي راح همن تقنعوني صدق اني اذبحه .. إذ انه مسوي لي بلبلة في حياتي .. لكن ابشركم ياجماعة الرجال اعرس .. واخيراً صرت انا ذيب البيت .. وكل ما أتمناه أن الله يرزقه بعيال انكد عليهم مثل ما كان ينكد علي .. وتكفون طالبكم طلبه .. لحد يوصله علم اني نزلت موضوع عنه .. اخاف يجي ويقول احذف الموضوع .. ومن طبيعة دلاختي بقوله ابشررر ..

مايستفاد من الخمبقه الي فوق ..
1- لاتسوي ذيب همن يضيق صدرك لادريت أن ما وراك إلا الضعوي ..
2- أفلام الكرتون كلها نصب مايمشي إلا على المخفات ..
3- بعض الأخوان وصخين جداً انتبهوا منهم


تعليقات 67

  1. ياخي الله يفتح عليك ويرحمك ويرحم والدايك والله بموت من الضحك يسلموا حقيقه:$:$

  2. شي مبكي أكثر من أنه مضحك 🙁 ونقول بعد ليش نص عيالنا مكبوتين!!! عموما مبروك لأخوك بس الله يعين مرته على برائته اللي تقوطر :$ وعقبالك تلقى اللي تعوضك حنان وتحوشك عن الانتحار كل مافكرت بأخوك 😀

  3. صراحة اخوك مرة انواع النذالة كيف كنت صابر بس المهم انة فارق بس 999 رهيييييييييييبة مرة حسيته مستمتع بس هو اكبر منك بكم

  4. .. تصدق لو قلت لك نفس اللي يصير لك يصير لي .. مدري وش السبب هل صرنآ طيبين بزيادهـ ..؟ أو أن الناس يستغلون هالطيبه لـ/صـآلحهم ..؟ . . . وربي أحيآن التفكير يخون .. ويوقف …!!

  5. :D:D:D:D >>>هذا المستخدم ميييييييييييت ضحك والله انك يامهف اوه اقصد ملف:D خطيييييييييير صرااااااحه اخووووك ابووو لنذاله اشك انه به عرق نذاله هع هعاااااااااات وانته تنرحم لصراحه حالك يرثى لهااااا شنو هالذكاء الخارق فيك 😀 بس تبي الصدق موووووووتني ضحك الله يوسع صديرك بالعافيه بانتظار جديدك وذكائك الالمحدوووود هعاااااااااااااااات

  6. والله قلبي ألمني 🙁 أسئل الله أن يبعد عنكم هذا الداء مع بقاء طيبة قلبكم

  7. الله يجبر مصيبتك الحال من بعضه 🙁 يوم قريت قصتك انك قصير حسيت انك تكلم عن واليوم بديت اشك انك انا اذا صرت نايم اقوم واكتب موضوع

  8. والله اني اضحك واصيح ياخي رحمتك مادري ليش بس اتمنى ان الاكلام مايكون صدق كلة لان عليك اخو يهودي الصراحة هبااااااااااااااااااااااال الله يعطيك على قد نياتك ويرزق اخوك عيال تطلع ريحتهم لا وصيك والله حلال

  9. عليك سالفه ضيعت من عمري 45 ثانيه اقرا 7 ثواني اكتب الرد ثانيتين امسح الايميل ياخي لو اني منك ترسل لابو نواف ايميل عشان يمسح السالفه الحلوه ولا يغير الموضوع الى( للدلاخه عنوان ) صدق انك دلخ والله ان اخوك ماقصر فيك ..:~

  10. بصراحة شي يقهر .. بس انت لازم تعرف ان 99% من الناس لهم ذكريات لها تاثير سيئ عليهم من ايام الطفولة بس الناجح منهم اللي يقدر ينسى الماضي ويفتح صفحة جديدة .. (الدين التسامح).. حاول أن تقلد ذلك الصحابي الجليل الذي بشره رسول الله – صلى الله عليه وسلم – بالجنة، ولما سأله أحد الصحابة عن فعله قال: ما هو إلا ما رأيتَ، غير أني لا أجد في نفسي غِلاً لأحد من المسلمين..صدقني احنا اللي رح نستفيد اذا سامحنا ونسينا..رح نستفيد انه مارح نتاثر من اللي صار ونفسياتنا تصير ممتازة ونقدر نستمتع بحاضرنا وباللي باقي من عمرنا لان الدنيا كلها قصيرة مابالك باعمارنا الصغيرة اللي تضيع اغلبها بالنوم والاشغال والشيخوخة والامراض والتعب فمايبقى من الوقت الا القليل حرام نضيعه بحسابات الماضي ..

  11. ياخي موضوعك بطل اهنيك عليه ورى موب لحالك مخفه .. فيه ناس كثير مخفاات< ابد ما يقصد نفسه

  12. مع إحترامي لك ولعائلتك الوم والدك ووالدتك الذان ربو اخوك على هذه الطريقة فهذا تقصير من الأب والأم:(

  13. وهـ بس ياربيه ,, وش ذا الحزن 🙁 متأكد ان اخوك شقراوي بس !! ماش ما اخبرنا ياعيال شقراء بهالنذاله :~ يالبيه يا انت بس ,, كلك ملح ماعليك منهم ..

  14. ملف ,,,معقول تكون سوالف حقيقيه ؟؟ والله انك حبيب وطيب وقلبك ابيض وعلى نياتك واتمنى الناس كلها تصير مثلك بس وانا اخوك حاول يكون عندك فطنه شوي وبصراحه حسيت انك واحد مكبوت ومظلوم ومقهور من زمااان وتبي الناس تفزع لك وترحمك وتواسيك لا خلهم عنك وخذ حكمتي (اذا لم تكن ذئبا اكلتك الذئاب ) واذا تبني أأدب اخوك قلي والله لأربيه كلش إلا ملف شقراء الله يخليه لنا ولا يحرمنا منه

  15. أخوي ملف شقراء ، أولاً هل الحكم على نفسك بأنك مخفة حكم سليم وفي محله . يقال الظربة التي لاتقصم ظهرك تقوية . أنت فكر بها المقولة وأجمع ثم أطرح وأستخرج النتيجة . الحياة مدرسة من لم يستفد منها عاش أبد الحياة همجياً لايقدم ولا يؤخر قضية أنت مخفة صورة تبنيها الناس لسوء أنفسهم ونقص يستترون خلفه ، وكثر أؤلاءك هم . ثم هل تعتقد أن ماكان يصنعه أخوك غير الطيش .

  16. قال تعالى ( لقد خلقنا الانسان في كبد ) كبد : تعب ونصب اخوي ملف انا اول مرة تقريبا اقرا موضوع كامل جذبني موضوعك اخووي الانسان اذا اقنع نفسه انوا غبي بيكون غبي او صدق كلام ان الناس انوا غبي , ذكرتني بقصة نسر اللي باض ويوم باض طاح بيضه بالغلط في عش الدجاج ففقس وعاش مع فرخان الدجاج وكبر معهم ولما بغا يطير قال انا ما اعرف وقالوا له فراخان انت ما تعرف تطير والنتيجة انوا صااار مثلهم ما يطير .

  17. عموما وش رايك تكون صديقي :$ عاد تصدق بيتنا جنبك حنا ساكنين عند الهيئه كانك تعرفها المهم تكفى الله يعدل طيابتك صر صديقي

  18. والله اني من قوة ما تقطع قلبي عليك 🙁 بسبب نذالت اخوك يوم قريت ذا الكلام (نشبت له لين وافق الله يجزاه خير ..) انقهرت ليه تقول الله يجزاه خير ههههههههههههههه

  19. معليش اخـوي ملف .. انت الي فيك برائه وطيبة قلب بس اخـووك مو بس نذل قسم بالله النذاله شويه عليه امـا يوم يقول لأبوك انك انت الي تلفلف بالدركسون لحد ماصدم طيب ابوك مافكر انك انت ماجاك شي وان اخوك بس المصاب يوووووووووه الله يعظم اجرك قسم بالله جتني الصيحه

  20. ضحكتنيييييييييي,, اما عليك اخ,, اعوذ بالله ياشيييييخ من وين جايبينه!!! المشكله كل مررره انت اللي تروح فيها!! كسرت خاطري بسالفة السياره والملاهي! حسيت ودي اسطر اخووووووووووووووووك سلطانوووه اشكرك صراحة

  21. السلام عليكم موضوع من جد رهيييييييب … خطيييييير….فظييييع…. وربي استانست وأنا اقرا من أوله لاخره ضحك.. حركات أخوك مب صاحيه خاصه سالفه (ابن كلب) قريته مرتين ومازلت أضحك . هذي المواضيع ولا بلاش ماشاء الله بديت بدايه قويه خاصه بعد موضوعك ذكرياتي يوم اني قزم وهذا من جد خطير الله يوسع صدرك بالعافيه. ولاتحرمنا من جديدك.

  22. خخخخ يقطع ام النذالة ياشيخ وقسم بالله عليك اخو النذاله والله اني ارحمك بس ممكن تجاوب على السؤال كم الفرق بينك وبينه في العمر

  23. اخوي ملف شقراء مذكرات حزينه وتقطع القلب بس ماشاء الله عليك من جد قلبك طيب ومتسامح ودليل على اخلاقك الطيبه قال الرسول صلى الله عليه وسلم((احسن الناس اسلاما احسنهم خلقا)) الله يرزقك ويسعدك ويوفقك ويعطيك على قد نياتك امين يارب.. من جد حبيتك حسيتك اخوي والله…

  24. وقسم قسمات انك تنرحم مع هالكلام اللي كاتبه 🙁 بس السالفه مب دلاخه .. انت تتعامل مع اخوك بنية صافيه .. وقلبك ابيض.. وكلنا لنا مواقف تقهر مع أخوانا .. بس لاتعيش عالماضي ..~} وانسى .. وخويك ذا مب خوي .. ماعليك منه ..ويمكن منقهر لانك طيب بزياده وهيك 😀 طحيااتي 😀

  25. خخخخخخخخخخخخ والله لو انا مكانك كان ذابحته من زماااااااااان نذل من جددددددبس حركة 999 خطيرررررررره وعلى فكره عندي نموذج منكم الاثنين مخفه ..ونذل بس المخفه اللي عندي يختلف عنك ان عنده ردة فعل مو سلبي مثلك… بس من جد ذكريات جوناااااااااان .. يسلموو

  26. بصرااااحه حركة 999 ذكرتني باختي يوم تدقلي على المطافي عشان اكلم صديقتي وانا صغيره 🙁

  27. :>أول شي أهنيك عالموضوع وثاني شي أقول أن اي واحد يحسب ان انت مخفة هو المخفة لأن هالموضوع ما يكتبه إلا واحد ماشاءالله تفكيره وخياله مرة كبيــــر؛؛؛ وصراحة جد أول مرة أقرا قصة بهالطول بس قصتك مررررررة حلوة:~

  28. 😀 ياحلوها الدلاخه عليك انا اعرف ناس كثيرين دلوخ في الحياة اليوميه لكن بالدراسه عباقره لكن اذا انت موب عبقري فالله يخلف على راسك ويرزقك بنت حلال ذكيه عشان تسوي موازنه لحياتك واخوك الحمدلله انه ما يقرب لي واقولها من قلب بس حاجه حلوه انك اخيرا اكتشفت نفسك

  29. اول شي : السلام عليكم ورحمة الله وبركاته.. ثاني شي : صراحه اخوك واحد نذل ليش يسوي كذا … والله ان تسبدي تقطع عليك …. صدز (صدق) اني منقهره من اخوك … ياليتي عندك والله ما اخليه لين يعض الارض … مع احترامي له.. بس هوبالاسلوب هذا هو دمر شخصيه طيبه اللي نادر ما توجد في هالزمااااان … اختك مجموعة شوق(عشقي اليوفي)

  30. السلام عليكم 🙁 والله قصتك صراحة محزنة بشكل كبير جدا جدا جدا :$ أنا أعترف إن أخوك وصل لحد من النذاله مالله به عليم , لكن هذا كله أصبح شيء من الماضي , واللي يفكر بالماضي بيتعب , فخلك بيومك ومستقبلك , أما الماضي خله ورى ظهرك , صحيح إن مثل هذي المواقف صعب تنساها لأنها مثل الثقب بالجدار مستحيل يزول , لكن حاول إنكن تتناسى إلين ما تنسى ….. أنا خويي قال لي كلمة حلوة , قال لو بتسمع كلام خلق الله كله بتتعب , وخصوصا لو كان الكلام من حثالة المجتمع . خذ الكلام اللي يفيدك بالمستقبل , والكلام اللي يعجبك , والباقي طنشه وبالنسبة لصاحبك اللي قال لك ذا الكلام . أنا أجزم إنه أخلاقه في الحضيض , لو واحد عنده ذرة من الأخلاق كان جاب ذا الكلام على الأقل بطريقة غير مباشرة اللي قالها لك . في الأخير أقول لك .. لا تهتم بالماضي , وفكر بمستقبلك . وحثالة المجتمع لا تطق لهم خبر …….. 8) أخوك الصغير 8)

  31. أنصحك بسماع شريط أساء إلي وشتمني كيف أنتقم منه تلقاه في التسجيلات الإسلامية

  32. ههههههههههههههههه هههههههههههههههههههه هههههههههههههههههههه : : لا تقطعنا من مذاكراتك : :

  33. يقوولووون من دقك حبك اكيييد اخووووك موو يحبك وبس الااا قاااتلك حب خخخخخخخخخخ >>لوكان ذا حب مااا ابي ان حب هههههه موضوووع جباار وننتضر الافضل منه

  34. مرحبا اول شي اللى فيك مو دلاخه ولا مخفه على قولتك الا طيبه وحسن نيه لانك انت صادق مع الناس وتتعامل معهم بطيبه تفكر كل الناس مثلك بس الناس عكس كذا ولا يضيق صدرك ولا تتكدر ولا شي ولا تحط العيب فيك العيب بأخوك مع احترامي ماقولك انتحر ولا اذبحه بس لازم توقف بوجهه وتوقفه عند حده ومافيها شي لو تمسك ابوك وتعلمه وتفهمه على الاقل يوقف احد بصفك وهاالتعامل مع الناس بطيبه وحسن نيه ماينفع بهالوقت للأسف ان ماصرت نذل وخبيث ماتمشي مع هالعالم والله يعينك على اخوك وعندنا وعندك خيرر فمان الله

  35. قطعت قلبي … بس من جد يعني اخوك وراح يضل اخوك صح ذكرياتكم سيئة بس يعني مايسير تكرهوا بعض خصوصا اللي فوق كلهم لبش ويحرضوك تكره اخوك

  36. أخوي الحل عندي روح البقالة واشتري بكت دخان او حطه في مكان خاص بأخوك أو قول لابوك انك لقيته عند اخوك

  37. :(ياخي كسرت قلبي انت بس علمني ونا اجيك 550 ددسن هذا قوية:$ هذا ماينسكت عليه هذا فيه قبيال:~:~

  38. والله وبالله يا ملف اني عايش حالتك الحين من نذالت اخوي 🙁 وبعض دلاختي:( انت الحين افتكيت منه وراح تزوج الله يوفقه 🙁 لكن الي معي توه بادي الجامعه:( وربي ما في مثله بالنذاله وسالفت الشرطه والله انها مسويها فيني:( مو لد الجيران ولد خالتي 🙁

  39. ههههههههههههههههههههههههههههههههههههههههههههههه ياخوان الرجال يبي يوسع صدوركم وانتم تواسوونه على بالكم صدق هههههههههههههههههه والله ياملف انك رهيييييييييب تسلم ايدينك عالموضوع الرائع والممتع تحياتي لك

  40. :$هههههههههههههههههههههههههههوش ذا اخو ولا عدو هذا الكلام من عام الفيل هههههههههههههههه:$

  41. :(ذكرتني بمعاناتي مع اختي لما كنت صغيره عذاااااااااااااب معها لمين تزوجت والحين ع كثر المواقف الشينه بيننا حتى تصور لماكان يجي امتحان وهي اللي تتولى تدريسي واخااااااااااااف منها موت وبمااني مثلك دلخه الرعب يزيد دلاختي تصور كنت اخاف من تهديد الاستاذه وتقول حافظوا ع اوراق المراجعه وهي من زود مالاعت كبدها من دلاختي شقـــــــــــــقت الاوراق 🙁 وانا صرت بين رعبين هي والاستاذه واذكر دايم تعيرني بكلمه تخليني اصيح :(واقول يارب هاالعياره تصير بعيالها بس المره تزووووووووووجت وجابت كتاكيت ياخذون العقل واستغفر واتوب يوم اقول يارب الكلام اللي تعايرني فيه يجي بعيالها والحين هي من احب واعز خوااااااااااااااااااااااااااااااااااااااااااااااااتي والماضي ورى ظهري رميته ماانسى لها موقف باالحيل طير عقلي يوم شرت لي جزمات يعزكم الله وجزماتي متقطعه ولا قلت لااحد من جد سوت فيني خير عساها تلقاها بيوم الحساب كان ذاك اليوم شي ملــــــــــــــــــــــــــــــــــــــــــــــــــــــــــــــــــــــــــــــف شكرااااااااااااااااااااااااااااااااااااااااااااااا ضحكتني وصيحتني :D:(

  42. أول شي أحب اشكرك كل اللي ردوا وواسوني .. وأحب أشكر كل اللي ردوا وقاموا يضحكون على معاناتي هههههههه .. اللي صدق تضحك وتخجل بنفس الوقت .. من جد مهوب أخو ذا .. وشكر كبيرررر لكل من مدح برائتي .. واقوله صدقني أنك صادق .. أنا بريئ جداً والله ما ئتلتوش يا باشا

  43. إهنيـك ع الموضـوع < حقيقـه موضوـع رـآئع ودللاخـه برئه < قسسم إنـأإ كنت مثلك عندي أخو لعن جدفي > كـأإن يعطيني ريموـوت التلفزيون ويقوول أنت سيد العبه < يالعـن إومه كرهـني بـ الكمبيورتر كلـه < بس اللـه لا يوريك إنوـأإع التسسليك إذا تحمست مع العبـه < يقول أنت احسن وأحد < وانا وقلـتي أسسوقها في رجا الله < ومدري هو فيني ولا في الخيششـه . تقبـل سسمـأإجيتي 🙁 < يـأإلعن إوةم الفيس هذ1 إحسه زلآبـه هههه

  44. مرحبا الحبيب مشكور علي هالايميل الحلو والرائع مو كل حد فينا عاش طفوله حلوي.. او مو كلنا متل بعض لكن اريد اسالك سؤال مهم… انت فعلا بعدك حاقد علي اخوك؟؟؟ ولا من باب المزح والفرفشه كتبت هالايميل؟؟؟ بعتقد انه لازم ما تحقد لانه اكيد هو كان يحبك ومن شان هيك يبا يمزح وياك ويعمل مقالب فيك… المهم موضوع حلو ومقالب احلي بس المهم لا تسوي هالشي باولادك ان شاء الله..

  45. قسم بالله ان دموعي تحجرت وانا اقرى القصة..تحزن من جد… جالسه امسح دموعي واقرى…:( ورب البيت هذي طيبة قلب مو دلاخه……الدلوخ هم اللي مايعرفون يتعاملون مع صغير الا بالضرب.. ورب البيت اني رحمتك وحبيتك ياملف….احسك مثل أخوي.. الله يوفقك دنيا وآخــرة..ويرزقك الزوجه اللي تسعدك وتنسيك كل اللي راح…وتعطيك الحنان اللي ما عطوكياه…… ويهدي اخوك..

  46. بالنسبة للي يسأل كم بيني وبين أخوي .. أقولكم بيني وبينه ست سنوات .. وتراني منيب حاقد عليه .. بالعكس الآن علاقتي معه قويه جداً .. رغم ان فيه بعض مواقف النذاله اللي نسويها على بعض :$ .. لكن يظل أخوي واعزه واقدره واحبه .. ( أن كانك تقرا كلامي ياسلطان لاتصدق تكفى ههههههه )

  47. مع احترامي لك اخوك موب نذل قليله فيه هالكلمه هههههههههههههه وانت موب دلخ وبس مافيه مصطلح علمي يطابق لتصرفاتك ..:~ الله يرزقه الذريه الصالحه ..ويخليه لكم .. ويرزقه ولد مخفه علشان تهبل فيه ..:~ أبدعت بطرح المذكرات ..

  48. وآلله آنـك ذيب ولـد ذيـب واللي يقول لك هذي دلاخـة فهو نصآب خخخخخخخخخ آجل تغمض عينك وتنتظر البقـس ههههههه وش رايك تصير اخووي يومين بس آتدرب عليك وآرجعك هههههههه قهر ما عندي آخـو آصغر مني على شآن آتدرب علية مثل آخوك ههههه

  49. ههههههههههههههههههه ياربي مت ضحك تخيلت شكلك وهم يطفون الكمبيوتر وانت تلعب بالريموت المفصول رحمتك ههههههههههههههههههههههههههههههههههههههههههه

  50. :$:$ امتعتنى صح ان البقاله اللي جمب بيتنا خلص مستودعهم من الكلنكس بعد هالايميل بس الصراحة مضحك وفللللة ننتظر جديد معاناتك

  51. السلام عليكم يا ملف :::: انت فوقك واحد :~:~ انا فوقي ثنينB B صح اخوك به لعانه اخواني عد وغلط لكن انا بما اني الصغير ارد الصاع ثلاث(( صيعان )) >> مدري كذا صح المهم انت اكيد لك مقالب عليه ننتظرها العدد الجاي ::: ونشوف من العن انت والا أخوك؟؟!! ههههههه

  52. اووووووه اووووه تقريبا انا مثل سالفتك بس مع المجتمع مو مع اهلي لان عارفين ان هذي طيبه مو سذاجه والا غباء …. لكن مااقول الا الله يخلف على هالناس تفكيرهم الطيب حساااس= دلخ

  53. هههههههههههههههههـ خلها على الله ياما تشيطرو علينا خصوصا عيال خالي .. هم الكبار وانحن البزارين اما التقليد فـ انا مقلده موسى حاطه لي قفار ولابسته على يدي ومسويه انها تضيء نووور خخخخخ وكونفوو ياما سطرت ولد خالي B الا قام يتهايط علي والله لو قالو لي من تشكرين بعد امك قلت مدرسه الكونفووو فلونه ياما قلدتها :$ ما خليت احدن ما قلدته ولا اغنيه افلام كرتون ما حفظتها 😀

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مذكرات مخفه ..

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول