علاقة كيسة خبز صامولي ومفرود


قبل البدايه
لي الشرف اني اكون من ضمن مجموعة ابو نواف البريديه
تعلمت من مواضيع المجموعه اشياء كثيره وكنت اتابعكم منذو مبطي
فقررت من بداية هالسنه الجديده إني ابدع بمجال آخر غير الروتين اللي بالمنتديات
واني اكوون عضووه خفيفه عليكم نافعه مع اني مااظن


مدخل
شي عادي إنك تفتح الدريشه
بس شي مو عادي انه يلفحك براااد وتمرض

شي عادي إنك تضحك
بس شي مو عادي إنك تضحك على شي مايضحك

شي عادي تتوظف
بس شي مو عادي إنك ماتخلص بوظيفتك


من بعد السماجه اللي فوق ادخل بموضوعي

1/1 واللي حصل وياي يوم الخميس

تواعدنا أنا ووحده من صديقاتي إنه في تمام الساعه السابعه مساء نتوجه لأم محمد وابنتها المعاقه
طبعا هالناس ذولا ماتقربنا فيهم اي صله قرابه..تعرفنا عليهم من مسؤولة المصلى ايام ماكنت طالبه نجيبه في الكليه
وكانت هدف زيارتنا الاولى لهم في السنوات السابقه مجرد فضوول بيني وبينكم
بس يوم رحنا لهم تغير كل شي وتحركت بداخلنا كل مشاعر الانسانيه.. وطبعا اكيد فيه ناس غيرهم أشد منهم وذولا يمكن بنعمه
ام محمد عجوز مريضه
بنتها المعاقه عمرها 21 سنه معاقه من اطرافها السفليه
اخوهم متزوج وساكن وياهم بنفس البيت بس هو بالدور السفلي وامه واخته بالدور العلوي
واللي يبط التسبد على انهم في بيت واحد مايربط بينهم غير كيسة الخبز الصامولي والمفرود
اخذت وياي ممرضه وصديقتي جابت وياها خادمه
وسوينا الواجب كعادتنا في كل زياره
لو اتكلم لكم عن اللي شفناه قسم بالله ماتصدقوون
ولدها تحتها وتكون هذي حالتهم؟
حتى الثلاجه حقتهم ع الزيرو فاضيه..
واكلهم كله شاهي وخبز !!!
كان نفسي امسك ولدها اتكلم معه بس للاسف مااقدر لأني لو تكلمت راح يعاقب امه لأنها اشتكت لناس اغراب.. وراح يقول لي بالفم المليان انتي وش دخلتس؟
وانا على شان امه بالعه المّر وساكته..
بس بقوله لكم لأنكم اوب مهاوشيني زي ولدها..
ألا تخاف من خالقك..؟
ألا تخاف ان ابنا لك يعمل بك كما فعلت بأهلك…؟
ألا تخاف ان ربك يبتليك بمرض وتصبح طريح الفراش طيلة حياتك..؟
أمك محتاجه دفء صدرك وسؤالك عنها..
اختك المعاقه محتاجه انها تتعلم زييها زي غيرها..!!
سؤال يقرقع بتسبدي..!!
متى ترجع لصوابك يامحمد…؟
هل يعقل ان الأبن تربطه علاقة كيسة خبز صامولي ومفرود فقط بأمه.؟

مخرج
هالله هالله ببر الوالدين


ملاحظه كبر خشمي
لا أقبل اي اضافه وماراح ارد على اي ايميل خارج عن نطاق موضوعي

ودي اصير قويّه 🙂


تعليقات 1

  1. والله هذة ماسه وفي الواقع الولد محمد مافيه خير .لان اللي مافيه خير في اهلة مافيه خير للناس لكن مااقول الله يلطف بنا.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

علاقة كيسة خبز صامولي ومفرود

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول