تصوير ، المكتفي من خلف العدسة


يسعد أوقاتكم بكل خير
مبارك عليكم الشهر<<< بدري
وأخيراً إستحيت على وجهي.. وصار عندي ذمه وضمير
وقررت أرتب موضوع .. وأرسله لقروبنا العزيز
وعلشان إنه أول موضوع لي بالقروب…
ما يحتاج أكتب مقدمه… لأني.. فعلاً توني أعرف فإنها صعبه بقوه

المهم .. موضوعي
طبعاً ما أخفيكم .. إني من محبين الجرافيكس..
وبرامج التصميم .. وكل ما يخص التصميم والمونتاج…
ومن شقفي وحبي .. لكل صوره فيها إبداع سواء تصميم .. أو تصوير فوتوغرافي..
حبيت أدخل مجال التصوير الفوتوغرافي.. وفعلاً مجال واسع وخيالي .. وفينظري من أروع المجالات
لأن يعتمد على أفكار .. وذوق .. وإبداع المصور… وطبعاً هو ما يخفى علينا..
إن المصور المبدع.. هو إللي يصنع جمال اللقطة .. في الدرجة الإولى..

عموماً .. مالكم بالطويلة والهرج الفاضي…
في الفترة الأخيرة إشتريت كاميرا … جيده نوعاً ما…
قلت أتعلم التصوير… وأساسياته..<<< ركزوا أتعلم

نوع الكاميرا…
canon
PowerShot A630

وبعدها بإذن الله إذا الله وفق…وتوفرت السيوله المناسبة
.. إشتريت كاميرا إحترافية .. وأتمنى إني أمتلكها .. وهي
canon 400D
أو
canon 450D

ألحين أترككم .. تستمتعون بالصور… من بدايتي بالتصوير
إلى آخر لقطة إلتقطتها…
وأتمنى تحوز على رضاكم وإعجابكم
وإللي تعجبه أي صوره حلال عليه…
ويمكن تنفع بعض المصممين .. إللي لهم خبره…


أول ما إشتريت الكاميرا على طول اليوم الثاني سافرت..
وإخترت لكم 3 لقطات


ومن حبي لتصوير الماكرو إخترت لكم هذي اللقطات..
طبعاً تصوير الماكرو .. هو التصوير الدقيق.. أو التركيز على تفاصيل الصورة الدقيقة
وإخترت لكم 3 صور


والصورة الثانية… سالفتها .. سالفة .. هذي النملة
ساعتين علشان اصورها.. بنت الكلب .. تتغلى علي..
تقولي لاتصورني أخاف تنشرني بلوتوث
بس صورتها .. صورتها وهي حاطه رجلها تبي تدخل بيتها


الصورة الثالثة
قطرة ماء… بس أحسها ما طلعت واضحه


تجربتي للتصوير التجريدي
وهو إحدى أنواع التصوير
إخترت لكم 3 صور


تجربتي .. للتصوير الإعلانية ..
ما كانت موفقه… إخرت لكم هذي الصورتين
لعطري المفضل


صور منوعة
إخترت لكم 6 صور


هذي لقطة طريفة
كنت طالع رحله للهافمون
وإلتقطت هذي اللقطة
إللي محيرني فيها… ليه هذي العجوز مجلسينها على الساحل.. ومعطينها سناره صيد…
يعني بتصيد حوت مثلاً…ههههههه
مسكينه.. شكلهم مصرفينها… أزعجتهم…
لالا… وعلبة بيبسي جنبها..يعني صيدي وإشربي .. ولا تزعجينا…
هههههههههههههه…. قسم بالله أراقبها.. ما قامت إلا بعد المغرب…
طبعاً مع كم هائل من صيد الحيتان والضفادع...ههههه
أحسها تناظرني بنص عين.. تقول في خاطرها… وش يبي ذا..هههه


تجربتي مع تصوير البرتريه..
من أصعب أنواع التصوير في نظري
إخترت لكم 6 صور

وإللي إني لاعب فيهم لعب .. بزارينا
وهذي لقطة للكتكوت
أموت على الجلسه أنا.. إماراتي صغنون
وااا.. فديته بس

بحلوس عليكم

تجربتي في تصوير تصوير السيلويت

طبعاً هذي آخر صورة إلتقطتها..
طلعت بشكل مناسب نوعاً ما … ولكن الإضاءة شوي… أتعبتني..
كنت أتمنى إضاءة السوفت بوكس تكون سداسية.. أوخماسية
علشان تطلع الإضاءة في عدسة العين دائرية .. أحلى من إنها مربعات
ولو تلاحظون شوي العين إللي على اليسار .. فيها ظل كثير…
عموماً طلعت بنتيجة مقبولة نوعاً ما..
وعلى فكرة الصورة .. مع شوية فوتوشوب… خفيف جداً…

في النهاية أتمنى إن الصور تكون حازت على إعجابكم..
وأتقبل نقدكم على أي صوره.. ولا سيما إعجابكم بأي صوره..
قد ألفتت إنتباهكم…

وترقبوني في الجزء الثاني من…
المكتفي من خلف العدسة
أجمل تحية ود… وتقدير للجميع


تعليقات 45

  1. متأكد انك انت اللي مصورها كلها بس على العموم صور ابداع وأتمنى لك النجاح شكلك بتكون مصور او صحفي

  2. مشاء الله تبارك الله مبدع صراحتا B لحد الخيال واتمنى لك مستقبل في التصوير بس الصوره رقم 8 و 13 و 16 و 23 ابدااااااااااااااااااااااااااااااااااع والله يوفقك وقداااااااااااااام يا فنااااااااااااان

  3. السلام عليكم ورحمة الله وبركاته… كيف الحال ؟ أخوي بالنسبة لقطرة الموية تقول مهي واظحة اكتشفت انا ليه مو واظحة عشان سقفكم أسود و كذالك واظحة اللمبة

  4. اقووووووووووووووووول مشالله عليك انت من بكره تشتري كاميرا احترافيه والله مشالله مشالله صورك قمة في الابداااااااااااااااااااااااااااااع اهنيك من كل قلبي

  5. يعطيكم العافيـــة يالغاليين.. ردو تشرح الصدر.. ( إخوي عبدالله السيد ) تصدق إنك شككتني بنفسي..هههههه.. إي انا مصورها كلها يالغالي.. وإذا تشك بصورة من تصوير غيري… إطرحها هنا..

  6. صور الماكرو كلها جميلة جدا اختيار موفق لهذا النوع من التصوير الليي يظهر الجماليات الدقيقة للاشياء ما تنشاف بالظروف العادية B

  7. 😀 والله أبدعت وأحسك مجتهد وبإذن الله لك مستقبل باهر في التصوير …الله يوفقك:$

  8. أقول تراكم طيرتوا هالمسكين في العجة يا أخي أرس لك على بر يعني اختر التصميم وإلا المونتاج وإلا التصوير وووو وترى كل وحده يدخل فيها أنواع ،،وترى الدعوى ماهي سلق بيض وأنا أخوك (أخاف بكرا تحط لك موقع المصور الفوتغرافي) أركد وش تبغى من الأنواع اللي ذكرت لك وأيهم تبدع فيه واللي بتستمرررررررررررررررررر فيه ،،، مو بس يالله صورتين وأنا من أنا ،، وتصميمن وأنا من أنا ،، ومونتاح وأنا من أنا ،،،مشكلتكم مشكلة أنكم تبحثون عن الشهرة في أي شئ حتى لو لم يكن هو الموافق لميولك ،، أعرف ككم شخص نفس طريقتكم أنت وإياه ،، وفي الأخير ولا شييييييييييي.يعني أعرف ايش تبغى بالضبط من التصوير أو التصميم أو المونتاج واترك البربرة عنك لأن مو كل من صار عنده فوتوشوب أو بريمرير أو كاميرا صار فنان وإلا محترف ،،وسامحني على الصراحة بس حبيت أصحيك من اللي أنت فيه لا تروح وتخسر خسائر مالها أول ولا تالي وبعدين تندم .وعلى فكرة الصور اللي فوق ما فيها ولا وحده تستحق العرض ،،ولاتستعجل على الشهرة بالحييييييل ترى لها ضريبتها،، زالأصل إن الواحد يتعلم ويتعلم لحد ما يصبح له باع طويل في هالمحال وبعدين يبدأ يعرض نفسه على النااااااااااااس . وربي يوفقك

  9. وفقك الله وفقك الله وفقك الله يا أخي الكريم إن كنت قد وافقت أخي الصريح في تحديد ماذا تريد وتنميته والتوسع فيه،، لكني أختلف معه كليا في الأشياء الأخرى !!! أنا لا أرى مانعًا من التعمق في شيء ومعرفة أساسيات الأشياء الأخرى… ونصيحتي الأخرى … امض فيما تراه مناسبا لك ولا تأخذ ما يقوله المثبطين على محمل الجد … ولكن تريث قليلا فقط هذا هو المطلوب منك……. وإن كنت أرى أن تأخذ التصوير كهواية ومتعة وليست كشهرة وبزنس كما قال الصريح !!! على فكرة صورك أكثر من رائعة بل وتستحق النشر!! قد تجد نقدا لكنها أيضا تستحق النشر بما انك أوضحت في البداية أنك ما زلت متعلمًا هذا الفن لجيل وهو التصوير امض إلى الأمام وننتظر أجزاءك الثاني والثالث والعاشر بكل شغف ولتعلم أخي أنه منذ اشتراكي مع المجموعة منذ سنه هذه هي المرة الثالثة التي ارد فيها على موضوع وما ذلك إلا لإعجابي به وتعجبي من رد الصريح !!!… أخوك: الحازمي

  10. اسمع وانا اخوك ….. لا يهمك كلام اللي مسمي نفسه بالصريح لأن هذا اللي دامريننا يالعرب . ماعندهم الا التحطيم والحسد انا لو ابحلف ان كل كلامه طالع من حسد وغل من تصويرك الاكثر من رائع .لكن ابي اذكرك مثل دايم شيباننا يذكرونه (( العبريه العاليه كلن يرميها )):$ على العموم …خلك جبل مايهزك ريح والله يوفقك ,,,, ولا تنسى تعرض جديدك من ابداعات تصويرك . وانت يالصريح اذا بغيت تعلق قل خير ولا اصمت …

  11. لا اخفي اعجابي اولآ فى بعض اللقطات السابقهولكن اعتقد وجود صوره الساعه مع الكبك مال امها كان داعي.. المفترض انك تكون اكبر تفكير من هالسطحيه خاصة وانت تبحث عن تصوير احترافى وانت تملك الأدوات..فلا تضيعها فى كلام فاضي

  12. يعطيك العافية .. بس انت ذكرت ان نوع كاميرتك PowerShot A630 من كانون وهي بحسب ما اذكر 8 ميجا بكسل بس ايش نوع الزوم تبعها ؟ وكيف عملت عزل للخلفية في صورة السيجارة لانه حاولت بكاميرتي وهي مشابهة للي معاك وما طلعت معي بنفس الدقة تبعك !

  13. السلام عليكم لا أخفي إعجابي بتصويرك الرائع مع وجود الكثير من الملاحظات مثل 1- دقة التصوير 2- توزيع الكادر 3- تكوين الصورة 4- التشبع اللوني لعل روعة تصويرك جائت من معرفتك بالتصميم و المنتاج فكلاهما له صلة من قريب أو من بعيد بالتصوير الفوتوغرافي ولكن أخي الفاضل أتمنى من كل قلبي أن تترفع عن الكلمات السوقية مثل [ بنت الكلب ] و التي اوردتها لصورة النملة فأنت أعز و أكرم من ذكر الكلاب وفي رمضان المبارك بخصوص الأخ [ الصريح ] مع إحترامي لوجهة نظره فإنني اقول له [ ما المانع أن يكون الإنسان يعرف من كل فن بعضه أو نصفه أو كله ؟ ] دع الخلق للخالق يا صريح

  14. بصراحة إنكم ظلمتوني ،، الاتجاه المعاكسأتمنى تفهم كلامي زين ولا تحملني سوء ظنك …أخي علي ،،أقول يرحم والديك ياالباريسي:$ (على وزن مولود في باريس) أجل يالعرب ههههه يامسكين ياعربي على قولتك جب لي شئ جديد تكفى مو تقليد وبس وبأسهل الأشياء تصميم تصوير مونتاج وبعد مونتاج منزلي (للأسف) ورني إبداعات أو شئ فلحتوا فيه يالعربي غير التقليد ،،، وبعدين أبغاك تميز مثل ماقلت لأخونا اللي فوق بين النقد والتثبيط

  15. أخوي صريحهل التقليد كله [ خطأ ] ؟ إذا تحامل عليك الآخرون فهذا لأن نقدك صريح حبتين أكثر من اللازم حيث تقول في معرض كلامك و اترك عنك البربرة طيب انت ليه ما تخلينا نشوف ابداعك بدل النقد الذي لا يوجد فيه اي إجابية واضحة ؟ أخي الفاضل رايك خطأ يحتمل الصواب و رأي غيرك صح يحتمل الخطأ فلا تحمل الموضوع أكبر من حجمه

  16. لكني أبغى الشباب تتخص في مثل هذي الأشياء ،، ما أبغى التقليد أو بمعنى أصح ما أبغى انه ولقرب هذه البرامج بدأ الشباب بالعمل عليها وتركوا أشياء أخرى قوية وكبيرة ،، وأنا أعرف مثل هذه النوعيات تبدأ بمثل هذا المشروع أو ذاك ثم يشوف أن المشوار طويل (للشهرة أو للكسب السريع ثم يتوقف)،، وأتمنى من كل قلبي أن يتوفق كل شاب في مجال يحبه ويستمر عليه ويبدع فيه أكثر وأكثر ..

  17. أخوي صريح الكلام أخذ و عطا و النقد الذي وجهته نقد جارح بصورة قوية و صريحة ولا توجد كلمة تشجيع …. أخي الفاضل لا يوجد إنسان يبدع في مجال بصورة كاملة فالكمال لله حتى و إن صار ذلك المجال [ حرفة ] و مجال يدر مال على صاحبه فأنا كمصور محترف أعمل كمصور في شركة و اقدم ورش عمل في التصوير ومع ذلك دخلت مجال الخط العربي ومجال كتابة القصص القصيرة فما العيب في ذلك ؟ التقليد [ مطلوب ] حتى تتطور فإذا طورت ابدأ في [ الابتكار ] ليس بالضرورة أن أتخصص في فرع واحد فالمجال واسع والله أعطى الإنسان قدرات يستطيع أن يتخصص في كذا مجال ….. المهم أن تقضي وقتك في شيء مفيد و ما الدنيا إلا متاع و نتركه في يوم من الأيام

  18. الصريح استريح انت مثل اللي جايين له ربعه يهدونه هديه ويوم شافها مثل هدية ابو فلان سكت وماقال كلمة شكر

  19. صور جميلةأكثر صورة عجبتني صورة اليداللي طالعة من الموية(حفظتها في الجهاز)موفق بحول الله

  20. ماشاء الله عليك الصور روعه والله مايبغالها الى براويز ولا تقبل كلام اقل من كذا والله يوفقك….:D

  21. ما احب ازعل احد الناس اذواق والأراء تختلفصحيح حلو بس مو مره يعني تحس الدنيا فااااااااااااااااضيه والالوان ناريه انا افضل الالوان البارده الهادئه والأضائه الصفراءما ادري إذا الإضائة عندك بيضه او صفره انا واضحه عندي انها بيضه او يمكن التصوير طلعها كدا ما شاء الله تبارك الله والله يجعله منزل مبارك ويرزقك السعاده والهناء بس لو من جد انته تفهم في الديكور او فقط تجربه؟؟انا لي تجارب في الديكور وغير كدا عندي اهلي متخصصين في مجال الديكور حريم مو رجال مميزات النمط الكلاسيكي دائم وفخم اما العصري مو دائم وكمان مو عملي خاصه الالوان الفاتحه وإذا عندكم اطفال لا لا لا تحطوها حتى الهادئ الوانه مره ماتنفع للاطفال زع الله كل يوم مغير فشك كلو وشكراً…

  22. بســم الله …..الله يسلم ايديــك تصويــر مممنتااااز ماشاءالله8) الله يووفقك استمــر ودعواتنـاا ورااك 😀

  23. والله روائعه من جد والله جميل جميل وماشاء الله على هذي الصور ومشكووووووووووووور على الصور والله جميل جدا جدا 😮

  24. بصرااااحه رووووعه وماعليك من البااااقيواذا ماعندك مانع تقولي شلون تصور كذا ؟؟ هل هو نوع الكاميرا او هواية او انت دارس تصوير ؟؟لان مرره مرررره تجننوبالتوووفيق ياررررب

  25. ماشاء الله عليك كثيييير حلووه الصور قلت ركزووا على اتعلم بس التصوير احلى من تصووير وااحد يتعلم إلى الأمام

  26. السلام عليكم عزيزي المكتفي صورك جميلة وهي بداية رائعة وقوية وان كانت هناك بعض الصور التي لم ترضي ذائقة البعض استمر يا عزيزي واطلع اكثر على المواقع المختصة وخاصة الاجنبية منها….

  27. إخوي الحــــازمي… يشرفني وجودك في صفحتي.. وتسجيل إعجابك بها…لاهنت يالغالي……..إختي Maha.. إختاري نمط الماكرو من القرص.. وحاولي تقربين اكثر من الهدف المراد تصويره… وكل ما قربتي اكثر كل ما تم عزل الخلفية اكثر.. بالتوفيق.. لك وشكراً على ردك…… إخوي مرشــد المهيري… اكبر شرف لي بأن يكون هناك مصور ينتقدني .. ويشجعني .. ألف شكر على إطلالتك.. وتشريفك وسام على صدري… وردودك … ما اقول إلا بيض الله وجهك.. كفييت ووفيت………. إخوي صريـــــــح … بقــــوة وعنـــف … لا تعليق دانـــه – منــى الأمـــل – ali – مشعل – Emo ~chi – خالف تخالف – water – imn – حفيدة عائشة – أصدق إحساس – noor – أصرح من الصريـــح….. ردود أثلجت صدري.. ألف شكر لكل لإطراءكم الرائع… بتشجيعكم وتواصلكم.. ولكم فقط… ستجدون كل جديد يسعدكم… لا عدمناكم يالغاليين.. وكلكم تاج فوق الراس

  28. بصراحه تصويرك رهييييييب وحلووووو مره وما عليك من اللي ما عندهم سالفه واااصل ابداعك فنحن من متابعينك

  29. 😀 انا من اشد المهوسين بالتصوير حقيقهوصورك تجنن واصل وبالعكس التصوير متعه وذكرى جميله يعني ياخ صريح مولازم نشتهر اخ يالعرب شهره ذبحتنا هالشهره ودت عيال الحمايبل فالحظيظ هو مشارك وله هوايته فلماذا لايزاولها يعني مايصور مره يشتري هالكام لازم محترف صارت وظيفه موكاميرا تحمل ذكرى وجمال في النقاوه ماشاءالله اشكرك واهنئك يالمكتفي

  30. ما شاء الله عليك .. مبدع أخي الكريم .. للأمام وبالتوفيق إن شاء الله .. همسة بأذن كل من عارض أخي الصريح .. إذا كان قد أخطأ بأسلوبه بالنقد .. فهذا لا يعني أن نخطأ نحن أيضاً بأسلوبنا بتوضيح الخطأ له .. فلا يعالج الخطأ بالخطأ .. ولكل منا وجهة نظره .. وعلينا احترام رأي الغير حتى وإن كان غير صائب .. والأهم من هذا كله .. لا يحق لنا أن نطعن في نية الطرف الآخر .. فلا يعلم النوايا إلا الخالق سبحانه .. أخوي مرشد لك كل التقدير على الأسلوب الرائع بالنقد والتوجيه والنقاش .. أخوي صريح .. النقد البناء يكون .. بأن نظهر ونمدح العمل الجيد ومن ثم نسلط الضوء على ما نريد نقده .. أما ما فعلته فهو هجوم .. ولا أعتقد بأن كل ما عرضه لنا أخونا المكتفي لا يستحق كلمة شكراً على المجهود .. بارك الله في الجميع .. وهدانا لما يحب ويرضى .. دمتم في حفظ الرحمن ورعايته

  31. لااله الا الله بصراحه تصويرك جوناااااااان وذوووق واكثر شي اعجبني قطرة المويه وصورة العطر الصوره الثانيه مرررره مضبوطه كأنها الي تجي بالاعلانات 😀 ع العموم اهنيك ع الذوووق

  32. ماشاء الله عليك هذا وانت مبتدأ , استمر و ورينا ابدعاتك 😀 وان شاء الله تقدر تشتري الكاميرا الاحترافيه :D:D

  33. السلام عليكم اخوي المكتفي .. الصور جدا جميلة …. ما شاء الله تبارك الله مبدع .. حبيت اقول كلمة .. صحيح مو كل الناس يمكن يتخصصون بعدين بالتصوير او غيره.. لكن ما فيه مانع انه يجرب نفسه بكل المجالات لين يلقى المجال اللي يستهويه ويحبه .. بس يحاول انه ما يضيع نفسه ووقته اذا شاف مجال ما يستهويه … احسن يجرب شي ثاني .. هذا ردي وتعليقي على الكلام اللي فوق .. لكن ارجع اعيد ولو اني لست بالخبير بالتصوير لكن صورك ابداع .. وتعليق بسييط جدا على صورة المرأة الكبيرة بالسن يجب الحذر من تصوير الناس الأغراب فليس الكل يوافق على ذلك حتى وان كانوا غير واضحين ومعروفين فالاحسن الابتعاد عن ذلك او اخذ الاذن منهم .. اما عن صورة السيجارة .. فأتمنى من القلب ان يقلع عنها كل مدخن ..

  34. السلام عليكم ورحمة الله وبركاته ,,,, بصراحه عجبتني الصور لكن اكثر شي عجبني هو صور الماكرو والتجريدي خبرك اخوك من عشاق التصوير لكن ما عندي كاميرة اذا بصور شي اصوره من التلفون وودي اجرب التصوير بكاميرة محترفه واذا ممكن تفيدني عن اساسيات التصوير وانواعه وشنو احسن كاميرة ومن وين ابتدي والف شكر ,,,, اخوك : محمد العنزي , الكويت

  35. toti – أحمد – قلوب بلا مشاعر – ابوفهد – احزان زمان – Fareed Zoahir – دلوعة نجد – بنت الحفر – Sami – يعطيك العافية يالغالين على حضوركم وتشجيعكم… لاعدمتكم يارب……… mm – ابوعسير.. على راسي ردودكم.. القصد طيب نيه……….. محمد العنزي التصوير بحر… والشرح يطول يالغالي.. ولكن النت فيه كثير معلومات تفيدك… اتمنى لك التوفيق… واي خدمة من عيوني

  36. أخوي محمد العنزي ……….. بخصوص سؤالك عن الاساسيات و أنواعه و التكوين و الألوان فأتمنا تدخل هذا الموقع بتلاقي دروسي Inshad.net في قسم التصوير باسم مرشد المهيري و هناك مصورين آخرين مميزين أمثال مصطفى و بنت الجنيبي و الكثير من المصورين الهواه و بعض المحترفين …… ودروسي في الموقع كثيرة من الاساسيات و قواعد التكوين و التلوين و التشبع اللوني و ملأ الفراغات في الصورة و إن شاء الله تتعلم

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

تصوير ، المكتفي من خلف العدسة

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول