سالم والديموقراطية !


صباح البردقان ياحلوين ..

قبل أبدا .. تراي مانيب محلل ولاني مبيح كل من يسرق لي أي مقال من دون مايشير إلى أنه منقول من الكاتب مدمن شاهي ،لأن بعض المهرقلين بصراحة زوّدها شطّه

خلونا مع الديمووغراطية ياحبايب الألب المهبهب
سالم .. شاب فرفور يبلغ من العمر 25 سنة ومعاها أربع شهور مجّانيه .. يعني حولي وحوالي والأعمار بيدِ الله ..
تخرّج من الثانوية الليلية بعد ماتعب وكدّ ولعبت فيه القوايل من ملاحق المعيز طول النهار ، وبالليل يحط الدفاتر على ظهره ويروح يدرس .
بعد تخرّجه اشتغل بمحل خُضار بِحُكم أن الوظائف مُتاحه على طول لِكُل شاب وشابّه متشبشبين ، والحكومة أبخص ووزير العمل دايم يقول أنتم بس تخرّجوا وماعليكم

ماكان – وقسم بالله – يتتن أو يغشّ في بيع الطماط أو أنه ياخذ ريلين من زبون المحل إذا شال أغراضه وركّبها في سيارته ..

سالم كان مِثال وتِمثال لِكُل شاب مزبوط على وجه الأرض .
طبعاً بعد ماهبّلت به ريحة البصل في محل الخُضار قرر يصير زي ولد عمّه تركي ولد المنـــــــــطلتز عسكري برتبة جنــدي حااااافّ بس عليه شويّ كتشب 

ركبت براسه الفكرة .. وراح شرى جريدة الرياض بريالين متسلّفها .. قرطش أبو القراطيش وبدا من أوّل صفحة وحتى نهايتها .. قرى كل شي .. قرى حتى الأخبار الإقتصادية عشان يحلل الريالين .. مع أنه مايعرف وش معنى إقتصاد بس يسمع دايــــم أن نصف الشعب عايش على أقساط البنوك

 

طبعاً .. أهم شي في الجريدة أنه عرف موعد التقديم العسكري على رُتبة جندي ووش المطلوب ووين الموعد وهل لازم تشوف لك واسطة مُقدماً أو مؤخراً .. طبعاً سالم ماعنده لامؤخر والا مُقدام .. بس عنده ربّه العالم بكل الخلايق !

 

شرا ملف أخضر .. وصوّر ست صور شمسية مكشوف الرأس والعقل .. مافيه ملحن أبد – سُبحان الله – .. بس العسكرية ماتبي ملح .. تبي رجّالن يتحمّل دعك الرمل بظهره الاشهب .. خذ شهادته الثانوية الليلي وشهادة حسن السيرة والسلوك ( أما شهادة حسن السيرة والسلوك فانا اشهد له بهالشي .. واكبر دليل أنه مايطلع بعد الساعة عشر من بيتهم ويروح يسرسر في الشوارع المظلمة ) .. ركـــب موتره وودع أمه وابوه ثم مرّ عمّه ناصر ( جندي حااااااافّ ) بنفس الكُلية ، طبـــــعاً الجماعة كلها جنود والرزق على الله 

مسك سرا من الصباح إلى الساعة عشر وربع بالليل  ، اختبروا نظره وطوله ووزنه وعقله ! .. إكتشفوا أن النظر منتاز المنتاز وعيونه تلاقط كنّه عيون قطو .. طوله راسي ووزنه يمشّي الحال ، العقل دقّروا فيه شوي ويوم سألوه عنعاصمة السودان تخربط وقال عاصمتها الدار البيضا ، قال له الضابط ياخي أنا ماقلت لك وش عكس السواد يومـــك تقول الدار البيضا .. سألوه سؤال ثاني : كم عدد الشعب السعودي ، يوم هنّق وقــــــام يعدّ عيال عمّه بس لخمه الضابط وقال له ( خالد ولد عمي تراه ميّت ) رد سالم وقال : طيب أنا ماعرفه !!  .. الضابط أحتار في سالم .. عيونه وشوفه منتاااز والطول زين ووزنه رهيب بس العقل مهناش والرجّال خريج ليلي واحتمال بُكره يكبّ العفش وينكب أبو الدورية اللي معه ويطلع برّا الحدود

 

رفعوا أوراق سالم كقبول مبدئي ، عاد الضابط راحمه وشفقن عليه مرّه فقال له بصوتن مبحوح : ياسالم ترى فيه قبول نهائي ، لازم تعرف وش معنى الديموقراطية لأنهم إحتمال يسألونك عنها ، واحفظ بعد واجبات الصلاة لأنهم يمكن ينوّعون في الأسئلة فلازم تصير مُلِمّ بكل شي  .. دنّق راسه سالم ثم قال له : يعني تهقا ياسعادة الجندي أني باتعيّن عسكري ، قفلت مع الضابط وقال أنا ضابط ياخوي طبعاً سالم مايعرف إلا الجنود لأن جماعته كلّهم جنود  
طلع سالم وهو منتهي وتعبان وحالته يُرثى لها .. رقد له يومين ويوم قام دق تحيّه عسكرية لامّه .. ياويح قلبي ياسالم .. مشكلتك أن عندك أمل كبير ياحبني لك ( وجه يستفزّه

 

بعد اسبوع راح عشان القبول النهائي .. طبعاً حافظ واجبات الصلاة وعرف معنى الديموقراطية .. اختبروه مرّه ثانية وصار النظر نظر ذيب في شعيبن خضر … خذ سته على سته ويوم جوا في الاسئلة مير يسألونه عن الديموقراطية ويجيب الجواب صح .. سألوه عن واجبات الصلاة ويطقّها مرّتن وحده ويهذّها هذّ من أوّل واجب إلى آخر واجب .. استانسوا الضبّاط عليه وقالوا شكلك جيّد بس أهلك هضموا حقّك وخلوك تدرس ليلي  .. رد سالم : أنا أكدح ليلي نهاري ومأمّل إن شالله أني أقسّم راتبي إلى أقسام .. نصفه قسط للبنك وربعه باخليه مصروف والربع الباقي باجمعه عشان أبني لي بيت بعد ثلاثه واربعين سنة 

إنتظر سالم شهر ونصف وهو يحسب ويطق أخماس على أخماس ويأمّل مُستقبله الأسود
إتصل فيه عمّه ناصر بضحى يوم الجمعه ويوم ردّ سالم وهو مبسوط .. قال له عمّه ناصر : ياولدي لاتحرص وتتعب عقلك ، ترى الديموقراطية تعدّتك وخذت غيرك

 
تعيش الديموقراطية .. وتسقط مدارس الليلي


*

للعلم : سأكون متواصل معكم أيضاً – بحول الله – فيجوّال أبو نواف بطرح مايسرّكم .. ولي الشرف في ذلك
:: مدمن شاهي  ::


تعليقات 7

  1. مدمن شاهي ,, <<== وجه مبتسم دايم تونسنا بأيملاتك ,, بس هالايمل جا على الجرح , ياحري حرااااهـ ياطر جيبي طراااهـ ابك مادهورنا وماودانا بداهيه غير الديمغراطيه ,, لعنة الله على الشيطان الحقير ,, بس سلملي على سالم وقصم كسر خويطري ياتسبدي عنه ,, ياربيييييييييييه والله حرام هالشي يتكرر ويصيرررر والواسطه لاعبتن بحسبتنا سوري قصدي الديمغراطيه ,, ,, يعني بدولتنا تشوف انواع الظلم والقهر بسبب هالشي ’’ تحطمنا ونتأمل بوظايف تعزنا وترزنا ,, ونشوف اخس الخلق ياخذ مكانا وهو مايستاهل ,,, ,, ياليتها تتعدانا لناس بحقه ويستاهلون الا تتعدانا وتروح لعيال الشيووخ الي يفقصوون ذهب والي اجسامهم متفضخه من النعمه ,, مانقول غير حسبي الله عليهم ,, مدمن ,, ولك تؤبشني أبش ,, ياحأ ,, ياجعلي ارقص بعرسك واناحامل ,, اطامر مطامر هع ,, // تكفى المرهـ الجايه تكلم عن اضرار العنوسه والبنت الي تبطي ماتتزوج واضرار والولد الي مايخطب وش عقابه // <<=== اووووووووت بص ,, فماااااااان لله يابعد تشبدي

  2. هلا مدمن ، أنت أحلى ديمقراطي في الدنيا ، يكفي أن مقالاتك تجينا بالسنة حسنة هههههههههه ماشالله عليك بس ومبدع مثل ماخبرتك

  3. العسكرية مصايب وعلى ذلك مافي تعيينهم عدل وحق ! مُدمن لاعدمنا إدمانكــــــ.

  4. السلام عليكم المبدع الساخر : مدمن شاهي شُكراً لديمقراطيتك وشُكراً لسخريتك التي بيّنت فيها عوار الواسطة التي أرهقت حتى الضعفاء من بني المجتمع شُكراً وشُكراً لك دائماً أيُها الماتع

  5. ياكثرهم والله اللي زي سالم … تلاقيهم بالثانوية مسااكييييين العيال انواع الجريااات والطق مايجي الا بظهر سالم وبعدين _ لانه ديموقراطي _ مايلقى وظيفة ويشتغل سكورتي الين يجي تقديم العسكرية يفصل من السكرتية _ على امل ان ديموقراطيته تخليه ينقبل في العسكرية _ وبعدين تطوفه الديموقراطية من اليمين ماشية 180 فيرجع يتوظف بكابينة !! وهذي دورة حياة ( سالم )

  6. الصــــراحه كتـــاباتك لا يعلى عليهـــا … وخاصــه انها يكون وراها مغزى مو شرط التسليه والضحك … واحلى شي انك تاخذ الفكره وتاخذها على نطاق كوميدي ساخر يجلب لك القراء… احتــرامي لك اختـــك غـــــرومه.. 🙂

  7. ماتخيل حياتي بدون واسطه ياخي وش نسوي تيار وجرفنا الحين لو تبي تراجع وتطلع لك لوحه بدل فاقد خل وظيفه قويه شوي.. والله لتاكل هوى ولتقعد لك ايام تراجع علشانها غير وغير التهزيء اللي يجيك << هذا وهي لوحه أجل كيف لو هي وظيفه مره وحده !!!!! ولو عندك واسطه كلها يوم تخلص الاجراءات وتسحب عليهم لأن مالك خلق تستخرج لوحه و لأنك تحس انك وصلت للي تبيه ووالحين شف قائد اي قطاع عسكري من اللي مابقى له الا سنتين ويشوتونه تقاعد .. وشف الاسماء المقبوله عنده والله تلاقي اغلبهم من ابناء عمومته ؟؟ طيب انا ماني بحاسدهم بس لو هم فعلاً في حاجة هالوظيفه الله يوفقهم ولو انهم عباطه بس يتوظف كم شهر ويسحب عليهم .. مااقول الا حسبي عليهم اشكرك استازي على هالموضوع الحساس هذا رد سريع بس وكان الله بعون من هُم على شاكلة سالم (( قلب يرجف من الحب اللي فيه للديمقراطيه ))

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

سالم والديموقراطية !

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول