صور : حملة نبي ثياب كروهات


السلام عليكم ورحمة الله وبركاته

أحبائي / .. سوري طولت عليكم الفترة إللي فاتت وما كتبت شيء جديد .. لكن اعذروني لأني في الحقيقة كنت لاهي أفتح الهدايا عقب
حفلة التخرج وهه توني خلصت / ( الحفلة لها شهر مخلصة يا نصاب /) .. لا عاد تبون الصراحة ؟! ..الصراحة هي أن بالي كان منشغل في موضوع مهم صار له فترة وهو محيرني ومأرق مضجعي .. صحيح هو موضوع خاص شوي لكن راح أشاركم فيه , وإللي هو ليه دايم أول ما نفتح علبة الماكنتوش نتهاوش كلنا على الحلاوة البنفسجية /؟! ليه ليه /؟! <<– واضح أنه ولا مرة لحق عليها /

أممم الصراحة هذا مهوب الموضوع الوحيد إللي محيرني ومأرق مضجعي بعد / ( أنفع أطلع سالي على هالدلع /) أنا حالياً الحين محتار وما أدري هل إللي فيني طفاقة زايدة أو هل هي عين ما صلت على النبي – صلى الله عليه وسلم – أو أن الشغالة حقتنا مسويه لي سحر /؟! ( أستهلكت كل تصريفات العجز / ) الحاصل يا أخوان هو إني منذ نعومة أظافري وإلى يومنا هذا وأنا ما عمري كملت أي شراب أو أكل بدون ما ينكب شوي على ثوبي ويتوصخ /

/

أحم أحم .. ياليت تركزون على البقع اللي في الثوب ولاتخلون ابتسامتي الساحرة وشكلي الحلو يغرونكم وينسونكم مغزى الموضوع / .. إلا وش الموضوع أصلاً ؟؟ .. أيه صح تذكرت / .. خلاص أنا متعقد خلاص خلاص / ( ما وضح إني أمثل أبد / ) من جد والله ما صارت حالة ذي ! , تخيلوا ما عمري أكلت في مطعم أو كوفي إلا وأطلع وألقى في ثوبي مفاجأة .. مرة بقعة كتشب , مرة بقعة قهوة , مرة وطية كفر /!! <<– إلا شلون جت ذي على الطاري /؟ .. شكلي متغدي في بنشر وأنا مدري /


حاولت مراراً وتكراراً إني أنتبه وأركز وأنا أكل عشان أحاول أطلع بأقل الأضرار ( حشى حرب / ) ولكن للأسف الموضوع كان يتحول لدمار أكثر والوضع كان دايم مزري وينتهي ببقعة قوية وخطيرة تؤدي إلى إعلان جنازة ثوبي العزيز وقرار الإستغناء عن خدماته ورميه في الدولاب مع باقي الثياب الغير مستخدمة .. الين ما يجي فصل الشتاء وتعزل أمي الثياب الصيفية وتشوف وش اللي ينفع يعطى فرصة ثانية ووش اللي يستغنى عنه نهائياً /!


أتذكر أخر مرة حاولت فيها إني ما أوصخ ثوبي كانت في عزيمة مسوينها جيراننا لأبوي .. عقدت العزم إني أكل لقمتين بس والباقي بيكون سواليف .. عشان أضمن بس / .. دخلنا على العشاء وجلست في طرررف السماط ورافع ثوبي ومصفط كمومي وكلش .. وما دريت إلا ببقعة تطيح على ثوبي من ولد جيراننا وهو يمد صحن من جمبي / .. ومن بعدها خلاص فقدت الأمل /


ما تدرون كم ثوب عزيزي على قلبي فقدته بسبب هالنقطة !! .. كله بسبب أن ثيابنا بيضاء /.. يا حظكم يالبنات عبايتكم سوداء وما يبان فيها شيء .. إلا اذا انتِ طمله مره وكبيتي عليها لبن / .. ما تلبسون الأبيض الا مرة وحدة في حياتكم بس وهي ليلة الزواج .. وعلى إللي أشوفه في الوضع الراهن نصكم مهوب لابسات /.. أحسسسسن موتوا قهررر /!! <<– وش جاني قلبت بزر /؟

كي أنهي معاناتي هذه قررت الإطلاع على أحدث ما ألت إليه الموضة لعلي أجد حلاً / .. فإليكم ما وجدت يا أحبتي / <<– كاتم الضحكة /




ثوب

وااااو /.. وش هالموضة الجميلة يا ناس .. أبي افهم بس ذا الحين ثوب وإلا كتاب /؟ .. لو بلبسه بحسني لابس صحيفة /.. ناقصة بس كلمة عمل الطالب تحت في الأكمام /

الثوب

وااااو برضو / .. ثوب والا مقلمة بعد ذا /؟! .. مدري ليه بس أحس المصمم اللي شكله كان يشتغل في مكتبة /
بعدين أبي أعرف بس.. متى بنترك التميلح حنا /؟ .. واحد قايلين له صور الثوب يطلع الساعة ليه /؟ .. أنا متأكد أني لو بدقق في الصورة بلقاها ما تشتغل وداخل فيها مويه بعد / .. هالصورة ذكرتني بنظام التميلح القديم في الصور .. أيام ما كانوا الناس يصورون في الإستديو وهم جالسين على مكتب والخلفية تكون رسمة كتب / .. وهو منزل راسه وعلى باله مهوب منتبه للكاميرا وهي تصوره وهو أساساً كل شوي يقول : هاه ما خلصت ؟ /

ثوب

لالالا الحين تأكدت أنه كان يشتغل في مكتبة / .. صحيح الخطين ذولي تذكرني بالخطوط الصفر إللي في الأزفلت بس يلا /

يالبيه

وه بس / .. تصدقون ذا لو ما حط سكسوكة كان حسبته بنت /!! .. بس لا يهمكم شكله .. أصلاً واضح أنه من النوع العصبي واللي تفكيره دايم غبي وأساسًا تلقونه أول ما خلص التصوير على طول التفت على اللي جمبه وقام يهاوش .. أصلآً هو شين / ( غاير منه / ) .. وبعدين من جدهم الحين حاطين سحاب في الثوب /؟ .. عموماً مهيب بعيدة على إللي في الصورة أنه بعد فترة يحط السحاب من ورى الثوب .. ثم عاد يجي لمي ويعطيني ظهره بعد ما يرفع شماغه لفوق وهو يقول : الله لا يهينك .. سكر لي السحاب بليز /


الحاصل يا أخوان هو أني بعد ما شفت السماجة التي أضيفت على الثوب والتي لا تفديني كـ شخص متأذي من بياض الثوب .. قررت أضيف موديل جديد للثياب وهو الكروهات / .. صحيح أننا عيال وما تفرق معنا الموديلات .. وصحيح أننا إذا تدلعنا مرة مرة جلسنا عند الدولاب وحطينا أصابعنا على فمنا وقلنا : امم وش ألبس الثوب أو كبكات وإلا إللي بدون /؟ .. لكن يظل هناك مبدأ مهم بالنسبة لي .. وهو إني ماسكة معي أكتب موضوع لذا سلكوا /

والأن يا أيها القوم .. امسكوا بيدي ودعونا نطافش سويةً بين هذه الصور التي جمعتها لكم عن الأقمشة الكروهاتيه /

تنورة

يا سلام / .. شوفوا شلون واقفين وهم مبسوطين ولا شالوا هم أن تنانيرهم تتوصخ ولا شيء .. شوفوا رجولهم بالله شلون بابين عليها الثقة ( ما لقيت شيء ثاني أستشهد به / ) .. حتى شوفوا , من شدة درجة الراحة حاطين كرفته في شراريبهم / .. مالت علينا حنا وشراريبنا المقطعة بس /

واحد
بغض النظر عن الوقفة اللي مدري وش تبي .. وبغض النظر عن يدينه اللي حاطها مرة ورى ومرة قدام .. صورته خقق الحقير /<<– مسكر يده بفمه من شدة حومة الكبد /

stormtrooper

هه شوفوا .. حتى ( ستورم تروبر ) بدل بنطلونه الأبيض بتنورة كروهات .. قايل لكم موضه راح تلقاي قبول من الشعب وبتسوي صرعة في عالم الموضات /<<– إلا وأنت الصادق الناس اللي بيجيهم صرع /
دعوني الآن أكشف الستار عن التصميم الذي أبتكرته للزي السعودي القادم بعنف /

:)

يالبيه يهبل /.. صحيح يذكرني بشرشف كان عندنا منول بس ولو مالي دخل فيكم .. يهبل يعني يهبل /
والأن كشف الستار عن المفاجأة الكبرى .. ثوب بموديل قصة سمكة /

/

* تنويه : أعزائي , جميع المنتجات المعروضة في هذا الموضوع ستصل قريباً للأسواق وجميع الأسعار ستكون موحدة .. لذا في حالة وجود أي شكوى يرجى مراسلتنا على إيميل الموقع وشكراً / <<– ما أخذ مقلب أبد /

ختاماً , عزيزي الثوبنجي حينما يتسخ ثوبك في المرة القادمة لا تجعل الخجل والحياء يشقان طريقهما إلى قلبك .. بل ارفع رأسك بكل ثقة وتذكر بأن خلف أسوار هذا الموقع شخص قد تأذى مثلك تماماً وثيابه قد أذته بقدر ما قد أذتك .. أو أكثر منك بشوي بعد / .. لذا وبهذه المناسبة ياليت لو واحد منكم يعرف مغسلة زينة يعلمني بليز الله لا يهينه /!! <<– واضح أنه كاتب الموضوع عشان يسألكم /
_____________________

مـدونـتـي
www.mr-azoz.com

سبحان الله وبحمده .. سبحان الله العظيم


تعليقات 45

  1. السلام عليكم ورحمة الله وبركاته اهنيك على موضوعك الرائع وبصراحه سالفتك سالفه مع الثوب واسلوبك كان فكاهي:$

  2. اخوي عزوز السلام عليكم وعساك بخير بصراحة بعض التعليقات لم تكن موفقة للموضوع لانه بصراحة كنت متحامل وبالعربي قاعد تحش في خلق الله وذا مو منطق واحد يبي يتكلم في موضوع من باب النقد وعلي الاقل يحترم وجهة النظر الاخري ايا كانت ولا تنسي ان الموضوع نازل في منتدى قدير يحترم جميع اختلافات الاراء بس التعليق صراحة زعلني لاني ما اشوف ان الثياب تخدش الحياء او تقلل من رجولة اللي لا بسها ولا كن انت الله يهديك حتا اللي متصور بالثوب تشكك في رجولته بصرااااحة ماكنت موفق نهائيا في الموضوع ولك الشكر

  3. راح ينتشر بعد يومين عندنا ويقولو موضة هاذي السنة مو بس انتو يالحريم تعرفو الموضة حتى إحنا متابعينها هههههههههههه ..رجال اخر زمن واللة…

  4. مممممممممممم احترم وجهت نظرك بس من وجهة نظري كمانا ارى التياب المطرزة حلوة وماهي شينه وفي النهاية والاخيرة كل مين يلبس اللي يريحو يعني اذا يضايقك المطرز وتبغاه ابيض ساده نحترم هذا الشي كنت تبغاه زيه الشاب الحلو اللي في الصورة الثاله هههههه برضو شي حلو يعني كله ساتر للعورة ياخوي تحياتي

  5. ماشاء الله عليك اسلوب راقي في النقد يا ثوب الهنا … تصدق والله من جد وعم وخال .الخ…عليه العوض ومنه العوض علي شبابنا اللي صاروا يقلدون كل شي الله يخلف عليهم ويهديهم يارب … قبل لا انسي اقول الله يعطيك العافيه في انتظار القادم والاجمل من الأنتقادات الهادفه واسنحلي انقلها في منتداي الإمبراطوري للمولات :$ شكر وتقدير لمجهود مبذول رعاك الله >>> مستر اي انتبه لثوبك وخذ مريله لما تاكل هههههه 😀

  6. هههههههههه الله يعينك يا عزوز .. اكثر ما راقني تعليقك على عارضين الازياء .. << حلوه عارضين الازياء .. واخزياه بس سلمت بعد حيهم كلهم

  7. صدق اللي ما يعرف الصقر يشويه الحين انا معك هي غريبه شويه وخاصه انها شي جديد علينا كاهل نجد ولا هي بجده منتشره كثير ومااحس انها شي شين او نقص من رجوله بس لو تفكر شوي وتاخذ اللي يناسبك مها راح تحبها يعني بدل ما تفصل ثوب بازارير مخفيه فصله سحاب مخفي قلي مين راح يدري وبنفس الوقت بتصير سهل عليك باللبس وبعدين انت عارف الثياب اسعارها تتعدر 600 وال 800

  8. ياريت تكون اهتماماتنا اكبر من كذا ونبطل نركز على توافه الامور ونحاول نحن واقصد المنتقدون ان نرتقي بالمجتمع بدل مانضيع وقتنا وجهدنا في البحث عن الصغائر لنجعل منها موضوع

  9. أخيرا فيه واحد يحس بنفس معاناتي ,,, أنا من زمان أعاني مع الثوب ,, ما قد أكلت وجبة وأنا لابس ثوب إلا ويتوصخ 🙁 🙁 شكرا لك إيصال معاناتي للعالم أجمع 🙁

  10. اول مره اشوف موضوع سخيف بهذا القروب :~ احترامي لك لكن لاعاد تكتب مواضيع خصوصا اننا ماعرفنا النقد كان عن الاشخاص والا الثياب رغم ان كلهم حلوين :$

  11. والله ياعزوز حلوة الثياب اللي عارضها وكلن يلبس على ذوقه بس ابي ادلك على مغسلة تنظف تمام بس لاتغسل الثوب في البيت وده المغسلة ببقعته (المغاسل الفرنسية ) تراها فتاكه في ازالة البقع هذي عندنا في جدة موفق ياعزوز

  12. بصراحه مو انت بس .. اكثر الشباب يشتكون من هالشغله , وتلقي الواحد يبدل كذا ثوب باليوم .. الله المستعان . الله يعين اهلهم على الغسيل والكوي .. المهم يعطيك العافيه على هالموضوع اللي شاغل الشباب ومنغص عليهم كشختهم خخخخخ .. تشكراتي لك خيووو ..

  13. والله ابداع وفن واسلوب صح *** ملا حظه يا شباب وصبايا السالفه ماهو ضد الثوب لكن تعليق باسلوب فكاهي عى شي معين ** وااااااااااااصل ابداعك

  14. عزوز ، اهم شي انك قلت انو ساتر للعورة ههههههههههههههههههههههههههههههههههههههههههههههه من متى فيه اثواب فوق الركبة ولا تحت الصرة هههههههههههههههههههههه

  15. mr.a كتابتك مهي زي قبل متغيرة…. لكن انا متأكد انك مااعديت لها ولا كان ابدعت بالكتابة

  16. موضووووع رآآآيق واسلووبك جووونآن … لآيهمك أحد وآصل كتاباتك وربي انك تخقق >>تقصد الاسلوب 🙂 لاتطول علينآ …

  17. أتمنى من الناس اللي يعلقون عن الموضوع يعلقون عليه بروح الفكاهه هو ماهو ضد الثوب ركزوا:~ عشان كذا دايم اقول تحتاجون (أقلام تايد) في جيوبكم يمدحونها على طول اي وسخ ينظفه بسهوله تلقها في كارفور او الدانوب:o دمت بود

  18. المجتمع لايترك الإنتقاد في اي مكان وزمان لانها من صفات المجتمع. فالناس ينتقدون حتى عين الشمس فلا تستغرب لأنها صفه وإلا لما صار مجتمعآ. بدون تطويل من زمان ومتتبع ثقافة الزي والناس تلبس مطرز عموما, ولكن من باب حب الزي الساده الأبيض هو أكثر ما يريح العين والنفس والدال على البهجه أيضا. وكون أن أي شخص يقول كل ملابسي على شكل محدد دائما فهذه مبالغه لكسب الحوار في صف المتكلم. فماهو ممنوع أنك تلبس ثوب مطرز غير شبيه بما يلبسه النساء لأن حبيبنا المصطفى عليه الصلوة والسلام لعن المتشبهين من الرجال بالنساء والمتشبهات من النساء بالرجال. ولكن خل لبسك مشكل فيه الساده والملون والطرز بخفه ماهو بعفاشه والقصير ليه مايكون واحد من ثيابك قصير على السنه أنا بصراحه أستغرب من الشباب دائما ينتقدون ثيابي القصيره مع أنها قليله والطويله يمدحونها فالظاهر ان انهم نسيو السنه في اللبس-الله يهدينا وياهم-………..امين…….. عالعموم في صور زي المخصر وما أدراك مالمخصر هذي اشوفها مصخره وسبهلله وانحرافيه فكون اني من المجتمع خلني انتقد والسوع زي الناس ,,,,, ياخي اذا تمشي فالشارع وتسمع صوت خرفشه والا هو واحد لابس شراع ملون والا ثوب من كثر ماهو مطرز تسمع له خرفشه وجحرشه وانت غافل من حالك في شانك قد يصيبك بالرهبه فما بالك لو تكون في شارع مظلم ومتفرج قبلها فلم مرعب الا العقل طار فتتحمل ذنب الآدمي ليه ياخي؟؟؟؟ هذا ماعندي واحس أني تعبت القعده عالنت باروح أشوف لي لقمه,,, دمتم في رعاية الله.

  19. والله أنــا تطفلت على البريد حق اخوي وقريت الرساله ومت ضحك عليها والله ابدااااع اليوم الخكاريه ضوق ثابهم طبعا لزوم الكشخه بكرا العرابجه يحطون جيبون ( جيبون = نفاش وهم اللي تحطه العروسه تحت الفستان عشان يصير نافش ) والله ابدااااااااااااااااااع كل داااايم اكتب موضوووع لايقذف في الحجر الا الشجره المثمره يعني ماعليك من النقد وواصل ابداعك عشان اللي يعجبهم طرحك 🙂

  20. الموضوع حلو وخفيف واللي مو عاجبه لايقرأ من الأساس .. وفي الأخير يقعد يتفلسف علينا

  21. معليش يعني مع احترآمي لك يآ اخوي بسسس فيه مواضيع اهم من كذآ بكثير انا من اول ما قريت الموضوع انصدمت بأن في نآس تكتب زي هاذي التفاهات وبعديييين تقولون وليش احنا مجتعنا كذآ وليش احنا آخر ناس يعني في الف موضوع فيه ضحك ووناسه بسس لهدف سامي وحلو هدف يخليك تفخر بالعرب اما اذا استمرينا على موآضيع زي كذآ وكان همنا لبسنا وثوبنا والمظهر بشكل عام رآح ننحط زيآدهـ >< انا اشوف المواضيع الثانيه الي تجيني ع القروب بدون مبالغه ان اغلبهآ انا استفيد منها في حياتي يعني انت منت خسران لو خليت في موضوعك مساحه بسيطه تتكلم فيها مثلا عن شي يخص موضوعك الي هو الثوب ياليت يآ شبابنآ تشغلون عقولكم وتحاولون ترتقون باللامه مو تهبطون فيها وتشوهوون سمعتهآ 🙂

  22. والله مافي احسن مثيابكم ياسعودين ولا في رجال يبلبس تنوره ولا بعد كروهاااات يسلموووو ع موضوع الحلو:D

  23. عندي لك حل يمكن يريحك تعرف الردادية اللي يلبسونها البزر اذا بغو يوكلونه السيريلاك أو بعض البزران اللي سعابيلهم و طراشهم واجد ؟؟ تعرفها ؟ فصل لك وحدة طوييييلة لتحت الركبة .. أو .. بس خلاص وشوله التفصال و التعب جب مريلة الطبخ حقت اختك و البسها عند الاكل ووو خلاااااااااااااااااااااااااااص ..

  24. مساكين رحمتكم ياتماسيح بس أول فستان قصدي ثوب مره رااااااااااايق

  25. ش السالفـــــــــــــــــــــه الناس معصبه ؟! B (قل خيراً أو اصمت ) ترى ماله داعي التحطيم واحس صدق اللي قاله ماعهدنا زي سعودي بالشكل هذا ..! والانسان بشر لا بد من الخطأ واللي يبي ينصح بأسلوب الله يعافيه حتى يتقبل الشخص اللي امامك النقد .. مااقول الا صرنا مثل الذباب لا نقع الا ع الجروح ..

  26. بصراحة .. من أشوف مواضيع باسمك أكون واثقة إنها بتوسع صدري .. الله يوسع صدرك بالعافية .. ولاتحرمنا من جديدك ..

  27. مستر ((( A ))) يا عمممي رووووح و القلب داعيلك مبدع ولله مبدع .. صحيح اني في مواضيع كثيرة لك ما استسغتها بس هذا غييييير من جد غير .. وابدعت حقيقة في انتقاد الظاهرة الغريبة هذي .. الثياب المزخرفة حلوه لما تكون الزخرفه خفيفه و رايقه نوعا ما .. لكن عالشكل اللي هنا , معليش كتاب على قولك مو ثوب !! نتمنى تنتهي هذي الموضة التافهة , لانه بصراحة عالشكل ذا بدو الرجال يقلدون الحريم و ينافسونهم بعد في جلابياتهم و هذي مشكلة كبيرة و ما نستبعد تطلعلنا بعد فترة موضة زي اللي انفردت معاليك بطرحها للاسواق خخخ عالعموم يا مستر .. واصل يا بطل على ذا المود , و فكنا بالله من القصص الشخصية . خصوصا ان عندك اسلوب ما شاء الله جميل جدا في النقد . فتك بعافيه .

  28. ههههههههههههههههه عزوز أهم شئ موضة التنورة ولا كرفتة في الشراريب شئ صرآآآآحة ولا موديل قصة السمكة شئ مت ضحك

  29. اخوي اسلوبك كان غير منمق ابدن .. نصيحتي لك حاول تجتهد اكثر ولا تنزل موضوع لمجرد تنزيل موضوع اذا تنقصك الموهبة لا تقحم نفسك في كل شي..

  30. عاد يجي لمي ويعطيني ظهره بعد ما يرفع شماغه لفوق وهو يقول : الله لا يهينك .. سكر لي السحاب بليز .. هههههههههههههههههههههههه أكثر شي ضحكني

  31. باين عليك من قوم طيحني ويابابا اسمحلي ويا ماما …………. واحد شايل دقنه والثاني تعبان ………….. شفلك موضوع مفيد افضل من هذا الموضوع

  32. عندي لك حل ولا اروع اكشخ فيه وهو مبقع وقل موضه جديده …….مغسله ابو عدنان اوف يحط لك فاين معطر والله ريحته حلوه

  33. مشكوررررررررررر أخ عزوز على طرحك الظريف اللي من جد وسع صدري :):)اسع للرقي دائما………………………

  34. مستر آي دايم مواضيعك ظريفه بس المره هاذي آشوفك آسآآت لكم شخص خصوصآ آلي شككت فـ رجولته :~

  35. لووول اهم شي ثوب كروهات حسيت اني عايشه عند كوكب ثاني :~ انا اعطيك الحل 😀 قوم البس جينز وتيشيرت 8) بدال ثوب وطفش وحر B وربي الجينز اريح بكثييييييير وخذها نصيحه من اختك بالاسلام

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صور : حملة نبي ثياب كروهات

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول