سليمة خرش – ذوبان الانوثه (الجزء الثالث والاخير)


سليمة خرش – ذوبان الأنوثه ( الجزء الثالث والأخير )

تأليف / ابو هديب


تعبت ( سليمة ) من الاسترخاء لتجلس على طرف السرير وقد أعطت ظهرها للباب لتفكر في صمت فيمن تتزوج ولم تشعر إلا بيدين خشنتين كأنهما يدا نجار لفت على عينيها من الخلف لينطلق صوت غليظ .. حزري فزري .. لم يكمل عبارته إلا وقد أمسكت بيده وسحبت بها إلى الأمام ليتكأ جسده عليها وترفعه وتقذف به إلى الأمام ليطير في الهواء ويضرب في الحائط ويسقط وتسقط فوق رأسه ساعة الحائظ .. بعدها أمسك بذراعه وهو يأن ويهمس مش معؤل أأطع دراعي أن ما كنتيش راقل يا ( سليمة ) .. إيه النشاط دى .. أقتربت منه ( سليمة ) لتقول له .. معليش يا دكتور ( فتحي ) كنت سرحانه شوي وما ميزت صوتك … قاطعها وهو ينظر إلى حاله ..

كل دى وسرحانه أمال لو كنت مركزه كان حيحصل إيه مش حيبأى فيني غير السماعة اللي عليا .. دنا كنت قي ابشرك بأزن الخروج من المستشفى … تجاهلته ( سليمة ) وهي تخرج حقيبتها وتأخذ منها ملابس جديدة لتقول له ولكل الموجودين وجيهكم على الجدار أبغير ملابسي .. تمتم الدكتور ( فتحي ) بقولة فيه حاجة أسمها حمام .. توقفت ( سليمة ) وتطلعت إليه وهي تجيبه وجهك للجدار لأخلي حواجبك عقارب للساعة اللي طايحة جنبك

أمتثل الكل إلى أوامرها ولفوا وجوههم نحوا لجدار ليقول الدكتور ( فتحي ) عوزانا نرفع رقل كمان وإلا نلف بس .. أجابته بعلبة الكلنكس في رأسه ليسود الصمت بعدها لتقوم بتغيير ملابسها ومن ثم أمسكت بجهازها المحمول لتتصل على صديقتها ولكن الحد الائتماني داهم هاتفها لتقوم بالاتصال على 902 الذي رد عليها محمد سعيد بكل أدب وبصوته الناعم لتصدمه بقولها ..

مسوي أن صوتك زين عطني رئيسك خل أكلمة .. تجاهل عبارتها بسؤاله لها .. أقدر أخدمك يا أختي .. أجابته بقولها ياليت تخدمني وتدخل بالسماعة على مديرك عشان يكلمني … قال لها اللي أكلمك منه مهوب سماعة هذا هدفون ينحط على الأذاني .. تأففت وهي تقول له خل رئيسك يكلمني وإلا منتب لاقي أذاني في راسك تحط عليه الهد فون … صمت للحظات ليقول لها يا أختي حنا كلنا في خدمتك قولي وش عندك .. تعوذت ( سليمة ) من الشيطان أكثر من مره حتى سمعت صوت الشيطان وهو يقول لها يكفي تتعوذين مره وحده ولعد أجي …

زجرت في وجه الموظف أنا أدري كل هالأدب عشان المكالمات مسجلة لكن ابسكر بعد شوي وبيجني أتصال منك من بطاقة سوى مسجله بأسم هندي وبتمتحن أهلي وتتميلح ، لكن قسم بالله لو سويتها أني لأخليك تدخل بيتكم أخواتك يتغطون عنك يحسبونك رجال غريب … دخل الرعب قلبه ليتمتم قسم بالله أبي أخدمك أنا موظف جديد ومالي في هالشغلات .. قالت له وهي تزفر من شدة الغضب .. رجع لي الخط

أعاد لها الخط في أجزاء من الثانية لتتصل على صديقتها التي ردت على الفور بصوت متلعثم .. هلا ( سليمة ) وش أخبارك الحمد الله على السلامة خفنا عليك .. قاطعتها (سليمة ) ( تشب ) ومن ثم استطردت أنا جاية عندك هالحين أي شغل في يدك خليه أبي أشاورك في شغله ..
أقفلت الخط في وجهها كعادتها ووضعت الهاتف في محفظتها لتشاهد الدكتور ( فتحي ) وجميع من الغرفه كلهم قد وقفوا ووجهم للجدار لتخرج وتدعهم ..

* * * *

أوقفت راعي تاكسي وقد لف وجهه بالشاش لتعطيه وصف المنزل وهي تقول له .. وجهك مهوب غريب علي أنا سبق وقد ضربتك .. قال لها لا مدام هازا حادس .. اتكأت على المقعد وهي تقول له معليش معد أجمع من كثر حقين التكاسي اللي ضربتهم ..
صمتت بعدها ليسير بها في شوارع المدينة حتى أوقفها أمام بيت صديقتها لتعطي التكسي أجرته وتنزل لتشاهد أطفال صغار يرمون بالحجارة على بيت الجيران المقابل لهم ويهربون إلى داخل منزلهم ليفور الدم في عروقها وترفع عباءتها وتلحق بهم وهي تقذف بالحذاء إلى الخلف حتى لا يعيق حركتها وقبل أن يغلقوا باب منزلهم رفسته بقدمها ليطر الطفل القابع خلفه ويضرب في الباب الداخلي لتدخل وتمسك بهم وتبرحهم ضرباً حتى أنها من شدة الحماس ضربت الخادمة معهم دون أن تعلم بأنها خرجت حتى تبدل أسطوانة الغاز ..

لتقول لهم ما علموكم أهلكم أن الجار قبل الدار ترضون أحد يأذيكم ويخرب بيتكم كانت تتحدث معهم وهم مكومون على الأرض .. ترضون أحد يسوي بكم كذا ويكسر قزاز بيتكم .. ترضون يسوون بسياراتكم كذا .. كانت تتحدث ومع كل كلمة ترضون كانت ترفس كل واحد على بطنه حتى كره الأطفال كلمة ( ترضون )

خرجت من منزلهم ومشت على الإسفلت نحو حذائها المكوم من التعب بسبب المهمات التي يخوضها معها انتعلته وضربت جرس بيت زميلتها بعنف والدماء تغلي في عروقها ليفتح لها أخو صديقتها ومن ثم دخلت وجلست في المجلس وأخذت تراقب زميلتها وهي تأتي وتذهب إلى المطبخ وصوت أخيها في الخارج يهدر كهدير حبال السواني ( جيبو الشاهي بسرعة ) لتقول الفتاة لـ سليمة .. معليش ثواني بس أضبط لهم الشاهي وأجيك .. وأخيها في الخارج يصرخ ترى أن جيت عرفت أتفاهم معكم بسرعة …

هنا نهضت ( سليمة ) بعد أن تأكدت بأن زميلتها دخلت إلى المطبخ لتخرج نحو أخيها وهي تقول له خير يا الحبيب بتسمع أخوياك مراجلك .. تتشطر على أختك الضعيفة عشان ترضي دشيرك اللي مجمعهم … قال لها خلك في حالك وروحي خشي داخل لأخليك تروحين لبيتكم على مكنسة .. تطلعت إليه ( سليمة ) وهي تشمر عن ساعديها وتقول تدري أني أفكر أركب خمس براغي في وجهك وأبيعه على محل كفرات .. أراد أن يرد عليها ولكنه بتلع كلماته بسبب اللكمات والركب التي انهالت عليه حتى أنها مرت بجانب دراجة صغيرة أخذتها وزينت بها رأسه ومن ثم تكوم أمام قدميها بجانب الملحق ..

بعدها رفست باب الملحق لتدخل على الشباب الذي صد منهم من صد والذي أغمض عينيه لتقول لهم لا والله فيكم الخير أحييكم على الفروسية اللي تتمتعون فيها مغمضين أنتم وخششكم تحسبوني أخته وإلا وحده من قرايبة لو أنكم ما تعرفوني كان هالحين أنا أسبح في المعاريض حقتكم .. كل واحد يضف جواله وبوكه اللي راميه ويطلع برى قبل ما أعلق أرقابكم بليات الشيشة .. خرج صوت الولد من الخف وكأنه يحتضر لا تطلعون ما عليكم منها بالله يا عصام ألعن والديها .. أسكتته ( سليمة ) بركلة خطافية وهي تقول له خسأت أيها الفاجر العربيد

.. أنهت كلماتها وشعرت بحرارة ونقص في الضوء جعلاها ترفع رأسها لتشاهد ( عصام ) الذي كان يضاهي الباب في طوله أسود البشرة كبير الأنف منفوخ العضلات تشهد له جميع أندية الحديد ..
فيه شي يا الحبيبة وش عندك طاقه خوينا ..

تطلعت إليه للحظات قبل أن تقول تصدق لو ما تكلمت كان أخذتك لبيتي اسطوانة غاز .. أقول توكل على الله ولا تغرك نفخة جسمك لأنك لو طولتها أبحط صدرك في الفتيرينه حقت نعومي .. لم تكد تتم حديثها حتى أتتها لكمة في وجهها جعلتها تحلق في الأفق وسقطت في حوض النخلة ..
لتقوم وتعدل فكها بيدها وتمسح خيط الدم النازل من شفتها السفلى وبعد ذلك أخرجت جوالها وهي تشير إليهم بيدها وتقول لهم لحظة شوي شباب أبسوي مكالمة وأرجع لكم .. ألو مستشفى العسكري ممكن ترسلون سيارة أسعاف وياليت بعد تشوفون المستشفى اللي جنبكم عشان يرسلون تعزيز سيارة ثانيه لأن أضن سيارة وحده ، لحظة شوي ..

أخذت تعدهم لتعود وتحدث الرجل حاول تجيب أكثر من سيارة لأن سيارة ما تكفي .. أغلقت الخط ونفضت عباءتها وطقطقت برقبتها يمنة ويسرى وخرجت من حوض النخلة وبدأت المعركة التي لو بقي في قلم التاريخ حبر لكتبها وتوجها وجعلها تدرس في مناهج التربية الحديثة ولو كانت عيادة أسنان قريبه لاستفاد صاحب العيادة من كمية الاسنان التي تساقطت في تلك الليلة فقد أصيبوا أصابات بالغة حتى الرجل صاحب العضلات أمسكت به مع حلمة صدره وسحبتها لتخرج في يدها ويخرج الهواء المختزن فيها ..

كومتهم وحملتهم بدمائهم ورمت بهم في حوض النخلة وهي تقول خلكم تكونون سماد للنخلة أبرك لكم .. خرجت صديقتها وصرخت من هول المنظر وهي تقول وش هذا يا ( سليمة ) أجابتها ( سليمة ) هذولي حشرات المجتمع كومتهم لك في الحوض أتوقع أن نخلتكم هالسنة مهيب حامل برطب بتحمل أكياس دم ..

أمسكت بيد صديقتها وهي تقول .. لا تشيلين همهم مجرد اغماء وكسور نتيجة الضرب شوفي لي الطريق أبغسل تطلعت إليها صديقتها وهي تقول بخوف وتردد يعني من بيتغطا عنك .. ضربت ( سليمة ) رأسها وهي تقول نسيت ساعات أحس اني ولد لدرجة أني كم مره أقوم الصبح آخذ مكينة الوالد الله يرحمة أبحلق دقني بس اتذكر أني بنت وأرجعها مو مشكلة أبن آدم طبيعته النسيان ( الناس تنسى موعد تنسى شي مهوب تنسى انها بنت )

المهم ما يمديني أغسل دم السفلة عندي موضوع ابشاورك فيه أنا تقدم لي مطوع وملحن والحقيقه ما أخفيك فكرت وتوصلت لحل هو يا أني أتزوج واحد منهم .. أرادت أن تصحح لها صديقتها ولكنها شاهدة الذين تعرضوا إلى القصف فقالت لها رايك صح حتى أنا أشوف كذا .. زفرت ( سليمة ) قبل أن تقول أجل على بركة الله أبتزوج الملحن عله يكون صلاحه وهدايتة على يدي بعد الله سبحانه وتعالى …

يا الله عن أذنك يا الله يمديني على صلاة الجماعة في المسجد قاطعتها صديقتها بتعجب .. وشو جماعته .. وضعت ( سليمة ) يدها على رأسها وهي تقول معليش جاني الشعور ثاني مره اني ولد مو مشكلة يا الله يمديني أروح البيت أضبط عمري وبالمرة لا تنسين تقدمين لي أجازه وحذري البنات أنهم لو ما نضبطن وانتبهن لدراستهن أبجيهم في بيوتهم ولو يستعدي الأمر أجيهم في أحلامهم وألعن خيرهن وأرجع … عندها خرجت من بيت زميلتها وتوجهت إلى بيتها ..

* * * *

جمعت أخوتها ووالدتها في صالة منزلهم ليخيم الهدوء على المكان إلا من صوت خطوات ( سليمة ) وهي تذهب وتأتي أمام أعينهم لتكسر حاجز الصمت بقولها .. شوفي يمة دقي على أم الملحن قولي لهم يشرفونا بكره وثاني شي قولي لها تجي لحالها ولا تجيب معها أي بنت من بناتها لأنه وبكل بساطه لو جاء أحد غيرها برميهم في الشارع بدون عباياتهن لأني مانيب فرجه لهم ولا راح أتحمل مصالة النقد ..

وبعدها التفتت بغضب نحو اخوتها لتقول لهم وثالث شي يا كلاب أي واحد منكم يقرب على صواني الحلى وإلا البيتي فور وإلا العصيرات قسم بالله لأعلقه في المنور وأخليه يصير كنه جرس كنيسه يتدودل .. أتمنى أنكم تسمعون الكلام وما تخلوني أحول بيتنا كنيسه بتعليقي لواحد فيكم ويصير كنه جرس ..

دخلت إلى غرفتها وضلت طوال الليل تشاهد أفلام ( مصرية ) كي تتعلم ماذا تفعل من حيث تقديم الصينية وماذا تقول .. وبعدها خلدت إلى النوم واستيقظت باكرا وقامت بجميع الترتيبات اللازمة

* * * *

مضى الوقت بسرعة على والدتها ولكنه لم يكن كذلك بالنسبة لـ ( سليمة ) التي جلست مع الكوافيرة لتقول لها معليش جبتك اليوم لاني من زمان ما حطيت ميك أب حاولي تعدلين عوامل التعرية اللي في وجهي وتطلعيني زينة بدون ما تقولين ولا حرف وإلا طردتك برى ( ما عندها وقت ) .. وضعت لها الكوفيرة بصمت تام كريم أساس ( سيشيدو ) و كونسيلر كلينك مخفي العيوب ومن ثم ايشدوا ( كرستيان دور ) وبعدها كحل ( ماك ) و مسكرة ايف سان لوران وبعدها روج من سماش بوك وفي الختام لمعة من ماك فور ايفر لتنهض وتتطلع إلى نفسها في المرآة التي تموجت بانتفاضه رتيبة لتقول بصوت خافت .. ما أدري أحس المراية خايفة مني عشان كذا مطلعتني زينه ..

قطع حديثها صوت جرس الباب لتركض والدتها وتصرخ من فوق الدرج مناديةً الأطفال افتحوا الباب جو الضيوف .. أفتحوه جعلكم العلة لا يغيرون رايهم ويرحون .. كانت تصرخ ولكن الأطفال كانوا منهمكين أمام التلفاز بلعبة البلاستيشن لتخرج ( سليمة ) وهي تتمايل في مشيتها بسبب الكعب لتقول يلعن شكله نسيت شلون ينلبس من كثر ما البس زبيريات ..

وبينما هي تسير سمعت والدتها تنادي على الأطفال وتأمرهم ولكنهم لا يبالون لها لتحث الخطى وتنزل عليهم كالصاعقة وترفع فستانها وتقوم بركلهم وهي تلعن وتشتم وتخرجهم كلهم ليفتحوا الباب ومن ثم لبست حذائها ونزلت والدتها واستقبلت أم العريس لتمضي معها وقتاً في الحديث قبل أن تهمس ( سليمة ) لوالدتها من خلف الباب وتشير لها كي تأتي وعندما أتت سألتها ( سليمة ) يمة أجيب العصير وإلا أدخل عليكم وامسك أطراف فستاني وارجع رجل واحني جسمي على قدام مثل حركات عارضات الأزياء ..

تطلعت إليها والدتها وأرادت أن تقول لها انطمي وروحي جيبي الصينة ولكنها خشيت منها لتقول لها بكل لطف لا يا بنيتي روحي جيبي الصينية وتعالي أجلسي معنا ..
أحضرت الصينة لتقول والدتها عطي أم طارق العصير .. أعطتها وجلست على الكنب وهي مباعدة بساقيها عن بعضهما لتكون الركب بعيدة ووالدتها من بعيد تشير لها بأن تضم ركبتيها حتى تكون كفتاة رقيقه بدل جلسة الشباب التي تجلسها .. سمعت كلام والدتها لتقول أم العريس تعالي يا بنيتي عندي هنا مشاء الله تبارك الله وش هالجرح اللي في خدك .. أجابتها ( سليمة ) بتأفف هذي ضربة سكين غاشمة من أحد شبابنا الطائشين أثناء دفاعي عن فتاة في أحد المولات كلها كم يوم وتروح مع العلم أن لها اكثر من سنتين ..

تراجعت أم ( طارق ) لتقول لها أم (سليمة ) بنتي تحب تمزح هي ما خشه نفسها وهي تحك وجهها وكلها كم يوم وتروح ..
شربت أم ( طارق ) العصير وخرجت وأعطتهم موعد بأنها سوف ترد عليهم بعد يومين وبالفعل تحققت نبوءتها وردت عليهم بالموافقة وطلبت تحديد موعد ليأتي أبنها ( طارق ) ويرى( سليمة ) ..

وتم الرد على أم ( طارق ) بأنه بعد ثلاثة أيام يأتي ويراها وبقدرة قادر مضت الثلاثة أيام وحضر (طارق) ومعه باقة ورد وقد فعل في وجهه ( سكسوكة ) نحيفة وكأنها ذيل فأر شارد ليدخل إلى المجلس وتدخل عليه ( سليمة ) ومعهم خالها المحرم لتجلس على طرف الكنب والصمت يخيم عليهم لينظر خطيبها ( طارق ) إلى ساعته وهو يقول لخالها مشيرا نحو ( سليمة ) ممكن ترسل أخوها اللي جالس هناك عشان يستعجلها أنا عندي موعد ..

ما إن نطق كلماته حتى نهضت ( سليمة ) واقتربت منه وخالها يقول لها امسحيها في وجهي يا بنت أختي ما يقصد شكل نظره ضعيف .. قاطعته ببرود وهي تتقدم مهوب مشكلة أنا أسوي له تشطيب عشان يشوف زين .. ما إن وصلت عنده حتى قالت له وهالحين تشوفني زين .. تطلع إليها بسرعة لتقول له عادي خذ راحتك تفرج مانيب مثل هالبنات اللي تخش ومنزله شعرها على وجهها وتقدم الصينية وهي مدنقه عشان محد يشوفها .. واذا ما تشوفني زين ترى أوقف لك فوق الطاولة حقت الشاهي ..

تلعثم ( طارق ) قبل أن يقول لها وش دعوة شايفك بس كنت امزح .. زفرت وهي تحني جسمها نحوة وتلف يدها حول رقبته لتقول له وهي تهز رأسه معليش متى المعرفة عشان تمزح معي هاه .. اقرب لك .. هاه ومع كل نهاية جملة فيها ( هاه ) تهز برأسه حتى أمسك خالها بيدها وهو يقول أذكري الله وادحري الشيطان خربتي الزواجة .. قاطعه ( طارق ) بالعكس من يقولك خربت أنا موافق أحب الأنثى اللي محتاجه ترويض ..

أعتدلت ( سليمة ) وهي ترد عليه أجل محتاجه ترويض أنت شكلك لو شلت الملاعق عنك ما عرفت تاكل بيدك عالعموم أنا موافقة ومدة يدها في جيبه لتأخذ قلمة وتمسكت بيده وتكتب عليها وهي تقول هذا رقم جوالي دق علي عشان ننسق للعرس دامك موافق .. نطقت بكلماتها وخرجت تاركة ( طارق ) خلفها يصدح بالموافقة ويأخذ من أهلها موعدا لتحديد العرس

* * *

تمت الموافقة وتم تحديد موعد العرس وكان ( طارق ) يكلمها وكانت هي تملي عليه شروطها بأن الزواج ما يكون فيه موسيقى وهو يقول أبسوي لك زفه من ألحاني وتقوله ما يحتاج يكفي نجيب لنا كم بزر ينشدون مع كم طقاقة عشان نخلي هالبنات يهزون ويخففون من شحومهم .. ويقنعها بأن تجعل الزواج داخل قاعة في عمارة المملكة أو الفيصليه وهي تقول له ما يحتاج وشوله الخساير نستاجر استراحه في الدائري الجنوبي ونخلي بنت ترفع ذيل الفستان من ورى عشان التراب ..

ويوافقها ويقترح عليها بأن يكتب البطاقات بماء الذهب وهي تجيبه أنا أشوف أن حنا نكتفي برسايل جوال اللي بيجي حياه الله واللي مهوب جاي بسلامته ويحدثها عن شهر العسل في باريس وجنيف وهي تقول له خلها على أبها من زمان ما مسكت خط مكسر ..

ويقول لها عن مأدبة الطعام من الفور سيزن وهي تجيبه ما أدري ليش الهيط هذا كله لو أنك ماخذ ازابيث تراك ماخذ ( سليمة خرش ) حتى أني شايله هم وش نكتب في رسايل الجوال أفكر احط أسمي وأحط صورة أبوي بدال أسمه ثمن أسم جدي جنبه المهم لا تتخسر ولا شي ترى الناس بتجي تاكل وتمشي والنقد لاحقك لاحقك لو حطيت العرس على سطح القمر ولو طلع شغلك كله زين بيقولون مالقى إلا هالشيفه يا خذها عشان كذا خل السب يجي في الاستراحة اللي بناخذها ولا يجي فيني …

* * *

تزوجا في استراحة في الدائري الجنوبي وحضر الحفل رهط من البشر وجلس بجانبها في الكوشه ولكنه لم يستطع أن ينظر إليها أو يمسكها وذلك لكثرة أطفال أقاربهم الذين تصوروا معهم مما أدى عدم خروج وجه ( طارق ) في جميع الصور …

دخلا بيت الزوجيه لتتجه ( سليمة ) بكل ثقه إلى غرفة النوم وهو في الصالة ينتظر كي يعطيها فرصة لتتعرف على البيت ولكنه سرعان ما أتاه اللحاف والمخدة في وجهه وصوت ( سليمة ) تقول له نم في الصالة هذا عقاب لك عشان ثاني مره ما تشتري سرير مزدوج قايله لك سرير فردي ..
حاول أقناعها ولكنها أنهت الحديث بقولها شف خلها على الصالة قبل ما أنومك في الحوش وأخلي الذياب تنهش لحمك .. لم تكد تصل إلى كلمة الذئاب حتى توقف مخه لينظر من خلف النافذه كي يتأكد من سكنه هل هو في المنزل أم في الغابة ..

حاول النوم في الصالة ولكنه لم يستطع ليأخذ عوده الذي اعتاد عليه ليدندن ويغني ويرفع رأسه وهو مغمضا عينيه من شدة الأندماج لتأتي في وجهه صينية الشكولاته ويخلد بعدها في نوم عميق بسبب عنف الضربه ليستيقظ في الصباح الباكر وهو يسأل نفسه .. وش اللي صار ليذهب ويوقظ ( سليمة ) بالدق على باب غرفتها كي تعمل له وجبة الأفطار ولكنها لم تستجب ليزيد من قوة الضرب ويزيد حتى استخدم قدمه لينفتح الباب بسرعة البرق وتسحبه إلى داخل الغرفة وتضربه ضربا مبرحا وهي تقول أذا شفتني نايمه الباب هذا ما تعتب عنده فاهم قاطعها وهو يقول كنت ابسألك تبين أصلح لك بيض عيون وإلا بيض مسلوق ..

أمسكت بقميصه وهي ترجه مزعجني عشان تعطيني خيارين كلهم في النهاية بيض ، أطلع برى ولا تحاول تستفزني عشان ما تجي كلمة الطلاق على لساني وأطلقك قال لها العصمة في يدي أفلتته وهي تقول معليش جاني الشعور نفسه نسيت أنها في يدك ممكن تطلع برى خرج وتركها ..

* * * *

عاش ( طارق ) أسوء أيام حياته فقد سقط من وزنه الكثير حتى أصبح لا يرى بالعين المجردة و ( سليمة ) ترافقه معه في حفلاته الخاصة وخصوصا عندما يقوم بتلحين أغنيه لمطربه فإنها تجلس على الكراسي تتابعه وتتابعها وما إن ينتهوا تقوم بضربهما معاً بحجة الفساد والمجون والدعارة حتى لم يعد هناك أي فنانه تطلب تعاونه إلا إنسانه وصلت إلى مرحلة التبلد من كثرة الضرب .. كلف ( طارق ) بتلحين أغنية الحلم العربي وحضرت معه ( سليمة ) ليتحول إلى الكابوس العربي فقد أصرت أن تغني وغنت مع الجماعة وما انتهت الاغنية حتى اكتشفت بأنها تقف لوحدها والكل هرب من الاستوديو ليصرخ أحد الحضور في الاستوديو أن أنكر الاصوات ولكنها اخرسته قبل أن يكملها ..

عاشت معه هكذا حتى شعرت ولمست حبه لها رغم قساوتها وتعاملها الجاف لتفكر في تغيير معاملتها معه وتلبي رغباته واحتياجاته وبينما هي تفكر سمعت صوته وهو يجري محادثه تلفونيه والغضب يعتريه لتأتي ليه وتسأله وش القصة امتص غضبه أمامها وأبتسم من الخوف وهو يقفل السماعة ويقول لها لا عادي مافيه شي واحد يهددني بالقتل أبروح اشوف وش يبغى وأنت خلك هنا لم تحاول أن تقول له شيئاً وكتفت بمتابعته وهو يخرج من المنزل لتخرج خلفه بسيارة أجرة وهي تتصل على الهيئة وتخبرهم بأن يلحقوا بها ليقولوا لها بلغي الشرطه قالت أنتم اسرع لو دقينا على الشرطة حطونا متواطئين واسأله مالها سنع خلونا نلحق زوجي ..

حددت لهم أسم الشارع والفيلا التي دخلها لتنزل وتقفز فوق السور إلى الداخل وتشاهد ( طارق ) من خلف النافذة وقد حضن فتاة أخرى لتهجم عليهما وهي تقول .. مسوي مسرحية كاملة عشان تجي لها طبعكم الخيانة يا الرجال .. صرخ في وجهها مستنكراً طبعنا كذا وأنت ما عليك لوم محسوبه علي حرمة ومضاف في قائمة المحصنين وش تبيين أسوي تقربت لك بكل الوسائل ..

صرخت وتقدمت نحوه وانهالت عليه باللكمات وهي تبكي وتقول مهما سويت ما تخوني من وراي أنا كنت ابتعدل على يدك …سقط على ظهره بسبب لكمة أصابت وجهه ومن ثم قفزت على المرأة الأخرى وضربتها وبينما هي تضرب أتتها طلقة نارية في كتفها من الخلف لتلتف وتجد الأدخنه تتصاعد من فوهة مسدس ( طارق ) لتسقط وآخر شيء وقعت عينيها عليه هو أبو معاذ الذي أقتحم المكان على صوت الطلقة النارية ليتم نقلها إلى المستشفى ويتم عمل عملية لها ونقلها إلى غرفتها بعد استقرار حالتها لتفتح عينيها ..

وتلتفت على الجهة اليمنى وتشاهد الدكتور ( فتحي ) والمرضى على نفس وقفتهم لتحاول النهوض بصمت تام وتأتي لتقف بجانبهم جاعلة وجهها للجدار وظهرها للخلف وهي تقول .. ساعات يكون منظر الجدار أحسن بكثير من بعض المناظر اللي ما ودك تشوفها
نطقت بكلماتها وضلت معهم هكذا هي لا تريد أن ترى إلى الخلف وهم ينتظرون إشارة منها كي يلتفتوا حتى ضن الكثير بأنهم عبارة عن ورق حائط أو تماثيل لتزيين الغرفة

النهاية


لن تكون هذه آخر سلسلة ( سليمة خرش ) سيكون هناك المزيد كلما جد شيء جديد

الإيميل
[email protected]


تعليقات 34

  1. انا ابغى اعرف شي واحد .. وش الهدف من هالكلام كله.. من جد فضاوه ادري ان المفروض اسوي اكس للصفحه او حتى ديليت للايميل دامه ما عجبني وماله داعي اعلق بس مو كل تعليق لازم يصير مدح وش امدح ؟؟ لا اسلوب حلو ولا فكره حلوه ولاهدف حلو ولا… شي !

  2. موضوعك من اوله ماعجبنى <<اسمح لى ابدى رأيي لهدرجه المرأه المطلقه كذا جفسه (ودركولا) تخوف عموما (خير الكلام ماقل ودل ) ولا عندى كلام كثير بس اخاف اتهور وتهاوش مع احد

  3. بالعكس الموضوع كوميدي ودخلت فيه قضايا موجوده في مجتمعنا والكاتب وضعها في قالب فكاهي .. بعيد عن النقاش الجاد والرتابه غير كذا ليش تنكرون ان فيه نسبه كبيره من المطلقات سبب طلاقها عنفها وجفافها العاطفي !!!!! . عن نفسي انا ضحكت وتسليت في القصه . آبو هديب .. اتمنى تكمل ابداعك اسلوبك ناجح وفكاهي ولولا اختلاف الاذواق لبارت السلع .. شكــرا

  4. بصراحة ماله داعي تعليقاتكم lماعجبك الموضوع امسح الايميل وشوف لك شغلة مفيدة في حياتك الجزئين الأول والثاني كانوا ممتازين وهذا الجزء لولا النهاية اللي مالها داعي كان ممتاز وبعدين محد طلب منكم تمدحوا ومافي داعي للثبارة عيب يعني

  5. ممتع بنفس متعه الاجزاء السابقه منه الله يعطيك العافيه بس مدري ليه اقراة وبحلقي غصه 🙁

  6. قصتك حلوووه ولكن الاسلوب وتسلسل الاحداث بالجزء الاول والثاني ارتب من الجزء ثلاثه ع العمووم ابداع وامضي قدما وموفق وعندي طلب صغير اللي مايعجبه لاينقد لانه النقد ماراح يسوي شي الا يحطم الكاتب (فليقل خيرا او ليصمت ) اعذروني ع الاطاله …. والسلام ختام

  7. الاخوان اللي يردون معارضين واللي يقول خير الكلام ما قل ودل وسليمة خرش اللي تبي تتهاوش واللي بيحط اكس ويسكر الصفحه واللي بيطلب نقل من بيتهم عشانه فتح الموضع فيه احب اقول للجميع كثرة الكلام هنا عشان التعليقات والمواقف الساخرة وبخصوص وش الفايدة لكل موضوع فايده .. لو الشخص امعن النظر ما بين السطور بيلقى وش ابي اقول لأنه الواحد لو نزل الموضوع بالفايدة بس صارت محاضره علمية مهوب موضوع ساخر وبعدين عشان نثبت ان فيه ناس من جنب الجاده في نقدها ولا تدري وين الله حاطها فيه .. انا ما قلت في كلامي ان المطلقات جفسات وانهم كذا اللي يخلي مخك يوصل للاستنتاج هذا يخليك تمعن النظر شوي وتشوف اللي بين السطور على العموم انا اتقبل نقدكم وفيه في راس الصفحه علامة اكس حمراء لحد يقربها << توقعتوا ابقول سكروها لا ابقول لحد يقربها وكملوا قرايه والهدف من الموضوع ضحك وفيه بعض الشغلات اللي ابي اقولها << يقول في نفسه الله يعين مسلسل طاش اشوى انه ما ينزل في القروب والا كان انواع التنتيف .. يقولك واحد وش الحكمة من المسلسل كله على بعضه سخيف تجيك وحده تقول . هل يعقل يوم ناصر يقلد بنت ان هذا شكل البنت قبيح مثل مافيه حكمة تقول خير الكلام ما قل ودل .. فيه حكمة بعد تقول ارضاء الناس غاية لا تدرك وكذلك حكمة خالف تعرف ان ضحكته قال ليش تضحكني وان تكلمت جدي قالك ليش تحط موضوع جد وان تكلمت عن الهموم قالك انت يا اخي الكريم تبالغ مشكلتنا كلنا ننظر للشي من منضورنا حنا لما نكون مرتاحين ماديا نقول مافيه فقر لما ما يكون عندنا هموم نقول ابو هديب يبالغ هذا حنا مبسوطين لما بكره ابو هديب بينزل موضع عن العطاله يجيك واحد يقول حنا في خير ونعمه والحمدة الله لانه موظف لذلك ما يشوف الا نفسه دامه هو بخير واهله بخير يا اخوان 1- طول الموضوع عشان الضحك ( بيجي واحد يقول ما يضحك ) نقوله خل الضحك وخذ الفايده اللي ابي اقولها في النقد وجودكم يسعدني ونقدكم يسعدني بس ودي كل واحد منكم يشمر عن ساعديه ويكتب لنا ويورينا أسلوبه وكيف يعالج القضايا بطريقته مشكورين على مرورركم

  8. اشكر الجيمع اللي انتقد واللي مدح وكلكم والله اخواني وانا اتعلم منكم ومافيها شي توضيح بسيط .. الموضوع مرتب بس الاحداث مستارعه عشاني حشرته في هالجزء والا المفروض تكون قصة زواجها في جزء مستقل لحاله ويكون في تصاعد درامي كثير .. لكن امر الله شق القربه الترتيب تشوفه مهوب متناسق هنا لسبب سرعة الاحداث واختصارها مثل خروجها منن المستشفى وركوبها مع التكسي بدون ناي وصف للحدث وصولها لبيت خويتها وتسارع الاحداث وخروجها من بيت خويتها لبيتهم على طول خشيت في مقطع تجمع اخوانها وتلقي محاضره وطبيعي يكون الجزء الاخير ما يعجب الكثير لانه نهاية الموضوع لانه مثل ما رقينا الهرم في اول الموضوع لازم ننزل منه في آخره وتقل الكوميديا ونخش في النهاية وان شاء الله نتقابل في موضوع جديد يتخمر في راسي بس خل يزين جهازي واكتبه انا هالحين كاتب الموضوع في ربع ساعه من جهاز واحد من الشباب ومنزله حتى فيه اخطاء املائيه ما تنقحت مشكورين وثقوا ثقه تامه ان اللي يمدح واللي يذم كلهم عسل على قلبي انا في النهاية ابي ارسم البسمة على وجيهكم مشكورين

  9. ابو هديب .. توجت إبداعاتك بـ إعجابي الشديد , كنت ولازلت اتابعك بشغف فقصصك وكتاباتك استحوذت ع اهتمامي كله .. قصصك وان اختصرت سردها ستفقدت جمالها وتنقص اكثر عناصرها فجمال اسلوبك بسلاسته وترابطه .. وإطااااالته .. ^_~ اقراء سطورك وفي كل مره انهي مقطع ادعي ان لايكون اخر مقطع للقصه ,, … احييك على خفة دمك فـ الضحكه لم تفارق شفاهي من اول حرف حتى التوقيع .. اترقب جديدك دائمآ دمتـ لنا

  10. السلام عليكم8 ابو هديب تسلم يمناك ويسراك <<يمكن انه عسماوي …على مواضيعك الي تشرح الصدر الواحد وده يشوف هموم المجتمع بس موبطريقه دراميه الواحد مهو ناقص نكد مزجت بين السخريه وبين هموم المجتمع والفرد خاصه..واتمنى ممن يكتوب ردودهم انهم اولا فليتعلمو فنون الرد الراقي قبل ان ينتقدو غيرهم ماعجبك الموضوع قول طرحك ماعجبنا واقضب الباب منتو مجبورين لكن وش اقول الي عمره ماتبخر تبخر واحترق <<اهداء خاص لكل من لايعرف اصول النقد وعلى فكره النقد يدرس بالجامعات لان له اصول …شكرا لك ابو هديب

  11. اولا : القصه با اجزاءها الثلاث خطيره .. وابداع والله بطني اوجعني من الضحك.. ثانيا: اللي ما اعجبه الموضوع مو لازم يعلق ويحطم .. بس لاتهتم ياابو هديب لكلامهم وكمل ابداعاتك .. ثالثا : صدقت والله كثره الصدمات تولد وحشيه وقوه وصلابه عند المراءه خاصه اذا صارت تتحمل مسؤليه اسره بدون زوج او اب >> انا اعرف حريم كذا.. رابعا واخيرا : كيف عرفت بأسما ء ماركات المكياج بهذي الدقه؟ >> سؤال محيرني..

  12. الصراحة القصة روعة وياريت تصير لك قصص ثانيه غيرها لان طريقة الكتابه والحوار جميل وما عليك من التعليقات السابقة ولا تهتم لهم و ما عليك منهم اتمنى ثم اتمنى انك تنزل لنا قصص اخرى ولا تطول علينا في ابداعاتك الراااائعه و لاهنت

  13. اخوي ابو هديب\\ ارجو أن لا تلقي بال للي يحولون تحطيمك.لن هاذا دليل الغيره فقط العكس تماما القصة جداّ ممتازة أنا عن نفسي والله من كثر ما اضحك على سليمة واتخيل الي تسويه تمر الساعة ما احس فيها وقبل كذا قلتلك تنفع مسلسل كوميدي — وأنت اخوي تبدع بهذا النوع من الفن . والله يعطيك الف الف الف عافية .وأسفة على ألاطاله وشكراّ نرجو المزيد

  14. تسلم أناملك والله ابداااااع يكفي انك رسمت الضحكة في قلوبنا 😀 الصراحة أسلوبك جداً ممتع في طرح القصة ومشاكلها بعيييد عن الرتابة والأساليب القديمة حبيت أزيد على الحكم اللي انذكرت في مقولة تقول لا تقذف إلا الشجرة المثمرة يعني إذا قصتك ما كانت مميزة كان من زمان سووا له اكس وديليت موفق يابوهديب وبانتظار المزيد وان شاء الله يتصلح جهازك باسرع وقت ونستمتع بابداعاتك

  15. احب الشكر جميع اللي ردو واقولكم الله يعطيكم العافيه والله يا اخوان قسم بالله يسعدني يوم اشوفكم مبسوطين وبجد حنا في زمن كله مشاكل وهموم وضيقه صار الواحد يدور الابتسامة . أنا اتوقع بيجي وقت الضحكه بنحصلها بفلوس الهدف من طول الموضوع عشان نزيد جرعة الضحك والا لو ابي اقول الكلمة اللي ابقولها ما راح تتعدى ثلاثه سطور بس مثل ما قلت للجميع نحط النقد دائما في قالب كوميدي وانا شخص مستمع واتقبل النقد البناء .. مهوب يجي واحد يقول سخافه ومدري كيف والثاني يقولي انا ضيعت وقتي .. ويسمي هذا نقد هذا اسمه ( انا فاضي ما عندي شغل قلت خل اضيف رد ) قل النقاط اللي تبي تنتقدها وحط في بالك ان حنا في النهاية بشر نسعى قدر الامكان ان حنا نقدم الافضل في كل شي ان اصبنا خير وبركه وان جبناها من جنب الجاده نقول حاولنا لكن ما الله وفق العذر والسموحه على القصور ودوم تكونون مبسوطين وفرحانين يارب

  16. السلام عليكم اولا احييك على الابداع الرائع كنت منتظر الجزء الاخير وهاهوا وصل اخيرا ونفس ما توقعت صار في القصه ولا تصدق اللي يقول ما له داعي وخير الكلام خلية يورينا شطارتة ويكتب قصه قصيرة ماهو بكاتب لو يقعد 100 سنه ويعطيك الف عافية ابو هديب اضحكتنا مع الفائدة لاهنت يالغالي تحياتي

  17. الى بيقرى ذا كله راسه صاحي على العموم مشكور وما قصرت موووووووووووووووه هاذي البوس لجميع مشتركين المنتدى

  18. أول مره أقرى لك مقال كامل.. لكن ما قدرت اوقف ضحك..:D:D:D:D من جد تقول أشياء جدا خطييييييييره8) إقتباس شي كانت تتحدث ومع كل كلمة ترضون كانت ترفس كل واحد على بطنه حتى كره الأطفال كلمة ( ترضون ) أحلى شي أجبرني أكمل.. أسلووووووووب رائع انشالله دايم أقرا لكB

  19. ابو هديب .. اهنيك صراحة على هذه القريحه الفكريه B << برااا لا والله بجد كنت كل ماتجي رسايل من القروب احتري الجزء اللي بعده من قصة سليمه خرش … بالفعل كلام حلـو .. قضايا موجودهـ في متجمعتنا وبكثثثره بعد بس في قالب كوميدي جمـيل ووالله انه مختـصر لابعد حد لو الواحد جلس يكتب زود بيطلع كلام اكثر واكثر … شكرا لك مره ثانيه ولاهنت كمل القصه ان كان باقي في راسك شئ .. ولو يتغير اسم المـره ومحور القصه ككل لكن يبقى الانتقاد وطرح القاضايا في قصصك .. أتمنى انك فهمت قصــدي … شكرا لك مره ثانيه ..

  20. وربي .. اني كل ما افتح الايميل .. اححتري الجزء الثاني .. هنيئا لك هذا الاسلوب .. وهنيئا لنا بك

  21. نفسي أعرف وش مغزى هذا الكلام الفاضي طيب وبعدين ؟ وحده شرسه وطبعها كذا , ثلاثة أجزاء وهي تضرب وتكفخ !!! ياخي حط تحول في القصة , يعني إنها تغير طبعها مثلا .. أما ثلاث أجزاء نفس الوتيرة , .. اكتب شيء مفيد أو دعنا فنحن نعرف كيف نستفيد !

  22. أبوهديب يابطل ماعليك واصل ابداعك الناس اللي كذا همها بس تنقد وتهدم ماهو نقد بناء نقد هدام مايعجبهم العجب ولا الصيام في رجب ياكثر المواضيع الجديه والعلمية البحته اللي بالقروب ماشفت هالشباب ردوا عليهم وشاركوهم بالنقاش بس يحبون يهبطون العزيمة ووش الفايده سؤال غبي وش الفايده عالعموم واصل يابطل وهذي الغيرهـ ماشاء الله عليك كاتب ثلاث اجزاء ومضايقهم عجزهم عن الكتابة واصل يابطل وعقبال مانشوفك كاتب لمسلسل كوميدي

  23. السلام عليكم ورحمة الله وبركاته قصة جميلة ونقد ساخر لاذع،،اعجبتني الأجزاء الثلاثة حتى انني أعيد قرائة القصص 8) أتمنى ان نقرأ مزيد من هذه القصص

  24. الله يسعد قلبك على الابداع بصراحة قريت الجزء الاخير وتمنيت لو اني لاقيه هالابداع من اوله بس اوعدك راح ارجع اقرأ من اول وجديد

  25. ماشاء الله عليك أسسلوبك بالقصه رائع هذي القصه الوحيده اللي ظليت اتابعه وانتظرها بشغف .. للآسف الجزء الثاني ماوصلني.. .. أنا بدور عنهـآ .. بس ياريت احد يحط لي رابطها والا شي

  26. السللآم .. ~ قصة رآئعهـ جدآ ..~ التمست منها فوائد كثيره و سليمه وضحت لنا اشياء كثييييرهـ يسلم راسك على هالقصه نتمنى تتحفنى بمزيد من ابداعك ..~ بالتوفيق

  27. B الله يعطيك العافية انا من اشد المعجبين في هذا الموضوع الاسلووب روووووعه انت يا ابو هديب مبدع بمعنى الكلمه وننتظر جديدك:D:D:D:D:D

  28. فللللللللللللللللللللللللله القصه وناااااااااااااااااااسه حلووه مررره ومضحكه ,,اهلي يناااظرووني ويقوولوون ضحكيناا معك اتمنى ااشووووف قصصك اكثر ,,اووماا سليمه هههههههههه يحليلهااا ودي اصيرر زيهااا ونااسه اكفخ اخواني مشكوووووووووووووووووووور والله ,, والغاااير يااكل فطاااير ويقوول انا حمااار طااير<<ماااعليك منهم واصلاا هم غااااااااير منك عشااانك تعرف تنكت هع وبالتووفيق..

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

سليمة خرش – ذوبان الانوثه (الجزء الثالث والاخير)

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول