ظلم أمن الطرق والمرور


بسم الله الرحمن الرحيم
السلام عليكم ورحمة الله وبركاته
حبيت أشارككم في موضوعين حصلت لي مع أمن الطرق والمرور


الموضوع الأول
كنت مسافر من جده إلى الطائف
وفي بداية الطريق السريع صادفني شخص ماأقول غير حسبي الله ونعم الوكيل عليه
جاني من اليسار ودخل علي بالسيارة وحك لي الجانب الأيسر من السيارة وتقدم إلى مقدمة السيارة وضغط فرامل فاجأه وخلاني أصدم فيه وماأكتفى عند هذا الحد بل جاء من الجانب الأيمن للسيارة ورمى علي قوارير من زجاج أدت إلى كسر زجاج سيارتي الأيمن
ووالله العظيم ماسويت له شي
وبعدها لقيت دورية أمن طرق على جانب الطريق ووقفت عنده وقلت له السالفه فتجاهلني وصرفني حسبي عليه
وإتصلت بعمليات أمن الطرق ورد علي العسكري اللي في العمليات وقال لي أنتظر أحولك على المسئول وأنتظرت تقريبا ربع ساعه وإنقطع الخط وبعدها وقفت عند دورية أمن طرق ثانية وبلغته بالموضوع كاملا وقال لي خلاص حنا الحين نصدر تعميم ومايصير خاطرك إلا طيب
وبعدها توقفت عند مركز تفتيش لأمن الطرق وقلت لهم فيه بلاغ جاكم على السيارة الفلانيه ؟؟
كل واحد جلس يناظر في الثاني وقالوا ماجانا بلاغ ولاشي
ورحت للعسكري الثاني بنفس نقطة التفتيش وقلت له يإبن الحلال ماجاكم بلاغ لأني مبلغ عمليات أمن الطرق
قال وبكل برود ماجانا شي روح لاتشغلنا
وبعدما ضاعت الحلول وصارت الدنيا في وجهي سوداء لأني مظلوم ولاأحد أنصفني
قلت خليني أدق على عمليات الشرطه يمكن عندهم حل ..
رد علي عسكري الله يجزاه بالخير جدا محترم وأنا ماسلمت عليه ولاشي على طول قلت له ياحكومة تبون تنصفوننا ولاناخذ حقنا بيدنا . قال آمر أخوي عيوني لك قلت الموضوع كذا وكذا وكذا قال الموضوع عند أمن الطرق وحنا مالنا دخل قلت له اللي حصل لي مع أمن الطرق من الظلم قال أبشر بعزك عطني أوصاف السيارة ورقم اللوحه أعطيته المطلوب وبعد تقريبا خمس ثواني قال اللوحه على سيارة ثانية غير اللي قلتها ؟؟ فتعجبت وفي الأخير إكتشفنا إنه مغير لوحة السيارة حسبي عليه
وقال لي أقدر أخدمك في شي ثاني
قلت له بيض الله وجهك
والموضوع ذا له تقريبا أسبوعين وأنا مرتفع ظغطي وحتى الجرايد رفضت تكتب عن ذا الموضوع


الموضوع الثاني
بعد المشكلة الأولى بيومين
كانت سيارتي في التصليح وأخذت سيارة صديقي وأنا ماشي في شارع عام وأتفاجأ بشخص يصدمني بأقوة قوة ويوم نزلت أشوف سيارة صديقي وش جاها تفاجأت باللي صدمني يسب ويبي يضارب يوم قربت منه لقيته سكران
جاني وقال أنت وش تبي هالحين قلت له أبي المرور سكت وراح سيارته وشغلها بكل برود وإنحاش
بعد مابلغت المرور جاني عسكري على دباب وقال لي سلامات قلت له الله يسلمك قال وين اللي صدمك قلت له إنحاش طلبني لوحة سيارته وأعطيته وقال الحقني قسم الحوادث ويوم وصلت للقسم وأعطيتهم أوراقي وإستمارة السيارة قالوا وين صاحب السيارة وللأسف صديقي صاحب السيارة مسافر لمكان بعيد
وقلت لهم صاحب السيارة مسافر بعيد ومايقدر يجي هالحين إنصفوني وبلغوا عن السكران اللي صدمني وبعدين يجيكم صاحب السيارة قالوا لا نبي نحجزك في التوقيف إلى أن يجي صاحب السيارة
وتوقفت في الحجز ثلاث أيام إلى أن جاء صديقي من دبي لأنه كان مسافر للعمل
ولابلغوا عن السكران اللي صدمني ولاشي وأنا ماكودت أطلع حسبي الله عليهم


آسف على الإطاله ولكن من حرة في كبدي من الظلم اللي صاير من بعض الافراد والضباط


تعليقات 60

  1. عندنا وعندك خير كان الله في عونك اخوي الكريم من كثره المواقف اعجز عن ذكرها وما اقول الا حسبي الله ونعم الوكيل عليهم ما ظلموك لوحدك ولكن…………

  2. انا صار لي موقف مثل موقفك الاول في الصيف كنت على خط مكه – جده السريع الا يجي ذاك الشايب المهستر انا صراحة شكيت في وضعه يحد و يسقط من يمين و يجي قدامي و يهدي المشكله ان اهله معاهـ يرمون قوارير على سيارتي انا هديت السرعة و خليته يروح عني ،، منعاً للمشاكل …

  3. الحقيقه اخوي انا اشوف انك مقرود او مسوي ذنب لان فيه اخطاء تحصل لكن لهدرجه وورى بعض انا اقول استغفر ربك وشوف وش مسوي من اذنوب وهذي تكفير هنا على العموم الحمد لله على السلامه وفي الحديد اهون

  4. صراحه قريت موضوعك والمني ما اصابك ولكن ما اقول غير الله ينصرك على الي صدمك+رجال امن الطرق اذا كانو ضلموك كما قرات +رجال الشرطه الي ما جابو لك حقك من السكران اما السجن فالمفروض ما يسجنونك مالم يكون هناك بلاغ على السياره ولكن ياخذون بياناتك ومكان عملك وسكنك في حالة لو كان هناك بلاغ فيما بعد من صاحب السياره (ما انت لحالك)كلنا صارت معنا كذا (ما معك واسطه )اجلس في بيتك هذي حكمة الشعب السعودي

  5. السلام عليكم … الحقيقة أحزنني ما أصابك من حوادث وظلم … لكن لعلها كفارة لك … ويبتلى المؤمن على قدر دينه يجب عليك أخي أن لا تسكت عن الموضوع أبداً … حاول وبكل الأصعده أن ترفع الموضوع للجهات العليا من وزارة الداخلية لكي تأخذ حقك وإذا لم ينفع معك … أكتب خطاب ووجهه للأمير الفاضل سلمان بن عبدالعزيز في أمارة الرياض تبين ماحصل لك كاملاً … وإن شاء الله الأمير ياخذ لك حقك كامل لكن لاتسكت …. لاتسكت …. لاتسكت وأعانك الله وجعل ما أصابك كفارة لذنوبك ورفعه في درجاتك … وأوصيك بقول لا إله إلا أنت سبحانك إني كنت من الظالمين …. أكثر منها وستجد الفرج إن شاء الله تقبل تحياتي … أخوك عمر من الأحساء

  6. السلام عليكم ورحمة الله وبركاته الله يعينك ويفرج عنك .. ويحاسب من كان السبب .. ان شاء الله تهون اخوي تركي هذول ما يسوون كذا الا لأن مافي احد يحاسبهم ويجيب لك الحق منهم … أنا ادرس بأمريكا واداوم الجامعة على سيكل .. ومرة من المرات كنت موقف سيكلي عند مطعم وجا واحد ضربه بالسيارة .. السيكل ما صار له شي .. بس راعي السيارة نزل يعتذر مني وما باقي الا يبوس ايدي .. وقال لي امش اشتري لك سيكل جديد .. انا سامحته وقلت ما حصل الا الخير هو ما سوى كذا الا لأنه يعرف ان يمديني اقاضيه واسحبه على خشمه الى المحكمة واطلع فوق حقي بعد .. لأن في نظام يحمي الشعب ويحاسب المقصرين يعني الى متى هذا الحال .. الشعب يظلم ولا حد حولك من العساكر الخمة اللي كل واحد همه الراتب وغيره ولا شي لا عنده ضمير و لا همته الامانة اللي في رقبته والله الواحد ينقهر لما يشوف البلاد الثانية تتقدم وحنا كل ما جالنا نرجع ورا .. اذا انت ابن البلد ومظلوم بين اهلك وناسك وعلى ارضك بعد … ما اقوول الا اقعد برا ابرك لي … لا حول ولا قوة الا بالله

  7. الله يصبرك أخوي ويعوضك والله شي يرفع الضغط ولو تاخذ حقك بنفسك وتبرد حرتك كان يطلعون لك من تحت الارض ،قصه صارت لزميلي في المكتب بلغ عن سيارتة مسروقه من قدام البيت بحي القدس بالروضة بلغ وبع اسبوعين مر زميله في الملز ويشوف سيارته موقفه في ارض فاضيه وسئل زميله قال هذي لها أسبوعين واقفه وبلغة الشرطة ما عطوني وجه و وقف دوريه وقاله هذي سيارتي مسروقة وبلغت عنها وما فيها شي تغير قاله خلاص خذها ورح للقسم سو كف بلاغ بكل سهولة !!!

  8. والله العضيم حاجه غريبه ياخي بعدين ياخوي انت احد داعي عليك وش هالمصايب اللي ورا بعض وبعدين ذالاوادم مهم اوادم هذولا طبقوا المثل اللي يقول جبتك يامداوي ابيك تداوي صرت يامداوي تبي مداوي العيون الساهره الله يخلف

  9. أخوي الكريم.. والله العظيم ان هذا اللي ذكرته غيض من فيض مما يحدث في هذه البلاد، ومع الأسف يتفاقم الظلم والفساد ولا حياة لمن تنادي.. من يصدق أن لدينا أكبر احتياطي نفطي ونحن نعيش هذا التخلف في وسط من المعمعة والمحسوبيات والرشاوي والفقر ..

  10. حسبي الله عليهم بعضهم مايقوم بالواجب زي ما هو مطلوب منه بس عليك بالدعاء عليهم والظلم ظلمات يوم القيامه ولا تخاف ربك بيحاسب كل واحد وريح بالك

  11. ليتك تشوف التفتيش اللي على طريق الرياض الخرج يعاملونك معاملة السجين ويبهذلونك بهذله ما بعدها بهذله وكنك رايح لجنيف مو الخرج حسبي الله عليهم ونعم الوكيل….كنهم دافعين من جيوبهم حق الطريق

  12. ياعزيزي من يقرا كلامك يعرف المبالغة فيه.. واذا رفضت الجرايد تنشره، هذا من لأن اللي كاتبه قد يكون فيه من الصحة الشيء القليل لكن غير مقنع.. وعساك ع القوة والله يعينك على مصيبتك

  13. ياسلالالالالام على الام عندنا والله شي اصلا من اول وهم قاهريني انا حرمه وجي لراعي المرور واشتكي من واحد متحرش بي ومسوي اشياء قذره زي وجهه تدرون وش قال لي قال روحي معنا عشان تسوين محضر وين اروح انا حرمه اركب مع رجال لامحرم مي ولا شي ويم قلت لا مانيب رايحه انتم تكفون قال وينه قلت شفه اشرت عليه هو كان يمشي بعدي ويم مسكوه وركبوه معهم وتعدني شوي الا ينزلونه بالله عليكم هذا ش اسوي فيهم الله لايوفقهم لادنيا ولا اخره الله يسلط عليهم

  14. حتى انا … مره طالع أجيب عشاء لأهلي … واحد معه كامري دخل على بالمخرج غصب … بعني انا جاي وهو كان واقف ..يوم وصلت عنده مشى ولا همه احد .. انا تفاجأت بالموقف وأبعدت عنه ودقشت لي واحد معه اودي … المهم انا على طول وقفت … وراعي الكامري قاعد اكبس له … ولا وقف اخذت لوحته يوم جت الدوريات عطيتهم اللوحه قال وش تبي انت … هو انحاش من وين اجيبه لك .. انت اللي مخطيء … قلت له ياخي انا أقولك هذا دخل على واذا مانتب مصدق أسئل اللي صدمته … قال طيب راح سئله وقال له ايه … وجاك العسكري قال لا الخطأ عليك … قلت له حسبي الله ونعم الوكيل

  15. السلام عليكم ورحمة الله وبركاته اخوووي كلامك خيالي ولا يمكن يتصدق معقوووله فيه هذي الامووور والحكوومه ساكته يمكن يكوون فيه شوي من الصدق وبهرت انت الباااقي… على العموووم هذي وجهة نظر ولا اعتقد انك بتخذ بخاطرك علي يالغالي .. اختلاف في الود ا يفسد القضيه

  16. الله يكون في عونك وانشاء الله تاخذ حقك منهم في الاخرة … … ناس تجيب الهم …

  17. اخ تركي للاسف هذا الحال في كل مجال وفي كل مكان …. اهمال تسيب ما في حس بالمسئوليه والاهم من ذا كله ما في لا حسيب ولا رقيب لا تستغرب يجي يوم وكل واحد ياخذ حقه بيده… الله يصبرك … ومره ثانيه وعشان تكسب راحه البال اي مشكله قله لا عاد تعودهاا ههههههههه والمسامح كريم

  18. تركي كيفك ………الله يعينك وانا اخوك انا ابوي كسرو قزازة سيارته وسرقو جواله والاستبنه لا وين محل السرقه عند الاداره العامه للجوازات……شفت ميت قلب الي سرق وماعنده خوف حسبي الله عليهم ونعم الوكيل

  19. الله ينصرك اخوي ويعينك u r n saudi arabia it happen بالعربي انت بالسعوديه تصير عادي هههههههههههه الله يعينا بس

  20. بالنسبه لأمن الطرق مالهم حق والمرفوض تاخذ اسماء العسكر الي رفضوا يساعدوك وخاصه اللي يقول لا تشغلنا لأنك انت شغلته وماوجد في نصف الطريق إلا على شانك يمكن مع الاحداث الي صارت (الارهاب) تغيروا لكن اذكر موقف لي مع امن الطرق والشهاده انهم كفوا وقائمين بواجبهم حيث تعطلت سيارتي واسعفوني وجابو لي سطحه وايضا يستفسرون لك عن السعر خوفا من طمع اصحاب السطحات لأنه امن الطرق يعرف اسعارهم لكن لا تعمم على الجميع فيه ناس قائمه بواجبها على اكمل وجه والخطأ خطأك لو اخذت اسم العسكري الي رفض مساعدتك وتقدمت بشكوى ضده اما بالنسبه للمرور المرفوض يكون معك تفويض من صاحب السياره احيانا تلقى شباب يسوقون سيارت والديهم واخوانهم ويطلعون سارقين السياره من اقربائهم يعني الطاحل يخرب على الصالح .. اللهم ادم على هذه البلاد عزها وأمنها..

  21. عاااااااااااااادي انت بالسعوديه ياعزيزي زين مادام محد دخل عليك بالبيت وانت نايم فانت بخير.

  22. لما ريت رجال الشرطة في الدول الاروبية من انهم غير مسلمين الا يتعامل معنا بكل احترام ولكن للاسف عندنا غير ويا حبهم في ظلم الناس في القسائم من غير سبب هذا اذا مارحت تجديد استمارة او رخصة وحصلت قسائم من وين جت ماتدري

  23. شوف يا صويحبي ..أنا بس قريت اللي صار إرتفع ضغطي و صدقني يا ولد الناس كدا أنا ما عندي أي امل إن أي شي ينصلح …إذا كان الحق يقع على المظلوم شو اللي باقي عاد؟؟ الله يكون في عونك و عون أمثالك

  24. اخوي تيركي لا يضيق صدرك ترا انت مو اول واحد يصير معه كذا صارت قصه اشين من قصتك بالف مره لو اقولها محد صدق واسف على اللي حصلك اخوك عبداللطيف

  25. والله ياصديقي لاتزعل ولا يرتفع ضغطك كلنا بالهوى سوا يعني هذا الموضوع موجود والحمد لله في كل الدول العربية بدون استثناء يمكن عندكم أخف لأنو يمكن عنا يحطوا الحق عليك وتروح فيها 3 سنوات

  26. السلام عليكم الله يعينك أخوي ويعوضك خير من جد ماأدري وش أقووول أتكلم عن السرقات ولا عن الفوضى الي في كل مكان عموما الي صار لك جزء من هالفوضى المنتشرة عندنا الله يعدل الوضع بس

  27. لو ذهبت الى الاردن عن طريق معان بعد كل 25 كيلو امن الطرق ويقفون في الشارع وليس في الغررررفه بلوووت ((( عقوول متحجررره ))) لايردون العمل

  28. الله يعينك والله الظاهر أمك داعيةٍ عليك كل هالمشاكل تطيح على راسك مرة وحدة الله لا يبلانا (( عجيبة ))

  29. يقول [email protected]:

    أنا صار لي نفس الشيء و أنا رايح من جدة لمكة و اللي زاد قهري إنه قليل أدب مرة لدرجة إنه أهانني فما مسكت نفسي إلا و أنا غاسلة على الإسفلت و تسببت في سجنه و عقوبته لما روحت إشتكيت عليه في قيادة أمن الطرق الواقعة في شارع السبعين في جدة و أي واحد قليل أدب ولا فيه أي شيء والله لو إشتكيتوه غير يتووبوا تاني مرة من حركاتهم هذه. و بالتوفيق

  30. ولله اخوي حاس بضلم الى صادك وطاش ما طاش ماقصرو في دي السالفه وثانيا الحكومة تاخد وما تعطي وهي شعارها العكس فاحسن شي الواحد ياخد حقه بيده وخلاص :@ ولله يعينك اخوي

  31. المفروووض انك ما كتبت هالموضوع لاني صايرة لي بقريبا نفس السالفة فقعدت التحسر علي وعليك وما أقول الا الله يكون في عونك

  32. اسال سوال هذي كل المشاكل الحصل انت مالك ذنب اشك في ذالك يمكن امن الطرق اتفق معاك اما المرور هذي عملهم يعني سياره موسيارت وش توقع

  33. والله لو انك مسرع كل واحد منهم يجيك طاير عشان يبي يصير اول واحد يعطيك مخالفه بس هذا اللي جيدين فيه هذا اللي نستفيده من امن الطرق ولا غيره ماعندهم ماعند جدتي والله يعينك يااخوي

  34. الله يكون في عونك ولا يريك وايانا مكروه والله هذه مشكلة كثير من شعبنا وما يرونه من امن الطرق والمرور ومن عساكرنا الغير مراعين لامن مملكتنا بقيادة خادم الحرمين الشريفين وولي عهده ووزير الداخلية لله يطول اعمارهم وخليهم لنا وهذه العساكر قله من عساكرنا والبقية والله والنعم بهم بس هذه الحثاله هم من خربو سمعة العسكر

  35. أنا أعتقد ان ما فيه حل أسلم من أن نجلب قوة من الأمم المتحدة لحفظ الأمن في هذه البلاد، بدون مبالغة، فالقصص كثيرة و القصة التي شهدتها بعيني لن أرويها لكم لأني إن فعلت ستعتقدوا أنني من مبدعي سيناريوهات أفلام الأكشن في هوليود. و لي أيضا تعليق على تعليق الأخ أبو أسيل، بصراحة صراحتك تستدعي الكشف العاجل على رأسك لاكتشاف مالذي يقبع وسط هذه الجمجمة التي تفتقت عن هذه الفكرة.

  36. أنا من رأيي تكتب القصة لعبدالله وناصر أبطال طاش والله أنهم يشرشحونهم لك لين تبرد كبدك

  37. ما اقول الا الله يكون في عونك قسم بالله ذكرتني مره بطلع خوي لي في الناصريه عاد انا يقال لك فزعه بعطيه ورقه والجوال علشان يكلم اهله الا والشرطي قال وهو يناضرني بأستحقار شكلك تبي تدخل معه قلت ياابن الحلال الرجال عنده سكر وضغط اخاف يجيه شي واهل ما يدرون وين اراضيه قال اقلب وجهك قسم بالله لأدخلك معاه يالله وصوته مثل صوت الحمار اعزكم الله الصراحه مشيت من هناك وقلت لو عرضت علي اني اكون ملازم ما راح افوتها بس علشان اجي اتفل في وجه هذا الحقير واشكاله الي ما يحترمون الناس الله لا يوفقهم ويفكنا منهم

  38. هههههههههههه والله مهازل لكن مالك الا تاخذ حقكك بقوة العين ان لم تكن ذئبا اكلتك السباعوا

  39. السلام عليكم ورحمة الله وبركاته شوف اخي الكريم امن الطرق انا واحد من الناس معاني منهم لانهم مسرع ما يتبلو على الناس اكلة منهم مخالفه زورا وبهتانا وهي سرعه ويوم جيت اسدد القسيمه لقيتها سرعه وتفحيط وعلما انو السياره اللي كانت معاي ما في امل انها اتفحط لاكن وش اسوي دبرت واسطه وسددة القسيمه لانو عليها حجز الله ينتقم من العسكري اللي كتبها وشكرا

  40. واااااو ارتفع عندي الضغط من موضوعك .. من جد شي يقهررررر .. حسبي الله عليهم .. والمشكلة هم الكل فـ الكل ماتقدر تشكي عليهم 🙁 ما اقول الا الحمد لله .. الحمد لله .. الحمد لله اننا مانســــــــــــــــــــــــــــــــــوق !!

  41. السلام عليكم ياخوي حنا في غابه إذا ما أخذت حقك بيدك مافيه أحد بينفعك والطيبه الزايده وأنك تمشي على القانون ما تأكل عيش في مملكتنا الحبيه وراح تعيش وتأكل غيرها إذا كنت ماشي جنب الحيط

  42. أخي … أنا عانيت من المرور كثير وفي حوادث متفرق ولم آخذ حقي إلا في حادث واحد لا وبالواسطة بعد .. على العموم هناك قاعدة عرييييضة تقول { من أمن العقوبة أســـــاء الأدب} فلا تستغرب من شيء لأنهم في الأخير كلهم ربع وأصحاب ( ومن لع رفيق يرفق له) ولا أزيد…

  43. ما تشوف شر اخوي وطبعا دي تير واجد في السعوديه …وتالي العالم يحسدنا على البترول المهم الحل انك تشتكي عند ديوان المظالم او انك ترسل القصة الى اسرة مسلسل طاش ما طاش يمكن ينشروها لعل وعسى

  44. بالصراااحه امن الطرق او المرور ماهم على قد مسؤليااتهم وغير كذا يظلمون الناس بالمخالفات ؟؟! الله يكون في عونكم ياشبااب وحاولو تبتعدون على المشاكل وبخصوص الحاوادث تأكدو ان بعض السائقين ليس لهم درايه بالقياده الصحيحه والسليمه وكما اخوي ياجه مشاكل مثل هذا بس الى متى ياالمروور هذا الاستهتااار انتم عليكم مسؤليه وكونو على قد هالمسؤاليه اعانك الله اخ تركي وانا مقهووره من هذا الاستهتار

  45. هذا الوقت توقع اي شي ياناس كسرو قزاز سيارة الوالد ومسكنا الحرامي ولنا رحنا نراجع القسم عشان يعطينا الحرامي تعويض لقيمة زجاج السياره الضابط قال للوالد سيارتك موجوده باقي ما انشالت قله ايوه قله قزاز السياره عوضك على الله يعني زي ماقالو بعض الاخوان خذ حقك بيدك والي يصير يصير وما اقول غير حسبنا الله ونعم الوكيل

  46. مااقدر اقول الا حسبي الله عليهم ونعم الوكيييييل وربي ينتقم لك منهم ,,,

  47. صراااااحه معك كلل الحققق انا انقهرررت اجل وشلوون انت اشوااا انا حنا ما نسووووق بس تتوقع لو سقنا بيسووون فينا كذا مممممممممم ماااااا اظن 😀 يعني لو تجي مره وتشتكي لهم من وااحد خدش سيارتها باظفره كااان لعنووو خييييييييره ههههههههههه

  48. متى صحيت من النوم اكيد هذه الكوابيس تجيك بالليل والصبح تقول حصلي وحصلي عموما نام واتغطى كويس . معاك عمليات امن النائمين يالحبيب

  49. ياسيد إللي رأسه عندك آخره عند كل مواطن ومقيم ما غير نقول ما قلته حسبي الله ونعم الوكيل والله يعين أبو متعب على هذه البطانه

  50. اصلا رجال الأمن والمرور هم سبب الفوضى المرورية وانعدام الأمن لعدم قيامهم بعملهم واهمالهم الا من رحم ربي الله يعيننا بس

  51. اخي وعزيزي ., لا تسكت عن حقك في الموضوعين .. كل السافلين المتسيبين الي قابلتهم تقدر تاخذ حقك بالقانون ..وتحت ضل قيادتنا.., عزيزي انت قد تتعب قليلا .. ولاكن احتسب الاجر فإن في معاقبة المقصرين خير لهذا البلد واهله .., . . ماضاع حق ورا مطالب .. وفقك الله وارجوا ان تخبرنا بكل جديد يخص الموضوع.

  52. عادي حبيبي انا دفعت 50% من قيمة اصلاح سيارة صدمت بالرصيف وقالوا لي اني صدمته والله يشهد اني ماصدمته ولا حتى لمسته لا من بعيد ولا من قريب بس عادي حبايبنا بالمرور اذا مايعملوا كذا من وين يقدروا يسيطروا على الطريق ومن وين لهم دخل غير كذا تحياتي لكم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ظلم أمن الطرق والمرور

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول