عزيمة ياشباب :)


مساكم الله بالخير


كيف حالكم مع الاجازهـ ..
تسني اشوف ابو نواف يلوح بالعقال ما عنده إجازهـ المسيكين
لا لا وورقة بلوت مبعد يقول لا تجيب طاري لي بعد تراني اشتغل
ولا حولي إجازهـ

يله يله خيرها في غيرها يا اللي تشتغلون .. عقبال اجازتكم والتقاعد مرة وحدهـ




انا يوم جيت أرسل هالرساله قعدت أهوجس ربع ساعه وشلون اصيغها وليش
لقيت أنه ما بدهااش .. طب صاروخ في الموضوع ولا تلف وتدور

هذا يا الزيون وانا اتسكع في ضواحي الانترنت .. لقيت لي
موقع حقق امنياتي .. حقق احلامي.. من الفرحة طمرت وصقع راسي جدار جيرانا
باقولكم ليش

الحين انت انت يا اللي تشوفني .. وانتي يا اللي تقرين.. اذا بغيتي تعزمين احد على العشا والا الغدا
والا بغيت تتقهوا مع ناصر مثلا والا تتعشين مع شوق
وطلع هالناصر والا هالشوق انسان ما يعرف الاماكن
والا انت انت اللي بتعزم وتسوي مناسبه .. ما تدري وش المكان الطيب والا المقهى الحلو..
في هالحاله وش تسوي..
في حالة ان المعزومين ما يعرفون الطرق ولا المكان .. بتبلش بالتوصيف .. ولف يمين .. والا خل شسمه ذاك على حجاجك الايسر << يا قدمي
واذا في حالة انت ما تدري وين تعزم فيه .. بتبلش تدور في النت مكان زين
وبتقعد تسال كل اللي عندك في الماسنجر .. وش رايك وين نتعشى فيه الليله
والا تقعدون تدورون مكان لما يسكر كل شي …


عزيمة :
هو موقع يساعد على تنظيم اللقاءات والمناسبات الإجتماعية عن طريق الإنترنت. ويعتبر الأول من نوعه عربيا
( من الموقع الرسمي )


ميزة الموقع وجماليته أنه يريحك كثير
يمنحك البحث في قائمه كبيره من المطاعم والمقاهي والاستراحات
مع تقييمها من قبل الزوار وتصفح صورها اللي يضيفها الاعضاء نفسهم
ويمنحك ميزهـ فتااكه بنظري .. اللي هي اختيار مكان مناسبتك الخاص .. زي بيتكم .. او استراحتكم الخاصه او مزرعه
وتحديدها بالخريطه
بعد كذا تقدر تسوي دعوة للاشخاص .. راح توصلهم رسائل مجانيه
SMS
تبلغهم بالدعوه ومكانها وتمنحهم خيار حتى تصفح خريطة المكان وهذا الشي بيريح صاحب الدعوه من هم التوصيف لبعض المدعوين
ويعيطك يا صاحب الدعوهـ خيار انك تستلم ردود المدعوين .. من راح يجي ومين رايح يتخلف
وراح توصلك على جوالك مباشره ..

الموقع خيالي واعجبني جدا .. فقلت اسوي له شرح بسيط للاعضاء .. عشان تعم الفائده ..

(1) التسجيل في الموقع :
التسجيل بسيط وواضح جدا


بعدين راح يطلب منك بعض البيانات الخاصه ..
منها اسمك اللي راح يوصل للمدعوين في عزايمك الخاصه
ورقم جوالك الخاص عشان تستلم ردود المدعوين
وعرف تفاصيل عزايمك بنفسك

بعد التسجيل راح يفتح لك الموقع بشكله الجميل وراح تشوف اخر الاماكن المضافه واخر الصور المضافه
واخر التعليقات على الاماكن والتقييمات عليها
مع العلم انه في حالة اضافتك مكان خاص فيك مثل بيتكم … فهو ما يظهر مع هذي الاماكن بل يبقى خاص فيك انت
وخاص بيوزرك الشخصي لاقامه دعوات ثانيه على نفس المكان لك لوحدك .


(2) المرحله الثانيه بعد التسجيل
هي اقامة مناسبه او عزيمه :

نختار من القائمه

بعدين بيفتح لنا صفحة اختيار المكان
لك حرية اختيار مكان عام من ضمن التصنيفات الموجودهـ
او إنشاء موقعك الخاص .. مثل ما قلنا سابقا .. بيتكم او غيرهـ

انا راح اشرح آلية اختيار مكان مناسبه خاص .. مثل عزيمه ببيتنا
لان اختيار مكان عام سهل .. مجرد كلك على المكان من القائمه او البحث عنه بواسطه الخريطه
بعدين يتبقى الخطوه الاخيره اللي هي المدعوين .. وهذي الخطوه متشابهه في المكان العام او المكان الخاص

راح ابدا بشرح اختيار المكان الخاص .. نختار كما في الصوره :

راح يفتح لنا صفحه خاصه
عن طريقها راح تحدد مكان مناسبتك ..
انا طبعا بحثت عن بيتنا في الخريطه لين لقيته
وحددته .. الخريطه تعطيك اسماء الشوارع وتعطيك خيار التكبير عشان يوضح لك المكان
وبعد كذا كتبت البيانات الخاصه بعزيمتي .. وصف العزيمه وكذا
وتركت مكان الصح فاضي .. لان المكان ( بيتنا ) خاص
ما ابغى يعرفه اعضاء الموقع .. بس ابغى المدعوين يقدرون يشوفونه
وغيرهم لا ..
بعد ما تعبي البيانات تضغط على
( ابدأ الدعوه) ومن هنا يتبقى لنا مرحله واحده وهي تحديد المدعوين ودعوتهم


(3)
تحديد المدعوين ودعوتهم :

ميزه حلوه بالموقع .. انه اذا اضفت صديق جديد لك
يحفظه تلقائيا في قائمة اصدقاءك في حال احتجت تدعوه لعيزمه في وقت ثاني
ويعطيك ايضا فرصه اعداد مجموعات لاصدقاءك وتصنيفهم بنفسك

نرجع لعزيمتنا .. هنا انا اضفت نفسي وباختار من القائمه حقت اصدقائي بعدين نضغط
على ( إرسال العزيمه ) وبعدها خلاص الخطوه الاخيره والجميله


(4) الخطوه الرابعه والاخيره :
ارسال الدعوات آليا للمدعوين اللي اضفناهم او حددناهم ..

نعبي تفاصيل العزيمه
توقيتها والمناسبه والوصف مثل اي كلام تبغى تقوله في الرساله مثل :يا شباب لا تخلونا

واهم نقطه .. في الخيارات الاضافيه
ما تحط صح على ( دعوه عامه ) اذا كانت دعوتك خاصه بمكان خاص

واذا كانت المناسبه بعد كم يوم تقدر تسوي رساله تذكير
توصل للمدعوين
وتقدر بعد تعرف ردود المدعوين على مناسبتك ببساطه

وبعدها تضغط ارسال
وبتروح لجميع المدعوين التفاصيل كامله


الان الكثير يتسائل .. المدعو للعزيمه او المناسبه شلون بيعرف الوصف من الموقع
هل لازم يسجل بالموقع ؟ هل فيه اشياء يحتاج يسويها ؟

ببساااااطه متناهيه .. لا ما يحتاج يسوي اي شي
مجرد انه يدخل الموقع للصفحه الرئيسيه .. بيلقى شي زي كذا :

يدخل عن طريقها رقم جواله ورقم الدعوه اللي وصلته بالرساله
وراح يفتح له الموقع تفاصيل الدعوه .. وموقعها على الخريطه بشكل دقيق وواضح جدا

وبدون اي متطلبات من تسجيل وغيرهـ


اخيراً .. اتمنى اني وفقت في شرح مزايا الموقع الاساسيه ..
والموقع جبار ويحتوي على اكثر من كذا بكثيير جدا
واتمنى دعمه مننا جميعا .. فهو نتاج عمل لتطوير محتوى الانترنت العربي اولا واخيرا
وغايته جميله وهدفه رائع ..

انتظرونا مع ابداعات جديده لأفضل مواقع الـ
العربيهWEB 2.0

أخوكم : عبدالله محمد الدباس


تعليقات 24

  1. السلام عليكم اشلونك اخوي عبدالله ؟ بصراحه الموقع حده اينن ومو طبيعي بس عندي استفسار هالخدمه بس بالسعوديه ولا باي دوله ؟ وشاكره مجهودك 😀

  2. فكرة الموقع ممتاز جداااااا لكن السؤال الرسايل الى ترسل من على حسابه ؟؟ وكيف صاحب الموقع يستفيد بشكل عام من ها الموقع وش فيادة الموقع على صاحبه ( مالكه ) ؟؟؟ الف شكر لك اخوى عبدالله

  3. ايووووه من جد مرررره خطييير هالموووقع ماشالله هذا يثبت انه عندناا شبااااب مخه نظيييف الله يوفقهم ياااارب هذا الموقع كنت اشووفه لما ادخل موقع منتدى جامعه الملك سعود وعجبني كثيييير مشكووور اخووووي عالشرررح ماقصررررت 🙂 وياليت لو تقدر ترسل موضوع عن موقع طلباات http://www.6alabat.com.sa هووووه كمااان موقع يستاااهل الشرررح وللاخ فهد ^^^ الرسائل تكووون مجانييه .. بس كيييف يستفيييد الله اعللم اكيييد من الاعلانااات !!!؟

  4. :$ مشكور يالغالي و الله يجود عليك دنيا و أخرة بس سؤال هل يوجد مدينة غير الرياض و لا هي بس في الرياض

  5. رووووووووووووعه الموقع وفكرته ماخلوا شي بهالنت ،،حتى العزيمه ،،نعزم من بعيد وبالصور بصراحه التكنولوجيا شي خطير والاحلى من هذا كله سعه صدرك وشرحك الوافي للموقع الله يعطيك العافيه ماقصرت

  6. مشكور على المعلومات ولو اني اقترح تعزمنا علشان نتأكد من المزايا أكثر ..:$ بس فيه شيء مهم زي ما ذكرت ان الموقع يطلب معلومات شخصية فما مدى السرية والامان اللي يتمتع فيها الموقع وهل يوجد جهة رسمية تشرف عليه مع الشكر

  7. فيه صفحة للاسئلة المتكررة في الموقع تجاوب على بعض الاسئلة المطروحة .. مثلا التكلفة المالية على الموقع والرسائل مجانية ! يقولون انهم ماراح يرسلون أي رسائل دعائية للمستخدمين إلا بعد اذنهم .. ولكن للآن ما أشوف أي خيار للشيء هذا ! على العموم .. شيء ببلاش ربحه بين 🙂

  8. :$ اجل بكره كلكم معزومين عندي بس كل واحد على حسابه اوكه في تمام الساعه 7 الصباح بعد منتصف الليل هههههههههههه حلو وكلك ذووووووووووق اجل كل يوم لفلف بهالنت جيب مواضيع زي كذاااااخخخخخخخخخخخخ

  9. يعطيك الف عاااافيه ع المعلوومهـ,,8) عن جد موقع مررره حلوو يعني يستفيد منه الكثييييير يعطيك الف عاااافيه اخووي:)

  10. الموقع تحفة فنية رائعه لكن عندي استفسار الحين انا سجلت بعضوية ، وما عجبتني الخدمة أو رغبت في حذف عضويتي. لا يوجد في الموقع أي خاصية لحذف عضوية ، يعني اذا طبيت خلاص طبيت واللي تقدر تسويه فقط تروح لصفحة تحديث معلوماتك وتغيرها كلها لأي شيء. ليش مافيه خاصية حذف عضوية. ؟ بعدين فيه مشكلة عندهم اذا سجلت خروج . يعني الموقع ماعليه بس ملاحظات بسيطة يمكنهم تجاوزها . شكراً

  11. مشششششاء الله راعي الموقع احس انه مبدع ع ها الفكرة الحلوة بس السوال اللي يسدح نفسة الخدمة هذي كلها ببلاش ولا بفلوس اتوقع انها بفلوس ولا مجانية كا بداية بعدين بفلوس

  12. يا رجال لامن بغيت تعزم 00 ارفع الموبايل اللي هو الجوال واكتب رسالة وحدة 00 مثل السلام عليكم أبوي يعزمكم على العشاء ويقول لازم تجون يمنا واللي ما يبي يجي بالطقاق الداعي : صالح ولد أبو خالد 00 اللي بيتنا جمب خباز التميس وبكذا خالصين وش له هالتكاليف كلها 00 ومنهو اللي يعزم بمطعم والا مقهى والا كافي والا منتزه يا رجال عزايمنا إما عند الحلال بالبران 00 والا ذبحية من حراج الغنم ويسوي العزيمة بالبيت 00000000000000000 على العموم مشكور اخوي وما قصرت

  13. الف شكر لك اخي عبدالله على هذا المجهود الجبار واتمنى لك المزيد من التقدم وشكرا لك

  14. شوكرن جزيلا اخي العزيز بس بصراحة مافي مثل على حجاجك اليسار < متحجر 😀 الله يعطيك العافية

  15. موقع رائع بصراحه … والحمد لله تسهيلات أكثر من المتوقع … 😀 شكرا ننتظر جديدك المبدع تحياتي

  16. تراك معزوم عندي اليله في بيتنا الي جمب بيت جيرانا الي عنده زباله وبابه اخظر

  17. اهلين وسهلين ومرحبتين باللي زاروو موزوعي >> بيصفقها عبود >> أصغر عيالك هو :$ أقوول قسم اني لو مآني متعشيه دوبني كان قبلت العزومه >> كويس انك تعشيتي أجل هع تطوووووور يا سبحآن ألله .. شكرا وسهلا

  18. لا يصيرون هم اليهود بعد ! ياخذون أرقامنا سرقةويجمعون فلوس ويقتلون فيها المسلمين 🙁 تراي مدري وش السالفة بس يعني منقهررررررة مااااررررة 🙁

  19. انا سجلت في الموقع بس شكلو الموقع خاص بمدينة الرياض من مطاعم واستراحات وكده افيدوني لاني وانا ادور في المطاعم مالقيت وصف لمطعم في مدينة جدة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ بلييييييييز انتظر الجواب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

عزيمة ياشباب :)

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول