قصة – عواد وحياة جديدة


في البدايه امسي عليكم بالخير باول موضوع لي معكم بهذا القروب الراائع اللي كنت متابع له من فتره طويله  وحبيت اكون احد اعضائه المشاركين  واتمنى انه يكون موضوعي  يوازي حجم القروب ولو بشي بسيط …
اتركم مع القصه واتمنى انه تنال اعجابكم بحكم انها اول قصه لي بالقروب …

:: عواد وحياة جديدة ::



بعد مرور 24 سنه لي بالدنيا ذي وعرفت منها اشياء كثيره ولما عرفت الدنيا زين وبعد تفكير عميق قررت قرار راح يشغل العرب 100 سنه قدام<< اخس ياجساس كركركركركركر
قررت اني اصير مفيد للمجتمع الى متى وانا ياسارق حمام جيرانا او ضارب اخو حمدان ابو راس او مغازل فلانه؟؟
جلست افكر ياولد وشلون افيد المجتمع تعرفون بسم الله علي ماخليت جامعه ماخذت شهادتها عشان كذا محتار باي اختصائص ابي اشتغل
<< اقول لايكثر انت وراسك اللي كنه وجه الدعيع منفرد فيه اسماعيل مطر
جلست افكر وافكر الين مادق جوالي ووقف التفكير معه ..
الا واللي يدق هو صديقي حمدان



حمدان : اهلا بصديقي عواد كيف حالك ؟؟
عواد : اخس يالزير حمدان وش عندك يابو جهل
حمدان : لو انني لا اعلم عن سفاهتك وسماجتك وسوء استقبالك للضيوف وعدم معرفتك بامور الحياه لقطعت راسك من جسدك
انا سمعت فيها قطع راس تبون الجد لا ارادياً بلعت العافيه مع اني كنت قبل اسبوع فاقع وجه حمدان وانا اذا تبون الجد متأكد ان حمدان ماتطوع الا من كثر ماشخمطت على وجهه بيدي الرجال حس ان الدنيا ماهي له.. قال الحق عمري واسوي شي للأخره

عواد : طيب ياصديقي مالذي جعلك تفعل هذا الشي بنفسك؟؟<< يقاله يكلمه بلغته
حمدان : الراحه النفسيه ياعواد
عواد : واي راحه ياصديقي وضح وضح ارجوك فالحماس يكأد يأكل ماتبقى من جسدي<< ارحمنا ياميسي<< والله مادري وش دخله ذااكركركرككر

حمدان : تذكر ياعواد يوم كنت اقولك اني اقوم الساعه 1 الفجر واقوم ابكي وبدون سبب؟؟
عواد : أي والله قلت لي بس ذي موو غريبه حتى انا تصير معي ترا
حمدان : لاتستعجل طيب واسمع السالفه باختصار …
( قبل كم يوم كنت جالس اتفرج على المباراة وجاء خالي وانت عارف ان خالي ماشاء الله عليه ملتزم ومايترك فرض المهم جاء وجلس جنبي وقالي بصوت واطي صليت ياحمدان العشاء؟؟ تصدق ياعواد اول مره ماقدر اكذب دايم عادي اللي يسالني اقوله ايوه واصرفه هالمره ماقدرت سكت … قالي : تبي الجد ياحمدان واضح من وجهك انك ماتصلي وواضح من تصرفاتك بعد …. انا عصبت يعني ايش قصده واضح شايفني كافر ولا يهودي * … قالي خالي زعلت ياحمدان من كلامي ..؟؟ ترا انا قايله وانا قاصد انك تزعل ابيك تحس على نفسك وصدقني لو مازعلت باسكت واعرف انه مافيه منك امل لان اللي مايزعل على نفسه هذا باختصار ماترجي منه شي … واللي خلاني اتكلم اليوم ياحمدان… امك تقولي انك ماتنام الليل وتجلس طول الوقت تدخن وتفكر … وانت تحسب هالدخان بيشيل همك هذا على حسب تفكيرك طبعا.. و بالنهار بس جالس طفشااان ماتدري وين تروح وماغير تحس نفسك ضايقه فيك الدنيا .. ماعمرك سالت نفسك وش السبب؟؟
فلوس ماشاء الله عندك سياره عندك لو تبي أي شي بتسويه ومع هذا فاقد اهم شي بالدنيا ذي …
حمدان : وشو هالشي .. وش الشي اللي يخليني اقوم بالليل ابكي وش الشي اللي يخليني ساعات اتمنى الموت وش الشي هذا اللي يكرهني بامي واخواني يكرهني بكل اللي حوالي …(( هالكلام قلته ياعواد بدون عقل وخالي بنفسه تفأجا فيني لاني ماعمره قلته لاحد ابدا ))

خالي : انا اقولك ياحمدان لاتستعجل الراحه النفسيه
تدري ان الراحه النفسيه تجي لناس وينحرم منها ناس مالها دخل بالمال ولا منصب ولا شي بس الفاهم فينا هو اللي يسعى لها

حمدان : تكفى ياخال علمني شلون بسرعه…
اول مره احس اني بديت افكر صح ياعواد
اول شي سويت توضيت وقمت صليت ركعتين مثل ماقالي خالي ودعيت ربي انه يهديني …
صدقني ياعواد حسيت بعدها كانك كنت حاط على صدري جنط كامري وفجأه جيت وشلته
<< مستحيل يترك العربجه كركركركركر

عواد : اما عاد اجل كل يوم اقوم متضايق وزعلان اثاري فيه جنط كامري على صدري ؟؟<< وش يفهمه ذا الحين هههه
حمدان : انت ياعواد شكله على صدرك جنط جيب هاهاهاهاهاها<< من حقك ياحمدان تنكت مرتاح نفسيا<< بيصكه بعين كركركركرككركرر

راح حمدان وجلست افكر معقوله الحين الصلاااه تخلي الواحد ينام مرتاح نفسيا؟؟

اذا تبون الجد انا ماعمري ركعتها قبل مايقولي حمدان حتى بالمدرسه كنت انحاش عشان ماصلي ….
قلت ياولد خلني اجرب لانه من جد وصلت مرحلة يأس من الحياه يعني وش تبون من واحد …

(( لا وضيفه و لا يعرف يلعب بلاستيشن ولا يعرف يلعب بلوت لا وفوق هذا كله يشجع النصر بحياته كلها ماعمره فرح ببطوله يعني من وين تبغون الوناسه تجيه ههههههه))

المهم والله جربت ومثل ماسوا حمدان سويت << قلودي خخخخخخخ
ياااستااااتر ياناااااااااس وربي فرق من بعد اول صلاه صليتها كانت صلاة العشاء من بعدهاا حسيت بشي غير احس اني مبسوط مانيب شايل هم احس كل مشاكلي راح تنحل…. انا عارف ان الشغله كلها نفسيه وان اموري مثل ماهي عليه لاوضيفه ولا شي بس نفسيتي صارت مرتاحه صرت انام وانا مرتاح بالعربي صار عندي قاعده

 (( اذا خسرت الدنيا عادي لاني عايش بالدنيا ذي عشان الاخره ))

والحمد الله التزمت انا وحمدان



وصرنا انا وحمدان مانفوت حلقه او جلسة مطاوعه الا ونجلس فيها بس اللي ماقدرنا نتركه انه اذا شفنا افغاني ولا هندي الا نلحق وراه << لا حد يلومهم ترا الموضوع وراثه بالعيله خخخخخخخخخخخ
:: انتهى::

في النهايه يمكن تكون القصه مصرقعه بس هالموضوع وقبل كتابة القصه كنت اسمع قصص عنه وشفته بعيني بعد من ناس قريبين مني (( الراحه النفسيه )) مايعرف قيمتها الا من فقدها وهالقصه وان كانت خياليه فهي تعكس بعض احوال من حولنا ….
اتمنى اني وصلت للهدف الذي حاولت ايصاله لكم .. واتمنى انكم ماتفقدون هذا الهدف

 ((الراحه النفسيه ))

روى أحمد أن النبي صلى الله عليه وسلم كان يقول : يا بلال أرحنا بالصلاة
روى أبو داود عنْ حْذَيْفَةَ قالَ : كَانَ النّبيّ صلى الله عليه وسلم إذَا حَزَبَهُ أَمْرٌ صَلّى
.
.
.
ويقول الدكتور توماس هايسلوب : إ ن من أهم مقومات النوم التي عرفتها في خلال سنين طويلة من الخبرة والبحث الصلاة، وأنا ألقي هذا القول بوصفي طبيبا، فإن الصلاة هي أهم وسيلة عرفها الإنسان تبث الطمأنينة في نفسه والهدوء في أعصابه

اخوكم : عملاق الصرقعه


تعليقات 7

  1. السلام عليكم اخوي الكريم عملاق ، طرحك جميل لكن اعذرني اذا قلت لك ان بدايتك في الفلسفة الساخرة فاشلة وأتمنى أنك تراجع مخطوطك وتتعلم خفة الدم كي توازي ماتطرح وأيضاً عملاق الصرقعة ربما أنها لاتوافق طرحك ومصالة حروفك ولذلك أحببت أن أنبهك لهذا الامر ، شاكرة والمعذرة مريم عفاري

  2. هههههههههههههههههههههههههههههههه ههههههههههههههههههههههههههههه ههههههههههههههههههههههههههههههههههه ياشيييييخ روووووووح انت ومخك الفاصل موضوع منتهي وحلو واللي محليه أكثر أن فيه فايده حلوه بعد 😀 أعجبني بالحيل جمعك بين الضحك والصرقعه وبين أمور الآخرة والتنبيه عليها الله يعطيك العافيه ويجزاك خير ولا تحرمنا شوفة مواضيعك دايم دوم

  3. قصه حلوه كثير .. فكاهية ذاتَ موعظة .. سلمت يمينكَ أخي الكريم مودتي رهف

  4. والله برغم من تعليق الأخت مريم عفاري ان القصة تحكي الواقع بأسلوب الشباب اليوم وفعلاً هي حقيقة برغم من خياليتها ولكن تصور حال الشباب بأسلوب مبسط مضحك جدا جدا ورائع كما انني كنت متأثر من القصه ومتفاعل و حزين من قلبي ولكن كنت أضحك ما اغرب أسلوبك يا اخوي عملاق الصرقه جمعت بين كل هذا في هذه القصة و اتمنى ان ينفع الله بها الشباب والامة كما بدأت قصتك بأنك تسعى لإفادة مجتمعك وامتك فأدعوا الله لنا ولك التوفيق وعدم حرمانك من الأجر و اناشدك بالمضي في هذا المجال وبهذا الأسلوب ومهما كانت الأراء فأنها تبقى راي شخصي وعليك ان تحدد سبيل نجاحك

  5. هههههههههه الله يرج بليسك منور والله ياعملاق بالقروب .. واخيرا شفناك بالنسبه للموضوع .. انت بالذات ياعملاق مواضيعك مهما كانت لو ان شاء الله مليون صفحه مسنجيل افوتها وانضمامك للقروب شرف لنا واللي مايعرف عملاق يشويه هو كاتب ساخر ..وهو الوحيد اللي يخليني اضحك وانا ماودي اضحك هههههههه بإنتظار جديد مواضيعك ياعسل ولا تحرمنا قصص عواد المهوي سر ياصديقي .. ولايهمك كلام العذال ههههههه << مايقصد مريم

  6. موضوعك رائع يجنن يضحك وبنفس الوقت مفيييييد يعني موب ضحك وبس…. طريقتك الساخره مميزه وخفيفه ودمك جنان خلك على هالمنهج يكون موضوعك رائع ومفيد ….الله يعطيك العافيه …. وماعليك من العذال << ياشين التقليد ^_^ سبحانك اللهم وبحمدك ..

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصة – عواد وحياة جديدة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول