لوحات مواطن


لوحـــات مــواطن

تأليف / أبو هديب

هناك عقول أصابها الصدأ والفتور
وضاعت منها الأمانة والحضور
لتصبح كمن يترنح من أثر الخمور
o
o
o
معاصي في السفور
o
o
شفاه تبتذل السرور
o
o
جهل خالطه الغرور
o
o
كلها تمثلت في لوحة رسمها الإنسان المغمور

* * *

شاء الله أن يكون في طريقي ذلك الرسام الرث الذي أصر بأن أحضر معه و أشاهد لوحاته في (( قراج )) منزلهم المتهالك لأسأله عن أعماله مبتدأ بتلك اللوحة …

اللوح … هـ (( 1 ))

صورة رجل مرور وهو يقف وأمامه مجموعة سيارات يطالبهم بأوراق وفي طرف اللوحة سيارات كثيرة وقفت بجانب الرصيف .. وأناس تلتف على رجل مرور آخر والحزن على محياهم محمل بالبؤس .. التفت بدوري وسألت الرجل والزكام قد شطر أنفي (( صاير كنه عرف ديك ضاربته فلونزا الطيور ))

ابو هديب / بالله يا ( نور ) وش هاللوحة تكفى حسيت وأنا أشوفها كأني واقف في البطحاء ..
نور / ابد يا ( أبو هديب ) هذي صورة المرور بعد استلام رواتب الموظفين
تنهدت وأنا أصد عنه كي لا يراني وأنا أمسح أنفي في كمي
أبو هديب / تصدق هالمرور يضيق صدره لو درى أن عندك فلوس وما أخذها ، ولا يهونون حقين الاتصالات ما يصدقون على الله يطلع راتب الموظف ويلهطونه مطبقين سياسة المنشار .. وكله كوم وتسمية الضرايب رسوم كوم ثاني .. <- شطحه مالها سنع
أخذ نور يرسم وهو يجيبني
مهوب هنا المشكلة المشكلة أنك عشان تسدد لهم تورم رجليك من المشي وفوق هذا كله انفس مخيسة (( كنها ريحة شراريب بنقالي مافصخها من يوم طلع فيزته للسعوديه ))
أبو هديب / يا رجال مسخرة عشان تسدد اللي عليك لازم تفتح حساب في جميع البنوك بنك الرياض للمرور والجوازات ، والراجحي للاتصالات ، حتى الاكتتابات اقتصروها على بعض البنوك (( صورة مواطن يمشي على جنبه من كثر بطاقات الصراف في البوك ولا فيها رصيد عايش على الإداع الفوري عشان يسدد ))
ضحك نور لتخرج أسنانه السوداء  ليقول لي ..
يبن الحلال الحركة هذي قوة الترابط بين السعوديين صاروا يتعرفون على بعض عشان حسابات البنوك (( صورة مواطن غير المواطن اللي فوق يقول لمواطن ثاني بالله عندك حساب في بنك الرياض سدد قسايمي ولا عليك أمر ))
نطق كلماته ثم عاد إلى الرسم

قاطعته وأنا أشير إلى لوحة أخرى وأبدي إعجابي به ..

اللوح …هـ (( 2 ))

_ ما شاء الله وش هالرجال الخير ثوب قصير ودقن وفاصخ بشته بيعلقه على المعلاق .. بس ليش حاط صورة ساعة في الجدار وعقاربها تشير على (( 11.30 ))
نور / هذا الله يسلمك دوام القضاة في المحكمة الكبرى توه يبدى هالوقت والناس منقعة من ثمان الصبح عندهم ولا همهم صارو علب مخلل من قوة الإنتظار ..
أبوهديب / تصدق على طاري منقعه هالحين عرفت سبب انتشار مرض البواسير اثره من كثرة الجلوس والانتظار
نور / لا وأزيدك من الشعر بيت يقولون أن المحاكم فايزة على الوزارات كلهم بأحسن قهوجية يضبطون القهوة والشاهي والحليب مع الزنجبيل في الشتاء (( صورة واحد متلحف بالفرشة ما لقى من ياخذ حقه ))
ابتسمت بكل خبث
_ وأنا أقول ليش ما نحصل التمر السكري في السوق أثره يخلص في المختصر حق الشيخ بعد ما يبدى دوامه
(( ملحوظة الكلام عن البعض مهوب يجيني واحدنسبهه يقول لا تعم ))

اللوح … هـ (( 3 ))

دنت التفاته مني لأرى ذلك الرجل المسن الذي لامست لحيته قاع الأرض من شدة الكبر وهو يقف وفي يده ورقه وأناس على مكاتبهم يشيرون بأصابعهم خلفه لأقول بكل غضب مصطنع
_ بالله يا ( نور ) وش هالصورة عسى بس مهوب يطردون الشايب برى الغرفة
نور / لا هذي صورة مراجع متمرمط في الدوائر ا لحكومية كل واحد يرمية على الثاني
تأففت وأنا ألمس صورة العجوز (( بزعمك بتمسك يده عشان تقومه ترى لوحه يا أبو الشباب ))
أبوهديب / يعني بتقولي أن هالشياب كان في قوته وما بدى يشيخ ويمرض إلا يوم بدى يراجع في الدوائر الحكومية عندن .. ما تلومه والله اسألني أنا تنعل كبدك وأنت تدور بالمعاملة من مكتب إلى مكتب وآخر شي توصل لمكتب الموظف وتجلس تنتظره ويدخل عليك زميله ويسالك تبي شي ؟ .. تقوله وين زميلك يقولك مجاز تسأله متى يجي يقولك والله الغايب عذره معه (( يسمع باللباقة ويا خشته الظاهر أني سائله بيطولعند المدير والا لا)) .. والله حالتنا حاله ما نقدر نقول شي والا تتعسر أمورنا أكثر خلها على الله

اللوح … هـ (( 4 ))

مشيت خطوة لأرى الصورة الأخرى فإذا بي أرى صورة امرأة عجوز وقد بنى العنكبوت بيته على وجهها وهي تجلس بجانب باب حديد والبؤس قد حفر مجرى على خدها لأقول بتعجب ..
_ يا حبيبي وش هذي بعد اللي أتخذ العنكبوت من وجهها بيت ومن فتحات خشمها ملجأ.. ليكون ميته وما لقت أحد يدفنه ..
نور / هذي العجوز الله يسلمك جالسه عند باب الشؤون الإجتماعيه تنتظر المعونة السنوية ومن طول الانتظار بنى العنكبوت على وجهها (( ردد ياليل ما أطولك ))
أبو هديب / .. يا بخت العنكبوت محد هاد بيته أبد دام المعاملة حقتها في الشؤون .. ( نور) على فكرة ترى ذنب هالعجوز في رقبتك ..
نور / ليش .. ؟؟
أبو هديب / لأنك عارف أن جلستها مطوله كان المفروض رسمت لها دورة مياه في اللوحه بدال ما تقضي حاجتها في مكانها وتنجس المكان .. حرام عليك كذا (( والله من التنسيم ))

* * * *
اللوح …. هـ (( 5 ))

تطلعت إلى تلك الفتاة السمينة وفي يدها بقشة وهي تبكي لتحاول فتاة أخرى أخذ حمولتها منها لأقول وأنا ممسكاً بضحكتي
_ أبسألك يا ( نور )تانكي هالصرف الصحي وش عندها تصيح
نور / هذي صورة بنت طلقها زوجها لانها من يومها صغيرة وأمها تخلي الخدامة تشتغل عنها الين كبرت ومعد صارت تفهم حاجة في شغل البيت وسمنت .. بالعربي صارت أتكاليه تبي الكل يصلح شغله . ( الكلام موجه للحريم الاتكاليات مهوب للي عندهم مشاكل في الهرومنات -صورة مع التحية للناس السبك اللي ما تفهم الا بالشرح )
أبو هديب / وين تبي هذي تشتغل معه .. هذي لو اشتغلت شميت ريحة كفرات محترقه من بين فخوذها (( صورة فاعلت خير ماده لها فازلين وصاده بوجهها للجهة الثانية ))
بالله تصدق ودي آخذ هالصورة وأعطيها لشباب في الأستراحه لأن الموية تنقطع عندهم بأستمرار ولا يقدرون يسبحون في المسبح حقهم .. عشان كذا ودنا نحط هاللوحة في المسبح كود تمليه بدموعه
تنهد ( نور ) وعاد للرسم وأنا أومأت برأسي بخجل ثم رفعتها لتقع عيني على لوحة جمعت الكثير من البشر وقد تشكلوا على شكل دائرة ومن بين أقدامهم خرج طرف قدم مغرقة بالدماء

اللوح .. هـ (( 6 ))

أبو هديب / الأخوان في الصورة هذي يطلون في قليب والا وش قصتهم
نور / لا هذولي متجمعين على واحد مصدوم ومحد منهم فكر يساعده
أبو هديب / آآآه خايفين من ان التهمه تلبس واحدن منهم لو مات وهو معه .. يحق لهم لانه على بال ما تثبت برائتة يكون خطاب فصله من عمله قد طلع نتيجة تغيبه (( صورة واحد يقول مافيه أمل يعطونك عذر إلا بطلوع الروح وأن عطوك قالوا لك لعد تعودها وتشيل شي مهوب لك << وين يا عمي محفظه وإلا آدمي ))

* * * *

تأففت وقلت بكل غضب وملل..
_ ياخوي وش هاللي يضيق الصدر والكآبه أنا ماشي تبي شي ..
نور / أيه .. خذ هاللوحة هديه مني لك ولا تفكها إلا في بيتكم وعلقها في الصالة ..
أبو هديب / طيب خلاص

خرجت من منزله فإذا برجل على دراجة يقف أمامي وينظر إلي بعمق لأقول له
_ خير يا الحبيب مضيع بيتكم وجاي تشوف الكروكي في وجهي
تقدم مني وقال لي ..
الغريب / أنتبه الرجال اللي توك طالع من عنده ترى ملحوس وطالع من المصحة النفسية … هذا غير المباحث ماسكينه كم مره ويخلون سبيله عشانه مختل عقلي
نطق كلماته ورحل لأنظر إليه وإلى اللوحة التي في يدي وقد لفت بجرائد كثيرة
نزعت الجرائد عن اللوحه بكل غضب ونظرت إليها لتشخص يعني حتى كادت أن تخرج من محجرهما ، فما رأيته لا يصنعه أعتى ساحر على وجه الأرض لقد رأيت صورتي وأنا قد أعطيت ظهري لتلك الصور التي أشرت إليها دون أن أكترث لها أو حتى أشعر بها وقد كتب في آخر اللوحة
(( أنت مثلهم لم يخفق قلبك أبدا ، بل أصابك الملل كحال من يرى الحروب والقتل في القنوات الفضائية ويغيرها بسرعة إلى قنوات الأغاني دون أن يكترث لموت أخوته ))
رفعت بصري إلى حيث ذهب الغريب ومن ثم إلى اللوحة وأنا أقول في نفسي

من المختل
o
o
أنا
o
o
أم أنت
o
o
أم هو

* * * *

(( النهـــايـــة ))

أتمنى من الأخوة الذين انتقدوا موضوع / سميرة

أن أرى رددوكم على هذا الموضوع وأرجوا الا تكونوا مجرد فقاعة صابون

الموضوع القادم /

الخطابة أم سرور

الإيميل([email protected])


تعليقات 37

  1. ياخي انا من الندفعين وراء قلمك الجارف ولكن لماذا التنازل عن حق ابداعك في موضوع سميره من قال انه فقاعة صابون !!! وهل كلام المغارضين للموضوع السابق لهم دور في اثبات ما قدمته من ابداع هل بهذه السهوله تنازلت عن حقك وعن قناعاتك اتمنا ان نجد رد واضح يوقف كل من اعتدو على حقك الفكري في الموضوع وعدم الاكتفاء بالصمت او الانخراط وارء ارائهم الخاطئه لك تقديري واتمنا لك دوام العطاء

  2. السلام عليكم ورحمة الله وبركاته يعطيكـ العافيه اخوي على هالموضوع الرائع لكن لي عتب على اخر تعليق لكـ في الموضوع انت بطرحكـ للمواضيع معناتها انكـ تطلب من الاعضاء رايهم وانتقاداتهم وليس فقط مدييحهم وثناءهم والزوار غير مجبرين على الرد على اي موضوع لانهم متصفحين غالبا فلازم تتقبل وجهات نظرهم بصدر رحب وتجعلها دافع لكـ للتقدم والتطور مهما كان نوعية الرد الا اذا انت متعود على المدح فقط !!! اذا عندكـ حساسيه من النقد فاجعل مواضيعكـ شخصيه لنفسكـ بصراحه موضوعكـ هاذا اعجبني بقوهـ لكن مازلت غيرمعجب بذباتكـ تقديري واحترامي تسبق تحياتي ^_^

  3. حي الله ابوهديب سلمت وسلمت اناملك الذهبية وكيبوردك الفولاذي الصارخ الكاريبي < ؟ منذو مبطي يعني حوالي خمسطعش سنة ضوئية وانا اتابع مواضيعك ويوم بعد يوم سلبت عقلي < على شحم يعني اقصد اثرت اعجابي ولم يتسنَ لي التعليق الا على هالموضوع وكانت اغلب القصص رائعة من ناحية السرد وتصوير الشخصيات حتى الاسلوب كان رائع وكل مره تبدع اكثر وتستفيد من ملاحظات المواطنين < لا يكون وزير خخخ المهم مالك في الطويلة الموضوع هذا اكثر من رائع و مختلف عن مواضيعك الماضية اللي يغلب عليها الطابع القصصي وكلها في الصميم وما عليك من الحاقدين يابوهديب دز وحنا نعزز وراك < وين يبو سلامات ؟ بالتوفيق وننتظر موضوع الخطابة ام سرور بكل شغف مع فائق تحيات وتقدير معالي سموي الكريم اخوك / نـ م ـرٍ

  4. القصه حلوه بس فيه أشياء أنا مافهمتها .. والمشكله مني مب من عندك 😀 <- تعاني من بطئ الاستيعاب .. تعجبني فيك ثقتك بنفسك رغم ردود بعض الناس 😀 واصل الى الامام .. بس بقولك سر .. كلمه ماصدقت على الله ماتجوز .. لأنها تعني أنك ماتتخيل ان ربي ممكن يسوي هـالشي .. استبدلها بكلمة ماصدقت بدون الله 😀 وعساك عالقوة

  5. السلام عليكم ورحمة الله وبركاتة في الحقيقة انا توني مشترك جديد في قروب ابو نواف وشفت لك موضوعين بس ومن الموضوعين هذي ابدي لك شكري على موضوعاتك المتميزة والهادفة واتمنى منك المواصلة في ابداعنا بقريحتك الحراقة ودي وشكري ….معجب باناملك

  6. هالزمن زمن التناقضات ,, الصادق يتكذب ,, والكذاب يتصدق ,, الزين ينقال عنه شين والعكس يصير ,, الصح غلط والغلط صح ,, اللي يقول كلمة الحق ينكره ويصير منبوذ واللي يراوغ ويلف ويدور ينحب ! الرسالة الأخيرة مرة مؤثرة ,, فعلا تبلد احساس الكثير منا وتلخبطت الأولويات ,, صارت أخبار حثالة الناس من أهل الفن أهم من أخبار اخواننا المسلمين شنقول بس , ,الله يصلح الحال يعطيك العافية بو هديب وعساك على القوة

  7. تسلم والله يعطيك الف عافيه كل اللوحات تمس بواقعناا الصرااحه وجبتها مثل ما يقولون واصل بالكتابه ^^

  8. 😀 دعني انحي لك وارفع قبعتي اجلالا لهذه المدونه التي جعلت انتباهي يتباها بانه قد قرأها اسلووب رائع وكتابه ذهبيه حتى في السرد لم تكن مبالغ بل كانت تلك هي الحقيقه لا استطيع النقد فانا اصغر من انقد ما خطت يداك دمت وسلمت ولك مني جزيل الشكر والاحترام

  9. الاطار العام للمدونة جديد وممتع , وفكرة اللوحات المتعددة كمان خلاقة . الدعابات محبوكة. حتى نكسبك ناقد لأحوال المجتمع بصورة رائقة راقية أكتب بغزارة . ودمت بخير.

  10. مرحبا …عساك اتكون بخير:D انا سعيده بكتاباتك الجميله وكل موضوع يجعلني افتخر فيك اكثر واكثر قرات مواضيعك اللي توصلني باليريد واتمنى لك تقبل كل اراء الجميع بروح جميلة…عساك ع القوه.. اختك ام نواف

  11. السلام عليكم …. ابو هديب ……… انت خليتني احب القرائه الحين موضوع ما اقدر الصراحه على وصفه اقل شي اقولك … وانا اقرا الموضوع كاني قاعد انا ضر فلم تخيلت شكل القراج … وتخيلت الحرمه المعفنه…:( وبرضو تخيلت يوم تقول ذبتك هذيك يوم يناضر بطرف عين وتقوم انت وتنزل عينك:$ ابو هديب ما ادري اسميك الكاتب ابو هديب او المخرج ابو هديب او الشاعر ابو هديب لا هنت عزيزي اتمنا ان تواصل مثل هذه المواضيع لانها صراحه تحكي واقع بغض النضر عن الخيال .. ابو هديب واصل … انا متابع لك

  12. السلام عليكم انا مشترك بالقروب منذ اكثر من 6 سنوات ومن المتابعين الجيدين لمواضيع الاعضاء الاكثر من رائعه لكن للاسف لا اشارك بالرد لكن يا اخ ابو هديب ابداعك كان اقوى من كسلي وهو اللي خلاني اكتبلك تسلم ايدك يا مبدع على هالموضوع اللي اكثر من رائع

  13. يعطيك الف عافيه على هاذا الطرح والاسلوب الجديد مع التحفظ على بعض (الذبات) اللي فيها توصيف زايد عن اللزوم صراحه ولا تليق بكاتب مثلك ا ناصراحه اول مره اشوف كتابه لك لكن اخبرك وبكل صراحه انك كاتب مبدع لأن اسلوبك مستقل يدل على انه نابع من ذاتك ولست من طائفة المقلدين واعتقد انك نجم مبدع بدون المبالغه في (الذبات) فدع الذبات لمن تخصصو فيها واستمر على اسلوبك وخـيالك الرااائع (وياليت تدقق شوي على الاملاء) <<قعدت ساعه الين فهمت عبارة (لتشخص يعني) اللي موجوده فوق ا ثره لتشخص عيني .. تحياتي لك

  14. لك وحششششششه والله يابو هدب ولكتاباتك وحشه ما شاء الله جاك عقد احترافي وصرت تكتب هوون اهم شي ايميلك مثل ما هو من تسعين سنه وانا مثل ما انا ودي اضيفك من سنه وكل مره أأجل ههههههههههههههههه ما يحتاااج طبعا تعليق على مواضيعك لانها كلها في الالف اكبر تحيه وسلااام من شخص يمكن ما تذكره من كثر الاشخاص اللي مروا بحياتك ^___^

  15. 🙁 ـآلصراحه هذه احلى قصه كتبتهآ .. وآقع نعيشه 🙁 وكسرت خاطري تانكي الصرف الصحي خخخخخخ :$

  16. مواضيعك روووووووووووووعه اخي ابو هديب يسلمووووووووووو ونحتريك جديدك يالغلا

  17. اشكرك يا اخ ابو هديب على القصص المسليه ذات الاسلوب الشيق القصه معبره جدا جدا جدا انتظر جديدك

  18. إسقاطاتك بالصميم ابوهديب واقع نعيشه بكل تفاصيله وانت كاتب رائع ونقدك صريح شكرا من القلب

  19. السلام عليكم ورحمة الله وبركاته : أخوي أبو هديب : لقد جسدت جميع معاني الأنسانية فقبل أن تكون مدونه مكتوبه للقراءة ، فقد كانت في ناظري لوحة مكتلمة الألوان قد كان ختامها تذكير لمن قد غفل عن ما كان يدور حوله من قسوة ( الزمن ) فأنا هنا لا اتهم ( الزمن ) بفعل ذلك أن اتهم من هم يرون ما تفعل الثواني والدقائق والساعات والأيام …. السنين وهم لا يحركون ساكنين انغمسوا بترف الدنيا فلم يرونا إلى ….!!! فكل الشكر لك على ما سطرته اناملك .

  20. مرحبااااااااا أبو هديب والله حتي انا اتابع وما أرد.عالمواضيع لاكن.. راح أرد ..عليك..هالمره..لأاني ماراح أسمح للي عقولهم صغيره وتحب بس تنتقد أنها تحطمك..وتضعف من عزيمتك.. فعلا الردود والتعليقات الناقده الجارحه…تضعفني… انا مشترك بمنتدي تصميم..ودايم أنزل تصاميم …والله أجلس عالتصميم أكثر من ثلاث أيام.. طبعا بشكل متقطع…وبالاخر يجي شخص ماعنده لا ذمه ولا ضمير..وينتقد ويجرحني..قسم شوي وأصيح…:( ياخي النقد الجارح يرفع الضغط حتي بالحياه العاديه.؟.أنا لما أحد ينتقدني ..يابو هديب نقدهم مو يقولون ..ش يزين..لا..يقول التصميم مو حلو ولالالوان مو حلوه ..والخامات مو حلوه..ولو مانزلته أحسن… لأنه ما يستحق العرض..حراام والله حرام أذا جلس شخص ضعيف نفس يحب بس ينتقد..ويجرح بالعالم .. لأن هذا النقد له رده فعل علي العضو صاحب الموضوع بشكل مقزز الي درجه كبيره جدا…حتي بالحياه العاديه.. أنا أذا انتقدوني ..تخرج رده الفعل..الي خارج النت ..ويتغير تعاملي.مع المحيطين بي..والله.. أمانه لاترد علي القليل خاتمه…ماعليك ياشيخ رووح بس وحنا معااك..هذي ناس بس تبي تنتقد..بشكل اعمي.. وانا اللي حطيت الموضوع بالمفضله >> ياحظكــ…ياقوي..8)

  21. أبوهديب / يعني بتقولي أن هالشياب كان في قوته وما بدى يشيخ ويمرض إلا يوم بدى يراجع في الدوائر الحكومية عندن .. ما تلومه والله اسألني أنا تنعل كبدك وأنت تدور بالمعاملة من مكتب إلى مكتب وآخر شي توصل لمكتب الموظف وتجلس تنتظره ويدخل عليك زميله ويسالك تبي شي ؟ .. تقوله وين زميلك يقولك مجاز تسأله متى يجي يقولك والله الغايب عذره معه (( يسمع باللباقة ويا خشته الظاهر أني سائله بيطولعند المدير والا لا)) .. والله حالتنا حاله ما نقدر نقول شي والا تتعسر أمورنا أكثر خلها على الله اااهـ يابوهديب خلها على الله بس

  22. الدوائر الحكومية لم توجد لك وحدك هل تعتقد ان الذين جالسين على المكاتب في قلوبهم عليك شي لا والله لا يعرفك ولا يتجاهلك بعدين تتكلم على الناس وكأنك اطهر منهم ياخي حسن اسلوب النقد عندك سلام

  23. أبو هديب أنت دائما مبدع وهذا شيء ليش بغريب عليك يعطيك العافيه قصه جميله جدا أعجبتني

  24. :):):):) ايش المقلب دا بس الصرااااااااااااحة .. الأبداع في العبرة من الموقف … سلمت يداك ابو هديب .. واذا كان المختل عقليا بهكذا يفكر فماذا سيكون تفكير العقلااااااااااء ..

  25. هههههههههههههههههههههههه والله تعللليقك احلى شي :$ والله انك صااادق في كل كلمه تقوولهاا خااصه العجوووز الي عند المووسسه ؟!! :(:(:( مشكوووووووووووووووووووور وواااصل ابدااااااعك ياا بطلل ,,

  26. شلونك خيو عساك عالقوه ان شاء الله لوحات مميزه باسلوب واقعي وغير مكلف تسلم دياتك ولايهمك كل مايقال عنك اسمع اللي يعجبك وطنش الباقي وبعض الناس ترد عشان بس تزعجك ابدعت _ _ _ _ لاتوقف 😀

  27. سلام عليكم ابداع ابداع ولا اروع مدونة تلامس الواقع فعلاً ولا عليك من القله خليك واثق بنفسك دامك تشوف نفسك انوو كتابتك مبدعه وواصل الابداع ولا يوقف لا يوقف 😀

  28. السلام عليكم كيف حالك..طيب.. موضوعك حلو وشيق تسلم اناملك وانا معجبه بكتاباتك واسلوبك والله يوفقك والى الامام يا فيلسوف

  29. مرحبا أخي أبو هديب بصراحه مواضيعك جميله جدا بس أكثر موضوع عجبني لوحاااااااااات مواطن وبصراحه موضوع شيق وجميل جدا تقبل مروري وشكرا أخي وإلى الأمااااااااااااااااااام دوما وبالتوفيق

  30. أشكرك اخي على ابداعك ودوم هالتميز والابداع دايم اتابع مواضيعك و انتظرها موقف خير بأذن الله:D

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

لوحات مواطن

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول