قال سياحة قال


كانت خطتي هذا العام لأماكن معينة , ولكن للأسف أضطرتني الظروف لإلغاء السفرتين , وفي الأسبوع ماقبل الأخير لدوام المعلمين تم إبلاغنا أنه قد تم اختيار مدرستي ضمن المدارس المختارة في المملكة لمشروع الملك عبدالله لتطوير التعليم العام , وأنه يجب على جميع المعلمين
الإلتحاق بالدورة التدريبية التي ستقام خلال الأسابيع الثلاثة الأولى من شهر 8 الهجري , وتم تحديد المدن الثلاث ( جدة , الطائف , أبها ) , وقلت في نفسي مادام السفرة ألغيت ليش ما أختار مدينة أبها منها أحضر الدورة ومنها أكمل بقية الأيام اللي كنت مقررها للسفر .
لكن للأسف الشديد تمنيت أنهم رفضوا طلبي في اختيار أبها , نظراً لما حصل لي من مآسي هناك , وسأذكر بعضها من خلال عناوين جانبية ضمن هذه التدوينة .

لا أبهى من أبها ….. ولا عسير في عسير
كانت رحلة أبها أيام المرحلة المتوسطة من أجمل الرحلات العائلية في حياتي التي مازلت أتذكر تفاصيلها حتى الآن , وكنت أشاهد عبارات في شوارع المدينة وفي اللوحات الترحيبية في مداخل المحافظات والقرى تردد ( لا أبهى من أبها ) والأخرى ( لا عسير في عسير ) , وكانت فعلاً أبها من أبهى المدن السياحية حتى وقت قريب
كانت الأمطار تقريباً في كل يوم وكانت الأرض خضراء بمعنى الكلمة والمتنزهات من أجمل مارأيت ذلك الوقت .

سافرت أكثر من 4 مرات بعد تلك السفرة ولكن تختلف الأجواء وكان آخرها قبل عامين وكانت رحلة ممتعة لحد ما , لكن رحلة هذا العام كانت من أسوأ رحلاتي فبعد أن قطعت 1400 كيلو متر مستطيل ( يستخدم المستطيل كوحدة قياس للتعبير عن المسافات المملة ) من مدينة بريدة- الرياض-الخرج-وادي الدواسر-خميس مشيط – أبها ,
وعند دخولي لم أشاهد الأمطار أو السحب كما تخيلتها وكنت أمني نفسي أن أعيشها هروباً من حرارة منطقة نجد .

زحمة يا أبها زحمة
كانت الخطوة الأولى هي البحث عن سكن داخل المدينة لتكون قريبة من مقر إقامة الدورة في فندق انتركونتننتال السودة .
أنا ماسك الجوال والمعزبة تنقل لي ارقام الشقق من اللوحات , والرد من الطرف الثاني جاهز بالعبارة المعهودة ( كلللللله فل ) , لين ربك سهلها ولقيت الغرفة الفاضية في عمارة سكنية على الحزام الأخضر ما أبي أذكر أسم الشقق من زود القهر اللي بي .
أنا : السلام عليكم …. فيه شقق وإلا غرف ؟
الموظف : فيه غرفة باقية
أنا : وش فيها ؟
الموظف : غرفة وحدة بدورة مياة وبدون صالة .
أنا : حلو حلو .. حنا اثنين مع الصغينونة ….. بكم ؟
الموظف : 500 ريال في اليوم
أنا : من زود القهر …

بالله عليكم , هل يعقل غرفة في عمارة سكنية وعلى الشارع العام وبـ 500 ريال اليوم ؟ ….. طبعاً ماراح تقدر تفاصل معهم بالسعر علطول يرد ( هذا الموسم )
عاد أبشركم لقيت غرفة بدون صالة بـ 300 ريال وتلفزيونها يوشوش , ولا تستغرب أنك تتعفر بالتراب إذا قمت من النوم لأنه مافيه ماء تغسل وجهك فيه !
هذا بخصوص السكن , وش أقول وش أخلي في الشوارع وزحمتها ! والمنتزهات وحوستها و و و و و و

موسم الأسعار فقط للمعلمين
هالسنة هي أول السنوات العشر المقبلة اللي رمضان يكون في الإجازة , وطبعاً أنتم عارفين أغلب العوائل ماراح تسافر في رمضان , فالموسم انحصر في شهرين ( 7 & 8 ) , طبعاً شهر 7 أول الأجازة والمعلمين يداومون يعني مافيه إلا الموظفين مسافرين مع عوايلهم , وبدت الإجازة للمعلمين في شهر شعبان إلا والأسعار فجأة قفزت بالعلالي !
ليش بس في شهر 8 ارتفعت أسعار السياحة عندنا ؟!! ….. عشان المدرسين !!!! … عشان مكاين الصرافات المتحركة ؟! …. ليش بس .؟؟؟
أتمنى أحد يرد علي ويقنعني بالسبب , لأني استغربت من الأسعار في كل شي وسألت بعض زملائي الموظفين وقالوا لي الأسعار أقل من كذا بشهر 7 , وواحد منهم كانت أجازته في نهاية 7 وقال له موظف الإستقبال ترى الأسعار من السبت بتتغير لأنه بدأ الموسم !!!!

أبو خيال .. أسعار في الخيال
قلت مادام أني مجبور خلال هالأسبوع في أبها , خلني أطلع التلفريك اللي يقطع المدينة من الجبل الأخضر لمنتزه أبو خيال , قلت بطلع للجبل بالأول وأجلس فيه شوي ومن بعدها اطلع التلفريك للمنتزه وأرجع مره ثانية , يوم جيت البوابة قال لي السيارة بـ 25 ريال ومافيه أماكن لا زم تنتظر , قلت خلني أديور واطلع من عند المنتزه في الجهة الثانية, يوم جيت البوابة قال لي
التذكرة 5 ريال !! .. أنا في نفسي استغربت ذاك يقول بـ 25 ريال وهذا بـ 5 ريال وفيه مواقف ! .. أكيد أني محظوظ بعد المعاناة ووعلى قولة المصريين ( ربنا بيحبك ) , وقفت السيارة وجلست أدور الطريق اللي يودين لمحطة التلفريك وإلا أقول شوفوا الصور وبتعرفون الطريق صح , لكن قبل الطريق تصدقون سعر الشخص الواحد 90 ريال والطفل 45 ريال والعربة تاخذه لك أنت وعايلتك بـ 560 ريال بسسس , ولعلمكم العربة توديك المحطة الثانية وترجع بك
الله يذكر أيام جنتنق بالخير , التذكرة تقريباً بـ 15 ريال وتوديك فوق الغابة مسافة أكثر من 3 كيلو .


طريق الوصول إلأى محطة التلفريك في أبو خيال .
الحبلة …. ومتطلبات شباب المستقبل

قرأت قبل فترة عن شعار مهرجان أبها السياحي لهذا العام والذي اختير بعنوان ( الشباب ومتطلبات المستقبل ) , أظنكم توافقونني الرأي بجمال وحسن اختيار العنوان , فمن يسمعه ويكون طموحاً مثلي سترتسم بمخيلته العديد من البرامج والفعاليات والأنشطة الرياضية وغيرها التي تعوض لشباب المملكة هذا الحرمان الكبير في إجازة الصيف وخصوصاً أن جميع الأماكن محظورة عليهم , فقلت في نفسي والله يالمنظمين بياخذون أجر هالشباب في الإجازة .
وخصوصاً أن الشعار في كل مكان في المدينة حتى أني شاهدته ملصق على سيارات المرور هناك , ما أبي أبالغ بالموضوع لكن بترككم مع الصور من منتزه الحبلة وأظنه هو المتنفس الأكثر للشباب :

لعبة رفع الشخص فوق القماش

لا تتوقعون أنها مخيمات اللاجئين في أحد الدول , هذي خيام للتأجير على الشباب في الحبلة .

الهواية المتوارثة من الأجداد وهي رفع السيارة بالحصى .

دورات المياه والوضوء ضمن التسعيرة
لا تستغربون فهذه هي السياحة الداخلية ,فنظراً لقلة المياة وأزمتها اليومية في أبها سترى الكثير من العبارات التي تطالبك بدفع المال قبل أن تدخل الحمام !!!
فمنتزه الحبلة شاهد بسيط على هذا , فبعد المشوار الطويل للوصول إلى المنتزه من مدينة أبها لن تجد دورات المياة متوفرة بل ستقابلك اللوحة الحمراء بجوار دورات مياه المسجد والذي كتب فيه اعتذار أنه بسبب عبث الناس بالمياه ولصعوبة توفيرها فقد تم إغلاق دورات المياه فإذا أردت الدورة فعليك الدخول لها داخل المنتزه , وبكم قيمة الدخول ؟
20 ريال بس .. يابلاااااااااااش !!! .. عشان دورة المياة تدفع 20 ريال
والمصيبة الثانية شفتها في أحد المواقع صورة لموقع أسفل الحبلة

جرب لعبة درايفر على الطبيعة
لا أبالغ في الكلام وكل من شاهد المنظر السيئ سيشهد بذلك , فالطريق المؤدي لمنتزه السودة هو مسرح اللعبة كل يوم , شارع طوله تقريباً 22 كيلو متر , ضيق ومليئ بالمنعطفات الخطرة وسيارات كثيرة وشباب مراهق لا يتجاوز السيارات الأخرى إلا في المنعطفات , ولك أن تتخيل كمية الإنزيمات التي تضخ في جسمك وأنت تسير في هذا الطريق , يد على قلبك والأخرى على الدركسون , ولكم أن تحسوا بمعاناتي يومياً لمدة خمسة أيام في الصعود والنزول من الفندق عبر هذا الطريق .

من أبها للنماص للباحة .. وياقلب لا تحزن
ماصدقت انهم سلمونا الشهادات يوم الأربعاء إلا وانطلق من ابها هرباً من القهر لمحافظة النماص المشهورة ببرودتها وأمطارها وخصوصاً أنها تبعد 150 كلم عن أبها , وأبشركم في الطريق أمطرت علينا واستانسن, ويوم وصلت المحافظة الصغيرة , قلت أدور على غرفة أريح فيها وأكمل بقية الإجازة ,لكن في النماص مشكلة أنه أغلب الشقق على الشارع العام وعددها قليل وأسعارها مرتفعة , فوقفت عند آخر مكان لعلي أجد ضالتي عندهم , فاسم الشقق يوحي باسم فخم ومنظر المبنى
من الخارج كذلك , يوم سألت عن السعر قال سعر الغرفة بـ …… ريال ( أقول وإلا أخليها في الحلقة القادمة )
:
:
:
:
والله العظيم قال لي سعر الغرفة بـ 800 ريال باليوم !
وارجع للسيارة ونقرر الهجرة إلى الباحة فهي ماتبعد 200 كلم عن النماص , ونفس الحكاية أسعار مجنونة وغرف مزحومة , واستقر بنا المبيت آخر اليوم في مدينة الطائف بعد 8 ساعات من السفر عبر الطرق الجبلية السيئة من مدينة أبها حتى الوصول للطائف !
طبعاً ماجلست في الطائف إلا يومين , لأنها برأيي ماتستاهل القعدة , في النهار حرررررر ولا حرارة نجد وبالليل هواء بارد , ماصارت مصيف هذي , صارت رحلة ألعاب ترفيهية في الليل !

أخيراً
ليت كل هالغلاء في الأسعار على سنع , زحمة وأسبوع كامل مافيه يوم جاء مطر , صرنا نتشفق لشوفة السحاب بالسماء لعل الخير يجي , وتنظيم أسوأ من السيء للمرور في الشوارع , ووصاخة منتزهات ولا شوارع مكة , ما أدري وين عمال النظافة في الإجازة ,خوفي أنهم قاعدين يحملون أغراض الناس عند الشقق ومخلن الشوارع تسبح في القاذورات.
و بعد هذه المتعة السياحية في ربوع بلادي , أتمنى أني أكون رديت لنفسي جزء بسيط من رد الإعتبار جراء المعاناة في هالرحلة المشؤومة . وسلملي على سياحة البلد , وقبل أقفل الموضوع هذي صورة هدية لكم لتنقل لكم نشوة شجر الصبار مع هالطبيعة الساحرة !

ودمتم سالمين
أبو لجين
موقعي الضوئي


تعليقات 43

  1. لو الاسعار موحده في المنطقه الواحده ما كان لنا تعليق يعني نقول وزاره السياحه حاطه هذي الاسعار من منتجع لتاني في الطائف اسعار خياليه والشقق الله لا يوريك

  2. انا زرت ابها بشهر 8 وكان كل يوم أمطار وركبت تلفريك السوده ب40 ريال وسكنت بشقه غرفتين وصاله ب300 ريال صح فيه أزمة مويه بس شوف من المسئول وختاماً خيرنا نبيه لغيرنا…

  3. أخووووي بدر مافي جديد أنت في السعوديه يعني تتبي تتحمل أي مصيبه توااجهك وتسكت لان الكل عارف ذا الشي من كبيرنا للصغيرنا وإذا تبي تسافر وتحلل اللي تدفع إحجز بدري وريح رااااسك

  4. لا فض فوك هكذا في الحقيقة السياحة في بلد نا للأسف تجار جشعييييين يستغلون الإجازة والمشتكى إلى الله ؟؟؟!

  5. خخخخخخخخخخخخخخخخخخخخخخخخـ .. ياخي بقووهـ .. قسمن بردت تسبدي بموضوعكـ .. أجل خويّ ابوي رايح هو ونسيبه للطايف .. ويم بغو دورة المياهـ قالو له الدخوليه بـ 5 ريال (o_O) .. واذا تبي تتوضىآ للصلاهـ بـ ريالين (o_O) تخلف من جد .. ويلمونن اذا رحنا برىآ .. ياخي حسنوّا سياحتكم اول هميين نتربع عندكمـ ..! تسم اخوي ولعل أحد المسؤولينـ يشوف موضوعك ويشوف له صرفهـ :~.. يعطيكـ العافيهـ .. لاهنت ^_^

  6. سلمك الله على تقريرك الرائع … و كان الله في عونك … بخصوص السياحه الداخليه سلم لي عليها مثل ما قلت لآنها اصبحت منافسه للسياحه الخارجيه في الصرف لا في التنظيم و …و… اصبح السائح في الداخل كما في الخارج و يمكن في الخارج اقل بقليل …. كل الشكر لك على طرح معاناتك مع سياحتنا الغائبة:$ …

  7. :~في أمريكا في مقاطعة كاليفورنيا شقة عباره عن غرفتين نوم وحمامين ومطبخ وصالة ب 600 ريال!! ولكم الخيار هههههههه

  8. اولا الاسعار بكل مكان حتى في الرياض تحصل الشقق على 400وانت طالع ويقولك نفس الكلمه(صديق هدا موسم)اي موسم بالصيف درجة الحرارة 50واما المطر فالساقي الله مع العلم انها هطلت الامطار يوم الجمعه ومشكووووووووووووور ويعطيك العافيه

  9. أنا مادري أخوي بدر .. من صحة الكلام. لكن أقل شيء انا رحت بـ 10 – 8 قبل عشره ايام واخذت فله صغيرهـ وجديدهـ وحلوهـ مرهـ بـ 500 ريال .. هو صح ان السياحه عندنا لكـ عليها لكن ماتوصـل للذم لـهالدرجه .. اذا ماعجبتك سياحة دولتنا وأمنها وآمانها أقلها إنك مرتاح علىا اهلك حتىا وانت تاركهم بغرفه في ديرتن غريبه .. بس تقدر تسافر وتاخذ اجازتكـ برا وتعيش بأمانهم ودينهم وحجابهم وكل امورهم اللي ماتخفىا حتىا علىا الجاهل أشكركـ علىا موضوعك !!!

  10. ما راح أعلق على كلامك على أبها بس سامع إن الأسبوع إلى راح كله مطر وبعدين أستغرب من كلامك على الطائف شلون يعني عشان ما جاء مطر تقول ما تستاهل أحد يجلس فيها وصارت ملاهي تبيهم يحطون فوق راسك دش ! قال ما صارت مصيف قال !

  11. انا بصراحة رحت ابها والباحة مع الشباب من 5 سنوات .. ولا اتوقع في شي تغير ما اشوف انها تستاهل اصلاً وعلى قولتك جوها مو بالمرة والأهم مناظر مافيها واللي يقول مناظرها رووعة والله يجامل نفسه ياخي الناس الاآن طلعت برى وسافرت اماكن مختلفة ..شافت تعامل أحسن واسعار عادلة اكثر وطبيعة وجو خيال وحتى الأمان اللي بعضكم يترزز فيه والله ان بعض الدول بدون ذكر آمــاب وبقوة ولافيها اي خوف وعلى طاري لبنان .. صحيح مافيه امان بس اقولك على الوضع هذا لبنان احسن وارخص 😀

  12. استغرب اصرار بعضنا على السياحة الداخلية الخارجية ارخص اكثر امان طبيعة ساحرة

  13. يالغالي بدر انا جيت ابها قبل اسبوع تقريبا وحصلت لي غرفه وحمام بـ200 على طريق السوده بالعكس ما لقيت الغلاء اللي قايل عنه الا اذا انت تبي فندق 5 نجوم فيدك على جيبك لا تقول غاليه وبعدين تلفريك السوده يالغالي بـ 40 ريال وطوله 7 كم لكن كلها كوم ونعمه الامن والامان في كوم .. شكرا لك يالغالي

  14. السلام عليكم أنا ممكن أعذرك من الظلم اللي حصلك بأبها.. لكن حرام تحكم على الطائف انها ماتستاهل عشان الحر بالنهار على قولتك… لو جلست في أقرب ظل (تحت شجره) كان لقيت الجو اللي يعجبك.. ومن ناحية أبها أنا سامع ان لها اسبوع أمطار… بس يمكن من حظك الحلو(او حظهم) إنك ماطولت فيها… تحياتي للعقلاء…

  15. تشكر ياغالي على الموضوع وبصراحة كأنك فاهمني ونزلت اللي بقلبي بصراحة أنا سافرت من تبوك إلى أبها عن طريق البر تخيل يعني ابعد منك سمعت عن السياحة الداخلية وقلنا ياولد مالك إلا هالبلد وسافرت وحدي كان خط الرحلة كالتالي ( تبوك المدينة مكة الطائف الباحة النماص ابها خميس مشيط) بصراحة ما توقعت الخدمات بهذا السوء وكنت حاط ببالي أجواء خيالية وساحرة وبراد وأمطار ..لكن للأسف لم اجد شيء من ذلك ..بل زحمة وقلق وحر بالنهار والله إني أشغل مكيف السيارة بالنهار قال مصيف قال ..وخدمات زي ال…….. لا معاملة حسنة ولا شي ..والسكن بقلة الحيا تلقى ولكن الحقيقة تنقال سكنت بأبها ب 200 ريال وبخميس مشيط ب 150 ريال لليوم وغرف شبه حلوة ونظيفة ..جلست عند أخوياي اسبوع ثمن رجعت لدياري وخط الرحلة ( خميس مشيط تندحة وادي الواسر السليل الأفلاج الرياض القصيم حائل تبوك الورد )) ويازينك وإنت بين أهلك ..بلا سياحة بلا هم وأوافقك على كل ما ذكرت لك كل الود >>>>>>>>> أبو بنان

  16. بردت قلبي بموضوعك B استغرب كل اللي عارضوا كلامك مع انه للأسف واقع 🙁 أنا برأئيي الشخصي أشوف السياحه عندنا ماتستاهل الواحد يتعب نفسه ويروح لها مافي مهرجانات ولابرامج ولانظافه ولاعنايه بالاماكن الطبيعيه ولامراقبه لاسعار الايجار كل واحد ياجر بسعر خيالي وكانه في دوله اوربيه انا بصراحه قبل 8 سنوات اعشق ابها وجده بس من يوم سافرت صلاله ودبي واجواها وروعه اماكنها وبرامجها السياحيه واسعارها المعقوله ماعاد طبيت ابهاصرت اصيف كل سنه انا وأهلي فيها واللي يقول امن وامان ترى كل دول الخليج امان انا أتمنى ترتقي السياحه في بلدي واتمنى الفلوس اللي اصرفها تكون في بس للاسف السياحه عندنا تفشل مقارنه مع دول الخليج الأخرى وعلى فكره حتى الرياض درجه الحرار صكت 52 وزايد الاجارات على الناس اللي جايين يشوفون اهلهم بها الصيف ياليت احد المسؤلين يسمع اصواتنا وينعش السياحه في مملكتنا الحبيبه .

  17. كلامك صحيح ….بلادنا غاليه على قلة سنع .. على الاقل لو فيها مناظر بحيرات تركيا ولا جو وبراد النمسا ..وخضرة شرق اسيا لو شيئ واحد بس يشفع لها …احنا يوم رحنا انصدمنا وبصراحه الخبر على رطوبتها وحرهل بس المعيشه فيها اريح وانظف ..انا في السعوديه غير مكه والمدينه مااسافر …

  18. يارجال وش الي حادك على السياحة الداخلية اقسم بالله ان برا احسن مليون مره انا الان عايش برا المملكة طالب ..وبعدين بدوله ماهي من الدول المتقدمة ولكن اقسم بالله ان امنها افضل من المملكة مليون مره ياخي على الاقل في الشارع تقدر تكلم جوال …عندنا في اي مكان في المملكة تخاف ان جوالك ينخطف وبعدين الاجواء حلوه والاسعار معقوله …ياخي السياحه الداخليه مامنها الا رفع الظغط …وخلها على الله ولكن نصيحيتي لكل اخواني السياحه الخارجية لايهموكم افضل مليار مره ..اول شي انك تستفيد تجارب وتعرف عن الشعوب وتعرف الذي عليك والذي ماهول عليك …وباذات كمان ماليزيا انا ماجيتها ولكن يمدحونها وانا اقوله لانها دوله اسلامية تصلح للعوايل …والله السياحة الداخلية مامنها الا النقص ..والسلام

  19. ياحبيبي سياحه داخليه هذاك اول .. الحين العالم بدت تفهمها وتسافر برا قسم ان كثير منهم يصرفون اقل من هنا واسأل اللي راحو اندونيسيا .. تبي خضار وطبيعة ورخص رح سوريا قسم ان ماعاد تعتب على ابها اجل بيت مع مزرعته ب 300 ريال !

  20. هههههههه اما النماص بـ800B لا الظاهر منب بالسعودية سلملي على الاذقية بـ180 ريال وفندق عســـــــــــــل

  21. تبون نهضه عمرانيه زي الامارات واحسن تعالو الشرقيه وخصوصا الخبر بس تحملوا الجو !!:D

  22. والله انه ودي اصيح عشان السياحه في السعوديه ياخي ايت سياحه لا يضحكون عليكم السياحه في الخارخ الفضل بمليون الف مره

  23. الله يعطيك العافيه على الموضوع بالنسبة لسياحة في المملكة اللاسف في حاله سيئه واتمنى ان صاير من سيئه الى أحسن

  24. لا تفوتك جده ثاني اكبر مدينه بالمملكة الشوارع محفره والشقق مثل قصور الافراح تلقى الاسعار يوم السبت والاحد غير والخميس والجمعه غير وإذا سألتهم قالوا مواسم – انا يتطلب عملي البقاء في جده اكثر من خمسة اشهر بالسنه منها اربعة اشهر دفعة واحده اقضيها بهذه المدينه ولاسعار نااااار ولا يقبلون يأجروك بالشهر إلا شقق نادره. روح الكورنيش وشوف الوساخه الي ما قد شفتها في اي مدينه بساس وافريقيات تجوب الكورنيش وبالشوارع وشي يقرف .. من جد بوابة الحرمين صورتها جدا بشعه..

  25. والله قريت الموضوع وحسيت انه شوي زاحف بس فيه نقطتين محيرتني اول نقطه وش سالفة ازة المويه في كل مكان لايكون البحر جف وانا ماعندي خبر :~ والثانيه انت رايح تصيف ولا تندب حضك :D:D:D ومدقق على كل شيء حتى الجو طيب بالله وش بيدنا نسوي بالجو الله يرحمنا انشاء الله مانقدر نسوي شيء يليق بجلالتك الله يعز مقامك واذا على السياحه الخارجيه اول مارح ترتاح لو توصل المريخ دام تشوف الحرام بعينك يعني اذا سافرت الخارج بتحصل كل اللي تبيه ؟ بتروح المراقص ولا كزينوهات ولا شقق مفروشه كل شوي طابه عليك وحده تبيع نفسها ولا ماتقدر تطلع ولاتروح مكان الا وشنطتك معك من كثر الحرميه تتمنى لو تدفع الف في اليوم ولا تتعذب هالعذاب ولا تروح السوق انواع المساخه والقصير والمزلط والجنز والله ماترجع انت وزوجتك الا مطلقين بعيد الشر نصيحه من اختك خلك هنا ابرك لك امان يكفي الراحه النفسيه اللي بتكون فيها ولك مني دعواتي برحله اطلق من هالرحله السنه الجايه اذا ربي كتب لك

  26. وربي معاك حق بكل كلمة قلتها,هالسنة وزي كل سنة صيفنا بأبها ,مع أني ما أطيق السفر لكن رغبة أهلي وحبهم لهالمدينة الي مادري وش شايفين فيها,,,,,,,المهم ,,رحلتنا بشهر 8 ولا وصلنا رحنا لنفس الشقه الي اخذنها السنه الماضيه وكانت بـ350 أما السنه هذاي المجرمين رفعو سعرها لـ800 ريال شفو النصب والاحيتال أكثر من الدبل يالظلمة,,,بصراحة السياحة عندنا مصخرة,,ولا تلفريك السوده أكثر من مصخرته مصخره أدفع 60 ريال تكيت عشان تنزل وتزور قلعة رجال المع وإذا نزلت قالولك ادفع حق الباص وبعد ماتدفع وتروح ادفع حق الدخول القلعة وبعد ماتدفع وتدخل ,,,إذا ودك تدخل المكتبه الي بالقلعة كمان أدفع.,,,,ماأقول الأ بلا سياحه بلا هم والواحد يقر بداره ابرك له

  27. انا رايي الي مايسافر برى يجلس ببيتهم احسن له انا ماحصلي اسافر هالسنه بس ماطرا لي ولافكرت اروح لابها اقبضو ارضكم لين يحصلكم وتسافرون برى واذا قالو ان بالسعوديه بعز القايله درجه الحراره 19 فكرو تخلصون اجازتكم بالسعودية الى القاء في فشيله اخرى

  28. فعلا أبو لجين هذه السياحة الداخلية و مشاكلها بس بس ما لقيت مكان تمثل به وساخة الأماكن يلي زرتها غير شوارع مكة المكرمة أطهر بقاع الأرض …سامحك الله

  29. عمار يا ماليزيا … سعر لنكاوي لاجون اقل من خمسمية …. دعوة مني لاهلنا في السعودية زورو لنكاوي في ماليزيا والله الاسعار ارخص

  30. أنا بصراحه اول مره ادري لان عمري ماتمشيت جوا البلدبصراحه مالك سنع دامه غاليه بشكل هذا وانت مقرش اطلع برا سعوديه ..انا كل صيفيه موجوده بالكويت فله يكفيك انك برا سعوديه الامارات مصر روح فللللللللللللللله علا أقل حماماتهم بلااااااااااااااش خخخخخخخخخخخخخخخ:D

  31. مع احترامي لك و لكلامك الغير صحيح اقول لك كلامك مبالغ فيه جدا جدا .. غرفة بثمان مية ريال و بخمس مية ريال ؟؟ شكلك رايح لفندق الانتر والا الترايدنت .. انا كل اجازه هناك ولا عمري سمعت عن هالكلام اللي تقول عنه .. بعدين الامطار يا حبيبي ماشاء الله تهطل بشكل يومي .. لا تفتري عشان تسوي موضوع !!

  32. ابو لجين كفيت ووفيت ما اعتقد لدي تعليق مثل تعليقك ماقصرت وين ا لمهتمين عن السياحه عن موضوعك المميز

  33. بمناسبة الحديث عن السياحه…انا شاب سعوودي اخذت عهدا على نفسي ان لا افكر بالسياحه الداخليه نهائيا…وذلك بسبب ما نقرأ ونشاهد من الصعوبات التي تواجه الشباب في كل مكان تقريبا والنظرات السوداء التي يقابل بها حتى لو كان خلوق وملتزم ومؤدب…….هل انا على حق؟اجيبوني..

  34. لو وجدت الأرادة الحقيقية لصناعة السياحة في بلدنا لكانت ابها والمنطقةالجنوبية واحدة من اهم المناطق السياحية في الوطن العربي والتطور الحاصل في دولة الأمارات هو اقرب مثال على مثل هذة الأرادة

  35. أولاً أحب ان أشكر جميع من علق على الموضوع , وأحب أن أهمس لمن اتهمني بالمبالغة والكذب بالموضوع : يشهد الله عز وجل عن كل كلمة قلتها أنها صحيحة وواقعية , ولمن أراد التأكد ماعندي مانع أحط أرقام الشقق المذكورة ويتأكد هو بنفسه … ——– أما بخصوص المطر , أنا ما أعترض على قدرة الخالق عز وجل , هذي أقدار مقدرة . لكن أقول ماتستاهل الروحة ومافيها أمطار

  36. الأخ الكريم رويال : أشكر لك التعليق ,لكن لي تحفظ على موضوع تكذيبك للموضوع وقولك أني أبالغ … مستعد كامل الإستعداد أن أزودك بكل شي وبالتفصيل الممل . بعدين يا أخي العزيز شلون تبي فندق ترايدنت أو الإنتر يكون في النماص ؟!! مع احترامي للمحافظة العزيزة على قلبي .

  37. انا تو راجع من الرياض الى ابها يوم كنت في الرياض سعر الشقه غرفتين وصاله 400 ريال ولا تقول رحت شمال الرياض كانت في شارع الابراج في السويدي 400 ودرجة الحرارة 80 والليل 50 وش ذا اجل في ابها والله الاسعار زينه وبالنسبه للنماص تستاهل لو تحط في اليوم 1000 ريال هذي مدينة الضباب ويكفي اهلها الطيبين

  38. اقول يا ابن الحلال اطلع للشام ههههه .. لو ما يجيك من الجنوب الا شوفة هالقرود اللي تسد النفس ولا التعامل الزباله هههه

  39. وربي كل كلمه صدقت فيهااااااااااااااااااااكل ديره ازفت من التانيه .. ديرتن تنقصها خدمات والتانيه عندها ازمة مياه والثالثه شوارعها كلها حفر ومدري شنو والرابعه عليك الله فيها عد واغلط من الاخطاء انا ايغى اعرف شيئ واحد ليه يكذبون اعلانات بكل قنوات وبكل حاره حتى المسجد ماخلوه بروحه من المهرجانات وبالنهايه ماشفنا الى غبار واحمد ربك واذا فيه مهرجان عد واغلط من الخدمات اللي ناقصته ..بصراحه كلامك عن ابهاااااااااااا احنا مارحنالها ولا نفكر نزورها بس اغلبية قرايبي لما رجعو منهااااااااا صراحه الكل يشتكي من نقصان خدماتها .. احنا صراحه رحنا للطايف بس يمكن ابها ارحم منهااااااااااااا خذ قذاره بالشوارع الله يكرمكم وقل اهتمام بالاشجار وتزيين الارصفه طيب فين البلديات الاموال فين يصرفونهن ..احنا بالسعوديه الاماكن المشهوره تعد بالاصابع للسياحه ومع ذالك قل اهتمام فيهاااااااا… بس لاحيات لمن تنادي اصرخ من اليوم الى يوم يخبروك بتحرير الاقصى ..محد سامعك توكل على ربك خذ بس عمرتك وزر المدينه وبعدها دوورلك على دوله تشرح صدرك..

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

قال سياحة قال

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول