ألعاب

بوكيمون قو (Pokemon GO): الهوس القادم

1

في الايام القليلة الماضية ظهرت لعبة بوكيمون قو على اجهزة اندرويد و اي او اس، وقبل ما نبدأ الكلام عن هاللعبة خل نستعرض تاريخ البوكيمون حسب موقع ويكيبيديا

Pokemon نسبة الى Pocket Monster وتعني وحوش الجيب، أول ماظهرت كلمة بوكيمون من خلال مسلسل كارتوني من إنتاج شركة نيتيندو المشهورة عام 1995م، واشتهرت في الغرب في عام 1997م، ولكن انتشارها عندنا العرب بدأ في عام 2000م تقريبا.

وكانت فكرة المسلسل قائمة على الخيال وتحكي قصة المسلسل عن طفل عمرة 10 سنين حلمه إن يكون بطل وأفضل لاعب بوكيمون في العالم.

2

البوكيمونات عبارة عن حيوانات لها أنواع مختلفة وقدرات مختلفة منها المائي والناري والنباتي، وكان الناس في عالم هذا الطفل يقومون بجمعها من خلال كور اسمها كرات البوكي (يعني يفلق الحيوان بالكورة ويسحبه لوسطها)، أول بوكيمون حصل عليه الطفل هذا اسمه بيكاتشو الكهربائي عطاه إياه الأستاذ حقه في الفصل، واسم الطفل إش كيتشام (طبعا هذا الاسم الإنجليزي، وله اسم ياباني بس لو تحلفون عليه ماجبته) وله صديقة اسمها ميستي وصديق اسمه بروك، وتمضي قصتهم يخوضون فيها المغامرات والتجارب لجمع واصطياد أكبر عدد من البوكيمونات.

المسلسل في وقته كان له جمهور عريض وطلعت ألعاب واكسسوارات تحاكي المسلسل الكارتوني هذا وكان له موجه بين الاطفال وبعض الكبار (وتراني منب أقصد سعد ولد خالتي منيرة). الشاهد إن المسلسل مع الوقت اندثر وطلعت أشياء غيره ونسوه الناس تقريبا.

3

لكنه عاد هالأيام على شكل لعبة على الجوال وسوى ضجة في العالم ومابقى أحد مابحث عنه وضرب ترند بقوة والشركة زادت أرباحها بشكل كبير جدا، وش هاللي فتنهم فيه؟!.

4

5

6

7

8

فكرة اللعبة بسيطة ومحببة وهي إنك تساعد الطفل في جمع البوكيمونات (حتى إنهم مكبرين الطفل يعنني كبر عقب هالسنين)، المهم أول ماتفتح اللعبة تظهر لك خريطة البلد اللي أنت فيه وتظهر البوكيمونات حولك وأنت تمشي على الطبيعة يعني تحرك رجليك وتلفلف لين توصل للبوكيمون، و أول ماتوصل له بتفتح كاميرا الجوال وبيظهر لك البوكيمون تقوم تفلقه بكور البوكي اللي معك عاد خلك حذر ودقيق في الرمي (الأخوان اللي كانو يلقطون عبري أو نبق زمان هم اللي بيبدعون في هاللعبة) لأن الكور اللي معي محدود عددها وبالتالي عندك حلين لزيادة عدد الكورة يا تشتري بفلوس أو تبحث في معالم المدينة اللي أنت فيها بتلقى منصات للهدايات وبيض البوكيمون وغيرها، البيض هذا بيفقس ويطلع لك بوكيمونات جديدة وكذلك المنصات ذي تعطيك كور إضافية.

كل بوكيمون له قدرات وخصائص وقوى تقدر تزيدها أيضا بنفس الطريقة، ويقولون في المستوى الخامس من اللعبة تقدر تستحوذ على المنصات هذي والأماكن ولو جيت المكان ولقيته ماخوذ من واحد ثاني قبلك تقدر تحاربه ببوكيمونك وتاخذ المكان منه وطبعا لازم يكون عندك بوكيمونات قوية عشان تستحوذ على الأماكن المختلفة.

9

وبتبدأ تطلع لك اكسسوارات للعبة مثل بوكيمون قو بلس اللي يساعدك على إيجاد البوكيمونات وجذبها من خلال ربط بجهاز الهاتف من خلال البلوتوث.

ويتكلمون عن خصائص للعب الجماعي وغيرها وتحكي الأخبار عن تحديثات أخرى قادمة للحين ماظهرت، الشاهد اللعبة مثل أي لعبة أخرى الأهم إنها ماتتحول لإدمان. وشكلها موضه قادمة بترجع الله يعين عليها.

gh1

gh

 

اللي جرب اللعبة وش رأيك فيها وكم المستوى اللي وصلته فيها؟

مقالات ذات صلة

‫2 تعليقات

  1. الزبده والله اللعبة حلوة ومسلية بس ما احسها ادمان وجنان زي ما الناس مسوين بس عيبها السيرفرات التعبانة + ياخي تنسف دين ام الشاحن بس بس اجمالي اللعبة جميلة????

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى