في بيتنا صليب و لا لا ؟


بسم الله الرحمن الرحيم
هذا موضوع كتبه أحد الأعضاء قبل فترة تحت نفس العنوان:

في بيتنا صليب

و أنا أتفق معه في الفكرة ..
و أختلف في الأسلوب !
صحيح نحن ضد الهوس بتتبع الصلبان ..
و لو فتحنا الباب لألغينا علم الرياضيات !
لأن كل مسألة فيها صليب مزعوم ! ( جمع + )
ولكن ..
هذا لا يجعلنا :
أولا : نستهزئ بتلك الطريقة التي طرح فيها الموضوع !
لأن صلاح النيات معتبر ..
فمن أراد أمرا نافعا و أخطأ في الفعل أو الأسلوب..
قدّرنا له إرادته للخير و شجعناه عليها و لم نوافقه على خطأه !
دون استهزاء أو سخرية .
فكيف إن كان معه بعض الحق ؟!
و قد أخبر النبي صلى الله عليه وسلم أنه في آخر الزمان ..
يشربون الخمر يسمونه بغير اسمه !
و قد وقع و الله !
فهذا :
ويسكي
بيرة
كحول
مشروب روحي
… الخ
و اليوم أيضا صاروا يرفعون الصليب ..
و يسمونه بغير اسمه !
أحد أبناء المسلمين ..
يفرح بفوز منتخب ( إنجلترا )
فيرفع علمها !
فتقول له :
إيش قاعد ترفع ؟!
يقول :
علم !
تقول :
هذا صليب !
يقول :
لا ..
هذا علم إنجلترا !
و تمر على فندق ..
فتراه رفع علم السويد عاليا على سارية !
إيش هذا ؟
يقول :
فيه وفد سويدي يبي يزورنا
تقول :
عشان كذا رافع الصليب !
يقول :
أي صليب ؟!
قبل أقل من اسبوع و أنا طالع من المسجد..
شفت رجل مسلم يصلي السنة الراتبة للمغرب !
فتوقفت !
لأني وجدته يصلي و الصليب على صدره !
كلمته بعد الصلاة ..
و كأنه انصفع على وجهه !
ما درى انه لابس صليب !
كان لابس قميص إنقليزي !
لا ..
و صارت تعرض الصلبان ..
عيني عينك !

و يقول لك :
قميص رياضي !
::::::::::::::::::
في بعض البلدان الإسلامية المنكوبة ..
و في الأخبار عندنا ..
تسمع دائما :
( وقام الصليب الأحمر بمساعدة المتضررين )
و يقولك واحد :
( جزاهم الله خير الصليب الأحمر يساعدون الناس ) !
تقول :
الصليب الأحمر !
يقول :
لا يا أخي ..
هذا إسعاف !
و هم لابسين الصلبان على صدورهم !
::::::::::::::::::
كثير من الأندية العالمية ..
تحط الصلبان على قمصان لاعبيها ..
و يأتي بعض المسلمين و بكل بلادة ..
و يستنسخ نفس القمصان دون حذف الصليب !
نادي برشلونة..
حذف الصليب من شعاره ..

::::::::::::::::::::::

و أنا أكتب الموضوع مريت على أحد الجدران ..
إللي شوهها أهل التخلف و الهمجية كعادتهم ..
و لكن همجي و ما فيه مخ !
ما لها حل ..

إللي كتب هذا الصليب المعكوف ..
ليس ..
صهيوني
و لا نازيا ..
بل هو مسلم ..
يشهد أن لا إله إلا الله محمد رسول الله ..
لكن ما فيه مخ !
فراح يرسم الصلبان على الجدران !
:::::::::::::::::::::
و في المقابل ..
يفوز المنتخب السعودي ..
تشوف الشاب رابط العلم على خصره و قاعد يرقص !
و واحد معلق العلم في شنطة السيارة ..
و إذا وقف عند الإشارة ..
العلم يسحب في الأرض !
و عند الشكمان !
طيب العلم فيه :
( لا إله إلا الله محمد رسول الله )
ما فيه مخ ؟!
::::::::::::::::::::
في اليوم الوطني ..
تشوف تقليعات غريبة ..
واحد كاتب الشهادتين على أبواب السيارة الجانبية ..

طيب ..
ما تمر السيارة في موية وسخة ؟!
ما يجيها أوساخ وتراب يعرضها للإحتقار ؟!
ما فيه مخ ؟!
::::::::::::::::::::
وش أقول و هذا واحد مسلم سعودي منا وفينا ..
حاط الشهادتين على المراتب !!

ما فيه مخ ؟!

::::::::::::::::

المهم ..
(إن تغير الأسماء لا يغير الحقائق )
و هالحين ..
في بيتنا صليب و لا لا ؟!
::::::::::::::::::::::

رسالة قصيرة ( sms )
بإمكانك شراء السرير ..
و لكنك لا تستطيع شراء النوم !

::

بإمكانك شراء الدواء ..
و لكنك لا تستطيع شراء الصحة !

::

بإمكانك إمتلاك المال ..
و لكنك لا تستطيع امتلاك السعادة !

::

فلتطلب ما تريد .. ممن يملك ..
( يـــــــــــا رب )


تعليقات 39

  1. صدقت أخي … بارك الله فيك … أكثر الله من أمثالك… الموضوع السابق كما ذكرت كان الأسلوب أسلوب استهزاء … وفقك الله على اسلوبك الجميل

  2. بسم الله الرحم اللرحيم ,, نعم نحن مهووسين بتتبع صلبان خلق الله ,, لكن اول علك ظهر ليس صليب , الصليب معروف شكله جداً , ثانيا ً الصليب مرفوع وترى اعلام الدنمرك , والسويد وبريطانيا وغيرها مروفع فوق السفارات على ما اظن ؟؟ يا اي النيه هي اللي بالقلب , ولازم نحترم رموز الآخرين وشعاراتهم الدينيه , عشان يحترمون مقدساتنا . اكيد الاختلاف كبير بالعقائد , لكن اقصد الاحترام . فأنا احترم صليب المسيحي لان هذا معتقده ويؤمن به , كما انا اؤمن بالكعبه المشرفه واحبها كبيت الله … وهكذا ,, ارجو ان يكون قصدي مفهوم بعدين انا مدري وش هالحساسيه من الصليب ؟؟ كل يوم طالع لنا واحد صليب وصليب …

  3. أتفق مع الأخ سطام وبالنسبة للأخ كاتب الموضوع الي شايف نص السعودية بلا مخ أتفق معاك في بعض التصرفات غير الحضارية وبالنسبة لشغلاات الأعلام الأنجليزية والبرشلونة وألخ أقول أنته يبغالك تبطل وسوسه النية في القلوب و من ناحية ثانية بالنسبة للدول أحترم ثقافة وشعائر الغير أ>ا كنت تنتظر منهم المثل

  4. إلى حاط (الإستكر حق العلم على سيارته) ما أشوف فيها شي .. خصوصا إن السيارة نظيفة وتلمع…إنما الأعمال بالنيات .. تحياتي

  5. كلامك إرجاف وتهويل لشيء مايستاهل ..يعني لا تشجعون وترفعون أعلام الأندية عشان الصليب!ياخي تعتمد على النية والنية مايعرفها إلا ربك لكن واضح إن اللي يشجع مثلا ماقصده شيء لذلك مافيها شيء وبلاش تشديد ..شكراً

  6. ياخوي حنا ما يجب اننا ننظر هالنظره ذي وهالتخلف ذا .. كل خطين تقاطعوا صاروا صليب .! لو تدقق بالعلم السعودي على هالنظره .. راح تلقاه فيه صليب .. السيف على شكل صليب ولكن مايل .. يجب اننا نغير هالنظره ونرفع تفكيرنا اكثر من كذا اخي الكريم .. و اخي الكريم ايضا .. في الزيارات الرسميه للمملكه .. للدول الخارجيه .. يرفع علم لا اله الا الله محمد رسول الله ايضاً في الاستقبال وفي الموكب و في الاجتماعات .. فمن حقهم في مواكبهم ان يكون علمهم متواجدا .. في زيارتهم الرسميه ومواكبهم الرسميه .. مثل ما تبيهم يحترموننا يجب اننا نحترمهم ونحترم دينهم .. ارفع تفكيرك اكثر من كذا وشف اشياء اهم من سالفه الصليب وركز عليها .. انتقد الشباب الي يلبس طيحني و مدري وش …. الخ .. انتقد الشباب الفاضي الا ما عنده الا سهر وفسق .. انتقد زياده الاسعار ارتفاع الاسعار ….. الخ .. مخلي كل ذا وجاي تقول لي علم وماعلم .. كن الامه تبي تنمحي و تزول عند هالعلم .! ارفع تفكيرك اكثر من كذا ..

  7. طيب ..ما تمر السيارة في موية وسخة ؟!ما يجيها أوساخ وتراب يعرضها للإحتقار ؟!ما فيه مخ ؟

  8. السلام عليكم .. انا رديت بس عشان راعي السياره .. ترى ما اظن فيها شي .. وبرضو فيه نقطه ثانيه ابي انبه لها .. ان الرسول صلى الله عليه وسلم قال في ما معنى حديثه (( لا غلو في الدين )) .. يعني انت اللي معه علم وين تبيه يحطه مافيه مكان احسن الا انه يحطه فوق المملكه او الفيصليه .. عشان لايقربه شي :$

  9. الحمدلله ان في ناس سبقوني وقالوها , انما الاعمال بالنيات ,. وانا اقول ان مايحق لك تقطع صلاة رجل عشان تقوله انت لابس علم برشلونه ! فيها صليب! هو نيته انه يحب الفريق ماقالك انا احب دين الفريق , وفعلا مثل ماقالو اخواننا , الرموز والعلامات التابعه للدول لازم نحترمها ,, ولا تبي الفندق يعلق علم السويد واهو ناقص؟!!!!! , اجل هم بكره لازرناهم ولا الحين بجامعتنا المفروضض يحطون لنا علم اخضر بدون ( لا اله الا الله ) صح؟؟؟ هذا منطقك؟!!!

  10. ياخي الفيصيل اتفق معك في بعض واختلف معك في بعض اتفق معك في الصليب النازي المعكوف وكلنا نعرف ان هذا صليب مهما اختلفت النيه اختلف معك بقصة العلم الي راعيه الله يهديه رازه على المرتبه واختلف معك بقصة الاعلام الي ندري انه فيها صليب بس نيتي احطها على سفاره ولا لبسة لنادي معين ياخي تاكدوا من بعض الامور حتى لا يصيبكم غلو في الدين

  11. ما اقول الا جزاك الله خير ..افلجت صدري والله ..هذي اهانه انه يضع العلم وراء ضهر وفيها كلمة التوحيد ..والله اشوف اعلام منطله في الشوارع والمدارس يدسون عليها حرام عليكم .. ولا بلوزة صليب نصلي فيها .. بلوزة صليب تروح لليبيع في المحل وتقول شلها يقول شكرا لقتراحك .. اكتبها في ورقه وحطه بصندوق الاقتراحات .!

  12. يا اخوي ترى تعبنا من هالتشدد. لازم نحترم غيرنا عشان نحترمهم . مل حياتنا ملاحقة للصلبان . ترى في أشياء واجد أهم . إلى متى؟؟؟ يعني كل ما تشوف شي راح تقول حرام وكل مايسوي واحد شي بنية زينة مافيه مخ .. والله ما يصير لازم نحترم الخرين عشان نحترمهم وترى كل التشدد قادنا الى التخلف . شكرا لك اخوي

  13. .. على هونك إن انتقصنا من بعض تصرفات البشر ( ولا يوجد أحد كامل ) لا جب علينا التعميم على الشخصية .. وغن كنت أتوقع منك حسن النية لكنك أسأت في التعبير .. 🙂

  14. بالنسبة لموضوع الأعلام ..انا رافضة تماماً لوضعها كمساند !! تحط كلمة التوحيد ورا ظهرك !! ولا اللي يقعدون عليها في الملاعب !! لكن بالنسبة لوضعها على السيارة من برا مدري بس اقول الواحد يآخذ فتوى احسن من انه يقول رايه ..بالنسبة للصليب حلوة اللي قال نحترمه !! اشوف ماشاء الله هم محترمين شعائرنا الدينية بقووة ..! بعدين حنا ماقلنا بندعس عليه قلنا بس رجاءً لا يقعدون يرسمونه على البلايز اللي عندنا وعلى فكرة ترى له اشكال متعددة ..وشكراً

  15. والله كلاامك عين العقل يالفيصل ومنطقي ولا يهمك نعق بعض الجهال ..كــل ماأنــكر أحد المنكــر قالوا متشــدد !!

  16. أنا ما أدري كيف تنتقد أسلوب الموضوع الاول في السخرية ..ثم تعود وتسخر من بعض الشباب على أخطاء وقعوا فيها بدون علم حتى ..مافيه مخ!

  17. موضوع جميل وتشكر عليه اخي الكريم، ولننظر بشكل أكثر واقعية وشمولية لما طرحت , الموضوع في أساسه يندرج تحت.. إهمال بعض مايخص تعاليم ديننا الأسلامي والجانب الآخر التقليد الأعمى، وبالنسبة لموضوع الأعلام وماتحويه فلا أفتي في هذا الموضوع لكن لنتكلم عن التصرفات الشخصية لكل فرد

  18. لو سمحت موضوعك يعني مو مرتب اسمح لي و بعدين اللي على الجدران مو علامة صليب تقدر تقول رسم طفل صغير و ما يسوي هالحركان عالجدران الا الاطفال الصغار و لو كان واحد حاط علم دولته في سيارته ؟ وش صار؟؟ حرام ؟؟ لا اسمح لي عادي و انت وش دراك ان يجي عليها وصخ يمكن يكون هو محافظ عليها اسمح لي و احنا مسلمين ما نكرهه الصليبين و لا نحبهم بالعكس ما نتكلم على دينهم كذا نسيء لهم و لنا هم راح يعتقدوا ان المسلمين يتكلموا على غيرهم خلهم ما لنا دخل فيهم سووا خير و لا شر علينا من نفسنا احنا المسلمين و بس اسمح لي اخوي اذا طولت و تقبل رأيي و شكراااااااا

  19. لا لا لا لا لا لا اخوي عن الغلط ليش يعني اهل السعودية طايحين من عينك يعني وشو بلا مخ ؟؟! و انا احترم الصليبين دامهم ما يأذوا المسلمين ليش ااذيهم او اسبهم عشان اشوهه لهم صورت المسلمين ؟و بعدين حسن الفاظك كيف اهل السعودية بلا مخ ؟؟؟! وش قصدك بهالكلمة و بعدين انت تكرههم بالاسلام بدل ما تحببهم بالاسلام مع انه مطلوب منك العكس و بـــس

  20. مثل ما تكرموا اخوانا وقالو الاعمال بالنيات والنية مخلها القلب.. وكلنا والحمد لله في قلبنا كلمة التحويد, أنا ما بلبس الفرق او برفع علمه غير لأن اشجعه تشجيع معنوي.. احنا كلنا مسلمين فليش نضر نفسنا ونفكر بسطحيه,, وبالنسبة للشخص فكان يصلي ويؤدس واجبه الديني لربه فمن المؤكد ما همه صليب ولا غيره.. بالنسبة للسيارة فالمهم من الشخص يكون واضعها بصد نيه مو عشان يقول انه سعودي وبس وبالنسبة انه من الممكن يتسخ فحتى الجو فيه شوائب وهذي الشوائب بتعلق بالعلم! يعني نغلف العلم ببلاستك؟ حنا همنا رفع كلمة التوحيد والافتحار فيها.. ومثل ما حنا لنا ديانتنا الي نفتخر فيها حتى المسيح له ديانته الي يفتخر فيها ومثل ما هو يحترمنا حنا من الواجب نحترمه واذا كان في اختلاف ومشكلة نحلها بمعاملة حسنة فماتدري ممكن يسلم,, ومن رأيي ما بتقدر تلفت انتباه اي شخص وتخليه يفكر بدينك الا اذا كانت معاملتك معاه لطيفه و حسنة,,

  21. ترى حرف الـ T على لوحة النادي اللياقي بشكل صليب! ترى مافيه جهاز كمبيوتر مايخلو من الصليب! يابو الشباب سؤال.. هل الصليب، أو عندما يكون في بيتي أو ألبس قميص فيه علامة زائد.. هل أصبح مسيحياً طال عمرك؟؟؟؟؟؟؟؟؟؟؟؟؟ ياعالم تروا المفروض نتجاوز المواضيع اللي زي كذا .. العالم يصنعون كل شئ لنا وحنا نتفنن في اكتشاف أين يقع الصليب؟ وبعدين اللي حط علم السعودية على سيارته وش فيها؟؟

  22. اخي كلشي حكيته صحيح بس مو كل الناس مثل ما ذكرت الناس الي يسوو هذي التفرقه هم اصحاب النفوس الضعيفه و بالاخير كلنا اذا كنت مسلم اومسيحي احنا نعبد الله (عز وجل) وشكرا

  23. في بيتنا صليب!! تهقون اننا صرنا مسيحيين؟؟ B مااقول الا الحمدلله بس واصحاب العقول (المخووخ) في رااحه !!

  24. إخواني هذولا الدول والفرق أعلامها فيها صلبان لانها جزء من دينهم وتاريخهم (الحروب الصليبية وإحتلال القدس ولا نسيتو صلاح الدين!!) برشلونة .. أسبانيا .. الأندلس … محاكم التفتيش … إعدام المسلمين والقضاء عليهم في الأندلس (راجع تاريخ سقوط الأندلس إذا ما فهمت) لا تلعب على روحك وتقول هذي زائد مو صليب. إلا صليب ونص .. حنا متعلمين ونعرف لما يكون الشعار معناه صليب ولما يكون صدفة أو زائد أو حرف T . الصليب: شعار المسيحيين (الكفار) = المسيح صلب = المسيح أبن الله . تخيلو لو فريق يحط معنى الصليب بدل شكل الصليب في الشعار . راح تلبس الشعار ؟ راح تلبس قميص مكتوب فيه (المسيح ابن الله صلب) وتقول الأعمال بالنيات؟ الأعمال بالنيات؟؟؟؟ ما أقدر أتخيل واحد يعلم أنه الصليب شعار للمسيحيين ويتعبدون فيه ويدعون ان الله ثالث ثلاثة … وبعدين يقف بين يدى الله يصلي ولابس صليب ! صلييييب! طيب أنا أحترم البدو والحضر ونعم فيهم كلهم .. بس خليني أجرب وألبس تي شيرت مكتوب عليه من قدام البدو متخلفين ومن ورا الحضر متخلفين أقدر أمشي في الشارع خطوتين بدون ما يتفقع وجهي 🙁 يعني تزعلون وتعصبون لأني أهنت البدو أو الحضر ولا تزعلون لما شخص يهين دينك!!! ترى الموضوع مو لعب عيال هذا توحيد بالله أساس الدين. أنا مو متصعب وأحترم البشر من الأديان الأخرى ولكن لا أحترم أديانهم المحرفة (ولكن لا أظهر ذلك من مبدأ حسن التعامل والتقريب للإسلام). أنا لا أحترم دين الهندوس ولا أحترم أفكار الملحد ولا أحترم مبادىء العنصري ولاكن أعاملهم بإحترام من مبدا الإنسانية … أعتقد فهمتوني .

  25. احيانا اقول الحمدلله شبابنا فيه خير بس اذا قريت بعض التعليقات يصيبني احباط مو طبيعي،اي احترام اللي تقولون عنه وهم يسئون لديننا من استهزاء بالرسول عليه الصلاة والسلام وتدنيس المصحف وغيرها غيرها كثير،وتقولون مافيها شي لو لبسنا شعاراتهم.صحيح ياأمة ضحكت من جهلها الامم.(اللهم اصلح شباب المسلمين)

  26. الله يجزاك خير على الموضوع والصراحه يبيله متابعه الكثير من الشباب يلبسون بلوزات وعليها كتابات بالانجليزي مايعرفون وش معناها مااقول يالله رحمتك

  27. ويزاك الله خيـــــــر ,,,دايما يجول بخاطري هذا الكلام ,,!وانته قدمته بشكل بسيـــط جدا ,, ان شالله الي ما فيهم مخ بينتبهون لانفسهم ,,دمت بحفظه (:

  28. الي يقول الاعمال بالنيات ,,شوه دررا الزائر او الاجنبي المقيم والسايح بنيه رسمه صليب ديانتهم الي مرسوم على جدران بيوتنا انها بغرض التخريب او اللعب او شوه ماكانت نيه هذا الشخص الرجعي,,!اتوقع بيحط في باله يا سخريه على صليبهم اوالغالب رمز القوه الي شبابنا الاذكياء يستعينون به في رسماتهم وخرابيطهم ؟وكلا الفكرتين اسواء من بعضهم الين متى نتحمل اخطاء المغفلين,,!!؟ لا حول ولا قوه الا بالله

  29. بسم الله الرحمن الرحيم، الحمدلله، والصلاة والسلام على رسول الله، موضوع رائع ومبهر، والعنوان أبدعت فيه، فهو يشدك لكي تقرأ محتواه، أنا من مشجعي البرازيل ورغم أنني حريصة في البحث عن صليب هنا أو هناك في أي شيء أحصل عليه وخصوصاً من الخارج، إلا أنني بعد قراءة الموضوع وجدت أنني غبية وأنني قد وقعت في خطأ مرة أو مرتين عندما وضعت خلفية لكاكا ورونالدو في جهازي وكان يحتوي على صليب صغير الذي عادة ما يكون موجوداً على صدور اللاعبين، لكني أعدك بأنني لن أفعلها مجدداً وسوف أكون حريصة أكثر. كل عام وقروب أبونواف بخير، شهر خير وبركة

  30. لو سمحت يا اخي كبر عقلك ………..هههههههه…….يا اخي الصليب معروووووووووووف جدا الصليب معروف انه متخذ عن سيدنا عيسى عليه السلام عندما صلب؟؟؟! فا ياليت ماتخرف وتقول انه اي اشارة زايد عاديه صليب !!لانه مالك حق تتهم العرب كلهم بالجنون وانه ماعندهم امخاخ

  31. ، الصليب مقطوع من فنيلة الأنتر ، لاأنها كوبي مو أورجينل … بعدين حرف T مو صليب ، هو حرف …

  32. تابعت الموضوع اللي ذكرته سابقاً وبالنسبة لي كلامه ماعليه غبار..ذكرت مواضيع كثيرة من تعقيد الناس لبعض الأشكال .. بالفعل أحيان تجد ملابس يوجد فيها صلييب وأحياناً لا بس الناس تدقق بزيادة صح هم يدسوا السم في العسل لكن اللي لابسها أكيد بحسن نية .. وهو هذا أسلوبهم يدخلوه بطريقة ماينتبه لها إلا اللي يدقق مثلها مثل صور الأوجه على الملابس مي واضحة.. بالنسبة لشهادة التوحيد صح عليك .. اللي يسويه البعض مو احترام وهنا أذكر انهم قالوا مرة بيسون علم خاص للمبارايات مافيه شهادة التوحيد عشان ماينهان بس وينه ؟؟ كلام؟؟ وللإخوان نصيحة ( ليش ماتكون ردودنا محترمة حتى لو غلط أحدهم ماتحح الغلط بغلط ! )أختكم

  33. أولا أشكرك أخي الكاتب على الموضوع الجميل والمنطقي واحترام علم دولة من الدول مثل انجلترا لا يعني أن احمل علهم على كتفي بالليل والنهار الملابس الرياضية والقمصان التي لا تحمل الصليب مالية السوق فعندما اترك كل هذا واشتري قميص يحمل الصليب فماذا تكون نيتي في هذه الحالة يا اخوان احترام الآخرين لا يعني وضعهم على رؤوسنا وإنما بعدم وضعهم تحت أقدامنا , عندما تضع علم المملكة وأنت تعلم أن به ذكر الله خلف ظهرك فماذا تكون نيتك فيهذه الحالة وعندما تلفه حول خصرك وترقص به في المراقص بين الغانيا وبائعات الهوى فماذا تكون نيتك في هذه الحالة والللي يعمل كذا ماااااافيه مخخخخخخخخخ

  34. جزاك الله خيرا اخي الفاضل على نيتك الصادقة في محالة إيضاح الحق الواضح .. و احب ان أنبه اللي يقول ان الصليب من صلب عيسى عليه السلام ويطلب من كاتب الموضوع ان لا يخرف إلى قول الله تعالى ( و ما قتلوه و ما صلبوه و لكن شبه لهم ) .. آية واضحة و صريحة ، و كل مسلم يجب ان يعرفها و يؤمن بها لأنها عقيدتنا في عيسى عليه السلام .. و لكن ما الذي جعل البعض يجهلها ؟ انها الدعوات الكثيرة إلى عدم التشدد لا تشدد .. لا تشدد .. لا تشدد .. لو نقول اي ملاحظة بسيطة او ننقد تصرفات لاتوافق مع ديننا قالوا لنا اوووووه لاتشددونحتى ارتخى الكثير و اصبح لا يعرف ابسط اصول العقيدة .او يقولون انتم تدققون على اشياء تافهة ومن هذا الكلام و لله الحمد و المنة لست ممن لديه هوس الصليب و البحث عنه في ادق الأشياء لكني في نفس الوقت لا اتغاضى عن الصليب الواضح كشعار لفريق او رمز لجماعة .. و خير الأمور الوسط

  35. اخي كاتب المقال ، لنفترض فعلا ان كل شي حولنا صليب ، هل نعبد الصليب لا ، الحمد لله ايماننا بالله في قلوبنا وليش بالشعارات ، كثرة الحديث عن الصليب وجع قلوبنا ، لنفترض كنت في مكان ما و على الجدار نقوش و قلت هذا صليب و بعدين صار وقت الصلاة ، هل ستترك صلاتك مثلا؟؟؟؟؟!!!يا اخي الله سبحانه وتعالى موجود في كل مكان وليس في علامة الصليب !!!

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

في بيتنا صليب و لا لا ؟

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول