صور : بيوت في العلالي + إبن أبوك إقمز …


السلام عليكم ورحمة الله وبركاته

حي الله الجميع
وأخص الغالي أبو نواف وغير البشر
ولايهونون البقيه /

بالأول قبل لا أبتدي بالموضوع أبتكلم عن مشكلة في خطوط موبايلي
لعلا وعسى إن صوتي يوصل لهم
مع إني إتصلت على الموظف على الرقم 1100وخبرته وقال إن شاء الله نصلحه
وماشفت شيء
المشكلة إني مره تعطلت في طريق طلع سير المكينة منقطع وحاولت أتصل على أمن الطرق 996
بس ينقطع الخط ويقول الرقم غير مستخدم
فإضطريت إني أتصل على المرور وأعطيهم رقمي
والمرور يبلغون أمن الطرق وبعدها إتصلوا علي
وأخذوا الوصف وجابوا لي السير وركبنها بس الأجاويد ماقصروا الله يعطيهم العافيه /




ونرجع لموضوعنا الرئيسي
وللمعلومية أن جميع الصور من تصويري
وهذه صور سبق وتمت إضافتها في ملتيميديا

1
تنسيم مخيم
أهم شيء خلاني أوقف بموقف كبار الشخصيات /

/

2
وين البلدية عنه !!

هذا أخونا بعد ما إستأجر المحل كانت فيه لوحة المحل السابق ماغيرها بس إكتفى بالصبغ ثم الكتابه بخطه يده
بس تصدقون بعد ماأضفت الصوره بالشبكة بإسبوع مريت ولقيته ماسحها ومخلي دهانات ديزرت
شكله سمعني /

/

3
محشش بس وطني
هذا في يوم جمعة وصاحي بدري والجو أمطار
أكيد وين أبروح ؟؟ للبر
بس هذا زودها شوي
راسم الشعار السعودي على النفود بالسياره /

/

وترى للمعلومية أن المحشش إذا كان تحت تأثير المخدر
لايكون عنده إبداع كم يظن بعض الناس أصلاً يالله يشيل روح
لكن يكون عنده شيء إلا ويقنعك إنه صح
مثل قصة حدثني بها أحدعساكر مكافحة المخدارت قواهم الله
يقول مره مسكنا واحد وهو تحت تأثير الحشيش /
ويسولف علينا ومن السواليف

يقول المحشش :صح الحين إن بلكة العلف أو حزمة البرسيم اللي تأكله الغنم بـريالين ( قبل غلاء الأسعار )
قال العسكري :إيه
قال :طيب الحين قيمة النعيمي أو النجدي ( الخاروف ) تتراوح بين 450 إلى 600 ريال
قال العسكري :إيه
قال :طيب ليش مانختصر المسافة ونأكل حزمة البرسيم اللي بريالين وتراها أوفر لن
خخخخخخخ يسمع بالأختصار
بس صاحبنا المحشش بعد ماتعالج وطلع من السجن رجع للحشيش

وبعد مدة
دخلوه مستشفى المجانين بعد مانسم مخه ( يعني رااح مافيه مخ )
يعني يشوفك عادي يقول هلا بأمي الحبيبه /
علشان ماأحد يتساهل بالحشيش
والله يكفينا شر المخدارت

4
مدرسة ثانوية تعتذر لجيرانه
هذي مدرسة ثانويه بعنيزة في منزل آجار لمدة سبع سنوات والجيران متضايقين لعدم وجود مواقف كافية للسيارات
وتم إنتقاله إلى مبنى حكومي وقد تم تقديم هدايا للجيران وإعتذار

/
(الصوره من صديق ومعلم في المدرسة)

5
كم تدفع ؟؟؟
البلدية مسويه تثمين على أراضي بهدف إقامة صناعية ثالثة
بس هذا شكله حاسدهم على الدراهم اللي بتجيهم من ورى التثمين

/

6
حتى للشياب منطقة خاصة
الظاهر إن هالمنطقة الساعة 10 مسكرينها كلهم نايمين

/

أما الحين نبدأ بالصور اللي لم تعرض

1
مره نشبت بزحمة عند إشارة
عاد من الفضاوه أقز السيارات اللي جنبي
وأشوف اللي يبري إصبعه بخشمه /
واللي يهوجس
واللي يهوش عياله
عاد صار جنبي سوداني راعي عربجيه
مكتوب على الصدام اخر شيء
/
شكله المسكين متعذب من كلام الناس /

2
مره من المرات كنا كاشتين
عاد لقينا مطعم وأخذنا الغداء معن
بعد مامشينا شوي أمطرت علين
المهم لقينا جسر صغير أو بالأحرى عبارة سيول علشان نتغدى تحته
( يسمعون بالهجه عن المطر مبطي ماغرقهم الشعيب/ )
بس وقف المطر بعد مادخلنا
وأشوف الشخاميط بالجدارن
وأكثرها حب
عاد شفت واحد شكله أحد شافه وهو يكتب وماكمل وإنحاش
/
بس الحب ذابحه /
تتوقعون مثل صاحب غير البشر اللي يقول أحبك يابدور /
خخخخ

3
في المواقف الحساسه لأزم الواحد ينتبه كثير
خاص لاجاء يكتب خطاب مهم أو غيره
مايصير مثل ماحصل بقناة mbc
يوم حطوا صورة راعي غنم بالأردن
وكاتبين تحت الأمير خالد الفيصل أمير منطقة مكة المكرمة
خخخخخ
بس هذا بدليل الخريجين للمؤسسة العامة للتعليم الفني
/

4
هذا بيت واحد موسوس كثير
بس أحس إن الوسوسه ماجت إلا بعد ماسرق البيت
/
حاط كفر فيه مسامير ومثبته على الجدار /
يعني إذا أنت ولد أبوك إقمز على البيت

5
هذا مسوي إعلانات للمطعم
بس الهدر حاط الإعلان في زبالة وأنتم بكرامة
من اللي يبي يشتهي يتعشى عندهم
/

6
ماعمركم سمعتوا بيوت في العلالي
شوفوا مايحتاج شرح /
/
/

7
كل صبح لاصار عندي وقت فراغ أو طالعين بدري من المحاضرة
أروح لبوفيه قريب
صراحه ياعليه كبده
خاصة كبده غنم
بس شوفوا إسم البوفيه
بس محتار راعي البوفيه وش يسميه سمره وإلا حمزة
/

8
الحين كل واحد يعرف توزيع المناطق في المملكة
يمكن يخطي الشخص ويقول الزلفي تتبع لمنطقة القصيم وإلا بالأصح تتبع لمنطقة الرياض
يعني تخطي بين مناطق قريبه لبعض
بس شوفوا تقويم تايوتا شركة عبداللطيف جميل كاتبين أرقام الفروع
وفيه أخطاء بتوزيع المناطق بس القريبه لبعض ماراح أدقق عليه
بس شوفوا المنطقة الجنوبية
/
صراحه قريبات للمنطقة الجنوبية
اللي على طاري الوكالات
وش صار على حملة خلوها تصدي ؟؟

9
الله يستر يجي أحد بالليل
ويطير الماصورةعند حوش الغنم اللي ورى
/

وإلى هنا نصل إلى نهاية إيميلي المتواضع
وأتمنى من الله أن تعجبكم
وأتقبل نقدكم بصدرٍ رحب
أخوكم مـرسـال
وفي أمان الله //


تعليقات 26

  1. معليش مداخلة بسيطه بالنسبة لتصنيف المناطق في شركة تويوتا انا موظف في الشركة وهذا التصنيف خاااص بالشركة بس مصنفين المدن اللي قلت عليها من المنطقة الجنوبيه وللا ايش دخل مكه كمان ضمنهم . اشكرك على الصور والله يعطيك العافية .

  2. بصرااحه كل صوره احلى من الثاانيه واللي زادهاا حلاوه التعليقااات عساااك على القوه خيووو

  3. يآمآل العآفيه يآبوسليمآن إيميل بصرآحه بطططل ..!! إستمر يآحُبيبي على هالمنوآآل ..

  4. مشكور على الصور الحلوة .. بس اتمنى يا خوي .. ترسل الصورة الأخيرة لجريدة عكاظ .. وهم عاد عندهم طريقة تخلي المسؤولين يحطون العمود في مكانه الصح .. وطريقتهم انهم يعرضون الصورة يوميا الين ماتنحل المشكله والله انصحك تسوي اللي قلتلك عليه .. حفاظا على ارواح الناس

  5. انوااااع التنسيم >>> خق مع المحشش بس انه من كاميرة جوالك هههههههههه يا حظ هالكاميرا بعيونك :$

  6. :$:$:$:$:$صور وتعليقات خبال بس حللللللللللوة ضحكت الين قلت بسسسسسسس الله يعطيك العافية

  7. السلام عليكم عساك على القوه صراحه حلوه سمره حمزه مسوي زحمه والطريق فاااااااااضي والاحلى سالفة المدرسه الله يسعدك:D::$:D:$:D:$:D:$:D:$:D:$:D:$

  8. والله بطل الصور 😀 والله لو يسمع الامير عن سالفة راعي الغنم B والله يضبحة خخخخخخخخخخخخخ مشكوووووووووور لى الموضوع

  9. الصور جدا معبره والأخطاء واضحه أما البيوت صراحه لازم نجرب نسكنها ولا شو رايك هههههه تسلم يالغالي

  10. عامر قوت القلوب عبدالعزيز (أنت قلبي) جهاد الغامدي (راح أرسل لهم الصور وبدون حقوق وشكراً لك) al-ran يركدون (تسلم جيتك يالغالي) الجمل الحكيم FaHaD محمد مشعل حسن الهلي (شكلك دايم تفطر منه خخخ) رضوان خليفات عبود خالد نايف هديل d7om al- hudaif عزوز تركي الوسام لمحمد كلي غرور الله يعافيكم جميع وشاكر لمشاهدتكم ولحضوركم ويعطيكم العافيه (F) < < ورده

  11. هههههههههههههههههههههههههههههههههههههه حلوؤوؤة القرنبع ولا المحشش اللي راسم شعار السعودية خخخخخخ مسوي وطنية على غفلة ههههههههههههههههه والله حركااات … يعطيك العافية مرسال ع الفلة

  12. يا جماعة لو سمحتم انا مصرى وفى رسايل مش بافهمها من الللى بيبعتها الاعضاء ياريت تكون اللغة العربية هى الاساس – ولو كان الجروب منشا للاخوة للخليجيين فقط ياريت حد يقول واحنا نلغى الاشتراك فيه

  13. بعد اذنك يا مرسال الأخ Khaled طيب ممكن تترجم لي الكلمة اللي أنت كتبتها بيبعتها واختلاف اللهجات لا يفسد للود قضية عاد انتم ياخواننا المصريين ما شاء الله عليكم لهجتكم واصلة الدنيا أما اقتراحك ياريت تكون اللغة العربية هى الاساس قالو لك نتكلم هندي والا الماني ايه قصدك فصحى فصحى… وجهة نظر سليمة مع اني ما لي مشاركات في القروب لكن ننتظر رد ابو نواف والاعضاء تحياتي واسف على اللقافة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صور : بيوت في العلالي + إبن أبوك إقمز …

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول