قصة هزلية : ليلة عرسي


السلام عليكم ورحمة والله وبركاته

حي كلن بإسمه يالربع .. صراحه يخوني التعبير وشهادتي مجروحه في قروب ابو نواف المتألق والرائع .. حيث جمع من المبدعين الكثير .. والغيورين على بلادهـم .. وشخصيات كثيره مبدعه ..
بعد ذا كله .. حبيت ابدع الليله .. لعلني اوصل ربع ابداع الشباب في قروب ابو نواف
وودي ابدع في حاجه ثانيه .. منها تغيير للجو .. ومنها اضافة البسمه على وجوهكم
اتمنى ان تكون مشاركتي تتسمى بهذي الصفات ..

بسم الله الرحمن الرحيم

في يوم كله غيوم كنت جالس على الدكـه بالديرة .. فجأة الا واحد من العيال جاني
قال يا سراب ما دريت ؟ … قلت وش السالفة قال عبيد ولد خالك بيتزوج ..
واقعد اضحك الله يرجك يا حمودي وش الي عبيد بيتزوج اجل بكره بيجي مطر
قال والله العظيم الرجال خطب بنت خوي ابوه .. قلت من جدك انت قال والله ..
وانا تقفل اخلاقي ليه عبيد بيتزوج وانا لا ؟؟

واروووووح طاير للبيت وادخل على امي قلت يمه! قالت وجع ؟ وش تبي ؟
قلت ولد اخوك بيعرس قالت خابره << هنا المشكله امي ردت علي رد عادي ..
قلت من جدك يا يمه بيعرس قالت مهوب رجال ؟ .. قلت اجل انا متى بأعرس ؟
قالت انت الحين دور لك احد يوظفك ونتفاهم .. واروح للحكومه الكبرى (ابوي)
لقيته يتغدا .. قلت يبه ! قال نعم قلت عبيد بيتزوج قال داري الله يوفقه ..
قلت طيب وانا متى اعرس ؟ قال اذا شفت البقر يحج على قرونه زوجناك …
قلت يبه تكفى ابي اكمل نص ديني واتزوج .. قال من وين لك المصاريف
قلت وعبيد من وين له ؟ قال عبيد يشتغل ويكد على عمره وعلى زوجته وعياله
ان شاء الله .. قلت الله يالوظيفة جندي بالشرطه العسكريه ملعونن ابو خامسه
من زين الوظيفه .. قال اهم شي يصرف على عياله قلت طيب انا بتزوج قال انت
صامل ؟! قلت ايه والله قال من وين بتصرف عليها قلت الله يخليك << انا ما كملت كلمتي
الا وصحن الشوربه بوجهي .. وأطلع متكدر خاطري وما فيه موال الا وجريته ..
من القهر .. وارجع للعيال على الدكه واقعد يمكن ساعه ما تكلمت قال دحيم
يا سراب وش فيك ضايق خاطرك قلت والله ودي اعرس << والعيال ينفجرون ضحك
طلعت وانا رايح فيها ما احد فهمني وفهم الفراغ العاطفي الي اعيشه ….
وبينما كنت امشي اهجول بالشوارع مادري وين اروح جتني رساله .. عبيد ولد
خالي يعزمني للعرس .. وادق عليه والعن سلايف سلايفه شين وقوي عين
قلت من متى وانت راعي بنات خابرك بزرنجي وصخ من متى وانت تعرف
للبنات واسلوبهم قال ياخي استح على وجهك وهزأني بكم كلمه واقفل منه واقفل
جوالي .. ويوم العرس سافطهم ما جيت الا بعد المعرس كنت قاعد اكتب قصيده مكسره
رايحها فيها بس من الغبنه .. ويوم دخلت افطس ضحك لقيت عبيد مشخص زي هذا >>
وابوي يطالعني بنص عين .. المهم بعد كم يوم جاني ابوي …
قال وانا ابوك ودك تعرس قلت ايه والله
قال اشر على البنت وابشر .. قلت هي والمه بس انتم والمين ؟
قال ما عليك وين هي بس قلت فلانه بنت عمي …
قال خلاص نروح نخطبها الليله ان شاء الله ويوم طلع من عندي ابوي وانا اتنكس من
الوناسه ويوم قبل عمي وشرحنا له وضعي قال خلاص وتملكنا وخلصنا
واروح ما خليت محل الا وشريت منه يا كبك يا سبحه يا قلم .. المهم
يوم بقي على عرسي يوم وانا اطلع ثيابي من المغسلة والشماغ مليان نشاء
ومغسل الددسن بستم ومستب كفراتها طالعه كشخه الددسن وألبقها ببيت عمي عشان
يركبون اغراض العروووس …

ويوم جاء عرسي العيال انصدموا … شافو انسان ثاني في القاعة مو سراب
خويهم راعي التكيات والاستهبال شافوا رجال جنتل وكشخه ..
وبعد ما قلطوا الرجال للعشاء طلعت بركب موتر ولد عمي بروح لبيتهم واخذ مرتي
بينما كنت امشي كان فيه ورع ملعون والدين كاب مويه على البلاط مادريت الا وانا
على وجهي .. شوي الا صوت واحد من العيال يقول لي سلامات يوم فتحت عيني
طلعت طايح من زاوية الدكه … وطلعت السالفه حلم في حلم ….
وأستانس واحب دحيم مع راسه … قلت عبيد وينه قال راح البقاله وبيجي
قلت هو بيتزوج ؟؟ قال ما طراله ذا الداشر .. وانا استانس ما عاد علي اهم
شي ما يتزوج قبلي …. <<< يقطع ام التفكير
اتمنى تكون اعجبتكم اولى حلقات مسلسلي …

أخوكــم ســراب ,,

للـتـــواصــــل
[email protected]


تعليقات 5

  1. والله ضحك يا الزاحف إلا أقول يا الزاحف وراك ما تنتبه لدراستك وتترك اللعب عنك شد على حيلك يا وليدي :$ ولا ما فيه زواج

  2. الله يزوجك بنت الحلالبس اظاهر انك في ديرة والزاوج في ديرة كثــــــــــــــــــــــــــــــــــــر في النـــــــــــــــــــــــومــــــــ

  3. يابيي انت مهبول تب تعرس؟؟؟ اول جب الشهادة وعقبن تزوج وماعليك من عبيد الداشر…:D

  4. هههههههههههههههههههههههههههههههههههههههههههههههههههههههههههههههههه موووب صاحي 😀 الله ياخذ عدوك بس :$ انا لو اني من خويك كان سميت عليك هع هع :$

  5. ومن شر حاسد اذا حسد اعوذ بالله والله من الحسد ياسراب هههههههههههههههههههههه اقووووول شكل عبيد بيعرس وانت في كندا عاد مايمديك تجي بالددسن تحياتي ضامي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصة هزلية : ليلة عرسي

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول