خفايف تعدل مزاجك !


السلام عليكم ورحمة الله وبركاته
صباح القشطة طايحن عليها ملعقة السكر للي يقرأ صبح
مساء الشقلاطه مفقشين عليها شوية مكسرات للّي يقرأ مساء
سوالفن خفيفه لكنه مفيدة وماهيب مفيدة .. وان شاء الله انها بتعدل مزاجكم شوي .. وتستانسون معها .. وخاصة اللي ماهوب جايز لهم السوالف الطويله وكثرة البربرة ..
ويحب (( خير الكلام ماقل ودل ))

{ خفايف تعدل مزاجك }

_ يوم انك تتغدى سمك بعد ماتصلي الجمعة له طعم ثاني … وبعد ماتعبي كريشتك من الهامور وتأخذ لك صكة بلايستيشن مع بزران اخوانك الصغار ويهزمك اصغرهم 5 _ صفر ماتزعل لأنه له طعم ثاني .. تغلط وتنسى انك مآكل سمك وتروح للبقالة وتأخذ لك لبن مراعي كبير يقال انك بتهضم من زود الدلاخه ويصيبك تسمم وتنصرع عل اخوانك بالمجلس قدام الضيف ويشيلونك مع كراعينك ويدينك وانت رأسك متدلي ولسانك على جنب تصارع التسمم ويودونك للدختور ويطزك بأبره قبل لاتروح فيها وتقوم بالسلامة ولله الحمد وتحرم تأكل سمك انت وخشتك لأن له طعم ثاني …..

/ / /

_ فنجال وعلوم رجال .. احلى فنجال قهوة وانت جالس على جنب تتابع مباراة المنتخب السعودي مع صديقك المدلل على الكنب وانت منت متعود على جلسة الكنب مغير رجيلاتك اللي كلهن شعر وجروح متفطره من جبال الديرة وكل شوي تحاول تقوم تنزل فالثوب تبي يغطي سيقانك وماسك الفنجال بكل جلافه وتشرب قهوة بشراهه كنك ضميان .. وخويك المدلل جالس بكل اناقة وجنتله ولابس ازين ملابس ومدلع نفسه شراريب وملابس كشخه وحاطن رجل على رجل وماسك الفنجال بكل انسيابيه ويشرب رشفه رشفه .. وتدخل عليك اخته بحلا التوفي وتختبط ويطيح منك الفنجال من الخرعه وتتغطى بشماغك تحسبها داخله بالغلط .. واخوها يضحك عليك ويقولك لا عادي هذي اختي ليندااااا …………………..

/ / /

_ زوجوه وافتكوا من شرّه … تسمعها وانت ماشي مع السيب اللي بجنب غرفة الحريم ام صالح تقولها لعجيزك وتلعب براسها عشان تأخذ بنتها صالحه وتولف عليك من الأتسذاب والتهم الملفقه ومغازلة بنيتها المصون وهي جايه من الخياط كل ذا عشان النظره الخطأ اللي قزيتها بها وهي تمد عليك كم بصله من ورى الباب ذاك اليوم يوم غلق عندكم الغاز … زوجوه وافتكوا من شرّه .. ابو ناصر << مسمّي نفسه ابو ناصر وهو مايخلف الا بنات << يتفاول خير .. عنّسن البنات وصارن كبر امك ولا احد جاهن وخطبهن ويحاول يتقرب منك ابوهن ويسلفك زي ماتبي قروش ويضيفك كل يوم غداء وقهوة وشاهي وبيبسي دايت ويدخلهن عليك باللغلط يقال انه يهاوشهن وانهن داخلات باللغلط وانت فاتحن فمك ماتدري وش تحس به
ولاينفع معك وتلقاه اليوم الثاني عند المسجد مع ابوك بعد الصلاة يقوله انه شافك تتن ورى الحنفية ويطالب بتزويجك عشان تعقل خخ … زوجوه وافتكوا من شرّه .. جالس في العصريه مع براد الشاهي وتغمس ببسكوت ماري وتتصفح اخبار اليوم بالجريده ماتخلص من الجريده وتحطها بالأرض الا وقدامك ثلاثه نفر ( ابوك وامك واخوك المطوع ) يناظرون فيك وانت صايبك شك وريبه من انك بتذوق الكف بعد ثواني .. وتقمز مع اول كلمة من ابوك على بالك الكف ويقولك: ياوليدي انت كبرت واللي كبرك تزوجوا وانت ماشاء الله ماناقصك شيء متوظف ومستصح ومقتدر ووو .. ماناقصك الا بنت الحلال اللي تترس عليك البيت جرابيع صغار … وانت تختار اللي تبيها بنخطبها لك ……. واــنا آآآآآآصيييح بصوووت قووووي تقال صافرة انذار ( زوجوني وفكوني منهم …….!!! )

/ / /

_ ياسلام لا اختبارات ولا شيء … ياحلو جوك وانت ماعندك اختبارات ومتكوي على فلم مصري جدييد البطل يموت اول خمس دقايق خخخ عمركم شفتوا فلم البطل يموت اول خمس دقايق ومعك فصفص ومكسرات ومتابع بحماس للفلم على بالك فيه احداث وهي نفس الأحداث اللي نتابعها بكل افلام المصاريه واحد يتعرف له على وحده ويحبها بثاني مشهد وابوها الغني ماهوب راضي لأن الولد خايس ومن عيله ئليله ويدخلون بمشاكل وفي الأخير يخطفها ويتزوجون غصبن عن ابو جدها .. واذا تسسعل الممثل : ليش احداثكم مكرره يقولك : المخرج عايز كده … واخوانك يكرفون بهالكتب وانت تأذيهم بكل وسائل الأذيه من الوناسه اللي شاقتن صدرك .. مرة تجيهم داعس طبلونك وتسحب جلنطات على دفاترهم وتهج .. ومرة تطفي النور وتنسدح وسطهم يقال انه جاك النوم الساعه 6 المغرب .. والا تقعد تقابلهم بركن الغرفة بسندوتش الشاورما ومكثر الهمليز والشطه .. وتأكل حبه حبه تبي تزل نفوسهم بسندوتش الشاورما اللي يقوطر همليز وهم متابعين بتركيز معك عبالهم معادلة حسابيه غير ممكنة الحل … وانت جالس تشرح لهم معادلة الشاورما مادري الا اللي صانك بفنجال قهوة على راسك منشب نص الفنجال براسك وماتدري الا الشايب بسروال السنة والفنيلة العلاقي وفي يده الباكوره واقفن على الباب يبي يسمع لك جدول الضرب خخ……

/ / /

_ 5 بزراين اللي نجح منهم 4 وواحد جايبها دواوير حمر حاكره ابوه بالمقلط وقاطعن عنه الكهربه والماء والهواء وماعنده الا شمعه وحده صغيره مغير صياحها ودموعها الحارّه .. حبس انفرادي ليش ماتذاكر من الأول … وياحلاوتها الليله للناجحين ويافرحة شايبهم بهم :: يالله يالله ياعيال اركبوا بجيب لكم هدايا النجاح ركبوا بصندوق الهايلكس 82 بدون خطوط هنقلين عشان مايطيحون البزارين .. والبزارين فرحانين الليله الليله عسكريم للعيله ورقص وهز وسط .. ويروحون لمحل العسكريم اللي بالفستق ..ويطقم لهم احلى عسكريم من الغالي أبو ريالين بعد المكاسر صار الواحد بريال ونص… ويصفط عند اقرب مطعم بخاري وحبة شواية مع الرز ومرندا كبير عائلي << يمدحون التوفير.. العاده تميس وفول وحبه زبادي وينامون جياع .. وأخيراً الفاجأة الكبرى في البيت والهدية الأحلى والأجمل والأمثل على قول مصطفى الآغـا سهرة الى الساعة 12 بالليل على فلم وثائقي على القناة السعودية الثانية !! على فكرة البيت مافيه غير قناتين الأولى والثانية وكان حاذفن القناة الثانية الشايب تدرون ليش …؟؟ يقول فيها وصاخه ………..

/ / /

_ أبوك مايشــوف زين سواقته صباحي بس ليلي مايسوق .. يقول مادرست ليلي !! .. تقوم بعد صلاة الفجر غصبن عنك وانت مانمت الا قبل الفجر بدقيقة يقومك ابوك بكرعه والا ينغزك بعصاته وانت نآآآيم ووفاتحن فمك كنك بياره ( المدلل مايقومه ابوه الا ببوسه وقوم يآولدي ) وحنا يالله المستعان .. وتقوم من النوم حالتك حاله من السهر تمشي وانت نايم تبي تدخل الحمام تغسل تلقى نفسك واقف بالمطبخ ماتدري وش الطبخه !! تركب السيارة جنب أبوك مغير تناظر قدام ماودك تكلمه يقال زعلان منه .. تشغل0 السيارة وتقومها بالثالث من القهر .. توصل للديرة وتحسب عمرك بتسدح أمها نومه لين يخلص شايبك اليوم الثاني .. تجي والشياب متجمعين بمجلس اكثر من 30 شايب كلهم شبه بعض .. ويطلعون عمانك ولازم تجلس معهم .. يرسلك اكبر عمانك للمحطة اللي عند المفرق تجيب له شي .. ويعطيك سيارة ولده لأن مامعك سيارة ابوك سحب المفتاح منك يخاف تدشر بالديرة .. تروح لسيارة ولد عمك الرانج روفر (( ددسن غماره .. التانكي بالغماره لابغيت تعبي بنزين يمد عليك اللّي مع القزاز واللي بيركب عند التانكي لازم يتربع .. المقاعد سست .. حوض مافيه .. الصدام مربوط بسروال ورع .. قمة الرفاهيه)) من القهر تقومها بالريوس .. ماشي طبلونها 50 .. تقص اللفات على سرعتك .. تقعد تلف حول الشجرة خمس لفات تبي تدمرها وترجعها لهم سيكل .. ماشي وداعس كنك برالي حايل .. وتطلع عليك عنز وتلف بسرعه وطربطخ وتقلب و… (نأسف على انقطاع الصورة من المصدر ) ويرجع الأرسال بعد نص ساعة وتلقى نفسك متمدد بسيارة ابوك بالمقعدة اللي ورى ومجبس بالكامل والسيارة ماشيه وفريد الأطرش شغال ( ماقالي وقلت له .. وياعوازل فلفلوا ) وابوك يسوق ويهز راسه طربآآآن وانت مصدوم ومذهول ماهوب من الحادث ولا من ( منهو جابني هنا ) لاآآ .. مصدوم ومذهول من انه ( أبوك طلع طربي موب شعبي ) .. وزي ماقالوا بالأمثال ( سقت به ليلي .. ورجع بي نهاري )

/ / /

_ اكبر احرآآآآآآج يومنك قاعدن مع الضيوف على المفطح وبينهم ضيف تستحي منه حيل وماتدري الا ويدك مع يده بوصلة لحمه وكلن يشدها يمّه وتخجل وتعطيه اللحمه كلها وانت نفسك بتموووت عليها .. اكبر احرآآآآآج يومنك تضيع اهلك بالسوق وتقعد تدور عليهم وتلقى اختك تفرج بالتنورة وتروح وتقضبها بيدها وتقول وينكم ضيعتكم وتلتفت فيك بأستغراب وتطلع ماهيب اختك وتقعد تناظرك من فوق لتحت بعيون موووت يقال مستحقرتك وانت مرتبك وتسوي عمرك تناظر وراك

/ / /

_ وشهو زئبق احمر !! ميمتي عندها وحدتن من هالمكاين السنجر كانت تخيط عليهن شراريبي المخرقه وثيابي الدفّه .. راميتها بالحوش لها سنين .. مكينه مصديه وحالتها حاله جبتها وكسرت ابو جدها آخذها وارميها من فوق السطوح على الحوش اجيها سباحي واردسها اطلع على المركى وقفز من فوق الحبال عليها خليتها فتات حتى الأبرة قمت عليها بسنيناتي راحن من عندي سنين والنـّـاب قام يرقل.. ماشفت والله لازئبق احمر ولا حتى زيت الوالده يقوطر يوم كانت تزيتها مغير المكرات تطلقن يمين ويسار وتدمير لكم صرصور .. وكم شبث شايلن عفشه مهاجر .. واحدن منهم يعرج ويناظر وراه ( الظاهر يسبني )

/ / /

_ يآآآآآزين نومة الليل ويآآآآشين قومة الصبح .. يازين نومة الليل يوم تصكها نومه من بدري والغرفة مظلمة مابها الا نور التلفزيون يشع عليك ونايم على بطنك ورجليك يطلن من تحت الشرشف كلهن شعر .. وماتدري الا يجيك واحدن غثيييث ماهوب وقته يصرخ عليك ويصحيك الصبح للدوام وووووودك تصكه برجلك على جبهته .. وانت ترد عليه بصوت تخنقه عبرة من القهر تقول طــيب خلاآآآآآااص وتقوم وانت تداقس من النوم تفتح عين وتغمض الثانية وتقول في نفسك : يآآآآآشين قومة الصبح

/ / /


تعليقات 83

  1. هههههههههههههههههههههههههههههههههه ههههههههههههههههههههههههههههههههههه ههههههههههههههههههههههههههههههههههههه 🙁

  2. السلام عليكم انا مستغرب بصراحة من تمييزك العنصري بقولك (حضري) حتى في الرسائل فيه تمميز عنصري ؟؟؟؟؟؟؟؟؟

  3. هههههههههههههههههههههههههههههههههههههههههههههههههههههههههههههههههه

  4. اخوي / فك وافك الله يعطيك العافية وصراحة الخفايف جت في وقتها واسعدتنا الله يسعدك,, كلشي ولا الهمليز ههههههههه. تحياتي

  5. اخوي موضوعك فيه عنصريه جباره:~ وانت تبا تفتح مواضيع مالها داعي من الاساس

  6. ماشالله على اسلواب التعبير تتكلم وكنك عايش معنا وسط البيت اثر كلنا عايشين بالهو سوا وعلى طاري الحضري تراني واحد منهم ولا فيه بوسة عصباح ولا ابو كلب اخس من كذا شفنا

  7. ههههههههههههههههههههههههههههه:$ ـآللــه يرج ـك8) أنـت وخفـآيفـك بقـوطي صلصـة طمـآط أم ريـآلين منتهـيه صـلاح ـيته :oB ,, ـآلــزبده ع ـليك خ ـفـآيـف إبـدآآع << متــسدح ضـ ح ــــك .. 😀

  8. بصراحه عدلت مزاجي االا موووووووووووووتني ضحك يعطيك العافيه ههههه

  9. يحلفون إن هالمستخدم يكركر 😀 بس بصراحة, حقت الشاورما بالهمليز (ما يواطنه في عيشته) قدام هالبزارين وتشهويهم, ما يصلح! صدقني يبندقونك بعين أو يصكونك بعين تمشي قطار, والله ما يردك غير الإنعاش ولا بيطلع دم في ساعته 😀 أما حضري ما يقوم الا على بوسات, ترى الحال من بعضه لا تروح بعيد! بس أعجبتني سالفة الكراعين اللي كلها شعر 😀 بالنسبة للاخوان اللي ماخذين السالفة بحساسية زايدة في نظري, لا تظنون في الرجال بالشر, وبعدين جميع السياقات الي أوردها (متعوب عليها صراحة أوردها 😀 ) ما تدل ان فيه اي عنصرية, بل على العكس تماما, مثّل شخصية الحضري انها متألقة والشخصية المقابلة هي المتألمة! فما أرى اية عنصرية في الموضوع, وقبل كذا, الموضوع مار على المشرف قبل الاعتماد والنشر. فالمطلوب أن السالفة تخفيف×تخفيف و وناسة! ودمتم سالمين أمدري بود أو كلّهن!

  10. من جد الله يعطيك العافيه وسعت صدورنا وونستنا الله يسعدك لكن اخوي استمر بالكتابه وبالتوفيق دايم .

  11. رووووووووووووووووووووووووووح ياشيخ الله يسعدك والله انك مبدع لاتحزونا من جديدك والله يعطيك الف الف الف عاااااااااااااااااااااااااااااااافيه

  12. يسعد أيامك ,, من جد خفايف قشطة طايحن عليها ملاعق عسل بصراحة اسمحلي أحييك على أسلوبك الرائع ووصفك الدقيق حسيت إني جالسة أتفرج على فلم كوميدي

  13. :Dههههههههههههههههههه اما البزارين الي تفحط قدامه وهم يذاكرون ههههههههههههه لا تحرمنا من جديدك وتسلم يدك

  14. إلى كاتب الموضوع: – هل تعتقد فعلا أن الحضري عديم الغيرة لدرجة أن تدخل أخته أمام ضيف؟ – هل تعتقد أن الأب الحضري أسلوبه في التربية أفضل من غيره؟ – هل تعتقد أن تسمية شخص ونسبه إلى عرقه عنصرية أو لا؟ – هل فكرت في موضوعك قبل كتابته؟ – إذا كان الحضري الذي تعرفه كما كتبت فانصحه قبل أن تتندر بقصصه

  15. بصراااحه روووعه كأنك تتكلم عن اهل القرية اللي عندنا ياازين عليماتك وترى ياااشباب مافيه عنصرية ولا شي الكلام جدا عااادي والحضري والبدوي كلهم اخواان اذا علق الحضري على البدوي او العكس تررررى عااادي اخوي بجد اسعدتنا بخواطرك الجميله والى الاماااااااااااااااااااام والمزيد من هالعلوم وتحياااتي لك ؟؟؟؟؟؟؟؟؟ الحربي – المدينة ؟؟؟؟؟؟

  16. يا خي الله يعطيك العافية وسعت صدري من الصباح اليوم بعطيه لأخوي الكبير هههههههههههههههههه تسلم موضوع منسم:D:D

  17. ههههههههههههههههههههههه بصراحة بتعب وأنا أرز الهااااااء من كثر ما ضحكت الله يوسعلك صدرك مثل ما وسعته على الخلق إلي قروا أسلوووبك وش أقول عنه غير إنه تووووحفة بس من التحف الغاالية لا يغرك بجد بجد يبيلك برنامج على الأف إم ويكووون بالصبح عشان محد يقول ياااشين قومة الصبح الله يحفظك ويخليلك لأميمتك ويزوجووونك ويفتكون منك فيه كم سالفة ماهي بذاك الزود بس لي بالغااالبية << مالك دااعي

  18. ههههههههههههههههههههههه والله ضحك صح …خاصة حقت الاحراج ..وتمسك أخت غير اختك ….خخخخخخخخخخخخخخ جملة وكان حاذفن القناة الثانية الشايب تدرون ليش …؟؟ يقول فيها وصاخه ……….. هههههههههههههههههههههههههههههههههههههه حلوة أما عن سالفة الخضري صراحة ماعرف شو يقصدون بها بعض المعلقين وماخذينها بحساسية …..؟؟؟؟ وبعدين هيه خفايف

  19. اذا كان هدفك هو اضحاك الأخرين بدون تحري الدقه والمصداقيه فانت مجرد إنسان عابث بعقول الأخرين.. وإذا كانت فكرتك عن الحضران مغلوطه فلتقم بتصحيحها… لأن قمة السخافه هي الإستخفاف بعقول الأخرين وطرح أفكار خظأ.. وغذا أردت ان تبدأ صح فأبدا صح.. وأرجو من إدارة الموقع إلزام المشاركين بتحري الدقه بالطرح ولهم جزيل الشكر

  20. تراء واجد الحضر ولا فيه الكلام الي تقوله بووسه واختك تدخل عند الضيوووف وكلام فآظي يآليت تعدل من اسلوبك في المرات الجايه وتخلي التعصب عنك تحيآتي ..

  21. موضوع رااااااااائع ههههههههههههههههه قسم بالله انك منتب صاحي انا اشهد انا بصراحه اصفق لك اعجاب بأسلوبك الرائع وياليت تكثر منها وانا اخوك ولا يهمك الّي يحاول يقلل من مستوى كتابتك ياخي فيه ناس مع احترامي ماتتقبل المزح وياخذون الأمور بحساسية

  22. بعد إذنك بنقل الموضوع لكن ما راح أقول إنه منك خايف عليك من الإزعاج والعين … B

  23. اذا هذا انطباعك عن الحضر معناته شيء واحد إنك بدوي وما عمرك عاشرت حضري، أو معاشر وعارفهم لك داخلك حقد ضدهم لأي سبب ما في نفسك. خسارة تكتب في قروب أبو نواف

  24. الصراحه موضوعك كان راح يعدل مزاجي لكن بكلمة ((وتدخل عليك اخته بحلا التوفي وتختبط ويطيح منك الفنجال من الخرعه وتتغطى بشماغك تحسبها داخله بالغلط .. واخوها يضحك عليك ويقولك لا عادي )) خرب المزاج ولا يستاهل اكمل الموضوع .. اذا صح انت ما تتكلم عن عنصريه ولا تفرقه وكلنا اخوان .. ما اعتقد انك ترضى توصف اختك بعدم العفه ولا اخوك بعدم الغيره .. ولا تنسى اخي العزيز قبل لا نكون حضر احنا مسلمين اتمنى مواضيعك الجايه تكون فيها غيره على اختك الحضريه

  25. الهملييييييييييييييييييييز هههههههههههههههههههههههههههههههههههههههههههه أما انك تقصد المايونيز؟؟؟؟ هههههههههههههههههههههههههههههههههههههههه والله ما عاد اسميه الا الهمليز

  26. صراحه انا شخصيا منبطحه من الضحك … من جد عشت الجو … الله يوسع صدرك بالعااافيه:D هههههههههههههههههههههههههههههههههههههههههه اما الاشخااص الي مسوين زعلااانين باين من طبيعتهم مايحبون الضحك والوناااسه انا ما اشووف فيه غلط بالعكس.. وان جينا للغلط ترا فيه بعض الردووود مالها داعي:~ لييييش الكئآآآآبه؟؟

  27. والله خليتني اضحك بشكل غير طبيعي هههههههه :$ بالعكس الموضوع مافية عنصرية وهو بالتأكيد فية ناس بدو ، وناس حضر

  28. بصراحه مقالك الاروع والاجمل والامثل انا من الحضر وما زعلت لانو عارف اهلي وعارف اخلاقهم بس كاتب الموضوع يتونس حبتين بعدين حتى البدو مو مثل ما ذكرت وانو سيقانهم جروح وفطريات ههههههههههههه ليه ما زعلو يمكن الاخ على باله يتكلم عن لبنان ولخبط شويه بس والله يا ضحكت ضحك وما زعلت المقصد وناسه وضحك واسلوبك راااااااااائع يرتقي لدرجة الامتياز كل الي زعلو اقولهم روقو وما يصح الا الصحيح وانتم عارفين اخلاقكم وتربيتكم بعدين تبون الجد فيه حضر عادي البنت تكشف والي يخالفني الرأي اقوله روووح اسواق جده وشوف الحضر مو كلهم بس فئه ضاله فيهم واغلبهم اصلهم مو سعودي يعني الي تكشف وتتكل حجازي قالو حضر لا غلط مو كلهم حضر فيه ناس متسعوديين تحياااااااااتي لكم جميعا

  29. هههههههههههههههههههههههه من جد وناااااااااااااااااااسه روقتني وأنا كنت فاصله الأخلاق أما سندويش شاورما ومكثر الهمليز ابداااااااااااااااااع ههههههههههههههههههههههههه وبالنسبه لبعض الردود عن سالفة أخت الحضري فالشغله كلها دعابه وخفايف على اسمها ما يحتاج لكل هالعصبيه والزعل وزي ما انتوا عارفين الدعابات عن البدو كثير وعن الحضر كثير وقي الأخير تبقى دعابات لا غيرا بصراحه واصل ابداعاتك ولا يهمك أحد يكفيك انك ونست ناس كثييييير:D

  30. 😀 😀 😀 اللة يسعدك ياشيخ وربي فاتس ضحك منك لاتحررمنا يابطــل ,, بررب !!!

  31. قسما انك … تحفه :$ بالنسبه للي يتكلموــــــــن عن العنصريه والغيــره ايش الفرق بين البنت لما تدخل على الضيف بالبيت وبين لما تاخذ اختك او مرتك معك السوق وهي كآشفه او داقه اللثمه ؟؟

  32. بكل صراحه ..! كلام فاضي… حشو كلام دون أي فائده تذكر .. الحضري والحضري .. ماني فاهم وش الفكره إلي ماخذها عن الحضر ….معنى إني بدوي. لكن أتمنى تكون ارقى من هـ الأسلوب ..أغلب القراء موب صغار عقول عشان تستخف بعقولهم لهدرجه ..الكلام يطول على ذا الموضوع الهابط .. لكن اتيح لغير مساحه للتعبير ..

  33. حلللووووه بعدين التعليق على الحضري كبرتوها بزياده دائما نسمع نكت عن المحششين او عن الصعايدة او غيرهم, هل القصد منها التجريح؟؟ لا انما هي مجرد نكته وصيغة مبالغه لا تاخذون الامر شخصي انا حضري واخوالي بدو والموضوع دئما بيننا وبينهم تعليقات على بعض بالمبالغات قريب جدا مما ذكر في الموضوع بل واكثر والنفوس على بعض زي العسل عااااادي والهدف الوناسة

  34. يآشيخ آلله يوسع صدرك بالعآفيه ..، :$ بس مستغربه من هآللي قبوآ فيك ! ترى السآلفهـ مآتسوى كل هالحمآس ، الرجآل حب يطلع تحشيشه عندنآ مآهو عيب ولآ حرآم عشآن يجيه كل هالهجوم <– يآخي تعآقد مع مدآفعين اصرف لك هههههههههههه مآ اظن الموضوع يستآهل كل هالتعصب , محآكيتكم حضريهـ ولآ سوت اللي سويتوهـ ! روقوآ بس وخلوآ عنكم الهوآش والتعصب اللي مآلهـ سنع ..,

  35. الله يوسع صدرك يافك على هالخفايف وما عليك من اللي يقول عنصرية وماعنصرية أساسا كلامك مافيه شئ غريب عن الواقع – الا ماشاء الله – غير كذا بيض الله وجهك ورايتك بيضا ومن أساسه لمن الواحد يبي يكتب بهالشكل لابد أنه يجرد الواقع حتى لو كان بسخرية طال عمرك أكتب واحنا متابعين معاك وبانتظار زحفاتك الجاية

  36. والله كتاباتك اسعدتني جدا ومت ضحك رغم اني في حزن وحاله مايعلم بها الا الله الله يسعدك يارب زي ماضحكتني واسلوبك رائع جدا واضح انك funny استمر والله يوفقك اختك

  37. استغفر الله العظيم واتوب إليه استغفر الله العظيم واتوب إليه استغفر الله العظيم واتوب إليه استغفر الله العظيم واتوب إليه

  38. ياخوي وش ها العنصريه حضري مدري ايش وتقول تدخل عليك اخته على فكره الحضر بناتهم محافضات ليش معودينك الحضر بناتهم تدخل على الرجاجيل المهم صحح كلامك ها قال الرسول صلى الله عليه وسلم(لافرق بين عربي ولا اعجمي الى بي التقوى) هذا تعليقي وشكرا

  39. ابكتب تعليقي الثاني اتمنى ان لايكتب مثل هذي الاشياء الهابطه الي مالها اي مصداقيه والتي تحمل عبارات تثير العصبيه

  40. هههههههههههههههههههههه ههههههههههههههههههههههه ياشيخ الله يسعدك وربي إنك تحفه واللي يقول عنصريه وماني عارف إيش بقول له الله يكبر عقلك وش ذا التخلف اللي أنتم عايشين فيها هو عادي كمان ذكر إن الحضر راقين وقام يحش بالبدو وألا يعني تاخذون كلام وكلام الله عاد إركدو خلوا الواحد ينبسط مع فك

  41. الحضري الحضري مقال يعكــــــــــــــر المزاج حسبي الله عليك تذكرني بكلمه البدوي الجاهل بربه اللي يقول يا عيال عمي اجنهدوا بالعمل الصالح علشان تدخلون الجنه لايصير بكره كله الجنه حضران يعني هو ضمن الجنه ولا يخاف ان يقال له من السماء ومن قال انك من اهلها وانك حرمت منها والمقال اللي يقول مافيه شي كاذب كيف يصف الحضر بأنهم كلهم يرضون بتعري نسائهم زي مافي الحضر ناس منعريين برضوا فيه بنات من البدو متعريين والنت يشهد

  42. ياناا فاطسسه من الزحك عليك يازين سسسويليفاتك .. خصوصا اللي سيقانه مشعره وكله فطور وجروح ههههههههههههههههه وشو الهميلز الحين . أخبره مايونيز احلى موضوووووع قريته أحلا ششي

  43. ههههههههههههههههههـ ههههههههههههههـ ههههههههههـ من جد فآطسهـ ضحك يا خفة دمكـ والله .هههههههههههههههه رهيييييييييييبهـ لأبعد وكل وحدهـ احلى من الثآنيهـ .~ بس اشوف ان بعض الاخوان ياخذون الامور بحساسيهـ زايدهـ..ْ~ فك حاطهـ الموضوع من اجل الونآسهـ ..مو اللي نقاش ..~ وليش يقول هيك وليش هيك..الموضوع كلهـ فلهـ × فلهـ و أعتقد القصد وآضح ..~ وسعوآ صدوركمـ..:D~ ثآنكس اخوي فكـ..~ لا تحرمنآ هيك ابدعآت ..~

  44. سلامات وش شايفنا عندك.. ما عندنا غيرة على أهلنا و خواتنا.. يا ليت تحترم نفسك.. أجل حنا ندخل خواتنا عند الرجال و عادي ما فيه مشكله..

  45. جااااااااااااااااااامدة هههههههههههههههههههههه حلوة مرررررررررررة

  46. أولاً يأخوي يعطيك العافيه على الموضوع أنا لي سنوات ادخل على شبكة أبو نواف وأول مره أرد صراحة موضوع يموت من الضحك بالنسبة للشباب اللي تكلموا عن العنصرية صراحة مانشوف في عنصرية ولكن مقارنه بين عالمين مختلفين أما سالفة البنت دخلت عليكم هذي فيها عتب على الكاتب لأن الحضر أخوان وعندهم غيره وشيمه ونخوة فغريب منك ذكر مثل هذا الكلام رغم أنني متأكد أنك مو مأخذ صورة عن الحضر بهذه الطريقة ولكن مجرد (خطة قلم)

  47. ههههههههههههههههه:$ فـــــــــــلـــــــــــــه منقطعة النظير……… بعدين وش فيكم أكلتوا الرجال صح الكلمة جت غــلــط بس أكيـــد مو قصدهـ اللي قلتوه المقصد كوميدي واضح… وفي النهاية والنعــــــم في كل شعـــــب الســـــعـــوديـــــة بحضرهــــــــا وبدوهــــــــا:D

  48. بسم الله الرحمن الرحيم اول شي اححب ابين وجهه نظري بالموضوع اناا او لمااقريته جلست اضحك علماً باني بدويه ولي الفخر ..~ فالاخ فك وافك يمتلك اسلوب فكااهيي جدا راقي اهنيئه عليه *_^ نجي لنااحيه الحضر : لي عندكم كم سوال 1/ يزعلكم انكم تقعدوون ع كنب ؟! تعتبرونه سبه !!! 2/ يزعلك انك تكون مرتب وجنتل ؟!! /3يزعلك انك مرتب وكاشخ وتشرب بذوق ؟!! 4/ يضايقك ان بالغ شوي بالوصف من اجل الفكاهه فقط ان مااتقووم الصبح الا من بوسه من ابوكـ ؟!! << لك الشرف طبعاً .. ^^ كل هذي المحااسن ماالتفتوا لهاا !! مالتفتوا الا الى الخت اللي تدخل وتقدم الحلى ؟!! وهو ماايقصد الجميع البغض من الحضر وماانختلف ع كذا لعلمنا جميعاا بتعصّب البدوي الشديد لدرجه انه مُثل بالمسلسلات .. نجي للبدو : ذم البدو بـ ( رجوله مفطره ومليانه شعر ) ووضحهم وكانهم ضميانين في شربهم للقهوه !! لم يعترض البدو و اناا منهم مع علمي الشديد ان ليس الجميع مع العلم انما الطرفه لاتاتي ولاتحلو الا بصيغه المبالغه وهذا ماافعله اخونا فك وافك .. وانا بدويه ولم اعترض بوصفع لناا باننا غير منمقين !! ليس بعدم اعتزازي ببدويتي لا والف لا بل لعلمي بهدف اخوي فك الغرض منه الفكاهه .. ختـــامـأً ..~ الكل فيه الزين والشين بدو والا حضر ..~ قال الرسول صلى الله عليه وسلم ( لافرق بين عربي ولا اعجمي الا بالتقوى ) والنعم بالجمـــــــيع حضر كاانوا والا بدوو .. فمن كــأن لديه اعتراض فليكن باسلوب رااقي ليتقبله الكـآتب .. اسففففففففي الشديد ع الاطاله .. اختكم .. ~ الخ ـــيآلهـ .. (

  49. السلام عليكم ورحمة الله وبركاته انا مانيب عارف ليش فيه ناس يأخذون الأمور بحساسية زايده ومانيب عارف وش فهمه لكلمة الحضري .. اخواني انا اللي اعرفه واللي نقوله حضري هو من يكون اصله غير مصري او سوري او … ومآخذ الجنسية السعودية هذا اللي اقصده بكلمة حضري وآسف اذا كان فيه احد زعل او يفكر اني اقصده جزاكم الله خير

  50. كلامك صحيح .. واصل ابداعاتك .. و هاللي معهم حساسية .. يحطون كريم على هالحساسية بلكن تروح ..

  51. ههههههههههههههههههههههههههههههههههههه يسلموووووووووووووووووووو بجد دمك عسسسسسسسسسسسسسسسسل

  52. الله يسعدك على هل الموضوع قصص واقعيه ولا احد يقدر ينكرها حتى لو كانت خفايف ولأجل الضحك :$ :$ :$ :$ :$ :$ :$ :$ :$ :$ :$

  53. الي تبغانا نفهمه أو الي أنا فهمته أو ال انت بترمي اليه ..B ان سيقانك فيها شــــعـــر :$

  54. السلام عليكم ورحمة الله وبركاته…. يعطيك العافية ……. :$ضحكنا :$وستنسنا 🙂 على سواليفك المزاجية ……. :D:D:Dابتسم ولا تأخذ الموضوع من الناحية العنصرية :D:D:D ومشكووووووووووووووووووووووووووووووووووووووووووووور

  55. الى صاحب الموضوع اتمنى انك تكتفي عن الكتابه بهذا الاسلوب العقيم وبخصوص الحضري والكلام الفاضي الي جالس تقوله

  56. نفسي اتعرف عليك…..الله يرجك هههههههه رسلتها لواحد اعرفو بالحي جلسنا نعلق عليه زاعلني حسبي الله عليك ههههههه وربي عدلت المزاج

  57. هل يعقل أن كاتب الموضوع لم يدري إلى الآن في ماذا أخطأ ؟ تلميح للمساعدة فيما أخطأ ويدعي أن الناس يأخذون الأمور بحساسية زايده وتدخل عليك اخته بحلا التوفي وتختبط ويطيح منك الفنجال من الخرعه وتتغطى بشماغك تحسبها داخله بالغلط .. واخوها يضحك عليك ويقولك لا عادي هذي اختي ليندااااا هل ترضى أن تكتب هذه العبارة عن أختك المسلمة أو عرض أخوك المسلم ؟

  58. ههههههههههه والله مزاجي من جد تعدل وبعدين وش عندهم هذول الي مسوين ان الكلمة زعلتهم هو صادق الرجال قال انا اقصد السوري والمصري واللبناني الي قاعدين عندنا هنا ومعاهم الجنسيات هذول هم الحضر وغصبن عن الي قاعدين يصايحون ان المصاريه والسورين وغيرهم من الأجانب المتجنسين طبعهم كذا واخواتهم يدخلون على الضيوف فيه احد ينكر ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ استمر بكتابتك وماعليك وانا اخوك

  59. ياخوي انا احضري .. وعندما تقول احظري تدخل اخته عليك !! فأنت تقصد اختي واخت اي حظري موجود على هالكوكب .. وانت تكتب بقروب محترم فياليت تراعي الشي هذا .. اكتب وانا ماسك اعصابي لان اسلوبك رغم متعته قتلته بعنصريك وكأن فقط البدو من لهم غيره .. ترى حتى الأجانب يغارون على حريمهم .. فياليت تحترم كل الثقافات الموجوده .. ولاتعتقد ان اسلوبك بالعيش انها هي الطريقة المثلى

  60. ههههههههههههههههههاااي هههههههههههههههاااااي والله تعدل المزاج ولا كذبت ورأيي الموضوع رائع وماعمري شفت مثل اسلوبك في التنكيت هههه صراحه اسلوبك سبيشل وماشوف الموضوع فيه شيء يزعل

  61. مرحبا اخوي فك وما تفك ما ادري شو سر هذا الاسم المهم موضوعك جدا خفيف وجميل واجمل ما فيه اللهجه الي كاتب بيها مشكووووووور ولا تحرمنا من خفايفك

  62. والله ماعرف يعلق الا رامي صدق كلامه اللي مهوب كذا ليش يزعل الرجال يمززززززززح خلنا نستانس ونضحك ياحبكم للمشاكل عنصريه وخرابيط :~

  63. اي والله الّي مو عاجبه شيء من الموضوع يضرب راسه بالجدار ايش عنصريه وخرابيط الكاتب يمزح وماقال الا الصحيح وبعدين من قال مافيه هالشيء الا فيه ونص وعندنا حضر بالحجاز كثير يسوون كذا

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

خفايف تعدل مزاجك !

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول