صباح الصبح ياقزازتي


صباح الصبح يا // قزازتـي ..!!

قصة من التراث الرياضي  الي هو الرياض

كان ياماكان في مثل هالحزة من يوم الأحد الموافق تموز مارس جالكسي الفائت كانت سيارتي راقدة في هدوء وانواع السعابيل عند باب بيتنا وكنت أنا المدعو أعلاه الموقع أدناه منسدح وفاقن خشتي في فراشي الوثير الي إذا جيت انام رحت له المهم عند الساعة 7 وثلث جاني أخوييقول : محمد قم شف قزازة سيارتك منسدح جنب السيارة  //  منسدح, سيارة , قزازة , حرامي , جهاز , انذار

>> يحل كلمات متقاطعة الأخ

طبعا أنا ماصدقت نزلت وفعلا لقيت قزازة سيارتي منسدحه داخل السيارة ومكسوووورة و مسروقه شنطة الحلاقه الي ماتجي قيمتها 250 ريال طبعا الحمدلله ماانسرق شيء غير شنطة الحلاقة والقزازة انكسرت ..  لماذا أيها الحرامي الدلخ تسرق الشنطة وتترك الاستبنة أيها الأحمق الغبي الأبله المغفل المعتوه

<<  يطلع حرته الحين عطوه فرصة

 بس يعني دامك تعبت وكسرت االقزازة علي اسرق شي يستاهل اسرق المسجل اسرق الاستبنة أي شي يستاهل عشان احس ان القزازة انسرقت على شي يستاهل خخخ

>> ورى ماتحمد ربك انت وخشتك بس شنطة حلاقة وجلست تصيح اسبوع عليها

طبعا هالسرقات انتشرت في الرياض انتشار الصبح في الهشيم ماادري الهشيم في الصبح الي هو المهم انها انتشرت حتى صرنا نخاف على الاوادم انهم ينسرقون .. أتمنى انه يكون هناك حل جذري لهالمشكلة الي جالسة تتفاقم قدامنا !!!

يعني مو معقولة بيتنا وعائلتنا المصون تعرضت لـ 6 حالات سرقة في سنتين غير الي أعرفهم انسرقوا

…..

انتهت عملية السرقة وبدأت رحلة العـلاج واصــلاح القزاز

رحت لمحل تصليح القزاز في الصناعية ودمعتي في عيني اليمنى وفي عيني  اليسرى عجاج القزازي وانا  قافلتن معي وش الي انسرق الدعوة سايبه أول مادخلت السيارة لقيت في وجهي سيارة شرطة قلت الحمدلله بفتك من روحة القسم وابلغ هنا .

يوم شفت العسكري الا الاخ مسروقه الدورية ومكسورة قزازتها ومسروق جواله منها هنا لم أتمالك الا ان افق خشتي واحمد ربي .

طبعا بعض العسكر الله يهديهم ماعنده أسلوووب أبد يعني بما أنك عسكري وبزيك الرسمي فهذا يعني انك تمثل جهاز حكومي لما يسألك واحد عن شي مو معناها انه يقصدك شخصيا معناها انه يقصد الجهاز الي تعمل فيه .

طبعا بما أن شنطة الحلاقة مسروقة فلازم أغث العسكري وأتكلم عنالسرقات وان الشرطة ماعندهم ماعند جدتي ليه لماذا ليش وش المشكلة ؟ جلسنا نسولف عن السرقات وكل كلمة والثانية يقول : احمدوا ربكم انك مسروق شي بسيط , غيرك انسرق منه فلوس

طبعا ماقلت له انسرق مني شنطة حلاقة ولا كان حطني في الدورية وعلى القسم بتهمة ازعاج رجال الامن خخخ

فلما شفت انه هذا منطق بعض وليس كل من يمثلون الشرطة قررت اني لما أحط شي مهم في سيارتي اخلي القزازة مفتوحه ماله داعي انسرق وتنكسر قزازتي اقل شي انسرق بس

طبعا كان مجمل الحديث وانا انتظر قزاز سيارتي الجديد يركب عن السرقاات وكان كل واحد جالس يحمل قصة سرقة معاه وانا اسمع واقول إلى متى وانا نسمع هالقصص ؟!!  متى تنحل هالمشكلة في مدينتنا الجميلة الرياض الي شوهتها يد الحراميا .

خلال فترة العصر تقريبا كان فيه عشرين سيارة أغلبها مسروقه يعني نقول 12 سيارة مسروقة في العصر في يوم واحد فكم بتكون عدد حالات السرقة للسيارات فقط في يوم واحد ؟!!

أتمنى انها ماتكون نتيجة مروعة طبعا مافيه احصائية رسمية لعدد حالات السرقة وان كنت اتمنى انه توجد احصائية لتوضيح المشكلة أقل شي يبدون الناس ياخذون حذرهم

برذركم : وقف عندك
شكر خاص لكل من ساهم في هذا العمل .
<<  ماكنكم ذكرتوا برامج القناة الأولى اذا جاء ينتهي البرنامج قام يعدد كل الي معه من مصورين وغيره حتى الهندي الي يجيب الشاهي  ياخويا ترانا نعرف نقرأ محطوطه اساميهم على الشاشة ونعرف نقرأ


تعليقات 3

  1. هههههههههههههههههه الله يعوض عليك وتعيش وتاكل غيرها تسلم دياتك على هيك موضوع (F)

  2. ياخي غطها بكيس بلاستيك اصرف وبعدين وش فيك حاط مكينة الحلاقه في السيارة؟؟؟؟ ايش الشغل متحرك الايام هذي

  3. يابعدهم … هلا وغلا حياالله الرجال لو أدري انك بترد على موضوعي هذا كان زبرقته زبرقة باكستاني لليموزينه 🙂 تراي منذو مبطي وانا اقرا مشاركاتك بس بصراحه طاقني العجز أرد 🙂 يعني تراي متااابع لكتاباتك ==== هلا وغلا x3x03 اسمك يذكرني باختبار الوزارة مادة كيمياء السؤ ال الثالث اوزن المعادلة التالي 🙂 اذا فهمتوا شي قولوا لي 🙂 ويسلمك ربي على التعليق المذوق ====== هلا وغلا شبح الليل توبه وقسم ماعاد اتعودها صورة وجه يصيح من جد الصيفية اتوقع انهم يسرقون الكحل من العين << يسمع بالامثال الاخ تحياتي للجميع وخاصة الي ردوا وكتبوا تعليق 🙂

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

صباح الصبح ياقزازتي

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول