..:: محتار من وين تبدا تخطط لسفرتك ؟.. خوش بأه ..عاوزك حبتين ::..


يسـعـد لي هالمسااااااا /
يا هلا والله ومليون غلا /
هلا والله بحـبايبي أنا / ..

مشتاق كثيرررررر لأحلى قروب .. قروب أبو نواف …
أتمنى أن الجمـيع بألف صحـه وعاااااااااااافيه ياربـ /

/

موضوعنا اليوم .. في مخـيخـي من زمان …. عاد خـبركم شغـل الزوله وهيك /
من زمان وأنا ملاحـظ شغـله في قسم الأستفسارات السياحيه … أو حتى في أي جلسه شبابيه … ملاحظ الحيره الكبيرررررره في التجهـيز لأي سفرة سياحـيه …
أول شي … إذا أنت من اللي يقول لا والله .. ما أحب أجهز لشي .. أحـبها تـجي على عماها /

فبليز يعـني .. ما تضيعـشي وأتك معـنا /
لكن اللي يبي تكون رحـلته مخـطط لها من الألف للياااااااااء … يتابع معـنا الموضوع /
لأن كـثير من اللي يبي يجهز لرحلة .. والا أهله موكلينه يضبط رحـله لهم … تلاقيه مطنـقـر / … ( مطنقر يعـني ماله خلق ابد / )
طيب من وين تبدأ ؟ … وكيف تبدأ .. ؟.. وهل شغـلك سليم ؟ .. وإلا ممكن يكون فيه لخـبطه ؟ …
كل هذا نبي نعـرفه في هالموضوع …
لا تجيب مفرحاتك ولا شي / …. أنا بجيب معـي / .. حقاتي بس / /
طيب …….

/

لازم تحـط في بالك شغـله معـينه … أنه نسبه نجاااااااح رحـلتك تعتمد على تخـطيطك لها …
وأصلا … تقدر تحـس .. وترتاح لنجاح هالرحـله .. وأنت اًصلا هنا .. لسى ما سافرت …
ترتاح لترتيبك .. ترتاح لشغـلك .. ترتاح أنك تبي تسافر وتشوف شي اوكي / ..
بعـكس اللي تارك كل شي على عمااااااااها … مثل ما تجي تجي .. وهذا اللي ما أحـبهــ …
طيب من وين تبدأ ؟ … امممممممممم / … أبدا بالفنادق / .. لالالالا .. نخلي الفنادق شوي .. نبدا بالطيران / .. لالالالالا / .. وش طيرانه بس … خلونا نبدا نرتب كم يوم نبي نجلس / … أوف وش هالحيره /
لا ان شاء الله ما في حيره ولا شي /

نتابع مع بعـض … الرسم التالي …

/

….!~¤§¦ ،،،……… خطط لرحلتك………. ،،، ¦§¤~!….

/

/

الرسمه اللي فوق .. ضبطته من راسي … يعـني حسيت هو الأمثل … بس الله أعلم اذا هو الأفضل …
راح نبدا شرح خطـوه خـطوه … وبحـسب أرقامهن .. ( الأرقام مذكر والا مؤنث؟ / ) <<< كمل بليز /
قبل ما نبدا في شرح كل نقطه … نبي نتفق على شي …
الدوائر اللي فوق مرقمه من 1 – 6 … وكل دائره طالع منها سهم .. للدائره اللي بعـدها … صح والا لا ؟؟
طيب … لما تجـي تخـطط … بليز .. بليز .. بليز …

لا تـطلع من دائره لدائره ثانيه .. وأنت لسى ما خلصت من أمور الدائرة اللي أنت فيها …
الشي الثاني .. لما تكون في أحد الدوائر … أنسى .. أنسى .. أنسى كل شي عن الدوائر الثاني .. وفكر في اللي أنت فيها … لأنه بيكون تركيزك أكبر …
يـعني مو أنت في حجز الطيران … وتقعـد تقول .. هالحين الفندق اللي نبي نسكن فيه 4 أو 5 نجوم /
وتجلس تلحـس مخـك وهو منلحس خلقه / .. غير كيذا هات لك ملف عادي .. وكم ورقه .. يعني احتفظ بكل شي تبحث عنه يخص الرحـله …
فحـبيت أنبه عن هالنقطتين … لأن الكثيررررررر … ما يحوسه الا الشي هذا …

( لا تـنـتـقـل من دائرة إلى أخـرى … حتـى تنتـهي من جميع أمور دائرتك الحـاليهـ )

^^
^^

ترى هالمبدأ أستخدمه في حياتي كلها … مو بس في التخطـيط للسفر …
نجـي للخـطوات .. وحـده وحـده /

/

….!~¤§¦ ،،،……… 1 – تحديد مدة السفر………. ،،، ¦§¤~!….
هااااااالحين خلاص … ( ماسكه اليوم على هالحين / ) … خلاص يعـني .. أجتمعـتو في صالة بيتكم / … والا كانكم شباب … أجتمعـتو في الاستراحه .. أو حتى في أبو هيثم ما فيه مشكله /
المهم أنكم أجتـمعـتو <<<< طيب وش فيك معـصب /
في هالدائرة تحـدد مدة السفر … ممكن الميزانيه هي اللي تحـددك … بس ما كتبتها ليش ؟ …
لأنه ما تكون هي عامل أساسي .. ممكن يكون ما عندك ألا ايام معـينه للاجازه …
ممكن عندكم عرس .. وبااااااااالشين لازم ترجعـون قبله .. وما ضبط الفستان .. ولا شريتو شي .. أموركم معـروفه / /
هيك يعـني /

اوكي … الحين حـددنا المده … بس ما نبي ألا تحـديد المده … لنفرض مثلا أسبوعين … عشان يمدي نشوف الزفه /
تم تـحديد المده ؟ … خلااااااص .. سكر على هالدائره .. وانتقل للدائره رقم ( 2 ) …

/

….!~¤§¦ ،،،………. 2 – تحديد تاريخ السفر……… ،،، ¦§¤~!….
التاريخ مهم جـدا / … تبي تقول ليه ؟ .. اعرف تبي تقول ليه /
التاريخ تعتمد عليه نقاط كثيره … من أهمها الوقت اللي تبي تختاره .. مو أي ديره تبي تسافر لها تكون حلوه /
يعـني مثلا حددت شهر معـين … هالشهر معـروفه لندن فيه برررررررد .. ومطر … لا يا حبيبي .. وش يوديك هناك في هالوقت …
اللي منعـنا من أختيار لندن .. هو الوقت اللي انت حددته .. مو لندن كوجـهه سياحيه …
هذا شي …
الشي الثاني .. يفيد تحـديد التاريخ .. في مسأله استخراج الفيزه … / … مو مثلا جالسين في نفس الصاله اللي قلناها فوق /
وقررتو تروحون باريس الأسبوع الجاي … مو على كيفكم طبعـا / … الا تكون الفيزه طالعـه وجاهزه …
ع كيذا .. تحـديد تاريخ السفر … اساسي جـدا في الاعتماد على الخطوات اللي بعـد هذه …
خلاااااااااااص يا باشا / ؟؟؟
حـددنا التااااااااريخ … وكل شي أوكي /

الحين وش سوينا ؟ … حـددنا مدة السفره ( دائره 1 ) … وتاريخ السفر ( دائره 2 ) …
بدت الحين تتضح الرؤيه امامك … طيب دعونا ننتقل للدائره الثالثه /

^^
هالسطر برعايه جريده الرياض /

/

…..!~¤§¦ ،،،……… 3 – تحديد وجهة السفر + الميزانية……… ،،، ¦§¤~!….

برضو هالدائره مهمه كثيرررررر … وهي تحـديد وين تبي تسافر ؟ … وش ناااااااوي عليه / … وطبعـا تعتمد اعتماد اساسي على الميزانيه …
يعـني شغـل الهياط وأنك تروح تتسلف على تروح تسافر .. خـله عنك / .. خلي الأمور قدامك أوكي …
إذا أنت عائله … ضبطو الوضع مع الوالد / .. يعني كلام زين .. تهميز … كل يوم عشاء غير …. ابتسامه تشق الوجه … لييييين شفتوه مررررره متشقق الله يحـفظه / … افجـعـوه بخـبر أنكم تبون تسافرون / / /
عاد إذا كـنتم شباب … فضبطو موعد السفرة بثاني يوم من نزول الراتب / /
ممكن تكون السفرة لأكثر من وجهة سياحية … وغالبا تكون مدن قريبه مع بعـض ….. يعـني دامك مسافر مسافر … ليش ما تغـير وتبدا ..
وخاصه اذا كان مود اللي بيسافرون .. يعني يحبون التغـيير …

اعطيك مثال ….
مثلا فيه ناس تحب التسوق + الطبيعـه … فوش تسوي …. ( قويه وش .. حسيت هوا طالع / ) …
ممكن تجمع بين جنيف و باريس … جنيف فيها الخـضره والمناظر اللي تجـنن / … وباريس فيها التسوق وآحـلى وأفضل وآخر الماركااااااااتـ /
فهذا مثال بس …
لكن لا تنسى عزيزي القاريء / … <<< وما زالت جريدة الرياض هي الراعيه /
لا تنسى أن كثرة التنقل مو حـلوه /

يعـني مو تـطير في العـجه … وتقول ياااااااااااااربيه / .. بروح لباريس يومين . ولندن 3 ايام .. وجنيف 3 ايام .. وانترلاكن 3 ايام … ويومين لزيورخ / .. ياااااااربيه وناسه / /
لا يا حبيبي / … ما هنا وناسه … الا هنا قطمه ظهر طال عمرك /
اللي اقصده أنه بيكون متعـب عليك جـدااااااااا التنـقل من مكان لآخـر … وخاصه اذا كانت معـاك عاااااائله /
لأنه لا تنسى .. أنك أول ما توصل الأوتيل تبي تفتح شناطكـ
تبي تطلع للمدينه الثاني .. طبعا تبي مره ثانيه تضف شناطكـ /
ثم توصل المكان الثاني .. تبي تدخل الأوتيل .. وترجع تفتح شناطكـ /
ثم يومين الا انت راجع مره ثاني .. وش تسوي ؟ .. تضف شناطكـ /

وتروح كل ابو الرحله فك وترتيب وضفضفه .. <<< كررها 5 مرات /

غير جـرجره الشناط في المطارات .. او القطارات … والأمور تكون جـدااااااااااا متعـبه …
فمن هالمنطلق / … تحـدد المدن اللي تبي تسافر لها … والميزاااااااانيه / .. لأن الميزانيه .. هي اللي تبي تـحدد لك سالفه الطيران والفنادق ووووو …
الحـين خلاص … حـددنا وين نبي نروح له / … وحـددنا الدراهم اللي نبي ندفعـها / ..

اوكي / ..

سكر لي على هالدائره … وبرضو دعـنا .. ننتقل للدائره اللي بعـدها …
قبل ما نروح للدائره اللي بعـدها .. حبيت أقول لك …
أنك الحين عرفت متى تبي تسافر ؟ .. بأي تاريخ ؟ .. ووين ؟ .. وكم ميزانيتك ؟ …
شفت وش حـلوووووووووووه الترتيب / … وه بس / / <<< وش عنده /

نبص مع بعـض ع الخطوه رقم 4 …

/

….!~¤§¦ ،،،……… 4 – حجز الطيران والقطارات……… ،،، ¦§¤~!….

هذه الخـطوه سهله تقريبا … ما يبي لها شي كبير … ما راح توصل انت هالنقطه الا عارف وين تبي تروح .. وكم ميزانيتك ….
فأيش تبي تسوي ؟ … يا تحـجز الطيران عن طريق مواقع النت … أو انك تروح المكتب … أو انك تطير بنفسك / … المهم دبرها /
وبخصوص القطارات … اذا كنت تبي تروح أكثر من مدينه … وبينهم قطارات .. يفضل أنك تحجز وتقص التذاكر من هنا .. يعـني من موقعهم ع النت … عشان ترررررريح دوماغـك هناك /
الحين كل امورك ماشيه اووووووكي / /

الطيران وحجـزناه … وكل شي تمام …
ننتقل للخـطوه أحـبها كثيررررررر / …. صح أنها متعـبه / .. لكن ممتعـه / ..

/

….!~¤§¦ ،،،……… 5 – حجز الفنادق والشقق……… ،،، ¦§¤~!….
هالخطوه مهمه كثير / .. حتى من اهميتها .. كثيررررر من اللي بيسافر .. يفكر فيها حتى قبل ما يحجز طيران /
مثل ما اتفقنا فوق / .. ياااااااااا ويله اللي يبي ينتقل من دائره لدائره ثاني .. من غير ما يخلص اللي بيدهـ ….
حجز الفنادق … يعـتمد على اكثر من نقطه … أولها الميزانيه … فرق أنك تسكن في فندق 5 نجوم .. أو 4 نجوم …. أو 3 نجوم …
برأيي … الميزانيه 75 % منها طيران وفنادق ….
طيب الفنادق كيف تحددها ؟ … تحددها مثل ما قلنا بالنظر للميزانيه … ثم النظر كم واحد معاك مسافر /
يعـني أذا انتم عائله كبيرررررره .. وش يسكنكم في أوتيل / … تاخذون لكم شقه كبيره شرحه وبرحه / .. احسن واوفر وكل شي /
همزو ابوكم لييييين تدوخون / .. كل ما قال نبي نرجع .. اسدحوه في الصاله .. عشان يمدد /
الشي الثاني … يعتمد تحـديد الأوتيل المناسب … على المكان اللي هو فيه / … يعني ممكن تلاقي فندق 5 نجوم فخم ورااااااااااايق ورخيص … بس في قلعـه وادرين / .. هذا وش تبي فيه .. /
البحث عن اوتيل مناسب .. انصح داااااااائما .. أنك تبدا بمواقع البحث الاساسيه للفنادق .. مثل بوكينق واكسبيديا .. والعيال ذولي … لأنهم دائما ينزلون عروض .. وغالبا تكون ارخص من المكاتب السياحيه المتــنطله في الشوارع /
هالحين خلاااااااص … <<< رجع لهالحين /
ما بقى شي / … لأن الاساسيات انت انتهيت منها …. نبقى عاد على نقطه أبيك تمخـمخ عليها /
هالنقطه اذا كنتم عائله … ما تحتاج تهميز أبو / .. ولا تضبيط عشاء فاخر له / … ولا شي ابدا .. لأنه خلاص التذاكر ومعـكم .. وحجز الفنادق واوكي .. وش تبون فيه / <<<< يا عيييييني على الجحده /

نشوف النقطه الأخيره مع بعـض ….

/

….!~¤§¦ ،،،………. 6 – وضع البرنامج السياحي……… ،،، ¦§¤~!….
مثل ما ذكرت لك فوق … هذه يبي لها مخـمخـه / ….
تجـيب لك جـدول … فيه التواريخ والأيام اللي راح تسافرون فيها … وتبدون تخـططون وين تبون تطلعـون اليوم ؟ … وين راح تكون السعـسعـه فيه /
عاد أنتم ونظامكم … يا ناسن تقوم من صباح الله خير / .. وتبدا برنامجها السياحي …
أو ناسن تناااااااااااااااام لين تخيس المخـده /
فهذه الأمرو راجعـه لك … وعلى اللي معـاك …
البرنامج السياحي ممكن ترجع لتقارير سياحيه سابقه لنفس المدن اللي أنت ناوي تسافر لها …. وتقتبس بعـض الأماكن الحـلوه …
ممكن تبحـث بالنت عن هالمدن .. وتشوف اللي على موووووووودك /
يعـني مثلا أنا ما أحـب أدخـل متاحـف / … وشو .. اشياء قديمه تسوى لها ملايين .. لو أرجـفها برجـلي انكسرت / .. فما انبسط فيها …
فأشيلها من الجـدول مررررررره /

لكن فيه ناس غـير … تحـب هالاماكن وهيك … فتكون هي من أولوياتها … …

/

لاحـظت شي ؟ ….
أن كل شي مشى معـنا بترتيب / .. وسلاسه / .. وعلى أحـلى ما يكون /
صدقنـي ما يخـرب كل شي .. إلا الحـوووووووووسه / … الحوسه وعدم الترتيب هذه تعـفس كل أبو شي …
أنت ممكن تشوف الرسمه اللي فوق .. وتقول يااااااربيه وش هالتعـقيد / .. وين حنا فيه في مدرسه / ..
والا تقول أووووووما أسوي كل هذا / / ….
لا حـبيبي …
من هالترتيب … راح تشوف نجـاح رحـلتك وأنت في بيـتكم … جاااااااالس وتحـس أن كل أمورك أوكي / … تشم ريحه النظافه /
وأهم شي أنه أصلا يمديكـم ترجعـون وتحـضرون العـرس .. وتشوفون الزفه / /

/ /

إلى هنا نكون وصلنا لنهايه الموضوع ….
أتمنى أني قدرت أوصل لك نبذه بسيطه عن كيفيه التخـطيط السليم لأي رحـلة سياحيه / ….
وأتمنى أنك أنبسط واستفدت بكل دقيقه بقراءه هالسطور ….
وأي سؤال … الجميع حاضر .. سواء انا أو أي واحـد عنده معـلومه ممكن يفيدنا فيها /
والموضوع فري … أنـقـله لأي منتدى ولأي مكان .. وأرسله لأي أحد … عااااااااادي /
بس لا تغـيير شي …

/

اشوفكم على خير …
دمتم في أمان الله وحفظهـ …
لكـــ/ـــ …. انت بس … مو لغــيركـ ….

المايسترو


تعليقات 16

  1. أنَـا مقدر على التنظيم هذا 😀 بس والله مُتعب حيل شووووف:D نبي نتفق لمــا أحدد السفره والمده والوقت والميزانيه راح أكتبها لك وارسل لك الـ money على حسابك و أنت تحجز لي وتسوي لي كل شي و ترسل لي التذاكر 😀 وش رايك فيني 8) تسلم الأيادي .. والله تخطيط و آحلى جارررري حفظ الرساله لـَ\الأستخدام في أي وقت .. ننتظر جديدك .. ومزيد من السفراااااتــ .. تراني تحمست معك 😀 يعطيك الف عافيه .. أيادي ما نعدمها .. 🙂

  2. يااااخي يا انت فلــه بعــد .. [[ ما تصير صديقي 😀 ]] كلامك سليم وعال العال .. يا سفرة بترتيب والا بلاااااها والله موضوعك جاء بوقتــه .. ألف شكـر يالمايسترو

  3. 8) 8) هههههههههههههههههههههههههههه اهم شي نحضر الزفه 😀 مشكور اخوي الجدول جدا رااااائع

  4. ياااااااااااااااااااااااااي مره عجبني ترتيبك للاشياء B بليز لو في حياتك شي ثاني مرتب زي كذا نزله لنا نستفيد والله احب التفكير المرتب مرررررررررره

  5. يسلموووووووو خيوو المايسترو بسراااحهـ مرررهـ اعجبتني طريقهـ التنظيم تخطيط راائع و كمااااان اعجبتني الكلمات االمضحكهـ في الموزوع 😀 بحفظ الموزوع يمكن تحتاجهـ في يوم من الأيام لووول 8) يسلمووووووووووووووووووووووو

  6. يسلمووووووووووووو والله يعطيك العافيه يا رب ولا تحرمنا جديدك وجزاك الله خير ودمت في حفظ الرحمن

  7. 😀 تنظيم حلو … خخخخخ اما سفره لبرا وخليها على عماها :~ المهم لو بعد تحديد الدولة حطيت لنا دائره عن الجوازات والفيز وهيك شغلات … اللي تحوس أكثر شي. وبس :$

  8. ماشاالله تخطيط مرتب وماعلية كلام وبصراحة تذكرني في بابا يحب التخطيط ودايم ورقة وقلم في كل مكان واحين نروح والمكان بس مايعجبنا والله بدقايق يفكر ويغير لنا الخطة والله انه خوش ابوي فديت بابا ياناس الله يطول بعمره ياربي تسلم يدك اخوي ونتظر جديدك

  9. شكرا كثيرات حتى تتعب .. فعلا مشكلة اذا صار معك واحد اذا زان التصوير قال مشينا 🙁 جعل ما تكتب في موازين حسناتك

  10. مسيت بالخير او صبحت بالخير > حسب طبتك نسيت شي مهم ، الكام قلهم لا ينسونه في التخطيط > آوت وربي ذبحتكم بالكام ـخخخخخخـ جد ابدعت يالغلا ، الله لا يحرمن ابداعك تحملتك 🙂

  11. موضوعك جاءءءء في وقته أخوي مانقدر نسافر هل الصيف انت عارف انفلونزا الخنازير والطيور مسويه عمايلها اللي يبي يسافر يسمع ويشوف نصيحتك اما انا وحده قاعده هذي السنه في بلادي ربوع قطر الجميله والبحر الرائع والله يستر علينا وانت اشرايك بتسافر وذبح الناس معاك غير الموضوع احسن ترى مو وقته تفتح بيبان مسكره ههههههههه الله يعطيك الف عافيه اختك كلي غرور

  12. 😀 الله حيوه تصدق من قبل ايام رايحه لمشاركاتك السابقه وهات ياقراءه وضحك وسعه صدر على انها يامايستروا المره الالف اللي اقرى فيها مواضيعك سبحان الله ليش ماادري بس ماش اليوم في موضوعاتك مافيه سيفونات ولا مقطوعات لااغاني محمد عبده:Dولا قلوب ولا شي 😀 عندك موضوع قديم باالحيل نزله عااااتي ترى اقرى كل شي 😀 اهم شي فيها مفرحاتك ومقطوعات محمد

  13. ابداااع يالمايسترووو منظم ماشاء الله عليك 🙂 عجبني موضوعك صراحه لان اخر سفره جبنا العيد والحوسه وكل شي B

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

..:: محتار من وين تبدا تخطط لسفرتك ؟.. خوش بأه ..عاوزك حبتين ::..

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول