زوجوني من فتاة قبيحه


انا كنت في يوم من الايام .. جالس في الغرفة لحالي لا لي ولا علي .. جالس اسمع شريط ( سعد جمعه ) كنت ضايع

 مع اغنية ( بسمك صرخت وصابني نشوة الزار ) .. كنت اسمع الاغنية وآكل تمر واشرب ببس ( عارف ما تجي ) بس وش اسوي( الشكوى الله ) كانو اهلي مسافرين .. وما في البيت إلا انا والوالد .. والوالد منشغل في تجارته الكبيرة … منشغل في محل الخضار اللي فاتحه في اخر اشارع … والمشكلة ان ما فيه احد يشتري …يجي اخر الاسبوع ويوزع البضاعة على الجيران .. والجيران يا كلون والمستشفيات تستقبل حالات تسمم من حارتنا بالهبل … تصدقون ان حارتنا معد بقى فيها إلا حنا بس .. إللي مات ضحية تسمم .. وإللي نقل من الحارة يحسب فيها مرض وبائي يعدم الناس .. ؟ المهم

كنت جالس اسمع المسجل ما دريت إلا بهذيك الرجفه إللي جت في باب الغرفة وانفتح .. من قوة الرجفة … الباب تكلم قال ( اي الضربة تعور ) .. دخل علي الوالد وهو محزن وضايق .. كأنه شايل الدنيا كلها جا وجلس جمبي وقالي . يا ولدي انا في ورطة .. وابيك اطلعني منها .. انت آخر أمل لي .. صراحه انا يوم شفت الوالد يقول كذا على طول سكت ( سعد جمعه ) وقلت للوالد خير .. قالي ابيك يا ولدي تضحي عشاني .. خلص الوالد كلامه على طول انا وقفت وضربت صدري وقلت .. ابشر يبه باللي ما يضحيلك بناقة.. بس خل عيد الضحية يجي وانا عند وجهك … ناظرني الوالد وقالي اجلس واسمعني زين لحط حرتي فيك .

ناظرني ابوي بنظرة .. حسيت انه يناظر قرد في حديقة حيوان ما بعد تم افتتاحها .. ناظرني وقالي .. انت فاهم غلط يا ولدي .. انا ما بيك تذبحلي ناقة .. انا … انا … انا ابيك تتزوج ناقة وفيها عاهه بعد … يوم قال كذا قلت في نفسي شكل الوالد … اكل من محل الخضار حقه .. وهذي اول علامات التسمم .. المهم جاريت الوالد وقلت يا يابه انا ما فهمت شي … تأفف وقالي كلمه ما راح انسها ابد . قالي من وين جايب الغباء … ما خذة من واحد من زملائك ما اذكر اني غبي وإلا امك .. انا يوم بدى يسب قلت يبه ادخل في الموضوع .. وش تبي تقولي .. ناظرني وقالي ..

اسمع يا ولدي .. انا تسلفت من شخص .. جشع .. جشع ما تتوقعه .. شكله كنه قير ارضي .. الشخص هذا طلب مني اني اسدد الدين اللي علي وانت عارف يا ولدي ان ما عندي فلوس.. فلما قلت ميده اني ما اقدر قالي اجل يتزوج ولدك من بنتي وإلا راح احبسك.. بموجب الشيكات اللي كتبتها . .. اول ما خلص كلامه .. قلت وانا متشقق من الفرح .. يبه الله يخليك اخيرا بتزوجني .. والله ودي احب على راس هالرجال للي حدك علي وبيحقق رغبتي … رغبتي اللي جلست اتحايل عليك سنوات عشان تنفذها .. من كثر ما اتحايل عليك حسيت ان قطار الزوج فاتني .. ( اي قطار إلا انقلو المحطة كلها حقت الزواج مهوب فاتني القطار وبس ) … المهم وانا فرحان ومتشقق ( يعني اطلق خياط في العالم ما يقدر يخيطني هذيك اللحظة من التشقق اللي انا فيه )

المهم ناظرني الولد .. نظرة واحد كأنه بيشوف شخص لأخر مرة في حياته .. ( نظرة مودع ) .. ناظرني وقالي .. لا تفرح يا ولدي .. البنت اللي ابزوجك منها .. بنت تعتبر في غاية القبح .. يعني تقول ميد القبح وخر واجي اجلس مكانك .. يا ولدي القبح نفسه يذل منها .. لأن وجها ما يخطر على بال بشر .. وجها كنه عجينة زايده خميرتها .. متفخ .. كأن فيه خلية نحل مقرصة في وجها .. هو قال كذا حسيت ان الارض معد تشيلني .. بغيت اطيح على سعد جمعه ( طبعا اطيح على المسجل بس الشريط كان موجود داخل لذلك حسيت ان سعد جمعة جالس معنا )

اقتنعت بكلام الوالد .. ومرت الايام .. وتزوجت .. ودخلت سجن الزوجيه ( قصدي قفص الزوجية ) .. زفونا المعازيم الين غرفة النوم .. وانا في الطريق للغرفة كنت افكر كيف انحاش .. جت في بالي افكار كثيرة .. منها اطعن ابو البنت وادخل السجن .. وهيناك راح اخذ نفس المصير إللي اباخذة هنا .. بس يمكن يكون هذاك ارحم وإلا اسوي نفسي ميت بسكته قلبية .. صراحه كل الحلول ما نفعت حسيت اني جندي امريكي .. كل مخططاته تفشل .. ما صحيت الا وانا داخل في الغرفة ؟؟ وهناك انا شفت شي .. غريب .. شي ما يوصف … اللي قاله الوالد شويا .. لأني حسيت انه كان بيزين الموضوع لي .. وما عطاني اياه على شكله الطبيعي .

دخلت الغرفة .. وشفت شي طارت له عيوني .. ناظرت في الغرفة يمين ويسار .. ما لقيت العروس .. صراحه اول ما لقيتها تنفست الصعداء وحمدة ربي اني ما لقيتها .. وفي نفس الوقت .. دعيت انها تموت .. قبل ما تدخل علي في الغرفة .. وانا ادعي كانت عيني تلف في الغرفة .. صراحه فيه شي شدني .. شفت في الغرفة ثلاث طاولات .. ثنتين عن يمين السرير ووحده عن يسارة … جلست افكر شوي .. وقلت شكلهم نسو الطاولة الثانية . المهم خلني اسوي نفسي نايم على السرير .. على شان إذا جت تلقاني نايم .. رحت على السرير .. توني جالس .. إلا طلع صوت وحدة أو مدري واحد المهم انه يقول كيف حالك .. انا طقتني النفاضة صارت ركبي كنها خضاضة سمنت تروح يمين وتجي يسار

التفت .. وقلت بسم الله الرحمن الرحيم من يتكلم .. رد علي نفس الصوت .. وقالي انا زوجتك يا ابو هديب .. ناظرت عند مصدر الصوت .. اول ما شفت الطاولة تحركت .. بلعت لساني من الخوف .. تحركت الطاولة وجت عندي .. شوي شفتها.. صارت الطاولة هي زوجتي اللي جالسة طول الوقت في الغرفة وانا ما ادري .. بعذري استنكرت ثلاث طاولات .. قلت في نفسي ما تجي

وأنا افكر جت وجلست جمبي … وقالت لي .. هلا والله حياتي .. صراحه ما تقبلت الصوت انا اعرف ان الكلمة ان صدرت من بنت تكون الكلمة رقيقة .. بس هي طالعة منها الكلمه كأنه صوت واحد من العيال قبل ما يسوي عملية لوز .. جت وقلت ميدي .. اقول ابو هديب .. يا عمري .. ما ودك تشيل الطرحة عن وجهي .. هي قالت كذا .. حسيت ولأول مرة بمعنا كلمة شلل اطراف .. انشلت اطرافي كلها … وقلت ميدها بصوت يتفتف كنه مكينه مخلص بنزينها .. اقول … اقول … اقول .. إلا على فكرة انت وش اسمك .. صدت بوجها ( يقالها مستحيه ) وقالت لي .. انا … انا .. ( هاله ) .. ناظرتها وقلت والله صادق ابوك يوم سماك ( زبالة ) أول مرة احس انه سوى شي صح في حياته .

ما امداني اقول كلمتي .. إلا قامت وجت قدام وجهي .. وجلست صراحه البنت كانت مربعه .. وقصيرة .. كنها ثلاجة غرف نوم من النوع القديم .. قالت .. اول شي انا اسمي ( هالة ) مهوب ( زبالة ) .. وثاني حاجة اخلص شل الطرحه .. بسرعه .. تراني انكتمت ومت من الحر جعله في مكيفكم هالخربان .. وجهي صار كله عرق .. ساح المكياج من قوة الحر … اول ما خلصت قلت ميدها اقول يا ( هالة ) شي طبيعي يصير حر .. لابسه ثوب صوف بني وحنا في عز الحر .. قاطعتني وقالت يالله شلها .. قالت كلمتها وهي تقرب وجها .. واسمع صوت نفسها كنه نفس اسد وهو حاط وجهه في بطن فريسته .. مديت يدي ورفعت الطرحه .. رفعتها وانا مغمض .. قلت في نفسي ابفتح عيني بشوي شوي على شان اتقبل الصدمه … فتحت عني اول ما فتحتها .. شفت وجه .. ما اقدر اوصفه .. وجه احس انه صادمته تريلا .. المهم ما قدرت اكمل النظر لأنه اغمي علي ..

بس اعتبر الاغماء هذا اقصر اغماء مر على العالم الطبي كله .. كان مدة ثواني رجعتني ( هبله ) قصدي ( هالة ) لوعيي كان في جيبها غرشة دهن عود .. كبتها كلها على راسي .. صحيت وانا مرتاع وخايف .. اول ما صحيت جيت عند رجليها .. قلت ارحميني تكفين .. ( هالة ) انا مستعد اكون اسيرك .. عامليني معاملة اسير حرب قبل معاهدة جنيف بخصوص الاسرى اضربيني .. خليني اغسل صحون اهلك .. كلها وملابسهم .. بس لا تقولين انك زوجتي عند احد .. استري علي .. تكفين .. جلست اصيح (ابكي ) .. وانا اترجاها .. قامت وقالت لي .. اقول انا زوجتك غصب عنك … انا ما صدقت اني اتزوج .. وينادوني مدام تجي انت تلغي انوثتي .. هي قالت انوثة نشف الدم اللي في وجهي كله .. وقفت وقلت لها اي انوثه .. انت وشعرك هالمطشم … كل شعرة رايحه في جهه تقل يلعبون حبشا .. وبعدين وش هالمكياج .. اللي حاطته على وجهك .. دابغين وجهك في مصبغة جلود وصابغينه

اقول ابو هديب .. مهما سبيت انا حلوه .. وانا جالسه على قلبك .. يالله قم تعال معي .. انا جايبه لك فلم مرعب من خواني نبي نشوفه انا وياك .. وشاريه من محل عطارة كيس حب مالح .. يالله قم خلنا نشوف الفلم المرعب .. ناظرتها .. وقلت اقول تحبين الافلام المرعبة .. قالت ايه اموت عليها .. هي قالت كذا على طول رحت جبت مراية ووريتها وجها .. قلت شوفي .. شي على الطبعية احسن ما تشوفين خدع سنمائية .. وبعدين يا ( هالة ) انت صراحه لو تطيحين في يد مخرج افلام رعب متمكن بيطلع من وراك ذهب .. ناظرتني وقالت .. انت ليش تضيع الوقت يا حبيبي .. يا عمري يا حياتي .. هاه .. قلي ..

المهم سكت ومشيت وجلسنا انا ويها قدام الفديو .. نتفرج على الفلم .. صراحة كان الفلم مرعب مرة .. بس اضطريت اني اشوفه كله .. كان الفلم عن الجن .. وحنا نتفرج .. تلتفت علي .. وتقول .. ابو هديب انت تخاف من الجن .. ناظرتها .. وقلت اقول يا ( هالة ) ما فيه احد ما يخاف من الجن .. بس اتوقع انت عادي تمشين بينهم وتشوفينهم ويشوفونك .. واتوقع انك تقدرين تدخلين الانتخابات حقت الجن في اي دائرة حكومية عندهم … بحكم شكلك انه قريب منهم .. ويتفوق عليهم في القبح … المهم ناظرتني نظرة استحقار .. وقالت ما ودك تنطم و نقوم ننام .. تراني تعبت

قلت عادي روحي نامي .. انا بنام في الصالة .. التفتت وقالت .. بعصبية والسرير هالنفرين اللي كبر جبهتك .. كله لي انا .. لحالي .. انام عليه .. اقول خل عنا خراط البزران وتعال نم .. المهم قمنا نمنا .. هي نامت في جهه وانا في جهه .. وودت وجها للناحية الثانية .. انا جلست افكر واهوجس .. هل الصفق هالابجورة اللي جمبي في راسها.. وإلا احط مخدة على وجها الين تموت .. خخخخ طخ خخخخخ طخ خخخخ طخ اول ما طلع الصوت التفت على طول ناحية الصوت ليقتها جالسة تسحب الطاولة بنفسها وترجعها ( شهيق زفير ) المهم قمت اركض لباب الغرفة من الخوف فتحت الباب لقيته مقفول .. هينا حسيت اني راح اموت محد يدري عني… من الغبنة نمت عند الباب .. كني كلب حراسة

المهم مرت الايام وعشت معها … كنت اجلس في الدوام .. اكثر من ما اجلس معها في البيت .. وفي يوم من الايام احتجت مبلغ من الفلوس .. مبلغ جامد .. على شان اسوي عملية .. ما لقيت احد يسلفني .. لفيت .. كل اخوياي ما حصلت احد يسلفني .. رحت البيت وانا طفشان .. وجت عندي .. من الطفش قلت لها السلفة اني محتاج فلوس على شان العملية.. اول ماخلصت كلامي .. راحت شوي ورجعت ومعها علبة مليانه ذهب .. وقالت لي .. ابو هديب .
صح اني بنت شينه وربي ما عطاني جمال .. لكن عطاني حب الزوج عطاني الاخلاص عطاني الوفاء وانت زوجي .. إذا ما وقفت معك من راح اوقف معه .. انت عزوتي .. انت سندي .. البنت ان طلعت من بيت اهلها معد يعرفون من اهلها ما يعرفونها إلا من اهل زوجها لأن يصير اسمها مربوط بأسم زوجها .. وانا تحملت اهاناتك لي .. لأني حبيتك من اول نظرة .. حسيت فيك الطيبه ..

صراحه كلماتها اثرت فيني .. خلت كل خليه في جسمي .. تتحرك .. حسيت اني كنت وقح معها .. ما اخفيكم فرت الدمعه من عيني .. فرت لأني كنت محتاج فلوس . وكنت متوقع اني اخذ المبلغ من خواياي .. بس كان اخر شي اتوقعه انها توقف جمبي .. بس طلعت اصيلة ووقفت معي ..

من خلال البنت هذي عرفت ان الجمال مو جمال الوجه .. الجمال جمال الروح .. يا ما فيه بنات جميلات بس مافيه أخلاق .. ليش لأنهم ما يملكون جمال الروح وفي نفس الوقت فيه بنات جمالهم تحت المتوسط .. وعايشين وفاتحين بيوت ..

لأنهم يملكون جمال الروح .. اللي مخلي ازواجهم يعشقونهم .. ويحبونهم حب جنوني

الإيميل / [email protected] 


تعليقات 37

  1. والله يا اني قعدت اضحك ضحك .. ياخي انت من وين تجيب هالخيال – ما شاء الله عليك – والله الخيال عندك مو واسع الا مفتوح ولا له باب . جميلة جدا , وقصة مؤثرة فعلا .. والجمال بالتأكيد جمال الروح ولكن ليت البنات يفهمون . الحرمة ما تشري زوجها بشكلها ولكن باخلاقها . لان الشكل مدة بسيطة ويصير مألوف وعادي زي اي شكل آخر ولو كان قمة الجمال . ولكن الاخلاق مستحيل تنسى او تصير مألوفه .. مشكور ..

  2. يعطيك ألف عافية أبو هديب وبصراحة انك عديت لوحة الابداع بـ 70 كيلو ألف شكر لك

  3. مبدع ،، ياليت تألف قصة في عاقبة الأغاني التي هي بريد الزنا،، الله يوفقك ويحفظ دينك

  4. الســــــــلااام عليـــــكم ورحمة الله .. (: بو هـــديب .. ربي يســــلّم مخـــك .. صراااحـــــــه .. مررره روعــــــه (: يجزااك ربي خيـــر ويوفقـــك (: .

  5. من يوم ما قلت سعد جمعه قلت في نفسي هالانسان من جيلنا هههههههه شف يا ابو هديب من ناحية الابداع القصصي ابدعت ومن ناحية الحقيقة لامستها بكل ابداع لا عدمناك يا غالي في هالقروب الطيب بس ياليت ام هديب تقرى اللي كتبته عنها ههههههههههه

  6. خيال رائع لقلم مبدع بأفكار تعالج توجهات الشباب الذين يبحثون عن الجمال الخارجي وينسون جمال الروح والاخلاق . بس بصراحة والله مبدع والله يوفقك

  7. كلامك صحيح أكيد جمال الروح والاخلاق مهم .. لكن عالأقل شوية جمال مو لهاذي الدرجة من القبح .. حتى الرسول عليه الصلاة والسلام قال فيما معنى الحديث تنكح المرأة لأربع وذكر منها لجمالها .. وشكرا بصراحة أسلوب قمة فالروعـه جزاك الله ألف خير .. وننتظر ابداعاتك .

  8. على طاري جمال الروح أعرف واحد يقول إني أكره زوجتي بمعنى الكلمة وودي اطلقهالكن ما قدرت لأني عجزت أمسك عليها شيء يخليني أطلقها فسبحان الله ( استغفر الله )

  9. ابدعت اخي في طرحك للموضوع بهذه الطريقه الساخره شباب هذه الايام يبحثون عن الجمال والكمال في وقت واحد الجمال زائل وكل شيء زائل ما عدى الاصل هو الذي يبقى وهو الاخلاق فمن لا اخلاق له لادين له

  10. ههههههههههههههههههههههههههههههههههههههههههههههههههههههههههههههههه والله انا كنت هموت من الضحك والله كتير حلوه وخيالك واسع والقصه كتير حلوه وانت جعلتنا مع قصتك نلمس الحقيقه بايدينا ولكن بطريقه فكاهيه جميله وفعلا الجمال جمال الروح ولكن لازم كمان يجون على الاقل هناك جزء من جمال الوجهه تحياااااااااااااااااااااااااااااااااااااااااااااااااااااتى

  11. والله قصه رووووعه وهاااادفه وتوصل فكره مهمه واللي كثير منا يغفلها هالايام وهي جمال الروح والاخلاق قبل اي شي ثاااني وياما ناس على قولة القااايل((من برا الله الله ..ومن جوا يعلم الله)) يعطيك الف عااااااافيه اخوي ابو هديب ((المبدع)) على هالقصه وننتظر جديدك و ابداعاااتك

  12. الله يوفقك يااارب بصراحه بالقصه اكو وايد عبر بس على وعسى الواحد ياخذ العبره

  13. مرحبا اخوي للاسف انكم غالبتكم يالرجال هذا اذا ماكان كلكم يبهركم الجمال والشكل الخارجي اكثر من المضمون حتى لو ان الواحد شيفه يتشرط يبي حلوه,ومعنكم دايما تكابرون الجمال جمال الروح بس بالنهايه تدورون عالجمال ..عالعموم وصفك كاان بشع كثير ماحبيت كلامك عن البنت كان يكفي لوقلت انها مو حلوه اكثر من وصفك لها..والشي الثاني مااخبر اللي مو حلوين يروعون الا اذا كنت رقيق فهذا شي ثاني؟؟..

  14. يا لأناملك ..!! ما أروع ما خطـت .. دمت مبدعاً .. وأحسنت اختيار الموضوع .. لكن ليس فقط الشباب من يبحث حتى البنات ولهن تفاصيل يا ليل ما طولك .. !! أكرر اعجابي لما سطرت ..

  15. تسلم اخوي ع القصة الطريفة كان هدفك توصل لنا إن الجمال مو سبب رئيسي للحب.. ووصلته بس بإسلوب غريب وسرد مطوّل صح لسانك يا اخوي بس ممكن اعرف وش الهدف من سرد الطاولات في القصة؟؟؟؟

  16. يعطيك العافية وبصراحة قصة جميلة واسلوب اجمل وصدقت الصاحب الان وان اتحصلة وقت الشدة

  17. الصراحه وايد عجبتني القصه ..في البدايه رافت بحالك..(الجمال جمال الروح .. يا ما فيه بنات جميلات بس مافيه أخلاق .. ليش لأنهم ما يملكون جمال الروح وفي نفس الوقت فيه بنات جمالهم تحت المتوسط .. وعايشين وفاتحين بيوت .. لأنهم يملكون جمال الروح .. اللي مخلي ازواجهم يعشقونهم .. ويحبونهم حب جنوني )..وانا دايما اقول اهم شي جمال الروح والاخلاق هو اللي يبقى.. وتحياتي لك ..

  18. ههههههههههههههههه مشكوووور الف شكر أبو هديب على القصه مشا الله عليك جمعت بين التسليه والفائده وننتظر إبداعاتك

  19. عن جد يعطيك العافية … راااائعة ومن كل قلبي واعجاااابي احييك على النهاية … والخلاصة الرااائعة ابدا مااتوقعت ان في النهاية راح تقول كذا بجد .. يعطيك العافية وصدقت ياما بنات حلوات بس للاسف ماعندهم اخلاق…. يسلمووو

  20. السلام عليكم الله يجزاك كل خير بصراحة وانا من أول القصة اقول هذا راح ينتحر او يسوي اي مصيبة ويدخل السجن واما البنت ما اتوقعت انها تصبر عليه مع كل هذا الشتام وسوء المعاملة بصراحة القصة وصلت وانا ما اقدر اقول ولساني يعجز عن وصف الابداع وما اقول إلا الله يوفقك ويسعدك والى مزيد من الابداع

  21. ههههههههههههه كله كوم والشهيق والزفير يسحب الطاولة ههههههههههههه من جد الله يعينك فعلا الجمال جمال الروح بس والله انا مقدر اتحمل يعني ادخل فيها قضية ويحبسوني مؤبد ولا اعيش مع وحدة وجهها مدري وش يبي

  22. اشكل جميع اللي علقوا على المووضع والحقيقه ردودكم اثلجت صدري وان شاء الله راح يكون فيه مواضيع جديده وحلوه علها تحوز على رضا الجميع .. ومثل ما قلت الهدف من القصة توصيل فكره معينه والتعليقات اللي فيها لا تمس ارض الواقع لأن الشخصيات عبارة عن كركترات فنتازية الهدف منها توصيل معلومه مثل ما قلت والضحك ..

  23. انا مع كلام الاخت ساره لو اكتفيت بقول قبيحه شينه مو حلوه كان افضل اما الاخت الثانيه تقول قال رسول الله صلى الله عليه وسلم تنكح المراه لاربع طيب ماختلفنا بيد الله رزق كل وحده مو بيد احد ولو كانت قصة ابو هديب مجرد كلمات القبيحات بكل مكان وهذا امر الله حتى لو مانعرفهم لاكن موجودين الحمد لله على كل حال ولا انكر ان القصه حلوه ونهايتها مره مره اعجبتني بالتوفيق يارب

  24. الأخ أبوهديب : أشكرك بعنف على هيك رواية .. الحقيقة إنك شخص موهوب وصاحب نفس طوييييييل جداَ جداَ جداً والمؤمن ياحبيبي مبتلى في هذه الحياة إمّا بزوجة قبيحة (مثلك ) أو بعمل ينغص عليه حياته (مثلي) المهم نسأل الله أن يكون في عونك على ما أبتليتم به .. وأنا أخوك لا أوصيك بالصبر الصبر الصبر الصبر.. والله يفرجها إن شاء الله.

  25. السلام عليكم اهنيك على هالموهبه اخي الكريم واتمنى لك التوفيق في حياتكـ .. اخي احب ان انصحك نصيحه .. اخي الكل يعلم ان سماع الاغاني حرام وانا احب اقولكـ ( واذا بليتم فاستتروا ) اعتبرها نصيحه فقط .. اشكرك اخي مره اخرى

  26. كنت مفكره إن القصه حقيقيه !! بس الحمدلله كانت خياليه لاني اتعب من الحقيقه اكثر الخياال ؟؟ وبالمناسبه في حديث عن الرسول صلي الله عليه سلم ما اذكر الحديث لكن فيما معناها انه دعاء على القبيحات بالزواج والرزق وهم اول من يتزوج من الجميلااات … والله اعلم

  27. صراحة أضحكتني قصتك جدا وايضا كادت تدمع عيني في النهاية القصة
    تأليف رائع استمر لأن روتين القصص لا يمل مع الوقت
    وكما أنها تعالج مشكلة نظرة الانطواء الي المظهر في الاختيار

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زوجوني من فتاة قبيحه

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول