خواطر مبتعث


هذه رسالة ارسلها لي احد الزملاء بس اسلوبه حواق <== موب صاحي نجيب فطلب مني اني انشرها بالقروووب وكتبت الرسالة بأسلوبي وحطيتني بطلها ( وجه يعض شفايفه ويقول محد درى محد درى )

المهم كلمت ابو نواف وجزاه الله خير ما قصر رجل في كل المواقف ما ان فاتحته بالموضوع حتى مد يده بحبل الغسيل وقال انشر يا بطارخ فنحمد الله الذي رزقنا بمدير في خفة ظل ابو نواف

من الوزارة للملحقية ويا كلب لا تحزن

نعم

بعد فترة قضيتها في الإبتعاث صدمت اني اعامل من من يفترض بهم خدمتي معامله الكلاب ولا اقول كلاب امريكا والعياذ بالله فجميعنا نعلم كم هي مكرمه ولكن كلاب ديرتنا يالله انك لا تخلينا … نعم نعم تلكم الكلاب الي تلقونها في البراحات الي حول الإستراحات تلكم الكلاب الي يحق لنا نسميها كلاب

خرجوا ابنائنا (الأوادم ) على عماها في الدفعه الاولى من البعثات لا الوزارة تعرفهم ولا تعرف وش هم من لحية

لا الملحقية تعرفهم ولا تعرف وش هم من لحية ولا هم يعرفون لا الوزارة ولا الملحقية بإختصار كان اللقاء الأول من نوعه

لا مقابلات لا تقييم الواسطات شغاله المعدلات مدحدره ولا زالوا هالطلاب البؤساء يعيشون غلطة الوزارة لما ارسلتهم بعد

حصولهم على قبول معاهد اللغه فقط بدون قبول الجامعه .. وفلذات اكبادنا متمرمطين الحين يدورون قبول

فكم من زميل قابلته فيذا <== وركزوا على فيذاا يشكوا لي الحال وانه متوهق لا معدل زين ولا جامعه تقبله

يسالني وانا توني جاي ادربي رويسي يقول تخبر جامعات زينه فقلت متفاخرا بذكائي واستعدادي من قبل ما اجي فقلت لا والله انا جاي مريح معي قبولي يالله من فضلك وفي احد الجامعات القوية ولله الحمد

فقلت له الحين يوم معدلك شين وراك تطلع بعثه ؟ ما تدري ان محدن قابلك ؟ قال لا والله قالوا لي تساهيل !! قلت منهم ؟؟ قال الي في الوزارة ؟ قلت عموما يا رجال احسن من قعدتك بالديرة بدون شغل ولا مشغلة .. قال يا رجال كنت بوظيفتي ملك زماني والحين اجرجر مرتي وعيالي معي وانا اعض اصابع الندم

فقلت للأسف الوزارة اغلب الي فيها دكاترة حتى السكرتير الظاهر تلقاه دكتور في تخصص معين واخرتها هذي نصايحهم لطلاب بمعدلات مقبول … قال يا بطارخ ليتها على كذا بس … قلت اها وشو بعد ؟ قال الملحقية يا بطارخ الملحقية ..قلت وش فيها قال تصدق الي ما يخافون الله يوم جبنا قبول من جامعه انا ومجموعه من الطلبة عشان هالجامعه ما تطلب لا جي مات ولا جي ار اي (( الجيمات والجي ار اي والتوفل اختبارات تطلبها اغلب الجامعات للقبول خصوصا في الدراسات العليا والتوفل يكون ضروري في كل تخصص اما الجيمات والجي ار اي على حسب وهالأختبارات هي كابوس السعوديين فتلقاهم يحاولون يتفادونها على قد ما يقدرون  )) فقلت زين طيب هالجامعه معترف فيها الوزارة ؟ قال ايه قلت زين طيب وش المشكلة ؟ قال دقوا الملحقية يقولون لنا دوروا جامعه ثانيه يوم قلنا لهم ليش قالوا هالجامعه قبولها سهل …. إبتسمت ابتسامة شخص موب مستغرب هالموقف على عقليه الرجل السعودي ذو المنصب فقلت ايه يا رجال معهم حق وشلون تستمتع بالدراسه شلون تحس بطعم الشهاده وانت جايب قبول بسهوله ؟ لا يبوي لازم تتمرمط فأنت سعودي لازم تدفع دم قلبك فأنت سعودي لازم اعصابك تنحرق وتعاف البعثه والإبتعاث فأنت يا عزيزي سعودي .

اذكر في خلال هالحوار طق كتفي احد الأخوة والي تعجبت من ضعف لغته على الرغم من انه في اخر مرحله في معهد هاللغة ومع ذلك لغته حواق ومن ذلك عرفت ان هالمعهد الي انا فيه حواق وللأسف بعد مصنف كأحد اقوى المعاهد الي معترف فيها من وزارتنا الحبيبة !!! تلفت  على اخينا في الله ذو للغه الضعيفه وقلت هو آر يو فجاوب علي جواب اولى ثنوي حينما قال فاين ثانكيو حمدت الله على انه لم يقل سير بعدها فقلت تمام فيه تقدم …. سألني هالمبتعث ضعيف اللغه وهو يتميز باللقافه والعين الحاره جدا ولكني وقتها جديد فلم اعلم 🙁 فقال عندك قبول ؟ فنفخت ريشي وقلت ايه الله المستعان منذ مبطي ما جيت الا وعلومي سفره … قال زين ( ماقال ماشاء الله )) قال وش جامعتك ؟ فقلت جامعتي احدى اقوى الجامعات في الولايات المتحده فهي

تقع ضمن اقوى 100 جامعه يا عزيزي

فكررها حسبي الله عليه وقال زين

ما ان تنحى جانبا ليسأل طالب سعودي جديد اخر حتى جائني احد الأخوه فقال بطارخ فقلت سم فقال لقد سمعت ان الجامعه الي انت مقبول فيها الغوا الإعتراف حقها فقلت وجع من متى هالكلام ؟ فقال من شهرين فقلت ما يخالف فالمنطق يقول ان قبولي قبل 3 اشهر من هذا القرار وبالتالي فقبولي ومصاريفي الي دفعتها في سبيل الحصول على هالقبول لم تذهب سدا .. فنصحني بالتأكد عن طريق الملحقيه فإتصلت واذا بمستشارتي الطلابية تقول ما فيه صديق روهي دوري جامعه ثاني 🙁

فقلت لا يا صديقه ما يمشي ذالحتسي يا اختاه 🙁 ورانا مصاريف ودراهم منيب فاضي من بيعوضني ؟ كفيلتس ؟ فقالت كلمتها الشهيره يالله روهي روهي 🙁 واغلقت السماعه في وجهي فلم اتعجب فهي تعمل مع سعوديين 🙁

كلمت من هو اعلا منها رتبه ووجدت انه هو البلا والجلا هاللي اعلا منها رتبه 🙁

جامعه يلغى الإعتراف فيها وهي من ضمن افضل 100 جامعه بينما هناك جامعات معترف فيها تقع في الترتيب 5000 شف قوة المنطق والحجة …. طيب ليه الغيتوا الإعتراف ؟ وش سوت لكم هالجامعه ؟ فقال قبولها سهل وتنجح عيالنا .. فقلت لا معكم حق شلون تنجح عيالنا هاللي ما تستحي ؟ لازم يسقطون ولا وشلون بيقدرون البعثه والإبتعاث ؟

طيب هالجامعه هاللي حاصله على هالترتيب القوي بالله بتخرب سمعتها لعيون حفنة من الطلاب السعوديين يعني نجحت عيالكم ولا سقطتهم بتفرق معها ؟

نقاط احب اوضحها

اولا: هناك جامعات كثير من موادها تدرس عن طريق الإنترنت ولا زالت معترف فيها من قبل الملحقية على حساب جامعات اخرى قوية وتتطلب الحضور من الطلاب

هالجامعات الي كلاساتها اونلاين ليه مبتعث لها طلاب ؟ ليه الله يجزاك بالخير ما تخلي الطالب قاعد عند رجيلات اميمته يهمزهن بيد وتدفع له انت مصاريف الجامعه بحيث انه يحرك الماوس ويدرس باليد الثانيه

ثانيا : طالما حاطين حيلكم على السهولة في القبول والتنجيح ليه يا مال المنيب قايل ما تحطون حيلكم في معاهد اللغه الي قاعده تزرف وتلهط من ميزانيتكم وفيها تسيب وخنبلقة ما بعدها خنبقة … مستويات تدريس ضعيفه جدا , تسيب من الطلاب بشكل كبير وهياط , تنجيح بالهبل في معاهد الرسوووب فيها يعتبر مستحيل فهنيئا لنا بهذا الجيل القادم 🙁 وسلم لي على ابو زين وعدو ماشاء الله 🙁

ثالثا: ياخي الدراهم واااجد وميزانيتكم يحسدكم عليها اطنخ وزير وراكم يا مال العافيه ما ترسلون موظف مختص لكل ولايه في امريكا كل ثلاث شهور يتفقد احوال الرعية يشوف مستوى المواد وطريقتها يشوف مستوى الطلاب ويتابعهم ؟

رابعا: الدفعات الثانيه الي خضعت لمقابلات شخصيه ونحسبهم والله حسيبهم جوا بدون واسطات ما بعد وصلت الى الان على حد علمي … فتمنى منهم يكونون واجه مشرفة ويصلحون بعض ما افسده ربعنا الي جو على عماها .

خامسا: والله يا جماعه شفت سعودييين فيذا والله لا يمتون للجنس البشري بصله والله ما عمري كرهت ولا حامت تسبدي من مجموعه من البشر في هالفترة القياسيه من الزمن قبل كذا ولكن لا اقوول الا يا ربيييييييييييييييييييييييييييييه <=== يشقق فنيلته

سادسا: حملات قبول من استراليا وبريطانيا بدأت تظهر مؤخرا على الساحه استعدادا لتحويل البعثه لتلكم البلدان

فلما تسأل اخوتك الطلاب وراكم بتحولون البعثه ؟ خلك على قردك لا يجيك الي اقرد منه .. فيرد عليك حكيم منهم ويقول والله لو في ادغال الأمازون منتب لاقي بأقرد من الي عندك هنا … عندها اخرس واعض على شحمه واقولهم من الي جاب لكم قبول بريطانيا واستراليا عندكم رقمه ؟

سابعا : لوحظ مؤخرا ازدياد عدد المواليد من اب وام سعوديين في امريكا … تعليقا على هالملاحظة ما اقول الا الله ابو القروا كل هذا عشان ولدك يتغير لون جوازه طيب افرض عقب فترة تسقط القوة العظمى وتصير الصين وش بينفعك هالجواز انت وخشتك

ثامنا : ما ان تهنينا بهال15% زيادة في المكافأه حتى ظهرت اصوات تنادي بإستردادها مره اخرى عشانهم بيحسنون وضع التأمين الصحي طيب والي جايبن معه مرّه وحلتيته وما يتداوى إلا بالأعشاب ولا يبي تأمينكم تعطونه دراهمه

تاسعا : بعض المستشارين الطلابيين الي مهمتهم متابعه الطلاب ومساعدتهم والرد على استفساراتهم للأسف بدو في تقليعه جديده وهي تحديد عدد الساعات في الرد على الهاتف والإيميل من ساعات الدوام كاملة تم تقليصها الى ساعتين والبعض تبجح وخلاها ساعه وحده بس… الي يشوفني الحين يقول داقن على ام كلثوم يومها تمنن علي

عاشرا : الي يرد عليه احد في الملحقية يتم الإعلان عن اسمه في المعاهد والجامعات القريبه ويذهب ليتمسح ويتبرك به بقية الطلاب عل وعسى ان يحالفهم الحظ ويردون عليهم الملحقية بعد ….. احد الظرفاء الأمريكان بعد مشاهدته لهذه الظاهره علق وقال بالفم المليان وراكم تسوون تسذا ؟ <=== الله من زين التعليق

والله يا جماعة القلب محمل بزيادة والتسبد حايمه ولكني ابطيت وصيفت

فلعل لنا لقاء قادم

## بـــــــطـــــارخ ##


تعليقات 2

  1. بصراحه الموضوع حساس جدا ويحتاج لتدقيق شديد ورقابه فوق المسؤولين في الوزاه ! والله يا جماعه أنا أستلمت قرار إبتعاثي قبل أيام معدوده .. أقسم بالله العلي العظيم أني أصدرت القرار بدون واسطه أو أي فيتامين ( مع العلم أني لا أصنف ضمن البرنامج الاول أو البرنامج الثاني !!!!!!!!!!!! ) والله يا جماعه أن الوزاره رايحه في أم الرحله .. والله موضفين نافخين ريشهم ومسوين فيها يعرفون الاجراءات وهم من جمبها …. يا جماعه صدقوا بالله أي ما أخذت قرار الابتعاث بواسطه بس نشبت لهم في حلوقهم وتسهلت أموري ولله الحمد !!! ما كنت متصور أن الوزاره راح تصرف لي تذاكر سفر قيمتها 6400 ريال في ظرف عشر دقايق !!!! صحيح أني إستلمت قرار الابتعاث والتذاكر … ورحلتي باقي عليها أيام معدوده 🙂 .. لكن كلمه الحق تنقال .. وزاره التعليم العالي يحتاجون لمدققين وراهم .. أقولكم أنا من كثر ما داومت عندهم عرفت الوضع .. وعرفت اللعبه كلها .. وأقسم بالله العلي العظيم لو عندك معرفه مع أحد السكيوريتيه في الوزاره أن قرار إبتعاثك تستلمه بعد حصولك على الفيزا مباشره 🙂 !!!!!! وزاره قمه في التسيب .. قمه في الغباء .. والله يا جماعه ما توقعت أني أحصل على البعثه بمجرد أني نشبت لهم .. الحمد لله أنا حصلت على البعثه نسبتي تأهلني ولله الحمد أعلى من 93 % والقدرات أعلى من 70 % الحمد لله أنجزت أموري بواسطه الله سبحانه الرزاق الكريم ثم أني إنسان نشبه طحت في حلوقهم لين حصلت على اللي أبيه .. وأعتقد لة ينشب لهم أي شخص بغض النظر عن النسبه حتى ولو تحت الـ 70 % أنا متأكد أن أمورة راح تمشي مثلي .. لأن وكاله قرار الابتعاث خرجت عن أكثر من وكيل ( تخيلوا اللي عرفتهم من كثر مراجعتي هم خمسه فما بالك باللي أنا ما اعرفهم ههههههههههه ) الله يهديهم ويوفقنا في حياة الغربه .. والله أني خايف من سوالف الملحقيه من الحين … والله ثم والله كل كلمه قلتها هنا أنا مهيب وهم .. وأنا مسؤول عنها أما ربي .. وأني حصلت على البعثه بدون وساطه ( بس هذا يدل على التسيب في الوزاره ) الله يهديهم ويصلح بطانه هذا الوطن ويطول بعمر أبو متعب ويحفظه من كل شر ….. واللــــــــــــــه مـــــــــــــن وراء القصـــــــــــد …

  2. بطارخ ……كانك تكلمت عني….يا فيني ضيقت صدر من هل المعهد!!!!!! وتكلم الملحقيه يقولون ….زين زين ..خير خير ولا حد يعطيك وجهه في هذا الحياه غير الفراش..حق المكتبه….الله يستر …الله يستر

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

خواطر مبتعث

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول