صور : تركيا .. نعم نعم .. إنتي كذآ


السلام عليكم ورحمة الله وبركاته
مساءكم لميس , في ليلة خميس , مع خبز تميس ,,
أخباركم عساكم بخير إن شاء الله , كل و!حدن بإسمه , الكبير قبل الصغير , والضب لازم يطير …. ألخ
ما عرفتوني ..؟!
<= واحد يلمح تراني حلقت السكسوكه وطلعت أسمر (على ذمة أمي)..
أول شي الحمدلله على سلامتي , توني جاي من تركيا وطيحت اللي فـ راسي وقابلت وشسمه ,,
ثاني شي ما هان علي وأنا هونيك أني ما أصور لكم ولو شيء بسيط من الروعة والجمال , وهذا أقل شي أسويه لكم حبايب ألبي , وإن شاء الله يعجبكم ,
الموضوع بيكون عبارة عن فقرات منوعه , فيها الطبيعه والعمارة والمواقف اللي صارت وكل أبو شي , وعليها تعليقات وبلاوي زرقاء
أحس كثرت هذرتي , وأنا ماعرف أسوي مقدمات , نروح للموزوعـ,

][ المسجد الأزرق ][
صورة من بعيد لـ(المسجد الأزرق) في مدينة إسطنبول
مبني من الحجر من العصر العثماني , وإلى ألحين يصلون فيه السياح المسلمين , روعة ومتانة في التصميم الخارجي والداخلي .

صورة للواجهه من الداخل , مع المواضئ .

صورة من الداخل

][ نورة واللاب توب ][

الوسيلة المفضلة للإتصال في السفر , والأقل تكلفة للطفارى ( مثلي وشرواي )هي الإنترنت والماسن
وخيتي الصغيره نوره كل يوم تشبك الماسن والمايك والسماعات , وتنتظرني أدخل
وكل ماقابلتها تقول لي بدر مشتاقه لك , لك وحشه يالأطخم (وخرابيط البنات انتو تعرفونها عاد)
الموهم عاد بعد اسبوعين صارت تقول بدر ياليتك ترجع بسرعه .
انا استغربت هالشوق كله وخاصه من نوير اللي ماتهضمني خخخخ
الاسبوع الاخير صارحتني بالحقيقة المُرّه , صارت تقول لي بدر ارجع ياخي بسرعه عشان اللاب توب , بعدين ارجع تركيا , ترى نبي اللاب توب مانبيك انت
<= يقلع ام التحطيم بس
صارت تبيني الشينه عشان اللاب بس :/
جلست اسبوع كامل متحطم وكاره اللاب توب , حسيت أني يععع خخخخ

][ بورصه ][
مدينة بورصه رحنا لها بالقارب , كانت من أروع المناطق , جمال وطبيعه الصراحه ولا فالخيال ,, حرام اللي يروح تركيا ولا يروح لها ,

زرنا أحد المساجد فيها وصلينا فيه , وكنا قروب , وجلسنا نرسم بعض المناظير الداخليه , بس للأسف الرسمات ضاعت ..

اللي ضيّع الرسمات هذا الشخص إسمه علي , نتـّفوهـ تكفون وهو يرسم , شوفوا شلون منبطح بس فشلنا الله ياخذ بليسه خخخ

الشرّاب لحد يتكلم فيها , محجوزه الذبـّه لي هع هع
<= فيني حرتن منه , موب صاحيه

][ مقلب ][
فيه سوق هناك إسمه سوق إستقلال ,
هذا رهيب اللي يبي يروح إسطنبول لايفوته,
الموهم كنا نمشي أنا وأخوياي (القروب بتاعي) , وكل ما مرّينا جنب عائله أو مجموعة أشخاص نزلنا روسنا كلنا فجأهـ , كأن شي طايح علينا , والناس كلهم ينزلون معنا خاشين فالجو هههههههه
أكثر شي ضحكنا عليه وحده تكرفست على خشتها ههههه بس للأسف طلعت خليجيه , زوجها بغى يصطرنا تصطير ههههههه
الله يسامحكم بس ياقروبنا , والله من الدجه <= طلع منها هع هع

][ آيآ صوفيا ][
كان فالبداية كنيسة , ولما فتح المسلمين تركيا تحول إلى مسجد مع تغيير بعض الأشياء البسيطه , بعد كذا صار متحف إلى اليوم ,,
الله ياخذ بليسهم ياخذون على الدخول 30 ريال

عندهم دفتر تسجيل حضور , اللي يزور المتحف يسجل ذكريات أو أي شي , وهذي صفحتنا
طبعا كثير من العيال كتبوا أرقامهم وإيميلاتهم , بس صورت قبل يكتبون

لفت إنتباهنا خليجي شوفوا وش كاتب

][ خليجيه في محل الـ Tattoo ][

دخلت مره بشتري هدايا لأهلي , لمحل يبيع أسوارات حلوه , أنا وأبو عبدالعزيز وأبو سلطان (أطلق ناس فالعالم)
وكان قدامه محل تاتو (رسم وشم)
الموهم شوي ودخلت وحده خليجيه (بدون ذكر إسم الدوله) وطلبت من راعي التاتو يسوي لها وشم فـ كتفها , وحلقه فـ سرّها (يع) ,
بس يعجبوني أبو السلاطين وأبوالعز راحوا دخل المحل وجلسوا هناك , وجلسوا يتابعون وش يصير ههههههه
هي عرفت من أشباهنا وكلامنا مع بعض أننا من أهل الخليج وأستحت على وجهها وقامت ..
علماً أن اللي يسوي الحَلق والوشم رجّال ,
هذي ذكرتني بموضوع قد كتبته (تغطي يابنت سعودي) خخخخ

سـ/ ليش بعض البنات / الأولاد إذا طلعوا من ديرتهم سوو اللي ما ينتسوّى ..؟!
هل هم ماقد شافوا خير ؟؟ ولا مافيه رقابة أصلا ؟؟ ولا مالهم ربّ هناك يعني؟؟!

][ رحلة على البسفور ][
بعض القصور والبيوت على البسفور ,
الله يرزقني بواحدن منها لو على طريق خريص خخخ

صورة لـ بيت نور ومهند , اللي فـ المسلسل المعروف نور , طبعاً كل واحد صور والبيت خلفيه له فله والله

هذا صورته بالغلط , وأكتشفت بعدين أنه قاعد يلعب بـ ألعاب بنته الصغيرهـ بعيد عن الشاطئ عشان محد يشوفه خخخخ
حسّيت أن عنده طفولة متاخرهـ جداً جداً هع

][ في المطعم ][
مرتن من المرّات رحنا نتغدىآ فـ مجمع جواهر (مجمع أمي)
ورحنا لمطعم إسمه Num Num , كان في الإستقبال بنت موووووووووووت , دخلتنا إلمن الطاولات , بس يوم جلسنا جابوا لنا إثنين إستغفر الله تنسد نفسكـ من يوم تشوفهم خخخ
بس وش نقول؟! سياسة مطاعم خخخخ
الموهم كان الديكور الداخلي حق المطعم روعه مرره فكرته , وأعتقد مطبقه فـ أحد المطاعم فـ الرياض , الموهم شوفوا أنتم ربعنا وش مسوين وتفهمون السالفة :
ريما مرّت من هنا

أشتقت لكم يابنات , والله تركيا من غيركم مو شي

هذا واحد من القروب الفولاذي , كاتب ذكرياته بعد , أنا كتبت وصورت بس موب واضحه للأسف

][ منوعات ][
مطلوبين أمنياً

شوفوا مظاهراتهم شلون بس ؟
بدون ترجيم ولا ذبح وذبيح

مساكين الأتراك , يقولون بدر حتى هنا ملاحقنا بالأخطاء الإملائيه خخخ

][ نورة ومهند ][
نرجع لنوير وخيتي , كل ما أتصلت علي قلت لها بجيب لميس معي (برفع ضغطها) , وتقول لي لا جب مهند ,
الموهم يوم رجعت قلت لها مهند فالشنطه معي , وراحت فتحت الشنطه وماصدقت , ولقت ولد صغير لعبه , يجي نص طولها تقريباً , الموهم هو مملوح حبتين وأشقر وفيه من مهند كتير كتير , عاد أول ما مسكته أستانست عليه وقامت تحبب فيه وتقول هذا ولدي مهند ,

الموهم يوم جا الليل قالت بدر بنومه فالوسط جنبي انا وياك , وانا امه وانت أبوه , وإذا كبر بتزوجه ههههههههههه
أنا من قوة الجملة فطست ضحك ودمعت عيوني وطار النوم عني خخخخ

في الختام أحب أهدي لكل من تابع موضوعي للآخر جميع أنواع باقات الورد والزهور من تركيا ,
وأتقبل النقد بكل رحابة صدر ,

][ إستقبال بايخ ][
أول ماوصلنا الرياض أستقبلنا أخو أبو عبدالعزيز (عبدالإله) , أنا أحب أسميه (عبدالإله كوبرا) , عشان شخصيته دايما كوبرا هع هع
سبحان الله هو من الناس اللي إذا ألتفت يلتفت بكل جسمه عشان ماتخرب الشخصيه هههههههه (سامحني عبدالإله من ذب فيكـ حبّكـ)
الموهم معنا أبوسلطان , وكنا بنوصله بيتهم أول لأنه أقرب (فـ شارع الضباب)
وصلنا لبيتهم وتونا نازلين إلا فيه سيارة مرور ديورت ووقفت عندنا , ونزلوا ونزلنا , وقالوا وين إثباتاتكم ؟!
قلنا تونا جايين من المطار وهذي جوازاتنا <= عاد شكلي محشش أنا فالجواز (وجه يغمز ليوسف)
قال انتو تو تدورون فشارع أبو بكر الرازي , قلنا لا تونا جايين من المطار وهذي شناطنا (كانت فالمرتبه اللي ورا)
وشنطة أبوسلطان (سفر) ماخذه نص المرتبه , وانا مندعس تحت من الزحمه خخخخ
عاد سفر ماخذ نص عفش البيت , حتى يوم فتحت شنطته ذآك اليوم لقيت قلاية بيض وكواية ملابس ودولاب جزم بعد خخخخ (سفر لازم تاخذ حقك فالذب)
الموهم قال الشرطي / اننا شايفينكم تفحطون تو هناك .!؟
قال يوسف / شف الشناط .. فيه احد بيفحط ومعه ذالعفش !؟ (مشكلته بارد ويتنرفز علاطول مدري شلون
شوي وسأل مره ثانيه / وين سافرتوا !؟
رد يوسف / تركيا !؟
يوم قال / وش عندكم هناك!؟
قلت / رحنا نقابل لميس ..
عطاني نظرة حقد , بعدين قعد يضحك وضحكنا كلنا من الموقف
بعدين قال / خلاص الحمدلله ع السلامه , ومشينا ..
قلت لعبدالإله تكفى تكفى تكفى , رجعني المطار إستقبال بايخ مررهـ ههههههه

في الختام لايسعني إلا أن أشكركم على متابعتكم موضوعي وجميع مواضيعي ,
وأتمنى أن يحوز على رضاكم وينال حسن ذائقتكم ,

شكراً أبونواف
شكراً موسعن صدرهـ

شكراً لكل متابعي مواضيعي في قروب أبونواف

لا إله إلا الله عدد ما كان ، وعدد ما يكون ، وعدد الحركات والسكون
سبحان الله وبحمده عدد خلقة وزنة عرشه ورضا نفسه ومداد كلماته
سبحانك اللهم وبحمدك .. أشهد ألا إله إلا أنت .. أستغفرك وأتوب إليكـ

منتدى فهاوهـ
للتواصل
[email protected]


تعليقات 44

  1. يعطيك ألف عافيه على هالصور والكلام المنسم بجد كنت مالي خلق لشي وضحكتني الله يسعدك في حياتك مثل ماأسعدتني اليوم :$ مشكوووووووور:D:D

  2. 😀 ماقصرت الله يرجك مت من الضحك ضحكتني من قلب وضلوعي عورتني انا ابعد انتظر جيت اهلي من السفر لتركيا واكتب به موضوع لايق

  3. ماشاء الله عليكم يالشباب من جد الواحد يذكر الله.,., كل الي يكلف عليك قص التذكره وتطليعت الجواز من الدرج ولا حنا يالبنات انطقي لين واحد من اخوانك يتكرم يوديك لجده ولا الدمام وبالنهايه تقولون الشباب مالهم اماكن يروحون لها للعوايل.,. طيب انا مو عوايل وين اروح:( الله يوسع صدرك بالعافيه وسلامة عمرك وسلم على القروب الانتحاري كلهم.,.

  4. هع هع ههههههههههههاااي اضحك الله ضرسكـ ..منننجد ضحكتني اخووي لاتقطعناا من رسايلكـ 😀

  5. والله انتو الي كذا مبين من موضوعك انكم استانستو والله ياليتني اني معاكم ( قاط بقوة ) الا مالكقيتوا لميس او امها B الحمدلله على السلامه وعجبني استقبالكم البايخ :$

  6. {.. سبحــــــــآن الله.. مرره جوونان المساجد فن لايعلى عليــــــــــــه صرااحة..~ ورحلتكم قسم انواع الفللّة..~ وانت مفهي على منسم الله يسعدك ويحفظك..~ .. بس صراحة المقدمة حلوة..~8) (( مساءكم لميس , في ليلة خميس , مع خبز تميس …)) شي شي مت ضجك علاااهـــــآآ..~

  7. ماشاء الله عليك أخوي رحلة ممتعة جداً ولكن تمنيت إنك ماتربط طاري لميس ومهند في تركيا خير كأننا شعب مايعرف نعمة تركيا بلد حلو وراقي بس بليز خلونا عن طاري هالشرذمة منهم واختك إذا هذا تفكيرها ألحين الله يعينكم عليها بعدين والله إنه راح يأثر على سلوكه مستقبلاً !! شكراً على هذا التقرير

  8. 🙁 ياخي ليه ماقلتلي اروح معك خخخخخ بصراحه موضوع خطير وصور رايقه ومناظر اروووق 8) تقبل تحياتي

  9. إيه صح نسيت أقول إننا بعد رايحين لتركيا إن شاء الله بعد أسبوع والله يعين ويوفق 😮

  10. ههههههههههههههههههههههههههههههههههههه الحمد لله على السلامة وجعله دوم مسافر مدام هذا الزين بنشوفه .. وسلمني على أختك نوير والله أني حبيتها..

  11. بصراحة تركيا مو مرة حلوة او انها حلوة وتصويرك ضلمها احلى شي عجبني القصر

  12. الحمدلله على السلامة ورحلة موفقة ما شاء الله …. الله يهدي البنات لاطلعن بر ديارهن تركن الغطاء ليش ما يوجد رب في كل مكان الله يستر عليكن. مشكووووووووور على الصور الجميلة

  13. :(انا زعلاااااان منك ..ليش ما جبت لميس >>>كان جبتله على الأقل عروسة دمية صغييرة.:$..خخخخ مششكووور

  14. مشكور على الموضوع الجميل والصور الجميله واتمنى ان ازور تركيا بس مدري بحصل لميس:$

  15. التصوير مب ذاك الزود وانت الحين ليش تروح تركيا السعودية اطلق منها

  16. اول شي الحمد الله على السلامه يا بدر ثاني شغله تركيا بلده جميله جدا و انا وحده ما زرتهال لكن امي و اهلي يوم صغار زايرينها و قالو لي عنها و من كثر ما يسولفون عنها حفظت المناطق و حفظت كل شي يعني مثلا في منطقه اسمها لالالي انته ما ذكرتها منطقه شعبيه و وايد حلوه فيها سوق مصقف و في شغلات غريبه انا حبيتها من كثر ما سمعت عنها و في منطقه اسمها يالاوه هالمنطقه نفس منطقة يحيا اللي بسنوات الضياع الناس اللي فيها يهبلون و فيها بعد الحمامات الحارة الماي اللي تتسبح في من الشلال تخيل بس اما في جزيرة اسمها جزيرة الأميرات ما فيها سيارات وايد و اذا في ينعدون عالأصابع كله فيها حصن (حنطور ) و فيها مناظر روعه و في مقبرة مسيحيين يوك شجرة هذي يمكن تكون بيالاوه بعد هذي الله يسلمك عمرها 520 تقريبا في تحت هالشجرة مطعم الشجره هذي مغطيه عالمطعم كله و في وااااااااااااااااااااايد اماكن راحوا لها انا كله اسمعهم يسولفون و حفظت المناطق يعني اذا رحت ان شا الله راح ادلها بدون لا يقولون لي و شكرا على موضوعك امتعتنا بالصور و المواقف الطريفه اللي صارت وياك اخوي بدر 🙂

  17. موضوع رائع وصور قوية يعطيك الف عافية والله كنت متنكد وقلت ما لي الا قروب ابو نواف ينسيني الهم. احلى شي حركة نوير مع لعبة مهند.بالتوفيق وللأمام.

  18. يعطيك الف عافيه وحمدلله على سلامتك روعه اسلوبك اعطت للتقرير بريق فوق بريقه سلم على نورة الله يسعدها يارب لاتحرمنا من الجدبد

  19. ماشاء الله تبارك الله .. صور رائعة ومواضيع شيقة وتعليقات أروع .. لاتبخل علينا بالمزيد

  20. الف الف حمد لله ع السلااااااااااااامة واللهي رحلة شكلها انما ايه يعطيك العواااااافي اخوي اثلجت صدورنا والله ياااسلااااام والله كلمة مهند لحالها توسع الخاطر آآه ياقلبي واللهي ياهو موزوع ختييير تستاهل عليه اوسكار ولا التعليق جونان × جونان سلمت اناملك وننتظر رحلتك القادمة ان شاء الله وسلم لي على اختك نوير الصغنونة ^_^

  21. الموضوووووووووع روعه ….تسلم يدينك وانا حفظت كل المناطق اللي انت رحت لها عشان نطلع لها مع اهلي بعد اسبوع …شكراً

  22. ::الله يسعدكم بصراحه الموضوع مرررررررره جنان وشوقتونا نروح تركياوسلملي على نوير ههههههههههه

  23. الحمد على السلامة :$ صورة جميلة جداً طبعاً تركيا يشهد لها التاريخ القديم انشاء الله أيام كلها حلوه وسفر. وبعدين شوقتنا لتركيا

  24. اولا اقولكم حمدالله على السلامة موضوعك جميل ومتكامل اخ يالحظ على كيفكم تفرفرون وحنا منثبرات بالبيت:(

  25. يعطيك الف عافيه بدر.. والله تقرير رائع واسلوبك كالعاده رووووووعه استمتعنا..واخذتنا برحلة لتركيا وحنا بالبيت.. عساك على القوه دووووم..

  26. موضوع رائع .. قلال الاعضاء الي احرص على قراءة مواضيعهم اتمنى لك التوفيق و كتابه مزيد منالمواضيع 8)

  27. اولا الحمد الله على سلامتك ويعطيك الف عافيه على هالطبيعه الخلابه وعلى خفت كلامك وطيبه قلبك ومرحك كثر ماعجبني في الموضوع الكلام اكثر من الصور ومرها ثانيه خبرني عشان اسافر وياااااااااااااااااك ويعطيك الف عافيه على هالموضوع الخيال .

  28. هههههههههههههههههههههههههه صرآآحه سفرتكم شي والله مت ضحك عليكم بس جآن مصور عمر ولايحيي بالغلط 🙁 ههههههههههههههههه بس يوم يروحون ربعك عند هاذيراعيه الوشم توووووحفه زين يسوون احسن:D وبس..، والحمدلله على سلامتك ويعطيك الف عافيه عسآك ع القوه

  29. ياااي موضوعك بصراحه مرا حلو الله يعطيك العافيه.. واختك نوره شكله مراا عسول الله لايحرمك منها..وياسلاااام ع تركيا مرررره تجنن..وتعليقاتك مراا موتتني من ضحك هههههههه..:D:D

  30. شكرا لك …وناسة موضوعك فيه المعلومه وفيه الطرافه…ورحلة مميزة لبلد جميييل..اتمنى ازورها تركيا…يعطيييييييييك العافيه خيييو:)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صور : تركيا .. نعم نعم .. إنتي كذآ

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول