زوجونا ولا بننحرف


السلام عليكم ورحمة الله وبركاته
ياخي مشكله لاتعطلت السياره فيك بشارع نائي >>> قبل أكتب الموضوع كنت بعرس وبجنبي مدرس لغه عربيه لاتدققون يعني
………………….
على طاري العرس مادريتو إني سويت مغامره مع أبوي عشان أقنعه يزوجن لاني كل ماجيه باليسر يقول لي كمل جامعتك والعرس يبيله مصاريف وصعبه عليك ويختم موضوعه بأنقلع عن وجهي

خلونا مع المغامره اللي سويتها
قبل أبدأ المغامره شريت علبة كولا تعرفونه البلاستك عرفتووها اللي زي كذا

/

بعد ماشريتها نزعت (لا مأثر فيه راعي اللغه العربيه بقوه) الورقه بعدها طبعت ورقه من الكمبيوتر وكتبت فيها هذه العبارة ركزوا على خطير يؤدي إلا الوفاة

/

هذا الشخص ليس على الخط حاليا شاطح فكره انه راعي مصنع صدق

ليصبح الشكل النهائي هكذا

/

أكيد فهمتوو مبدأ الخطه اللي بسويها
بعد مانتهيت من العمل .. دخلت بكل بساله على أبي الذي كان متكئ على المركا وبيده السبحه ذات اللون العودي التي كنت أتمنى ان الطشها منه حالها حال السبحات الأخريات ومعي علبة البانزين >>>> خلاص هنا بدأت القصه يعني أصبحت علبة بانزين المخرج عاوز كذا
بعدما دخلت قلت : شف يبه زوجن ولا بنتحر شف أبي أشرب بانزين علمتكم وتروه مميت حتى أقرأ التعليمات >>> عشان يصدق

أبي بنظرات ثاقبه ينظر إلا العلبه كان في ذهني أنه يقرأ التحذير لكن للأسف تفاجئت بسؤاله الذي لم يأتي على ذهني وقال لي : ليش لون البانزين كذا شكلهم غاشينك ياوليدي لاهو خمس وتسعين ولا هو احد وتسعين قلت يبه وافقت ولا أشرب؟
وأفتح العلبه لزوم الأكشن لكن تذكرت انه طايحه مني العلبه يعني طشرت بوجهي
قال أبوي ماقلت لك ياوليدي البانزين اللي معك مو أصلي مخلوط مع غازيات المره الثانيه أشر أصلي عشان تموت بوقت أسرع !! قلت طيب أنا بشرب الحين وصدقني راح تفقدونن ودور من يودي أهلي عنك يايبه لسوق ولمشاويرهم دور لك ولد كبير بار مثلي>>> ماخذ مقلب بنفسه
هنا التفت علي أبي وعيناه تغرغر حنان !! قال : ياوليدي اصبر كل شي بالتفاهم وأعطني اللي بيد
ك


أعطيته وكلي فرح وتبهج وسرور أنه بدأ يرضخ للأمر الواقع .. بعد أن أخذ العلبه من يدي بدأ يقول : توك ياوليدي على العرس كمل هالسنتين وبدال الوحده أزوجك ثنتين بعد أن خلص هالكلمتين قال : يالله ياأبني الباار اللي بنزوجك لاحجت البقر بقرونه رح ود أهلك شف يبون السوق >>>> على فكره هذا
اللي خلا ابوي يمنعني من شرب الكولا أقصد البانزين

التفتت أبي أخذ العلبه الا مالحقت عليه شربه أخوي الصغير النشبه ويوم خلصه سوى نفسه بطنه
يوجعه >>> طالع ملكع على أخوه
الحين طلعت كالأطرش بالزفه وفي روايه سوريه أخرى خرجت من المولد بلا حمص
يعني لافيه زواج ولا أستفدت من الكولا وشربته لا والأدهى والأمر أجبرت على مشوار كرف دام أربع ساعات في السوق

بس بالله ماهي فكره تحسب لي المفروض يسجلون برائة إختراع بأسمي بعد هالفكره الخاقوقيه يعني يصبح بكل بقاله وسوبرماركة على الطرق الخاليه من المحطات علب بانزين للي يتعطل بعيد عن محطه

المهم ماطول عليكم ودخلكم بالموضوع >> للحين مادخلت بالموضوع
وياخوفي أبوي مسجل بقروب أبونواف ويقول لي كالعاده ليش تنشر خلاقيننا بقروبات النااس

أصبرو عاد الموضوع اللي بقوله لكم رسمي شووي خلو أغير الأسلوب و التنسيفه وأسكب تسكيبت الكوبرا وأحط رجل على رجل >>> بالله ماطلعت تقل دكتور طالع بالتلفزيون بالقناة الأولى

ياخي ماكتبت الموضوع إلا من القهر اللي بداخلي شوفو وشلون صار وضعنا أضطرو الشباب مايهتمون أن وراهم زواج وبدو يفقدون الأمل ويلجئون لأساليب أخرى منها السفر وإلا الترزز بالأسواق
ياخي والله قهر الحين الواحد يتوظف يبي له أربع سنوات على قولتهم عشان يكون نفسه ويجمع مهر العرس اللي كل ماله بزياده وعلى مايجمع إلا يكون طلع الشيب براسه
مايدري هو يلقاها من الأسعار الرخيصه أو أباء البنات اللي يحسبون بناتهم فيها نفط ويرجع أرباح للمعرس وعلى فكره البنت مقردوه بعد ودها تعرس لكن الأبو ناشب بحلقه مغليها وإذا ماقدر الولد يدفع سعر المهر الغالي قال لبنته أن الولد أخلاقه خربانه ومايصلي رغم أنه اساسا ماسئل عن الصلاة
تصدقون أننا مجتمع مادري وش نحس به ناخذ اللي نبي من الدين ونحس انه بيمشي أمورنا يعني لو كان زواج حرمه ثانيه أستدلو وقالو الدين حلل أربع يعني خذو الشق اللي يبون وماكملو الأيه وان فيه مطلب اساسي وهو العدل
{ فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة } (النساء:3)
مو هذا موضوعنا موضوعنا أن الرسول صلى الله عليه وسلم زوج بنته فاطمه رضي الله عنها علي بن أبي طالب بمقابل درعه الذي كان ثمنه أربعمائة وثمانين !! >>> مو هذا اللي المفروض نتقيد فيه ونيسر المهور
ماقول أرمو بناتكم على أي واحد يجيكم لاتأكدو من دينه ومن أخلاقه وعلمه وبره بوالديه وأهله فاللي مافيه خير لهله مافيه خير لناس وخليتو البنت تشوف خشته وهو يشوف خشتها رغم ان اغلب العوائل تمانع بالشوفه الشرعيه >>> ماقلت لكم أننا مجتمع نأخذ اللي نبي من الدين بجد ياخي إذا أقتنعو بعض زوجوهم ولا تفشخرون واجد وخلو العرس عائلي وفرو فلوسهم لمشروع يفيدهم بالمستقبل وسفره لشعر العسل لماليزيا أزين من تجبرونهم على جده بها الحر والرطوبه


خلص الموضوع >>> مابغيت
أقوول الحين بالله بعد ماصرت مصلح أجتماعي مالمفروض يزوجن أبوي ؟؟
أتركم بخير


تعليقات 62

  1. بسم الله الرحمن الرحيم اولاً موضوعك فيه نوع من التحيز والتطرف باللهجه وهذا تطرف ارجو الا يتكرر لو كتبت موضوعك باللغه العربيه الفصحى بمساعدة المدرس الذي بجانبك لكان موضوعك اجمل ولكن افسد موضوعك وبريقه اسلوبك في اللهجه العنصريه اللتي لاداعي لها شكراً

  2. يالله ياربي انك توزجوه وترزقوه بالذرية الصالحه وتزوجن بعد ياربي معوه D: صراحه جبتها ع الجرح وربي ياليت هالشي يفهمونه الاهل من جد كثر الانحراف وكثرت المصايب الله يكفينا الشر والسبب هالتفكير اللي بيودينا بداهية تسلم يدك اخوي

  3. الا الوفاه ياشيخ وين سبويه عن خشتك الا المشاوير استر لبوك من انه يقط وجهه لبنت الناس عليه العوض منه العوض

  4. والله انك صادق بحكايه انهم ياخذون من الدين اللي يبونه وبقووووووة بعد 🙁 ننتظر جديدك يسلموووووو

  5. معليش انا بعترض عليك بالنسبه للمهر ةلاباء البنات معليش بس انت اللحين ماجربت ولا تقول سمعت لان موكل الناس زي بعض بالعكس يوم خطبنا لاخوي ماحددو المهر وتقريبا كلنا زي كذا و اللي يبي مهر قليل يدور مويروح للناس اللي يزودون ويتشرطون

  6. ههههههههه وربي انكـ فله :$ فكرتك خوقآآآآقيه ههههههه واااصل ابداعك واتمنى ان ابوك مشترك في ابو نواف ههههههه

  7. ^ شوشو انتو من أي كوكب ؟ انا من السعودية يعني يمكن انتو حالة نااادرة او يمكن حددو المهر لاخوك وانتي ماننتبهتي

  8. اقوووووول ماتسووا عليك هالخطه كلهااا واخرتهااااا مشاوويررررر بس اهنيك انك للحين توودي اهلك للسووق والله ياخوووي اني اخرر مره وداني سووق يمكن من 6 سنوات بسسس ع سالفة العرس والله مو بس ابوانا اللي يتغلون والله انتوو يالرجال عليكم امهات مدري وش يحسووون به يعني تجيك الام قرويه وحووسه ولاتدري اولها من اخرها وتبي ذيك الصارررررررررروخ اللي مازيها بالجمال ياهووووووه مايجتمع جمال وظفاااره بالبيت يعني عشان نصير اجمل الجميالات لازم نكون مانعرف بالمطبخ وبالبيت شي بس همنا قص شعر وصبغه ومناكير وبديكرررر والززي منووو يعني الحين نتعلم للحياة واذا تززوجنا تززينا لكم يالتماسيح الحلوين عشان كذا ياعياااااااال علمووا امهاتكم القنااااعه وان اهم شي الاخلاق والعائله الكوويسه يعني انا مثلا شملحي اهبل كلي ززين وقبله :$ واهلي وربي ونعم عائله مرررريحه لاغثى ولا قرقرره وابووي منتهى القناعه ويشتري رجال لو تقوله المهرر 20 الف قاااال تم مو رخص فينا بس صدق يشتري رجال ويستر على بناته وماماتي تنحط ع الجرح يبررى << كنها قاعده تلمممممح على عمرها :$:$ صدق صدق لاحد يززعل من كلامي بس والله الدنيا تغيرت يعني الرجال طفرانين للاخر وعلى كذا البنات شكثرهم بالبيوت اتمنى يكون في حل للسالفه هاذي ومعليششششش هذرة واجد بس الفراغ ومايسوي ..:)

  9. ههههههههههههه مرررره شكلك مستعجــل:D الله يزوجكـ يآآآآآآربـ بأسرع وقت ويوفقكـ المره الثاانيه اشرب فظ علبه كلوركس وحط سفن خخخخخخخخخ

  10. فض فض ياعزيزي فض فض وماعليك من ذولي المخلوقات اللي ينتقد التحيزيه ولا يطقطق هم ما يقولوا خليها في القلب تجرح ولا تطلع برا وتفضح بالفعل تفضح مع مثل ذول البشر تصدقون يمكن لانهم يتمركزون في هذي الاسواق وما احرقهم الحرام ويدورون الحلال حتى ببنزين الكولا ما أقول الا الله يعين العزاب من الجنسين على الصبر في هذي الفتره اللي نعاني فيها من قلة الحشمه والغلى تحياتي للعزوبيه المحترمين فقط لاغير (باصرف شيك)

  11. وانا سعوديه الا ادري امي قايلتلي وحنا نظامنا المهر على ابوي والبيت على اخوي واغلب الناس كذا بس انتم مادري عنكم دورو زين زكل اب يبي الستر لبناته بس زي ماقالت توت نجد امهاتكم مايبن الا كاملات والكامل الله ودورو البنات اللي يستاهلن تلقون ومايتشرطون بالمهر

  12. لكن ياعربي فصيح يا عامي تكلم :$,,,,هههه ناقشت موضوع مهم بطريقه فكاهيه ,,, حلو ….

  13. انا من فتره وانا ابي اخطب بنت ناس ومحترمين وبالفعل حصلت وسأل ابوها (النشبه) في العمل وبين ربعي وجماعتي ومافيه احد الا وسأله والحمدلله الكل مدحني بفضل من الله وبعدها دقية مشوار من الرياض الى الطائف عشان نتفق واشوف البنيه المسكينه ولكن الاب كان شروط كتالي : مهر بـ 60 ألف ريال وزواج في قصر وزيهاها زي اختها ولابد جماعتي وربعي يحضرون ,,,,, وانا اتأمل فيه يعني الحبيب مافكر من اين بجيب له المهر هذا ومافكر ان فيه قدامي تأثيث شقه كامل ولا ماسمعت منه كلمة ابي استر بنت وانت رجال وانعم فيك كل ماقال شئ قال 60 الف ,,,, مالكم في الطويله والله ياربع اني حزنت على البنت ابوها (النشبه) يبي يبيعها ويبي يتفشخر قدام ربعه اما الزوج وبنته في حريقها المهم اني استخرت وقلت في نفسي مافيه الا هذي العائله في الف يتمنون احد يطق بابهم وقفلت الموضوع معاه وقلت له ان مامعايه الا كذا وكذا اذا انت راضي توكلت على الله ولكن الرجل كان مصمم سلمت عليها وقلت لها الله يستر علينا وعليك … بالرغم ان البنت تبي الفك وتبي تعرس ولا وهذا وانا راتب والحمدلله بيكفيني وظيفه محترمه ولكن الابو مايفكر الا في الدراهم وبس والله العظيم ايقنة ان اكثر الشعب السعودي همه المظاهر . ولا اللي يقهر اذا سألت بعدين قال انا مع الشباب وراح اساعدهم وهو اكبر نصاب حكي فاضي بس ………. والله اني حزنت عليها من جد قهرني انا بالنسبه لي تمساح الف واحده تتمناني بس البنت يالله في السنه حسنه اذا احد دق الباب ويبي يعرس .. والاب يبي 60 الف والله ستين الف تصك في خته عبد الدينار والدرهم وبس …….

  14. هههههههههه والله موضوعك خطير بالنسبة للمشاوير ترا نفس المعاناة >>>> متورط معاهم وبالنسبة للمهر ياخي مادري ليه المهر غالي انا اتكلم على مستوى المدينة المنورة يعني القصر يكلف 100 الف والمهر 50 والأثاث ومتطلبات البيت 100 الف غير اجار البيت اذا كنت مستأجر يعني يطلع الواحد منتففففففف على الآخرررررررررر بالذات الشي الي ماله داعي قيمة القصر يلعن ابو الحالة يوم واحد بـ 100 الف ليه ياخوي مستأجرين (تاج محل) عموما انا باقي ليه سبع سنوات الين اخلص دراستي في كلية الطب هع هع صدقني مالك الا الطرق الملتوية عشان تمشي حالك >>>>>>>>>> يفكر يتزوج مدرسة مسيار خخخخخخخخخخخخ امزح امزح بس الله يصبرنا وشكرااااااا

  15. إذا تطيعني أو بالأصح حديث الرسول الكريم صلى الله عليه وسلم عليك بالصلاة على وقتها في المسجدأولا وبالدعاء ثانيا وبالصيام ثالثا وبعدها تعال أ زوجك بنتي جميلة وعمرها16سنة من جد جرب الوصايا الثلاثة وبتشوف النتيجة من الله اللي اسم من اسمائه الرزاق وبعدين ماتدري يمكن كل تأخيرة فيها خيرة بس أنتبه من الأسواق ومضايقة بنات الناس ترى يمكن تجيك دعوة من ام او اب وترفع عليك وأسفه جدا على الإطالة

  16. انا تعليقي خارج الموضوع هو انت في الجامعه وعندك اخطاء املائيه يعني (الى ) تكتبها انت (الا) ارجو ان تنتبه ترى ماني لغه عربيه بس استغرب من شباب وش كبرهم والأملاء عندهم مشاكل فيها

  17. بصراحه ابد ما تعرف تسوي مقالب خخخخ عموما الله يوفقك ويستر عليك وعلى جميع المسلمين والمسلماااات اما بالنسبه للأخوان الي تكلمو ا عن المهر اصابعك مو مثل بعض فيه العوائل الي تدور الستر انت اسعى واسأل وربي بيوفقك بس انا مستغرب من بعض الشباب الي يتكلموون على المهر انا معاكم اذا زاد المهر صعبه على الواحد لأن الحياة صارت صعبه بس قبل كل شي وانا اقولها مو واقع تجربه المهر يهون بالمصاريف الي بعد الزواج والله خاصتاً الاجار مرتفع لا زود على ذلك عليك قرض وفواتير ومقاضي وروحات وجيات يعني الي راتبه اقل من 6000 ويبي يستأجر راح يعاني ,, والله يسهل امووووركم

  18. والله انا مني شايفه في غلاء بالمهور عكس بعض القبايل والعوائل تحدد مبلغ معين مايزيد عنوه المهر وخاصتن في المدينه المنوره ومين قلك ياخويا فراس 50 الف احنا قبل العام تزوج عمي وابو العروسه ماجاب سيرة المهر قال اللي تدفعوه راضين فيه وعمي قدم 30 الف لعروسه والحمدلله تزوجوا .. وخالتي تزوجت العام وماتكلمنا عن المهر قدم العريس 25 الف والحمدلله اتزوجو ومبسوطين وحتى جدي لمن قلو العريس دي 25 الف قالوه (احنا متهمنا الفلوس احنا نشتري رجال عشان اخلاقه ودينوه ) وموبس احنا اغلب صحباتي والي اعرفهم يقولوا ابهاتنا يقولوا عيب نحدد المهر مننا جالسين بحراج سيارات ..!!! للشباب :الي يبغى الناس الطيبه واللي تفهم بالاصول والاخلاق يحصلهم … والابهات اللي يحسبوا بناتهم قطع اثاث ولا سيارات تنباع وتشترى وماياخذها الا اللي يدفع اكثر دولا ياويلهم من ربي وراح يحاسبهم بدنيا قبل الاخره لانو دولا البنات امانه برقبتهم لازم هما يدورا ع مصلحتهم وسترهم مع الرجال الطيب الصالح مو ابو فلوس اكثر ..!!

  19. يارب يرزقك الزوجه الصالحه الي تكون قرة عين لك ويملىء قلبك بحبها ويحنن قلب ابوك عليك ويزوجك في القريب العاجل اما تعليقي عن المهور ففي ناس تيسر وماتكلف على الرجل وابوي الله يحفظه من ضمنهم فمهر اخواتي 25 وابوي ما يقصر علينا اي شي ينقص يوقف معانا فيها ففي ناس تشتري رجااااااااااااااااااااااااااااااااال مايهمهم الفلوس ودمتم في حفظ الله ورعايته

  20. اولا موضوعك ياخي راااااااااااااااائع بطريقة مرحة، وماهوب لازم ياخي انك تكتب باللغة العربية ، ولا كان شكسببير الف نسخة بنقالية من شان لا يجيك ابو فسية وينتقده ، اولا انا مجرب الزواج والله الديون تتعب الواحد، ياخي بس عتبي على بعض البنات، الحين البنت يوم تسوي حركات وكوشة بالسعر الفلاني ، وخرابيط حفل مال امها داعي، ليه ما تعرف ان هالدراهم لو وفرتها كان تهنت به في شهر عسلها، الحين اغلب البنات تلاقيه على كوشة وفستان تصميم مدري شسمه بدوي ذا اللي بالتحلية بجدة، وخرابيط وبعد الزواج بيومين ، جبنة بيضا ، وشاي بكاسة جبنة كاسات مطموس المعالم، ياخي الواحد اذا ما بجيبه على اقل تقدير 150 الف ، لايفكر يتزوج . تحيتي مره اخرى لكاتب الموضوع ، واقول له المره الجاية استخدم علبة حليب السعودية ^_^

  21. والله انك زااااااحف وفكرتك زااااحفة>>>بس مانفعتش يالذكي:$ وصراحة ابوك صادق كمل دراستك و يمديك ع العرس الزواج مسؤليه مو خبط لزق؟؟ اقول انثبر بس والله الله بخو اتك حطهم بعيونك وودهم اللي يبووون دلعهم مو الدلع بس (للمره)اذا جت؟؟؟طبعآ هههههههه الله يوفقك…

  22. يابن الحلال ما غلينا المهوووور رخصنا رخص واسهمنا طاحت كله من هالشباب الطفران احنا بعد نبي نعرس مو انتم بس تقدموا للبنات تراهم يحترونكم خخخخخخخ مو انت اللي بتنحرف لحالك المجتمع كله الله يستر عليه خلونا نتفق شباب وبنات نسوي خصم مقابل صلاح الشاب

  23. ما شاء الله علبك مبدع وافكارك مب سهلة والله يوفقك للي تتمناه ويحنن قلب ابوك عليك:)

  24. خخخخخخخخخخخخ رينا يقوزك ياواد إن شاء الله يقوم أبيك اليوم من النوم ويقول يافلان تراي خطبت لك بنت فلان رح شفها <– على كيفتس ؟ بس والله ياعليك خطه :$ .. الا على الطاري وش لكم بالعرس ياتسبديه أنا أعلن عزوبيتي الدائمه إلى أن أموت <–من نشدتس ؟ هع شووكنن عالموضوع .. ربنا يوفأك 8)

  25. جمعت كل مصاريف العرس من مهر وهدايا والعشاء وفلوووس القاعه وطق كااااش على الفراش … ولد نعمه 🙂 .. بس عاد الصدق هذي رواتبي جمعتهن ريال فووق ريال حتى الكولا ماشريته .. والحمد لله تحس للعرس طعم ثاني ماحتجت لاحد بس الحمد لله امور المهر عندنا معقوله ماتعدى 35 الف

  26. للاسف عندكم في المدن المهور غاليه جدا لاوبعد العرس على حسابك خير انشاء الله ياخي عندنا في الجنوب بنات اصول وملكات جمال 40الف بس واغلى قصر 20الف ولا انت مجبور انك تسويلها زواج في ديرتها الله لايهين ابوها يسويلها على حسابه وانت صلحلك زواج في ديرتك وعلى حسب امكانيتك مااقول الا الله يغنينا بحلاله عن حرامه وبطاعته عن معصيته مشكور ع الموضوع اعجبتني جرائتك مع ابوك.

  27. ملعقققققققققققه شكلك مبعد طبيتي في العشررررررررررررررررين اصبري تعدين 25 بعدها بتعلينين تخفيض وتسوين عروض خخخخخخخخخخ ادعوا لنا يالعزابيه 🙁 نكسر الخاطر خخخخخخخخخ

  28. :$:$:$:$:$ ابداااااااااااااااااااااااااااااااااااااع ان شاء الله الفكرررررررررررره توصل وااااااااااااااصل الابداع

  29. وربي أنك تحزن:( بس عليك أفكار جوهنمية أيش هاذه الأفكار ياواد:D ياالله يمكن أبوك يحس فيك ويزوجك قبل لاتنحرف8) على فكره أسلوبك مررره خطيييير وشكلك تعاني من عذر أبوك خخ :D:$يسلمووووووو:D

  30. ياصاحبي أحسنت بالتعبير لكن أنت طالب في الجامعة – و فقك الله – وهذا يوجب عليك الكتابة باللغة العريية الفصحى لأنك لا تكتب لنغسك أو لمن يفهمون لهجتك . فأنا سوري وكثير من الألفاظ لم أفهم معناها إلا بعد تفسير و تأويل . و لو كتبت بها لكانت قصتك أجمل و مؤثرة أكثر و أعتقد : لو أن والدك – أطال الله بقاءه – رأى في يدك بئر من البنزين فلن يتحرك ليحقق لك حلمك التاريخي في الزواج حتى يغني مواله الذي يدور في رأسه لذلك انتظر الفرج و ما حصل لزميلنا في الحامعة يشبه ما حصل لك : لقد ذهبنا في زيارته وجالسنا والده و بالتأكيد سوف يكون جزء من الجلسة مخصص للحديث عن الزواج و الصبايا …….. و ألقينا القنبلة : ابنك عشقان بنت … يالطيف منها ؟؟؟؟ ففهم والده الحكاية فحدثنا عن أحد أقربائه الذي وصل إلى الخامسة و الأربعين حتى تزوج – كان يكمل دراسة الدكتوراه و ابن خالته وصل إلى الخامسة و الثلاثين و لا يريد الزواج – وهو صيدلاني…. ففهمنا الرد……… فلا تبتئس لست و حدك من يخطط للإيقاع بأهله للموافقة على تزويجه . لكن المصيبة أن الأهل منتبهون إلى هذه المخططات المشبوهة…..

  31. راحت عليك هالمرة جرب غيرها بس تدرون ما أعرف بنت تزوجت بأكثر من 40ألف وأغلبهم ب30هذا نقطة نفس البنات أعلاه ما تزوجوا في قاعات كبيرة كلهم في استراحات وماشاء الله أمورهم ماشية تمام الشاهد:في ناس يشترون رجال مو تروحون للناس يبيعون بناتهم كأنهم سيارة وماتبون الغلا

  32. كمان انت تجيب كولا كان جبت فانتا على الاقل ابوك كان يبلعها ويوافق على الموضوع لو بشكل موقت الين ما ترجع من المشاوير اللي حا يرسلك لها واذا تبغى خطه ثانية كلمني انا اجبلك خطه ميه ميه . الله يعطيك العافيه على الموضوع انشاءالله نشوفك عريس بدون كولا ولا فانتا .

  33. شكلك تعباااااااااااااااااااااااااان مرة يابوالشباب, مثلي:$:$:$:$ الله يزوجك ويزوجني.

  34. اللي يسمعكم يقول الزواج هو منتهى السعاده وكلكم ميتين عليه احمدوا ربكم بس فيه ناس يتمنون ورقة الطلاق ومو محصلينها.. آآآآه يازين الحريه بس

  35. انا مع شوشو الحين انا خاطب اقسم بالله ماقالوا لي اي شي بالنسبه للمهر بس لازم اعطيهم علشان البنات تشتري لبس لها اولا واخير البنت راح تشري لك راح تتزين لك يالغالي ولاتنسى انت راح تشتري بنت مو بقره واخوي متزوج العام ولاقالوا له شي بعد وفيه نسبه مو كثيره ولا قليله يبون للبناتهم الستر وبس الله يوفقك يالغالي ويوفقك جميع من يبي الستر يارب اما بالنسبه للدين تكلم ولاحرج يوم اخطب ماسالوا عن الصلاه صدق انهم سالوا عن اخلاقي وعلاقتي مع اهلي وعن راتبي:$ بس الصلاه ماسالوا:$

  36. اذا حاس نفسك بتنحرف خلاص معناه ان في طاقة بتنفجر داخلك و هذا شيء مؤقت ما يبغي له زواج دائم لا تبلش روحك و تبلش بنت الناس معاك و انت بعدك ما كملت و الدين ما غفل ابد عن هذا الشي يوجد زواج مؤقت مهما اختلفت مسمياته مسيار , زواج بنية الطلاق , مسفار , مصياف ما اعرف شنو اما اذا حبيت تستقر و تكمل نص دينك و ترزق بالذرية الصالحة ذيك الساعة يبغي لك عرس دائم و اذا ما عندك كاش ممكن تسجل في الزواج الجماعي او تتزوج من خارج المملكة يقولون و الله العالم انه بنات البحرين مهورهم 15 الف !

  37. ههههه مراحب خيوو الحين وش معجلك على العرس خلص دراستك اول <<ابد ماتقلد ابووه .. لا من جد اتكلم الحين انت ودك تعرس طيب من وين راح تصرف والا ابوك راح يصرف عليك ماتوقع ترضاها يعني لو بتشتري زوجتك فستان تروح لابوك يعطيك فلوس يسالك ليه تقوله المدام تبي فستان B خلص دراستك وتوظف وكون نفسك وبنت الحلال تنتظرك في بيت ابوها ماارح تطير .. ترى العجله اوب زينه وانا اختك .. والله يوفقك ويرزقك الزوجه الحنون الولود ويرزقك درزن عيال ..

  38. انا الصراحة أيدك على موضوع الزواج والصراحة كلامك عدل على حال الشباب يا بالمجمعات او النوم والطلعات والصراح الزواج في استقرار وتكملت نص الدين بس ترى توه الناس عليك اول شئ اخلص من الجامعه بعدين فكر عدل بالزواج ما اقول لك لا اتفكر لاء لان فكر لاهل و نص تفكير الأهالي مايرضون يعطون بناتهم واحد يدرس لان صارت بولد عمي الحجه من وين يصرف على البنت وهو توه يعني قالو لهلي الولد ماينعاب بس المصرف ؟؟ شوف وين التفكير ولاهنت

  39. ^ ^ زواج المسفار والمتعة وهلم جرا محرم الا اذا بحثتم عن من يحلل لكم فهذا سهل جدا ممكن ان تفعله انت مثلا يا محمد ضع لحيه بسيطه وحفظ كم ايه وكم اسم وركز على اسم كتاب وكم امام وفتي للجهال بجواز هذا وذاك وفي يوم القامة الحساب ان شاء الله زوج الله ابناء وبنات المسلمين ازواج صالحين غير مدلسين ولا منافقين ولا مبتدعين في الدين

  40. ههههههههههههههههههههههه <<ميته من الضحك الله يرجك رجا مبرحا صراحه موزوعك خوققان يسلمو ويعطييك الف الف عافيه

  41. الموصوع غلط كبير يا خيي..زوجوني ولا بنحرف؟؟؟؟شو ها الحكي؟؟؟الشخص ياللي بينحرفاو الو نيه انو ينحرف الزواج ما بيفرق معو لانو ناوي ع الانحراف وياما ناس مجوزه ومنحرفه..ما هيك؟؟وبعدين ازا انتا شب وكبير مين منتضر يجوزك..بيك؟؟؟اللي بدو يتجوز ما يتكل ع حدن من شان يجوزو..كون حالك وخبر اهلك انو بدك البنت الفلانيه وانو انتا معك اللي بيكفي من شان تسترا وانا متاكده انو اهلك رح يوافقو؟اما ازا بدك تنتظر بيك او امك من شان تجوزك فاسمح لي الك انو انتا منك قد المسؤليه ولساتك صبي8)

  42. 😀 اذا بتنحرف الميزان موجود في الصناعيه لا تتحمس ياعزيز بعدين راح تكره الزواج وساعته دائم كذا حلاوة الشئ في اوله وبعدين يعني ماراح يكون في هذا الحماس موجود طبعا في ناس يقولك غير حياتك بحركات وافلام عايشين الدور في النهايه اذا لم تكن القلوب تحب بحق وحقيقه ولا مافي شي بيتغير في الحياه وراح تكون روتين والله يقويك على الاسواق اشر البقاع

  43. والله مدري شقول بس الله يعينك يعني الشاب اذا يبي يتزوج لازم يكون موظف ولا من وين بيصرف على بنت الناس !! تعالوا نحسبها وش رايكم ؟ لو قلنا جامعي ودافور بيتخرج وعمره 23 سنه ومع كثر الوظايف عندنا ماشالله يالله لك الحمد الخريج يبي له سنتين ولا ثلاث على ما يتوظف 25 سنه توه يحصل على وظيفه ويبدأ يكون نفسه لو يبي يعرس ومثله مثل غيره يطلع قرض على كذا بدا حياته بالدين الي بيتضرر البنت دام ابوها كلف ع العريس بمهر غالي وبدا حياته بالدين وووين بيصر عليها ولا بيعيشها برفاهيه وهو بادين حياته بدين الله يعطيك العافيه يالغلا الحياة صارت جهاد وكفاح

  44. اولا احب اقول انو عليك اسلوب مره حلووو ثانيا توك تدرس مابعد فقشت بيضتك تبي تتزوج ؟؟B وبعدين تعال هنا انتا وياه < ناويتهم ليلة الزواج مره وحده فالعمر وماراح تتكرر مرتين فـ اكيد اكثر البنوتات تبي تكون ليلة زواجها مثل مااتمناها !! واذا مو قادرين ع المهور الله لايهينكم لا تتزوجون يمدحون العزوبيه هالايام ..8) وبعدين وش لكم بالزواج ليه ليه نحبس اعمارنا بـ القفص الذهبي بلاااااهااا زواج وش حلاة الحريه 😀

  45. إذا أتاكم من ترضون دينه وخلقه فزوجوه، وإلا تكن فتنة في الأرض وفساد كبير نعم، هذا حديث حسن أخرجه أبو داود في السنن، وصححه كثير من أهل العلم، وقد بيَّن فيه النبي صلى الله عليه وسلم أن الخاطب إذا كان مَرضيَّاً في الدين والخلق فرده لمجرد العوائد والأعراف أو لمجرد الطمع في زيادة عرض الدنيا وحطامها سبب لنفرة القلوب وسبب لكثير من المشكلات التي لا حصر لها، فإذا كان الإنسان مَرضيَّاً في دينه ومَرضيَّاً في خلقه وخطب فينبغي أن لا يُرد، لأن رده يؤدي إلى كثير من المشكلات، يؤدي منه هو إلى عقدة نفسية، ويؤدي منه أيضاً إلى أن يمكن وقوعه في الحرام والفتنة. وكذلك الطرف الآخر أيضاً إذا رد عنه من كان هكذا ذا دين وخلق فذلك سبب لوقوعه في الفتنة، نسأل الله السلامة والعافية، لهذا قال: وإلا تكن فتنة في الأرض وفساد كبير.

  46. زوجوووووووووووووووووووه تكفون لاينتحر ههههههههههه والله بصراحه بداية موضوعك مت من الضحك وفي نص سالفتك حزنت عليك بجد والخاتمه..اقول والله انك صادق ياأخوي وانا اقول اسلوبك في طرح الموضوع جدآ رائع واصل مثل ماأنته عليه واسلوبك جدآ رائع ولاتغير اسلوب طرحك في الموضوع ولا مابتابع جديدك ههههههههههههههههههه=>تهديد:D وقول لي ابوك زوجني ولا بنتحر من فوق الرصيف ههههههههههه ع الاقل اهون من بنزين غازيات هههههههههه والله يرزق الزوجه اللي تسعدك وبلمواصفات اللي تتمناها آمين ولك احترامي..

  47. ههههـ الصراحه اسلوبك حلو في توصيل الفكره بس الصراحه احمدو ربكم 60 الف و 25 الف احنا عندنا اقل من 100 الف المهر مايرضون هذا كله غير قاعة العرس … الخ و البيت او السكن انا عرس اخوي كلفه 400 الف وتزوج و عمره 21 يشتغل وماخذ له دين ( سلف ) الحمدلله ع النعمه

  48. الله يعينك ياخوي والله اني ارحمكم بس عليك بالوصايا الي انذكرت فوق ويسهل الله امرك وانا بقولكم قصة واحد من الي اعرفهم شخصيا :>وربي ان عمره 20 وهاديه ربي مشاالله ويدرس وضيفته مؤذن فقط لاغيرر من اول خطبه له ماردينه لاننا نشتر ي الرجاال والحمدالله ميسرين على شبابنا ما ناقش بالمهور ابد الله يسهل اموركم ويزق الجميع ياارب:D

  49. اقوووووووووول فيه نقطه لاتنسونها ترا الشباب نفسهم يحبون يرزون نفسهم عند نسباهم يتسلف ويحط له ذاك العرس وسفره ماحصليتش ..وكلها بالدين وفلوس غيره…. كله عشانه كلمها وشافها وجلس معها ….بطلوا هالحركات وتسلمون من نص التكلفه خخخخخخخخ.. ثانييييييييياُُُُُُُُُُُُُُُُُُ لاتخلوني احلف …فكوني تكفون لاتخلوني احلف << اخلصي والله ما صاروا الناس يشترطون اقولكم سالفه صارت لي انا اتصلت ام العريس وتسأل وامي تجاوب وكان فيه سؤال …هي تصلي ؟؟؟؟ اللي فاقعن تسبدي ..اني ليه استقبلهم يوم سألت امه هي تصلي ؟؟؟؟؟ هي من اي دوله خاطبه …والا ولدها تشوفه توووووووب اخرتها صار ولدها راعي سفريات للمغرب والبحرين والامارات فقط بس مصير الشي ينكشف ..وخلها بدل ما تغلط ع الناس هذا ولدها تروح تشوف يصلي والا لاااا؟؟ اخبر اهل البنت يسألون عن الصلاة مو اهل الولد ,,, نقطه لكل الشباب ياليت لو تخطبون ..يكون من الرجال للرجال ……لان الحريم يطلعون في البنت الف علـــــــــــه ….وبكذا يطفش الشاب ويتأخر في الزواج بعدين لاتنسون التحاليل و العلل اللي كل شوي ضايفينها للتحاليل يبون االناس سليمه 100% التحاليل حرمت ناس كثثثثثثثير بنات وشباب عن الزواج..خصوصا الوباء الكبدي B اقول ربي يفرجها ع الجنسين …

  50. هههههههههههه مره ايميلك حلو… شوكرن ويارب يارب يارب يصير عندك فلوووووووس كثيرات وتتزوج باحلى البنات اللي تسعدك وتسعدها يارب وتجيبو بزوره….وتعيشون بسبات ونبات…. يارب…

  51. قصتك حلوووووووووووه مره وكوميديه على اساس مسوي مقلب في ابوه فانقلب السحر على الساحر خخخخخخخخخخ المره الثانيه جيب فلاش مخلوط بكلوروكس وهدده يمكن ينفع معك خله يشم الريحه اول عشان يتاكد انك تبي تنتحر :$:$ اما بالنسبه للزواج والمهور اشوفها معقوله جدا وماهي مستحيله الا عند بعض العوائل الي تتفشخر قدام العالم بس الاغلب يقنعون بالبسيط <<< مثلي يعني 8) بس انا اشوف اسلوب المصريين احلى اسلوب البنت والشاب يتساعدون في كل شيء بداية من الحفل الين تأثيث البيت وتجهيز العروس على اهلها وحجز الصاله على العريس هذذي هي المساواه والتخفيف على الشباب على فكره اسلوبك ضحكني كثير وحلو يمكن البعض مافهمه مثل الاخ السوري بس كان الاسلوب حلو ومادري ليه البعض سماه بالتحيز في الكتابه..

  52. للحين ما انتحرت ههههههههههه جب لك الحجم العائلي احسن واسرع :$ تسلم هالديات والله ونستني رديت 3 مرات وباقي يمكن ارجع بعد خخخخخخخ:$

  53. اخوي موضوع العرس والزواج .. تكرر كثيرا .. بالنسبة للاكشن اللي مسوية وتعبك على الموضوع , فلو تسمح لي من رأيي الشخصي فيك كتابتك سردك للموضوع والقصة كان جدا سيء متواضع بشكل رهيب حلو انك تبين اللغة العامية ودايما نقرا مواضيع بلغة عامية وتكون قمة الامتاع انت يعيبك العامية بالزيادة انا من نجد فهمت كل كلامك بس انت اظهرت اللكنة القصيمية بزيادة وثانية الشي والاهم والاخطر التشطيح فحلو تكتب بموضوع وتصير فيه اما انك تبدى موضوع وتنتهي بثلاثة هذي تحسس القارىء انك تسولف وهذي مجرد سواليف عادية لا اكثر ولا اقل الواحد لما يقرى موضوع قصصي يكون بين شيئين يا قيمة بالمعلومات يا روعة بالسرد والطرح انت من وجهة نظر لم تتوفق لاب منها ارجوا تقبل وجهة نظري بشكل ودي اخوك عبدالله

  54. من معه فلوس يعرس والي مامعه فالعزوبية أجمل وأحسن لاتقول غلاء فبنات الناس ماهي لعبة !!!!!!!! انت بنفس أذا جا واحد ويبي أختك بتزوجه بلاش لا :$ هذا حقها شرعا اشتغل يامال الشحم وجب فلوس ومليون بنت تبيك ولا تبي الزواج من ظهر ابوك المسكين

  55. والله خوش فكره اسويها مقلب باللي ينافسني اويحاول يتبلاني:$:$ بس ياريتها نفعت مع والدك الله يصلحه ويهديه يزوجك و يريحك:( الله يناولك اللي في بالك باقرب وقت وباسهل الطرق اللي ما تتخيلها وبالنسبه للمهرما بتخيل اذا في والد يحب بنته كتير و يدور مصلحتها ومستقبلها يقبل باي مهر مهما كان بس في خوش عالم ما يهمها المهر المهم يكون العريس حنون مو نكد ويدور المشاكل كريم متسامح وكمان وبشوش ويمازح ومتعاون فاذا كانت فيك هالصفات ما بنصحك تنتحر خخخخخخخخخخخخخخخ بس الصبر خليك هيك زيد المقالب اكيد مقلب اقوى شوي رح ينفع موضوعك كتير اعجبني وموتني من الضحك ههههههههههههههه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زوجونا ولا بننحرف

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول