بنك اليرموك .. شيخ البنوك


بسم الله الرحمن الرحيم

والصلاة والسلام على أشرف الأنبياء والمرسلين نبينا محمدوعلى آله وصحبه أجمعين .. وبعد :

الإخوة والأخوات الأعزاء أعضاء قروب حبيبنا
ووالدنا / الغااااااالي أبو نواف /

تحية طيبة لكم جميعا
وعذراً على طول الغياب ..

شكلكم تقولون والله مادرينا عنك /

ولكنني لا أحب الحضور لمجرّد الحضور
يسرّني أن أقدّم لكم هذا اللقاء الافتراضي
وآمل منكم قراءة مابين السطور

ملاحظة غير هامة :
شخصيات وبنوك هذ اللقاء الإفتراضي خيالية و أي تشابه بينها و بين شخصيات أو بنوك حقيقية هو محض صدفة ( إيه هيّن ) /

/

بنك اليرموك .. شيخ البنوك

يسعدني في هذا اللقاء أن أستضيف الشيخ طخيمان الناجحي رئيس مجلس إدارة بنوك اليرموك
الإسلامية لنتعرف على طموحاتهم المالية وخططهم الاستثمارية وآمالهم وآلامهم والعوائق التي تقف في طريقهم .

/

** ياشيخ طخيمان ماهو سبب تسميتكم للبنك بـ اليرموك هل معترك المال والأعمال أشبه بالمعركة ؟
= لا ليس هذا القصد ، القصد ببساطة هو أن نعطي البنك بُعداً إسلامي عشان يجون ربعنا على الريحة ويعطونا دراهمهم .

** هل أردتم أن تستقطبوا العملاء باسم الدين ؟
= بيني وبينك بس لا تـنشره ، عندنا ناس صحيّحين ويطيرون في العجة ، وحكمتهم المفضلة
خل بينك وبين النار مطوّع وإن ما كسبناهم كسبهم غيرنا .

** طيب ماتحسّون انكم كذا تستغلون الناس ؟
= ياخوي جحا أولى بلحم ثوره ولو ماسوينا كذا جاك بكرة البنك البنقالي وسمى نفسه
مصرف بنجلاديش الإسلامي ولهف دراهمهم ، ويمكن مايرجّعهن وحنا الحمد لله حافظينها لهم .

**فيه سؤال محيرني من زمان ياخي هل أنتم شركة والا مصرف والا بنك ؟
= كلبوهن ، إذا جينا نسولف مع عيالنا في الدار قلنا شركة اليرموك ، وإذا جينا نتعامل
مع بنوك برا قلنا حنا بنك أما إذا جينا نتعامل مع شعبنا الحبيب قلنا لهم حنا مصرف ونعوذ بالله أن نكون بنكاً !! .

** طيب يا أخ طخيمان ماهي خططكم التوسعية المستقبلية ؟
= بصراحة بعد مافتحنا فرع في كل مدينة وقريه وهجرة هالحين منشّنين على كم خيمة
بدو في الصمان ، وناوين نفتح عندهم فروع .

** ماشاء الله عليكم كل هذا خدمه للوطن والشعب ؟
= بكل تأكيد ، وزيادة عليه يمكن عند هالأجاويد فلوس ٍ موزينها منّا والا منّا خلنا نزرفها .

** ماهي أكبر عقبة تواجهكم ؟
= بصراحة أكبر عقبه هي تعاملنا مع ( أبو نعيلة ) والمشكلة إن البنوك حاسدينا على عدد
العملاء الذي يفوق ال 5 ملايين ومادروا إن 4 ملايين منهم طفارى ، وهذولي مسببين لنا قلق ماتتخيله !!

** ماسويتوا إجراءات تطفيشيه لهم ؟
= إلا سوينا !! قلنا اللي يقل رصيده عن 1200 ماله حق يسحب ببطاقتنا إلا من صرافاتنا
، وقالوا مايخالف !! و قلنا لهم ترى اللي بيقل رصيده عن 1000 بنسحب منه 3ريال ولا فاد
لأنهم يسحبون فلوسهم على طول ولا يمدينا نلقط شيء ! و أخذنا منهم 10 ريال رسوم بطاقة
صراف بس شكونا على المعازيب وهاوشونا ورجعناها لهم !! و إذا دخلوا البنك يراجعون نعطيهم
أشكل ونطنشهم ونخليهم يصفون مع الهنود والبنقالية ونعاملهم اسوأ معاملة بس لعنبوا
ابليسهم لزقات عيوا يروحون !

** طيب ياخي حرام عليكم ليش تتعاملون معهم كذا ؟
= ياخوي 4 ملايين عميل لو تجمع أرصدتهم كلها ماجو ربع دخل مطعم ماما نورة !! وإذا قلت
له شي قال أنا عميل .. مهوب عاقل المليونير !!

** ولكن الا يكفي إن راتبه ينزل عندكم وتستفيدون منه .؟
= جاك الثاني !! ياخوي أي نستفيد منه ، أولاً راتبه مايتعدى 3000 ريال ومايمديه ينزل
إلا وهو ساحبه تصدق إن واحد منهم جاي من الفجر قبل ينزل الراتب ولقى المسؤول عن إيداع
الفلوس في الصراف وقاله تكفى عجل عطني راتبي قبل تحطه في الصراف لأني مستعجل !! بالله
ماتشوف طوابير السيارات عند الصرافات كل يوم 25 من كل شهر !! تراهم كلهم عملاءنا حتى
لو تشوفهم يصرفون من صرافات البنوك الثانية أبد والله هذولي ربيعنا أعرفهم بدرادعهم
!!

** خدمة الجوال اللي عندكم كانت مجانية ليش خليتوها بفلوس ؟
= كله من هالطفارى !! يوم شكونا ورجعنا لهم الـ 10 ريال قلنا نوريكم ياعيال اللذينَ
وخذنا منهم 49.99 ريال كخدمة جوال عقاباً لهم .

** لكن ماتشوف إن الـ 49.99 ريال كثيره ؟
= ياحبيبي هذا باب رزق لنا إضربها في عدد عملاءنا بيجيك 250 مليون فيه أحد يعاف هالمبلغ إلا المهبول !!

** لكن ياخي المفروض الخدمة تكون مجانية .
= ياحبيبي أي مجانية ، أنا فاضي لهالطفارى كل ماسحب له 100 ريال نرسل له على جواله
و نقول ترى رصيدك نقص 100 ريال وبقى فيه 350 !! من زين هالرصيد ، وثاني شيء ذولي قليلين
حيا ، مايكتفون بتخسيرنا باستخدام الصرافات الثانية لا كل ماسحبوا شيء خذوا إيصال !!
وإذا قروه شققوه ونطلوه لأن رصيدهم الباقي يفشل ويخافون يشوفه أحد!!

** سمعت إن عملاءكم ذولي زعلانين وبيشنون عليكم حملة مسمينها حملة تأديب بنوك اليرموك وش القصة !!
= الحملة هذي ضحكت عليها ضحك ماتصوره ، هذولي مجموعة طفارى زعلوا علينا عقب ماخلينا
الجوال بفلوس واتفقوا على تأديبنا على حد قولهم وقالوا بنسحب أرصدتنا يوم جمعوا أرصدتهم
كلها وإلاها 4500 ريال !! معليش أبوجه لهم كلمة : عيب عليكم استحوا على وجيهكم هذي
ارصدة آوادم !! لعنبوا ابليسكم البنقالي يدخّل في اليوم أكثر من دخلكم الشهري كله !!

** طيب وش سووا عقب ؟
= اتفقوا انهم ماعاد يصرفون إلا من صرّافات البنوك الثانية و ياخذون إيصالات عشان يخسرونا
بزعمهم !! تلومنا إذا حسّرنا بهم !!

** طيب وش مشروعكم القادم .؟
= مشروعنا القادم هو مكافحة هالطفارى ، وقررنا أننا نحط تذاكر عند البنك قصدي المصرف
ونخلي الدخول بـ 10 ريال ، منها نفتك من مضايقتهم لعملائنا المحترمين ومنها يكون دخل جديد لنا .

** قبل ما نختم ياخي ليش مانشوف لكم إسهامات خيرية ومشاريع تنموية تخدم البلد سواءً مساجد أو مدارس أو حدايق الخ ؟
حنا مكلوفين بكم وإلا نكد على عميان وإلا شايفنا فاتحين جمعية خيرية ؟؟ بس والله بيّن
من طريقة أسئتلك إنك واحد من هالطفارى اللي غاثينّا !! المساجد ما يصلح نبنيه وحنا بنك
أستغفر الله بس !! والمدارس الدولة الله يحفظه ماخلت علينا قاصر ، والحدايق والله بيني
وبينك ودي نهدم سور الحديقة اللي جنب بنكنا ونقلع شجرها ونشحم نخلها ونبلطها ونخليها
مواقف لنا ! قال مشاريع تنموية وإسهامات خيرية قال !!

/

وتقبلوا فائق التحية والتقدير
أخوكم : أبو طارق

abotareq.sa@gmail.com


سبحان الله وبحمده .. سبحان الله العظيم


تعليقات 31

  1. اخي الكريم .. من خلال موضوعك انت تقصد بنك الراجحي وعلشانه اسلامي او كما تقول يدعي الاسلامية والشرعيه في تعاملاته الماليه وانت بموضوعك هذا كأنك تلمح الى القول بأنه يجب عدم التعامل بالدين في الامور الماليه وفصل الدين عن الاقتصاد بينما في بريطانيا مثلا اصبحت تحاول اتباع نظام الاقتصاد الاسلامي لانه هو افضل نظام في مواجهة الازمات وادارة الثروات .. واذا كان موعاجبك الراجحي عندك اكثر من بنك في السوق يمكنك ان تتعامل معهم .. وعلشان تفهم فكرة البنوك مثلا يجب عليك ان تقراء العقود والانظمة قبل ماتاخذ من عندهم اي شي .. فنحن امه لا تقراء ..

  2. البنوك واجد وانا اخوك 😀 والبنك ما كان اسمه اسلامي علشان يخدعون الناس بالدين لكن .. كل ذي نعمة محسود

  3. أخي ابو طارق .. أنا أشهد أنك قد شخصت الداء تشخيصاً خنفشارياً لا يجارى. فشكر الله لك. واسأل الله بمنه وكرمه ان يخلصنا من هالبنك الغثيث ومن مجلس ادارته اللئيم… يا جماعة…. هل يستطيع أحد ان يخبرنا ما هو الفرق بين هذا البنك المتاسلم وبين بقية البنوك الأخرى؟؟؟؟ ان البنك الذي لا يحترم عملائه جدير بأن يحثى عليه التراب. ووالله العظيم انا من زمان ودي انادي الى حملة مطالبة قضائية لمحاكمة هذا البنك… كان ودي انادي الى حملة مقاطعة بس الخلق كلها ناشبة مع حلوقها . اسأل الله ان يعجّل بفكاكنا من سلسة بنك اليرموك عاجلاً غير آجل. الامضاء: ابو الحسام.،،،

  4. كنت موظف عند بنك شبيه فصلت خفت من الظلم دهاء في دهاء واستغفال الضعوف بلاوي تصير ماياكلها الا الضعيف ابو 5000 واللي زيه وطايحين في حركات البطاقه الاتمانيه هي السرق عيني عينك ولاحسيب ولا رقيب ومؤسسة النقد بشيك من تحت الطاوله يمشي الوضع

  5. مشكور على تعبك على هالايميل الرائع بصراحه فكرته جديده اول مرررره اسمع فيها << ايه هين وتراني ماقد قريته من قبل ابد ابد << هههههه

  6. الله يوسع صدرك ان تسانك وسعت صدورنا .. الله يعيننا على هالبنوك .. حنا لاقينها منهم ولا من الاتصالات ولا ولا ولا الله يعين بس على هالحياة شكراً حبيبنا ابو طارق

  7. ياخي شي غريب تشوف ناس تدافع على الفاضي 😀 والله انه ما يفرق عن باقي البنوك في شي بالعكس هو اكثر بنك ياخذ فوايد في القروض ووهو وبنك الرياض محتكرين الدوائر الحكومية غير كذا كل تعاملات وزارة التعليم العالي مع الراجحي طبعا للمكافئة الي تنصرف للطلاب وايضا عندك اختبارات مركز قياس كلها مع الراجحي يعني مزبطين بعض .. وقلك بنك اسلامي اصلا كل البنوك حاليا تقلك قرض بطريقة اسلامية روح شوف ساب وسامبا والعربي وغيرها كلها بإسم الدين تقرضك وطبعا كلها عن طريق حيلة مضحكة قال نشتري معدن ونبيعه للعميل بثمن مؤجل ويرجع العميل يبيعه لنا هههههههههههههه والله ياطريقة خطيرة وهم لايبيعو ولا يحطو قرض بتاخذه وبياخذو فايدة مقدراها 3.90 % في السنة >>> هذا الراجحي الإسلامي اما ساب ياخذ 3.40 وسامبا اظن ياخذ 3.45 وكمان الراجحي لما تجي تفتح حساب يتشرط ويبغى 12 الف ؟؟؟؟؟ سامبا رحت فتحت فيه حساب بدون ما احط رياااااااااااااااال اغلب البنوك كذا ليه بس الراجحي 12 الف ؟؟ وانتو عارفين البنوك فين تستثمر الفلوس حقتها والمشكلة انو البنوك صارت شي لابد منه وما باليد حيلة

  8. السسلام عليكم .. احببت ان اضيف تعليق بسيط فقط .. ذوو النفوس الدنيئة , يجدون اللذة في التفتيش عن أخطاء العظماء ! 😀 ولا شكْ ان لكل مهنهْ حاسداً .. 🙂 وحبيت اعلق على رد الأخ [ Feras ] اما 12 هههههههههه ! اضحكتني ..! تعرف تنصب انت ! 😀

  9. اييييه صدق من قاااال ..اللي مااايطول العنب حاامض عنه يقووول اذا ما اعجبكم البنك غيره الف.. لا تطيحوا سب فيه.. وحسبي الله على من يعاااديهم..

  10. ابو طارق طالبك انك تسوى لنا لقاء ثاني :$ و كل كلمة كتبتها هي واقع البنوك واخص البنك الي لونة ازرق وموضوعك خنفشاري 😀 وواصل ابداعك الساخر

  11. تراهم قارهريني ياخي على الاقل البنك العادي قبل لا يسرق يقولوك ويقع معك عقد ترى بنسرق منك كذا وكذا هذا ما يشاورك يسرق ثم اذا سالت قالو لك رسوم طيب ما اتفقنا على كذا هذا نظام جديد وليش يسري علي النظام الجديد حسب الله ونعم الوكيل على فكره ( قهر ) الرجل يتحدث عن الي يحطون النظام الاسلامي ستار لهم وهم ابعد ما يكونون عن ذلك بس في النواحي الخيريه ترى بنك الراجحي هو الافضل وعائله الراجحي لها اسهامات خيريه لا نحصيها الحق يقال بس بلاك هالتسلاب الثانيين سامبا وطقته وقسم ما تشوف لهم ولا دعم الا دعم حفله ولا دعم مجعره المهم قسم اني حاقد على هالبنوك ومؤسسه النقد اردى واردى لانها كبيرهم الذي علمهم السحر تحياتي لك ابو طارق يامال العافيه لا تقاطع

  12. موضوع جيد يناقش سلبيات بعض المصارف … شكرا لك أبو طارق ما قصرت… نبي لقاء ساخن افتراضي مع البنوك الربوية اللي ما تنبلع أبد ( شين وعهارة ) شكرا لك أخوي … أنا من المتابعات لكتاباتك .. يعطيك العافية

  13. الموضوع رؤوؤوؤوعـــة والله يهديهم ان شاء الله يسلمــــوو ع الموضوع … 😀

  14. ــــــــــــــــــــــــ هالحين بدل مأنت قاعد تكتب موضوع طويل عريض ليش مافسسرت ذرعانك وسويت بنك ..ووريــتنا شغلك بدل مانت قاعد تتطنز ببنك الراجحي شوف وش قاعد يساهم فيه البنك . وش المشاريع اللي يدعمه .. مشاريع للشباب .. ودعم الزواج . غير الأيتام إلخ إلخ لانك ماترى غير الجانب السئ . كتبت هذا الموضوع طيب ياأخ ومن ناحيه أخرى .. ليش تسب تعاملهم الإسلامي ليش تبي تعامل غير اسلامي .. غير شرعي ماكثر الله البنوك ــــــــــــــــــــــــــــــــــــــــــــ أنا أسسستعجب من الإنتقاد ودنا طيب نشششوف شغلك طيب .. تحياتي لك ولا عاد تعوده

  15. اللي قاله الأخ ابو طارؤق صحيح لبش نضضحك على نفوسنا والله كل بنك أخس من الثاني انا والله العظيم رحت للرياض وكنت اسأل عن معاملة ما وبينما قاعد الموضف يشيك على الكمبيوتر قالي عندنا خدمة للزبون ومن هالكلام اللي لو وافقت راح ياخذ علية نسبة المهم قال عندنا التورق معتمد اللا وهو نآخذ من راتبك مبلغ 600 ريال وبعد عشر سنوات تجي تستلم 200 ألف ( حلال زلال) أكمل والا لا …. يالللي تجبون الراجحي وطقته اللي ماطلع لهم صيت اللا من فلوسي ومن هم على شاكلتي ( الشعب السعودي ) الشيخ آل منيع يقول وانا اللي سمعته والله العظيم ( لا يوجد أي شركة أول مؤسسة أو بنك صافية 100% ) ما معنا هالكلام وش ورا الربا ياجماعة الخييييييييييييييييييير رأيي الشخصي

  16. ابوطارق السلام عليكم / انت ماقصرت في نقدك البناء على هذاالبنك لكن للأسف هذا حال اغلب البنوك يقيسون الناس على اشكالهم وأن كان قصدك على بنك معين لكن وين تروح خشمك ولو أنة عوج

  17. الشرهه مب عليك على اللي نشر لك اقول طيب ليه حاط حيلك عليه بس هذا اذا كان كلامك صحيح خلك شجاع وصريح ورنا اللي عندك واكتب اسمك وقل اتهاماتك بكل وضوح وصراحة ما دمت صادق

  18. اقول يحليلك يا Feras شكلك ما عمرك مريت بنك تسمع بالبنك انت وين انت 12000 اقول ادخل موقع اي بنك ثقافتك البنكيه يبيلها لا تعودها وصاحب الموضوع بعد يبيلك كورس مصارف قبل لا تسوي مقابلات ما تفهم نصها

  19. مقال جميل وانا معتبره زي ماقلت اخوي مجرد كلام خيالي لا يمت للواقع بصله انا اشتغلت ببنوك اخرى و الصدق الله يحلل الحجاج عند ولده كلهم معتمدين على مبدا كيف تعرف عميلك عشان كيف تدبسه وتربطه بك وتاكل ما وراه ودونه بالنسبه للراجحي انا لا ازكيه ولا ادافع عنه بس مشكلة الراجحي ليست في ادارته العليا … مشكلته من ادارته التنفيذه وحتى الصراف اللي تشوفه بالفرع القواعد والقوانين اسلاميه لكن اذا اخطأت او اساءت التطبيق فراح تتحول من اسلاميه الى ربويه .. وهم ولا همهم انا صراحه على انه بنك منافس .. الا يكفيك انه متطور جدا وسريع الانتشار وهذا اكبر علامات النجاح ترى غيرهم ( بدون ذكر اسماء 😀 ) يسرقونكم وغصب عليكم ولا تشوف اي تطوير او تطوير فيه . لا ويعلك بخدماته الخطيره . وكلمه اخيره : مفهوم البنك عندنا مو جهه تحفظ مالك مقابل رسم بسيط … المفهوم عندنا : جهه تسرق مالك وتخلي لك الشيء البسيط انتهى كلامي حفظني الله :$

  20. اهنيك على هالفكرة النير والمقال الحلو بصراحة من زمان ماقريت مقالت حلوه مثل كذا فيها فايده وسلسه وخفيفه لا ويقولون ربعنا طيروا البنقاليه مايدرون ان البنقالي احياناً منتج للبلد اكثر منهم ولا المشاريع الخيريه والمساجد يبنيها من اموال المساهمين او تخريجة الاموال الربوية … ويقولون الله يجزاك الشيخ فلان ماقصر بناء له جوامع وكلية طب و…و…و…و اشكرك من الاعماق

  21. اش عندهم هاللي مدري وش يحسون فيه زعلانيـــن !!؟ اجل تدافعون عن الازرق ؟ زحلق بعيد انت وياه الكاتب ما انتقد المعاملات الاسلامية بعينها او رسمها بل انتقد طريقة التصرف فيها واللي اصبحت واجهة فقط للجميع اقول صدق من قال اننا شعب على البركة ننسرق واحنا نضحك طيبين او بمعنى آخر ( دلوخ ) لدرجة يضحك منها الحرامي طير من راسي انت وياه أبو طارق .. عز الله انك قلت الحق كفوووو يالغالي

  22. السلام عليكم ورحمة الله وبركاته أشكر جميع من قرأ الموضوع وأجزل الشكر لكل من علق سواء كان مؤيداً للطرح او مخالفاً له .. بسم الله .. أخي قهر : تقول كلمة حق إريد بها باطل …. إذن تؤيد أن كلامي حقيقه أما النوايا فلا يعلم بها إلا رب البرايا سبحانه ، وللأسف فهمك للموضوع كله خطأ في خطأ اللي أتمناه ياعزيزي أن تكون جميع بنوكنا إسلامية 100% لا أن يكون التعامل الإسلامي مطية يُحمل عليها أكبر عدد ممكن من العملاء وترى تقرأ تكتب كذا ( تقرأ ) 🙂 تحياتي لك . ثامر : زين انك علمتني !!!منول احسب مافيه الابنك واحد . عزيزي ابو الحسام : كفيت ووفيت يالغالي وشكرا على إثرائك للموضوع بإضافتك الجميلة . أخي أحمد السليمي : شكرا على حضورك المورق وإضافتك الرائعة 🙂 أخوي احمد : والتراب رخيص ؟؟ شحنته بذيك العدة 🙂 أخوي عالي مستواه : الرائع هو حضورك وكانك قاريه في حبيبتنا فواصل فزدتني شرفاً 🙂 حبيبي أبو فيصل الله يوسع صدرك بالعافية وصدقت يالغالي كل ٍ جايب ٍ جهده … اسعدني حضورك 🙂 الغالي Feras أشكر لك حضورك المثري وللأسف عندنا ناس مازوشيين يتلذذون بتعذيب الآخرين لهم 🙂 تحياتي لك . الرماد وعليكم السلام . ـــــــــــــــ مااالكم دخل.. هذا الاسم والاالرد ؟ أجل ـــــــــــــــ وحسبي الله على من يعاااديهم.. ـــــــــــــــــــــ عسى ماكفرت بس ؟ ـــــــــــــــــ عزيزي عادل بن عبدالله حضورك أسعدتني لسببين 1- لأنه مبهج 2- لأن اسمك ذكرني بأخ غالي وغايب الله يرده 🙂 شكرا لك يابو عبدالله . shaaloo6 اللهم آمين شكرا لك . ..R.B.G تقول : ــــــــــــــــــ عزيزي .. من أي البنوك المنافسه أنت ــــــــــــــــــ أنا العضو المنتدب والرئيس التنفيذي لمجموعة سامبا المالية بس لاتعلم أحد !! ــــــــــــــــــــــــــــــ أخوي الغالي وابن بلدياتي سوالف القايلة أسعدتني قراءتك جداً واسعدني أكثر حضورك المشرق والمورق وإضافتك الجميلة التي لاأملك امامها إلا الصمت فالصمت في حرم الجمال جمال تقبل تحياتي وتقديري … ــــــــــــــــ أختي أم خالد شكرا لك على حضورك ولعل أحدهم يوافق في المرة القادمة أن أجري معه اللقاء 🙂 تحياتي لك . أختي Rooj_Qtr شكرا لك على طيب المرور . ـ يتبع

  23. ـــــــــــــــــــ إلا بنك الراجحي : العلم اللي يجمد على الشارب ــــــــــــــــــ ههههههههه إلا جب عجرا وطقني أحسن !! ــــــــــــ أخي الغالي ابو عماد أشكرك جزيل الشكر على روعة مشاركتك وإثراء الموضوع بها تقبل تحياتي وتقديري .. ـــــــــــــــــ ابو حرب : خل الاسهم لأهلها ورح لسوق الخضار أزين لك !! ـــــــــــــــ الجمل الحكيم .. بل انت الجميل الحيكم .. أشكرك على ردك الذي ينضح بالجمال والحكمة . تحياتي . ـــــــــــ عمار ــــــــــ ياسفاب إسمك عليك . ـــــــــــــــ Newmoon ـــــــــــــــــــ منتب عاقل يابن محفوظ ـــــــــــــ Aziz صح لسانك وشكرا لك على مداخلتك الجميلة , حفظك الله . ــــــــــــــــــ أخوي .. سلطان القصمان حبايبي والله وما اعتقد إن اللقاء فيه شي يزعلهم 🙂 حبيبي تركي صح لسانك وشكرا لك على مداخلتك الحاذقة دمت بخير .. عزيزي مجود شكرا لك فقد وضعت النقاط على الحروف وفسرت مالم يستطيع البعض فهمه . جاء ردك في الأخير لأنه مسك .. فشكرا على على تعطير الموضوع بمسك كلامك . والشكر موصول للجميع .

  24. السلام عليكم ابو طارق الله يعطيك العا فية وتكون من الخير ين فى الجنة وعندما تقا بل الله جذاك الله كل خير اخوك حسين سر حان بس رد عليا وهتشوف انا بحبك قد ايه انتا وكل المو جودين معانا

  25. السلام عليكم كلامك فيه من الغلط الكثير جدا تدري انه البنك من اقل الناس اللى تاخذ منك فوائد بالنسبه للقروض الشي الثاني البنك مو مستفيد منك يابو نعيله ابدااا لا تقول انه يقوم على فلوسك لانك ماعندك شي اصلا بالنسبه للفيزا ماياخذ منك ولا ريال زياده لان الفيزا الراجحي تسحب 2000 على طول يخصم من راتب 2000 ولا زياده ولانقص اهي خدمة للعميل طبعا الزياده على السحب تكون لشركة فيزا الام واللى يقول انه يشرط 12 الف لفتح الحساب انت كذاب او الموظف يكذب عليك ولا ريال ياخذ ام لماذا يتم تسديد الرسوم الحكومية وخدمة القياس في الراجحي ارجو انك ياظالم ماتحكم من راسك بمان الراجحي منتشر من كل مكان ويخدم اكبر قدر من الناس بالمملكة لذلك يتم اختياره من قبل الدولة بالنسبة ان البنك يخصم 2.50 للعملاء اللي يقل رصيدهم عن 1500 فهذا من موسسه النقد والراجحي اخر بنك طبق النظام لك الحق انك تتصل على الموسسة وتتكد من كلامي ومن حق البنك يفتح فروع ويتطور والله هما لا حسد صحيح البنك عنده اخطاء واللى مايخطي اعرف انه مايشتغل تحياتي

  26. أهلين ياشيخ سرحان الموضوع منور بوجودك ياشيخنا 🙂 أخوي : اروح لمين ــــــــــــــــــــ تدري انه البنك من اقل الناس اللى تاخذ منك فوائد بالنسبه للقروض ـــــــــــــــــــــ مالك لوى هو أكثر بنك ياخذ فوائد بعد الأهلي والبلاد وبقية البنوك أقل منه كلها ، راح زمن الاستغفال !!!! وياحبيبي بنكك اللي تدافع عنه مابنى فروعه إلا من جماجم أبو نعيله اللي انت حاقرهم ومستنقصهم ، واللي يشكلون أكثر من 80% من عملائه ، ــــــــــــ واما الفيزا فهو يبلع منك 200 ريال سنوياً حتى لو كنت ملغيها وهذا صاير معي البطاقة منتهيه والغيتها ايضا وبلع 200 ولولا اني طفران وعارف حسابي كان مادريت وإذا راجعتهم قالو أوووه آسفين ورجعوها وإذا مادريت فالأمارية الغفله . ــــــــــــــ هذا غير 50 الجوال الداج واللي مايعلمك كم باقي في حسابك ، ولا يعلمك رقم الحساب كامل وأحياناً مايعلمك انه مسحوب منك إلا من بكره ( أمر الله من سعة ) وغير الخمسة اللي لهطوها عشان بطاقة الصراف بس الأجاويد شكو وخذو حقهم وغير وغير … تحياتي لك

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

بنك اليرموك .. شيخ البنوك

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول