قصيدة : ألفية غير شكل


أخواني وأخواتي زوار وأعضاء وإدارة
قروب أبو نواف حفظكم الله ورعاكم
وددت المشاركة في هذه الخاطرة ، وأطمح أن تكون بمستوى القصيدة ، وأسميتها (الفيه غير) لأن المتعارف عليه أن الألفيات لا تكون إلا غزلية (حسب رأيي) .
حاولت كسر القاعدة وتحويل مجرى الألفيات إلى النصح والإرشاد لنفسي قبل غيري .
عموما هي مشاعر شاعر تحتمل الخطأ والصواب آمل تقبلها بصدر رحب ولا استغني عن تعليقاتكم التي استنير بها داااااااااااائما .

(الفية غير شكل)

الألف : أسمي قبل ماقول وابدا
حيث انها للناس هي خير مبدا
وقلبن تجاهلها فلا شك يصدا
ياويل تاركها من الرب ويلاه

والبا : بديت بنظم قافي بترتيب
حرصت اعديها عن الزيف والعيب
ضمنتها علوم الرجاجيل والطيب
مابي يقولون الرجل زل بحكاه

والتا: ترى من يفعل الخير لو مات
ذكره يبين وعند ربه بجنات
حيث ان ربي حافظن كل مافات
واللي كتب للعبد لابد يلقاه

والثا: ثعالب هالزمن جت مغاليث
كلن بزعمه يحسب انه ولد ليث
وهو بعرف الناس مثل البغاريث
يالله عن دروب المخاليق تقصاه

والجيم: جاهد نفسك بكل منهاج
لاشفتها تسلك لها درب منعاج
وعنادك لنفسك ترى طب وعلاج
وللي يطاوعها على الطول تقواه

والحا: حسبت اللي من العمر قد راح
إثر السنين اقفن مع الوقت سراح
يالله عسى تاليه خيرات وأفراح
ويرضى علي الله الى جيت ابا القاه

والخا: خطا ياللي على الناس تنفخ
وبوجه قاصرهم تذمر وتصرخ
خليت قلبه من عمايلك يكفخ
جا يرتجي وأثره على اللاش ملفاه

والدال: دارن قام من دون الاعماد
ينهد لو بانيه حريف واستاد
حتى ولو وثق بحلقات ووتاد
الحظ لمشيد بالاعماد مبناه

والذال: ذمـام المخاليـق ينبذ
ماله عن عيوبه مفرن ومنفذ
يالله عساه بسو الاعمال يوخذ
الا ان كان الله عن العيب نجاه

والرا: رعى الله من يحافظ على الجار
حتى ولو الجار في جيرته جار
وصى عليه المصطفى سيد الابرار
والا الردي يازين بعده وفرقاه

والزا: زمانن فات عن وقتنا ماز
وبكل شيّن عنه يفرق ويمتاز
والا الزمن هذا عواكيس والغاز
العمر يجري والغطو ماعرفناه

والسين: ساعه في ذرا العز مجلاس
أخير من دهرن يوطا به الراس
اقولها للي بغى كسب نوماس
واللي سمع قولي يبرق بمعناه

والشين: شد الحيل لاجيت تعتاش
والعجز لايطويك بالحاف وفراش
كلن بجهده مايجي شي ببلاش
ماينحسد من حاش فعله بيمناه

والصاد: صادق من ترى فيه الاخلاص
وابعد عن اللي بالمهمات ملاص
حتى ولو حطوا له عقال وعراص
مثله حرامن تتعب النفس لرضاه

والضا: ضريبة كل ماشذ الامراض
واشدها منهو تعرض للاعراض
مايدري انه من هل البيت الاقراض
يارب كل مسلم عن الشر تحماه

والظا: ظليمة من سمع بالمواعظ
أن الفقارا عايشين بلاحظ
ويصد عنهم مغضين باللواحظ
كنه يقول الخير شفته ولا ابغاه

والطا: طبيعة هالمخاليق تغلط
والا ولت خلقن عليهم تسلط
واللي يخاف ان الولي منه يسخط
يبعد عن امور بها الناس تشناه

والعين: عاين قبل تدخل بمطلاع
ولا يغرك شوفتك بعض الاطماع
خلك فهيم وعارفن درب الاسناع
من قاس قبل الغيص حصل مناياه

والغين: غبط الحق بالنذل مطموغ
مهما يحاول بالاساليب ويروغ
لابد خصمه من سواياه ملذوغ
يقوله اللي قد وطى الشرك ماخطاه

والفا: فروض الدين قمهن على خف
واحذر من التقصير ومن الولي خف
والليل لايسري بلا رفعة الكف
لاطاب نوم اللي مقصر بدنياه

والقاف: قم بوالدينك وبرفوق
ولهرجهم دور على زين منطوق
ولايجيهم منك نكران وعقوق
عزي لعاصيهم أي والله عزاه

والكاف: كمل واجب الضيف لاجاك
واحذر مثل ماقيل تعطيه علباك
حتى ولو انك لقيته من اعداك
ترى الفخر للي ضيوفه تنصاه

واللام: لو القول يقرن بالافعال
شفت الغرايب من جديدات وسمال
افعل وخل الغير يدلي بالاقوال
بالناس منهو يوصل العلم لاقصاه

والميم: من حافظ على دين الاسلام
وابعد عن علومن بها فسق واجرام
يبشر بجنات(ن) بها خير وانعام
والمجتهد رب المخاليق يجزاه

والنون: نومك والمخاليق يسعون
يجلب عليك الذل والفقر والهون
حتى ولو عندك مثل مال قارون
ترزق الله خاب من لا ترجاه

والها: هبيل اللي يبيّح بسده
وهو عن العربان كاميه مده
سرن تبيحه صعبتن تسترده
مسكين من خلا هل الشر تالاه

والواو: وين اللي على شبة الضو
ربعن على علوم المراجل تربو
وبكل علمن غانمن هم تبدو
راح الكثير ويحفظ الله بقاياه

واليا: ياليت اللي سمعها عذرني
يوم ان تعبيري عن اشياء غدرني
نضمتها واحساسي اللي ومرني
يا الله عسى مجهودي العيب يعداه


شاعر المشاعر = راشد السكران


تعليقات 3

  1. والله جـــــــــــــــــنننننننننناااااااااانننننننن القصيده واصـــــــــــل في التقدام إلى الامــــــام

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصيدة : ألفية غير شكل

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول