..:: لندنــ .. أتعـلمين أي عشقٍ يبعـثـني إليـكـ …!! ::…


ملاحظه .. ترى الموضوع طوووويل … وراك شي .. رح وتعال … ابيك معي هنا بكل احاسيسك .. وبمزاااااجك … يالله !! … هيا بنا ….

مساااااااااااااء الخير لكل الأحبابــ ..
مسااااااااااااء الورد لكل الأصحابــ
مساااااااااااء ما يليق إلا بأحبابي … انت .. وأنتي …
كيفكم … !! … وش اخباركم ..!! … ان شاء الله بخير وعافيه

من زماااااااااااااان ما كتبت تقرير … من فتره كبيره صراحه ما جلست اعصر هالدميجه … ونطلع اللي فيها
عاااااااد مالكم بالطويله …نخوش في الموضوع على طول …




اليوم ان شاء الله راح أبدا معكم سلسلة من التقارير … هالسلسله عبارة عن وصف كامل لرحلة للصيف الماضي … صيف عام 2007 م
هالصيف صراحه كان غيررررر… المدن اللي اخترتها غيررررر .. والاحداث اللي مريت فيها كانت غير … وكول كول كول حااااااااقه .. كانت غير يبني صدأني …
قبل ما ابدا في وصف أول مدينة زرتها … بعلمكم بأهم الاستعدادات الاوليه اللي سويتها قبل هالرحلة …

الاستعدادات بدأت قبل شهرين تقريبا… أي قبل شهرين … معليش انا موسوس من ناحية السفر … يعني يا تجي سفره مجهز لها كلش … كلش يعني كل شي .. ( لغير الناطقين بلهجتي ) … يا تجي الرحلة مجهزة من طأ طأ لسلامو عليكم … والا ما بااها .. المهم بديت اجهز للرحلة بفتره كبيره .. اول شي .. اني عارف ان الصيف زحممممممه .. وبيكون كل شي محجوز … ثاني شي … عارف ان الشعب السعودي … << بدا يطب …. ان الشعب السعودي بارك الله فيه .. ما يبدا بتجهيز امور السفر .. الا قبل الرحله بكم يوم … عشان كذا .. قلت يا ولد اخلص على عمرك … وخلص امورك بدري بدري …

قسمت تخطيطي للرحله هذه .. الا ثلاث مراحل … مرحلة أوليه .. ومرحلة متوسطه … والمرحلة النهائيه … المرحلة الاوليه هي اللي تشمل على الآتي :

-تحديد وقت الرحلة … يعني من تاريخ كذا لكذا
-تحديد المدن المختاره
-تحديد خطوط الطيران المناسبه
-تحديد الفنادق المناسبة
هل تحتاج المدن لفيزا ..!!

المرحلة الثانيه … كانت تشمل على :
-القيام بالحجز النهائي للطيران
-القيام بالحجز النهائي للفنادق
-استخراج الفيزا
-وضع جدول زمني لكل مدينه .. ( يعني كم بجلس في المدينه الفلانيه )
-وضع الانشطه اليوميه لكل مدينه … ( يعني اليوم وين بروح )
معرفة حالة الطقس للمدن الي راح اسافر لها

المرحلة النهائية …. كانت تشمل على :
-اشيك على الفنادق اللي حجزتها … يا ادق عليهم تلفون يا ارسل لهم ايميل … << قايل لكم

موسوس الله يهديه
-شراء ملابس تناسب حالة الجو في كل مدينة
-شراء الاغراض الثانية الخاصة بالسفر … ( شنطة صغيره – mp3
بلير – كتيب صغير – قلم – مفرحات …..الخ )

في سفرتي هذه .. قلت بحجز الفنادق عن طريق الانترنت … معصي اروح للمكاتب … الناس في الدول المتغدمه ما تحجز الا من الانترنت .. وحنا ماغير نطامر في هالمكاتب .. وهم يصلخونا بهالاسعار .. وحنا حبيبين ندفع هالدراهم …
فاخترت اني احجز كل فنادقي عن طريق الانترنت .. واخترت موقع واحد .. اني احجز عن طريقه .. وهو موقع اكسبيديا المشهور …

الحجز عن طريق موقع اكسبيديا .. سهل جدا .. ما يبي له ذاك الصعوبه .. يبي له بس أنه يكون معك بطاقة ائتمانية .. وتعرف لغه شوي .. مو بولبول .. لالالالالالالا .. شي بسيط بس تمشي به حالك …
ما عليك اول شي .. الا انك تسجل في الموقع …بوص معايا ..
لندن

بعد ما تسجل .. بيرسلون لك اليوزر حقك على ايميلك .. مع كلمة السر طبعا … انت تجي وترجع مرتن ثانيه للموقع .. وتدخل بيوزرك … بعدها تروح لقسم الفنادق … وتشوف صوره مثل هذه …
لندن

هنا ابد .. اللي تسويه تكتب اسم المدينه .. مثل ما انت شايف .. انا كتبت لندن … بعدها تختار المدة يعني تبي تجلس من كذا لكذا … بعدها تختار .. كمكم من نفر ونفرات … بعدين اضغط بحث .. والرجال اللي ماسك الموقع .. بيروح يدور لك الفنادق اللي عليها امكانيه .. بعدها تبي تطلع لك هالصفحه ..
لندن

مثل ما انت شايف .. لقى لك فنادق كثيره .. انت شف الاسعار اللي تناسبك .. وعدد النجوم اللي تناسبك .. والمنطقة اللي تبيها … يعني ممكن تخليه يرتبها لك حسب المنطقة وحسب الاسعار .. وحسب عدد النجوم … انت ما دامك تبي تدفع !! … هو بيسوي كل شي
بعدها اضغط على book it .. وبعدها بيطلب منك رقم بطاقه الائتمانية والامور الثانيه المعروفه …
انحاس راسك صح ؟؟!! …. لا جد ما انحاس راسك ..!! …. والله حتى انا وقسم … بس صدقني كل شي تخطط له .. تتعب في البدايه .. بعدين كولو حاقه تطلع أوبهه … وتطلع زي اللوز …صدأني يبني …
المهم خلوني ارجع للمرحلة الاولى .. عشان منها اخووووش على التقرير …
كان في بالي صراحة أكثر من مدينة أني اسافر لها … من اللي كان في بالي (لندن – باريس – جنيف – انترلاكن – روما – ماربيا – برشلونه ) … بعد اللف .. والدوران .. والسؤال هونيك وهناك … اخترت 4 مدن .. فقط لا غير … نشوف مع بعض هالملخص … يالله نشوفه !! … يالله تعال …

لندن

يمديك بس على الطياره … اهم شي آخر محطه تبي تنزل فيها
وبخصوص الطيران … أخترت الخطوط السعوديه …

لندن


وكان خط سير الرحلة .. الرياض – لندن …. لندن – باريس ( بالقطار ) … باريس – جنيف( بالقطار ) … جنيف – انترلاكن ( بالقطار ) … والعوده للرياض من مطار جنيف …. ومن مطار الرياض لشقتي عن طريق سياره محمد .. وكانت المدة تقريبا 3 اسابيع …. وكان افراد الرحلة هم انا .. والمايسترو .. ومحدثكم .. شفتو وش كثرنا …!! … ما راح الا انا بس …
وراح اكتب ان شاء الله وبعونه … عن كل مدينه .. تقرير خاص فيها … ومدعم بالصور .. والسواليف .. وكل شي مفيد … بس انت .. خليك معانا انت بس .. وازهل الباقي
الآن راح أبدا معكم بأول مدينه … عرفتوها !! … طبعا عرفتوها …

لندن

معشوقتي … واي معشوقة هي
محبوبتي … واي محبوبة هي
صديقتي … وللقلب لها مكانه … لا يعرفها سواها … هي .. وانا … فقط

في بداية استعدادي لمدينة لندن … بحكم اني رحت اكثر من مرة للندن … قلت هالمره بأختار أماكن غير .. وحتى الفندق برضو بغيره .. حلو التغير .. مو ؟؟!! …
اول شي استخرجت الفيزا الخاصه ببريطانيا .. ابد رحت لمكتب .. وخلصها لي في يوم واحد فقط .. بس جبت له طلبات الفيزا البريطانية .. وش رايكم نشوفها مع بعض …

1- تعريف موجه للسفارة من جهة العمل بالراتب وموضح به تاريخ الالتحاق ويكون باللغة الانجليزية
2- كشف حساب من البنك لآخر 3 أشهر .
3- صورة من جواز السفر
4- عدد 2 صورة مقاس 4 في 6 وتكون الخلفية بيضاء … ( مافيش حاقه خلف الخشه )
5- حجزالفندق (عن طريق الانترنت) .. ( او خل المكتب يحجز حجز وهمي )
6- صورة من تذكرة السفر او الحجز
7- تعبئة استمارة طلب الفيزا.. او اذا صاحب المكتب مو عجّاز .. راح يعبيها لك هو .. 

انا صراحه ما كان لي خلق اروح في هالشموس … قلت بعطيها هالمكتب .. واخذ مني الاوراق .. و 100 ريال .. وطلعها لي ..
بعد ما طلعت الفيزا … باقي الان حجز الفنادق …
صراحه فنادق لندن احترت كثيررررررر معها .. مره قلت باخذ لي شقه غرفه وصاله … ومره قلت لا يارجال .. وشو له الشقه .. ما طبخت في شقتك في الرياض تطبخ في شقق لندن.. اهااااااا بس … قلت اجل باخذ فندق .. بعد الحوسه .. قررت اخذ فندق من سلسلة فنادق الهيلتون .. وهو فندق …

لندن

وهذا موقعهم على الانترنت .. اذا ناوي تحجز .. هنــــا
وهذه خريطة لموقع الفندق
لندن

بعد ما حجزت في الفندق .. وجهزت كل اموري .. جا موعد سفرتي ورحلتي … ابد جمعت كل اغراضي … وكل متطلبات السفر … وعلى طووووووول على المطار … محدش دري .. ولحدش عرف …
كانت رحلتي تقريبا الساعه 1 الظهر … اول مره اروح في هالوقت للندن .. اول ما اروح الا تالي الليول … ( جمع ليل ) … لكن هالمره عطوني حجز على الظهر …
بعد ما وصلت المطار وكذا … دخلت شنتايتي … وجلست انتظر موعد الاقلاع …( الاقلاع والا …. ها ها ها ) … المهم وانا جالس انتظر الاقلاع … مبسوط جدا … لأني جالس اشوف اكثر من مشهد مفرح … اللي ما شاء الله جايب عفش بيته .. وعفش جيرانهم معه .. كراتين والله .. حتى اني شفت وحده ماخذه معها قدر ضغط وين يا اوخيتي .. راعية طويله … عاد هذا كله كوم … واللبس كوم ثاني … يالله يالله .. شو هيدا …لبس يحوبه قلبك .. طبعا لازم الكرشه طالعه .. ( وقار وقار ) .. والحزام لازم لازم تحت الكرشه .. عشان يحدد ملامحها … الله يحرسها يارب … والشعر مبلل .. وعلى الجهه اليمين … والبنطلون قماش حرير .. يلق من البوابه رقم 21… واشك انه مشغل البلوتوث .. هذولي الرجال .. كيف عاد البنات … لزقه محلات الهرم .. ناسيه تشيلها من الجنز
استغفر الله يارب .. بيجيني شي الظاهر … <<< بدري يابو

المهم خلونا منهم بس …
بعد الاقلاع … كانت الرحلة هاديه كثير .. ولله الحمد .. مافيه بزر يصيح( عقدتي في السفر ) … بعدها وصلت لمطار هيثرو بالسلامه … ما كان في زحمه كثير .. ابد يسألونك كم سؤال .. ليش جاي … وكم تبي تجلس .. ووين تبي تجلس … وخاصه اني سافرت بعد خرابيط التفجيرات اللي صارت عندهم …
بعد ما خلصت امور جوازي .. واخذت شنطتي …باقي الحين اروح للفندق …
لما توصل لمطار هيثرو .. فيه اكثر من طريقه انك تروح لسينتر المدينة … يا انك تروح بالتكاسي … ( بياخذ تقريبا 500 ريال .. وبيجلس تقريبا ساعه )
او انك تاخذ مترو الاكسبريس …Heathrow Express<<<ادخل موقعهم عشان تتتعرف عليه اكثر( وهذا بياخذ منك تقريبا 30 باوند تقريبا 200 ريال ..) .. وراح يجلس تقريبا ثلث ساعه
انك تاخذ الوسيله الثالثه .. وهي المترو .. طبعا ارخص .. لكن بيوقف عند فوق 16 محطه قبل ما توصل … يعني بيذن الاخير ما وصلت ..

انا اخذت Heathrow Express … صراحه انصح فيه بقوووووه .. سواء كنتم شباب او عائله .. اول شي سعره جدا مناسب … ثاني شي الوقت اللي راح يستغرقه قليل جدا .. تقريبا ثلث ساعه .. ولا راح يوقف عند أي محطه .. بدايته من مطار هيثرو .. حتى محطه البادنقتون …

برب كوفي
<< تيت يا حلو

اول ما وصلت المطار وخلصت اموري .. رحت لشباك قطار Heathrow Express … وقصيت منه تذكره .. بعدين على طول ركبت القطار … ووصل بي للمحطه البادقتون …
ايوووووووه .. الحين وصلنا المحطه .. طيب وين الفندق !! … الفندق اسمه الهيلتون بادنقتون .. والمحطه اللي وقفت فيها … هي البادنقتون ستيشن … يعني بينهم اسم مشترك .. يعني ياولد لا تسوي نفسك فاهم وتبعد .. ترى الفندق حولك
اول ما نزلت من القطار … لقيت الفندق قداااااااااامي … ابد كم خطوه من المحطه … اصلا هو يفتح على المحطه من جهت الغرب … ( سطرني اذا عرفت جهت الغرب )
الفندق اخذته تقريبا 6 ليالي … طلعت علي الليله بسعر 120 باوند تقريبا .. لغرفه ديلوكس .. مو عاديه … وهذه صورته من برى

لندن

هذا الفندق .. صراحه اعجبني كثيرررررر … من اكثر من ناحيه …. خلوني اسدحها لكم على شكل نقاط :
1-في مكان هادي .. بعيد عن لجه شارع الاجوارد رود
2-على يمينه محطة القطارات ( بادينقتون ستيشن ) … من هالمحطه تقدر تروح للمدن البريطانيه الثانيه … يعني تقدر تروح لمانشستر .. تروح لجلاسكو .. تروح لادنبره .. تروح للي تبي … وعلى يساره محطه الاندرقراوند … يعني تقدر تروح لأي مكان في لندن عن طريق الاندرقراوند طيب خلنا نشوف صوره الفندق من برى .. ونقارن المسافات .. هيا بنا ..

لندن

شفت الدويره الحمرا اللي على اليمين .. هذا المدخل الرئيسي للفندق … والدويره الثانيه اللي على اليسار .. هذه محطه الاندرقراوند … خلف الفندق من الجهه الثانيه .. باب ثاني يفتح على محطه القطارات …
3-اما الجهه اللي ع البادنقتون ستيشن .. هالمحطه فيها سوق داخلي .. صراحه كل شي في هالسوق … خلونا نشوف كم صوره من هالمحطه .. او بالاصح هالسوق …

لندن

هذه صوره عامه للسوق اللي تحت … شوف معي هناااااااااك يمين شوي … لا تطالعني هنا … طالع هنااااااااك .. فيه مثل اللمبات الصفر فوق كلمه CAFÉ .. شفتها ..؟!!! … هذه هو الفندق .. يفتح على المحطه …
طبعا فيها كوفيات … وفيها مكتبه .. وفيها كم بقاله .. وفيها محل يبيع ورد .. … وفيه اشياء كثيره ..
طيب شكلك تعبت …. جد ما تعبت ..!! … وش رايك نريح شوي .. واشتري لك كوفي .. ودونات .. من ( كريسبي كريم ) .. ..

لندن


كريسيبي كريم فاتح تحت الفندق على طول … وكل صبح مسنترن عنده …

لندن

يالله خذ لك هالكوفي .. وهالدونات … على ذوقي عاد .. لا تردني
بعد ما وصلت الفندق .. وصلت تقريبا على الساعه 6 المساء … دخلت ورحت على طول للريسبشن … وهذه صوره من الريسبشن … او بالاصح اللوبي …

لندن

وهذه صوره ثانيه من اللوبي

لندن

اول ما وصلت طلعت لهم رقم حجزي .. وقلت انا حاجز بالرقم هذا .. وتجي الريسبشنه .. ( لأنها بنت مو ولد ) .. عشان اكون صادق بس … وتجي هالريسبشنه … وتطقطق على الجهاز .. قالت اووووه ماي قااااد .. يو ليييت … ( يعني انت متأخر جزاك الله خير ) … اول ما قالت كذا … جلست ادور اللابتوب .. عشان اخليه يديور في جبهتها
وشو متأخرررررر ؟!!! … قالت لالالالالالالا .. امزح معك … وتتطلع كشرتها … وانا اللي ارجع اللابتوب لمكانه … قالت يالله هذا كرتك … ودواليك على غرفتك … ( قويه دواليك ) … واروح لغرفتي … خلوني اعطيكم نبذه بسيطه عن الغرفه ومحتوياتها ..
يالله ندخل ..!! … يالله مرر الكرت على المكان الخاص له في الباب …

لندن

يالله …برقلك اليمين يبني .. بســـــــــــــم الله …

لندن

مثل مانتم شايفين …الغرفه ما شاء الله كبيرررررره .. استغربت صراحه ان في لندن غرفه مثل هذه كبيره .. يمكن لأني ماخذ ديلوكس .. مدري والله بس المهم انها كبيره .. حتى من كبرها بغيت ااجر نصها
خلونا نشوف صوره اهم شي في الكره الارضيه .. وهو السرير

لندن

مثل ما انت شايف .. السرير كبيررررر … يعني تقلب على راحتك ( قلب) .. غير كذا فيه مخاد كثيره >> يحب يجمع المخاد حوله ( وجه ) …
وهذه صوره ثانيه .. للغرفه من فوق …

لندن

تفتح النفس الغرفه صراحه … بعد كذا .. نروح لحمامهم .. ( الله يكرمكم ) … الحمام ما شاء الله .. كبير … خلونا نشوف صور له .. وهذا مدخله من الغرفه على طول

لندن

وهذه صوره ثانيه من جوا …

لندن

وهذه صفه الشاموبهات ( جمع شامبو ) … اللي حاطينها على المغسله

لندن

هذا ما يخص دوره المياه … فيه برضو .. الثلاجه .. وقسم الكوفي … اول شي .. خلونا نفتح الثلاجه ونشوف وش فيها …

لندن

مثل ما شايفيني .. شي صديقنا .. وشي ما نعرفه ابد
فوق الثلاجه .. حاطين الكوفي ميكر.. مع عدته من كوفي وسكر وكذا يعني … بوص معايا يبني …

لندن

مثل ما انت شايف .. حاطين كوفي ميكر .. وحاطين غلايه مويه … ( طبعا مويه اجل غلايه جبن ) … وحاطين معها مستلزمات الكوفي وخلافوه …
بعدا على طول .. رحت للتلفزيون … قلت بشوف وش فيه من قنوات
التلفزيون فيه كم قناه عربيه .. فيه الكويت ودبي ومصر .. يعني حاجه زي كذا …

الفندق هذا حاطين خدمه حلوه في التلفزيون .. مثلا ممكن تشوف افلام لسى نازله في السينما .. طبعا تشوفها بفلوس …بس انت تطلبها عن طريق الريموت كنترول … وممكن برضو .. تلعب بلايستيشن في الغرفه … ابد انت اختر اللعبه اللي تبي .. وتلاقي يد الالعاب قدامك .. مو مصدقني صح … شف معي طيب ..

لندن

مثل ما قلت لك .. يا انك تختار فلم من الافلام المعروضه قدامك … وتشوفها .. او تختار لعبه من الالعاب …واليد موجوده من اول …
بعد ما اخذت جوله في الغرفه … وارتحت لها كثيرررر .. قلت ياولد .. خذ لك شور الحين .. وصل اللي ما صليت .. وصلح لك كوفي .. واجلس شوي …
بعد ما تحممت وكذا … صلحت لي كوفي …

لندن

بعدين جلست اقرا كم مجله وجريدة كانت معي
بعدها .. بدلت ملابسي … قلت بطلع اشتري لي كم غرض للشقه .. وبعض المفرحات ..( المفرحات للي ما يعرفها .. هي مجموعه من الحلويات . سواء كانت شوكولاته او بسكوت او علك .. وسميت بهذا الاسم .. لأنها تبعث الفرحه في نفوس من يأكولوها ) ..

المهم بعدها رجعت للفندق … وجلست اطالع التلفزيون .. واخذت لي شوي شوكولاته

لندن


وبعدها .. طلعت لابتوبي .. واوراقي .. على اساس اجهز اموري لليوم الثاني .. ووين بروح .. ووين بطلع له …

/
\
/
\

على كذا .. اكون وصلت معكم على نهايه الحلقه الاولى … من تقرير رحلتي الى لندن .. واتمنى من كل قلبي .. انك تتواصل معي… عشان نعيش مع بعض .. باقي الحلقات …

اشوفكم على خير …
دمتم في أمان الله وحفظه
لكـــ …. انت بس … مو لغيركـ….
المايسترو

لندن


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

..:: لندنــ .. أتعـلمين أي عشقٍ يبعـثـني إليـكـ …!! ::…

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول