مختارات ولقاءات شعرية مميزة


السلام عليكم ورحمة الله وبركاته
كيف الحال قروبنا الغالي؟
موضوعي اليوم نقدر نقول عنه تقرير على قدي..
يعني معليش لو فيه كان احد يشوفه غير مقنع او صغير او ماعندي سالفة
لكن انا حبيت اعمله بحكم حبي للشعر والشعراء
وان شاء الله ينال اعجابكم

الموضوع كله يتكلم عن الشعر والشعراء..وتقرير بسيط عن كل شاعر
اسمه – لمحة عنه – عرض لأحد اعماله – صورته (اذا حصلت) – كلمة منه لأبو نواف و لأعضاء القروب الطيب – ديوانه – مقابلاته – موقعه الشخصي(اذا حصل) او صفحته الشخصية في احد المواقع
وان شاء الله يكون الموضوع تحت اعجابكم
واتقبل النقد بصدر رحب<–مالت بس
وعلى فكرة..ترتيبي للشعراء بحسب اللي رد اول وجاب لي المعلومات…لعلمكم فيه ناس للحين ما جابت خبري..خخخخ
لا امزح لكن الموضوع ما كمل
يعني بإذن الله انتظروا جزء آخر


الشاعر : خالد حميد الذيابي العتيبي

عرفنا عن نفسك
الاسم : خالد حميد الذيابي العتيبي
العمر : 29 سنه
المهنه : مهندس تخطيط عمراني
السكن : المملكة العربيه السعوديه مدينه الطائف

نبذة عن مشوارك الشعري..؟
بدأت الكتابه منذ تسع سنوات تقريبا والنشر بوقت واحد بعد تخرجى من الجامعه مباشره انتمى لعائله شعريه عريقه فوالدى هو الشاعر حميد الذيابي احد ابرز الشعراء بدوله الكويت والسعوديه على حد سواء نشأت بدوله الكويت نظرا لعمل والدى بها وانتقلت لدراسه الثانويه العامه والجامعه للرياض , نشرت بالعديد من المجلات والجرائد الخليجيه والسعوديه على وجه التخصيص وأقمت العديد من الامسيات وشاركت بالعديد من اللقاءات الاذاعيه والتلفزيونيه بعدد من المحطات نزل لى عدد من القصائد بشريط اسلامى قبل ما يقارب الاسبوعين والشريط بعنوان قوافى تحت اشراف تسجيلات اضواء الرباط الاسلاميه ولى عدد اخر سوف يرى النور قريبا كما سجلت عدد من اللقاءات التلفزيونيه لقناة اللساحه وقناة الصحراء وسوف ترا النور خلال الايام القادمه كان تواجدى الاعلامى خلال الخمس السنوات الاولى بشكل مكثف ولكن خلال الاربع سنوات الاخيره ونظرا لكسلى اصبح تواجدى بالنت أقوى .. اتواجد بأغلب المنتديات الشعريه البارزة منها على سبيل المثال لا الحصر منتديات المرقاب والنداوى وشظايا ادبيه ومشاهير العرب وغيرها

سمعنا من عذب كتاباتك…

النص الاول بعنوان : أشتقت اضمك
اللى وداعك فيه للحزن مضمون

 ما قلت لى وشلون بنسى عذابك
عطرك وبسماتك بطيفي يمرون

 وأعيش جو الذكريات برحابك
كني عقب فرقاك للطيف مسجون

وإن جيت أبنسى الطيف عيا صوابك
سببت لى بالبعد قرحه وقولون

ومشاكلٍ بأسباب حضرت جنابك
خليتنى من دون مذهب وقانون

 ياليت شيٍ قد سطابي سطابك
حتى تعيش العمر بإحساس مطعون

بإحساسي اللى قبل مده هنابك
يا كيف تنساني وأنا فيك مفتون

وتنسى فوادٍ بالغرام أشتقابك
لاعاد تنشد ضاقت الارض والكون

بالهاجس اللى فى دروبه سرابك
الناس تعشق بس ماهوب هاللون

سرقت قلبي ما حسبت لحسابك
من دون تنشدنى عن الشوق من دون

ناظر لحالي وأنت تعرف جوابك
أشتقت أضمك لاجل أعلمك وشلون

جرح المشاعر نازفه فى غيابك
وكيف الزمن من دون غيبتك مجنون

وكيف الفواد يجيبنى عند بابك
هذا الفراق المر ملعون ملعون

لانه خذاك وعن عيونى غدابك

النص الثانى بعنوان: لبيه

المترف اللى كل ما زان جوه

يتلنى بين الرجا والمشاريه
يقول أنا طفلٍ على الحب توه

وأقول أنا قلبٍ يبي طفل يحييه
يا ناهبٍ قلبي فدلك لهوه

ضمه على قلبٍ يحبه ويغليه
وإلعب وخرب ما تريده بقوه

ما دمت نبض القلب وشلون تذيه
قلبي فداك اللى تبي فيه سوه

وأنا بموت بكل شيٍ تسويه
وأنته تصرف خل عندك جروه

وخدرنى بقولك ليا قلت لبيه
فكرى معك لاجيت يعلن خلوه

وقلبي معك ليا مكانٍ توديه
شاعرك لاجاء الضيق يعلن دنوه

يتذكرك حتى السعاده تباريه
إترك شعّرك يعلمه عن هدوه

وإطعن بعينك كان ودك تصحيه
بيني وبينك بالمشاعر عنوة

وإحساسك الشاعر وحرفي قوافيه
والشاعر اللى فيك ماهو مفوه

يترك مجال الشعر لايشتقي فيه
فى طلتك غيث الغمام وعلوه

والسحر والتأثير والورد والتيه
الذوق فى هرجتك يأخذ سموه

والزين كنك من وصوفك تغذيه
والعطر ماهو عطر يحسب مشوه

لانك بعطرك لاتعطرت تعميه
هذا القمر وألا أنت تعطيه ضوه

ولو تشتهى تطلع مكانه وتلغيه
ما ألوم قلبٍ فيك معلن غلوه

صحيت فيه الشوق وأعذب معانيه
واليوم أنا طالبك لاأجل الاخوه

ولاأجل فوادٍ منحرم من محانيه
أعلم ترا بعدك فوادى عدوه

وأكره كره الزرق وأمل طاريه
وأحرص دخيلك خل عندك مروه

منهو يحبك كيف قلي تخليه

صــح لـسانك

كلمة توجهها لأعضاء قروب بو نواف
الحقيقه اولا اشكر الاخت
(.!.Kit..Kat.!.)
لجهودها ولمتابعتها واشكر الاخوان القائمين على قروبات ابو نواف والتى لها ذكر واسع الانتشار لما تقدمه من ماده طيبه واتمنى ان اكون ضيف خفيف الظل

كما يسرنى تلقى نقدكم واقتراحاتكم على بريدى الخاص
[email protected]

اخوكم الشاعر : خالد الذيابي

وانا في الأخير احب اقول له تسلم يا شاعرنا عساك على القوة


الشاعر عبدالمحسن الشاهر

شاعرنا عرفنا عن نفسك؟
الاسم : عبدالمحسن شاهر الشمري
العمر : 30 سنه
الهواية : الشعر والكتابة
المؤهل العلمي: دبلوم حاسب آلي ثنائي اللغه وتحليل البيانات على نظام الساب
العمل: أعمل مشرف قسم في مركز خدمات العملاء
المدينة: الجبيل الصناعية

منذ متى وانت تكتب الشعر؟
كتبت الشعر منذ عام 96م
اول لقاء صحفي كان في مجلة اصداف عام 98م وآخيرا كان لي لقاء قبل 5 اشهر في مجلة اليمامه لدى الصحفي الرائع سعد الحميداني.
الأمسيات: امسية في مهرجان حائل صيفها هائل 1425هـ على مسرح حي السلام

امسيات في الجبيل الصناعية
اقمت اكثر أمسيات لشعراء معروفين منهم الشاعر حاكم المعلا وفلاح العماش فس صالة مخيم شركة ساسرف بالجبيل الصناعية
نشرة في مجلة أصداف وفواصل والآن مع مجلة ملامح وبالتواصل الدائم في جريدة اليوم
عدد القصائد : اكثر من 30 قصيدة للنشر وهناك قصائد خاصه
أول قصيدة كانت في مجلة سيوف عند بداياتي بعنوان مظلوم

هل سبق وان كتبت قصائد غنائية؟
نعم كتبت قصائد ولكن قله ولكن لم امنحها لأي مطرب او مغني ولكن هناك تعاون في قصيدة وطنية مع أحد المطربين وسيتم الأفصاح عنها لاحقا بعد الانتهاء من كل الإجراءات مطلعها ( ياصاحبي كان الفخر بين الأوطان ..يكفينا أن الممكله هي وطنا))

ممكن نسمع شي من قصيدك؟

قصيدة بعنوان  آخر رمــــــق

ذي قصتي لك  قلتها  يا  مضاوي
شرحتلك  كل   التفاصيل   بإيجاز
ووضحتلك قصة  خفوق  الشقاوي
أرجو التكرم يا  مضاوي  بالإيعاز
للي  بحلاها  مغرم  القلب  هاوي
حد الجنون  لحبها  العذب  منحاز
معشوقتي  ياعين   ذاك   النداوي
شيهانة  تكرم  عن  البوم  والباز
لباسها  الحشمه   وطبعٍ   حياوي
ما  أغتابها   بالذم   هماز   لماز
متقدمه  ترفض  معاها  التساوي
ترتيبها   الأول   بتقدير    ممتاز
لي الشرف أني لها صرت  غاوي
وفي حد ذاته  حبها  لذاتي  إنجاز
أبديلها  عذري  فلا  عدت   قاوي
من بعدها والشوق يعجزني إعجاز
يكفيني اسهر من  جفاها  خلاوي
هايم غلا  والقلب  ياما  لها  جاز
كل المواجع والعنا والبلاوي  وأنا
أتحدى   سود    الأيام    واجتاز
راحت وأنا جسمي من الهم خاوي
وأصبح خفوقي لكثر الأحزان تلفاز
يعرض همومٍ ما لها  من  مداوي
حتى برز في عالم الحزن  وأمتاز
بأخر رمق جيتك  أحث  الخطاوي
كن  الأمل  شايب  والأيام   عكاز
فيك  أتعشم  لا  تخيب   الهقاوي
ردك  يفك   بعالمي   كل   الألغاز
وتفضلي  مني  التحية   مضاوي
لك مع جزيل الشكر  والود  برواز

خيل المنايا
  اليـوم يومـك لا تـوارى حبيبـي
ما عاد أبقوى الصمت قاتل وذبـاح

جرح يطيب وجـرح عيـا يطيبـي
بعدك حياتي كلها تنـزف اجـراح

وخيل المنايا فـي هـواك تعديبـي
لا حي مرتاح ٍ ولا أمـوت وارتـاح

انا دخيلك فـي الزمـان الصعيبـي
الهم مـارد والجفـا منـك سفـاح

اشرق بشمسك طولت في المغيبـي
ونور الفرح في خافقي ما بعـد لاح

شكيت همي للأسـف مـا دريبـي
واصبحت في بحر المتاهات سبـاح

تلعبي الأفكـار تخطـي وتصيبـي
أمواج تلعبـه عواصيـف الأريـاح

ومن العنـا اون مثـل الصويبـي
اللي بصدره وقفت روس  الأرمـاح

عيبـي أحبـك أه يازيـن  عيبـي
وعيبك لبست من الجفا ثوب ووشاح

وألبستني ثوب الحزن يـا  حبيبـي
وعريت من لبس المسره والأفـراح

رضيت بالواقع قضـاي ونصيبـي
محدن على رد القدر يرفـع سـلاح

لا شك ما انسى صاحبي لو يغيبـي
ان ما بكته العيـن تبكيـه الأرواح

يعطيك العافية..كلمة منك لقروب بو نواف الغالي؟
أتمنى لمجموعة ابو نواف التوفيق والنجاح وتقديم كل ما هو جميل للمتصفح والمتلقي من خلال برامجهم الإعلامية والصحفيه على الشبكة العنكبوتيه
مع التحية والتقدير للأخ أبو نواف على هذا النشاط والمتابعه.
ولكم جميعاً التحية والتقدير


الشاعر..فارس الصميدان

من هو فارس الصميدان؟
الاسم الشعري : فارس الصميدان
الاسم الحقيقي : فارس محمد صميدان العنزي
العمر 27 سنه
سعودي الجنسيه طبعاً

متى بدأت كتابة الشعر؟
بدأت كتابة الشعر منذ اكثر من 13 سنه  يعني بسن صغير
نشرت في جريدة الجزيره السعوديه  اكثر من سنتين
وايضا نشر لي في صحف اماراتيه ومجلات كويتيه وبحرينيه

ممكن تسمعنا شي من عذب كتاباتك؟

القصيدة الأولى بعنوان أحلى هدية

احـلا هديـة حـب لأحـلا  حبيبـه
ودي اطيـر مـن الفـرح صدقينـي
ماهي غريبه منـك ماهـي  غريبـه
يا ارق والطف من سكن وسط  عيني
لـو تطلبيـن اللـي تبينـه بجيـبـه
يابلسـم جروحـي وفرحـة سنينـي
كـلٍ يلاقـي فـي حياتـه نصيـبـه
وانتي نصيبـي علّقـك فـي  يدينـي
يكفينـي انـك مـن خفوقـي قريبـه
واصدق معاني الشوق منـك تجينـي
انـا حياتـي قبـل اشوفـك عطيبـه
ومن بعد شوفك مادري اش صار فيني
قبلك حياتي مـن مصيبـا  لمصيبـه
الكل يضحـك لـي واهـو مايبينـي
والحيـن قلبـك لاغمرنـي بطيـبـه
دنيـاي بأحسـاس الغـلا  تحتوينـي
والى حضنتـك ثـم جيتـي  مجيبـه
ودي على طـول الدهـر تحضنينـي
مانتي بشـر انتـي مـلاك ٍ عجيبـه
صرتي عن عيون البشـر تسرقينـي
الكون بعدك يالغلا ويـش ابـي  بـه
كله تحـت رجليـك يانـور  عينـي
احـلا هديـة حـب لأحـلا  حبيبـه
قصيـدة ٍ فيهـا غـلاي  وحنيـنـي

الثانية بعنوان أنا عنزي
ياخي تعلّم كيـف تعشـق بلازيـف
ان كان تبغى تصير يعنـي  وليفـي
ابيـك تعـرف للعلاقـه  تعاريـف
واحـلام ورديـه وقلـب ٍ  نظيفـي
انا معي صعب التعامل على الكيـف
انا عنزي واعشق على كيف كيفـي
الـروح اقدمهـا غـلا للموالـيـف
وان ضاقت الدنيا ابا اسـل  سيفـي
يعني كذا يبنى الغلا صـح ياطيـف
واقدر اقول ان طيف بتصير طيفـي
اما ان كان الحب عنـدك سواليـف
لاوالله ان الحـب ماهـو حليـفـي
ضيف ٍ دعيته في خفوقي وهو ضيف
واشوف صار الضيف ماهوبضيفـي
يعني على ماقيل عن حبك  مخيـف
وانا الصراحه ما اخوض  المخيفـي
ما امنعك تبقى معـي دون  تكليـف
ان كـان قلبـك للعلاقـه معيـفـي
اقعد وعطني عن حياتك  تواصيـف
هو فيك طبـع الثقـل والا  خفيفـي
انا عطيتك عـن حياتـي تعاريـف
وانا عنزي واعشق على كيف  كيفي
قلي واعـدك دون كـل  المواليـف
ان كان تبغى تصير يعنـي  وليفـي

صــح لسانك


هشام الداوود

شاعرنا الغالي عرفنا عن نفسك

الأسم:هشام الداوود
العمر:23 سنه
مواليد الرياض
بديت الشعر من عام 1417

كم امسية احييتها؟
ولي امسيتين حتى الان في الرياض ومملكة البحرين وعندي كم امسيه جايه

طلبت منه يختار لكم قصايد..لكنه اوكل المهمة لي..واخترت لكم هالقصيدتين

الأولى بعنوان تاج العذارى

الله وهبني عشقتـك وأعشـق  رضـاك
وأنــا أحـمـد الله انـنـي  مهتويـك

 مجنون بك وأعشقك وأعشقك  وأهـواك
تبغـى الصراحـه حيـل مجنـون فيـك

لانـك سرقـت القلـب منـي ويفـداك
يـادم قلـبـي مــو خـسـاره عليـك

 ياللي هجمت وكاسـر السايـد والبـاك
هجمـة رونالدينهـو مـع آبـو  تريك

وشقيت في خشـم (الثمنيـات )شبـاك
من شـوب نجـم اللعـب  بالكوستاريك

الين صاح معلـق الصـوت  ماحـلاك
صهـلـة جــواد ٍ طـامـح ٍ يحتميـك

تبغى الصراحه ياغرامـي انـا ابغـاك
والعـالـم الله.. بـالـغـلا  مشتـريـك

يانـور عينـي واذهلتنـي  مـزايـاك
حتـى وصوفـك مـع طـواري حكيـك

 ياللـي تنومسنـي بمدحـك  وحكيـاك
وانــا قصـيـدي يالـغـلا  محتويـك

لبـى عروقـك ثـم لبـى  ثنايـاك
ولـبـا لـثــام ٍ تمسـكـنّـه يـديـك

ولبى جديل ٍ مـر صـدرك وسمـاك
فـراولـه مـتـصـدره راس  كـيـكـا

 ولبى تقاسيم القـدم تعـزف خطـاك
(دبكة) كعب تعزف لـك احلـى  (مزيكـا)

 ياكيف لو ((بوش)) الابن ناظر  شفاك
يترك ((واشنطن ))مع حكومـة ((مريكـا))

(( والبنتاقون)) يصير مجموعة  املاك
و((الكوندليـزا)) تصيـر(  الكوندريـكـا)

حتى( فتوحات العرب) صارت  هناك
وحكم العرب يوصل الى اطراف((  تشيكا))

 قال الزمن(( صدام ))في لستة  بلاك
مـن جـور صكـات الزمـن: ينتخيـكـا

 ياغاليـة ربطتـي الزيـن  بأسـلاك
فـي قـمـة الزيـنـات والله  يحميـكـا

وانا على الرمضا مكانـي  بيسـراك
وانـت تتبطـح فـوق هــام  الاريـكـا

اضمى عيونك في غياابك انا  أضماك
واقـف علـى بـاب الامـل واحتريـكـا

 واجوع بك واضمى انا جوع/  لقيـاك
جوع(( الجنوبي ))لا اشتهـى لـه عريكـا

واخرم اشوفك( خرمة )شوي (تنباك)
وانت( التبغ) وانت (العسل) وانت  :(ذيكـا)

لو هي على الفصحى/ اذن خُذ حكاياك
(والشـوقُ يُـرسـل مقلاتـايـا  اليـكـا)

لـو كنـت أعلـم ان قلبـي  تمنـاك
لـمـا تـركـتِ تكشـفـيـن عينـيـك

يعني علـى رتـم البلاطـه /يالبـاك
ياالمـاس يـابـرق الـذهـب يالسبيـك

يامن ملكني وامتلكنـي وانـا  افـداك
وضلـوع صـدري ياغـرامـي  تبيـكـا

كـان العـذراى مملكتهـم بيمـنـاك
سموك /فـي((( تـاج العـذارى))) مليكـا

وابوك في درب السنع حيـل  ربـاك
وهــذا مهربنـتـه/ بنـقـد ٍ/ وشيـك

والله واللـي زينـك حيـل  وسـواك
انـي بغيتـك فــي حيـاتـي/ شريـكـا

الثانية اخترتها لكم بعنوان( انا توني)
الا ياليـل ودينـي علـى بيـتـه وعنـوانـه
اذا انته عارف ٍ وصفـه فانـا طالبـك ودينـي
على ذاك الحبيبي اللي عجبني منظـر  اعيانـه
عيونه من ورى( البرقع) تهيض قلبي  وعينـي
أضيع بروعة أعيونه تشابه عيـن(  شيهانـه)
حلاها والكحـل فيهـا غـزال ٍ كامـل الزينـي
أكابر فـي مشابههـا تشابـه قمـرة  أنسانـه
مـلا كٍ كامـل بحسنـه يبعدنـي  ويدنيـنـي
على (منفذ قطر) شفته سرق قلبي مع أشجانـه
أناظرهويناظرنـي تصافـق عمـري وسنينـي
ركب( لكزس) ثقيل اللون أعاف الكل من شانـه
على شانـه فـرق والله علـى كـل المزاينـي
تخيلته( شبيه الريح) تراقـص قلبـي بألحانـه
وقلبت الوجه مع من قال (أحبك لو  تجافينـي)
أنا توني على (سلوى) وأشوف (الدوحه) أعيانه
أجل لا صرت (بالدوحه) ترى باريس في ايديني

صــح لــسانك

واللي يحب يسمعها ينزلها من هنا

كلمة لأعضاء قروب ابو نواف..وابو نواف قبلهم
بالنسبه لجروب ابو نواف ماشالله معروف ومعطي انطباع جيد بتميزه والله يوفقكم


الشاعر عبدالرحمن بن عمير بن حميد

شاعرنا الغالي عرفنا عن نفسك

الاسم:عبدالرحمن بن عمير بن حميد
العمر : 26

متى بدأ( عبدالرحمن ) ابن العز في كتابة الشعر؟
عندما بدا قلمي بنزف هذا الإبداع

ما هي الأسباب من كتابتك تحت مسمى ابن العز ؟؟
وصوف العز في نفسي وصوف الذيب والشيهان
عزيز القدر والشيمه رفيع الشان من ساسه

أين ابن العز عن الظهور الإعلامي في المجلات والصحف كان أو الأمسيات من جهة أخرى وهل لابن العز ظهور فيها ام لا ؟!
أنا لست من يبحث عن الشهرة أو يركض خلف وسائل الأعلام ويكفيني إنني أثق بما اكتب ليقرأه الآخرين
من الشعراء الذين تعتبرهم قدوه لك في الشعر ومن هم الشعراء الذين خرجت تحت أيديهم؟

الشاعر / فهد بن نايف
الشاعر / فالح الشلوي
الشاعر / ماجد بن حباب
الشاعر / صقار العوني
الشاعر / احمد الشلاّحي

ابن العز أين تجد نفسك في الشعر. هل تجد نفسك في المدح أو الاجتماعي أو الغزل …؟
إنني أجد نفسي حيث يكون عقلي أتواجد معه

ما يعني لابن العز .. البر .. البحر .. الطفولة .. الدموع .. الأم .. الحزن؟
البر :البر رحب وفي لياليه ماضقت = والبال يشرح بالفجوج الوسيعه
البحر : البحر غبه في شواطيه مينا = وعانيت من غدر البحر والسفينه
الطفوله :اسم الطفوله يذكرني باحلامي = حلم(ن ) تمنيته وشيّبت ماطلته
الدموع : الدموع تغسل قلبي من ذنوب ومن خطيّه = ودّي ابكي لين ماتبقى على قلبي خطايا
الام :الام ماهي مثل كل البشر غير = الام رحمه في الحياة وكنفها
الحزن :ليه الحزن غطى على كل الافراح = وليه الحزن بالقلب نوّخ اركابـه
متصورٍ حزني عن القلب ينزاح = ولقيت قلبي والحزن في طلابـه

سؤال حير الكثير من الناس في اغلب المنتديات من هو ابن العز وماذا يكون من الناس؟ ..
انا مطيري نسل سادات المعارك والكرام = من لابةٍ مضرب مثل في جودها وقدامها

يكثر في قصائد ابن العز المفردات الاجنبيه ماهو السبب ؟
من باب التنويع وحيث إني استخدمها في القليل من قصائد ولست حريص جدا ً عليها وان استخدمتها أستخدم  المعروف منها والدارج

ما الفرق بين الشعراء الجيل الحالي وشعراء الجيل القديم ؟
المفردة وجزالة الوصف وقوة المعنى والجيل السابق متفوق في كل الحالات

ما هو رأيك بشعراء الشباب في الجيل الحالي أمثال حامد زيد وسعد بن علوش ونواف الدبل؟
كل شاعر لديه سكه معينه وله جمهوره الخاص

ماهي اقرب قصيده إلى قلب ابن العز؟
كل حرفه كتبته اعتبره قريبٍ إلى قلبي

لو ينام حظك وش تقوله؟
ياحظي اللي نام مايوم قد قام = حسبي عليك ان كان يانمت ياطحت

ماهي أول قصيده كتبتها؟
أول بدايتي كتب هذه الأبيات

تركتني عايش علـى حلـم ذكـراك = ونور الامل في داخلي دوم مشتـاق
وقتي قهرني وانتظر شمـس لقيـاك = تشرق على وتجمع قلـوب عشـاق
ودي يميني تلتحـف كـف يمنـاك = ويبقى حنانك دنيتي كلهـا اشـراق
العمر كلـه ياهـوا البـال يفـداك = ولا شفت زولك جو الاحباب لي راق

وفي ختام الحوار أترككم مع بعض مقتطفات من شعر الشاعر/ ابن العز

صاحبي لاوقف يازين حتى وقوفه = وقفة الفارس اللي غزوته قد كسبها
لو رسمته تضيع المحبره في طيوفه = ولو رسمته قصيده عاذلي مالعبها
من ورايه رماح وقدم عيني سيوفه = ويل حالي عيونه يوم ترخي هدبها
…………………….

في صوتها تسمع موسيقه وقيثار = الحان ( بت هوفن ) جعلها مقاما
ظني حبال الصوت خلقت من اوتار = اليا هرج لحظه عن الفين عاما
لا لف جسمه قلت دار الفلك دار = انشهد ان آيات ربي عظاما
……………………….

ابوصف اللي سلب عقلي من فوادي = واصبحت مثل السفينه دون رباني
روّح بقلبي ولا به عنه نشادي = قلبي بيده كما خاتم سليماني
عيوونها عين حرٍ بالسما سادي = اضيع بعيونها والموت بي داني
………………………..

ومن يناظر عيونـك ابتعـد وامتحنّـي = فاتنه في عيونك والبشر فـي صياحـي
ياجميله جمالـك سالـب العقـل منّـي = العسل من صفاتك والعطر فيك فاحـي
صوتها عزف قيثاره ولحن(ن) وفنّـي = لحن (بت هوفن) اللي زاد فيّ ارتياحـي
…………………………

تو ماهدا فكري وريحـت بالـي = تو ماشعرت اني مع الناس موجود
يومٍ عرفتك يابعـد كـل غالـي = عقبك وانا كني لي ايـام مولـود
ياتاج راسـي والغـلا ياحلاالـي = العمر دونك ياهوى البال محـدود

واختار لنا هذه القصيدة بعنوان رمز الأمجاد 

للشمـس ياليـل الثنـا معـك ميـعـاد
نـور القمـر كاتبـك ونجومـه شهـود

صبـري نفـذ ياليـل ياستـر الأجـواد
أطلـق عنـان الشعـر بعيونـك السـود

ان كانهـا بعنـاد انـا كـلـي عـنـاد
وأن كانهـا بالطيـب حنـا هـل الـزود

ماكـل مـدحِ ..لا.. بغيـنـاه..ينـقـاد
الا .. لا .. صار المدح في هامة الجـود

تاريخكـم يجبـر فكـر كـل قـصّـاد
على المديح ..ومـدح الأبطـال محمـود

أمجادهم من عصر نـوح وعصـر عـاد
وتمجيدهم فـي كـل مخلـوق موجـود

بنت الفخر نسـل الثنـا رمـز الأمجـاد
بنت الذي سيفـه علـى العـز مجـرود

رمز الشرف بنت الترف عـز الأجـداد
ياعون راسِ من عنـا الوقـت مضهـود

يافخر .. حوى.. يابعـد كـل مـن جـاد
كل المـدح لـك مـال عنقـود عنقـود

كل العذارى غيرهـا … صفـة أعـداد
وتبقى فخر .. للطفل .. والرجل .. والعود

تكلم عن منشوراتك الشعرية ومقابلاتك..؟
قصيده بعنوان العواذل
والثانيه في مجلة بروز
بعنوان  ماهزني ريح الزمن
ومجلة الفوارس
نشرت به مقاله
وقناة الساحه
وكانت قصيده في الملك عبدالله بن عبدالعزيز

كلمة توجهها لقروبنا الغالي
كم اسعدني هذا القروب
وكم سعدت بالانضمام اليه
وتحيتي الى ابو نواف والقايمين على هذا القروب

ماذا عن ديوانك؟
ديواني الكتابي موجود في منتديات ديوان العرب
وحاليا اكتب في منتدى ديوان العرب
ولي ديوان صوتي بعنوان ديوان العرب مع عدة شعراء
ولكم خالص تحياتي


واللي عنده موهبة شعرية ويحب يرسل لي اضمه لموضوعي حياه الله..لكن يرسل لي نفس المعلومات اللي بالرسالة
وانتظروا الجزء الثاني بإذن الله..
أختكم..كتكات


 .!.Kit..Kat.!.


تعليقات 4

  1. انا عنزي واعشق على كيف كيفـي الـروح اقدمهـا غـلا للموالـيـف صح لسااااااااااااانك يالعنزي وجميع الشعراااء ابدعتي يا كتكات في استظافتك الجميلة ويستاهل عشر نجوم مزيد من الرقي ومزيد من الابداع

  2. لقد وفقت العضوه كت كات في اختيار ضيوفها و توفق الضيوف في اختيار قصائدهم الجميله والممتعة ..

  3. اللـه يعطيك العافيـة على اللقـاءات الممــيزة 00 والله لا يحـرمنا من جديدك 000 فيض تحيتي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مختارات ولقاءات شعرية مميزة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول