سحوركم الليلة علي ‎[ صينية الرز بالقشطة والدجاج ]‎



السلام عليكم

صلحت لكم طبخة لذيييذة وانهبببل عليها زوجي و مررره عجبته << محد يتطنز ترى

سلمكم الله .. فاضت قريحتي قبل كم يوم وجلست أبحث عن طبخات وحليات وحركات مطبخ .. وجمعت لي كم طبخه وسجلتهم عندي .. لأن شهوة الطبخ مهيب باتلتلي فـ ودي اذا جت ولا كلش جاهز




قبل ما أسدح مقاديري … الله يعافيها اللي مواريها اذا مالقت شي من المقادير عندها في البيت سكرت الصفحه لاتكمل موضوعي أنا منول أمر ع الطبخه ولو الملح قاضي من بيتنا دورت طبخه غيرها << فيه أحد يدورها من الله؟ << على أساس انها عقلت الحين عن هالحركات

مقاديرها أضمن لكم ان شاء الله انها متوفره .. واللي موب متوفر كنسلوه محدن ميت قبل يومه

خل أوريكم صورتها قبل .. تشهوو عشان تركزون ع المقادير بضمير خخخخخخخ

نجي للمقادير :

– رز أبيض ( 3 بيالات رز + ماجي + بهارات + ملح + زيت )
نغسل الرز ونخليه ساعتين إلى ثلاث ساعات .. وننتسبه في قدر مويه مع اللي فوق .. طبعا لاتكثرون بهارات .. وحتى الماجي لو يحصل تقسمونها نصين بعد
لأن خلطة الدجاج ماراح تقصر بالطعم

وأساساً الرز الأبيض يكفيه ملح وزيت .. بس أنا أضفت له شوي بهارات عشان مايصير مدري وش يبي

– خلطة الدجاج ( صدر دجاج مقطع صغار + فلفل بارد مقطع بالطول + جزر مبشور + كرومب مقطع بالطول + بطاطس مقطع مربعات صغار مقلي + بصل + زيت + ملح + بهارات + ماجي )
نحمس البصل في الزيت وبعدين الدجاج .. وباقي المقادير اللي قلتها وحركوه لين تملون والبطاطس خلوه اخر شي << احس مابيه ينهرس
أهم شي لاتكثرون ملح عشان ماتتوهقون العطش مايرررحم

<< الغرض واحد وشوله منزله كل الصور ؟ عاد جازوا لي كلهم ومالي خلق أنقي وكل واحد يناظر اللي تعجبه

<< هنا حطيت البوتاتوو بعد ماقضيت من تقليبه .. غثني الله يغث العدو تمصعت يدي .. لا ومن زين الطبايع .. يد تقلب فيه ويد بالجوال .. قعدت حول نص ساعه وانا اقلب هالدجاج خخخخخخ

 
 
– خلطة القشطة : نسوي خلطة مكونة من ( 3 ملاعق جبن سايل + 3 ملاعق مايونيز + علبة قشطة )


 

 
نجيب الصينية وناخذ جزء من الرز ( الباقي خلوه ع جنب بنستفيد منه بعدين )

وبعدها نجيب جزء من الخلطة بعد ( لاتكثرون منها لأننا بنحتاج لأكثرها بعدين )

الدجاج طبعا كله

وهذا شكله بعد ماصفيناه في الصينيه يلوموني وأنا أعرف أصف <<

بعدها نجيب باقي الرز ونحطه فوقه

آخر شي باقي الخلطة

ندخله في الفرن من تحت ومن فوق .. وهذي النتيجه

سمممموا وبالعافيه
ان جازت لكم لاتحرموني من دعوة في فطوركم أو سحوركم .. أو في أوقاتكم المستجابه :$
وان ماجازت لكم .. راجعوا روحكم .. الطبخ يبي له نفس تعرفون وش يعني نففففس مهوب كلن يجيده ولاهوب كل من خذ الطريقه وسواها طلعت مثل راعيها سبحان الله ناس الطبخ منا وهي منا وجايه تتنعفق << تفريغ شحنات مواعين رمضان

ابد جازت لكم ولا ماجازت لكم ياجعلها محادير العافيه ع قلوبكم


 


تابعوا جديد شبكة أبونواف على فيس بوك وتويتر

   


تعليقات 25

  1. هههههه قسسم جالسس اضحك ع الاسسلوب ربي لأ يحرمك السسعاده = وش مدخلك طبخ للحرريم برأإ:D أإلله يعطيك العافيه ع الطبخه وبنششب لاختي تسسويها لأ تخافين وعيدكم مبأإرك

  2. تسلم يدينك اخيرا لقيت طبخه تفتح النفس وكلامك عسسسسسسل شكلك توك مخلصه غسيل المواعين وكتبتي الهرجه

  3. يااااااجعل العافيه بقلبتس وماتفارقتس قولي آميين ^^ الله يسلم دياتس يامال العافيه جعلنا ماننحرم منتس ^^ بحاول اسويها كووود تضبط مثل اللي سويتيه خخخ :~ كل عام وانتي بخير مقدما وقبل الزحمه وتقبل الله طاعتك ^^

  4. ما شاء الله تسلم يدينك.. أنا أبصم بالعشرة أنها لذيييذة لذا أنصحكم جربوها << والله ما أعرف سميحة و لا أقرب لها بس أعرف الطبخ اللذيذ 😀 سؤال .. وشي الكام الي معك ؟؟

  5. يعطيييييك العافيه إسلوبك روعه ماشاءالله :$ وإن شاء الله أسوي هالطبخه قريب ق1

  6. لا ماتاخذ وقت في النار .. من تحت ربع ساعه الى نص ساعه أو أقل ع حسب حرارة الفرن والدجاج ومن فوق لين تتحمر بس

  7. الله يعطيك الصحة و العافية يا أختي في الله سميحة المليحة على هذا الطبق الحلو، و سأقوم بطبخه انشاء الله لكوني اشتهيت من الصور بتاعتك العجيبة ذي.

  8. ما شاء الله واضح انها لذيذة .. باذن الله اعملها غداً .. كل الشكر والتقدير يا سميحة

  9. الطبخه والإسلوب والتصوير كلوه لذيد في لذيد ههههههه اكيد بإذن الله بسويها بكره بالعافيه على قلوبكم

  10. nejjara / الله يعافيك وبالعافيه مقدما FRWAN / العفوو ويعطيك العافيه ميا / بالعافيه :$

  11. عزوز / جعله بالعافيه ياارب .. والمكرونه حلوه بعد شهد / ياحبيلتس :$ الله يعافيك

  12. يم يمممممممم راح اسويها اليوم وبتمدح قدام اهلي على هالطبخة ههههه تسلمين يا عسل

  13. يعطيك العافيه ياقلبي عن جد طبخه جديده وخصوصا انه فيها رز ملينا من الكبسات المعهوده التغيير حلووو. باالنسبه لموقعك ياترى القى فيه وصفات جديده وغريبه ؟ لاني ناويه اسير عليييك تحياتي والف شكر

  14. احلى من العقد / الله يعااافيك .. موقعي منّوع فيه من كل حتّه ^^ بعدين وشو ناويه خخخخ حسستيني انك رايحه سوق 😀 مري وسجلي والله يحييك معنا تنورينا :$

  15. سويت الطريقه امس ع الفطور ،، بصراحه رهيــــــــــــبه ماشاء الله تسلم ايدك بس بسألك القشطة ، هي قشطة الخفق ؟ لأن انا حطيت قشطه تاج و صارت الخلطة ثقيله لما جيت اصبها تعبتني لا تحرمينا من هالطبخات المميزة ،،

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

سحوركم الليلة علي ‎[ صينية الرز بالقشطة والدجاج ]‎

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول