كشخه، وعوده، وهوية وطنية


متكشخ ومسوي فيها رزه ولابس ازين ثيابي وفي كامل حلتي مثل العروسه ليلة زفافها ..وطاق الشخصية ومضبط الشماغ ومكثر النشا عشان تصيركوبرا وكل شوي يدك على الشماغ تخاف تخرب ..
وكله كوم وريحة العوده كوم تشمها على بعد اميال تفتح مسامات خشمك لين يصيبك ربو مزمن هذا كله عشان الصورة اللي نبي نطقها عند الأحوال ..
ولاااا عاد وخرر عن المشيه اللي صرت امشيها مسوي ثقيل وشغل آلي على مزاجك مع منظر الثوب وهو لتحت الركب ويسحب ويكنس الأرض..
الناس على بالهم مكنسه تمشي لحالها .. تجمعوا الناس وقاموا يصورون ..

انا على بالي معجبين ومعجبات اللي يمسك يدي ويناظرها واللي حاط يده على قمة راسي واللي يجر بالثوب من ورا تورطنا .. والورطه الاكبر منها اللي سوى حركة خايسه مثله وانا اقوله عيب ماقلت عيب الا الكل قام يصفق ويضحك ويتلفتون ببعض ويقولون ( ههه عيب عيب ههه ) صدقوا اني جهاز آلي ……
والوهقه يوم واحد يزهم عليك وهو وراك تضطر انك تلف بزاوية مقدارها 360 درجة عشان تلتف فيه بالحركة البطيئة خايف على الكوبرا لا تخرب….

رحت للأحوال المدنية هم ومبناهم الخايس اللي مدري وش يبي بعد بحث دام خمس ساعات لأن المبني مالقيته الا بوسط حارة شعبيه وعلى بعضها تدخلها ماتطلع يبغالك خريطة عشان ماتضيع بها
ومتى بيعتقونه ويبنون لنا مبنى جديد ومريح مايزحلق .. الواحد يمشي فيه بسلام هو وكشخته ..
المبنى دورين وملحق آيل للسقوط مع اي عطسه الملحق مأجر على عمال بناء والدورين للأحوال ..
دخلت المبنى مع خويي الحلو الأسمر وانا اناظر يمين ويسار وش ذا مبنى قدييييم مررره …اتوقع من بناء العهد الأموي واللي بناه هو الفرعون الأسكتلندي الأصل عوض خوليوس << من ذا عوض خوليوس
دخلت مع البوابة والا دولاب كبير كله عناكب وجنبه عسكري واقف مايتحرك ابد تقال مكبوب علية مثبت شعر ومثبته.. المبنى خايس كله غبار وتربان وبراعصه جافه على الجدران مصطره بزنانيب الموظفين
سألت عن تجديد بطاقة الأحوال وشلون ؟؟؟؟
عرفته انه مثل الأجراءات القديمه يوم انك تجي وانت بزر مع ابوك توك بالغ وجهك كله حب شباب وحفر يعني وجهك يبيلك ورقة اصلاح عشان يرجع مثل اول .. وتبي بطاقة احوال تكشخ بها قدام اصحابك وتصير تخرج من البيت آخر الليل لحالك
وابوك ماسكن يدك وانت في قمة السعادة ..
اتجهت للصالة بتاعت التسجيل بالكمبوتر اول مادخلت للصالة والا الناس على بعضهم زحام على الطاولة وزحام على الشبابيك !!
وسط الصالة فيه طاولة طوييله ومافيها غير اربع كراسي وعليها قلمين واحد ناشف عرفت من واحد من الموجودين ان الطاوله ذي للزباين عشان يعبون اوراقهم عليها وهم مرتاحين خخ آبوك بالخدمة فايف سطار

والناس طوابير على الـ4 كراسي وهواش .. حتى فيه اثنين تماسكوا على كرسي كل واحد حاطن يده ويقول انا بعده.. وقاموا يدفدفون بعض وكل واحد يجر الكرسي يمه لين ماطاح وتشقلب الرجال وسوى دبل كيك على خشمه..

اخذت ورقة بيانات وعبيتها على ظهر واحد من اللي في الزحمة وهو ماهوب داري لأنه ماشاء الله 6 × 6 باب يعني ..
بقي زحمة الشبابيك ..زحام ماهوب معقول على شبابيك موظفي الكمبيوتر لاتنظام ولا ترتاب وحرارة تسلخ الجلد .. وشايب لابس ثوب ملون وجكيت بالحر وانا مبقق عيوني واناظر فيه وش يحس فيه ذا ..

ومافيه عندهم الا مكيف واحد رايحن فيها يادوب يون ويكحكح حتى براد ماعاد فيه براد شكله من ابو قدييييم واتوفع انه مقدم على طلب تقاعد وبتجيه حقوق نهاية الخدمة ماطور جديد يقضي بها باقي عمره خارج الأحوال !!

وانا العرقان تصب مني شلالات وانحاست خشتي والكريمات اللي حاطهن عشان الصورة تطلع زينه .. وخفت على الكشخه لا تخرب وانا مابعد تصورت وقفت بعيد عن الحرب اللي صايره عند جدار انتظر تخف الزحمة

وانا واقف مادريت الا جبنبي شآآآب جنتل ويمن طاق الجنز وطيحني وريحة لبانه صاكه بخياشيمي نآآآآآآعم ومتكي على الجدار من شدة النعومة حسيت ان الجدار يبي يمييييييل معه ..

سلمت عليه .. رد علي : هآآآي .. قلت : يمال الهواه.. قال : افففف وش ذا الزحام متى يخلصون .. ساعه وانا انتظر

قلت بعقلي : والا مثل هذا مايدخل زحام المفروض يجيه الموظف للسيارة ويخلص له اوراقه خخ ..

قلت : مالها الا نزاحم مع البشر الله يعيننا والا بقعد مثل الجنتل ويمن ذا ..بس الكشخه وش السواه ؟؟!!

رحت للزحمه .. قمت الف يمين ويسار ادور فتحة من بينهم ادخل معها قلت خلينا نلعب مع الأطراف دايم الأطراف سهل المرور منها .. رحت وراء شايب حاولت ادخل من تحت باطه الا عطاني بكوعه على خشتي رجعني وراه مترين..

قهرني وحلفت ادخل غصبن عن آبو جد آآآآبوه .. رجعت وراه مرة ثانية ادور على حته ادخل منها ماهناش مجال يمين يسار فوق تحت كبري نقازي ماهوب راضي يزيح الشايب .. قلت يأخي مالك الا تشغل مخك انت ووجهك الخايس ذا
اجل وشهو له المخ المعفن ذا اللي رايح كنه معصوب ..

قلت اجيه بحرفنه وسياسة وفهلوه رحت له وقمت اخبط على ظهره قال : مين ؟؟! قلت : انا خخ << تخبط على باب البيت انت ووجهك

قال : خير وش تبي

قلت بسألك : الخمس ميه ريال الطايحه هناك على الأرض لك والا لا؟؟ قال : وين وين وين !!

قلت : هناك ورى الكرسي ذاك ..

ماصدق التسذوب وانطلق زي النبيطه وأخذت مكانه << هع هع هع فيس شيطان بشوكته ..

حاولت ادخل جوه الزحمة عنه عشان مايشوفني لكن الخايس قدر يشوفن ويشدني مع خشمي وهو يقول : هآآآآه تلعب علي يالسلوقي
ثم سحبني من وسطهم سحبة راعي البقالة للهندي حقه وعطاني طرآآآآق وتصطير وبقس على خشمي خلى اعضاء وجهي تلخبط صار الخشم مكان الفم وصارت اذني ترمش بدال العين .. وحاس لي الكشخه والشغله كلها وقتها عرفت انه ماينفعك الا
7
7
المثل اللي يقول ( انقلع وسو مثل مايسوون وخذ حقك بيدك )

رجعت ثلاث خطوات للوراء ونفس عميق زهيق ونفير وطرت سباحي وسطهم ودف ولاتدف وفك ولاتفك وادبش بذا واسحب ذاك الييين ولله الحمد ماوصلت للمقدمة وغلقت اوراقي عند الموظف وخرجت من بينهم وانا اقول الله يخسهم عليهم حركاتمش كويسة دخلت بكامل حلتي وخرجت بسروال السنه وفنيلة علاقي.. مغير شايب نشمي الله يجزاه بالخير رمى علي عباته وهو يقول : استر على نفسك يآآ .. ولد .

الحين خلصت الحمد لله مابقي غير اتصور واستلم البطاقة بس المشكلة الطقم ذا الي انا فيه خربت الكشخة وحاسونا حوس هالجحلط وشلون بنتصور كذا وانا لا لون ولا طعم ولا ريحه خخ وش نسوي عاد مابالرجل حيله..

روحت ادور مكان استلام البطايق قالولي بالجهه المقابلة يسار الباب برضه بالدور الأول اتجهت والا غرفة صغيرة مكتوب عليها صآآآلة انتظار الرجال خخخ ليش بمستشفى لا وبعد مكتوب عليها صاله على بالهم كبروها كذا..

والغرفة مليانه والناس متزاحمة على اماكن الجلوس الواقفين بعدد الجالسين والسرا بطيء .. وفيه غرفة ماهوب صغيرة وبس الا كرتون تايد وكل شوي واحد يطل براسه بسرعة 500 خيل في الساعة ويقول اسم ويروح انا مبقق عيوني بأستغراب على بالي خيل داخل الأحوال وقاعد يلعب طلع واحد من الموظفين حق الأحوال هذي وظيفته ههههاااي مغير يطل بدميجته وينادي اسامي المراجعين ويأخذ راتب كومبارس يعني .. وان الغريفة ذي بتاعت التصوير

وهناك في الجنب فتحة بجداريسلمون فيها البطايق ..

دخلناانا وخويي اللي جاي معي للصالة واحنا مرتبكين من الزحمة ومن الربكة جلسنا بكرسي واحد واحنا نحس اللي بالصالة كلهم يناظرون فينا حنا ويا خششنا منحرجين وجهي غادي تسنه طماطه بايته وخويي الأسمر غادي تسنه فلفل رومي مبشور ..

ومدنقين روسنا في الأرض على بالنا اللي بالمكان كلهم يناظرون فينا بس اكتشفنا بعد كم دقيقه انه محد داري عنا ولا احد يمنا كلن مشغول بحاله وكلن يحتري دوره اللي واقف واللي طفشآآآن يبي يخلص ويطس
واللي نايم وراسه متدليه على لحد بطنه وساحبها نومه ماتسمع منه الا انواع النغمات واللي داخل عرض مع اللي بجنبه سوالف وتسذب ..

ومع الزحمة والتأمل بمخلوقات الله ومرور الوقت نادى الخبل ابو رويس على اسمي قمت بسرعة ورحت لغرفة التصويرانا وملابسي اللي رايحه فيها دخلت الغرفة والا فيها اربعة موظفين مدري وشلون شالهم كرتون التايد وانا بنفسي اقول معقوله كلهم بيصوروني هذول وقفت برهه محتار صرخ علي واحد منهم :بسرعة خلصنا ..وجاني ومسك يدي
قلت له : وانا اضحكلالا ماهوب ذا وجهي هذي يدي خخ.. قال :ورى ماتصك فمك دارين انها ماهيب خشتك نبي نبصمك اول وبعدين نصورك انت وخشتك ..واخذوا يبصمون يدي بالكامل وبعدها السبابتين والأبهام وكل اصبع لحاله !!

مابقي الا ابصم بخشمي .. حرآآآمي الظاهر وانا مانيب داري .. بعدها قمت بتصور ابي اضبط الشخصية صرخ علي وقال ماحنا فاضين لك اجلس وخلصنا << عندهم واحد عصبي وشين ..

جلست وياحليله حق التصوير هو وكامرته ذيك الكبيره زي اللي بفلم كرتون الكاميره ام شرشف .. تلحف بها ويادوب جلست على الكرسي ورفعت رويسي الا و ( تشك ) صورني وبسرعه اللي بعده مادريت عن نفسي الا برا الغرفة ..
رجعت وجلست احتري عند الفتحة اللي بالجدار عن بطاقتي وهم يزهمون بالدور وطولت وكل شوي ممتحنهم وين بطاقتي ؟؟ وهم يقولون يجي دورك .. وانا احتري رقدت وقمت ورقدت وقمت .. ورقدت وقمت كمان مرة .. ليين مانادوا على اسمي وروحت لهم ابي البطاقة قال اصبر هات يدك ومسكني مع يدي .. وش ذا ?? وشبهم على يدي هذول وش صار بالعالم ؟؟ قال : نبي بصمتك .. (هآآآآه لا لا اكيد من البصمات الأولى عرفوا اني حرآآآآمي يوم اني سرقت بسكوت بندق من زنقير الهندي قبل سبع سنوات ) وبغيت اصيح وافضح نفسي الا قال : لازم نبصمك بصمة اخيره عشان تطلع الهوية ..أشواااا .. بصمت وقالوا لي دخل رقم سري للبطاقة خخ والله وتطورت منفوحه .. حطيت رقم سري للبطاقة

قال لحماية المعلومات السرية والمشفرة والله مانيب خابر انه عندي شيء سري الا الحصاله اللي بالغرفة اللي على شكل فيل ترمي النص مع الخرطوم لين تصل القاع .. نص قروشي ناشبه بخرطومه ماوصلت تحت ..

غير هالسر ماعندي شيء يصلح للتشفير حتى علوم زينه ماعندي غيرالخراط ..

واستلمت الهوية الوطنية انا وصورتي الخايسه عين مفتحه وعين مغمضه .. لا وملبسين البطاقه نايلون بعد هذا احلى شيء عندهم .. ومن الفرحة الضحكة شاقة الوجه من الأذن للأذن لحد السعبله كني بزر مع ابوه جنب سيارة الآيسكريم ..
ومن الفرحة نسيت خويي بالصاله زي ماهو جالس على الكرسي ومدنق راسه (( على باله اللي بالصالة يناظرون فيه خخ)) رجعت له وجريته مع براطمه وطلعته برا وانا اشوت فيه :: توه طلع عليك الحياء ياقليل الحياء ………..

مايستفاد من الموضوع :

1_ اصحى تكشخ وتتبخر وتتعب نفسك وانت رايح لأي دائرة حكومية لاتبخر وتكشخ لأنهم بيحوسونك حوس .
2_ نرجوا من حكومتنا الرشيدة توفير مباني مناسبه لراحة الموظفين والمراجعين وسلامة كشختهم والتنظيم والترتيب .
3_ تعطر عشــــــان الصورة تطلع حلوة .
4_ رحم الله امرأ عرف قدره الضغط وينه ( اعرف امكانياتك الجسمية والعقلية ولاتحاول تسوي عمرك فاهم وتأكلها على راسك ) .
5_ اذا ممكن توفر خدمة سبيشل للجنس النآعم من الشباب لعدم مقدرتهم على الأختلاط مع الرجال .
6 _ خذ الأمور برويه ولا تستعجل في الحكم على بعض المواقف الطارئه وتنخلع ونبلش بك حتى لو كنت سارق بسكوت بندق قبل خمس سنوات .



تعليقات 18

  1. أخي الكريم طريقة جميلة ..وأسلوب جميل وقد تمنيت أن تنقيها من بعض السقطات التي تحسب عليك أخي الكريم … الله أعظم سبحانه وتعالى علوا كبيرا من أن يذكر في هذه الجملة (( ايييه والله لو تدخل بينهم ويحشرونك هالدشير بوسط الزحمة ماتخرج من بينهم الا وانت حامل .. )) أخي حلفت زور … وتهمت مجتمعك بقبول مثل هذه الموبيقات والعياذ بالله وإن كانت موجودة تتوارى عن عيون الناس ..ولكن ليس بصورة التي شنعت مجتمعك بها أخي الغالي جزاك الله خير امسح هذه الجملة .. فليست ضرورية في القصة الجميلة والظريفة وقل أستغفر الله وأتوب أليه هذا والله يحفظك

  2. حبيبي القصة كلها خيالية ولاتمت للواقع بصلة.. لايكون صدقت بس :$ وهي صح نقزة ابليس زي مايقولون واعتبرها ماهيب بالقصة اهم شيء كلامك الحلو ( طريقة جميلة ..وأسلوب جميل ) تشكر يابيه على الكلام القميل ده وماتزعلش نفسك خالص

  3. أخي الكريم إسلوب رائع في تصوير موقف وكنت أتمنى أن يكون في الموضوع لو جزء بسيط من المصداقية… أخي.. أعمل في الأحوال المدنية وقمت بزيارة غالبية فروع الأحوال في شتى مناطق المملكة ولا يوجد بها ما يطابق كلامك ولو بشيء قليل خصوصاً وأنت تتحدث عن تطبيق نظام حديث لم يطبق إلا في الفروع التي روعي فيها أن تكون الظروف مناسبة لمثل هذه الأنظمة. أخي الكريم… أنك عندما تكت مثل هذهالمواضيع تكون مواجه في الغالب إلى مجموعات من الناس من شتى دول العالم. فإذا كنت تحرص أن تكون مستوى سمعة بلادك بهذا السوء فهذه بحد ذاتها كارثه…. نحن معك في نكون ننقل للناس كل ما نراه.. ولكن ليكن نقلنا بمصداقيه. أتمنى أن لا أكون قد أثقلت عليك. وشكراً.

  4. ههههههههههههههههههههههههه ههههههههههههه اما عليك قصة انما ايه كدهـ من اولها لآخرهآآآ توحفتن ,,, من جد شي والله … تسلم ديآآتك فك وآآفك نبغى نشوف كتابات اكتر واكتر … دوم هالتميز 🙂

  5. اخي موظف الأحوال .. القصة هي عبارة عن تصوير لوضع نظام الأحوال في احدى المدن اضافة لبعض المواقف الخياليه .. وتصويري للوضع كان حقيقي 100 % وبعدين ليش تعتبر انها تشويه لسمعة البلد .. ليش ماتعتبرها توضيح لبعض الأخطاء لكي نصل الى الحلول المناسبه

  6. اسلووب فنتكه ,, وتصوير ولا احلـى بس انا اتفق ان الموضوع او القصه بيزيد جمالها لو خلت من بعض السقطات ,, حتى لو كانت بسيطه ,, لكن لها اثرها ,, عموما روح الداعبه متجليه في اسلوبك ,, لا تحرمنا من مثل هالمواضيع 😀

  7. كلام اخوي فك وافك صح 100% وانا صار لي نفس الشيء وعانيت من الزحمة وسوء التنظيم 🙁 والمعامله السيئة:(

  8. شكر للجميع حبايبي على هالمشاركات الحلوه حتى لو كان هناك نقد احترمه واتقبله بكل صدر رحب مثل ماقال الشاعرالفرعوني القديم : انا وانته وانته وانا وانته .. واهو كله رايح وكله قاي ورأصني ياقدع

  9. وياحليله حق التصوير هو وكامرته ذيك الكبيره زي اللي بفلم كرتون الكاميره ام شرشف .. تلحف بها ههههههههههههههههههه :$:$ هاذي انا اشهد انكـ صادق من جد مافي تطور ولا في خدمات زي العالم ومبروكـ على البطاقه يالله نستنا جواز السفر :$:$ لاتحرمنا مثل هيكـ مواضيع

  10. ههههههههههههههههههههههههههههههههههههههههههههههههه حركاااات يافك أنت وأنت فاك خشتك زي ابتسامة المراعي من الإذن للإذن وموضوعك منشور برى المنتدى عسى بس ما تاخذ برأي الكاتب لأنه المقصود من الكلام المقتبس لموضوعك أنك قلته على هامش التهكم والسخرية من بعض التصرفات اللي تحصل في مجتمعنا ولو كان وصفك فيه بشكل حلو على أن النظام في عندنا شبه معدوم حتى داخل الدوائر الحكومية حبيبي فك ترى الموضوع هادف بالدرجة الأولى وهو الرائج هاليومين اللي هو السخرية من الواقع بأسلوب التهكم وإن شاء الله نشوف اسمك بصفحة الوفيات أقصد بعمود خاص لك بجريدة مرموقة زي مشعل السديري وطقته موفق يالغلا

  11. شوفوا موضف الأحوال ينكر :$ ياخي وين عايش أنت يارجل هذا أقل مايُقال في الدوائر الحكومية فما بالك بالبنوك والمطاعم المزدحمة ياخي قد يكون الأسلوب شديد له وقعه بس هذا مطلوب في أسلوب السخرية والتهكم وإذا بجد أحزنك اللي ينقال حاول تعرف موضع الخطأ وتحاولون تعدلونه من عندكم أنتم كموظفين >>مدري تعليقي الأول نزلوه مدري لأ … عاد بذمتهم المهم يا فك الله الله بالجديد وننتظر كتاباتك وتشريحك على أحر من الجمر

  12. الحقيقه انك بالغت في الوصف ولكن اعرف ان الغرض هو نقل الوضع السيء للنظام في ادارة الاحوال المدنية . تجربة احد الزملاء في تجديد بطاقته كانت تتطلب ارسال اوراقه لادارة الاحوال المدنية في حريملاء والموضوع يحتاج 20 – 30 يوم ولكن باتصال هاتفي واحد استطاع الحصول على بطاقته في نفس اليوم. المأخذ عليك هو الجرأة في وصف بعض الامور فهناك اعمار وجنسيات مختلفة تتابع المجموعه مثل (ماتطلع الا وانت حامل).وهي من المبالغات ايضا.

  13. اخي موظف الأحوال .. القصة هي عبارة عن تصوير لوضع نظام الأحوال في احدى المدن اضافة لبعض المواقف الخياليه .. مقتبس من فك وأفك أخي الكريم فك وأفك: أولاً النظام اللي تتكلم عنه نظام يعتبر حديث وهو نظام التصوير والبصمات فلا يعقل أنه يوجد نظام أخذ بصمة وتكون كمرة التصوير كما وصفتها بل الكمره المستخدمه في هذا النظام أخر ما وصل إلى التطور من تقنية هل تعلم أن الدخول على هذه الكمره والعمل بها وإن كانت مفضوله عن النظام تحتاج إلى رقم مستخدم. وتصويري للوضع كان حقيقي 100 % مقتبس من فك وأفك إسمح لي أن أقول لك بأن تصويرك للوضع خالي من المصداقيه فما بالك بأن يكون 100%. صحيح يوجد بعض التأخير في إنهاء معاملات المواطنين ولكن هذا التأخير بسبب الأعداد الكبيرة من مواطنين ومقيمين والتي تقوم الأحوال المدنية بخدمتهم جميعاً في أنا واحد مع قلة في عدد الموظفين وبعدين ليش تعتبر انها تشويه لسمعة البلد .. ليش ماتعتبرها توضيح لبعض الأخطاء لكي نصل الى الحلول المناسبه أخي الكريم :توضيح الأخطاء يكون بالمصداقية المجرده في النقل للواقع وليس بالخيال الوصفي وأحلام اليقضة والكوابيس. صحيح أننا نعاني من بعض الأخطاء ولكنت ليست بالصورة التي صورتها للناس وعكستها بطريقة وصفك للواقع وجعله مؤلم.

  14. اخوي موظف الأحوال .. احترم رأيك وبالذات يوم قلت : صحيح انه يوجد هناك بعض التأخير في المعاملات بسبب الأعداد الكبيرة

  15. اقتباس: من الأخ رائد رائد زائر 52759 المبالغه لايصال الصورة 16/01/2009 21:11:15 الحقيقه انك بالغت في الوصف ولكن اعرف ان الغرض هو نقل الوضع السيء للنظام في ادارة الاحوال المدنية . تجربة احد الزملاء في تجديد بطاقته كانت تتطلب ارسال اوراقه لادارة الاحوال المدنية في حريملاء والموضوع يحتاج 20 – 30 يوم ولكن باتصال هاتفي واحد استطاع الحصول على بطاقته في نفس اليوم. المأخذ عليك هو الجرأة في وصف بعض الامور فهناك اعمار وجنسيات مختلفة تتابع المجموعه مثل (ماتطلع الا وانت حامل).وهي من المبالغات ايضا. ردي أنا متأكد يا أخوي رائد أنك معنا بالسعودية ولا لأ ترى كلامك لايمت للواقع بصلة أبدا أبدا البتة >>وركز على البتة قال إيش باتصال هاتفي ؟! والله لو أني ولد مدير الأحوال ما صارت ياشيخ أنا ما يضايق صدري إلا اللي يشوفوا المنكر ولا يلاحظونه يعني الحين أنتك رديت بأسلوب دبلوماسي صح ؟ والله ثم والله لو عندك ربع وطنية ماقلت هالكلام لأنه الرجال الوطني الحق ينطق كلمة الحق ولو على راسه طالما القصد منها الإصلاح ولو كان الأسلوب شديد شوي ومبالغ فيه صحيح ما قلنا شئ بس أقل شئ وصل واقع الكل يعيشه مو أنت اللي تقول باتصال هاتفي والله العظيم عيت تدخل راسي يارجل انا بطاقتي مقطعة وحالتها حالة وهم رافضين تماما يغيرونها بحجة انها منتهية أو تكون بياناتها ما تُقرأ خلك واقعي وثاني مرة يا تتكلم بالواقع بالشكل المضبوط يا تكتفي بالصمت فهو أبلغ من الكلام جل مودتي

  16. ايه والله إنك صااااااااااااااااااااااااااااادق .. ياخوي كل دوائر الحكومية .. قرف × قرف .. لانظام ..ولا شيء .. واللي يدافعون عليها .. منافقين .. ايه منافقين ونصابين .. ولا عندهم واسطة .. ومايعاملون هم بانفسهم .. متى راح نتطور .. متى راح نكبر .. متى ومتى ومتى .. أبو القرف اللي عايشين فيه .. اللهم انصر غزة يا أرحم الراحمين .. وفرج كربتهم .. ياقوي ياعزيز .. ودمر الكفرة الفجرة .. اللهم آمين .

  17. أخي العزيز (فك وأفك) .. بارك الله فيك وتقدم وإلى الأمام .. ولا تلتفت أبداً لكلام بعض الأشخاص .. فنحن لا نعرف دوافعهم .. رسالتك هذي أروع رسالة قريتها بالمجموعة، تتكلم عن واقع بأسلوب مضحك جداً جداً وممتع لآخر حد.. بارك الله فيك ،، ومن رسالتك هذه أنا بانتظار الرسائل القادمة من كتابتك على أحر من الجمر أخوك

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

كشخه، وعوده، وهوية وطنية

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول