لا وا حسافة ! ـ شعر


السلام عليكم ورحمة الله وبركاته
في البداية أحب أشكر كل من تكرم وأرسل لي تعليقه على القصيدة الماضية .. وهذا يدل على طيبه وذوقه الرفيع
وأحب بعد التفاعل اللي أسعدني إني أشارك معكم بقصيدة ثانية أتمنى ترقى لمستوى ذائقتكم الأدبية ،، أقول فيها ،،،
 
لا وا حسافة
 
يا اللي نبات الشر في وسط أراضيك
يا لعنبو من هـو يحبـك  وأغـلاك

لا بارك الله بكل علـم(ن)  يطرّيـك
يااللي معاني النحس كلـه بطريـاك!

تلعب على الحبلين والكذب مرضيـك
لانك ربيبة دون والواطي أرضـاك!

تغدر مـود(ن) بالمحبـة  مصافيـك
يا جاهلة من يزرع الشوك .. ينشاك!

تحسب جميع الخلق تطلب  أياديـك؟
يا خاينة محد(ن) عرفـك  وتمنّـاك!

جرحي صعب وردة الفعـل تدريـك
عن قوة في الباس مـا هيب تخفـاك!

أنا على عز(ن) تربيـت .. وبثنيـك
عن كل خسّه نابعـه مـن حنايـاك!

يا من فعالـه كنهـا نفخـة الديـك!
ينفخ .. وشكله للمخلايـق ضحّـاك!

دوّر دموع(ن) تغسل الذنب وتشفيـك
من هـمّ أبشر بـه بقلبـك بيغشـاك!

والله لنزّلْ فيض دمع(ن) من  عنيـك
تجرح به خدودك صباحك  وومساك!

الله من وقت(ن) مضى فيه  أدرايـك
بين العيون وبيـن جفنيـن  غطّـاك

لكن خسارة .. بعْد ما كنـت أغليـك
وباحلى الكلام العذب شعري  تلقّـاك

من عقب ما كنت أترك الخلق واجيك
قلبي كرهك اليوم واعْلـن  معـاداك!

مابيك يا خوّان مـا بيـك مـا بيـك
كذّاب والخسّـه أصولـك ومنشـاك!

إذا الكذب والغـشّ هـذي مواريـك
فأنتي الغدر والحقد أبـرز مزايـاك!

أول إلى غبتي أحنّ إلـك  وأشكيـك
واليوم يوم السعْد لا شفـت فرقـاك!

لا واحسافة شعري اللي انكتب  فيـك
لا واحسافة عمـر عشتـه  بدنيـاك

أنتي غدرتـي وبالمسبّـه  أجازيـك
ذوقي مرارة مـا جنيتيـه  بيمنـاك!

ما كان ودي أكتب الشعر  واطريـك
بس انكتب إنـي أسبّـك  وأشنـاك!

وآخر كلامي يا عسى الرب  يعميـك
ولا بارك الله بكل علْمك  وطريـاك!
 
لكم مني كل الود
ثامر البدراني


أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

لا وا حسافة ! ـ شعر

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول