عيادة رقم 14


السلام عليكم ورحمة الله وبركاته
عزيزي القارئ , وش جاي تسوي هنا /؟ <<– داخل بحرش /

البداية
سمعت صوت طرقِ على الباب – طق طق طق – فتنحنحت قائلاً : تفضل .. دخل علي سكرتيري قائلا : أحم.. أهلين دكتور مستر أي , ( سبانة ) موجود برى وينتظرك طال عمرك /.. هززت برأسي كناية عن الدراية و قلت له : أوكي بعد خمس دقايق خله يدخل علي .. بعد أن خرج السكرتير دفعت بقدمي الطاولة فبدأ الكرسي الدوار بالدوران .


أنا ( مستر أي ) دكتور نفسي عرف عنه النجاح والشهرة بين الناس في هذا المجال /, لدي عيادة تدعى ( عيادة رقم 14 ) في منطقة راقية ودخلي السنوي يعتبر مرتفعاً جداً مقارنةً بغيري .. ألّفت العديد من الكتب الناجحة كـ ( شرح الذهول .. لأهل العقول ) وأيضاً ( أهل الحاجة .. أولى بالدجاجة !! ) بالإضافة إلى كتاب الرياضيات حق ثاني متوسط / <<– جاز له النصب /

width=500

فور توقف الكرسي عن الدوران رن هاتفي الخلوي , ألقيت نظرة فإذا بزوجتي تتصل بي .. تأففتً : يوووه منيب ناقص هوشه ومشاكل على ذا الصبحية / .. ضغطت على الزر الأحمر ( مشغول ) ووضعت الهاتف على الطاولة وما هي إلا لحظات حتى رن مرة أخرى معلناً عن وصول رسالة نصية .. فتحتها لأجد رسالة من زوجتي :

وأنت جاي تجيب معك حليب وخبز.. وتمر على دربك محل الساعات وتجيب ساعتي وبالمرة جب التلفزيون من المصلح بعد , ودامك رايح من هناك جب اللعبة حقت العيال تراها خلصت من التصليح .. وعلى فكرة ترى أختي هي وزوجها توهم جايين من باريس ولازم تشتري لهم هدية .. وأعمل حسابك ترى هالصيفية راح نصيف في باريس , وش زود أختي عني !

وضعت الهاتف على الطاولة مرةً أخرى وأنا أقول في نفسي : وجع وش ذا البيت اللي كأن جايه قصف و كل شي فيه خربان , الظاهر لو أرجع أأثثه من جديد أسرع وأرخص / .. لم تمض إلا لحظات وإذا بالهاتف الخلوي يرن مجدداً مشيراً بوصول رسالة .. فتحتها لأجد زوجتي قد أرسلت مرة أخرى :

على فكرة تراني عارفة أن ما عندك مراجعين وأنك معطيني مشغول تو عشان تصرفني ! .. اتصلت على السكرتير وقال لي !

وضعت الجهاز على الطاولة وفتحت الباب كي ألقي نظرةً خارج المكتب فوجدت سكرتيري قد أمسك بسماعة الهاتف ويلوح لي وقد بانت على وجهه علامة الندم لرده على زوجتي ولعمله لدي من الأساس / .. لوحت له معزياً وأنا أقول في نفسي ( الله يكون في عونك , بتجلس تسألك عني للظهر / ) .. وجدت ( سبانة ) ينتظرني وقد بانت عليه علامة الارتباك , ناديته ودخلنا إلى المكتب .


بعد أن دخلنا خاطبني : كيفك دكتور أن شاء الله بخير ؟؟ عرفتني صح /؟! .. تبسمت في وجهه وأنا أجاوبه : أيه أكيد عرفتك , شلون ما تبيني أعرفك وأنت الزبون الوحيد اللي يدفع لي كاش / .. قلتها له وانا قد مددت يدي ملمحاً له بالدفع / .. استغرق ( سبانة ) دقيقةً حتى يفهم قصدي فاقترب مني ودفع لي مبلغ الجلسة , زادت ابتسامتي فاستطردت : تفضل اجلس يا ( سبانة ) وقل لي وش موضوعك ؟ صار لي فترة ما شفتك / !! .. ازداد اضطرابه وتلعثم قليلاً ثم قال : هاه /؟ وليه حسيت أن عندي موضوع ؟ ليه ما قلت إني مبطي عنك وجاي أشوفك وأسلم عليك مثلاً /


أدخلت رسوم الجلسة في جيبي وأنا اقول له : إذا كذا فـ أجل قل آمين , الله يكثر من أمثالك / .. المهم بس قل لي وش مشكلتك أو تدري خلني أبدأ بالسؤال الافتراضي عند دكاترة علم النفس , تكلم عن طفولتك /؟ .. تنهد قائلاً : مدري من وين أبدأ يا دكتور , لكن خلني أبين لك في البداية أني أنا وبكل صراحة مو راضي عن تخصصي اللي تخرجت منه / .. أذكر لما كنت في سنوات المرحلة المتوسطة رسبت في كل المواد لأني وبكل بساطة كنت بليد وغير مهتم بالدراسة , إللي صار أني في الفصل الثاني شديت على حيلي واجتهدت وذاكرت ونجحت في كل المواد .. ما أخفيك يا دكتور إني بعدها فرحت جداً وصار عندي طموح وصار .. قاطعته قبل أن يكمل حديثة : لدرجة أنك قررت تدخل طب /؟!


بدأت في الضحك بعد مقاطعتي له , أحرجت فتنحنحت قائلاً : أحم أحم أسلم يا ( صالح ) /.. نظر إلي بتعجب ثم أردف : اسمي ( سبانة ) لكن ما علينا , المهم بعد ما خلصت المتوسط ومر أول يوم لي في المرحلة الثانوية تراجعت عن قراري إللي اتخذته بشأن الطب وقررت أتخصص في الرياضيات .. حبيت المادة جداً وكانت عندي قدرة على الحسابات بسرعة كبيرة / , درجاتي في المادة كانت عالية جداً .. قاطعته لا إرادياً : لدرجة أنك كنت شوي وتقوم تشرح بدال الأستاذ من شدة فهمك /!! تلعثمت ثم استطردت : سوري على المقاطعة , أسلم يا ( محمد ) /.. أكمل وهو متعجب : قلت لك اسمي ( سبانة ) / , عموماً الحاصل أني بعد ما تخرجت من الثانوي ما قدرت أدخل تخصص رياضيات لأن التخصصات عندنا مربوطة بالمعدل العام للمرحلة ولا يهمهم درجاتك في المواد .. يعني عشاني ما كنت أقدر أحفظ الأدب ومشتقاته من المواد الأدبية أنحرمت من التخصص إللي حبيته وكنت مبدع فيه /!!

أبي أعرف بس يا دكتور .. ليه ما يحطون موظف مختص أو يكلفون المرشد الطلابي أنه يرفع كشوفات الطلاب نهاية كل سنة لبعض الجامعات وعلى ضوئها يختارون للطلاب التخصصات اللي هم متميزيين فيها /؟! .. مهوب معقول أني أحرم طالب نابغة في العلوم أو الرياضيات والحساب أنه يتخصص فيها ويبدع عشان باقي المواد وأحكم عليه بحكم شبيه بالإعدام وقتها وهو إني أدخله قسم تاريخ أو إعلام أو غيره /!!

ليه ما تكون الثانوية عندنا شبيهة بالمرحلة الجامعية .. يعني تكون مزيج بين الاثنين بحيث أن الطالب يتعود ويتأقلم على جوها وعلى الاعتماد على نفسه في مثل هالأمور .. مهوب مثل ما هو صاير الحين , الطالب الين يتخرج من الثانوي وهو يعامل كـ طفل وكل شيء بالغصب من ناحية دوام وحضور /.. وبعدها وخلال فترة قصيرة ينقال له أنت خلاص صرت رجال رح للجامعة واختر التخصص اللي تبي وترى الدوام على كيفك متى ما تبي تطلع بين المحاضرات عادي و ما إلى ذلك من الحرية .. طبيعي لما شخص مكبوت يدخل في مرحلة مفتوحة زي الجامعة أنه يضيع في بداية الامر /.


وعشان كذا نلاحظ كثير تكون معدلاتهم منخفضة أو يتركون الجامعة خلال السنة الأولى أو تضيع عليهم كذا سنة وهم بس شغلتهم التحويل بين الكليات .. بمجرد ما شخص يمدح له دكتور في كلية تلقاه يشيل عفشه ويحول لها سواء كان تخصصها زين أو لا ؟ مكتفي سوق العمل منه أو لا ؟ صح وإلا لا يا دكتور؟! صح وإلا لا /؟؟!! .. شهق ( سبانة ) وبدأت تنتابه حالة هستيرية , فتحت الثلاجة الصغيرة الموجودة بقرب مكتبي وأخذت منها ( قارورة ماء ) ومددتها له بسرعة .


شرب منها ( سبانة ) اأسترد انفاسه واسترخى .. اقتربت منه وقلت له : صحة صحة .. استرح واترك جسمك يسترخي , على فكرة ترى علبة المويه عندنا بخمسة ريال /.. بعد أن أكمل ( سبانة ) شربه للماء استطردت سأئلاً : تراني للحين ما عرفت وش مشكلتك وليه جاي بالضبط ؟ .. أخذ ( سبانة ) نفساً عميقاً ثم أجابني : ليه لا يكون مستعجل بس /؟


أجبته على الفور : لا ما عندي شي وش دعوة .. عموماً وعلى طاري الدراسة خلني أقول لك قصة شبيهة وهي قصتي يوم كنت أطبق في مدرسة في أخر ترم لي في الجامعة /.. أذكر للحين أول يوم لي عندهم , قمت الصبح وكلي نشاط وحيوية وحماس , طلعت من البيت وشغلت السيارة ولكنها للأسف ما اشتغلت فاضطريت أخذ تاكسي /.. وصلت للمدرسة ولقيت واحد من المدرسين ينتظرني عشان يعطيني جدولي ويعطيني نبذة شوي عن المدرسة والطلاب .. أذكر قال لي : أهم شيء التحضير الذهني للدرس و الكنترول على الفصل عشان تقدر تسيطر عليه بسهولة ودرسك يمشي بدون مشاكل وطبعاً لازم تكون شديد وتخوفهم بشخصيتك /


طبعاً بحكم أن وجهي مثل ما أنت شايف ما يدل إلا على السكون والطمأنينة /.. واللي على فكرة صار لي فترة أطالب أنهم يحطونه في راية السلام بدال هالعلّم الأبيض بس ما حولك أحد /.. عموماً اضطريت أني أوقف عند الباب شوي قبل ما أدخل على أول فصل عشان أتصنع العصبية واعفط وجهي وأحسسهم بالخوف , ما أمداني أدخل إلا واحد من الطلاب يهمس : يووه يا شين السرج على البقر , وش هالمهرج اللي دخل علينا يا عيال /؟! .. تجاهلت كلامه وكتبت عنوان الدرس على السبورة وبعدها التفت عليهم وصرخت بصوت عالي ( جبتوا الكنترول معكم وإلا لا /؟! ) شفتهم جالسين يتلفتون على بعض وما فهموا شيء فقلت ( ما شاء الله عليكم , وتبون تنجحون بعد /!! بكرة ما أحد يجي إلا وهو جايبه معه , ومحلول بالقلم الأزرق بعد /! ) .. فتحت الكتاب وجلست أشرح لهم وصرت كل ما نزلت رأسي عشان أقرأ فقرة من الكتاب أسمع صوت واحد يصفر


رفعت رأسي وأنا معصب وجلست أمشي بين الصفوف وأنا أقول ( الظريف اللي أهله لاعبين عليه وقايلين له أنه ينفع يشتغل ببغاء , يقوم بسرعة /) وصلت لأخر الفصل وشفت طالب قصير متوزي وجالس يضحك .. وقفت جمبه وقلت له ( أنت معنا هنا في الفصل صدق /؟! صراحة شكلك مزور الشهادة /!! يلا اطلع برى الفصل ولا تتكلم مع أحد وانتظرني الين أجيك , وبكرة تكون جايب معك الكنترول ترى أول واحد بشيك على دفتره أنت !! .. وبالمرة إذا طلعت برى تمسك بأي شيء عشان ما يطيرك الهواء / )


رجعت لمقدمة الفصل وكملت الشرح وطبعاً تخلل الدرس كذا سؤال محرج من الطلاب ولكني قدرت أسيطر على الدرس عن طريق إتباع القاعدة المشهورة اي طالب يسألك سؤال في الدرس ولا تعرف جوابه !! على طول خله واجب في البيت


تعليقات 20

  1. كتبت فابدعت منذ زمن وأنا أنتظر طرحك طرح مختلف هذه المره (مازلت حزين على أوضاع مجتمعك ) وتحاول أصلاحها أسال الله أن يبلغك ذلك 🙂

  2. وسعت صدري الله يوسع صدرك 😀 شكرا Mr.A جمعت بين الفائده والوناسه مصطفى قصصصصدي سبانه هههههه لاتحرمنا من جديدك يالغالي

  3. الله يعطيك الصحة والعافية والوناسة زي ما ونستنا بطرحك الأكثر من رائع وان شاء الله يتعدل الوضع الى الأحسن بأذن الله

  4. (يجيب الله مطر) بس مو زي جدة 🙁 بالنسبة لكتابك هل هو متوفر عند جميع مطابخ المندي والمظبي والا وين الاقيه :$

  5. موضوع رووووعة ماشاء الله عليك بصراحهـ ابدااااع اسلوبك يجمع بين الفائدة والضحك بطريقة رووعة 8) يسلموووو مستر اي يستاهل الموضوع احفظه في المفضلهـ بانتظار جديدك الاروووع ويعطيك العافيهـ 8)

  6. هههههههههههههههههههههههههههههههههههههههه وقسسمن ياني ضحكت ضحك … وآآه بس ع مواضيعك وعلى مدونتك .. وقسسم كل مواضيعك خقه وانا واحد من معجبينك اقولها بكل فخر <- كبر راسه لول خليلك آسوم 🙂

  7. اولا عيدك مبارك بعد الزحمة الحقيقة تصوي ممتاز للواقع الله يعطيك العافية

  8. حياك الله وعافاك والله موضوع حلو وافكار حلوة ونقد موضوعي ويريت الناس تقرأ وتطبق والله يعطيك العافية

  9. يعطيك العافيه بصراحه طرح راقي واسلووب جميل صراحه وبكل اسف اقوولك ان هذا هوو واقع مجتمعنا واصل ابداعك انتظر جديدك

  10. ماشاء الله تبارك الله طرحك و اسلوبك رائعان جدا واحببت ان اعلق على موضوعك الجميل وهي ليش من عادتي ولكن موضوعك اجبرني على ذلك بارك الله فيك تستحق التميز والابداع والشكر والمديح

  11. موضوعك يصييييييييييييييح من قو ماهو خطير :$ والله اسلوب مافي منه ابد ! موضوع مشوق لأبعد حد لدرجة اني انشغلت ورجعت له يوسع الصدر ويشكي حالنا مع الاسف 🙁 جاري تصفح مدونتك 8) شكراً لك سبانه 8) ااامم اقصد مستر اي 😀

  12. اقسم بالله انك مبدع وفاصل بنفس الوقت B إلا ابي اسألك المحل حق الكمبيوترات وينه فيه 😀

  13. هههههاي طرح اكثر من راائع تسلم يمناك مستر اي مع ان عندي اختبااار مهم بس ما قدرت اوقف قراءة….. بارك الله فيك على الطرح الجميل

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

عيادة رقم 14

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول