ليه يا قناة المجد ؟؟


السلام عليكم ..

بدايةً … أحب أشكر كل من راسلني بشأن موضوعي الأخير " بتاع " زواج المسيار .. صحيح أن الرسايل كانت مُختلفة الوجهه .. بعضها كان مؤيد من كِلا الطرفين .. والبعض منها كان زعلان وكانت الرساله مليانه " كلام وِحِش " والرسايل الزعلانه كانت بِلا شك من الجنس النسائي ..




أنا طرحت موضوعي بِلا رأي مني .. فقط كُنت أريد رأي الجميع تُجاه تِلك الحالة الظاهره .. والبعض فهم الموضوع مقلوب .. وبدا يشتم ويسب وكمان يلعن .. والله لو أني ذابحـ(ن) واحد(ن) من أهلكم كان ماسويتوا فيني كذا 

صراحة كنت أقرا بعض الرسايل ومُباشرة أغفل ضحك ويهزّ كرسيي بِلا شعور << الكرسي مُتفاعل معي وانا أقرا الرسايل 

قرأت أكثر من رساله مُضحه .. إحداها من إمرأه تدعي علي وتقول ( حسبي الله عليك ياهالمدمن .. أشوا أني اليوم قريت الرساله بدال زوجي اللي يتابع رسايل القروب .. وطحت في رسالتك بالصدفه .. أنت تبي تفتّح عينه على هالزواج .. مالت عليك ) .. ورساله أخرى من إمرأه أخرى تقول ( رسالتك يامُدمن مصيرها إلى سلّة المحذوفات مُباشرة .. الرسائل الغير مُحترمه لاتبقى في جهازي دقيقه ) ياهووه يارسالة غير مُحترمه  

ماودي أطيل عليكم وأسرد عليكم بعض الرسائل .. ولها وقفات مُستقبلاً في موضوع مُستــــــــقلّ راح أطرح فيه وجهة الكثير تُجــــاه تِلك الظاهره << والله يا أنت قلق بعد .. خلاص ياهوه .. يكفي طــــــــــــــــاري زواح مسيار .. اللي يشوفك آلحين متزوّج .. عزوبي منتّف وعايش على الأفلام المكسيكيه طول ليلك 

خلونا في موضوعنا ياقدعان ..

قبل أسبوع أو أقل قليلاً << فككوا الحروف وتعرفون وش معناها .. قبل أسبوع وصلتنا رساله من أخونا الغالي على قلوبنا : سوالف القايلة

كنت وقتها خارج منطقتي اللي أسكنها .. وكنت مع شلّة عزوبيه .. مثلي وشرواي .. ماعندنا شغل إلا " الحشّ " في فلان وفلتان .. ومشاهد  التلفزيون ومتابعة قنوات " دؤّي يامُزيّكا

ويوم أني رجعت .. وبالصُدفه زرقت للنت أشوف آخر الأخبار وأطالع خشّة بعض الشباب المتنّح .. ومُباشرة شفت خبر عن موعد خروج أخونا أبو نواف في برنامج حوار نت  

وفي الموعد المحدد .. جمعت عفشي وقحشت أغراضي .. وركبت موتري وتوجّهت لبيت عمي .. لأن عنده قناة المجد .. الموعد كان الساعه ( 8 ) مساءً … ومن الساعه ( 7 ) وانا حاطّ الشاهي قدّامي .. وجايب شويّة مكسّرات وسلك أسنان عشان إذا صار أبو نواف يسولف وماأعجبتني سالفته أبدا أشتغل في إسناني واستغل وقتي في تنضيف ماتبقى من لحوم ساكنه بينها من اسبوع 

المهم جا البرنامج .. وانا اللي أفزّ .. شوي إلا ويصــــــير اللي يحتسي واحد(ن) يقاله " سفياني " ! .. يتكلم عن موقع " أدب " .. وكان موضوعهم عن الأدب .. أيش الهرجه ياجماعه .. وينك يابو نوّاف ..

وانا اللي بغيت أبتسي من القهر <<< تسذوب ماعمره بتسى إلا مرّتين بحياته .. يوم انه بتوقيف المرور وعمره 15 عشانه قاطعـ(ن) إشاره .. والمرّه الثانيه يوم ان راشد يصفّقه بطلعة المدرسه

المهم ولا أطوّل << كل هذا وماطوّلت ؟

أذر الدعوه مقلب يابو نوّاف .. وش السالفه .. 

المهم .. كل شوي أصبّر نفسي .. واقول ان شاءالله بيجي .. وكل ماراحت دقيقه .. قلت في نفسي " يارب سترك " .. والوعد قدّام يابو نواف

مادريت إلا البرنامج ينتهي .. ويبدى المقدّم يودّعنا ويقول ( نشوفكم السبوع الجاي ) .. قلت : أغسل يدك أشوفك انت وبرنامجك .. آلحين  تواعدونّا ببو نواف … ثم تجيبون لنا سفياني 

صراحه .. ضاق صدري .. وتذكّرت ربعي في الاستراحه ..

تذكّرت الوناسه والفلّه اللي راح تفوتني ذيك الليله .. ولاحصلت لابرنامج ولاربع ولا استراحه 

بعد يومين من الحادثه .. وصلت رسالة إعتذار من البرنامج .. ووعدتنا بأن الطرح سيكون الأسبوع القادم لخلل حاصل في الطرح ..

واليوم راسلت أبو نواف  .. وصراحه بيّن لي أبو نواف أن البرنامج سيتم طرحه – بإذن الله – الأسبوع القادم .. لخلل حصل في تسليم المادّه وتسبب في تأخير العرض .. ووعدني خير وقال : يامُدمن مالك إلا العلم الغانم وعطني رقم حسابك أحوّل لك مبلغ عشاني تسببت في تعطيلك عن دشيرك في الاستراحه .. وقال لي أجمع لي حسابات أعضاء القروب لأني بعوّضــــــهم بمبلغ ألف ريال عشاني تسببت في تعطيلهم عن اشغالهم << المُدمن ناوي يسرقكم ياناس .. أنتبهوا منه 

أنا أقول ومن باب الأخوّه اللي تجمعنا في هالبيت الكبير :

" وعسى أن تكرهوا شيئاً وهو خيرٌ لكم "

الأخوان في المجد .. ماقصّروا .. سجّلوا الحلقه مع الأستاذ : أبو نواف ..

وأيضاً أخونا أبو نواف ماقصّر .. أعلن واجتهد وراح يقدّم في الحلقه الشي اللي ينفعنا جميعاً .

يعني الخلل في تفكيرنا لمّا " نزعل " ونقول " ليش أبو نواف يواعدنا ثم يُخلف " .. البرنامج مُسجّل … والمادّه وصلت مُتأخره إلى مصر .

ما أجمل النفس حين تعذُر نفس أخيها المُسلمه .. وما أجمل أيضاً أن نعرف .. أننا هُنا نسمع ونرى ونقرأ .. فالنفس مُخطأه بزللها الشيطاني .. ومامن بركه فمن الله وحده ..

 

كلمة حق أقولها : قروب أبو نواف متميّز بأريحيّة أعضائها .. وتقبلهم لجميع الآراء ..

قروب أبو نواف مُتميّز بنصائح أعضائه واقتراحاتهم لتطويره والرفع من شأنه ..

قروب أبو نواف مِنّا وفينا .. والوقفه معه بأي شكل هي في مصلحتنا الأولى والأخيره ..

 

للعلم : برنامج " حوار نت " سيتم بثّه  – اليوم الإثنين – الساعه الثامنه مساءً .. وستتم إعادتـــه يوم الثلاثاء الساعه 12.30 صباحاً << تصوّروا عاد مايعرضونه .. بفقّع وجه العدو .. عاد كل شي إلا أتفشّل قدّام الأعضاء

أخوكم : مدمن شاهي


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ليه يا قناة المجد ؟؟

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول