قصة وقصيدة الفارس والشاعر بداح العقري بتفاصيلها الصحيحه


بسم الله الرحمن الرحيم
السلام عليكم ورحمة الله وبركاته
..تحية طيبه الى قروب ابو نواف
والى كل زواره..موضوعي لن يكون موضوع قد ماهو ردآ وايضاح على احد المواضيع من احد الاعضاء
الذي نقل سالفة وقصيدة الفارس الشاعر واللذي هوجدي بداح العنقري بتفاصيلها الخاطئه
واللتي تمس لرجولة هذا الرجل قبل ان تمس اي احد يحمل اسم قبيلته فالموضوع له مده ,وانتظرت
ان يرد من لهم درايه اوسع وثقافه اشمل للتفاصيل ولكن.. للاطلاع على موضوع اخوي
ZA3EEM
اضغط هنا لمشاهدة الموضوع

احب اشكر اهتمامه في السالفه والقصيدة لكن اتمنى منه انه ماينقل الا شيء متاكد منه ومايمس لاحد بسوء.
قصه الشاعر والفارس بداح العنقري احب اوضحها بتفاصيلها الصحيحه اولا للي نقل الموضوع ورد عليه..ومن بعدها الى الاخوه القارئين


العنقري من قبيلة بني تميم اشتهرت هذه العائلة على مر العصور بعلمائها وشيوخها حتى اصبحوا مضرب مثل في سعة الاطلاع والعلم في الدين والافتاء حتى قيل لمن يفتي بغير علم (لو كنت العنقري) وهذا يدل على ان العنقري لايفتي بغير علم مطلقاً
نأتي الى الشاعر بداح العنقري هو احد امراء ثرمداء واللتي تقع في منطقة نجد..هو رجل كريم ومقدام وشهم وله هيبه وعزة عرف فيها وله مثل معروف فيه باخلاقه وعزته واذا قيل لك مثل(شيمة العنقري)
ويضاف الى ذالك انه فارس وقاد الكثير من الغزوات توفي عام 1136ه
له قصائد كثيره ولكن لن يشتهر له الا هذه القصيده لارتباطها بقصه حرب وحب
فقصة قصيدته في حربه مع الفضول
كان يعمل بالتجارة يبيع المؤن وكان أهل البادية ينزلون قرب المدن والقرى التي بها آبار المياه بالصيف حتى يأتي موسم الأمطار فيرحلون إلى أراضيهم




ولطبيعة تعامل بداح العنقري مع أهل البادية فقد كون علاقات جيدة مع البدو نظراً لما يتمتع به بداح من سمعة طيبة وتعامل نظيف ..فمن هنا تكونت العلاقه بين بداح وبين البدو اللذين كانوا يكتالون من دكانه فقد كان يبيع لهم المؤن ويصبر عليهم حتى يبيعوا السمن والسمين , فيدفعوا له الثمن . . . فصادف أن رأى بداح فتاة بدوية أعجبته
واسمها (هيا بنت الدويش) شيوخ المطران فقد كان يعرف والدها رجلاً كريما عرفه بداح من التعامل معاه فبعد ان رحلواالى اراضيهم ذهب بداح العنقري للحاق بهم ليطلب ابنته للزواج
ومن عادات البدو ان الضيف لايطلب طلبه الا بعد ثلاث ايام من مكوثه عندهم ..فقد احسنوا استقباله وقاموا بواجب الضيافه فبعد ان تمت الثلاث ايام
اخبر بداح والد البنت انه شاري لنسبه وطالب بنته على سنة الله ورسوله فلم يكن من والدها بداً من الموافقه الا انه سيأخذ رأي ابنته أول
لأن بداح سوف يأخذها للقرية إذا تزوجها..فمن المعروف ان البيت اللذي يسكنه البدو هو بيت الشعر وهو عبارة عن جزئين المجلس والجزء الاخر للنساء فكان لابد من سماع مايقال فبعد ان شاور والدها وقال لها ان بداح العنقري طالبك على سنة الله ورسوله فردت على والدها وبداح بقصيد فاصبحوا يترادون الابيت بين بعضهم

قالت: الله لا يهينك انت خابرني بدوية
ما احب الي يمسس غترته ويزبط عقاله
أنا ودي ببدوي يمشي بدمه حمية
لا تعزوا بالقبيله كلهم صاروا عياله
البدو غالين عندي لو حصل منهم خطية
الولد فيهم يساوي شيخ بجاهه وماله

قال: انا أنعم وأكرم ما كذبتي يا اجودية
سجل التاريخ عنهم البطولة والجماله
لكن الله لا يهينك لا تناسين البقية
الحضر رجالهم يا وسع صدره وطول باله
في المواقف إنشديني ما يتخلى عن خوية
لا فزع ما عاد يدري من وراه ومن قباله
وضيفهم يبشر بعزه والوفاء والمقدرية
كل واحد يسبق الثاني ولا ندري بحاله

قالت: اكبر عيب فيني يا الحضر النرجسية
ما أظن أحدٍ بيغريني بطبعه أو جماله
أنا احب الي زهابه حاجتين وبندقية
يفتخر بالذود ويسرح كل يوم في حلاله
وان لفاه الضيف شاف الفرق شاف الناس حية
بدوي صوت نجره أطرب الطرقي وجاله

قال: أنا ليه اختلقتي فرق وسويتي قضية
الكبر لله والمؤمن ضعيف براس ماله
يا بدويه الجروح اللي من أسبابك ندية
والخفوق اللي تحرا جيتك ياما جراله
والعيون اللي تمنت شوفتك صارت شقية
والفراق اللي بليا ذنب يذبحني لحاله

قالت: الله لا يعاقبني أنا بنتٍ بريّة

فردت على والدها ان الحضري زين تصفيح وانها لاتريد الا ابن عمه
فعتذر والدها عن مابدر منها وقبل بداح عذره وشكره واطال المبيت عندهم حتى الصباح ليعود ثانية من حيث أتى !!! وفعلاً بات عندهم تلك الليلة
وفي الصباح الباكر وقبل رحيل بداح حصل أن أغار قوم الفضول على أهل الفتاة وأخذوا حلالهم كله وابتعدوا به
, فصاح الصياح بالمضارب وهرع القوم للحاق بإبلهم وتخليصها من أيادي الغزاة هذا كله وبداح جالس يشرب القهوة ولا يحرك ساكناً والفتاة تنظر إليه بازدراء وهي تردد على مسامعه : الحضري خيال نظره وهو لا يكترث لهاولما جاء الضحى عادت وذيال القوم منهزمة لم تستطيع تخليص حلالها من أيدي الغزاة وفي هذه اللحظة تناول بداح سيفه ورمحه وركب فرسه وأغار بطلب الغزاة وحيداً والفتاة تنظر إليه
ولما جاء العصر عاد بداح وقد هزم الغزاة وحيداً وأعاد الحلال كاملاً ومعه خيل الأعداء , وبعضهم مأسورين فتعجبت القبيلة كلها من فروسيته وهو الضيف الذي لا يلزمه شرع البدو بمناصرة مضيفيه إلا من باب النخوة شعرت الفتاة بالخجل لما قالته له فوقفت تزغرد له كأنها تعتذر وتقول قبلت الزواج بك
فاتت اليه بالقهوه ولم يكن منه الاان سكبها وقال القصيده:

الله لَحَـدْ يامـا غـزينـا وجين
ويامـا ركبنـا حَامِيَـات المشاويـح
ويامـا علـى أكـوارهـن اعتلين
ويامـا ركبناهـا عصيـرن مراويـح
ويامـا تعاطـت بالهنـادي يـدين
ويامـا تقاسمنـا حـلال المصاليـح
وَرَاك تزهـد يا أريش العيـن فين
تقول خيّـال الحضر زيـن تصفيـح
الطيـب ما هـو بـس للظـاعنين
إمقسـمن بيـن الوجيـه المفـاليـح
البـدو و اللـي بـالقـرى نازلين
كـلٍّ عطـاه الله مـن هبـة الريـح
يـازيـن يـوم إنـك تبيـح الكنين
خليت جفـن العيـن نومـه شلافيـح
يـوم الفضـول بحلتـك شـارعين
بالشلف ينحونـك سـوات الزنانيـح
يوم انجمر رمحـي جذبـت السنين
وخليت عنك الخيـل صـمٍ مدابيـح
هيا عطينـا الصـدق هيـا عطين
وإن مـا عطيتينــاه والله لا صيـح
أصيح صيحـة مـن غدالـه جنين
وإلا خلوجـن ضيعوهـا السراريـح
ياعـود ريحـانٍ بعـرض البطين

فاخذ برحاله وعاد الى ثرمداءوتركها لتموت بحسرتها.
الله يرحمه ويحسن مثواه وذكره ويجمعنا بوالدينا في الفردوسالاعلى من الجنة..


تقبلوا مشاركتي:
(حفيدة بداح العنقري)


تعليقات 55

  1. .. ما قصرتي .. لا يضاح الحقيقه .. بس اخونا ZA3EEM ذكرت نهايه رسالته .. ان لها اكثر من روايه .. تختلف ولكنها تتفق بالمضمون .. لك جزبل الشكر ..

  2. والنعم فيكم اختي .. وبجدكي بداح .. لكن أعتقد الغزوات انتهت بعد وفات النبي صلى الله عليه وسلم .. 8)

  3. قصه رائعه قرأتها منذ زمن وحبيت اعلق فقط للاشادة بادراجك لها هنا انعم واكرم بالبناخي العنقري السعدي التميمي ,, تقبلوا تعليقي اخوكم الحنضلي التميمي

  4. الاخت الفاضلة حفيدة بداح العنقري ما اعتقد ان زعيم سب او شتم في جدك؟ ولا اعتقد انه غير مغزى القصة بالعكس الرجال مدح فيه ومدح في شجاعته وكرمه وعزة نفسه المفروض تشكرينه بدل ماتقولين له لا تنقل القصة ولا تمس احد بسوء!!!! صراحة ردك غير لائق مع احترامي الا ان كان المقصد انك تمجدين جدك اكثر واكثر وتصعدين على اكتاف الاخرين!!!

  5. الخطاء ليس من ناقل الموضوع الأول الخطاء من الذين أصبحت وظيفتهم تأليف الكتب و القصص دون الرجوع إلى مصادرها أو الروجع إلى أصحاب القصة أو من عايشها . فكلٌ يريد أن يثبت أن قصته هي الحقيقية و لعل القصة التي ذكرتيها أقرب للحقيقة فجزاكِ الله خيراً و بارك الله فيك

  6. يعطيك العافيه على القصه .. لكن ..الزعيم مااعتقد انه غلط …او نقص من رجولته التي تدعين …يابنت الاجاويد… ولا اعتقد انك تبغي إلا على قولهم الصعود على الاكتاف …

  7. شكرا لحفيدة بداح .. بيد أن لي ملاحظة على الرواية فبالرغم من ركاكة الاسلوب الا أن فيها تناقض وقصة بداح معروفة ومدونة في كتب التاريخ.. واعتذر لهذا الرد

  8. يزبط عقاله ..حلوة يزبط.. من اين اتيتي بها ياحفيدةبداح.. من تركيا والا من الهند

  9. ملاحظة / هالسالفة لها أكثر من رواية تختلف بتفاصيلها الدقيقة لكن مضمونها واحد . والله قد أنصف بهاكلام ومما تواتر إن قصة الأخ أقرب للصحة والله العالم. وأنا ما أشوف الأخ أخطأ بشي بالعكس أجاد وأفاد.

  10. السلام عليكم بصراحة أختي الكريمة ويا من ذكرتي أنك حفيدة العنقري لا أجد في ما تفضلتي به من تشويه أو طعن في قصة جدك رحمه الله أي أن الأخ ZA3EEM لم يذكر شيئ يستحق غضبك الذي لمسناه من توضيحك بل على العكس هو ذكر بمثل ما وصفتي واتوقع أنك لم تقرأي موضوعه جيدا .

  11. اطلب من الاخت كاتبه الموضوع ذكر مصادرها عن هذه الواقعه لانها مست عائله الدوشان من مطير ومع احترامي للعنقري وطيبه ولكن قبيله مطير تعتز بامرائها ومشايخها ولا يفتكهم الا فرسانهم فارجوا ذكر المصدر الصحيح لكي لانهرف بما لانعرف بانتظار الرد

  12. اخوي خذاني الشوق..اشكر مرورك ..واتوقع اني شكرته في موضوعي! اخوي عبدالمحسن ماعليك زود …ونحن ليس بحصة تاريخ لأشرح لك ماهي الغزوة 🙂 اخوي منصور ينعم بحالك وماعليك زود واشكر اشادتك . اخوي متعب..مشكور على مرورك وانا ماقلت كلام غير لائق في اخوي الزعيم بالعكس اشكر اهتمامه بالموضوع بس انا حبيت يتاكد وماينقل كلام يمس بسوء واللي هي طلب النخوه من المرأه وانه لم يقبل طلب نخوة رجال؟؟؟؟؟؟؟ اي احد يقيسها وبيقدر ردة الفعل …وانا على كثر الراويات اللي سمعتها عن القصه الا ان هذه الروايه لم تمر على مسامعي ابداً !! وانا لم اصعد على اكتاف الاخرين هذه وقصه جدي فارضه نفسها على التاريخ ولا فيه كلام بينقص من قيمتها.. اخوي خالد مشكور على مرورك وصح كلامك لكن يبقى اساس وصحة القصه من مصادرها الموثوقه.

  13. السلام عليكم في الحقيقة أنا سمعت السالفة من حمد الريس في الخيمة الشعبية وجاب تفاصيلها كاملة، ولها بقية طويلة، لم تذكر لا في هذا الموضوع ولا في موضوع الزعيم، وكيف ماتت البنت، ثم كيف مات بداح، إلى آخر القصة والقصة عندي مسجلة .. لو أردتموها حاولت أرفعها لكم مع إن الاتصال هاليومين مش كويس عندي ياعلي هذا الموت ماهوب وثاب ———————مير الله الله على الكفن والرهابه ولياحملتوني على اللوح والباب ———————بالك تحرمن وقفتن عند بابه وذا توايق الزين وضاح الانياب ———————قله توفى العنقري ياسفبا به ذا صاحبي ماهو لغيري بعجاب ———————-وليا شافني قامت تلاعج عذابه وليا شاف احد تغبى ورى الباب ———————-وليا شافني مافوق راسه رمى به

  14. وراك تزهد ياريش العين فينا وتقول خيال القري زين تصفيح والله لحد ياما غزينا جينا وياما ركبناهن عصير مراويح وياما غزيناهم وياماغزينا وياما تقاسمنا حلال المصاليح ويوم الفضول بحلتك شارعينا والخيل باخوانك سواة الزنانيح اذا انكسر رمحي جذبت السنينا وخليت عنك الخيل صم مدابيح وترا الظفر ماهوب للظاعنينا مجسم بين الوجيه المفاليح البدو والي بالقري ساكنينا كلن عطاه الله من هبة الريح والصدق عندك مير هيا عطينا هيا عطينا الصدق يازينة الريح هيا عطينا الصدق هيا عطينا وان ماعطيتينيه والله لاصيح والله لاصيح صيحه من غداله جنينا والا خلوج ضيعوها السراريح ولي صاحب…كما طلع تينا عنهن جديد الثوب غادي تشاليح صخف بلطف باعتدال بلينا ولا مش مش البصره ولاهن تفافيح ياعود ريحانا بجال البطينا من وين ماهب الهوى بان له ريح وهي اللي تطلع الأعنة وتكبه قدام الجماعة وهو يركب حصانه ويروح يبي ديرته وميرتقوم البنت وتقول يبه يحرمون علي الرجال غير بداح قال له بداح: وانتي تحرمين عليه من بد بنات ادم وتقوم البنت من غير شعور وتلحقه يوم انهم مشو وراها يبون يردونه ومير يلقونه ميته المهم جاء ابو البنت ودفنها …… البنت الي توفت له اخت اجمل منه والاخت ذي قالت لابوه يابه الي ذبح اختي ابي اذبحه قال الابو ابوك وش تذبحينه به ذا محد ينطحه تبين تذبحينه انتي؟! قالت لا مالك دخل انت حطني في بيت قدام قصر العنقري بثرمدا . وافق الابو وفعلا سكنو قدامه العنقري صار كل ماطلع مع قصره تجي البنت وتكشف له محاسنها ويوم بعد يوم العنقري حب البنت وعلى قولهم (دقر عنه) لكن هي له مقصد ثاني الي هو تبي تولعه وبعدين تتركه وتجحده العنقري جاه مرض الحب الله يكفينا شره واشتد عليه المرض الين ماجاء احد جماعته يقاله علي . واخذه لراس ضلع ماهوب بعيد عن الديره يوم بدآ العنقري يونس الموت وعلي حمى المخاطر يبي يكويه يحسب الي به الوثاب والوثاب مرض معروف . ومير يقوم العنقري ويقول البيتين ذولي الي هن اخر ماقال بالدنيا مير الله الله على الكفن والرهابه ولياحملتوني على اللوح والباب -بالك تحرمن وقفتن عند بابه وذا توايق الزين وضاح الانياب له توفى العنقري ياسفبا به ذا صاحبي ماهو لغيري بعجاب وليا شافني قامت تلاعج عذابه وليا شاف احد تغبى ورى الباب وليا شافني مافوق راسه رمى به وبقي شوي لكن الحروف ما تكفي …

  15. الله يرحمه ويغفر له ويتوب عنه وبعد ماقضى العنقري من قصيدته مات فعلا ومير ياخذه علي ويدور به بثرمدا ويصيح ويقول صلو على الجنازه يالمسلمين … مر من عند بيت البنت ومير تساله من الي مات قال العنقري يطلبك الحل قالت قل عليه الله قال عليه الله ومير تقول اصبر وان مت انا فادفنوني معه ومير تجدع روحه من فوق السطح وتموت

  16. اهلين اولا احب احيي العناقر كلهم لاني اعرفهم من قرب ونعم العائلة أصل طيب وأفعالهم طيب من اولهم الى اخرهم .. لكن لي تعليق علي الابيات اللي ذكرتها الاخت حفيدة بداح العنقري وهي الابيات اللي في اول الموضوع ومكتوبة كمحاورة بين بداح والبنت البدوية باللون الازرق والاحمر هذي ماهي صحيحه ومؤلفه وباين من العبارات اللي فيها انها ليست عبارات ولاكلمات الجيل والعصر اللي عاشة بداح والبدوية واقرب دليل كلمة نرجسية ماظنها كانت معروفه هذاك الوقت ومس غترته … فالابيات مدخله علي القصة لكن المتعارف عليه والمتواتر هو ماورد بالقصة وفزعه العنقري مع القبيلة ورد الحلال المنهوب والابيات اللي قالها … هذا ماحبيت اوكد عليه

  17. ونعم من بداح لكن كلامك انه راح لحاله ورد الحلال وفوق هذا جاب معه اسرى هذي ما تخش العقل حدث العاقل بما لا يعقل فان صدق فلا عقل له

  18. واضح و صحيح إن الأبيات تأليف … مهيب صدقية … و هقوتي و الله العالم إن حفيدة العنقري بعد ما جابت العلم كامل … و زعيم كلامه أقرب للصواب هقوتي … أجل راح لحاله و رد الحلال >>> على كل حال ببسي تلقيمة أورد نهاية حلوة … مدري عن صحتها … (( يا جماعة إن ما جاز لكم تعليقي فلا تعدونه )) …

  19. حفيدة بداح العنقري .. قبيلة العناقرة قبيلة معروفة من تميم وتميم قبيلة مشهورة في التاريخ الجاهلي والإسلامي كانت بينها وبين عامر بن صعصة الأيام المشهورة … لكن ذكرك للقصة بهذا السياق والأبيات التي كانت بينه وبين الفتاة لا بد أن يكون له مصدر فهل ذكرها ابن منديل في أزهاره النادية أو علق عليها أبي عقيل الظاهري في تاريخ نجد في عصور العامية أو ذكرت في تاريخ نجد ، ولا يعني طلبي لمصدر القصة التقليل من جدك بداح و لا من قبيلة العناقرة لكن أتعجب من كيفية انهزام الدوشان أمراء مطير وهم الفرسان المعروفين وهذه شهادة مني وأنا أنتمي إلى قبيلة المقطة أمراء عتيبة التي كانت بينها وبين مطير الحروب الطاحنة قبل التوحيد فكيف ينهزم الدوشان؟؟!! الأمر الآخر الفاظ القصيدة أحس أنها لا تنتمي إلى عصرها فجدك الشيخ بداح عاش في القرن الحادي عشر الهجري والفاظ القصيدة أخال أنها من عصرنا ولو أتيت إليك بقصيدة من القرن الثالث عشر الهجري لما عرفت أنا وأنت بمضمونها ومعاني الفاظها.. فارجو منك يا حفيدة الشيخ بداح العنقري أن تذكري المصدر أو الراوي وشكر لك .. كتبه أبو خالد المقاطي العتيبي مكة

  20. السلام عليكم للأسف احنا العرب همنا الماضي و وقتنا يضيع بسبب مناقشة الماضي ناس تحتقر ناس بسبب الماضي بيوت تنهدم بسبب مناقشة الماضي ما ادري الى متى ننسى الكلام هذا و نتطووور

  21. اقالت: الله لا يهينك انت خابرني بدوية ما احب الي يمسس غترته ويزبط عقاله أنا ودي ببدوي يمشي بدمه حمية لا تعزوا بالقبيله كلهم صاروا عياله البدو غالين عندي لو حصل منهم خطية الولد فيهم يساوي شيخ بجاهه وماله قال: انا أنعم وأكرم ما كذبتي يا اجودية سجل التاريخ عنهم البطولة والجماله لكن الله لا يهينك لا تناسين البقية الحضر رجالهم يا وسع صدره وطول باله في المواقف إنشديني ما يتخلى عن خوية لا فزع ما عاد يدري من وراه ومن قباله وضيفهم يبشر بعزه والوفاء والمقدرية كل واحد يسبق الثاني ولا ندري بحاله قالت: اكبر عيب فيني يا الحضر النرجسية ما أظن أحدٍ بيغريني بطبعه أو جماله أنا احب الي زهابه حاجتين وبندقية يفتخر بالذود ويسرح كل يوم في حلاله وان لفاه الضيف شاف الفرق شاف الناس حية بدوي صوت نجره أطرب الطرقي وجاله قال: أنا ليه اختلقتي فرق وسويتي قضية الكبر لله والمؤمن ضعيف براس ماله يا بدويه الجروح اللي من أسبابك ندية والخفوق اللي تحرا جيتك ياما جراله والعيون اللي تمنت شوفتك صارت شقية والفراق اللي بليا ذنب يذبحني لحاله قالت: الله لا يعاقبني أنا بنتٍ بريّة القصيدة مختلقة و غير صحيحة لعقال لم يظهر إلا في المئة و خمسين سنة الأخيرة و لا أحد بالسابق يضبط عقاله ألفاظ ( نرجسية – سويتي قضية – سجل يا تاريخ ) أيضا اللغة الشعرية و الوزن فالنص بديهيا غير صحيح و مختلق

  22. مع احترامي وتقديري لعائله العنقري الا ان الدوشان لايناسبون الامنهم وفي اضيق الاحوال لايصاهرون الاشيوخ القبائل والنقطه الاخرى الدوشان ومطير يفتكها غريب هذاالروايه فيهاالكثيرمن المغالطات ارجو الرجوع للمصادر وتوثيق الروايه بشكل صحيح واخيرا الدوشان واقسم بالله لاتوجد امراة من500 عام اسمها هيا يااختي الدوشان عائله معروفه عندالجميع وحدث العاقل بمايليق

  23. يقول [email protected]:

    أنا شاعر ومدرك جيدا ً للأوزان واللغة الشعرية في العصور السابقة الأبيات التي ذُكرت على أنها رد بين الرجل والمرأة فيها إختلاق واضح وزيف وتشويه للتاريخ لأسباب البدو لا يقولون النرجسيه ولا يدركون معناها ثانيا ً من شيم البدو عدم مخاطبة المرأة للرجل الغريب ثالثا ً القصيدة رباعية التفاعيل مع انها مكسوره في اغلب ابياتها ورباعي التفاعيل لم يظهر إلا من فتره قريبه كــ لحن الشيباني في الشعر النبطي و المحاوره ( الرجد ) أو تفعيلة ( فاعلاتن فاعلاتن فاعلاتن فاعلاتن ) وهي التي كتبت عليها القصيدة وأتحدى ان تأتي لي بقصيدة من التراث رباعية التفاعيل في عصور ماقبل 150 عام وليس 300 عام هناك اسباب كثيره تجعل ان روايتك ماهي إلا للتلميع ، وذكر الأخوة بعض منها ربما اعود لاحقا ً وارد وللمعلومية انا لست مطيري ، بل عتيبي حتى لا تقولين انني في حكم الضد بصراحة يا بنت العنقري الكذب خيبه (:

  24. يوم تقول بنت الدويش انا بنت بريه للتوضيح بريه احد جذوم مطير الثلاثة التي هي بريه وعبدلله وعلوى. وعلوى هي التي ينتمي لها الدوشان فيفترض لو القصه صحيحه تول(انا بنت علوى) وليس كما ورد في في قصتك يا اختاه. امل التعقيب والتوضيح لان السالفه لا تعني العنقري فقط حينما اوردتي الاسماء والقبائل الاخرى. يا شيخنا مالك حلياُ مع الناس كونك نهار وكون غيرك نهابه

  25. ونعم والله ببداح واحفاده .. واحد من العيال عويرضي ويرجع لكم يالعنقري قالي القصه عن جده وكانت مطابقه لما ذكرره الأخ زعيم في موضوعه .. بس معليش هالمقطع ما يخش المخ .. اقتباس: (( وفي هذه اللحظة تناول بداح سيفه ورمحه وركب فرسه وأغار بطلب الغزاة وحيداً والفتاة تنظر إليه ولما جاء العصر عاد بداح وقد هزم الغزاة وحيداً وأعاد الحلال كاملاً ومعه خيل الأعداء , وبعضهم مأسورين )) والله لو انه سوبرمان ؟؟

  26. السلام عليكم ..اشكر كل من رد على الموضوع سوا بالحسن او العكس..لكن..بداح العنقري تعددت الروايات على قصته ولكن اللذي ورد في الاعلى انه مات مقتول ا انه لن يقبل الا بالثلاين نخوه و غير ذلك كل هذا ليس له اساسا من الصحه ..و من قال انه كذب فماعليه زود ولا كلامي ولا كلامهم بينقص من تقديرها . وكل من زاد لمعلوميته بالتاريخ او بالقافيه اشكره .. وغيرهم لم يكون لهم غرض الا التنقيص من قدر هذه القصه وهم بالاساس لن يطولوا النجوم:) وشكراًً

  27. حللوه سوبر مان العنقري خخخخخخ الله يرحمهم كلهم ماتوا وشبعوا موت وانتم تهاوشون يا ناس عطوا سداح فرصه مدري بداح قولوا ايه صح عليك يا حفيدة سداح وخلوا القصه تنتهي اقول لكم حل اسألو الشرهان عن القصه وهو يعلمكم

  28. سلمتي ياحفيدة بداح وهالقصه معروفه واحنا الجيل الاخير ومعروفه ولايهمك كلام العذال .. واسم البنت هيا والدليل يوم يقول البيت .. هيا عطينـا الصـدق هيـا عطين من يفكر اساسا يناسب العنقري له الشرف.. وشكرا ..

  29. ياخوان على كثر ماقريت في تاريخ مطير .. ما اذكر ان احد فزعلهم بمثل هالحرب !! وبعدين يابنت العنقري ترا قصة الزعيم اهون وارحم شوي .. لكن الظاهر الغرض من الموضوع تلميع في تلميع .. لحسم الجدال الرجاء ارفاق اي مرجع .. او مصدر للقصه .. ولا تجبريننا على تصديق كلامك لمجرد انه جدك .. والنعم فيكم .. لكن عجزت استوعب صراحه

  30. اول شي احب اشكر اختنا ابنت العم ع ماطرحت وثانيا مثل مالكل عارف ان الروايه لها اكثر من روايه والاخت بنت العنقري حبت تنقل الروايه الصحيحه ولكن مثل مالكل عارف الحمايه والدفاع وكل شخص منا راح يقول مثل ماقالت تحياتي للجميع بدوام الصحة والعافيه

  31. سلام من الله عليكم 1- المحاوره الاولى نتاج حديث والعنقري صاحب التراكيب البدويه الطاغيه في قصيدته الاصليه والالفاظ كذلك اكبر دليل لمن له درايه بالشعر على عدم صحة ورودها ونسبتها له وللبنت .. ناهيك عن الكسور الواضحه في المحاوره والعنقري شاعر فذ لاتفوته الكسور 2- انا قلت يمكن ازعلتك سالفة ثلاثين نخوه من بنت لكن والله انها استر من سالفة جلس يتفرج لين ردو القوم مهزومين وقام هو لحاله((وحيداًB )) وذبح الفريس وجاب الغنايم ورد الحلال ((كاملاًB ))؟؟ 3-لاتتجاهلين ردود عيال الدويش اللي يطلبون منك مصادر موثوقه ومرجع لقصتك اللي اوردتيها ترا من حقهم ومن حقنا نعرف الرواية الصحيحة كقراء ومطلعين 4- والنعم فيك وفي لابتك وبالعنقري وكل من يقرا ماكتب 5 – عدد الحروف المتبقية : 1383حرفا

  32. حتى انا ابلعت سالفة النرجسية 😀 عموما الزعيم قال :ملاحظة / هالسالفة لها أكثر من رواية تختلف بتفاصيلها الدقيقة لكن مضمونها واحد . يعني ماقصر الرجال :$ وكني بسالفتة واقعية اكثر ..

  33. الاخت الفاضلة حفيدة بداح العنقري ? ما اعتقد ان الدويش شيخ مطير والي كان ركن اساسي من جيش الاخوان الي زي ماا تعرفين وحد الجزيرة بقيادة الملك المؤسس عبدالعزيز ابن سعود رحمة الله ، ما اعتقد انة كان عاجز يرد الغزاة او يحتري لين ضيفة ( بغض النظر عم اسم الضيف) انه يرد حلاله والنعم فيكم وبكل القبائل والاسر العربية الكريمة لكن الدويش مهوب عاجز يحمي نفسة او قبيلتة بعد الله . مودتي،،،

  34. مع احترامي الشديد انا مع كلام تركي لكنه سبقني وكتبه يعني انه لحااااااله وقبيله قبله ما قدروا حشى افلام ابيض واسود والله لو يحارب بيدينه الثنتين ورجلينه ما قدر يعني بالعقل انتي يا بنت الاجواد تخيلي الموقف براسك انه واحد يحارب مجموعه اذا ما قتله اللي قدامه بيطير راسه اللي وراه انا ما ادري عن هالقصه الا من رسالتك اللي توها وصلتني بس طلعت عيوني لدرجة اني يوم قلتها للي جنبي

  35. أنتم وش فيكم على البنت أول شيء هي قالت عشان ماتتكلمون عنه بسوء يعني يوم طلب 30 نخوة . ثانيا : بداح حضري وعادي يقول نرجسية . ثالثا: الأبيات كانت أبيات رد ، يعني بداح الله يرحمه مانقح القصيدة . رابعا: الأولى هيا والثانية هيّا خامساً : أكيد انه تقهوى وراح بعدين جابهم هو ورفقاه وهذا اللي كانت تقصده حفيدة بداح لأن موقع الفضول معروف سادساً : عقب المشكلة هذي الدويش درب خوياه وحط قوة وحصن منيع للقبيلة لأنه أخذ درس.

  36. هههههههه الله يقطع سوالفك يا بنت العنقري هذا اللي ذكرتيه سوبرمان مو بداح يعني معقوله نفر واحد يغزو قوم او قبيله ويسترد ما سلب وفوووقها يسلبهم ما معهم ….!! قويه لو تحكين الحكايه لمخرج افلام هندي سوف يرفض الفلم برمته … لانه ما ينبلع لو شربنا وراه 100 جركل

  37. القصه الاقرب للتصديق ان العنقري بعد ان رفضته البنت اتصل على حراميه واتفق معهم على سرقه معزبيه وان يكون هو المنقذ …. كل هذا بمقابل ليكون شجاع في نظر الفتاه والدليل ان الرجل غني وتاجر انه بات عندهم وبقي للصباح بعد رفضوه ! لماذا انتظر حتى يعود رجال القبيله حتى يذهب وحده ؟؟ ارجو النشر وفتح باب التعليق للجميع

  38. الله يرحمهم كلهٍـٍـٍـٍـٍم ويسكنهم فسيح جناته ..~ ..الكلام في الماضي نقص في العقل خلاص فطسوا وانتم قاعدين تهاوشون ؟! المهم مشكوره حفيدة العنقٍـٍـٍري ..] ونعم فيك وبجدك وبالعنقري عيال عمومتي ..~ْ خٍـٍـٍودافٍـٍـٍـٍـٍـٍـٍـٍـٍـٍـٍـٍـٍـٍـٍس..(ورده)

  39. اختي اذا بغيتي توصلين اهلك وجماعتك لما وصل اليه فرسان القبايل ومنهم الدوشان ,, فيجب عليك ان لاتكذبي وتنسبين قصائد بندر الرشود الى جدك رحمه الله هذه القصيده لبندر الرشود قالت: الله لا يهينك انت خابرني بدوية ما احب الي يمسس غترته ويزبط عقاله …. الى اخره http://www.alriyadh.com/Contents/24-12-2003/Mainpage/Thkafa_9502.php اتمنى من قروب ابونواف نشر هذا الرد وارساله الى جميع المشتركين وذلك لمافيه درء للمغالطات التي جرتنا اليها حفيده بداح شكرا

  40. اقول لا يكثر بس يابندر العتيبي قال ايش قال بندر الرشود استرح بس :$ .. المشكله انكم تحسدون البنت على ان جدها شاعر ومعروف والكل يمدح فيه وتبون تخربون سمعته لا انتم ولا الف من اشكالكم يقدر يشوه نص سمعت العناقره .. هاذا ردي لكم .. ونعم فيك حفيده بداح .. وانشاءالله يروح حسدهم ما يطول .. سلمى سدحك ان شاء الله مانيب قايل قولي امين .. سداح في عينك .. روحي شوفي اسم جدك قبل .. اجل ابوك مدري جدك حاظر الفلم ماشاءالله .. الحمد الله على نعمت العقل بس .. وشكرا ..

  41. السلام عليكم اولا احب اشكر بنت عمي وكلامها عين العقل.. الماضي شي اساسي في حياة اي انسان وماحد يقدر يتجاهله وهذي هي القصه المعروفه ولو كثرت عنها الروايات..ولا يهمك كلام العذال ولا تديرين له بال لان(اذا كثر الطاعنون من خلفك فاعلم انك في المقدمه..ويابو نجوميه العنقري واصلين للنجوميه قبل ماتجيبك امك .. وليه مايكون شاعرك لاطشها من جدي !!!!! اتمنى قروب ابو نواف يرسل هالحكي لجميع المشتركين

  42. السلام عليكم..ياناس يلوموني في العنقري.. كلهم فرسان وشعراء واخلاق يشهد بها الجميع.. وسلمت اناملك ياخالد..ماعليك زود.. وكل اللي يحكي فيهم من غيظ مايحسون يمكن نقص فيهم او احد من جدنهم مشوه لهم السمعه وحابين يفرغون كبتهم بمجرد محاوله لتشويهه سمعه فارس العنقري ..ويبطي من حاول على العموم اشكر بنت العم على نقلها لالتفاصيل الصحيحه والموثوقه المصادر ..

  43. الأخ بندر العتيبي بدل ما تعلق على مواضيع لم تمسك ولا قبيلتك سؤوالي لك كيف تأمر عليكم واحد من البقوم معناها يوم يتأمر عليكم كان وضعكم صعب جداً وكنتم سهلين الانقياد ارجوا من قروب ابو نواف ادراج مشاركتي

  44. بسم الله الرحمن الرحيم مع احترامي الشديد لحفيدة بداح العنقري فأني أود أن أشكرها على اهتمامها بالموضوع وأريد أن أختصر القصة الحقيقية عل شكل نقاط وذلك لأجل التصحيح وذلك حسب ماقرأته وأطلعت عليه في أكثر من مصدر : أولاً : القصة وقعت لبداح مع قبيلة الفضول فقط وليس لها علاقة بقبيلة مطير لا من قريب ولا من بعيد فكما تعلمون أن قبائل الفضول كانت تسكن نجد في القرون الماضية وكان لها سطوة آن ذاك قبل أن تنزح وتستقر في العراق وبلاد الشام واجزاء من نجد والأحساء وهم الآن متواجدون في تلك المناطق فوجودهم في نجد كان في وسطها وتحديدا في مناطق نجد شقراء والوشم ومرات وحريملاء وبقية الامارات النجدية وثرمداء كما هو معروف في الوشم . وكانت بادية الفضول متواجده على زمن بداح العنقري. ثانيا :بداح العنقري أراد أن يخطب بنت الفضول من شيخهم حيث كانت باديتهم تقيم حول ثرمداء في ذلك الوقت وسمعت البنت طلب بداح فقامت وردت بأبيات توضح فيها رفضها لذلك وتبرر رفضها كما ذكرته الابيات السابقه وان كان فيها بعض الاخطاء ولكن الابيات صحيحة ومعناها صحيح وحدث بالفعل مع بداح والالفاظ المذكورة قد يكون أنه تعرضت لبعض التعديل والتحريف لتواتر النقل . ثالثا : عندما سمع بداح رد البنت عاد الى ديرته ثرمداء وأتاه الخبر بأن الفضول تعرضو ا للغزو من قبل حنشل أخذوا مالهم وحلالهم وبعد ماعلم بذلك أخذ بداح خيله وهب لنجدتهم هو ومن معه من جماعته وتبع الحنشل حتى سطا عليهم وقتلهم جميعا وأخذ الحلال وعاد به الى قبيلة الفضول وكان متلثم بعمامته وسلم الحلال لشيخ الفضول وكانت بنت الشيخ تنظر اليه وعرفته وعرفت صوته ثن نطقت بأبيات تبدي فيها اعتذارها وقبولها به وذلك بعد عودته لديرته فرد عليها بقصيدته المشهورة عنه . هذا باختصار القصة واعذروني عن عدم ذكر التفاصيل وشكرا للجميع

  45. اقول ترا كلامكم لا رح يزيد من قدر القصه ولا رح ينزل منها .. والعناقره تاج على روسكم .. واللي يبي ريال يجي ياخذ عشره .. ولا همهم كلامكم انتم يالعذال.. وياليت فيه عقول تفكر قبل ما ترسل الكلام .. ونعم فيك حفيده بداح العنقري .. وشكرا ..

  46. اولا : بداح العنقري حضري ويقول نرجسيه عادي ويعرف معنها قد شفت احد يقول كلامه ولا يعرف معنها ؟؟ ثانيا: ان اللي يسب منقهر لانه مقدر يوصل لقدرهم وخليه ينقهر ويجلس مكانه .. والا فيه احد ما يبي يكون جده بداح العنقري او تكون عائلته العنقري ؟ ثالثا: ونعم في كل العناقر من اولهم لخرهم ومن صغيرهم لكبيره . رابعا : ماحد يسب الا وهو منقهر وغاير منهم .. وشكرا

  47. الدعوووة مو سب جيبي اسم الكتاب وانا اشتريه واسوي لك سكاان وانشره في القروووب في روايات كثير لكن الروايه هذي بعيده عن الروايه الاصليه تحياتي

  48. ياناس ياعالم ياهوه اعيد واكرر ان القصيده اللي فوق هي للشاعر بندر الرشود و
    ياناس انا مااعرف العنقري الله يرحمه ومالي دخل فيه، بس مااحب الكذب والافتراء .. وليتهم دوروا اسم عائله او قبيله ضعيفه ,الاخت نسبتها للدوشان 🙂 🙂 وكما قال الشاعر ابن سبيل رحمه الله دوشان علف سيوفهم كل جمهاه على القدى ولا على غير قادي ابو سلطان ========== ماشاءالله عليك عندك معلومات حلوه احس ان عندك مؤهلات ، بس كان ودي انك تكتب قبيلتك علشان ارد عليك . وعتيبه ومطير عينيين في راس . اتمنى نشر التعليق لأحقيه الرد ولتوضيح الحقائق

  49. مع احترامي للاخت وعائلتها اتمنى ظهور رجل شجاع مثل بداح وتوضيح اللبس

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصة وقصيدة الفارس والشاعر بداح العقري بتفاصيلها الصحيحه

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول