قصيدة – طفولة و الحكايا كثار


عبر (قروب أبو نواف العالمي) واللي افخر بأني طنشت قروبات كثيرة عشان أحافظ على انتمائي له
اشكر كل من عقب على قصائدي واشكر كل من قرأها .. كما أشكر إدارة الموقع اللي عطتننا وجه وخلتنا نشارك الله يخليهم لنا
إخواني وأخواتي تختزن ذاكرتي مواقف جميييييييييييييله عن طفولتي ، وانا مغرم بشي اسمه طفولة .. يمكن عشاني احن لها كثير .. ما أدري ليه .. تكفون لا تبخلون عن نقدي .. بس نقد هادف ما هو مثل بعض الناس اللي ينقد وهو ما يدري وش السالفة ..

بعدين فيه ناس وعدوني بيسجلون قصايدي وفرحت بس ما شفت شي لا يكونون هونوا على العموم انأ ممنون لكم واسمعوا جديدي وعن الطفولة طبعا لأن غير الشعر الطريف أتوقع ما يناسب القروب وإلا وش رأيكم ؟

هلا والله هلا باللي لها في خاطري تذكار
هلا بك عد ماغبتي هذاك الوقت وسنينه

هلا بك ياطفوله عشتها والدار جنب الدار
يوم ان العمر توه مافرض فينا قوانينه

صدق منهو يقول ان الزمن مهما حصل دوار
مسير الحي يتلاقا ولو طالت ميادينه

انا منساك لو تنسى الطيور بصبحها الاشجار
ولو ينسى هذاك الطير في عشه وراعينه

اكيد اذكرك من ينسى الطفوله حتى واحنا اكبار؟!
هذاك الوقت منسى لذته يابنت وش زينه

يوم ان الجار احن من القرايب عند اخوه الجار
تعلم هالمبادي من تقاليده ومن دينه

يازين ايامنا وقت الطفوله والحكايا اكثار
وش اللي اقدر اقوله بعد وانتي تقولينه

ذكرتي يوم كنا فالليال الماضيات صغار؟
يروح الوقت مانعرف (طفش) كنا سلاطينه؟

وكنا عايشين بوقتنا رغم الفقر تجار
ولانقلد هذاك اللي يجمًع في ملايينه

والى وصًونا اهلنا والا جينا نروح في مشوار
ركبت بسيكلي وافرح الى جيتي تدفينه

وانا فيني غشامه مدري الامبلط (ن) بجدار
وياما صاد ثوبي سيكلي وانتي تفكينه

نوايانا مثل بيض الغمام اللي تهل امطار
مهو هالوقت مع سود النوايا شحيح ياشينه

ذكرتي لالعبنا وامتلت حتى (شوشنا) غبار؟
وثم رحنا نغسل وجيهنا في بركة التينه؟

وجانا (فهيد) قال انتم وش تسوون ياشطار
وقمت اجرجر بكمي ومن خوفك تجرينه

ولذتي بي والى جا من يمين انتي تجين يسار
أعرفك هاالعليله من مواقف ماتودينه

وقلنا في براءه وين جانا منه هالعيار
واخذ يسألني (يارشًود) من هي هالمسيكينه؟

وقلت اختي وبنت جيراننا يجوننا زوار
وقال البنت هذي شاطره ياحلوها زينه

وانا من غيرتي دمي براسي يابنيه فار
واقوم ادعي عليه ولو حصل (حشيت رجلينه)

تبين انساك معقوله!؟ ترى(راشد) وفي للجار
تعلم هالمبادي من تقاليده ومن دينه

اكيد اذكرك من ينسى الطفوله حتى واحنا اكبار؟!
هذاك الوقت منسى لذته يابنت يازينه

راشد السكران – شاعر المشاعر 27/4/2008م


تعليقات 12

  1. انا منساك لو تنسى الطيور بصبحها الاشجار ولو ينسى هذاك الطير في عشه وراعينه اكيد اذكرك من ينسى الطفوله حتى واحنا اكبار؟! هذاك الوقت منسى لذته يابنت وش زينه صح لسانك ذووقـ واتمني التواصل في القصايد انشاء الله شكراُ

  2. قصيده رووووعــهـ رجعتنا لأيام زماااان <<حست انها عجوز هع بس جد تسلم يدينك اخوي راشد وبالتوفيق

  3. صح لسانك وكلها روعه نوايانا مثل بيض الغمام اللي تهل امطار مهو هالوقت مع سود النوايا شحيح ياشينه بس هالبيت وافق شي في نفسي يعطيك العافيه ولاهنت

  4. يعطيك العافيه ياراشد السكران وصح الله لسانك قصيده حلوه والله تسلم يمينك لاتحرمنا جديدك

  5. ما شاء الله عليك راشد .. أنا أقول فالك القروب كله بعد إذن حبيبنا أبو نواف .. شفت هالبيت : انا منساك لو تنسى الطيور بصبحها الاشجار ولو ينسى هذاك الطير في عشه وراعينه لو بدل وراعينه( فراخينه ) أشوف إنه أحسن وهالبيت: نوايانا مثل بيض الغمام اللي تهل امطار مهو هالوقت مع سود النوايا شحيح ياشينه بدل شحيح ( شح ) لأن شحيح تصغيرها والله يوفقك أبو همس

  6. هلا والله هلا عد ماقلت يالسكران وهلا بلي دلني لموقعك يازينه فعلا قصيدة لذيذة تاخذك عبر حدود الزمن والشكر موصول لمن عطاني الرابط Rose- Almadinah وشكرا لبو نواف

  7. راشد السكران – شاعر المشاعر بكل تأكيد شاعر لايختلف عليك اثنان والله يوفقك بدنياك مثل ماتوفقت بشعرك تحياتي لك

  8. في الحقيقة قصيدة جدًا رائعة ،،، وما أجمل العودة إلى مراحل الطفولة وتذكر تلك الأيام الجميلة المليئة بالطهر والنقاء ، والعمل بالسجية ، والصحبة الرائعة … أبدعت أخي شاعر المشاعر و عشنا معك طفولتك البريئة الرائعة في سلسلة متصلة ، و أحداث مشوقة أبدعت كثيرًا حين قلت : وكنا عايشين بوقتنا رغم الفقر تجار ولانقلد هذاك اللي يجمًع في ملايينه

  9. وربي ابداااااااااااااااااااااااااااااااااااااااااااااااااااااااااااااااع ما شالله ياابو رشود بجد القصيده ولا اروع …. اسمحلي باخذ منها اقتباسات بسيطه بحطها في ماسنجري ممكن …؟؟.. انتظر منك الرد … اخوك : الباحث عن الحقيقه

  10. ذكريات(ن) رثاها من طلب تذكار تذكر طفولة عشتها و فاض فيك الحنينا ما بقول غير ليتني كل ما رقت قريت من قصايدك واهديتلي من قوفيك موال كلك ذووووق وصح بوحك

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصيدة – طفولة و الحكايا كثار

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول