صور + فيديو : رحلتي الى نيويورك


السلام عليكم و رحمة الله و بركاته

موضوعي اليوم عن رحلتي لـ نيويورك والي مدتها 4 ايام وان شاء الله تعجبكم الصور

الرحله من سان فرانسيسكو الى نيويورك

خمس ساعات ونص

حبيت اصور المنظر هذا الثلج فوق الجبال
اتوقع انها ولاية كولارادو

طبعاً اليوم الاول ماسوينا شي لان وصلنا بليل ومكسرين ومافيه الا جلسه بالفندق ونوم
الان مع صور اليوم الثاني وكانت تمشيه بين شوارع نيويورك والمباني و التايم سكوير

المبنى الطويل اللي ورى , اسـمه
Empire State Building
مبنى مشهور ومثلو فيه بالافلام القديمه خصوصاً فلم King Kong
والى الان يمثلون فيه
راح تكون فيه صور من الداخل والاعلى بعد قليل
هذي صوره له من تحته مباشره

هذا مبنى عجبني تصميمه

اللي ورى مبنى الساعه بس الشجر مغطي عليه من مكاني ..
لو تلاحظون بالصوره او الصور الباقيه .. تكاسي بكثره
الظاهر نيويورك المدينه الي فيها التكاسي اكثر من السيارات العاديه
يعني لا تستغربون لا شفتو شارع كله تكاسي وولا حادث بين تكاسي

الان مع التايم سكوير

عجبني شعار ماك

محل M&M'S

No Comment

مدري الى متى وهم يلعبون باللغه
اقرو من اليسار لليمين


* —- *

اليوم الثالث كان بين Empire State Building & Statue of Liberty & Wall Street
طبعاً الوول ستريت و الستيت اوف ليبرتي كلهم جنب بعض .. مشي يعني
ومكان الهلكوبتر برضو جنبهم
Wall Street و الشوارع الي جنبه

هذا افغاني . امه من مكه مدري الطائف ,, نسيت
بس عليه شاورما مسّكته

المبنى الي قدامنا بعد ماقربت له طلع شكله كنيسه ومقابر

هذا حق ريد بول .. قبل فتره منتشر بالنت ماتوقعت اني بصادفه

وهنا احد دورات المياه تفاجئة ان الشاشات داخل المرايات نفسها
شغل غريب ومتعوب عليه بصراحه بس مدري وش هالفسقه الزايده
كل من شاف الصوره حسب ان الشاشات عالجدار و المرايات عاكسه ..
وبالحقيقه الشاشات داخل المرايات

وحنى بالسعوديه مازلنا نخرب الممتلكات العامه وياقلب لاتحزن

هذولي من بعيد حسبتهم ناس حقيقيين بس مصنمين نفسهم << تعقدت خخ كل ماشفت واحد تحسبه صنم الا شوي ويتحرك

الهليكوبتر افضل تجـربه
الجوله كانت على منهاتن + تمثال الحريه + جسور بريكلي << اعتقد

من داخل

صورة المدينه من فوق

هنا فيديو للهلكوبتر ^_^

بعدها طلعنا الى امبير ستيت بيلدنق

طبعا كان ودي جاي من الصباح عشان المنظر بس وقتنا راح بين الاماكن الاخرى لكن كان وقتهاا كان المغرب << توها مغربه الشمس


..

على طريق رجعتي للفندق صادفة مبنى شركة ابل ..
الي قبل فتره انتشرت له صور عالايميل قبل افتتاحه وكان مغطى بالاسود و العالم طارت بالعجه
وقالو انهم يقصدون الكعبه << مازال التخلف ماشي
اخذت له صورتين بالكاميرا العاديه و بليل << اعتذر على رداءة الصور

بس شكله خالع .. تدخل تنزل تحت بالدرج او الاصنصير ,,
*–*

اليوم الرابع والاخير كان رجعتنا لسان فرانسيسكو ..
وانتظار 5 ساعات بالمطار على الرحله الثانيه .. لان الاولى اقلعت << الاخ ساحبها نومه
خط العوده


———–

هنا صوور قاعد اصورها وانا بالكافي وابي رايكم *_^

هذا الكافي قريب من شارع Wall Street

وصلى الله على نبينا محمد
انتهى


تابعوا جديد شبكة أبونواف على فيس بوك وتويتر

   


تعليقات 39

  1. مششالله عليكم رحلة موفقه مششكلة أمريكا مو من ضمن طموحاتي السفرية :~ بسس صورك تششجع خصواصاً ميدانالتايم سكوير :>

  2. متابعك من زمان يابدر انت خير مثال للشاب المبتعث اللي يستغل الابتعاث خير استغلال:$ تقرير مميز وامنيتي ازور نيويورك واصل يابطل

  3. هلا اخوي بدر تقرير رائ والله يعطيك العافيه .. انا من سكان Santa Cruz ,CA وبإذن الله بزور NY بعد

  4. الحمد لله على سلامتك انا ناوي زياره لنيويورك عشان كذا حاب استفسر عن بعض المعلومات اذا ماعندك مشاكل 1- هل مانت لاربع ايام كافيه على نيويورك ولا تتحس ان فيه اشاء مالحقة تزورها 2- كيف وضع السكن وكم الاسعار وفين سكن 3- ايش وضع الهالكوبتر وكيف وحجزتها وبكم واذا فيه موقع للشركة يكون حلو وشويت معلومات عن الهالكوبتر لان اول مره اسمع عنها ولله يعطيك العافيه

  5. انا ودي ومنى عيني اروح لامريكا بس اشكوا لله لو ابوي راعي فلوس كان رحت ودي لو نص يوم راضي شوي بس انزل وارجع بس ودي اروح مافيه احد ياخذني معها اشيل الشنط بس عادي:$ ربي ترزقني وروحو لو شوي راضي

  6. هلا أخوي بدر .. أنت طلبت رأينا في الصور .. الصورة الأولى والثانية تقريباً نفس الصورة .. أقصد الزاوية والجو .. في الصورة الأولى أعجبني إنك عطيتنا المكتوب في الكوب .. بس المنديلين اللي على الطاولة لو شلتهم بتكون أفضل .. ويد خويّك بعد .. والبوك . والجاكيت .. والشي الأصفر هذا .. الخلفية لو كانت شي سادة .. أو شي يدلّ على اسم الكوفي مثل الصورة الرابعة مثلاً .. بيكون أفضل .. الصورة الثالثة حلوة .. الزاوية حلوة .. والمنديل له معنى .. الصورة الرابعة برضو حلوة .. بس لو بيّنت الحروف كلها .. نقد أتمنى يفيدك .. وأنت ما شاء الله عليك واضح تحب التصوير .. موفق ..

  7. ماشاء الله عليك، تقرير رائع وتصويرك اروع فعلا أنك خبير وفقكم الله وثبتكم والسلام

  8. اولا الحمدلله على السلامه انا رايح ان شاءالله هناك قريب ممكن اذا ما عليك امر ابغى عناوين: 1: المطل اللي على المدينه وكم سعره 2: الهوليكبتر وكم سعره 3: الافغاني :$ 😀

  9. يعطيك العافيه.. ما اقدر اقول يحظك عشان ماتقول بنحسدك ولاكن بجد بتقريرك هذا راح يعطينا حافز وبقوة عشان نزور نيويورك وتسلم الايادي على هالصور الجميع

  10. رحله موفقه بس كنت اتمنى التعليق يكون على كل صوره ويكون تعليق شامل عشان نفهم اكثر واتمنى لكم التوفيق ولا تنسوا احفظ الله يحفضك

  11. نفس السوال اللي ساله الاخ اللي قدام وش شغلتها تفاجات لما شفتها تصور…..؟؟ بس احلى شيء عجبني الــ ام اند ام ز بسالك نفس طعم اللي عندنا والا تختلف رهييييييب وايفون تدري توي اعرف عن الاشاعه اللي انتشرت

  12. ما شاء الله عندهم التايم سكوير وعندنا منفوحة سكوير 😀 ونا كنت أحسب شارع التحلية شي ثاني ،، أثاريه خرطي هههههه تقريرك بطل ! تدري وش معنى بطل !! الله يعطيك ألف عافية وبصراحة شي يقهر أني أشوف زي هالأشياء وبنفس الوقت أتذكر أن ما عمري عديت كبري خريص .. يالله الله يهنيك .. بس ما قلت لي .. الاراضي بكم في نيويورك ؟>> ترى يتهور الله يقدرني وأقضي شهر العسل هناك قولوا آمين وإذا ماكتب الله ،، الطايف أحلى وأحلى :D:D مشكور أخوي على تقريرك الرائع ولا تحرمنا جديدك !

  13. تسلم ياخوي ع البحث جزاك الله خير خليتنا نسافر واحنا على سطح المكتب الله يحفظك ويرجعك لأهلك بالسلامه

  14. ماشاء الله عليك رحلة موفقة بس يالتني:D معك تقرير رائع وبالتوفيق ان شاء الله

  15. حضارتهم قائمة على (البترول) البترول هنا … وآثاره هناك !! لا يغرنك تقلب الذين كفروا بالبلاد .. متاع قليل ثم مأواهم جهنم وبئس المهاد !

  16. بصراحه تقرير رائع وتبدو كثيرة الزحام وانها فعلا المدينة التى لا تنام اكشن أكشن

  17. نسيت اقول لك ما تعرف مطعم اليمني السعيد هذا مطعم حلو وفيه في الشوارع مصريين يبيعو هات دوق!______!

  18. سسلام علييك يا بدر .. ابدعت بالتقرير .. ويا لبى نيويورك <3 عندي كم سوال وكلها تتعلق بالميزانية 😛 الفندق اللي سكنت فيه كم ستار ؟ وكم سعر الليله ؟ الهيلكوبتر بكم دولار اخذتموها ؟ وكم دقيقه جلستم بالجو ؟ اخيرا كم كلفتك الرحلة من الى ؟ مع الرحلات من والى سان فرانسسكو ؟ وبس ويعطيك العافيه 😀

  19. ماشاء الله صور حلوه صراحه مواقع وجوء وكاميرا كلهن ماشاء الله تمام يعطيك العافيه وانت استغليت الفرصه اتمنى لك التوفي

  20. رحلتك دي حلوة وجميلة، كنت بسمع عن نيويورك وها أنا شفتها من خلال صورك، في الحقيقة مبانيهم متقنة وفيها هندسة معمارية مختلفة تماما عن المبا ني في باقي العالم لا من حيث الديكور و لا التصميم…رحلتك دامت أربعة أيام…بس في نظري ما بتكفي حتى أسبوع لزيارة أمريكا…ههه

  21. shada هلا فيكـ ,, امريكا مدينة الاحلام اما التايم سكوير قصه لحاله ياهلا وسهلا فيكـ ,, ——– ابو سلطان لي الشرف والله هههههه افا عليك لازم نستغل الشي قبل لا يروح 😛 وان شاء الله تزورها قريب ——- Saud altamimi هلا بولد العم والجار 😀 ان شاء الله يارب عاد ارفق لنا تقرير عن الرحله ——– ترووك لا هذي زينا جايه تاخذ جوله ——- bsom الله يعافيك الروعه حضورك والله يسلمك —— Ibrahim الله يسلمك بالنسبه للمده اتوقع اسبوع بالكثير كافيه فيه مكان مازرته للاسف الي هو متحف الشموع اتوقع كان يمديني عليه لكن للاسف نسيت ازوره بس اسبوع كافيه و زياده حسب وجهة نظري بالنسبه للسكن انا حجزت من النت تذاكر الطياره مع الفندق 3 نجوم طلع علي الحساب للشخص الواحد 670 دولار 3 نجوم وكانه 5 نجوم مره فخـم ومكانه كويس بالنسبه للهليكوبتر تلقاها عند شارع ساوث فيري قريبه من تمثال الحريه لا رحت هناك بتحصل ناس لابسين جاكيتات خضر و حمر وبتشوفهم وموقعهم مدري اذا مسموح انزله هنا ولا لا بس ماراح تضيعهم لو رحت ذيك المنطقه واذا رحت هناك بيعطونك عرووض وكذا انا اخذت عرض 10 دقايق بـ 168 دولار عاد مدري يمكن تتغير اسعارهم اما الهليكوبتر ابد تروح لمكانهم بالساوث فيري وغالبا مايكون عليها زحمه بيعطيك نبذه على الاماكن الي بيروح لها جسور بروكلي ايطاليا تاون تمثال الحريه منهاتن وكم شغله ثانيه

  22. مشاء الله عليك مافيه مكان بنييورك الا مريت عليه لابغيت اروح باخذك معاي يسلمك ربي على الرحله الممتعه وعلى الصور الحلوه تقبل مروري

  23. عبدالعزيز من يدري يمكن تجي لامريكا انا ماكنت متوقع اني اجي امريكا صراحةً ^_^ ياهلا وسهلا فيكـ ,, — fahad تقصد تمثال الثور ؟؟ ريد بول ولا وش 😀 — غـدير هلابك .. يعطيك العافيه على الانتقادات الهادفه بالنسبه للصوره الي فيها الكيس الاصفر والبوك كانتت وقتها تجريب وعجبتني الصوره بس مادققت كثير عالخلفيه 😀 لكن مشكوره على الملاحظات ^_^ — هدهد الله يعافيك مشكور على الاطراء والله يثبت الجميع حياك — othman حياك اخـوي 1 – اي مطل تقصد ؟ 2 – الهليكوبتر 168 دولار لعشر دقايق 3 – ماهو بعيد عن الهليكوبتر 😀 بس لا تبثرونه 😛 — Arafat Alhetar الله يعافيك ويخليك .. ماقصرت =) — مرايم الروعه حضورك .. — جزاكـ الله خيـر وان شاء الله بالتغطيات الثانيه راح نزيد التفاصيل مشكوره على الملاحظه — Maybe Not هذي هي وخويتها عجز سواح من روسيا يصورون .. مو من طاقم الطياره .. بالنسبه للطعم .. تقريبا مافيه فرق بس تحسين انه طازج اكثر 😀 من المصنع على طول اي بالنسبه مبنى شركة اي فون وغيره العرب ياحبهم لتفسير كل شي على كيفهم حياك اختي — البطحا سكوير هههههههههههههه تشوف انت والله فرق الارض عن السما البطل حضورك وان شاء الله تسير عليهم من يدري *_^ وان شاء الله شهر العسل تقضيه هنا 😀 — عمر الغيثي الله يسلمك ويخليك ويحفظ الجميع يارب وهذا هو المطلوب احطكم بوسط الحدث *_^ — نايف العنقري ان شاء الله الجايات اكثر 😀 — ابو عمر بس تعتبر هذي مشكله فينا دام البترول هنا واثاره هناك مو منهم هم عرفو يتصرفون فيه وحنى اهله ماعرفناله ^_^ حياك الله — خيط وسناره فعلا نيويورك مدينه شغاله على طووول — abdullah لا والله دخلت على مطعم لبناني هناك و بالنسبه للمصريين لقيتهم كثير وشريت منهم برضو والعرب هناك بكثر بس المطعم اليمني اكل منه بسان فرانسيسكو 😀

  24. yousef وعليكم السلام حياك ااخووي الفندق الي سكنته 3 نجوم بس تشوفه بمثابة 5 نجوم .. يعني مره كويس وبالنسبه لسعر الفندق مممممممم ما اذكر بالضبط لاني حاجز الرحله من النت رحلة الطياره السكن طلعت علي بـ 670 للشخص الواحد وللايام الاربعه كلها الهليكوبتر 168 دولار = 10 دقايق والرحله كلفتني 1300 الى 1400 دولار وتعتمد على حسب صرفك ومشترياتك وعندك مبنى الامبير بيلدنق الي حاط صورته فوق .. تشوف نيويورك هذا قيمته بـ 51 دولار والله يعافيكـ ,, — ساكن لوول الله يهديكـ تراها عجوز 😛 — لا اله الا الله الله يعافيك .. واكيد لزوم استغلال الفرص ماتجي مرتين 😀 — nejjara11 من جدد المباني عندهم شكل فضيع وشكل كل مهندس يتفنن بتصميم المبنى حقه كان ودي اطولها لكن وقت دراستي راح تبداء ولا عندي اكثر من الاربع ايام ذي ياهلا فيك وباهل المغرب

  25. الله يعطيك العافية فعلا حسيت اني هناك اتمنى يجي اليوم الي اروح فيه لامريكا شي رووووووووووووووعة -تحياتي –

  26. :$الى الامام ياخوووي ماشاء الله علييييك صور حلووه ومجهود طيب ولا يغرك بعض الردود خصوصااالي يدققوون بشي تافه مثل المنديل مدري ايش لا علييييييييييك صورك روعه واول مره يمر علي موضوع مثل هذا :ومجهود تشكرعليييييه واعذروني على الاطاله: @@ وجة نظرB

  27. طارق الدخيل .. الله يعافيك ويخليك ابد ابشر بس محفول مكفول هاه :$ شموخ .. الله يعافيك .. ان شاء الله يجي هاليوم … نونا نور .. العفو والله يسلمك ويعافيك =)

  28. فيصل تسلم وماقصرت لا ماعليك الانتقاد الهادف لا بئس به ومشكور على اطراءك

  29. يسلموا لكن ماتعرف اسم شركة الهالكوبتر بدورهم بالنت ممكن القالها موقع عشان احجز من بدري ولا امسك سرى مع العالم السكن كان بالداون تاون ولا بعيد منه

  30. ابراهيم شركة الهليكوبتر اسمها ZAP ابحث عن الهليكوبتر بنيويورك وبتحصله ولا تخاف مافيه زحمه مره عليه و السكن كان يعني يمكن 10 الى 15 دقيقه مشي m-s العفو وحياك الله ..

  31. بسم الله الرحمن الرحيم (( والذين في أموالهم حق معلوم للسائل والمحروم )) أما كان الأجدر بك أن تنفق ماانفقته على رحلتك هذه على الفقراء والمحتاجين ف بلادنا الأسلامية تعج بهم وتضج عسى الله ان يوفقك لكل خير

  32. جزاك الله خير اخوي على كلامك و حرصك لكن الله يهديك من كلامك جزمت اني جالس العب بالفلوس والي يشوف ان المبلغ المصروف بالمليارات و تبذير في تبذير … ماتقدر تجزم لين تشوف بعدين انا جاي في بعثه دراسيه ومنها رحلات في وقت الاجازات يعني ياليت مانتسرع ونقول اي شي .. لان بردك هذاا كانك تقول اني ما اتبرع ولا شي وفوق هذا العب بالفلوس .. الله يهدينا وياك بس ومشكور على حرصك

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صور + فيديو : رحلتي الى نيويورك

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول