دعوة للحوار : إغلاق المقاهي بعد الواحده .. مالأسباب ؟



مصدر الصورة ( جريدة الرياض )

في مدينة الرياض وقبل بضعة سنوات أصدر قرار بإقفال متنفس الشباب من مقاهي إنترنت ومحلات الكوفي شوب ومقاهي الشيشة من بعد الساعة الواحدة ليلاً.
هذا القرار صُدم بامتعاض كبير من قبل الشباب والذي يبدو أن هذه الأماكن هي المتنفس الوحيد لهم بيد أنها وعلى حسب تعبيرهم تصادفهم الكثير من المشاكل في قضاء الوقت في إجازة نهاية الأسبوع والإجازات الطويلة .
ثلة من الشباب يجد أن الذهاب ( للمقهى ) ليس لغرض ( الشيشة ) وإنما للالتقاء بأصدقائه حيث أنه المكان المناسب لذلك .
( قلم ) حوارات من وجهة نظره أن هذا القرار للأسف لا يستند لشيء من ناحية منع المفاسد وقد يبدو له أن عون على انتشارها بعد الساعة المحددة للإغلاق لأنه حسب رأي الأغلبية ( المقهى ) هو احتواء لهم , وحينما نقول المقهى فنحن نقصد ( مقاهي الإنترنت – والكوفي شوب ومقاهي الشيشة وغيرها من الأماكن الشبابية ) .
لا أخفيكم أني حاولت كثيرا التفكر في قرار المنع فلم أجد أي فائدة من وراءه بل على العكس وجدتها تؤدي إلى بحث الشباب عن أماكن أخرى يقضون فيها ليلتهم إذا ما اتفقنا بأنهم لن يتوجهوا لبيوتهم ليناموا , فنرى أبعادها السلبية أبلغ من ايجابياتها التي لا أراها حتى الآن , هل يكون المسئولون بهذا القرار يتناسون المثل – أقضب مقرودك لايجيك أقرد منه , أم هي أمور لم نستطع رؤيتها بعد .

قلم حوارات قال رأيه في هذه القضية ولكن الأهم من ذلك هو طرحكم للآراء على الطاولة فنحن بإنتظار نتاجكم

علما بأن التعليق متاح للزوار

كتب هذا الحوار وحرره: معاند


تعليقات 50

  1. بداية اشكر لكم اتاحة الفرصة للتعليق وحيث انني من المعانين لهذه المشكلة … اقترح وضع بعض الضوابط لكيلا تحدث مضاعفات لوجود الشباب في المقاهي حتى الغد … لاننا بالفعل في مدينة الرياض لاتوجد متنفسات لنا إلا المقاهي أو الثمامة !! والاخيرة أرى انها ابتدي بتعئيلها مؤخرا .. – مأخوذ من جعل المكان للعوائل – ونحن معاشر الشباب نريد متنفسات لنا … ولدينا طاقات متفجرة … نتحسر حقيقة حين نرى دولة الامارات أيدها الله … في استجماع طاقات الشباب في مجمع الرياضات … لاتقولون روحو لم النوادي .. النوادي أقل نادي امكانياته ضعيفة جدا .. وبـ 500 ريال للشهر على ايش ؟؟ وان قدرت انا على هالـ 500 … غيري ماهوب قادر !!! والله لو تشوفونا وحنا نروح يم الامارات ونشوف نوادي الرماية اللي عندهم وحلبات سباق السيارات قسما بالله ترحمونا … تقل ناس ماقد شافت عيشة !!! وفوق هذا تبون تحجمون من اماكن الترفيه الباقية لنا ؟؟؟ اذا انا راح اكبر راسي واصير اعقل من غيري واهجد ببيتي … غيري ماراح يحكم عقله !! … وراح يتصرف تصرف يندم عليه هو اولا والمجتمع ألا وآخرا ولكم اطيب التحايا

  2. أنا من رأيي انها بادرة طيبة وأنا أؤييد هذه الفكرة بل وفرحت عندما سمعت بهذا الخبر أنا شاب مثل اي شاب ولكني عندما اذهب الى هذه الاماكن أعترف بأني داخل إلى أقل طبقة في المجتمع !! عندنا في جدة على ما اظن لم يطبق القرار أتمنى ان يطبق (أقضب مقرودك لايجيك أقرد منه) لن نضيع نحن الشباب بسبب اقفال المقاهي انما سنتذمر لفترة ونتعود بعدها أين سنذهب لـلي اقرد منه؟ لايوجد مكان أقرد من تلك الاماكن تحياتي

  3. بسراحه اخطائو واذا على كلام اخوي فانا اشوف انو الاي اقرد منها العزب حيث انها بعيده عن الانضار ولابد في كل جمعه فيها فاسد والعزب مئوا وفيها كل شي ممكن مو بس شيشه بل الاقرد من الدشوش الؤربيه والمخدرات وصدقني انا لو مدمن بدورلي ناس عندهم عزبه لانه مابيكون عندي فلوس الى وقد حطيتها فلمخدرات فبدورلي ناس طيبين اخذو عزبه يومين ولا انا واحد منهم واخرب قدامه واخربهم ولامنشاف ولا من دري والعزب خطيره يعني القهاوي على القل بعيدة عن السكان لاكن العزب موجوده ولاتقلي لابحر ولاشارع كلها ممنوعه بجده بعد الساعه2 السؤال وين تبغون الشباب يروحو؟؟؟؟؟؟ الدول الخارجيه في اماكن للشباب وفله وكل شي متاح تحس انك عضو فلمجتمع مو منبوذ يالله لو دري امن احد المراكز انك بدون عائله يؤؤؤ بتحس نفسك اهبل وغبي مطرود وين تروح للاسف ماتعرف الحكومه تتستغل شبابها لاوضايف لا ملاعب لا قهاوي يعني ذنبنا ولدنا ذكوووور المم تفتخر اذا فيها شباب كثير وحنا امه شاااااااابه الشباب فيها كثير ودوله مقتدره فلميزانيات كل شي غلط يعني جت علقهاوي لي مايسكرو اشيا ثانيه ليه مايشددو علكباين الي عندنا بجده كلها شباب ولا الي عنده فلوس ينبسط ولا ماعنده ولقيله قهوه بتقفلونها عليه ماقول الى الله يفك ازمتنا!!!!

  4. لا تروحون بعيد ,,, شوفوا المنطقة الشرقية مقاهايها تفتح 24 ساعة عدا أوقات الصلاة …و ماشية أمورها تمام ,,,و أنا مع رأي الأخ حوارات لأن هالمقاهي لها فوائد أمنية بحيث انها ( تضف ) الشباب و تخليهم و تمسكهم عن أشياء مثل التفحيط و الدوران اللي ماله فايدة بالسيارات ,,, و المفروض البلدية أنها تترك مقاهي الشيشة على كيفها تفتح و تسكر لأنهم أصلا مانعينهم يفتحون داخل المدينة أصلا ! ,,, و هذا شيء حلو و بدأت مدينة الخبر بتنفيذه و ذلك بإغلاق مع المقاهي اللي تقدم الشيشة داخل المدينة ,,,هذا و الله أعلم

  5. اضم صوتي لصوتك استاذ معاند…الى اين يذهب الشباب؟؟ برأيي انه قرار تعسفي وغير مدروس وكان وليد اللحظه وتم تطبيقه من غير مراعاة لظروف واحتياجات الشباب ..ما المانع من السهر؟؟ اليس من الافضل للشباب السهر في المقاهي بدلا من الاستراحات؟؟ وما ادراك ما بداخل الاستراحات…

  6. اول اشي ينطيك أليف أليف عافيه اخي معاند <== مشارك من عمّان خخخخخ حبيب قلبي معاند للأسف الوسايط والمصالح الخاصه لها دور كبير في القرارات الي تصدر ضد المقاهي ..... تقولي شلون اقولك شلون <== مهبل ههههههههههه حبيبي كم بطولة الأن محتكره من قبل الإي آر تي ... ولاحظ حملات الهيئة على المقاهي تكثر في هالفترات فترات المباريات ... ويطلبون من المقاهي اغلاق قنوات الإي آر تي تحديدا دون بقية القنوات لا لشي ولكن الموضوع وما فيه ان فيه تعليمات تصدر بين فترة وفترة تطلب من القنوات عدم عرض قنوات الإي آر تي لأن الشيخ صالح كامل ذو علاقة وطيدة بالداخليه واهل الداخليه والمصالح مشتركة فلو استمرت المقاهي بهالشكل بينخرب بيته ... فلازم نغصب الشباب يشتركوون معه هذي نقطة حبيت اوضحها . النقطة الثانيه من المعرووف ان المقاهي تفتح من الساعه 6 الصبح وبعضها ابكر من كذا وانا اقصد هنا مقاهي الشيشه والي تكون خصوصا في الرياض خارج حدود المدينة ههههههههههههه فوش الكمه من فترة الإغلاق الي هي 5 ساعات بس في اليوم ؟؟ وبالعكس بعض المقاهي ما تقفل الا 2 يعني تتقلص المده ل4 ساعات ؟؟؟ المقاهي لو عليها فتحت 24 ساعه لأنهم عارفين ومتأكدين ان سوقهم ماشي بس وش الحكمة ؟؟ وبالعكس تلقى تجمعات التفحيط وسرقة السيارات ما تبدى الا من هالحزة حزة تقفيل المقاهي ....... اقترح ان المقاهي تكون تحت يد وزارة التربية والتعليم لأنها اثبتت انها اماكن تحكم السيطرة على المنحرفين من ابنائنا ولو لفترة مؤقته . وهذا ما يمنع ان الشرفاء امثالي يرتادون هالأماكن حبا في المعسل ليس إلا هههههههههههه

  7. يعني الصبح في الدوام والظهرية نايم والعشاء ممنوع الدخول لغير العائلات وفي الليل مغلق بأمر الـ ….. وفي نهاية الأمر يبحثون عن أسباب الانحراف هذه القضية مثلها مثل اللي يعمل bluck للمواقع الاباحية ويسمح لك تشغل في بيتك اللي تبيه !!!! الحل أحد أمرين 1 ) يعملون أسواق ومراكز ترفيهية ومطاعم مخصصة فقط للشباب فقط 2) اغلاق المراكز العائلية قبل ال 11 مساء و تمديد فترة العمل المسائية للمقاهي حتى ال 2 فجرا.

  8. أخوي Abo Hamad أتوقع أنك تقصد مقاهي الشيشه فإذا انت تقصد مقاهي الانترنت فهم يدعوننا نغلق بعد الساعه الـواحده ولاكن المقهى يعمل فنقوم بإغلاق الباب ونطفئ اللمبات ونغلق اللوحه كأننا في فلم رعب واذا أتى زبون من الزبائن يقوم بطرق الباب ثم نرى من بالخارج اذا هم من الدوريات الامنيه ام زبون عادي فدائما يأتون ويقومون بطرق الباب بأقوى ماعندهم ثم يستدعون صاحب المقهى وتعهد و و و الخ.. وتقبلو تحياتي..

  9. أعتقدإنه قرارصائب وفي مصلحة الشباب والمجتمع على حداسوا أي طاقات يفجرها الشباب بعدالساعه الواحده صباحا غير الأنحراف وإفسادالطالح منهم للصالح.متى يكون شبابنا شباب نهار؟ لماذا لايكون العمل لدينا مقدس ؟لابدمن أن يكون خلفنا مراقبين لكي نقوم بأعمالنا التي يجب أن ننجزها ؟ياخوان شبابنا أمانه بين أيدينا يجب أن يكون هناك توعيه شامله ومركزه لحب العمل و نصبح مجتمع منتج شباب يقدس العمل مجتع متقدم عيش رغيد حياة ملؤها السعاده والصحه وإنتشال الشباب من براثن مرض[عشق السهرليس في العطلات فقط بل ليله]نحومجتمع وشباب أفضل.ودمتم

  10. المفترض ان المقاهي ( الشيشة) تغلق نهائياً ، لانها اماكن فساد وتجمع لحثالة المجتمع، اللي ماكان يشيشة صار يشيشة والسبب ان الاجتماع في هذه المقاهي ولايوجد فيها رقابة، غير البلاوي الثانية، حقيقة مفترض ان توضع نوادي يشرف عليها شباب سعوديون توجد في الاحياء فيها عدة اقسام للعب الورق والبلياردوا والبلاي ستيشن والرياضات الاخرى ، مع منع التدخين والشيشة ( لانه حرام تشوف شباب في عمر الزهور ماسك الدخان يتلف عمره ويتلف اللي حوله ( واذا كان من حقك ان تدخن فمن حقي ان استنشق هواء نقي) على العموم هناك مشاكل كثيرة المفترض ان ينظر لها بعين الاعتبار مثل: العطالة – الغزل- السرقة- الفراغ- صعوبة المعيشة. هذه بعض الهموم التي يوجهه الشباب والتي توثر على المجتمع ككل لان الشاب او الشابة فرد من افراد المجتمع متمنياُ للجميع التوفيق والهداية.

  11. انا اشوف ان القرار صائب لأن اغلب المقاهي تستنزف اموال الشباب ووقتهم يضيع على متابعه البرامج الهابطه

  12. اولاً شكراً اخوي صاحب الموضوع وربي صدمة اقفال المقاهي هذا المكان الوحيد لنا انا لا ادخن ولا اشيش ولاكن لايزجد مكان يضمنا غيرة بالامس كنا نقول لايوجد لنا سوا المقاهي واليوم لايوجد لنا شي بصراحة قرار فاشل جداً ولا اعتقد انة في بعد نظر يا اخي الكريم علمنا اين نذهب في وقت الفراغ التسكع في الشوارع ام نجلس في البيت حالنا حال النسوة واحنا الحمد لله دولتنا دولة امن وامان ولا اعتقد هناك مصلحة لتقفيل المقاهي لو احنا بدول ثانية فيها اجرام قلنا اوكي اما احنا بالسعودية بلد الامن والامان ويصير فيها هذا الشي والله حرام على الاقل هل الاماكن تبعد الشباب عن التفحيط وعن التواجد في اماكن العوائل . ولاحول ولاقوة الا بالله العلي العظيم

  13. بسم الله الرحمن الرحيم السلام عليكم ورحمة الله وبركاته ،،، أولاً : أشكر أخي حوارات طرح هذا الموضوع واللي أتمنى إننا نشوف مثله كثير لكي نتمتع ببعض الآراء اللي تفيدنا كشباب وشابات .. ثانياً : أنا هنا بحط وجهة نظري وبصراحه مطلقة يعني ليش نخبي ونلعب على بعض انت من وراء كمبيوتر وأنا من وراء كمبيوتر يعني مانعرف بعض 🙂 عشان كذا البساط أحمدي ….. ثالثاً : نرجع لنقطة حديثنا 🙂 انا شاب من هالشباب والحمدلله ماشيه هالدنيا معنا يعني الحين لاجاء ايام الاسبوع وهي نقطة الحوار الأولى لما اخلص دوامي وانطق في بيتنا واكون جلسة الوقت الكافي مع الوالده وتقهويت معها وخلصت اللي تبيه لو تطلب مني شيء وبحكم إني فاضي ماعندي شيء مافي غير شيء واحد نقابل الشباب ونجلس معهم طبعن كلن وظروفه لكن انا بحكي عن جمعتنا أنا والعيال من سنتين نفس الشلة ونفس الوجيه 🙂 حنااا يهالشلة قدر الله علينا وكنا نجتمع في مقهى شيشة ونجلس من تقريباً الساعة 9 إلى الساعة 12 ونص الليل وطبعن هذا اوقات الأسبوع العادية علماً بأن في ناس ماتشيش بس تجي تسولف وتلعب بلوت وتستانس ونوسع صدورنا ونمشي هنا أنا متفق مع القرار إنه أيام الاسبوع قفلوها الساعة 1 ماعندنا مانع يعني اكثر الناس دوامات وبتروح تريييح لكن بالنسبة للناس العاطلة مايعجبها الوضع وتبي تجلس أكثر أنا أقول أتركوا بعض الأماكن وقفلوا بعضها ليش يعني جت على بعض المقاهي ماتتقفل (بدون ذكر أسماء) طيب نجي للنقطة الثانية ،،، أيام نهاية الأسبوع كان الوضع غير نظراً للألتزامات الشخصية والعائلية فكان اجتماع الشلة يكون من بعد عشر أو احدعشر الليل يعني مابقى غير ساعتين او اكثر بشوي نجلس مع بعض لانه بيقفل الساعة 2 الليل بعدها صار النظام المتبع بحكم انه ويكند وطفشانين اركب سيارتك انت وكم واحد معك واطلعوا فرفروووا في التحلية واستانسوا وبعدها كل واحد يطس بيتهم ينام أنا هنا ضد القرار ليش ماتتاح الفرصة ونقعد بدال التحلية والدوران حتى لو انه نادر يعني حنا عاقلين والساعة 3 بالكثير كل واحد ببيته ،،،،، لكن غيرنا لا كم من شخص بيطارد تفحيط كم من شخص بيتبع امور ثانية كم من شخص بيدمر نفسه بنفسه بدال مانعين الشباب نوقف ضدهم 🙁 ،،،،،، بتقولون ليش كذا بقولك انا ماعندي غير نهاية الأسبوع بسهر وواوسع صدري عشان استعد للسبت وانا رايق 🙁 لانه لابد من تغيير الجووو طبعن خلال الفترة اللي راحت كنا بعض الأحيان نستغل الويكند للسفر لأحد مناطق المملكة الحبيبة وخلال الربيع نطس لهالبران نغير جوووو ونستانس 🙂 طبعن كل هالكلام قبل سنة من تقريباً 8 شهور وأكثر قررنا نغير الوضع فكان اجتماعنا في منزل أي شخص منا 🙂 نجلس بهالملحق وسواليف وانترنت وسعة صدر ولامانع من الدش وإذا برد ببيت الشعر والله يديم القهوة الكايفة وراعيها 🙂 طبعن للي بيشيش مافي مانع بس اهم شيء نبعد عن جو المقاهي 🙂 بعد فترة تضايقنا من البيوت كنا نبي نغير ،،، قررنا نستأجر إستراحة وتكون ملاذ لنا وراحة لنا ونجتمع بكيفنا ،، كان في عدة عوائق : 1- كان إيجارات الاستراحات نار وفوق الخيال لين قررنا في الأخير نأخذ استراحة بمبلغ اربعين الف في السنة ، طبعن بتقولون مو معقول مجانين بقولكم إن حنا كنا بنشتري راحة روسنا ونستانس وترى العمر مره وحده يعني مانعيش غير مره وفترة الشباب ياسرع ماتروح ونتندم عليها ،، طبعن كان هناك مكاتب او استراحات مجررد ماتدري انكم شباب والله يجيك سعر يفك مخك فك 🙁 يعني احد بيقنعني استراحات السلي واللي آخر الدنيا وصلت إلى 30 ألف وهي مقلط اربعة في ستة وين عايشين طبعن بعد بحث وبحيث ومجادلات ومناوشات قررنا نأخذ استراحة حول الفحص بالسعر السابق ممكن كان عددنا يساعد وامكانيات تساعد بحكم كلنا موظفين طبعن كلنا على بعض حدود عشرة 🙂 … 2- كان عائق مكان الاستراحة ونظافتها وامكانياتها من اهم الاشياء ولكن بالتفكير والبحث المتواصل لمدة شهرين الحمد لله لقينا 🙂 ترى عندي خبرة الحين بالاستراحات اللي يبي ادور له ويعطين وساطه ماعندي مانع خخخخخ والله من كثر مافرفرة الرياض ولفيته من السلي والفحص الدوري والدرعية والعمارية والصحافة أي مكان فيه استراحات طبيت فيه 🙂 طبعن بعد البحث والاستراحة وجدنا الراحة التامة والحمدلله ارتحنا ولاعاد نفرفر ولانسوي زحمة من الاستراحة للبيت وخلوهم يقفلون المقاهي الساعة وحده وش المانع دام عندي مكان اروح له عشان كذا الله الله بلاستراحات ووسعوا صدوركم ترى العمر مررره ،،، طبعن المجتمع عنده نظره خاطئة عن مجمع الاستراحات وأولهم الوالدة اللي يخليها لي 🙂 بس أنا بقول شيء واتمنى الكل يفهمه زين ،،،، كلن عقله براسه يعرف خلاصه ،،،، يعني لو عرفت من أخوياي زين وعاشرتهم أكيد اننا نفهم على بعض واللي يفكر يأخذ استراحه اول شيء يفكر فيه من اخوياي وغير كذا يتفقون على شروط معينه في الاستراحه هي اللي بتمشي الوضع صح 🙂 أدري ابتعدت عن نقاط الحوار كثير ودخلت في مواضيع متشعبه ولكن حاولت اشرح لكم الوضع بالصوره الصحيحه …. اتمنى اني وفقت وهذي اول مشاركة لي بقروب ابونواف وإن شاء الله مو الأخيره لي حضور دايم إذا سمحت الظروف 🙂 أخوكم عبدالرحمن

  14. السلام عليكم ورحمة الله ، هذه اول مشاركه لي بالمجموعة ولكن لفت نظري الموضوع المطروح ، اولا : بالنسبه لموضوع اغلاق المقاهي ، فإذا كانت المقاهي ستغلق في الواحده صباحا وسيصل الشاب إلى منزله في الثانيه وينام في الثالثه ، فهل ينبغي له السهر اكثر من هذا ليستيقظ صباحا ويذهب إلى عمله أو إلى جامعته ، وأي عمل سيستطيع انجازه بعد هذا . ثانيا: استغرب من تخصيص اماكن للعائلات وأماكن للشباب في معظم الدول الخليجية ، وكأنه اعتراف من المجتمع كله بأنهم لم يحسنوا تربيه أبنائهم ، مع انه العكس تماما هناك الكثير الكثير من الشباب محترمين . ويعرفون كيف يحترمون النساء والعائلات ، ولن يتحرش الشاب أبدا بفتاة ملتزمة تخرج مع عائلتها.

  15. لقد صور لكثير ان الشباب ان لم يمسكهم او يضفهم شي فهم مخلوقات حمقى و غبية ومنحرفة بالخلقة وممكن ان تدمر نفسها … سيدي الكريم .. انا مع هذا القرار ومع كذلك قرارات اخرى مثل فتح نوادي للموهبين من كل مجال حتى وان كانت موهبته الرسم على الجدران!!! في برنامج ذا فيو الأمريكي قبل ايام كانت هناك مقابلة من خباز للكيك محترف ومتمرس بصنع الكيكات الأبداعية و عندما سألته المذيعة ماذا كان يعمل قبل هذا الهوس اخبرها انها اعتاد ان يرسم الجدران في صغره.. لا تقولو اين يذهب شبابنا … لديهم الكثير الكثير من الخيارات الصحية النافعة .. اما المشي على الكرونيش او المشي في الشوارع المخصصة او يكفي فقط قضاء الوقت مع اهله … فليست حياة المنزل كلها جحيم اسألوني اما المقاهي للأسف فهي اجتماع يضم الأسوأ و الأسواء من عينات المجتنع هذه وجهة نظري

  16. نحن بلد اسلامى وقبلة المسلمين فمن يواصل السهر الى ما بعد منتصف اليل او اكثر ثم ذهب الى مكان نومه ونام فلان يستطيع ان يقوم لاداء صلاة الفجر جماعة او في وقتها منفردا وذلك سوف يفوت عليه الصلاة في وقتها جماعة او منفرد هذا اولا. سوف يقصر في اداء عمله والذهب اليه في المواعد المحدد هذا ثانيا . اذا كان من رجال التربية والتعليم سوف يؤثر ذلك في ادائه امام طلبه ولان يشرح على الوجه المطلوب هذا ثالثا. والاسباب كثيرة . ولكن السؤال لماذا السهر لبعد منتصف اليل في القهاوي او المقاهي بغض النظر عن التسميه فلماذا لايحفاظ الانسان على صحته وينام مبكرا ويصحو مبكرا لتوافق ذلك مع ما شرع الله للعباد.

  17. هل هم يعتقدون ان باغلاق المقاهي حل وانا الناس بيرجعون بيوتهم بعد الساعة 1 اكيد لا. انتو بالطريقه هذي تجبرون الناس في الويك اند انها تطلع من الديره بسبب الكبت الي هم فيه ومااقول الا الله يخلي الخبر لهلها ولا يطلعون لنا مثل هذي القرارات الي تسد النفس

  18. سلامون ياجماعة الخير .. أنا أعتبر هالقرار صايب وان اللي اقترحه وطبقه رجّالن كفو ويستاهل الشكر .. يعني أنا أشوف أن أغلب هاللي يرتادونه في الليل خاصه بعد الساعه وحده في الليل من صغار السن وشغل البلوتوث يامدحت ! استنزاف أموال .. وضياع للوقت .. وترك للوالدين في انتظار ساعة دخوله وهم على أحرّ من الجمر ! دعونا نفكّر بتعقل وراح نجد أن تطبيق القرار في مسار الصواب .. وألف شكر ليك خيوّ حوارات على هيك حِوار شايأ 🙂 .. مدمنوه !

  19. يا اخي الكريم الموضوع اكبر من ان يطرح على هذا المستوى وبااعتبار ان الغالبيه العظمي من مجموعه ابو نواف هم الشباب فستجد تعاطف كبير للشباب في هذا الموضوع. با اختصار شديد المقاهي اللتي فيه شيش هي للاسف مرتع و ملعب للشباب اللي ليس له شغله و لا مشغله الا شيشه و تغيير في الدش اللي موجود في المقهى وللاسف الشديد انتشر في الاونه الاخيره ظاهره وجود الاحداث و صغار السن في هذي المقاهي و اللتي و بنسبه كبيره جدااااااااااااااا راح تؤثر على اخلاقهم وراح يكونون هدف للي ليس في قلبه ايمان ولمن تحدثه نفسه و العياذ بالله من فعل المحرم ( و افهم يا فاهم ) و بالنسبه لمقاهي الاتيكيت زي حقت التحليه فهي محافظه نوعا ما و لكنها وللاسف الشديد لا تخلو ايضا من المفاسد . تقولون الحل وشهو …….. انا مع الاخ محب الوطن بان توضع نوادي و ليس مشترط ان تكون فاتحه الى اخر الليل يعني كفايه الى الساعه 10 في الايام العاديه و الى الساعه 12 في العطل و تحت اشراف ناس عاقلين و فاهمين و يفضل الاستعانه بمدرسين متقاعدين للاشرف عليها. و هذي من وجهه نظري مسؤليه على عاتق الرئاسه العامه لرعايه الشباب ما ادري هل كلامي صح [email protected]

  20. السلام عليكم … اول شيء ياجماعه انتوو من ضمن هالمجتمع وتشوووفون اللي يصير في المجتمع … احنا الحين نبي لنا شيء يخلينا ننتنفس وغيرر من احوال شبابنا هاليومين … بالاول كنا نسمع التفحيط في كل مكاان وناس يموتون في كل مكان بسبة التفحيط … والحمدلله هاليومين نشوفها خفت بسبب الانترنت وبسبب الاستراحات … بس ما افتكينا من سالفة الحشيش والمسكرات … تقولون وش دخل ذي بذي … لكن يا جماعه الخير في نااااس من الفضااوه في ايام الاربعاء وخميس وجمعه تلقاااهم يضبطوون اوضاعهم على هالزفت اللي يشربونه على شان يمشوون وقتهم … والحين يبوون يغلقوون اخررر شيءء يقدروون الشباب يمشون حالهم فيه … انا بصراحه مالي في هالاماكن … الحمدلله لا اشرب دخان ولا اشيش والحمدلله الانترنت موجود في البيت ولله الحمد… بس انا من ضمن هالمجتمع وجالس اشوف كل شيء … بس انا ابي منهم يغلقون مقاهي الشيشه وكل شيء مافيه اي مشاكل … بس اهم شيء يجدووون البديل هذا الاهم … بدل ماترجع ايام التفحيط والخرااب مثل اول … لأننا الحين في تطوووووور اكثر من اول … وهذا راايي …

  21. حتى الواحدة صباحا كافى حتى تكون هناك فرصة لبعض النوم ثم القيام لصلاة الفجر مش كده والا أيه

  22. سؤال للأنسان الذي أقترح هذه الفكره .. إذا تقفل المقهى وين بيرحون الشباب ومجموعات المراهقين ؟ والشي الثاني .. مو أفضل إن المقاهي تكون مفتوحه لجل تحتوي الشباب والمراهقين ولجل يكونون أفضل تحت أعين الأمن والمراقبين أفضل من خروجهم للشوارع وممارسه التفحيط أو السرقات أو الازعاج بجميع أشكاله. وشكراً

  23. السلام عليكم في البداية أشكر كاتب الموضوع واللي ماقصر شخص الموضوع واللي مو من الشباب لايطرح رأيه لأنه فعلاً اللي يده في النار مو مثل اللي يده في الماء محد حاس في ذا المشكلة إلا حنا الشباب طيب؟ أنا طالب جامعي أتفرغ تمام التفرغ يومي الأربعاء والخميس لقضاء كل وقتي خاارج البيت نجتمع أنا والشلة وين نطلع له وين نجي ماأنكر إننا ماعندنا إلا خيارين لاثالث لهما نتسكع بالسيارة وعاد الشي ذا ضرره أكبر من سالفة المقاهي والشيش ووو صدقوني أكثر ويصير فيها مضايقات ومطاردات سيارات العوايل ومطاردة التفحيط وووو((واللي عااشر شباب الرياض بيأيد كلامي)) الخيار الثاني المقاهي تقريبا هو أفضل مكان من ناحية الأجواء الشبابية أو حتى إن الشخص يحس بالإنتماء للمجتمع اللي هو عاايش فيه كمان يعتبر مكان حلو لتبادل السواليف والأخبار ووو ماأنكر إنا نحتااار لاطلعنا أسواق ممنوع ملاهي ممنوع حدائق ممنوع . . . . طيب؟ أطالب بتوفير وسائل ترفيهية في مدينة الرياض خااصة لأني ماأنكر زرت مدينة جدة ولقيت تقريبا كل شي متااح عندهم بعكسنا حنا مالنا رب يعني؟؟ أشكر مجموعة أبو نواف على إتاحة الفرصة وأتمنى يصل الموضوع للمسؤولين للجميع خالص تحياتي العمري عبدالله

  24. بسم الله الرحمن الرحيم أشكر الحقيقه كل من له صله بطرح الموضوع وبوجهت نظري انا شخصياً أن هذا القرار ليس إلا قرار يتخذ من شخص يعين جديد على رأس العمل حتى يقال أنه قدم شيئ بالبلعكس هذه المقاهي تمسك هؤلاء الشباب من التسكع بشوارع وإيذاء الجنس الأخر وإلا هي ليس لهذا القرار أي ضرر على المجتمع لأن الشاب إذا لم يريد النوم مراح تنومه بالغصب ولاكن نترك هذه المقاهي لهم تمسكهم وتجعلهم يجتمعون مع بعضهم إلبعض أفضل وكلمه للمسؤلين الذين يصدروون مثل هذه القرارات وأقوول كفاااكم هررراء ومضاهر

  25. السلام عليكم انا معهم في هالقرار .. ياخي كل شي بهالديره يمشي على مبدأ (درء المفاسد مقدم على جلب المصالح) ..السواقه والتكنولوجيا والتعليم والتربية و…ووو… كلها تمشي من هالمنطلق .. وعلى كذا إغلاق المقاهي برضه لازم ناخذها من نفس هالباب ! الخمر وانا اخوك وهو الخمر له منافع وفوايد كثيرة لكن مضاره اكثر من منافعه وعشان كذا حرم ونفس الشي المقاهي نعم هنالك مصالح كثيرة إن فتحنا المقاهي 24 ساعة لكن مفاسدها أكبر .. مشكلتنا نعرف مشاكل بعض 😀 ..ونعرف وش يصير بهالمقاهي

  26. السلااااااااام عليكممممم… انااااااااا مدري ليه مصعبين الاموووور..، <<بلآمـقـهى بلاهـم دام عندك شيشه لاتهتمممممم

  27. والله اذا كان على الايام العادية فخير وبركة ياشيخ وش عندك لساعة وحده برا البيت ما وراك دوام واذا كان في الاجازة الاسبوعية برضه خير وبركة حتى ما تخرب على نفسك نظام النوم في الايام العادية وتنام بدري وتقلي ليه تنام بدري عشان تروح الدوام مصحصح وتأدي عملك على أكمل وجه اما في الاجازات الكبيرة فبرضه خير وبركه عشان الناس تصحى وبدري وتستمتع في جو الصباح العليل وتصحى زي الخلق وتترك السهر ومافيه من مضار أدري بتقولون عني انه تفكيري تفكير شيبان بس هذا هو الجنب اللي يريحني اعتقد السهر لساعة 12 يكفي

  28. السلام عليكم ورحمة الله وبركاته. : نظرتي ونظرتك ونظرتُـ(نا): لاتُقدِم ولاتُؤخر بالنسبة لـ قرار تعسّفي بحت كـ هذا ! أعتبِر القرار بجملته خاطِئ ولم يُبحث فيه إحتِياجات وإهتِماماتْ الشباب .. إنتشرت بؤر الفساد المُتخفية تحت جُنح الظلام لماذا ..؟! وتكاثرت بـ شدّة أيضاً ! أعتقِد أنّ السبب الرئيسي لـ ذلك هوَ أنّهم لايوفّرون إهتِمامات الشباب ولا رغباتهم . إلى متى كُل شيئ يكون بالإجبار والإكراهْ.! الله منح الإنسان هذهِ الحياة بأكملها ليعبده و لـ يعيشها بحلوها ومرّها فهوَ حُرّ طليق لاعبدْ .. فـ بأيّ حق يمنعون هذا الإنسان من حقّه الذي منحه إياه ربّه!!!! شُكراً معاندْ ( موضوع شيّقْ ) ! !

  29. ياملا الضربه لهم,,لعنبوا حيهم وين يروحون شبابنا,,والله ماباقي الا انهم يحبسونهم في البيوت معنا,اذا احنا يالبنات قلنا معليش البنت ممكن الف شغله تسليها في البيت لكن الشباب وش يسوي,,((كان يطبخ!؟! عاد مدري!!!))بصراحه مالهم داعي عاد لو فيه اصلا خيارات هنا غير المقاهي و,,و,, كان اقول يمكن عندهم سبب,,لكن للاسف حتى بافكارنا صرنا محدودين,,لكن الله لا يجزى خير اللي يحاول انه يمنع الحريه,,قلت انا من قبل بس محد لمي ,,ماحنا خشش تطور ,,التطور في جهه واحنا والتخلف في جهه

  30. السلام عليكم ورحمه الله بدايتا انا اول مره اعرف ان السعوديه اصدرت قرار زى ده..وبصراحه جزى الله خير من ساهم فى التفكير فى مثل هذا القرار ..و اتمنى ان كل الدول العربيه تأخد هذا النهج و الى الاخ العزيز الذى طرح هذا الموضوع يا اخى اتمنى ان تلغى عقلك فى الامور التى تأتى ضد الشهوات و تستخدم قلبك وما تبقى من دين .. رسولنا قرر ما هو اشد من ذلك منذ زمن وقال لا سمر بعد العشاء ..وانت تصر على مخالفه ذلك حتى وبعد ان اغلقت جميع الاماكن التى تلهى تصر ايضا على ان تجد مكان تذهبه لتستمر فى المعصيه و تطاوع ملذاتك.. يا اخى ادعوا الله ان يهدينى و اياك

  31. بصراحه شد نظري الموضوع وحبيت اعلق عليه لانه موضوعمهم ويهم شريحه كبيره في المجتمع الان المقاهي بغض النظر عن سلبياتها وخرابها الا انها حاجرتن الدشير ومخليتهم في شبك واحد قصدي مكان واحد يعني لو اذا قفل المقهى 12 يبون يروحون ينامون عشان يقومون لصلات الفجر ؟!! فشي طبيعي راح يقضي وقته للبحث عن وسيله تملئ وقت فراغه ( تفحيط ،هجوله ،استراحات ،سرقات ،،،،الخ) فيايكون هناك بديل ..او خل المقاهي تقفل اقل شئ الساعه 2

  32. I think they have to close all of them now before next time because it steals our young men’s health and thier money also thax for follow me

  33. من وجهة نظري انه قرار الإقفال بالنسبه لمقاهي الشيشه مبكرا قرار مناسب لان أكثر المشاكل والشبهه وكذلك من بيع حشيش ومخدرات عن طريق المقاهي وياما داهموا المقاهي وحصلوا بلاوي فيها اما بالنسبه لمقاهي الكوفي شوب والانترنت ما أعتبره قرار سليم لانه غالبا الأماكن هذي مافيها شبهه مثل مقاهي الشيش ((يبقا هذا وجهة نضر بالنسبه لي ممكن تكون صح وممكن خطاء)) مشكور اخوي معاند على طرح مثل هذا الموضوع

  34. صراحه انا من الاشخاص اللي لو المقاهي كان اعتبر نفسي ضايع ولا ادري وين جهتي الان اقل مافيها ان المقاهي والانترنت هي اللي تمسك الواحد من السفر والهياته بالشواارع ااسف على الكلمات اللي قلتها ولكن هذا الصراحه

  35. في إغلب الاحيان يكون الذهاب للمقهي لشرب الشاي أو الشيشة أو لقاء الاصدقاء و فييكون الإحيان يكون الهروب من المشاكل وبعضها في الهروب من التمشي في الإسواق والشواراع وما يتبعها من مشاكل

  36. مع القرار لمقاهي الشيشة والتمديد للمقاهي الأخرى حتى الثانية والنصف في الإجازات ولـــــــــــــــــــــكن الأهم توفير البديل الأفضل للقضاء على الفراغ وقضاء وقت ممتع للشباب والشـــــــــــــــــااااباااتــــــــ مثل نوادي يتوفر بها مسابح وصالات بولينج وبلياردو تعليم الرماية ومكتبة سمعية وبصرية وتكون الاسعار في متناول الجميع اما شكوى الشباب الدائمة من تخصيص اماكن للعائلات فقط ؟؟؟ ايش في غير المجمعات التجارية هل هذه الاماكن للتسليةوقضاء الوقت في التسكع اما الملاهي يااخي خذ زوجتك او امك واخواتك ورفه عن نفسك

  37. بسم الله الرحمن الرحيم السلام عليكم ورحمة الله وبركاته وبعد أنا لأول مره أشارك في رد فشدني هذا الموضوع فانا اشوف إن مقاهي الفساد ليس تغلق بل تهدم وتنسى ويعاقب من يرونه يشيش علناً امام الناس ياشباب وياشابات الى متى وإحنا نلهو بملذات الدنيا وربنا عز وجل وعدنا بانهار بالجنه مالذ وطاب ياشباب الى متى وانتم بهذه الحال تسببون لانفسكم الأمراض ياخي خل تنفسك يكون نقي وارحم الرئتين اللي تمدك بنعم كثيره واولها لو ماتشتغل الرئتين كان تموت عيب عليك هي تعطيك الحياة وانت تقابله وتعطيه العفن ( ارحم نفسك قبل تُرحم) وفي الختام اللهم أصلح شباب المسلمين واجعلهم هداة مهتدين وثبتهم على الصراط المستقيم واجعلهم قرة عين لوالديهم ياأرحم الراحمين

  38. ههههههههههه وش السالفة ما بقى الا يسوون حظر تجول,, الله يعين الدوريات والهيئة وبالتوفيق للاخير ورا ما يسكرون محلات (مـيـد ) بعد ترا فيها طاولات وكوفي ميكر واماكن فساد ؟؟؟,,, والله العظيم عليهم قرارات ,,هذا بدل ما يفتحون اماكن جديدة للشباب قاعدين يسكرون يعني لازم كل ويك اند اروح لجدة والا للبحرين عشان اوسع صدري والله طفشنا خلاااااااص يرحم والديكم اشك هدومي

  39. شكرا اخوي معاند على هالموضوع والاعضاء الي ردو فيهم الخير والبركه بس حبيت اعلق على بعضهم : القرار عندي متاخر جدا والحقيقه انا اتمنى انه يكون الساعه 11 ليلا اقصى شئ الامر الاخر الى متى احنا نلاحق الشيشه والجلسات اللي على الفاضي وغيرنا يصنع ويشتغل وينتج … مافيه احد منا سأل نفسه انا على الطريق الصحيح والا لا … الدول الثانيه تبدى يومها الساعه 6 صباحا وتنتهي 7 مساء !!؟ واحنا نهاوش ليش يطلع هالقرار الله يخلف على المسلمين بس ؟؟؟ الى متى نفوق من هالنوم العميق الى متى؟؟؟ واللي قال وين نروح وانت محلوف عليك ماتدخل بيتكم ياخوي نم مبكر او اجلس مع اهلك ياملا الغنيمه … والله ياشباب اللي ماراح يستغل شبابه بعمل نافع سواء دراسه او تجاره او طلب علم راح يندم بعدين وتحياتي لكم …

  40. أول شئ السلام عليكم ورحمة الله وبركاته ثاني شئ أشكر موقع أبو نواف لإتاحة لنا الفرصة للتحدث عما يجول في بالنا ندخل في صلب الموضوع : بصراحة نفس ماقالوا بعض الأخوة الكرام لانجد سبب لجعل هذا القرار هادف ومنطقي بالعكس هو اللي يجلب الدعارة والفساد لشبابنا المسلمين بالذهاب الى بيوت بعض البنات بالتقابل عبر طريق النت ويفعلون مايفعلون والعياذ بالله أفضل شئ أن يمنعوا هذا القرار الغبي للترفيه على المسلمين بالذهاب الى أصدقائهموشرب القهوة وتناول الأحاديث الشيقة والممتعة

  41. السلام عليكم انا نفسي افهم البلد دي ايش نهايتها مع الشباب اظن كم سنه كمان يمنعو الشباب يركبو في سيارات لحالهم والله طفشنا من التخلف داا مافي مكان نروحو ولا نجلس فيه يقولو لا تضيعو وقتكم في الكافيهات يعني الي يشوف يقول عندنا اعمال اجتماعية نقدر نساهم فيها او في احد يسمح للشباب انو يتكلم وبما انوو الشباب في دي البلد مالهم حق ولا صوت ودايما الكلام الموجه ليهم ((انتا ليسسا صغيير وعييب و انتو تقلدو الغرب وانتو وانتو …..)) جانا القرف والله الواحد نفسو يطلع يزعق في الشارع يعني نفسي افهم ايش الفايدة لمن يقلو الكافيهات مو بتدخل فلوس وبتكون لصالح البلد ايش المانع يعني وعلى فكرة انا من جدة مع اننو حتى هنا طفش بس الحمد الله انا رحت الرياض كنت ابغا انتحرررررررر مافي شي تقدر تسويه والناس يطالعو فيك على اننك مرض ولا عشانك شاب لازم ما تظهر قدام الناس وبعدين يسالو ليش العرب ما يقدرو يقولو لا ويطلع جيل متخلف الله يعين بس …………

  42. هل القرار سيجبر من يرتادون هذه الاماكن للعودة للمنزل والنوم رأي غير صائب ومن نتائجه أنه سوف يساعد على زيادة أوقات الفراغ ومع الفراغ تأتي الأفكار السيئة كالتفحيط وأذية الغير ناهيك عن اختلاق وقت للمراهقين في التفكير فيما هوا أخطر وهو المخدرات والسرقة لماذا لاتبقى مفتوحة ومن اراد الذهاب وهو مقتنع فليذهب ومن اراد النوم فهو يعرف الطريق إلى الفراش

  43. خطوه اكثر من رائعه ولو نفكر شويه حنلاقيها في مصلحت الشباب بشكل خاص ياجماعه لماذا اذا نوقش موضوع يختص بالشباب نجد مفردات كثيره اين نقضي اوقات فراغنا اين نطير الطفش ……الخ المفروض حنا الشباب نكون في هذي السن حاسسين بالمسؤليه ماحنا فاضيين للمقاهي والدشره تفكيرنا كله منصب على اصلاح حالنا وحال بيوتنا ومتحملين المسؤليه كما كثير من الشباب في نفس اعمارنا الى اقل شي ما يشحتون المصروف من الاباء والهم هاذي وجهة نظري وشكرا

  44. من عنوان التعليق تفهمون ما أريد الحديث عنه أتمنى من كل من يؤيد الموضوع المطروح ، أن يخرج يوما في الصباح الباكر إلى شوارع الرياض أيام الاجازات ليرى بعينه ، حتى بالنسبة للخدمات المنزليه المهمة مثل الكهرباء السباكة الالكترونيات أصبحوا لا يفتحون باكرا . لن أتحدث عن مضار السهر ولكن أخي الشاب متى سوف تصحو من نومك متى سوف تجلس مع ووالدتك لتلبي لها طلباتها متى سوف يخرج الاولاد ، أين هو الوقت الذي سوف تقضيه بالمنزل .. أن أؤيد القرار وأؤيد أن يكون أيضا الساعة الثانية عشرة ولمن أراد إكمـــــال السهر فالمنزل هو ألانسب ومع الأهل …. ويعطيكم الف عافية جميعا

  45. ماصدر بخصوص قرار الاغلاق بعد الواحده مفيد لإسباب كثيره منها ان كثرة السهره لها تأثيرات سلبيه مثل التأخير عن العمل والمدارس والجامعات وغير ذلك انها مرتع لتجمع بعض ضعاف النفوس .. وان الشباب من حقهم ان يجدو ماينفس عنهم وهم الفئة التي بين 18 إلى 35 واعتقد من هم اكبر من ذلك لديهم عائله واقصد المتزوجون وهو اكثر حرص على النوم المبكر بسبب التزاماتهم العائليه اما الشباب فهم ليسو بحاجه لمقاهي يجتمعون بها الاصح انهم بحاجه لمتنفس يقضون به وقت فراغهم هذا دور رعايه الشباب التي تهتم فقط بكره القدم اين المراكز الثقافيه والترفيهيه ومراكز الرمايه والخيول هي تكفي لإحتواء الشباب

  46. أشكرك أخوي معاند على فتح باب لنقاش في الموضوع من وجهة نظري ان المقاهي لو تفتح لوقت متأخر من الليل في اوقات الدوام والدراسة تكون سبب في تقاعس بعض الطلاب والموظفين عن دراستهم وأعمالهم وان يفضل ان تسكر في وقت مبكر … ولكن في إيام الأجازات لو تسكر في وقت متأخر يكون احسن لان راح يشغل أوقات فراغ الشباب وتسلية لهم هذا من وجهة نظري الشخصية وشكراً

  47. بسم الله الرحمن الرحيم ألف شكر لك اخوي حوارات على هالموضوع الاكثر من رائع اختلفت الآراء بين موافق ومعارض على القرار (اتكلم عن مقاهي الشيشه) أولا الفئاة العمريه المسموح لها بالدخوول اول شرط عند باب القهوه ان الزبون يكوون عمره 18 فما فووق وكل القهاوي لها رجال أمن (سواء خاصين او متعاقدين من قبل شركات) و العمر هذا اكيد انه مخلص ثانوي يعني مسؤول عن نفسه وأتوقع ان وجود االفئات العمريه اللي اقل من 18 بالقهاوي مو عيب على ادارة القهوه ولا صاحب القهوه المفروض يتعاقب والد الشاب اللي مهيته ما يدري عنه وهو بالعمر هذا ثانيا : القنواة التلفزيونيه حددت القنواة المسموح بها من قبل امارة منطقة الرياض وحصروها بالبدايه بالقنواة (المفتوحه) من قمر عرب سات وبعد كثرة الطلبات من المقاهي تم السماح للقنواة المشفره (الرياضيه) واكيد ان اي شاب او اي استراحة شباب راح تكون فيها قنواة اردى من كذا او عن التعميم نقوول الاغلبيه ثالثا : الخروج من المقاهي في منطقة الفحص الدوري بالرياض (تقاطع طريق الدمام السريع مع طريق الشيخ جابر الصباح) يوجد فيها اكثر من سبع مقاهي لو افترضنا ان كل مقهى يحتوي ألف جلسه وكلها مليانه وبكل جلسه شخص واحد جاي بسيارته (مستحيل واحد بكل جلسه) وقت الخروج بنهاية الاسبوع محدد بالساعه 2 صباحا يعني بالوقت هذا بتحصل سبعة آلاف سياره خارجه مره وحده ومستحيل كلهم بيروحون على بيتهم حنا ساكنين بالسعوديه محنا باليابان هذي ثلاث نقاط احسها من صالح تأخير وقت اغلاق المقاهي كتبتها على عجل مني ولخبرتي بالمقاهي لاني اعرف صاحب احد المقاهي بالمنطقه هذي وصدقووني صحيح المقاهي تجمع ناس فاضيه لكن تفكنا من التفحيط تالي الليل والسرقات والدوران بالشوارع على الاقل يكونون بمكان واحد تحت شروط خاصه من الاماره ولا يكونون بالشوارع تحت رغباتهم وافكارهم اشكرك اخوي حوارات مره ثانيه وهذي وجهة نظري المتواضعه

  48. احس انه من الافضل ان تبقى المقاهي مفتوحه 24 ساعه وذلك افضل من اللف والدوران في الشوراع والتسبب في مشاكل كثيره منها ايذاء الناس والسرقه والتفحيط وغير ذلك اغلبنا يالشباب يكون عنده اجازه مثلا لمدة اسبوع يقضي فيها اشغاله الصباح وينام مثلا للعشاء واذا صحى ما يلقى مكان بيسهر فيه كل شيء مقفل وبعضنا الاخر يكون عمله دائما مساء من الساعه 6 المغرب لحد الساعه 12 اخر الليل ولا يجد مكان يجلس فيه ويجتمع مع زملائه اتمنى ان ينظر في هذا الموضوع بجدية والسماح للمقاهي العمل 24 ساعة

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

دعوة للحوار : إغلاق المقاهي بعد الواحده .. مالأسباب ؟

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول