السلام عليكم
اخواني وخواتي بقروب أبو نواف
الله يوفقكم ان شالله بدراستكم وهالله هالله بالنتايج اللي ترفع الراااس
وانا بصراحه من الحين اقول لكم اللي بيقرا موضوعي ذا بيسقط يعني اللي عنده دراسه يفااردز ماني ناقصه دعاوي
مقدمه
طيب الحين يومن احد يقول لكم ( ثانويه عامه )
ماهو الشعور اللي يظهر بخشتك ايها القارئ الكريه قصدي الكريم عندما تسمع ( ثانويه عامه ) ؟؟
هل هو شعور الحب ؟ وتنتابك مثل حاله ناصر القصبي يوم مثل انه سعيدان وحب اخت خويه السوري ؟
يومنه يقول : احس بشي كذا ثمين يغدي مثل خوينا ذا ؟ >>>
ام هو شعور المغص الكلوي والقولوني والقلبي وبنقول الله يرحمك انتم السابقون ونحنو اللاحقون لاتخاف برسل السواق يقرا على قبرك الفاتح كل يوم جمعه
قسمن بالله كل هالمقدمه عشان اقول لكم (( اني احمد ربييييييي واشكره واني ماراح انسى فضله علي ونعمته باني نجحت وافتكيت من هذي المرحله ))
ياهو عذاب هههههه تخيلوا وحده مرفهه بهالمدارس الخاصه دااجه اشي حفلات واشي رحلاات ويدلعوننا ويكرموننا على الفاظي والمليااان لو وش نسوي يسامحوننا وينصحوننا ويهدوننا الى طريق الحق والصواب ماعندهم شي اسمه انتي كسلانه مافيه ليه ماحليتي الواجب ؟؟ وربي وربي اني كنت احيانا ما ابي اداوم بدري مثلي مثل هالخلق تدرون وش كنت اسوي ؟
كنت اخذ دش الصباح الباكري وبعدين اعطي اميّتي وأبيّي قوبله الصباح << الله من الصدز
وبعدين كنت اقعد عالنت عاد وقتها كنت مسجله بمنتدى شعر مايميدكم علي وانا هيفاؤووه الشاعره اقول لكم وش كان اسمي ؟ لا استحي اخاف تزاعلوني انا اصلا ماهبلني الا انتم
وبعديين اتذكر ان عندي مدرسه وكنت اروح الساعه تسعه الا ربع تسعه وانا عند باب المدرسه
وشنطتي ياعزتي لهااااا اذكر ان كان فيه اختراع اسمه شنطه لازم نشريها غاليه وطقم مقلمتها ومحفظة فلوسها والنوته والدوسييه << الله واكبر من يوم ماشريته ماعرفت وشوله يستخدمونه ! والدوسييييه موب نوع من انواع الكابتشينو تراه شين ينحط فيه الاوراق المهمه تساني مانيب واهمه ولو على كيفي طقمت مع شنطتي المطااره
واذكر اني من يوم ماعرفت نفسي احب شنط كيبلنج ياكرهني له هو القرد اللي معه
______________________
ومالكم بطوالة الحتسي نرجع للشنطه هالشنطه هذي كنا نحط فيها الكتبو المدرسيه والتفاتر قصدي الدفاتر
وهذي الشنطه ماتقرب لي
اول ما اطلع من المدرسه ارميها بالشارع همين يجي السواق ويحطها بالسياره وماني من النوع اللي احب يجون معي شغالات لانهن فتينياات و ترى هالحركه مالها داعي
عاد سواقنا القديم مسيكييين كانت شنطتي بااك على الظهر ومره مدري وش صار بالشنطه و لبسها على ظهره وانا اللي اقول له فك الشنطاااه << الله من غلاتها ولا ادري وش فيها
وقبل لا أركب السياره بالصبح تاخذ الشغاله الشنطه وتعطيها السواق عشان يحطها بالسياره وهكذا دواليك واللي معه دوالي لايقرا موضوعي << مدري وش دخل هذا بهذا بس احس ان دواليك ودوالي طقم ولايقين على بعض
حتى اني مره بالحصه الثانيه تذكرت ان الشنطه بالسياره ياتفشلت من مديرتنا ومب لاني نسيت الشنطه بس لا انها قالت لي وينك من الحصه الاولى مافقديتها ؟ عاد كانت تعرف امي
الحين ركز معي ياتنبل انت واياه هذا الوصف قبل ثالث ثانوي << لاحظوا ما قالت شي للبنات ايه لان الموضوع يتكلم عن فضايح مدارس البنات موب مدارس العيال
______________________________
الحصــــــص :
اما حصصنا ياربي كانت احلى حصص عمري شفتها بحياتي كللل البنات هم نفسهم من يوم اني بالروضه كنا بحصه الجغرافيا ( ابله ثريا ) ياكنا نهبل فيهااا
كنا ناكل ام ان امز ( يامال الحريمه ) يوم اتذكر هالسالفه ودي اصيح من الفشيله
وانا مكاني ورا عاد انواع السواالف واللي قدامنا بشوي وحده تطلع من شنطتها شباصات عشان
تلبسها اللي جنبها يصيرون طقم والي قدام شوي انوااع السوالف
همين قالت وحده : ( ابله بروح الحمام ) وتغمز للثانيه يعني اذا طلعت اطلعي وراي
ثمين قالت: ( استاذه ممكن اروح اشرب مويه ؟ )
ثمين انتبهت لهم ثالثه وقالت : ابي اروح الحمام <<<< تقل بزارين الحمد لله والشكر
وتنهبل ثريا وتشرح عن الاسطرلاب وربي اذكره ذاك الدرس وش دخل جد البنات بالاسطرلاب ؟؟
ثمين تجي ابله ( عتريسه ) وعاد هذي بتسوي علينا نجسه قالت طلعوا الاوراق ودخلوا الكتب بالشنطه !! امتحان مفاجئ دوبني اختبرت الفصل ( ب )
تحسبوننا قلنا لها : أجلييه تكفين ؟؟ هالحستي مايمشي عندنااا
يجونك البنات ويرسلون مسجات للبنات بالفصل الثاني وش الاسئله حقت الرياضيات اللي قبل شوي ؟
وش اخلي وش ابقي عمري بحياااتي مالعبت بكثر مالعبنا بسنين الدراسه
______________________________
المواجهـــــــه
واخيرا انتقلنا للصف الثالث ثانوي وكانت الطامه !!
عرفنا ان الله حق وكللل الناااااس كانت تقول جمله لو اقولها الان لكم وربي بتطقني البكوه
كان كال اللي حووولي يقول لي (( شدي حيلك نبيك تجيبين نسبه ))
ويتبدل الحااااال 180 درجه بدينا نكتب بالدفاتر ونسوي ملخصااات وجت الامتحانات الشهريه !!
وكل ما اختبرنا اختبار تجي المديره ثاني يوم : وش هالعلامات ؟؟
وتعطيني هاك المحاااضره اللي يحبها قلوبكم كأننا بنموت بكره اذا ماجبنا نسبه
ونعيد الامتحان مره واثنين وثلاثه واربعه ( لعنبوا ابليسهم المدارس الخاصه موقعين على قرار رسمي بمنع اعاده الاختبارات )
احووول وش هالبلشه وبدت كل وحده فينا تبتعد عن الثانيه ماعدنا زي اول صار فيه غيره ابله فلانه تعامل علانه عشانها تكفلت بالنشاط العلاني والابله الفلانيه مستقصده ماتنجح البنت العلانيه وبدت النزاعات كنا تقريبا متربين مع بعضنا كأننا خوات والحين النزاعات على نص وربع درجه
وانا من حظي التعيس ان صديقاتي ولا وحده منهم تحب الثانيه وانا مانيب فاظيه لهم ولدلعهم صرت مشتته << الله يرحم ايام الدجه
______________________________
نتائج الغيــــرة والحقد :
وتجي وحده ترسل على القروب بس موب قروب ابو نواف
وتنزل اسماءنا مع نبذه عن شخصية كل وحده ووش سوت خلال العام مع اسم المدرسه وصارت شوشره كبيييره بالمدرسه حول هالموضوع وكل وحده صارت شاكه بالثانيه
والبنت ماعرفتها انا الا لما تخرجت الله يسامحها اتمنى انها تجي يوم وتعترف بس عشان ابين لها ان حنا عارفينها من اول وان حنا اطيب منها ومسامحينها
وبرغم كل هالمشاكل كنا نتمشى بالساحات مع بعض ( من براده الوجه ) بس اغلب الوقت ساكتييين وطفشانين
وبسسس ودنا نتخرج من الثانوي واربع وعشرين ساعه نفكر بحفل التخرج
______________________________
حقيقه المدارس الخــــــــاصه ( وانكشف القناع ) :
وتجي اختبارات نص الترم ولو تشوفون البناااات بأول يوم امتحان انواع التصرع
وانواع الحوسه وقبل لاتدخل الوحده الامتحان يمديها خاتمه المصحف قبل لاتدخل
المشكله ياناس انه خوف على قله سنع
انا اعرف اللي يخاف يذاكر حنا خوف من غير مذاكره كانت حالتنا مستعصيه بصراحه
وكلنا معتمدين ان الترم الاول ظامنين الدرجات كامله وقبل لايعلنون النتايج تتسرب الدرجااات !
ثمين تجي ام كل بنت تتصل على المديره : ( انا سمعت ان بنتي خذت بالفيزياء 27 من 30 ان ماعطيتوها الدرجه الكامله شيك التبرع اللي ابوها يرسله كل سنه بتستغنون عنه )
وتتصل اخرى : الحييين مدرسه خااصه وبنتي ماخذه 20 بالرياضيات ؟ كان دخلنها حكومي وقلنا بلاش غربله من اولها )
وتتصل وليه امر طالبه اخرى : اقوووول على ميين تلعبون انتم ؟؟ اجل فلاانه مكلمتكم ورفعتوا درجات بنتها وانا بنيتي المسيكينه ماينوبها شين ؟ ) <<< امحق اولياء امور
اما الابلات المصريات اللي كانوا يصححون اوراق الامتحانات اللــــــــــــه يعينهم
كانت الوحده تخلق الدرجه من تحت طقاطيق الارض
اما طريقه حلنا للاسئله فكانت كالتالي :
الصح والخطأ: >>>> نحط صح ونحط خطأ وهي تختار
الاختياري : >>>>>>> نختار كلل شي
ومافيه عندنا عرفي ياويلها تحط هالسؤال عندنا شي اسمه ( اذكري المصطلح العلمي ) نحفظ اول كلمه بالتعريف همين نعرفه
ومع هذا كانت درجاتنا مثل خششنا
ويأتي يوم النتايج الكل نسبته ( 100 – 3/4 99 – ….. 95 )
سبحان الله !! فجأه صرنا دوافير
______________________________
تم السيطره برعايه الرئاسه العامه لتعليم البنات :
ولكن يافرحه ماتمت كل هالوناسه راحت بالترم الثااااني يالله الحين بدا الجد ! نذاكر الكتاب من الجلده للجلده الاسئله من الرئاسه مافيه لعب
واذكر اني ورثت من خالتي اللي سابقتني بسنتين نماذج لاسئله الرئاسه من عام 1398 بكللل المواد وهي خالتي هذي موصيه عليها وحده من الطايف كمان كانت وارثتها من وحده تقربلها
ومره ابوي جاي من الشركه يناديني : هيفاؤووه تعالي شوفي وش جبت لك
انا : وش ؟
جايبن معاه كرتوووون وش كبره فيه ملخصات ونفس الاسئله اللي ورثتها من خالتي وفيه اشياء زياادة كانت لبنت واحد بالشركه مصري
ابوي : انا قايلن له من السنه اللي فاتت ان نجحت بنتك خلها تجيب كل اغراضها
انا : يايبه حرام عليك روعتني الحين ابي اقول لك شي شايف الكرتون الكبيير هذا شلون بدخله براسي ؟؟؟
ابوي : والله يومني كنت كبرك كنا نذاكر ماعندنا وقت للعب …. )) الخ وانتي البنت الكبيره ولازم انتس ترفعين راسنا
هيفاؤووه : ياويل قلللبي انواع التحطيم لو يدري بس انه مابراسي غير هواااا
______________________________
مدرسين خصوصي :
وجابوا لي مدرسين بكل المواد ويالله عاد حلووها مافيه وقت احك راسي
جابوا لي استاذ رياضيات اللي يدرس بنفس مدرستنا البنين يقولون شاااطر اول مانظايفه قهوه وشاهي يقول : تسدؤوا بالله ؟ ( تصدقون بالله ) ان بانجلترا بيحطوا بسكويت مع الشااي
همين يرد عليه عمي : استاذ حنا هنيا بالسعوديه
ايه صدز كان عندي اساتذه بس ما اكشف وجهي اقعد متلثمه ولا كنت اقعد لحالي معهم كنت اقعد مع محارمي
ويوم الاحد والاثنين بعد صلاه المغرب : استاذ الفيزياء ياساتر عليه هو وبدلته الرصاصيه كان حمقيييييي دارس فيزياء وعلم النفس يقووله مدري عنوووه
يعطيني واجبات وانا يالله واجبات المدرسه
واتفقت مع عمي من ورا ابوي عشان يقوله مابي واجبات
وقال له : لا تعطيها واجبات يخرب بيتك هبلت بها
همين قال : حاضر ياباشا
ويوم الخميس الصبح وربي يقوموني الصبح الساعه 9 والاثنين العصر : ابله الكيمياء هذي اكوس وحده بالعالم تدرس كيمياء وتتلكم بالسياسه وكنت الاقي كلللل البنات عندها
ومره اتصل علي ابوي وقال: بمر اخذك دامني بالطريق خلصتي؟
قلت: ايه خلصت وسكرت وانا مبتسمه مستانسه اني بروح من عندها
وقامت تخزززززززني بعيونها وتقول : بتضحكي ليييه ؟؟
قلت : ههههههه عادي اضحك
قالت : الجوال بتاعك بيطلع نور كتير انتي عماله تصوريني من الصبح ؟ ( جوالي سامسونج T100 وربي بريييء )
قلت : ياويلي لا طبعا هو كذا يطلع نور حتى شوفيه قلت بقلبي ( من زين ذي الكشره عشان اصورتس يالله بس مرشحه وخشتس تصبصب لوعتي تسبدي )
قالت : امال بتدحكي ليه بباكي بيعاكسك ؟ << وفهمتها غللط عندهم يعاكسك موب زينا يعني يطش الرقم وكذا يعاكسك يعني يمزح معك
وفيه مدرسين ثانين بس مانيب طايقه اذكر احد الواحد ماصدق يفتك
______________________________
وتجي الامتحانات النهائيــــــــــــــــه
وخلاص بكره علي رياضيات ودوب الاستاذ طالع ويقول لي : اذا جيتي من الاختبار اتصلي قولي لي كيف امتحانك
قلت له : والله شوف اذا ماحليت مانيب متصله << ماعندي لعب
وهو بكل امانه كان مشالله عليه شااطر وربي خلاني اذاكر كل كبيره وصغيره وحفظني كل النظريات وكل قوانين التفاضل والتكامل
واهلي سبحان الله فجأه صاروا يهتمون فيني <<< الله يالجحده
امي تقول لي :هيفاؤووه وش تبين تتعشين
ابوي : نامي بدري يابابا عشان تحلين زين
اما خواني : مستحيين مني ومايدرون وش يقولون لي وحالتهم حاله
شكيت ان بكره عرسي موب اختبار ثانويه عامه
وفي قاعه الامتحان : وش هالاسئله احووووول وش هالتحوير بالسئله ؟ اول عشر دقايق اسمع احد يناشق بالقاعه
التفت على الجنبي واثاريها تبتسي وانا اللي يدي على قلبي
وشوي البنات تفاعلوا معها صارت نص القاعه تبسي بس انا شجاعه كنت اسكتهم منا واغش منا محد داري لي
وشوي ولا بنت اندمجت مع الصياااح قالت لهم: طلعوووني باستفرغ
ولا الموجهه صارت خشتها تسذا >>>>> ومن زود النذاله قالت ممنوع تطلعين يمكن تغشين بنجيب لتس كيس واستفرغي فيه على راحتس
والله وجابوا لها كيس وووووووو $%&$%^#$%@#$% << بعذرها من القرف اللي شافته كانت ناويه تدخل طب اسنان بس عقب الامتحان ماهقيت
وبعد ماطلعنا من الامتحان سمعنا ان اسئله الرياضيات كانت متسربه بالنت
وقلنا خلنا ندخل على النت ونطلع امتحان بكره ومثل ماوصلتني الانباء منتدى حق حساويين فيه وحده تسرب الاسئله
وفي تمام الساعه4 صباحا شبكت النت وسجلت بالمنتدى هذاك واذا بالصاااااعقه وصلت اسئله الانجليزي خشتي لاتسعني من السعااده ولا عمرها صارت بالسعوديه
والله وانواع الاتصالات عشان ننشرها
وصرنا اخر الليل بعد المذاكره نشبك هالنت بس كانت المجالس مانعه تنحط الاسئله فيها عشان مايسكرونها زي المنتديات الثانيه
وفيه منتدى نزل اسئله الكيمياء غلط
وانا شاكه انها غلط ورديت على اللي منزل الموضوع وقلت له: يابو الشباب متأكد ولا لأ عشان ماتورطنا
رد علي واحد وقال : يستغفلون فتياات في عمر الزهووور ويتركن دراستهن لمقابله النت والبحث عن اسئله سيسألون عنها يوم الحساب هؤلاء الساذجات المسكينااات … واستتري يافتاه انتي عوره << يؤ هذا بالسوق
رديت عليه وقلت له : اقول مانيب فاظيتن لك انت الثاني بعد الامتحانات اوريك الشغل << بس وربي فشلني هو صادز كنا نضيع الوقت
والحاله النفسيه كانت بفترة هالامتحانات صفرررر كان مافيه وقت للنوم الله يرحم ايام ماكنت اسحبها 12 ساعه نومه كنت عشان ارتاح شوي تخبرون الواحد قبل لاينام يفكر بعدين ينام
كان عقلي يقول لي : لاتتميلحين واجد ترا مايميدتس انخمدي بسرعه عشان تصحين وتذاكرين
وقدر الله ان انتهت الامتحانات وكل من طلعت للساحه قامت تصارخ واذكر اني طالعت بوجه وحده من صديقاتي وانهبلت
قلت لها : متى طلع بتس كل هالنفر ؟
قالت: لهاردجه ماطالعتي بوجهي من اول الترم ؟؟
قلت لها : اعذريني ياوخيتي ما كنت فاظيتن لتس
______________________________
النتايـــــــج :
وجت النتايج الله لايعودها من نتايج وييين النسبه حقت الترم الاول ؟؟؟؟
بس الحد لله على كل حال لكل مجتهدٍ نصيب مثل مايقولون والواحد موب زين يصير مشفوح على الدراسه
وكانوا عمامي يقولون: لو عرفنا ان هذي نسبتس كان ماقمنا بالعصاري نجلس معتس انتي واساتذتس
واللي يقول : ياحسافه كل يوم خميس ماكنت انامه زين الا وذا الجنيه طابه ودني للمدرسه
وكلهم كانوا يتوقعون اني بجيب 99% على الدراسه اللي كنت ادرسها بس ماسكتت لهم قلت لهم شوفوا : لاتشرهون علي انتم السبب مورثين لي عرق التفهي وتتشرهون علي
_________________________________
النــــهايــــه :
اتمنى التوفيق لجميع اللي بالثانويه العامه والله معاهم
وان القصه هذي ميب شرط تكون صدزيه بس هذا واقع أغلب مدارسنا الخاصه للأسف
والطالب اللي موب مؤهل من بدايه مشواره التعليمي ماراح ينجح بالنهايه شدوا على عيالكم من الحين لا تبلشون فيهم اذا كبروا
واعذرونا على الاطاااله ياحبني لي كلامي واجد
وتحياتي للجميع
ودمتم سالميـــــــــــــن
اختكم / هيفاؤووه
رسائل المجموعة
