ليلة العرس

دايم دايم دايم ها الموضوع افكر فية *** مشغلني ذابحني ممردغني قاهرني باطن تسبدي
ليل نهار ونهار وليل
ليلة العرس وش بسوي في ليلة عرسي ؟ وكيف بتصرف ؟
وشلون بحتسي ؟ ووش بقول ان حتسيت ؟ ووشلون بتصرف ؟ (تحسون انه وجه نكبه من اولها)
اسئلة كثيرة ومعقدة افنيت سنين من عمري افكر فيها وابحث وادور عن اجوبة لها وسألت اهل الخبرة
بس لين اللحين ما عرفت شي (تبون الصدق اهل الخبرة لاعنين سابعي يقولن وخر يابزر )

خلوني اقولكم وش قصدي من القصة طبعاً العلم عند الله بس
هذي بعض تخيلاتي وتصوراتي للي بيصير في ليله عرسي
خبطت اقصد خطبت وبعدها تملكت حلو وجا يوم العرس وسبحت
( سباحة استثنائية باالعادة بس في الاعياد ) وفركت جسمي با الليفة
وفرشت سنوني  ونعمت وكديت قذلتي وحددت شنبي وقصصت اظافري
( علشان ما امخش ) ولبست صراويلي وفنيلتي وبعدها طقيت لك ثوب العرس

ولا ارضا بأقل من ثوب الدفة طبعاً عريس وبعدها صكيت القلابي وبيحمر وجهي كاالعادة
ولبست الطاقية الزري ( وععع) وفوقها شماغ العقل ابو خمسطعش وفوقة عقال متنتف

وأخيراً لبست آخر قطعة وهي البشت واكيد بكون متسلفة من واحد من الربع اما
بفصل واحد بذاك القيمة…. علشان ليلة معصي

وبتجي الوالدة الله يطول لي بعمرها ( قولو آمين ) وتبخرني وتصبصب علي من انواع الاطياب وبتقول
" ما شاء الله عليك حارسً يحرسك يا وليدي كلك ملح وقملة اقصد قبلة
وبتجي جدتي سوير وبعد ما تبسي ( الفلم الهندي زي العادة )
بتقول هي بعد " ولااااااااك يخزي العين شو ما احلااااااااك يا وسواس " معليش بس خوالي من لبنان

لا بتقول " مبروك يا عميري والله عشت وشفتك معرس عقبال ما اشوف عيالك معرسين )
وطبعاً بيخلل كلماتها هذي دموع ومشاهق ووقفات لمسح الدموع
با الشيلة ثم المتابعة وبينقصنا صوت ربابة علشان يكمل المسلسل يعني شغلة <!–emo&<_

سرت القافلة او الموكب وبدو طبعا صويلح وعبسي يظربون بواري بسياراتهم
( ددسن 85 وهايلوكس 88) وعلى بالهم يسون لي زفة

وفضحونا بسياراتهم ( من زين السيارة اللي عاد انا راكبً فيها ) والقراوى صويلح وعبسي
يحسبون لا صرت في موكب عرس يحقلك تقطع الاشارات وتعاكس في الشوارع وتسب وتلعن
في اللي ما يفتح لك الخط

انا اصلاً من شفت ضرسة اللي في الواجهة طايح ويقولي ماكلن لبان وانا غاسلً رجلي منة

وصلنا للقصر واكيد انة بيكون في حي النسيم لاني طفران وماني قد قصور الافراح اللي باالعليا

بيعرض اخوي بسيارتة عند المدخل وبيجون يركظون اخوان العروس يفتحون لي الباب
( هين كلها شهرين ويتوطون في بطني ) 0

0 مع ها الاجواء الحلوة والريحة الزينة بيهجمون علي الناس ويحبحبوني وبلقى انواع السعابيل
على خدودي "يقلدون القراوي اللي يجون ورا الكاميرات في القناة الثالثة السعودية
ويقعدون يحبحبون في دميجت هاللعيبة …نوع من الأستعراااااض …علينا "

بيدهرون المبزرة باالقهوة والواحد منهم لاجا بيصب لي الفنجال بيقعد ينتفض ويرجف من الرهبة
ولو هو جالس يصب للعريس !

بيغثوني قهوة وشاهي ومتأكد انة بينكب فنجال قهوة على ثوبي من واحد من ها المبزرة اللي يصبون

عادي حصل خير وعقبها كل شوي جايني واحد يسلم ويحبب فيني وابو العروس بيسوي
فيها فاهم وبيقولي هذا فلان وهذا علان موش مشكلة بمشيها لة
بعدها بيجي صويلح وباقي العيال يستهبلون علي عند ابو زوجتي ويتطنزون

علي ويعلقون على شكلي ويضحكون ويستخفون دمهم بس برضو بعديها لهم 0
في اللحظات هذي اخوي بيكون في مطعم يامال الشام يشتري لي ولزوجتي عشاء وغالب
الظن بيكون مشويات وخلافة ولايهون عصير ابو طبقات

وبعدين بياخذ العشاء ويودية لشقتي ويحطة في المطبخ بعد ما يغطية بسماط
وبيحط جنب العشا بكت الزقاير داخل واحد من اباريق الشاهي… عشان ماتشوفه المعزبة

في القصر بيقوم ابو العروس ويرفع راسة وكرشتة وبينسف شماغة ويقول بصوت عالي للضيوف
" ياالله تفضلو يا جماعة على قل الكلافة العشاء جاهز وهذي والله الساعة المباركة
اللي خلتنا نشوف وجيهكم الطيبة (الله من الشلخ …محد درا عنك يارجال)

بينفتح الباب وبيدخل وبيجرني معة ووجهي بيكون لونة ازرق + احمر
واتصور انة بيطلع في وجهي لون زركوني <!–emo&<_

بدخل وبلقاء عروستي واقفة ولابسة الثوب الابيض والشرعة على الراس
وماسكة باقة ورد بيدها واكيد انها بتكون منزلة رويسها
" طبعاً هذي اول مرة اشوفها " واكيد انها بتعجبني طبعاً " بنت "
المهم جنب المخلوق الرقيق اللي هي عروستي بتكون فية وحدة واقفة جنبها

من فصيلة الثديات زينه بس اشباها شرانية وبتناظرني بقرف وودها
تزنطني ليش ما ادري هذي هي حماتي ام زوجتي

بجي منبرش وبسلم وبعدين بروح لحماتي واحب راسها والله يعيني على ريحة الحنة اللي براسها
بجي عقبها اسلم على زوجتي وبتلخبص مدري احبها والا لا ؟ اخاف احبها ويجلدني ابوها
.
.
.

بس تدرون منيب حابها بعدين خخخخخ

بيطلعون امها وابوها بعد ما تقعد تقرقر امها با الحتسي اللي ما لامة داعي وهو
" حط بنتي في عيونك " وش قالو لس فاتح فندق في عيوني يوم اني احط بنتس فية
؟ والا خذ هذي " ترا بنتي هذي اغلى ما عندي وابيك تحطها بين عيونك "
وهي عندها غير ذا البنت خمس وكل ما اعرست وحدة قالت نفس الحتسوة !

طلعو وصرنا لحالنا انا وزوجتي وبتمر الثواني كنها ايام علينا مغير ساكتين هي تعفط في ثوبها
وتكسر اصابعها وانا ماغير اغير شخصية الشماغ مرة انسفة منا ومرة منا والتالية بصك اللطمة
بيدخل ابوها علينا ويقول ياالله بتروحون لبيتكم والا بترقدون
عندنا وهو يضحك ( على بالة ينكت عادل امام على غفلة <!–emo&<_ )

اكيد بضحك وبقهقة مسموعة مجاملة لة هو وكرشتة اللي تقل كيس شعير
وبقوم انا وهي بتلبس عباتها وبنطلع لسيارتي واكيد بتكون الكريسدا حقت اخوي
بيمدية رجع من المطعم ولبق سيارتة في الكراج وخلا مفتاحها عليها

شغلت السيارة وجت بتركب زوجتي وبتجلس ساعة بحلة بعمرها هي وثوبها المنتفش
ووردها اللي معها وباالاخير بينصك بابها وبدق الريوس واطلع من القصر <!–emo&<_

متأكد في اللحظة هذي صويلح وباقي العيال بيكونون في سياراتهم وبيلحقوني
على بالهم بيصرقعون بي ويبهذلوني !

وبيوقفون جنبي عند الاشارة والله من زين الاشكال اللي يطالع ويضحك علي وصويلح
بيزيد على صوت المسجل وبيرقص سامري على بالة مقلع بس بعطيهم اشكل وبيروحون في حالهم

عاد حنا مازال الصمت مخيم علينا في السيارة سوا صوت بعيد باالعافية
يسمع خارج من سماعات السيارة وكان صوت بشير شنان يغني وصوت المراويس

وفلة الحجاج والعالم الله اخوي نسى يطلع الشريط لانة مجنون بشير
بسوي فيها عاقل وبصك المسجل وبلتفت على المدام لعل وعسى يبدا الكلام بيننا

طبعاً ماراح اشوف شي غير السواد وبقول مو مشكلة في البيت نسولف على راحتنا
وصلنا البيت وفتحت باب الشقة وولعت اللمبات وقلت لها تفضل يا عروسة نورتي بيتس
( اسلوب صح ) وبتدخل بحياء ممزوج بدلع على شوية كتشب وبقدونس( صارت مطبق مهيب آدمية )

فصخت العباة ووقفنا في الصالة وريحت العشاء فايحة في كل مكان وخصوص الثوم
مع اني بكون محرص على اخوي قلهم بدون ثوم بس ياالله
بقوم افرجها على الشقة مع العلم انها قد جتها قبل يوم انها تجيب خلاقينها
وعفشها وكا العادة بكون مسوي جرد على كل شي جابتة عقب ما يطلعون من الشقة خخخخخخخخخ

بعد الفرجة وبكون اتميلح اثناء الفرجة واحط تعليقات مظحكة محاولً استخفاف ثقل دمي
رجعنا للصالة وانتصينا فيها واقفين !

ياربي وش نسوي اللحين ؟ بقول اوووة العشاء نسينا العشاء ههههه وبضحك كذا هههههه ( يا شيني )

بروح للمطبخ اجهز العشاء وفي اللحظة هذي بتتكلم اخيراً وبتقول : آاااا لا لا استرح انا اجهز العشاء
بكل تأكيد كل صواميلي بتنحل بعد حتسية ذا وبتنح شوي وبقول : لا والله ما تروحين الليلة
ليلتي وبسوي كل شي بنفسي انتي عروس ما تسوين شي انتي بس تآمرين ( آاااة يا مصلحجي لك غرض <!–emo&<_ )

بدربي دميجتي للمطبخ وبكون لين اللحين ما فصخت بشتي من زود الثوارة وقلة الدبرة
تعشينا وكني اشوف شكلي وانا اتعشى مسوي نفسي فاهم وآكل با الشوكة والسكين وانواع الحوسة
والمطرسة وكل ما جيت امسك شي با الشوكة طارت من صحني واستقرت على فستانها
وكني اسمع صوت المماطق اللي بيطلع من اثمي وانا آكل الحمص وبيبقى شوي حمص
على اطراف خشتي زي العادة وزين ان ما طال خشمي شي بعد

وهي بتآكل اكل نمل ابد بتقعد تقطع من ذا الخبز وتاكلة من زود الحيا ( او يمكن بتحوم تسبدها من طريقة اكلي )

وجا وقت العصير وبشرب ابوة كلة وبقعد اتفنن بشرب آخر قطرة في الكاس
با الشفاط وبتطلع ذيك الاصوات المزعجة ( جغغغ غررر جغغغ)

بطلع وامخمخ على هاك الزقيرة وبرجع وبتفاجأ انها لين اللحين بفستانها
؟ طيب وبعدين ؟
بنقضي الليل وحنا مشخصين بثيابنا انا ببشتي وهي بفستانها
بفكر وافكر بطريقة المح فيها لها على انة خلاص عاد يا الله

بنقابل التلفزيون شوي وبعدها ببدا اتثاوب ( يعني فيني النوم )

ان كانها ذكية فهمت بس احس ان زوجتي بتكون غبية فعلشان كذا فكرت بطريقة ثانية
الا وهي بقول لها " ما ودس ننام " ما فية باالوجة عدل

تبي تتلخبص البنت وبيقلب لون وجها لعدة اشكال وبا الاخير بتقول " تونا بدري هذانا نسولف "
بعدها عاد ……….
.
.
.
.
.
.
.
.
.
ماصحااااااني من النوم إلا طرااااااق …من ابووووووي يقوووووووول قم لعنت الله على من زمزمك "ايه ابوي كان يشتغل
بالحرم ايام اول من قبل يعني …. ابي افهم صح )
طبعا يقومني من النوم عشاااااان عرس اخووووووي …وانا بعد ببطي ليييين يجي دوري …لكن تساهيل

عاد اللي يبييجي لا يستحي.. ( ادري انكم متشققين الحين )