مجلة نص كم


مجلة نص كم

__________________________

__________________________

أحمد ربي حمدا لايليق إلا بجلاله وعظمته وجبروته وقدرته , وأثني بالصلاة والسلام

على سيد البشرأجمعين نبينا محمد صلى الله عليه وسلم وعلى آله وصحبه أجمعين وبعد :

عندما رأينا معظم أقسام مجالس أبونواف قد عملت مجلة دورية لها , ورأينا مدى تميزهم

في مجلاتهم وطرحهم الراقي والجميل , قلنا لأنفسنا ذات تجلي ” ورا مايصير عندنا

مثلهم وش زودنا عنهم ” , فأنطلقت فرقة تحرير هذه المجلة بالبحث عن المواد المناسبة

لتكون مجلة لنص كم تعلن عن تمرد أعضاء مجلس نص كم وإظهار قدراتهم المخفية عن

الجميع .

ولقد سبق البعض إلى إصدار مجلات مبسطة لنص كم ولكن هنا نضع مجلة دورية كل

شهر أو شهرين ” على حسب الخمة ” , وندعوا الجميع ممن يريد المشاركة بهذه المجلة

أن يرسل بمادته للمجلة إلى صندوق البريد الخاص لسوالف القايلة ليرسلها لنا , فالسرية

تفرض علينا أن لانعلن حتى أسماء فريق التحرير … ونكتفي بقول ” قام بإعداد هذه

المجلة ثلة من أعضاء نص كم ” … كما أحب أن أنوه بأن أي مادة تصلنا قد وأقول قد

تتعرض لتعديل أو تحرير حسبما يرتأي فريق الإعداد لهذه المجلة …. وأدعكم الآن مع

محتويات هذه المجلة سائلا الله عز وجل ان تحضى بإستحسانكم ورضاكم ….

كنا نطمع بأن تكون المجلة كاملة شاملة لعدد كبير من الأعضاء ولكن لسرية إعداد العدد

الأول , أرتأينا أن تأتي محصورة في أسماء معينة , وفي الأعداد القادمة بإذن الله , لن

نرضى حتى نجمع أكبر قدر من أعضاء نص كم المحترمين .

ملحوظة :

توجه قروب الكاميرا الخفية الخاص بالبرنامج ليعمل مقلبا بيوزرين

هما ” مدوخة الملايين و قم بس قم ” ولكن بسبب فشل المصورين وإضاعتهما للقطات

المقالب (( الداتا حقت المقلب )) تم حذف هذه الفقرة ونتقدم بالإعتذار للأخوة الأعزاء

(( مدوخة الملايين وقم بس قم )) …..

 

مدير التحرير …

يجيب على إستفساراتكم

م . كماخيشن .

رساله من الحائره

المهندس كماخيشن المحترم

اروي لكم حكايتي وانا يعتصرني الالم والحيره

فمكأفآت الجامعه لمدة ستة شهور ضاعت مني هباءا منثورا

سأروي لك قصتي وارجوا منك ان تساعدني في حل هذه المشكله

وارجوا نشرها لتأخذ البنات عبره وعضه من قصتي الحزينه

وهذه قصتي

انا بنت جامعيه البس عبايه راس وبالمناسبات العائليه والمنتزهات

البس عبايه كتف بس صدقني يامهندس انها واسعه وراهيه

المهم قبل شهر كنت رايحه مجع الراشد انا وبنت خالي عواطف

و شفت محل كمبوترات اللي اول ماتدخل يجي على يدك اليمين ياشيخ هذاك اللي بجنب محل المسجلات

شفناه بس لاننا ماكان عندنا وقت وخالتي حصه تنتظرنا علشان تسحب لي الفلوس من ماكينه الصراف

لاني كنت اوزي عندها مكافاتي علشان اخر السنه استفيد منهم بشي ينفعني اروح لصالون مثلا

اواشتري فيهم كنادر <<

بس هالمره انكبت وجبت العيد لاني يوم شفت محل الكمبيوتر قررت اشتري كمبيوتر

وفعلا حدث مالم يكن في الحسبان واشتريت تالوب لوب << قدها لاب توب

وتورطت يامهندس لان البنات يوم شافوه قالوا هذ1بانتيوم فور ماهو ويندوز

وانا الحين حائره في امري ولا أعرف ماذا افعل

المهندس

الاخت حائره

لاتقلقي فهذه المشاكل تحصل كثيرا في عالم الرقميات فمثلا تذهبين لشراء مكنسه ثم تفاجئين بأنك اشتريتي ثلاجه

لكن لاعليك سأشرح لكي كيف تشغلين الوندوز

ثم بعد أن تنظري شويتا << يعني قليلا

اتبعي الخطوه التاليه وكوني حريصه لان تشغيل الوندوز يحتاج الى مهاره ودقه في استخدام الكمبيوتر

اتمنى ان يكون شرحي كافيا اخت الحائره

رساله من مدني كبينه

ابو الهندسه مساك الله بالخير كيفك وكيف الناس الطيبين في ابو نواف

اسمع الله يمسيك بلخيرر انا دوبني مشتري كمبيوتر من هادا ايش اسموا تبع الكمبيوترات

المهم ياعمنا انوا باعني الكمبيوتر بدون فاره تخيل تروح تشتري كمبيوتر ماتلقى فيه فاره

هيا قولي ايش الهرجه ؟

اروح لمو في المحل واكسر لو راسوا

ولا اطير هوى لمحل تاني واشتري فاره ؟

انا في انتظار اجابتك لانو صراحه الفار بدى يلعب بعبي وناوي اقلوبها فتونه هيا رد علي بسرعه احس لك

الاخ مدني

هذه الحالات معروفه وتحدث دائما لكن عليك الانتباه الى نقطه مهمه

في حالة انك نويت تكسر لو راسوا يعني احرص على عدم وجود أحد داخل المحل

لان في حاله وجود شهود فان القضيه ستكون لصالحه بحكم انك تهجمت عليه بمحله

انصحك بعدم التسرع وانتاظره حتى يخرج من محله ووقتها العن سلسفيل سلسفيله

بقلم : هكر فاهم

لفتح المسنجر وانت تشرب شاهي وبيد وحده بس ….!!

شعارنا في كل بيت هكر

وشعارنا كل دلخ سوف يصبح هكر

وللهكر آداب اولها ان تشتغل بيد وحده من زود الثقه

سنبداء من الصفر

كيف تشغل المسنجر بيد وحده لا وانت تشرب شاهي باليد الثانيه بعد

اتبع الآتي

1/ قل لامك تسوي لك شاهي ثم ابداء بشربه

2/ ادخل جهازك وانت ماسك الشاهي بيدك

3/ اختر برنامج المسنجر ثم حط كاس الشاهي علي الطاوله بدون محد ينتبه لك

بعدين بسرعه دخل الايميل والباسبورد وارعص اوكي

بعدين رجع كاس الشاهي ليدك ” وانتبه لا يكون احد شافك “

بعدين صرخ علي اهلك وقلهم تعالوا وعلمهم انك سويت كل هالشي …

وكاس الشاهي ماسكه بيد وتشتغل بيد وحده فقط

إعداد : خرارة , مخقة .

إنتشرت في الفترة الاخيرة أقسام الفضايح في كل المنتديات وقلنا ورا مانسوي مثلهم

وجمعنا لكم بعض الفضايح الخطيرة …

ومصور بالفيدو وحصريحه جدا

* فضيحة مسؤول كبير ….

للتحميل إظغط الزر الأيمن وحفظ بدون أسم <<< دورها عاد

* فضيحة مستشار ….

للتحميل إظغط الزر الأيمن وحفظ بأسم

بقلم : بربسة .

تقدمت إلى مقابله شخصيه مؤخرا للحصول على وظيفه

وحصلت على معلومات من مجموعه كبيره سبقتني لهذه التجربه .

دلفت باب تلك القاعه وانا ثمل من زياده الثقه بالنفس ….. وما أن شفت خشه هالي بيقابلني وهو مرسم

والياقات حقته جديده وشكله تسنه توه طالعن من حادث ومكسورتن رقبته والشماغ نازلن ومغطي

عيوونه لدرجه إنه قاعد يطالعني من المرايه ضعيف .

هنا وهنا فقد جتني ام الركب وقامت رجولي تطقطق في بعض وصرت امد يديني بأتمسك بأقرب شي

عشان ما أهبد بوجهي وأخرتها تمسكت في شي مدري وشو وهبدت على خشتي وانا اسمع صوت يقول

تشقققققققققققققققققققققق وإذا بي اشوف سكرتير هالموظف إلي بيقابلني لابسن موديل جديد صروال

وفنيله وشماغ والثوب مشقوق طالعن تسنه بالطوا

قبلت جبين السكرتير يعنني راضيته

جلست وانا استرجع التعليمات والتي سبق وسمعتها ….. لا تحرك يدينك واجد عشان ما يعتبرونه عدم

قدره على التعبير ….. لا تعض اظافرك عشان ما يحسون انك مرتبك …. لا تحط رجل على رجل عشان

ما يحسون انك مغرور ….. لا تحط يدينك في اي فتحه في وجهك عشان ما يحسون إنك وصخ ….. لا

تحط يدينك على فخوذك عشان ما يحسون إنك حسران

قابلني الموظف بإبتسامه وقال ليه تبي توظف عندنا ؟

فجاوبته

فسألني وش مدخلك القانون ؟ …… وانا اردد في نفسي الله من زين الكفاءات هاللي مخلينها تقابلنا .

فسألني تتابع هالسخافات إلي إسمها سوبر ستار وستار أكاديمي ؟

فقلت له وقد بدأ الملل يصيبني سريعا بعد ان كنت في حاله إرتباك وتعرق تام ……. الله من زين السؤال

؟ يعني تقول سخافات هقوتك مثلا بقولك ايه اتابعها وانا في مقابله لوظيفه ؟

فحس انه غبي وطأطأ رأسه وجا يفكر بالإنتقام وقال ليش برأيك هالبرامج انتشرت ؟ قلت والله مدري

تخبر هذي حلقه الإعلام من صحف وإتصالات وإعلام مرئي كل هذي دائره سببت هالإنتشار الغير طبيعي لهالبرامج .

فقال يقولون ان فيه سعودي مشارك صح ؟

قلت ايه

قال وقد تغيرت ملامح وجهه وصارت إبتسامته تذكرني بالذيب إلي في أفلام كرتون يوم يحجر للخنازير

قال هماك تو تقول انك ما تشوفها ؟ وش دراك اجل ان فيه سعودي ….

فإنفقعت مرارتي من مصالته وإحتقرت نفسي لأني تقدمت على وظيفه يكون مثل هالشخص هو من

يجري المقابله معي وقلت نعنبوا بليسك توك تقول يقولون انا سمعتها من يقولون هذي مثلي مثلك وبيني

وبينك وظيفه من واحد جاهل تافه مثلك ما أبيها <=== يا حبيلي إذا بديت انصب من زود الحماس وانا

اكتب مقال

طلعت وانا معصب وهو طلع من المكتب منحرج وانا رايح بقابل المدير حقه ….. اول ما دخلت ويدخل

وراي ويقول يا طويل العمر تراه فشل في مقابله الصبر والجلاده والتحمل <=== والله ياهو يصرف

تصريف ملكي

وذلك لأن المدير فق خشته وقال ويش ؟

عزيزي القاريء لا أقول إلا إمحق كوادر هاللي قاعدتن تبربس في ديرتنا لما يكون المظهر هو 50%

للحصول على بعض المواقف ….. ولما تكون جامعي ويجي يقابلك صاحب شهاده ثنوي لا يفهم في

الموارد البشريه وكيفيه الإستفاده منها او حتى كيفيه تقييم قيمه عملها .

قناه نص كم الأعلانمية

تهنئ سلسلة مدارس مصعب بن عمير أبناءها الطلاب بالنجاح

ويسرها أن تقدم أسماءهم وشهادات التقدير الخاصة بهم ليكونوا قدوة لغيرهم :

أجراه : التفخ .

لقاء العدد

(لحظات حلوة )

عرفته رجلا ينثر الفرح أينما حل , ولايكتفي بنثره وإنما يبقى حتى يجد الإبتسام مرسوم على وجوه

الآخرين … مكافح مخلص في عمله أشد الإخلاص , إلتقتيه في حوار إتسم بالحذر قليلا فأخذت أتصيد

الأسئلة من لسانه إصطيادا , عرف ذلك ففتح لي عقله وقلبه وتحدث بصراحه شديدة , لم أكن أعلم بأنه

قد كان كافيا أن أطلب منه الصراحة دون أن أحاول الإصطياد …. حاورته في أربعة محاور , أبونواف

ذاته , والمجموعة البريدية , فالموقع بما يحتويه , وأخير المجالس …….. لن أطيل في التقديم فها هو

أمامكم الآن كما ذكرت سابقا كتاب ينتظر من ينهل منه بالقراءة ……..

المحور الأول : أبونواف

1- بداية من هو أبونواف ؟

سعد صالح الخصيري , 27 سنه , متزوج وعندي طفل .

2- كيف كانت بدايتك في عالم الإنترنت والكمبيوتر ؟

أنا أحب الكمبيوتر من زمان , كنت أشتغل على الـ Dos وأعرف له , ايضا كنت أقدر شي إسمه

الرسام , 

طبعا معروف إن الإنترنت دخل السعودية في سنه 89 م . أنا بعدها بشهر بالضبط دخلت هالعالم . طبعا

دخولي له كان فيه بعض الحذر لأني ماأدري هل أببدع فيه وإلا لأ كنت متخوف كثير … أذكر إني

كنت أدخل من مقهى إسمه ” رنديفو ” .

كنت ” أفاخت ” من الجامعة عشان أدخل النت . يعني أدمنته بإختصار .

طبعا أول مساعدة جتن في هالمجال من أخوي شرى لي جهاز كمبيوتر ووفر لي أنترنت , كالعادة لازم

الواحد يمر بفترة مراهقة في النت والحمد لله مراهقتي ماطولت بس ثلاث شهور , كنت أدخل فيها

الشات بإسم ( الظل ) ولي يوزر ثاني هو ( shdoo() …. بعدين حسيت إني لازم أشوف لي شي

ينفعني وشاقتني التصاميم وتولعت بها بديت عاد أتعلم الفوتوشوب وكنت آخذ الدروس من الإنترنت

وأصمم وأخبيهن عندي ماأعرضهن على أحد أبد .

شوي شوي لقيت نفسي أحترف الفوتوشوب , دخلت بتصاميمي في منتدى إسمه المنتدى العربي

ومسكت إشراف هناك بإسم ( shdoo ) وسويت أول عشر دروس للمبتدئين وهي نفسها اللي حاطها

الأخ ( خلاد ) في موقعه .

مشكلتي كمحترف فوتوشوب إن أفكاري ضعيفه نوعا ما ماتجيني أفكار … موب كني طولت الكلام ؟

3- بعد أن أصبح إسم ” أبونواف ” علما في عالم الإنترنت , ماهو شعورك حيال ذلك ؟

الخوف من عدم الإستمرار بنفس المستوى , مع إني أحس إني للحين ماقدمت ولا 5 % من مافي راسي ومن اللي أبي أسويه .

المحور الثاني : المجموعة البريدية .

1- كيف خرجت فكرة قروبات أبونواف ؟ ومالهدف منها ؟ ومن ساعد في إنشاءها ؟

بصراحة شديدة أنا كنت دايم أنا وأصدقائي نسوي لبعض فوروورد للرسائل اللي تجينا ونعرضها على

بعضنا ونتراسل دايما , فوجدت إنه أحيانا يكون فيه شيء إسمه قروب أو مجموعة بريديه تتيح لشخص

يسمى آدمن إنه يستقبل الرسائل من مجموعة أشخاص وينشرها عليها أتوماتيكيا أو يدويا . فحسيت

إنها شي حلو بحثت في هذا الأمر , لين لقيت شركة (Egroups) قبل إندماجها مع الياهو كانت تتيح

هالخاصية . ومن هناك بدأت فكرة إني أسوي قروب . طبعا بدأنا بأربعين شخص نتراسل ونوسع الصدر

هدفي منها سعة الصدر لي ولغيري . اللي بدأها معي وكان معي دائما هو الأخ فهد الطريفي .

2- في فترة من الفترات توقفت القروبات عن الإرسال لأعضاءها بسبب مشكلة في الصور من موقع

الياهو آنذاك … ولكن بقي قروب أبونواف وإستمر في الإرسال . حدثنا عن هذا الأمر ؟

اللي حصل إن الياهو أرسل تحذير , ينبه فيه لكل أصحاب القروبات عن عدم تخزين ملفات في الأرشيف

بسبب الضغط عليهم , بس مانبهوا عن اللنكات والصور إنها ماتشتغل . طبعا أنا كان عندي قروب

إحتياطي أجرب فيه شكل الرسائل وبعض الأمور الفنية . وبحكم معرفتي في الأكواد إستطعت الوصول

لحل هذه المشكلة . وأنا مستعد إني أقدم يد العون لأي قروب حول هذا الأمر وقد ساعدت الكثير منهم فعليا .

3- سمعت أنك يوميا تفعّل 500 يوزر مشترك جديد في القروب ألا يشكل لكم ذلك عبئاً ؟

وهل هناك من يساعدكم على إدارته ؟

هذا الكلام صحيح . لدرجة إني عملت قائمة بريديه لإستقبال طلبات الإشتراك . طبعا كان ممكن أنفجر

من الضغط الكبير لولا فضل الله سبحانه وتعالى ثم مساعدة سوالف القايلة في حذف بعض الرسائل

الغير جيده .

4- ماهي آلية القروب وكيف يدار ؟

على حسب خبرتي في معرفة أهواء الناس ( غريب – مضحك – عجيب – مهم ) عرفت وش ممكن

أرسل لهم ووش الشي اللي بستحوذ على إهتماماتهم . طبعا المكرر ماكان مسموح إنه ينزل أبد ….

وعندي عدد خمس رسائل فقط يوميا .. وماأخفيك فيه نيه لإنقاصها إلى ثلاث رسائل يوميا ………….

5- كان معك بعض الأشخاص يديرون القروب ؟ أين هم الآن ؟ ولماذا أوقفت يوزراتهم ؟

فعلا كلامك صحيح , في البداية تم تعيين 3 مشرفين على القروب عشان يتواجدون في الفترة اللي

ماأكون متواجد فيها .. أحدهم كان يمرر رسائل بالواسطة . والثاني لايتابع بتاتا . والثالث ينفر الأعضاء

بسبب كثرة المشاكل .

كانت سياسة القروب :

· الرسائل مفتوحة : وحصلت مشكلة بين فئتين على موضوع سخيف

أدى إلى أن يكون تمرير الرسائل بواسطة الآدمن .

· كان هناك خاصية السماح بالردود : وتم إيقاف هذه الخاصية عند وصول القروب إلى 3000 عضو

لأن البعض لايهتم بهذه الردود أو محتواها أو الموضوع اللذي يتناقشون فيه .

· الرسائل الخفيفة الحجم اللتي لاتحمل مرفقات , وتكون من إبداع الشخص نفسه والحقوق بكتابة إسم

القروب عليها .

المحور الثالث : الموقع

1- ماللذي جعلكم تزيدون أعباءكم بفتح موقع , مع أن القروب يشغل وقتكم ؟

لعدة أسباب , أولا : تأكيد هوية , وثانيا إثبات وجود بين المواقع ,

ثالثا توضيح هوية القروب وأنه يتبع لموقع . رابعا تقديم خدمة وضع مالديهم أمام الناس

بدون الحاجة إلى الإشتراك في القروب .

2- ماهي الصعوبات اللتي واجهتموها أثناء إنشاء الموقع ؟

كانت فكرة الموقع هي موقع شخصي , وهذا شي يصعب كثيرا إيجاد شيء من

دون مساعدة الآخرين لك .

3- ماهو السبب الرئيسي برأيك لإنتشار موقع أبونواف ؟

القروب هو سبب الشهرة .

المحور الرابع : المجالس

1- ماهي فكرة هذه المجالس , ومن اللذي ألحّ عليك لتفتحها ؟

لم أشأ أن أفتتحها للأمور التالية :

1- كثرة المنتديات .

2- كثرة المشاكل بها .

3- عدم التأكد من طاقم الإدارة بالمنتديات .

وقد حصل عليّ ضغط فعلا من أعضاء القروب لأنهم يريدون الرد على المواضيع في القروب

ولكني قد أقفلت خاصية الرد فطلبوا أن أفتح لهم مكانا يتيح لهم الرد .

فكرة المجالس : طرحنا السياسات من قبل الإفتتاح والقبض عليها منذ البداية …. وإشترطنا كإدراه

على المشرفين التكفل بها .

2- عند توقف المجالس لمدة ثلاث أيام بسبب السيرفر ؟ تعبت نفسيتك لدرجة أنك غيرت السيرفر ؟

حصل ذلك بالفعل لأنني أحسست بأن بنياننا سوف ينهد في بدايته , عدا كوني رجل أهتم لكل صغيرة

وكبيرة وأضع لها ميزانها وأقلق حتى يتم ماكنت أريده .

من اللقاء …..

· في القريب العاجل سوف يمكن تحديد نوعية الرسائل اللتي تريد إستقبالها من قروب أبونواف .

سألته حول الشبه بينه وبين الممثل السوري أسعد فضة فقال : يارجال غيرك قال إني أشبه

خالد عبدالرحمن يمكن بالشماغ خالد عبد الرحمن وبدون شماغ اسعد فضة وبالطاقيه معمر القذافي

خلها على الله

( بقلم : مطفوق )

عالم غريب ذالك العالم المادي البحت , عالم الأغنياء البخلاء الأشحاء , فعندما ذهبت قبل أيام

إلى احد المراكز الكبيرة رغبة مني في شراء بعض الحاجيات والحصول على كوبون .

أقول مليت من الفصيح

عموما رحت للمركز وشريت علبة زبادي وقلت ابي كوبونين قالوا ما فيه إلا واحد ويخب بعد . المهم

كان قدامي سوداني كتب اربع كوبونات يعني شاري اربع علب زبادي.. أول ما خلص ناداه رجال ودخله

المكتب , أنا أول ما خلصت ما انتظرت عزيمة رحت بنفسي وطقيت الباب وقلت تراي كتبت الكوبونات ,

قال طيب توكل على الله , قلت منتب معطيني أسئلة العام الماضي , قال اقول لك توكل على الله .

المهم رحت.. وكان السحب عقب 15 يوم على مرسيدس.. أنا من الساعة 6 الصبح وأنا بالمركز..

طقيت الكرت وجيت

المهم.. شوي ويعلنون أسماء الفايزين.. واللي فاز بـ ذهب واللي فاز بـ سيكل.. شوي الا قالوا الجائزة

الكبرى من نصيب.. الأمين احمد عصمان , طلع خويي ذاك اللي اخذه الرجال معه.. انا رحت أبارك له..

وأقول المرة الثانية بجي معك عشان يكلمني ..

شوي قال واحد.. ضعيف ذا السوداني.. الحين يعطونه 10 الاف حسب الإتفاق وخلااااص , أنا من

عقبهاااا. فهمت اللعبة.. وصرت اذا كتبت الكوبون قلت معليش ألفين ريال مهوب لازم 10 . أربع مرات

وأنا اشترك آخر مره.. دق التلفون الساعة 11 بالليل قالوا فلان الفلاني .. قلت ايه.. قالوا فزت معانا

يوم رحت لقيتها 4 ميداليات مفاتيح عليها اسم المركز.. وكورة بعد عليها اسم المركز

إعداد : وحده الله يستر علينا وعليها .

كيف تجعلين ريحه بيتك تهبل ………..!!

نعلم تمام العلم ان الذوق عند المراه السعوديه قالب علي التنده لذلك سوف اوضح لكم كيف

1/ اول ما يتجهز رجلك عشان يطلع للدوام

قفي عند الباب واطلقي تلك الابتسامه المدويه وقدمي له قائمة الطلبات وليكن من ضمنها : معطر جو .

2/ اذا اتي موعد رجوعه من الدوام احتريه عند الباب واذا دخل اطلقي نفس الضحكه اللي اطلقتيها الصبح

ثمين خوذي معطر الجو منه وبخي في بيتكم لمين تقولين بس

وهكذا سوف يكون بيتك رهيبا وريحته تهبل .

* نصيحة للرجل :

إذا دعيت إلى عزيمة وقلطوا الغداء فلاتجلس تسوي فيها إنك صغير ومنتب قالط مع الأولين يعنني

إحترام للغير لأ …. أقلط أول واحد وتنق لك مكان زين , أما إن دخلتا متأخر فتراك بتجلس ورا ذنبة

المفطح لأن محد يجلس وراها إلا اللي يدخلون متأخرين …. ولو اظطريت تجلس وراها فكب حبحر في

منقب اللي جنب عشان يحتر عليه الرز ويقوم وبالتالي تفحز شوي وتجلس مكانه وبالتالي تقدر تأكل

لحم زين موب زي أول جالس ورا الذنبه ولاتقدر تأكل شي ويقطعون لك الرجاجيل لحم تسنك بزر .

* نصيحة للبزران :

إذا دخلتا نفس العزيمة اللي قبل شوي ولقيتا واحد جالس ورا الذنبة لاتسوي نفسك مؤدب

وتقوم عن مكانك وتخليه يجي محلك لأنه موب ماكل هوا ذيك اللحظة إلا أنت …

* نصيحة للحريم :

لكي يحبك زوجك إذا راح للعزيمة السابقة الذكر ورحتي معه فأنكبي له شوي وحطيه بقصدير لأنه بيرجع

وهو ماأكل شي فتقومين وتحطين له من اللي انتي جايبته معك وبالتالي بيحبك ويقول إيييييييييه

هذي المرة السنعة اللي تحبني .

إعداد : مسوي راعي بر …

* فيه واحد طايرتن وشرته (( يعني خبل شوي )) طلع للبر مع مجموعة من أخوياه …. وبعد ماتعشوا

قام المعزب وقال لذا الرجال قم خل أصب عليك الماء عشان تغسل …. قام ذا الخبل وطبعا الوضع ظلام

مره مايشوف شي … المعزب بدأ يبول عليه وذا الخبل يغسل يوم جاء يتمضمض أوجس طعم غريب  ….. 

( بقلم : ضاري )

قبل أمس أنا مع خواتي بالسيارة.. ومعنا أمي.. اللي صرت اسميها (باتكس) ما عمري قلت أبطلع شي

إلا تقول أنا معك بكرى بطلب منها تقط عني مع الشباب واريح راسي.. الظاهر إنها ما بعد استوعبت

إني انفطمت من 20 سنه .

و الخوات قاعداتن ورى بالسيارة وما غير دودودودودودوووو يرغون رغي على قولة اخوانا

السواريه.. إلا على فكره ما احد يخبر لي سوريه.. استعمال صيني.. ياربييه وين رحت انا , خلونا

بخواتي أنا انفقع راسي.. البلا سواليفهم ماصله بالحيل.. اجل وشو القلوس الجديد.. – تراني ما ادري

وشو القلوس- وليش تنورة ريم أمس بالعزيمة نفسها حقت العيد.. وع عليهم سوالف توقف القلب , أنا

زعقت فيهم قلت شوفوا يا بنات الريح _ بنات الريح ذي دايما إذا قلتها أحس إني قاعد اشكك بـ رجولة

أبوي..

قلت لهم شوفوا اقسم بالله إن ما قضبتن السنتكن.. إني لا أخليكم تنزلون وترجعون البيت رجل , عااد

البنات بس تبي من يقول لها بو.. عشان تطلع ذا الدموع

قامت أمي قالت لي عييييييييب ذولي خواتك شعر وجهك

شعر وجهك هههههههههههههههههههههههههه يابطنييييينه ياناس

حلات اختي بدور بكرى الشنب.. وحنان السوالف خخخخخخخخخخخخخخخخخ و إلا بكرى إذا جيت أقول

للحلاق دقن أقول له شوي شوي على الشنب ترى بدور نايمه .. والله شي يضحك بجد.. تخيلوا بس

بكرى ادخل الحلاق واسمع صوت صراخ.. وبنت تقول لاااااااااا يرحم أمك لااااااااااااااااا … وأناظر

تحت وأشوف بنت جيرانا نوف تو أخوها حالق اللحيه وطاحت هي معهااااا …

واجي انا واخليها لاجئه عندي لحد ما تطلع لحية أخوها مره ثانيه و ارجعهااا – يارب ما تطلع لحية

أخوها إلا عقب سنه_

عموما.. اسم الله علي الرحمن الحريم.. وجعل عدوي عينه تتفضخ واللي وده ينظلني تدوسه تريله

ماشيه 240 على خط الدمام

قعدت أفكر بتفسير منطقي للمقولة الشائعة شعر وجهك .

ووصلت لنتيجة مفادهااا ان _ والله منيب هين والله.. بكرى بطلع نظريتي الثانية والثالثة.. وأخليكم

تدعون علي إذا مت وأنا بقبري جالس اكسب حسنات _ وصلت لنتيجه ان معنى كلمة شعر تعود لتعبير

مجازي مفاده الظهور والسطوع والبيان يعني ان الشعر دايم طالع للناس.. مافيه شعر إلا ويطلع

ويشوفونه الناس.. _ والله مدري هي صدز و إلا لا وان الوجه أول ما يهتم الإنسان فيه.. يعني إن

خواتي إذا صارن شعر وجهي الناس بيشوفونهن.. وتصير فضيحتنا بجلاجل.. بكرى الناس يدرون إن

اسم أختي بدور وين أروح أنا أحط راسي بالتراب زي النعامة.. و إلا انتحر من فوق الطاولة حقت

المطبخ . ( <<< الله من الملح بواسطة مطفوق ) .

رحت لامي وقلت لها تفسيري للنظرية _ أنا فسرت شي أساسا_ قامت الله يجزاها خير شرحتها لي

وقالت يا ولد شعر وجهك يعني اللي يعيبهم يعيبك والله يعيبك يعيبهم

قلت لامي

اقووووووول يا أم الشباب إذا على كذا فـ بناتك عايبات من سنييييييييييين

كما بدأنا بشكر الله عز وجل والثناء عليه والصلاة والسلام على رسول الله محمد صلى الله عليه وسلم

وعلى أله وصحبه أجمعين , ننتهي بذلك … وكما ذكرنا في المقدمة ننتظر مشاركاتكم ليوصلها لنا سوالف القايلة .. بالإنتظااااار …

قام بإعداد هذه المجلة :

المنقهر .. رئيس تحرير .

ابريق الكشتة … صاحب الفكرة ونائب رئيس التحرير .

بيالة شاهيبطارخسالفة خاصةبنت السعودية …. فريق الإعداد .

سوالف القايلة …. الإخراج .

كذلك إحتوت المجلة على بعض الفقرات من مجلة ابونواف (( هذيك اللي كنا نعتزم إنشاءها ولكن شاءت الظروف ألا تخرج إلى النور )) …..


أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

مجلة نص كم

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول