قصة : المشهد الأخير


تلميح : لمن يخاف على ضياع وقته الثمين يرجى عدم قراءة القصه 🙂

الشخصيات الرئيسية بالقصه :

سعود : مواطن
ريم : زوجة سعود
صالح : موظف فصل التيار في شركة الكهرباء
وليد : موظف السداد بشركة الكهرباء

المشهد الاول
صوت شخير مزعج من سعود النائم يقطعه صوت زوجته (ريم) وهي توقظه

ريم
سعود قم قطعو الكهرب

سعود
يتمتم بكلام غير مفهوم

ريم
(تصرخ)
سعود سعود .. قطعو الكهرب

سعود بعد ان استعاد وعيه من النوم
أي كهرب ؟

ريم
كهرب الشقه بعد اي كهرب

سعود
افااا بيذوب الاسكريم

ريم
شف بس ..وش اسكريمه الا قل اللحم والدجاج اللي تونا شارينه

سعود
يمكن صيانه وبيشتغل شوي ؟

ريم
اتصل عليهم شف وش السالفه

ينهض سعود من السرير متثاقلا

سعود
طيب لو فصلوها عشان الفاتوره وش اسوي

ريم
(بحزن)
هذي المشكله

سعود
(بغضب)
ماقطعوه الا يوم خلص الشتاء

ريم
تتوقع كم ساعه ويبدا الثلج بالفريزر يذوب

سعود
يمكن ست ساعات

ريم
ياليت

المشهد الثاني
موظف الكهرباء (صالح) يدور على العدادت ويقطع التيار الكهربائي عن بعض الشقق

صالح
فالحين بس بالاكل والشرب …سددو فواتيركم للناس

يرده اتصال من المشرف في شركة الكهرباء ويجيب

صالح
هلا بوسلمان

بوسلمان
وينك فيه

صالح
انا بحي المساء

بوسلمان
حلو … رح لعمارة البروج ورجع الكهرب لشقه 31

صالح
مسرع سدد توني قاطعه ماصار لي عشر دقايق؟

بوسلمان
ماسدد …هذا من طرف ابوفارس

صالح
هذا اللي فالحين فيه

بوسلمان
اتصل علي ابوفارس وقالي وشلون تفصلون الكهرب عن خالي

صالح
قله وش درى اهلي انه خالك

بوسلمان
المهم رجع الكهرب بسرعه يقول خاله لعن خامسه

صالح
هذاني راجع للعماره

المشهد الثالث
سعود يجلس على الاريكه ويتحدث بالهاتف مع شركة الكهرباء

سعود
طيب رجع الكهرب والله بسدد الحين

الموظف
سدد اول ثم اتصل علينا وابشر

سعود
يبيلي وقت على ماروح الشركه

الموظف
وليش ماسددت من اول ياخوي متأخر ثلاث شهور

سعود
الفاتوره ماجتني من ثلاث شهور يعني بسدد بالتنبوء مثلا

الموظف
اشترك بخدمة الجوال وتجيك رساله بدل الفاتوره

سعود
الاشتراك ببلاش والا بفلوس ؟

الموظف
ببلاش

سعود
لا انا اخبر الرساله بخمسه ريال

الموظف
(بنرفزه)
ببلاش …. اي خدمات ثانيه ؟

سعود
ايه…رجع الكهرب واوعدك اسددها اليوم

الموظف
والله ماعندي صلاحيه اسوي اي شي قبل ماتسدد الله يعيينك تروح ….

يغلق سعود الهاتف في وجه الموظف

سعود
يارجال طير

تأتي زوجته وبيدها سندوتش جبن

ريم
إفطر وإطلع دبر فلوس للفاتوره

سعود
ببيع جوالي وش اسوي

ريم
دامه استقبال بيعه مامنه فايده

سعود
اخاف مايجيب قيمة الفاتوره

ريم
ماعندنا شي ينباع بالبيت المشكله

سعود ينظر لحلق على اذن ريم

ريم
وش تناظر هذا اكسسوار ماهو بذهب

سعود
كله منك اقولك لاتشغلين المكيف خليتي الفاتوره تصك 600

ريم
ياسلام وليش حاطين مكيفات بالبيت زينه مثلا ؟

سعود
حاطينها للصيف بس الشتاء الناس تريحها

ريم
اجل ليه حاطين فيها هيتر كان خلوها بارده وبس

سعود
(بحسره)
حاطينها للي عندهم فلوس بس حنا مساكين

ريم
يعني الله يهديهم مااصبرو لين تنزل راتبين ابومتعب

سعود
اي والله ابومتعب يدلعنا وذولي يغثونا

ريم
انت اللي ماسددت ياسعود وش دخلهم هم

سعود
لا المفروض يصبرون ليت تنزل الراتبين

ريم
امي تقولي انهم بينزلون الراتبين الاسبوع الجاي

سعود
ياليت والله ودي اشتري ايفون

ريم
يعني مالك نيه تخليها لايجار الشقه ؟

سعود
باقي شهر عليه وبذاك الوقت يصير خير

ريم
خلاص دام بتاخذ لك ايفون انا ابي بلاك بيري

سعود
بكم هو

ريم
ابي مثل حق منال صديقتي اشترته بالف

سعود
جاك

ريم
وابي شنطه ماركه

سعود
بعطيك الفين وسوي اللي تبين

ريم
حرام عليك شوي

سعود
كلها ست الاف اللي بتنزل

ريم
احمد ربك …تخيل ماعندك شي وفجأه تجيك ست الاف

سعود
الحمدلله

المشهد الرابع
سعود يفتح باب محل جوالات ويرفع جواله دون ان يدخل

سعود
تشتري ؟

البائع
هات اشوف

يذهب سعود للبائع ويعطيه الجوال فيقوم بتفحصه

البائع
فيه شي ؟

سعود
لا

البائع يقوم بتركيب شريحته على الجوال ويتصل من جوال آخر وبعد التأكد من عدم وجود مشاكل

البائع
150 ؟

سعود
(مصدوم)
الله الله حرام عليك شاريه ب 380 قبل اسبوعين

البائع
هذا سعره مستعمل

سعود
زود لي شوي

البائع
انتظر شوي يجي صاحب المحل يمكن يعطيك اياه بسعر احسن

يدخل صاحب المحل بعد لحظات

البائع
كم يسوى هذا الجوال ؟

يتفحصه صاحب المحل قليلا

صاحب المحل
80 ريال

سعود
(بصدمه عنيفه)
كمممممم

صاحب المحل
هذا سعره والله

سعود
خويك سامه مني ب 150

نظرة غضب من صاحب المحل للبائع

البائع
(بحرج)
انا خلطت بينه وبين جوال ثاني

سعود
افاااا

صاحب المحل
الجوال فيه شي ؟

سعود
والله نظيف

صاحب المحل
وش سبب البيع

سعود
(بحرج)
أأأأأ ظروف خاصه

صاحب المحل
(بحزن)
الله يعيينك ..خلاص باخذه منك بميه مساعده مني لك

سعود يسحب الجوال من يد صاحب المحل

سعود
(بغضب)
ومن قالك اني محتاج صدقه منك

يخرج سعود من المحل ويتجه لمحل أخر

المشهد الخامس
موظف الكهرباء صالح يتحدث مع المشرف على الجوال

صالح
هزئني خال ابوفارس الين قلت امين

بوسلمان
احسن من قالك تفصل الكهرب عنه هههههه

صالح
حتى شكراً ماقال ….المهم انا بروح اخلص معاملتي بالوزاره

بوسلمان
لاتتاخر لان الناس بتسدد اليوم وبيزيد الشغل

صالح
طيب

المشهد السادس
موظف الكهرباء يصل للوزاره وبسبب الازحام لايجد موقف ويضطر للوقوف بعيدا عن الوزاره

المشهد السابع
سعود يخرج من محل الجوالات ويتحدث مع زوجته

سعود
بعته بتسعين بحب خشوم والله

ريم
من وين تكلمني اجل

سعود
من جوالي

ريم
يووه تقول بعته!!

سعود
ايه بعته بس قلت له تسمح لي بمكالمه اخيره قبل الاعدام هههههه

ريم
طيب تسعين ريال يعني باقي لك 510 ريال من وين بتجيها

سعود
مدري

ريم
قلت لك خلني اطلب من امي مارح تقول شي

سعود
لالالا انا بدبر نفسي

ريم
وش رايك اشيل اللحم والدجاج اوديه عند جارتي

سعود
لا انتبهي تسوينها مانبي فضايح

ريم
بنخسرهم لو ذاب الثلج

سعود
اصبري باقي كم ساعه على مايفك الثلج ولو ذاب الشكوى لله بوزعها على المحتاجين قبل ماتخرب والله يعوضنا

ريم
الله يعيين بس اذا خربت ومانزلت الراتبين بنجلس بدون ايدام لين الراتب

سعود
عادي باقي عشر ايام على الراتب نقزرها بالتونه

المشهد الثامن
موظف الكهرباء صالح يجلس في احد الاقسام بالوزاره على طاوله خاليه من الموظف وامامه طاوله عليها موظف منهمك في عمله

صالح
خويك مطول ياغالي ؟

الموظف
(بدون نفس)
مدري

صالح
طيب ماتقدر تقوم محله

الموظف
لأ

ينظر صالح للموظف بإحتقار

المشهد التاسع
سعود يقف بجانب سيارته امام احد محلات بيع مسجلات السيارات وامامه البائع في المحل

سعود
مايجيب اكثر من كذا ؟

البائع
لا والله هذا سعره مستعمل

سعود
طيب زودها خمسين

البائع
مافي مجال والله

سعود
اوكي فكه الشكوى لله

يدخل البائع السياره لفك المسجل

سعود
المسجل الجديد بكم ؟

البائع
600 ريال

سعود
بل..طيب مافي رادو بدون مسجل

البائع
لا والله ماعندي

سعود ينظر لرادو صغير وقديم فوق الكرسي امام المحل وتعمل فيه اذاعة القران

سعود
رادوك هذا ؟

البائع
ايه

سعود
تبيعه ؟

البائع
(مبتسم)
حلالك خذه ببلاش شاريه ب 25 ريال

سعود
اما 25 ريال … وين الاقي مثله

البائع
مليان بالسوق

يغادر سعود المحل بعد فك المسجل واستلامه للمبلغ

المشهد العاشر
سعود يقف امام محل بيع كفرات السيارات ويتحدث مع البائع

سعود
جديد الكفر مامشيت عليه طريق طويل من ركبته

البائع
هذا سعره مستعمل

سعود
زودها خمسين

البائع
مافي مجال والله

سعود
طيب موافق بس تركب لي الكفر السبير ببلاش

البائع
ولايهمك

يتجه البائع لفك الكفر الخلفي الايمن وسط نظرات حزن من سعود

المشهد الحادي عشر
سعود يتحدث من الهاتف الثابت في محل الكفرات مع زوجته

سعود
لاتخافين بمشي شوي شوي وترى الكفر زين مافيه شي بس عيبه انه صغير

ريم
ياوليك ياسعود ان سقت بسرعه

سعود
طيب الحين باقي مية ريال وتكمل قيمة الفاتوره

ريم
ليه ماتروح تقولهم بسدد نصها والنص الثاني بعدين

سعود
لازم واسطه عشان يقسمونها

ريم
طيب رح لخويك اللي تعرفه

سعود
مع الاسف ترك الشركه من زمان وجواله موب عندي اصلا

ريم
رح لهم وحاول تتمسكن يمكن تكسر خاطرهم ويقسمون الفاتوره

سعود
اما اتمسكن مافي ا مل

ريم
يعني تمثيل موب صدق وش فيك

سعود
لا مستحيل اسويها

ريم
براحتك

المشهد الثاني عشر
يدخل سعود شركة الكهرباء ويتحدث مع أحد موظفي سداد الفواتير

سعود
انا مسويها قبل كم سنه عن طريق زميلك خالد سلمان

الموظف
انا مقدر اقسم الفاتوره الا بأمر من المدير

سعود
وين المدير ؟

الموظف
شف مكتبه هناك

(وليد) زميل موظف السداد الجالس بجانبه يتداخل بينهما

وليد
(لزميله)
هو كم فاتوره عليه ؟

الموظف
ثلاث

وليد
طيب خله يسدد اول فاتورتين

الموظف ينظر لوليد بغضب ويتسائل بعباطه
تصير يعني ؟

وليد
ايه بقوه يارجل ساعد الناس بس

الموظف
خذ سوها له انت على مسئوليتك

وليد
هات الفاتوره ماعندي مشكله

سعود
الله يجزيك خير تسلم

وليد
اخوي آخر فاتوره 488 ريال

يمد سعود النقود للموظف وهو مبتسم

سعود
خذ 500 موب 488

وليد
اوووه لازم بطاقة صراف ماناخذ كاش

نظرة احباط من سعود

وليد
ولايهمك بسدد لك من بطاقتي

سعود
الله يكثر من امثالك ياشيخ

وليد بعد سداد الفاتوره وطباعتها
خلاص اخوي روح قسم اعادة التياره عشان يرجعون لك الكهرب ولاتعودها مره ثانيه ههههه

سعود
تسلم الله يطول بعمرك ماقصرت

المشهد الثالث عشر
موظف الكهرباء (صالح) مازال ينتظر بالوزاره قدوم الموظف ويتحدث مع زميل الموظف متذمرا

صالح
خويك شكله موب جاي

زميل الموظف
(بدون نفس)
مدري

صالح
(بهمس)
ياصبر ايوب

يرد اتصال لصالح من المشرف

صالح
هلا بوسلمان

بوسلمان
وينك فيه

صالح
بالوزاره انتظر الموظف يشرف

بوسلمان
كثرت طلبات اعادة التيار اخلص علينا

صالح
ياخوي شتاء خلهم ينتظرون شوي

بوسلمان
اي شتاء انا مشغل المكيف خلاص دخلنا بالصيف

صالح
بعطيه فرصه شوي وان ماوصل بمشي

المشهد الرابع عشر
سعود في منزله يتحدث بالهاتف مع موظف اعادة التياره وريم امامه تضع يدها على خدها

سعود
ياخوي انا مسدد من ساعه والى الحين مارجعت الحراره

الموظف
في زحمه عندنا اخوي

سعود
وش دخلني انا فيكم انا سددت

الموظف
ابشر ان شاء الله يرجع بأسرع وقت

سعود
(يهدد)
خمس دقايق ان مارجع الكهرب بجيكم الشركه

ينهي سعود المكالمه وينظر لريم

سعود
شفتي شلون

ريم
خلاص مافي فايده بنخسر اللحم والدجاج

سعود
(بحزن)
وش اسوي طيب

ريم
ليه ماتشيل اللحم والدجاج وتوديه البقاله اللي ورى العماره تحطه بالفريز

سعود
افااا قويه ..تخيلي اسويها والله مالها داعي

ريم
(بنرفزه)
تنازل عن كبريائك هالمره بس

سعود
ماهي مسألة كبرباء وانما مسألة مبدأ..انا سعودي راسي دايم مرفوع وصعبه انزله عشان دجاجه مفصخه ومثلجه بعد

ريم
ماودانا بداهيه الا شوفة نفسك

سعود
يعني عشاني احافظ على كرامتي صرت شايف نفسي

ريم
طيب حافظ على كرامتك من حقك بس سدد فواتيرك مره ثانيه

سعود
عندي احساس ان الكهرب بيرجع الحين يلا عدي معي من واحده لثلاثه ..واحد اثنين ثلاثه

ريم
بدينا بالخبال

سعود
اجرب مره ثانيه موب مشكله…. واحد اثنين ثلاثه

ريم
والله مدري اضحك والا ابكي

سعود
روقيها ياشيخه عيشي حياتك دامك بعافيه

ريم
الحمدلله ماقلت شي بس مقهوره على الاكل حرام

سعود
اصير لك دجاجه مسلوقه بس روقي تكفين

ريم
(تبتسم)
عشانك بس

سعود
طيب تتحدين اعد من واحد لميه ويرجع الكهرب

المشهد الخامس عشر
سعود يدخل البقاله وهو ملثم ويعطي البائع كيس بداخله اغذيه ولحوم

سعود
معليش محمد خلي هذا فريز هنا عشان انا ثلاجه مافي شغل

البائع
انتا مين

سعود
انا ساكن هنا ورى

البائع
وين عماره

سعود
هنا ورى بقاله على طول

البائع
ايش في كيس ؟

سعود
اكل بس ثلاجها انا خربان

البائع
لازم تفتيش

سعود
شف بس المعفن…طيب فتش يلا اخلص علي

يفتش البائع الاكياس ثم ينظر لسعود مبتسماً
اوكي مافي مشكله

سعود
(يهدد)
مافي شيل لحم انا سوي حساب كيلو هاه

البائع
(بغضب)
انا مافي علي بابا

سعود
(للتصريف)
هههههه ايش فيك انا سوي نكته مع انته ههههه

المشهد السادس عشر
يصعد سعود سيارته وبداخلها ريم

سعود
وافق على طول

ريم
(بسخريه)
غريبه والله

سعود
مدري ارجع اشوف يمكن رجع الكهرب

ريم
ليه يرجعونها عن بعد مثلا موب لازم يجي الموظف هنا

سعود
ماتدرين يمكن تطورو وحنا ماندري

المشهد السابع عشر
موظف الكهرباء صالح مازال ينتظر بالوزاره على المكتب الخالي من الموظف ويتحدث مع زميل الموظف بغضب

صالح
اخوي ترى مصخت السالفه وين خويك

الموظف
مدري

صالح
وش اللي مدري ياخوي صار لي ثلاث ساعات انتظره مايصير كذا

الموظف
هو كان موجود الصبح بس مدري وين راح

صالح
طيب خلصني انت

الموظف
ممنوع امسك عمله

ينتبه الموظف لزميله وهو قادم للمكتب

الموظف
هذا هو وصل

يأتي الموظف نحو مكتبه مسرعا

الموظف
السلام عليكم

صالح
عليكم السلام

الموظف
امرني اخوي

صالح
هذا مكتبك ؟

الموظف
اي نعم تفضل

صالح
(بغضب)
ياخوي مايصير كذا صار لي فوق الثلاث ساعات انتظرك

الموظف
اعذرني ياخوي الكهرب مقطوع عن بيتي من الصبح والى الحين ماارجع حتى زوجتي جبتها معي بالسياره

موظف الكهرباء
أرجعه لك انا موظف بالكهرباء بس خلصني الحين تكفى

سعود
زييييييين الله جابك والله اني مسدد من الصبح بس مارجعوه

الموظف
وين بيتك الحين ادق عليهم يرجعونه

الموظف
بحي المساء عمارة البروج شقه 30

صدمه ثم احراج وارتباك من صالح

موظف الكهرباء
(يتحاشى النظر للموظف)
أأأأأ تفضل رقم معاملتي والحين ادق عليهم يرجعونه ولايهمك

– النهايه-
واجب : حفظك الله يابومتعب من كل شر وكفانا وإياك فتنة المخربين
ذبه : عندما ينتقدك شخص لايعمل….فتأكد حينها بأنك اتقنت عملك

فهد العبداللطيف
www.fdawod.com


تابعوا جديد شبكة أبونواف على فيس بوك وتويتر

   


تعليقات 21

  1. قصه رائعه ونهاية غير متوقعه 😀 مشكوووور اخوي الله يعطيك العافيه وتحمست مع القصه 😀 في انتظار جديدك 🙂

  2. قصة مسليــــة جدا أستمتعت بقرائتها وسلاستها لأبعد حد أعجبتني بساطة الشخصيات و بساطة الأحداث و بساطة الحوار ألفت الشخصيات 😀 أبدعـــت ……………………….. [[ تلميح : لمن يخاف على ضياع وقته الثمين يرجى عدم قراءة القصه 🙂 ]] أحسن شي سويته ريحتنا من أصحاب مقولة ( ضيعت دقيقتين من وقتي الثمين :$ )

  3. رائع ماكتبت وأنا اقرا المشهد اتخيل الشخصيات والممثلين يعني تلفزيون الواقع أمامي سيناريو متناسق فيه من المغزى والطرافه ..الشيء الجميل اطلعت على مدونتك وراق لي ماقرأت ..اتمنى لك التوفيق بمشاهد تخدم مجتمعك وبيئتك

  4. وربي أنصدمت في النهاية لما عرفت إن الموظف أهو نفسه سعود , بس صراحة الرجل في شركة التسديد وليد والله إنه رجال طيب , ويستهال بوووسه فوق راسه .

  5. ياحبيل قلبك يافهد والله أسلوبك لذييذ لذييذ وأول مره اعلق بقروب ابو نواف لأني عجزت ما اشكرك , ألف شكرررر والله اسلوبك روعه روعه الله يسعدك , لا تطوّل علينا تكفى

  6. عواااااااااااافي على هالابدااااع ما توووقعت ابدا انه تكووون النهاايه كذا انصدمت صاار فيسي كذا B لا تحرمنااا من ابداااعك فدييتك

  7. أجمل وافضل عبارة اي والله ابومتعب يدلعنا وذولي يغثونا يعطيك العافيه .. استمتعت بالقصة .. لو انك لم تكثر من ترديد كلمة (مثلا)

  8. اشكركم جميعا على اطرائكم وملاحظاتكم المفيده والحمدلله ان القصه نالت الاعجاب 🙂 تحياتي للجميع

  9. مبدع خيال من الواقع اتمنى ان تكون هذه القصص منشورة لطبقة الموظفيين حتى يتعلموا قصة في العبرة والحكمة وفقت اخي على طرحك ومشكور واسف على التأخير في الرد

  10. قصه جميله بس في خطأ وحيد الي هوا كيف صاحب سعود في الدوام قال لصالح سعود كان في الصبح وحرمته صحته لما قطعت الكهرباء ومن بعدها ما رااح دواامه قاام يشووف الكهرابااء ولما شاف مافي امل روح لدواامه ؟؟؟ ومشكورين القصه الممتعه والمشوقه

  11. اشكر الجميع على تشجيعهم اخوي محمد الخطأ اللي ذكرته متعمد للتمويه قليلا على القاريء 🙂 تحياتي

  12. انا ما فهمت نهاية القصه ليشصالح انحرج لما قال سعود انه صاحب الشقه 🙁 ومشكور على الابداع8)

  13. شكرا لكل من قرأ القصه اختي سوسو بالنسبه لسبب احراج صالح لانه هو اللي قطع الكهرب على شقة سعود ويوم قاله العنوان عرف انه بنفس المنطقه اللي اشتغل فيها الصبح وارتبك تحياتي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قصة : المشهد الأخير

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول