قصيدة – أهل الحسد


ربعي واهلي قروب ابونواف اولا اشكركم واحد واحد
وأشكر كل من تواصل معاي إما بواسطة الردود بالإيميلات أو بواسطة الردود من موقعنا المتميز
واحب اقول للجميع الله يسامحكم بنقلها لأي مكان على النت ويكفيني فخر ان أي قصيده تنزل على قروب ابو نواف القاها منتشره في قوقل والفضل يرجع لله ثم قروب ابو نواف وانتم لاعدمتكم .
اليوم جايب لكم قصيده يارب يارب إنها تعجبكم
وبعدين لو ما أعجبتكم ميه بالميه الجايات أكثر صح ؟
هالقصيده من الحسد الله يكفينا وياكم الحسد واهله قولوا آآمين

من غيرهم أهل الحسد اللي يحسدونك حتى على نسمة الهواء الطايرة ، وللأسف بعضهم يملك مالا تملكه ولكن الحسد متأصل فيه
يعني بالعربي حسووود بمعنى الكلمة مايقنع ابد

ومالكم بالطويله يقول المتنبي:
إن يحسدوني فوا أسفا حتى من الموت لم أخلو من الحسد
عاد قلت أنا .. حلوه قلت أنا .. يعني إني ههههههههههههه
ماعلينا.. اسمعوا وش قلت :

أهل الحسد

أهل الحسد ماخلت الناس تعتاش
ولا وراهم للمخاليق عيشه

لو بيدهم خلوك تشخذ من اللاش
وصكوا على الارزاق باب ودريشه

حتى الهوى اللي ربنا حط ببلاش
لو يقدرون يعلبونه بخيشه

وان قلت ابا تنفس يقولون لك ماش
بفلوس والا افك سلكه وفيشه

من حسدهم دايم مناحيس وغشاش
ياكثرهم في وقتنا اللي نعيشه

ياجعلهم دايم مجاويع وعطاش
حساد والحساد دايم وحيشه

ياليت يسمح لي ربع طاش ماطاش
ابا اكتب مسلسل بناس(ن)غشيشه

شاعر المشاعر – راشد السكران


تعليقات 9

  1. البيت اللي ذكرته بالبدايه ماهو للمتنبي هذا ليزيد بن معاويه في قصيدته نالت على يدها

  2. حتى الهوى اللي ربنا حط ببلاش لو يقدرون يعلبونه بخيشه وان قلت ابا تنفس يقولون لك ماش بفلوس والا افك سلكه وفيشه يعلبونه بخيشه … علبة وخيشة معناها ان الخيشة صارت علبة والخيشة ليست بماده صلبة وان قلت ابا تنفس يقولون لك ماش صار الصدر اطول من العجز تحياتي لك .. اتمنى اني مااكون غلطت وهذا مجرد رآي ..

  3. الله يكفينا شر الحسد واهل الحسد..هذولا ناس مرضى الله يشافيهم…. سلمت والى الامام.

  4. ابيات أكثر من رائعة .. بس لي ملاحظة بسيطة أوة اقتراح اذا صح التعبير .. لو قلت : حتى الهوى اللي ربنا حطه بلاش ..بدل ببلاش اعتقد بيستقيم البيت أكثر يالغالي .. تحياتي لقريحتك 🙂

  5. صح لسانك .. وانتظر كل جديدك اخ راشد قصايدك فيها الطابع الاجتماعي نأمل ان تتحفنا بجديدك دائما وياريت تكتب عن قصيده عن بعض السلبيات اللي نعايشها لأن معالجتها شعرا سوف تساهم في تلاشيها .. وشكرا لك وللأمام دائما وعندي طلب صغير بيت شعر باسمي 🙂

  6. صح لسانك راشد قصيده رائعه وتحمل معنى كبير أبعـد الله عنا الحسد لكن لي إنتقاد بسيط مع أني مالي بالشعر كثير بس من خلال قرائتي للقصيده قلت : حتى الهوى اللي ربنا حط ببلاش لو يقدرون يعلبونه بخيشه انا أقول لو تخلي الشطر الأول حتى الهوى اللي ربنا (حطه بلاش) الفرق بالكلمتين الأخيره لكن هذا مايمنع من روعة وجمال القصيده بإنتظار ماتقدم من جديد

  7. حتى الهوى اللي ربنا حط ببلاش لو يقدرون يعلبونه بخيشه وان قلت ابا تنفس يقولون لك ماش بفلوس والا افك سلكه وفيشه ياكثر الحساااااااااااد اللهم أكفينا شرهم فاااااااااالك البيرق يارااااشد

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصيدة – أهل الحسد

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول