ذكريات بزر أصبح رجلاً (1)


السلام عليكم ورحمة الله وبركاته
ألف تحية معطرة بكولونيا المغاسل الأزرق [ أزين عطر أعرفه ] لجميع أعضاء القروب الجميل
وألف عذر من جميع الأعضاء الي شرفوني وعلقوا على موضوعي الأول لكن معذرة على عدم التعقيب لإني ماشفت الردود إلا متأخر
وردودكم محل تقدير وإحترام

من فترة كان عندي فكرة موضوع أجمع فيه مواقف رسخت في طفولتي
تحت مسمى يوميات بزر أصبح رجلاً
وبعض هالمواقف يمتد حتى بداية المرحلة المتوسطة وبعضها يتغلل حتى أواسط المرحلة الثانوي
والقليل منها يصل إلى المرحلة الجامعية ونادراً ما تمتد حتى حياتي الوظيفية << لعنبوا إبليسك متى صرت رجال خخخخخخخ
بحكم تقادم الزمن على وقوع هذه المواقف فتفاصيلها الدقيقة لم أعد أذكرها جيداً
لكن الموقف بشكل عام لايمكن تناسيه
ولذلك وحتى تكون الصورة مكتملة ارتأيت أن أكمل جوانب النقص في بعض التفاصيل بإضافة تفاصيل أرى أنها كانت مقاربة كثيراً لما حدث


!!في بيت عمي أمير

هذا الموقف في المرحلة المتوسطة
وكنت متعمد أضيفه كأول موقف عشان تعرفون مدى العلاقة بين عائلتنا الكريمة وبين الأسرة الحاكمة

في يوم قالي أبوي ترا بكرا عمك عازمن أمير على غداء
أحترن بعد صلاة الظهر عند الباب عشان نروح له
قلت أبحتريك من صلاة الفجر هذا أمير موب بلاش
تروشت وتنظفت للمرة الثالثة في حياتي تقريباً طلعت كأني عريس في ليلة عرسه ورحنا لعمي في إنتظار مقابلة صاحب السمو الملكي الأمير

جلسنا بالمجلس انا وجدي وأبوي وعماني وعيال العم
كانت الرسمية طاغية علينا بحكم أننا على وشك مقابلة أمير
ضرب جرس البيت وكلنا تناقزنا الأمير جاء
طلعت وكلي لهفة وشوق
تفاجئت أن قدام الباب ماوقفت إلا سيارة وحدة ؟؟؟
لا وجيب لاندكروزر ؟؟
ذهلت الحقيقة .. كنت متوقع غير كذا
وعلى قولة سعيد صالح أومال فين الموسكلات والأععععععععع
ناظرت ولد عمي وهو ناظرني .. قربت منه وهمست له وقلت له شفت شلون التواضع ؟
قال ايه والله استغربت

دخلنا المجلس ومخترشين صب قهوة للأمير وشاهي وبخور
جلسنا ننتظر شوي
وأنا وولد عمي جالسين مقابل للأمير ونتمعن بهذا الرجل المتواضع
تمعنا فيه
وتمعنا بعياله

تفاجئت أن واحد من عيال شرابته مشقوقة من عند أصبع الإبهام
قالي ولد عمي تشوف شلون التواضع هذا وهو أمير .. تراه يقدر الحين يوصي لولده يجيبون له شراب من فرنسا
قلت تقوله صادق ..

بتلنا نعلق هاك اليوم لمين قلطوا الغداء وراح الأمير الله يستر عليه
طول العصر وحنا سواليف أنا وولد عمي تخبرون مرحلة المراهقة ومسوين فيها فاهمين للسياسة

وأنا ماغير أقوله يا شيخ هذا الأمير الي صدق محتاجته المملكة
مهوب أمير متكبر ومتغطرس
أنت شفت شماغه بس شلون خيوطه متمكعه
قال ايه والله الرجال زاهد بالدنيا
أنت ماشفت شلون نزل من السيارة بدون بشت وبدون محد يفتح له الباب
وأنا أقوله أيه والله زهد زهههههد موب الي انت خابر

…………..

مرت السنين
وفي يوم من الأيام عماني يتناقشون عن الأمراء وبعدهم عن الشعب
عاد أنا نطيت على طول وقلت موب شرط كلهم كذا
تخبرون الأمير الي جاء لعمي ذاك اليوم
والله يا فيه تواضع ماقد شفته في أي مواطن
يكفيكم سيارته
يكفيكم شراب ولده المتمكع
يكفيكم شماغه الي خيوطه تدودل

عمي يسألني اي أمير جاء في بيتي ؟؟؟؟؟؟؟؟؟؟؟؟؟
قلت هذاك الي ذاك اليوم . يوم يجي وحنا كذا وكذا وكذا

قال الله يصلح بالك تراه موب أمير أمير
هذا أمير فوج بالحرس الوطني


!! في بيتنا ألتغ

ابتدي بتعريف اللتغة كما عرفها الزمخشري في كتابة ألتغون قادوا العالم للجنون قال فيها اللتغة هي أن تنطق الراء غين … انتهى كلام المؤلف تجاوز الله عنا وعنه

في الإبتدائي وتقريباً في ثالث أو رابع أذكر كان واحد معنا من أهل الزلفي عنده تأتأة جامدة
يعني تلقى عنده حروف مايقدر ينطقها بسرعة يجلس ساعة عشان ينطقها
والظاهر مشكلته بالكاف والتاء والسين
يعني اذا نطق كلمة مدرسة يقول .. مدرسسسسسسسسسسسسسسااااساساساساسااسسسسة
الله يتجاوز عنا ذاك اليوم نكعها ضحك عليه لمين نفحط
والمشكلة المدرسين خصوصاً المطالعة يخلونه يقراء غصب قدامنا والولد يحول تعقد نفسياً من ضحكنا
وتقريباً كنت أنا كبير الضاحكين

يجي مدرس المطالعة ويقول عبدالعزيز اقراء صفحة 40
على طول حنا نفتح صفحة اربعين ونجلس نعد كم كلمة فيها كاف وتاء وسين
على عدد الكلمات الي نحصلها راح تكون عدد ضحكاتنا
ولما يقرب الولد من الكلمة الي فيها هالحروف نبداء نتغامز حنا يا الطلاب ونتهامس ونقول هاه وصل وصل
أول ما يطب المسكين في الكلمة كيكة كاككاكاكاكاكاكاكاكاكاكاكاكاككاكا
يطلع من الكاف الأولى ويريح شوي في الياء يلقى بوجه الكاف الثانية وابلش عاد
بالعربي تخلص الحصة دائما وهو للحين ماخلص القطعة

موب يقولون الطنزة تلحق !

فجأة جتني لتغة في الإبتدائي .. مع أن لساني كان ماشي صح قبل مانتعرف على عبدالعزيز
ولكن عقاب من الله على كثر ماضحكت على هالآدمي
موب بس جتني لتغة
زيادة عليها كل الي حولي كأنهم اتفقوا ضدي
في أي عزيمة أو مناسبة أو حتى عزاء يتجمعون حولي ويبداء برنامج مايطلبه المعزومون

محمد محمد قل الرياض … الغياض … كركركركركركر هههههههههههههه واااااااااااااوك
ماتسمع إلا ضحكهم
وأنا كل ماجيت أصيح يطلع لي شبح عبدالعزيز ويقول قلعتك
بس مايقولها قلعتك .. يقول قلعتكككككاكاككاكاكاكاكاكاك ههههههههههههه < ياعزيز طس حتى بالشبح تأتأ هههههههههههه

وكل جمعة عائلة نفس الطلبات
قل بريدة .. بغيدة .. قل بارود .. باغود .. قل الربيعية .. الغبيعية

وصلت إلى مرحلة من الإنكسار الداخلي ومن كره حرف الراء
إلى درجة فكرت فيها بالبدائل

الي يبي الرياض أقوله عاصمة المملكة
الي يبي بارود أقوله بندقية
الي يبي الربيعية أقولها مدينة عمي محمد وفهد

وعلى ذلك قس
أهم شي حرف الراء ما اشوفة

بعد 8 أشهر من إصابتي باللتغة وفي أحد زواجات الأقارب في بريدة
وبالتحديد في قصر الجنادرية إلي كان اسمه سابقاً قصر أفراح الفضل

تخبرون البزارين دائماً يلعبون عند باب الحريم ويحاولون بأي وسيلة يتغافلون الحارس ويدخلون
المشكلة دخولهم موب لهدف ! بس عشان يقهر الحارس
تلقاه يدخل وعقب يطلع من الباب ويمد لسانه للحارس ويرجع للصفوف الأمامية ويحاول يدخل مرة ثانية

المهم ذاك اليوم فيه مجموعة بزارين يحاولون يرفعون ضغط الحارس
وفيه مجموعة أخرى متحرجمة حول الفقير إلى عفو ربه المكنى ببيالة شاهي
وتبداء الطلبات

محمد قل الرياض بس إياني وإياك تقول عاصمة .. أنا مضطر أقول الغياض ومضطر أتقبل كركرتهم
لأنهم اجتمعوا علي وماحولي فزعة
وتتوالى الطلبات

قل بريدة .. بغيدة
قل كورة .. كوغة
قل بارود .. بارود !!!!! بارررررررررررررررود
بارررررررررررررررررررررررررررررررررررود يا ثورررررررررررررررررر أنت وإياه
هيه باررررررررررود الررررررررررررياض الرررررررررررربيعية

فجأة وبدون مقدمات لساني فك عقدته وراحت اللتغة
أذكر يوم خلص العرس ورجعنا لبيت خوالي راحت ليلتي إلى الفجر وأنا أمر على خالاتي وحدة وحدة وأقولهم
رياض ربيعية بارود بريدة هيه هيه
كورة ريم ريال الرفيعة هيه هيه
رماد نار أربعاء رمضان هيه هيه

عقبها حطوا علي كمادات وقالوا بسم الله عليك نم بس
! ترا الطنزة شينة انتبهوا


!!تعيش أم العامر تعيش تعيش

تمهيدي أنجال الرياض درست فيها التمهيدي كله إلا آخر شهر .. الوالدة نفست عند اهلي بالقصيم واظطريت أخلي الدراسة وأطلع هناك
بس مدرسة التمهيدي يوم جت أمي تاخذ ملفي قالت يا أم محمد هلا بدي أعطيك شهادته لمحمد بس برضاي عليك بدك تكملي معاه
قالت أمي ما أعرف
قالت هاي المقرر تكملي معاه هيك وهيك وهالمقرر بتكملي معاه على هالشكل
مابحرصك هه قالت أمي أبد مالتس إلا الي يكرفه بالدراسة

رحنا هناك للقصيم ودرست أحلى شهر بحياتي بمدرسة فطيمتا العلي
ليت والله كل حياتي الدراسية عند فطيمتا العلي
يا ناس موب معقولة هالمدرسة
تبي فائدة تعطيك فائدة تبي تسيب وإهمال تلقى تبي سعة صدر فيه

!كيف
أقولكم كيف
الدراسة طبعاً مسائية بالحوش والوالدة الله يجزاها خير حازمة وشديدة خصوصاً في وقت بداية اليوم الدراسي ونهايته
مافيه تأخير نهائياً
!متى يبدى اليوم ومتى ينتهي
يبداء اليوم أول مايسلم الزويد من صلاة العصر
إن جيت والزويد يستغفر والا يقول حديث بالمكرفون للمصلين تعتبر غياب
شدة شدةةةة وحزم مافيها كلام
وتخبرون هاك الوقت ماعلي صلاة بس الواحد يتأخر مرات يلعب كورة أو يطقطق على كمبيوتر صخر

هذي بداية اليوم
!طيب نهاية اليوم متى

أول ماتجي أم العامر وأم المشاري ومعهن صرتين من كراث أم المسيطير
إن شفت أم العامر وأم المشاري مقبلات بالحوش معناه الدراسة قيم أوفر خلاااااااااااااص

بعضكم يسأل طيب كم يستغرق هاليوم ! ساعة ساعتين !
أحب أقولكم كل عصرية أم العامر والمشاري يطلعن من بيوتهن أول مايسلم الزويد
يعني مشوار خمس دقايق وهن عندنا
بس فعلاً استفدت من الوالدة بهالشهر ونهلت من علمها الشي الكثير
وإلا قسم بالله لو إني رايح لجامعة هارفارد ما استفدت الي استفدته من أمي
وإلا وش يدرين أن الكراث لا صار قصير يطلع اطعم من الكراث لا صار طويل
بس يطلع أحر شوي
وكيف ادري أن كراث المسيطير أزين من كراث البطي بواجد
هذا كله بفضل الحوش وأم العامر والمشاري ..

لله درتس يا أم العامر .. لله درتس ..

على فكرة تراني نجحت من التمهيدي


هذا الجزء الأول وأشوفكم في الجزء الثاني تسان الوضع جاز لكم
!!! وإذا الوضع ما جاز لكم عاد وش أسوي بكم ما باقي إلا وأجي أدغدغكم بعد

الله من زين النفس خ خ خ خ >>>>

أتمنى لكم قراءة ممتعة وكويسة


تعليقات 85

  1. هههههههههههههههههههههههههه تجنن وخصوصآ كوغه ………. يعني كوره بانتظارك

  2. لله درك يا بيالة شاهي .. سوالفك تهبل ماشاء الله أنا قريتها قبل في شبكة الإقلاع وقريتها على أمي .. تقطعت كبدها من الضحك .. .. يعافيك ربي يا بيالة:D

  3. لسام عليكم ورحمه الله وبركاته مادري اقولك محمد ولا بيلة شاهي بس وربي اهنيك ع اسلوبك المرح بس تصدق قسمن ماكسر خاطري الا سالفه الامير احسك تلعن ابو الساعه اللي تصدق فيها اهلك وتتروش بعدين اجل شرابه منتف ومتواضع هاه تقبل مروري يابياله شاهي:$:$ لاتحرمنا جديدك كانت هنا شهد

  4. والله ضحكتني يازين سواليف الذكريات بس ما شاء الله عليك متذكر كل شي ننتظر جديدك

  5. وأنا كل ماجيت أصيح يطلع لي شبح عبدالعزيز ويقول قلعتك بس مايقولها قلعتك .. يقول قلعتكككككاكاككاكاكاكاكاكاك ههههههههههههه < ياعزيز طس حتى بالشبح تأتأ هههههههههههه <__ مات ضحك هههههههههههههههههههه

  6. :$:$:$:$:$:$:$يجنن نبى اجزاء مو جزء واحد تهبل وخصوصة الامير والتواضع روعةاللة يونس قلبك بالايمان يابيالة مثل ما ونستينا:$:$:$

  7. بصراحة هذي اول مرة اعلق لان سوالفك متعة بس من جد ضحكتن<<<<<<على قولتكم وكثر الله لا يهينك من هالسوالف جازتلي على فكرة

  8. الله يضحك سنك .. فطستني من الضحك أكثر شئ صحكني لما تخلصت من اللتغة وصرت تعدد لخالاتك الكلمات اللي فيها راء بشكل صحيح ربي يوفقك ويكثغ ( يكثر ) من قصصك .

  9. وربي انك رهيييييييب وش هالسوالف هعهعهعهع طلبتك لاتحرمنا سوالفك والله انها تونس ربي يسعدك ويعطيك على قد نيتك

  10. هههههههههههههههههههههههههههههه الله يرج ابليسك اجل طلع قال الله يصلح بالك تراه موب أمير أمير هذا أمير فوج بالحرس الوطني خخخخخخخخخخخخخخخخخ يعطيك الف عافيه اخوي على الموظوع

  11. تقبل مروري بس الصراحه واضح ان عندك الان خبره في الكراث ياليت تجي تساعدنا في محل الخضره بتعنا:$ ننتظر الجديد ودمت سالم ياغالي

  12. انت مو دغدغتنا الا موتنا من الضحك واسلوب رائعه و عسل مشاء الله دمك شربات وانا احس انك اذا كملت بالاسلوب هذا ممكن تنافس الاسطوره جنط سفينه. للامام يبو حميد وننظر الجزء القادم من ذكرباتك الحلوه

  13. حلووووووووووووووووووووووووووووووه من جد كلمات تضحك تسلم اخوي:$:$:$

  14. يازين سوالفك وربي وناسه :Dواسلوب روعه ومميز انتظر الجزء الثاني بفارغ الصبر.. ولاتحرمنا من ابداعاتك تحياتي:$

  15. خطيره جداااااااااااا احلى شي لله درتس يا أم العامر .. لله درتس :$ وربي فطست عليهااااااااااااا ضحك الله يوسع صدرك بالايمان قوووووول امين وربي تستاهل كف حلاقه على هيك موضوع<<< قمة التدليع :$:$ لا تطول عليناا عاد كل يومين ارسل هماااه برب اكمل ايملات ابونواف من زمااااااااان عنكم

  16. هههههههههههههههههههه:$:$:$ الله يرج ابليسك ننتظر الجزء الثاني الله يعطيك العافية,,,8)8)

  17. هههههههههههههههه:$ روووعه روووعه روووعه قصصك وذكرياتك تفطس من الضحك وخاصة سالفة الامير ومدرسة ام عامر واسلوبك في سرد ذكرياتك رووعه,,اهنيك على هالشي استمر خيووو:) متى بس الجزء الثاني ,,بانتظاااار جديدك

  18. ههههههههههههههههههههههاااي احلىى شي عزوووز وشبح عزوووز ككككاكB ذكريات حلوه حلوه يا بيالة ننتظر الجزء الثاني سلامو 8)

  19. المشكلة دخولهم موب لهدف ! بس عشان يقهر الحارس تلقاه يدخل وعقب يطلع من الباب ويمد لسانه للحارس ويرجع للصفوف الأمامية ويحاول يدخل مرة ثانية <<<<<<< هههههههههههههههههههههههههههههههههههههه والله انك صادز.. وبإنتظاااااااار الجزء الثاني ان شاءالله واتمنى بسررررررعه

  20. الصراحه تقطع بطني من الضحك :$ سوالفك روعه خصوصا في بيتنا ألتغ بانتظار الجزء الثاني

  21. اهنيك بيالة شاهي عالذكريات واسلوبك ومن جد ماقدرت امسك نفسي من الضحك يوم قريت حقت اللتغه استغفر الله العظيم ياربي لاتبلانا 😀 بانتظار جزئك الثاني

  22. 😮 انا اقول وين بياله اهي قد سمعت به طلعت بالحاير وتراي زائه بانتظام هناك مااقول الى الله يوسع صدرك بالعافيه

  23. السلام عليكمورحمة الله وبركاته يعطيكـ العافيه اخوي على هالابداع والامتاع اظحكـ الله سنكـ ولاتحرمنا جديدكـ سجل متابع 😀

  24. ماشاء الله عليك أسلوبك مررة حلوو في السـوآلف كمل يااخوي انا عجبني الوضع بانتظار الجزء الثـاني 8)

  25. الصرآحهـ سوآلييف ولآآ أررووووووووووووووع:$:$:$ أهم شي مدرسة فطيمتآ العلي هههههههههههههههههههههه الله يخليه لكم يآرب ق1.. تسلم بيآله8)8)

  26. ههههههههههه آلله يـــقلعكـ منـــدمج بـــس ويــن آلــجزء آلـــثـــآني:(

  27. بكل صراحة في السعودية يقولون ان ………… بلاش وانا ما قابلت احد منهم نهائيا ولكن والله انك فظيييييييييع ههههههههههههههههه من جد عليك اسلوب مجنون من طبعي ما احب اقرأ الا لواحد د. او واحد معروف وما احب الايميل يجي كذا يا شيخ واصل والله انك مبدع وتقبل تحياتي

  28. ذكريات رووعه وتعبير احلى قطعت تسبدي من الضحتس الله يسلمك اطلدز تحية لك استمر بنتظارك

  29. امير والله امير الاوالامير الذي جاء الى عندكم مسيكين متواضع الاقل لي ما جاء ثاني مره نشوف حالته الله معاه ومعاك ياامير في ابداعاتك وسوالفك التي لا تمل

  30. اهنيكـ على اسلوبكـ .. والله يوسع صدركـ بالعافيهـ ،، لا تقطعنا بإنتظار الأجزاء القادمة إن شاء الله ..

  31. كله كوم و وكيف ادري أن كراث المسيطير أزين من كراث البطي بواجد كوم ثاني , ما قصرت بالفعل طفولة مثالية :$:$:$

  32. والله وسعت صدري الله يوسع عليك بالدنيا والاخره موضوع تستاهل التقييم عليه تقبل مروري وباانتظار جديدك

  33. بصراحه طفولتك جدا رائعه واحلى شي فيها اللي ضحكت عليه بس مايقولها قلعتك .. يقول قلعتكككككاكاككاكاكاكاكاكاك ههههههههههههه < ياعزيز طس حتى بالشبح تأتأ هههههههههههه بصراااحه مبدع :$

  34. حلو عجبتني القصة وطريقتك في السرد .. أول وإلى الحين أحس إن محد فاهم في الكتابة الساخرة واللي تضحك ويعرف ينكت وفنااااااان إلا (mr.a) بس حلو طلع لنا أحد جديد كمل يا خوي كمل الله يعافيك ..

  35. القصه مرة حلوووة 😀 استمر اخوي ترى انا اول مرة ارد على موضوع من حلاة موضوعك احنا بنتظارك 😀

  36. رهيييييييييييييييبه الموووووواقف 🙂 ننتظر الجزء الثاني والثالث والرابع …… والمليوون بعد خخخخخ عسااااك عالقووه والله يعطيك الصحه والعافيه

  37. ههههههههههههههههههههههههههههه يازينها من ذكريات ضحكتني لين قلت بس وخصوصا فطيمة العلي خخخخخخخخخخخخخخ الله يوسع صديرك بالعافيه .. بانتظار الجزء الثاني

  38. خخخخخخخخخخخخخخخخخخخخخ الله يرجك يشييييييييخ والله انت اطلق واحد تسولف بالقروب تكفى استمرررر

  39. اقوول يا بيآآلهـ قل يحضقني <<<يعني يحرقني خن نضحك عليك :$ ههههههه مااستآآنست عليك ابدددددددددد :D:$ الله يونسك يآآشيخ كثرر ماونستني والجميع:D سلامووووو

  40. وربي مت ضحك خاصة عالشبح الألتغ اضحك لوحدي زي المجنونه كمممممممممممممل اسلوبك جنان

  41. :$ شي رهيب انا الحين بالفجر والبيت هادي ماغير ضحكي والله اخاف احد يصحي ويقول وش هالهبله والله من جد شي يمةت من الضحك يعني الحين عرفت الفرق بين الكراث الطويل والقصبر هههههههههههههههههههههه:$:$

  42. ههههههههههههه لبى قلبكـ ..~ قسم مت ضحك على اللتغه .. ولايهون تمهيدي العصر انتظر رسايلك بصبر الفارغ .. استمغوا قصدي استمروا .. ياحبيلك يابوقاسم

  43. اللدغة ختيرة وشلون انفكت وبعد الامير وانا وش هالامير اللي شراب ولده مقطوع الله يقويك وفي انتظار المزيد

  44. يعطيك العافية وتكفى لا تقطعنا من سوالفك الحلوه اجل امير ههههههههههههههههههههههههههه

  45. لااااا جازلنا ونص 😀 والله اسلوبك في عرض القصه غووووووعه = روووووعه 🙂 <<<< ياويلس طنازه :~ الله يوسع صدرك بالعافية وننتظر جديدك

  46. هههههههههههههههههههههههه هههههههههههههههههههههه هههههههههههههههههههههههه هههههههههههههههههههههههههههه هههههههههههههههههههههههههههههههههههههه هههههههههههههههههههههههههههههههههه فلللللللللللللللللللللللللللللللللللللللللللله هات الثاني ارسله ارسله

  47. الله على سوالفك يابادريق اوما امير الفوج والتغه فطستنى ضحك اضحك الله سنك شووووكراً

  48. رياض ربيعية بارود بريدة هيه هيه كورة ريم ريال الرفيعة هيه هيه رماد نار أربعاء رمضان هيه هيه عجبتني هيه هيه:$:$ مواقف حلوووووه ننتظر الباقي

  49. يعطيك العافية يا بيالة شاهي بجد بجد مشاغتككككككك غهيييييبة تسلم ضحكتني من قلب خصوصا سالفة الامير ياحلو برائة الطفولة بس

  50. هههههههههههههههههههه خيييييييييييييييييييييييييييرررررررر لااااااااااااا توقف..

  51. مسهم بالخير يعجز لساني … أو بالأحرى كيبوردي عن سطر آيات الشكر والتقدير لهالتواصل الجميل من جميع الأخوان والأخوات الي ردوا على موضوعي ولا خلا ولا عدم … وبإذن الله الجزء الثاني يبي يتشرف بمروركم في منتصف الأسبوع القادم كتبه وأملاه وحرره … أبو شاهي

  52. امبي انته حدك نكته بس وايد من الحجي ما فهمته بس على العموم يسلمو ثانكس قراسياس

  53. هههههههههههه بغيدة والغبيعية ماشاء الله عليك أكمل وبانتظر جزأك الثاني لاتأخر

  54. ههههههههههههههههههههههههههههههههه هههههههههههههههههههههههههههههه ووربي مت من الضحك قصص أسلوووب يجنن بانتظآآر الجزأ الثآني على أحر من الجمر

  55. الله يسعدك و ينور لك قلبك ياااااااااااااارب استمر و في انتظار الجزء الثاني

  56. اسلوبك ممتع ماشاء الله بس كلها كوم وفاطمتا العلي كووووووم خخخخخخخخخ الله يخليلك فاطمتا العلي

  57. على فكرة: ترى عبارة(برضاي عليك ) أظنها حلف بالرضا…فالباء حرف حلف..فاحذروا منها.. والله اعلم…

  58. ههههههههههههههههههههههههههههههههههه تبي الصدز يآولد فاطمتنا العلي .. قصصٌ رآئعة ٌ .. واسسسسسلوبك تووحفة ٌ .. وازين مابهالقصة هالـ تس 😀 .. ولا كرآث المسيطر .. دآ حآقة تانية .. ويسسسسسلمو على آحلى بآآرت .. وعقبآل زيآره قريبه للغياض 8) .. وبإنتظآر الآجزآء القادمة بأحر من الجمر ..:D

  59. :$:$:$:$:$:$:$:$ هههههههههههههههههههههههههههههههه والله انك منسم وزاحف8) وانت صغير خخخخخ 😀

  60. بس ممكن تسجل صوتك وانت تقول كوغه الغياض بغيدة كلها خلن ننكت شوي :$:$:$هههاي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

ذكريات بزر أصبح رجلاً (1)

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول