السلام عليكم ورحمة الله وبركاته
مساكم / صبحكم الله بـ الخير جميعـاً
عودهـ لكم من جديد في الجزء الرابع والأخير من تقريري المصور
لـ رحلتي في مملـكـة تـايــلانـد 
واللي ماشاف الأجزاء السابقة .. يضغط ع الروابط :
رحلتي إلى تايلاند – تقرير مصور < الجزء الأول >
رحلتي إلى تايلاند – تقرير مصور < الجزء الثاني >
رحلتي إلى تايلاند – تقرير مصور < الجزء الثالث > 
آخر يوم في بوكيت أخذنا جولة ع المدينة
رحنا نشوف : حديقة الفراشات وحديقة الحيوانات ومعرض مجوهرات ومكان للـ قفز في بحيرهـ
ماصورت غير في حديقة الفراشات والحيوانات بس 
اول شي رحنا لـ حديقة الفراشات
في المدخل حاطين مجسمات لـ فراشات وكاتبين معلومات عنها وكلام كثير
ومن بين الصور اللي ع الجدران .. قهرتني هـ الصورة 
مو بس عشان مالها دخل في الفراشات
لا ابيكم تتخيلون انفسكم واقفين في المرايه اللي ع اليمين وراح تعرفون ليش انقهرت 
من حديقة الفراشات رحنا لـ حديقة الحيوانات
شوفوا الفيل .. عادي مربوط بـ سلسله صغيرهـ بدون شبك ولا شي 
المشكله انهم حاطين البعير الجمل في قفص كأنه أسد 
وهذا النمر جالس عشان اللي يبي يصور معه << صورنا بـ 20 ريال الصورة
طبعاً ابتسامه ثانيتين قدام الكاميرا بعدين ررررررركض
مو خوف لالالالالا بس كان ودي اسوي سباق مع اخوي 
من جد والله وانا جالس جنبه وحاط يدي على ظهرهـ احس دقات قلبه كنها سامري 
يمكن هو اللي خايف مني << 
لا واللي خوفني أكثر المدرب حقه ماله يد
مقطوعه كلللها من الكتف 
!!
يوم سألته .. يدك أكلها النمر ؟
صررفني وقال تبي تصور معه اجلس 
كل يوم في الحديقة يسوون عروض للـ قرود والفيله والتماسيح
طبعاً ماحضرنا عرض القرود ولا الفيله .. بس شفنا حق التماسيح .. كان حلو والله 
يعطي التمساح بوسه 
يحط مية بات عشرهـ ريال في فم التمساح 
وبـ نهاية هـ اليوم انتهت رحلتنا في بوكيت
وكان حجزنا من بكرا لـ بانكوك
يومنا الأول في بانكوك قضيناهـ في Dream World
ملاهي رووووعه وفيها حركات وتلفريك وعروض حيوانات وعرض حركات هوليوود
لا واللي عجبني أكثر في هـ الملاهي التنسيق والترتيب والاهتمام بـ كل شي
و مسوين مجسمات في كل مكان خصيصاًً عشان اللي بـ يصور معها !!
راح تشوفون الصور الحين ان شاءالله
هذي البوابه
اول شي في الملاهي حديقة الحب
كل شي فيها على شكل قلوب 
شوفوا مكتوب LOVE بـ الشجر .. من جد رووووووعه
لاتفوتكم سيارة الحب 
بعدها ركبنا التلفريك .. قلنا نشوف الملاهي من فوق
هذي مجسمات فواكه مسوينها كـ شكل جمالي 
طبعاً حجمها كبير بس من فوق مو مبين
هذا مجسم لـ رجال كنه غرقان << من جد اللي مسويه فنان وخيآله وآآآسع
برضو حجمه كبير مرررهـ .. لـ درجة اني مصور داخل فمه 
شوفوا كيف الفن بـ الشجر 
وهذي لعبة الشوايه << ترى ماجبنا العيد فيها ابدددد 
نزلنا من التلفريك ودخلنا بيت الاشباح
يلعن ام السخاااافه اللي فيه
قسم بالله تسدحنا ضحححححك
المفروض نطلع خايفين .. وحنا طالعين نضحك
أحلى شي حاطين مجسمات لـ هياكل عظيمة عند بوابة اللعبة
طبعاً الغرض منها .. عشان اللي بـ يصور جنبها 
وهذولا يلعبون بلوت ويدخنون << الظاهر اللي مسويهم سعودي
شوفوا الكرفته والطاقيه بس
اكثر شي ضحكت عليه في هـ الملاهي
مسوين النخل على شكل رقاصات 
وهذا النمر حق تشيتوس
وكـ العادهـ في كل زمان و مكان في تايلاند
لازم تلقى شي يتعلق بـ الفيله
مسوين مجسمات لها من الشجر .. وفوقهم حاطين قرود 
هنا سووا عروض وحركات هوليوود
تشوفون هـ اللي لابسين اصفر .. هذولا دخلوا الملاهي بـ لحظه وانتشروا كنهم نمل !
من جد وش كثرررررررهم .. انا قلت وش هـ العايله اللي مطقمين وجايين الصبح للـ ملاهي
طلعوا مدرسه وجايين رحله << الله يخلف على مدارسنا ورحلاتهم .. ان خربوها ودونا معرض الكتاب
بدا العرض .. تفجير وطلق نيران .. ودبابات وطيارة !
من جد أبدعوا .. كنك تشوف فيلم << طبعا بدري عليهم ينافسون هوليوود 
هذي بحيرهـ قبل مانطلع .. عجبني شكل الورد بـ وسطها 
وبـ كذا يكون انتهى آخر الاجزاء من تقريري المصور عن رحلتي الى مملكة تايلاند
أتمنى يكون الموضوع بـ كل اجزاءهـ نال اعجابكم
واحب اشكر كل اللي تواصلوا معي وحمسوني
بـ ردودهم ومتابعتهم وكلماتهم الحلوهـ
واعتذر ان كان الموضوع طال شوي ومليتوا
بس صدقوني .. انا كل هدفي تستمتعون في كل لقطة من الموضوع
مثل ماستمتعت انا في كل لحظه بهـ الرحلة
وابيكم تعيشون الجو الرائع اللي عشته
اشوفكم على خير في مواضيع ثانية ان شاءالله
700) {this.width=700; this.style.cursor=’hand’; this.title=’اضغط لتكبير الصورة’}>
