بطاقة سجين


السلام عليكم

هذي ثاني رساله ارسلها للقروب الرائع قروب ابونواف << يبي يكسر العاده اللي يقولون اول رساله
اليوم انا جايكم بقصة طويله مدعمه بالصور اللي تدعم معاناتي

بطاقة

في هذاك اليوم اللي ماكنت متفائل فيه من اوله حطيت رجلي مع الدائري الغربي امشي 160 وما نتبهت يوم اني لفيت مع مخرج الترمذي اللي بعد مخرج عائشب بنت ابي ابكر << والله من زين التوصيف, ولادريت اللي اللي يقولي  وقف ياولد على يمين وقف , والله اللي اوقف ويجيني ذاك العسكري الرخصه والاستماره واعطيه الرخصه والاستماره قال اطلع من المخرج يسار ومن ثم وقف يمين والله اللي اسوي ماقالي واروح يسار واوقف يمين ويجيني قال طف السياره وانزل يابن الحلال يابن الاجواد ماهي بهي تكفى (ياللحيه الغانمه) انا وراي عمل وتاخرت الله يرحم والديك (وبيني وبينكم وسوس لي ابليس قال يارجال قل ماني برايح معك واعلى مافي خيلك اركبه) > ملعون ابليس

قلت نركب نركب ونشوف اخرتها , طيب وين حنا رايحين قال شوي وتشوف ,ركبنا في الدوريه تقريبا الساعه الرابعه عصرا او قبلها بقليل ويقوم يفر فينا الشوارع طويل العمر من شارع عائشه بنت ابي بكر الى شارع الفريان , عاد يوم ركبت انا حصلت اثنين من الجنسيه الافغانيه او الباكستانيه (اهم شئ فيه النسافه) والي كان راكب جنبي هذي صورته وريحته تجيب المرض مع الحر طالع له ريحه تسد نفسك خمسه ايام عن كل شئ,

بطاقة

هالافغاني مدري البستكاني قصته قصه من يوم ركبنا يقول للعسكري ابي مويه صديق يبغي ماء انا فيه 2 ساعه كلام انتا , العسكري اخر همه ماعليه منه عاد ماشترى مويه الضعيف لين وقفنا واحد ثاني علشان يركب معنا في حدود الساعه 5 ومن حسن حظه انا وقفنا عند بقاله ,, وقبل لايركب معنا هالاخير واللي ركب قدام , مسكوا واحد مطوع وبينه عليه علامات التدين وماشاء الله عليه معطيه الله الصحه والعافيه ويعتبر عن اثنين ويجيبه العسكري ويركبه معنا ورا وحنا من قبل 3 واحد من العيار الثقيل (افغاني مدري باكستاني) واثنين من الحجم المتوسط اللي هم انا والفغاني المروح ويجيبه يقول اركب ونقول نصيح عليه يابن الحلال مزحومين ومايصير قال اركب بس  والله ونتحاشر فوق بعض يالاربعه وصرت قريب من الفغاني المروح والمطوع زاحمني من يسار وقلة حيا الكلام هذا كان الساعه الرابعه والربع عصرا ويقوم يفتر فينا في الشوارع الين الساعه 5 يوم مسكوا الاخير وركبوه قدام ,,,,, واخذ يفر فينا شوي ومن ثم روحنا للحجز في الناصريه

سالفة المطوع

بطاقة

هذي صورته وهو ابو غتره بيضاء اما الثاني فلقيناه هناك ويقول انهم طرحوه لانه مامعه بطاقه (تابعيه للمخضرمين)

المطوع هذا يقول انه رايح بيشوف العروسه وان اليوم موعد الشوفه ويقوم يصيح في العسكري لاتفضحنا مع نسباي يابن الحلال تراها اول زواجه لي لايغرك عمري والعسكري مطنش (المطوع معه جوال برافو والله ياهو روعه لايفوتكم << دعايه مجانيه) ,,,,,

المطوع هذا صلى فينا المغرب والرجال صلاته ممتازه وترتاح لصوته بعد ويوم خلصنا الركعه الثالثه (يعني قمنا من الركوع) والرجال يدقها دعاء وابتهال للله سبحانه وتعالى ويقوم يدعي ومير والله يقول (اللهم ان كان في اسرنا هذا ظلم لنا فانصرنا على من ظلمنا )<< قلت رجنا فيها في السجن وتدعي على الحكومه واسر ومدري ويش بس غابت شمسنا ويقوم يدعي ان الله يفكنا من اسرنا ويفرج عنا عاجلا غير اجلا ,, ويوم سلم والله مير يقول هالكلمه الخفيفه ويذكرنا فيها ويقول ياجماعه ترانا ماجينا هنا الا ابتلاء من الله سبحانه وتعالى واكيد انا مقصرين في شئ :: قلت كانك تدري اني ماصليت الفجر الا متاخر اليوم ,,,

نترك المطوع ونرجع حق محور حديثنا

الساعه الخامسه والنصف وصلنا الى الناصريه على السياره اللومينا اللي حاشرنا فيها العسكري الله يحشره ان شاء الله
وصرفوا لنا هالبطاقات الله من زينها عاد ومخالفه سرعه قصوى بمبلغ 900 ريال سددتها بعد دخولي السجن بدقائق عن طريق واحد من الشباب اللي اتصلت عليه وسدد عني الله يجزاه كل خير

بطاقة

دخلنا السجن اول ما استقبلنا هالعباره

بطاقة

ومن يوم دخلنا دخل معي اثنين واحد منهم اعرفه معرفه شخصيه بس هو جاي في دورية ثانيه وبعد دخولنا بعشر دقائق والا هو طالع بس ماقول الا مثل واحد من العيال في الماسينجر (قاتل الله الواسطه), المهم اني قعدت اتمشى في السجن للمره الاولى احس بالقهر من جد , نجي لمعامله العسكر معنا معامله سئيه جدا وكانه يعامل له خدم او كفار يكلمك من راس خشمه (اذكر اني سالت واحد وقلت له كم عقوبه السرعه قال 3 ايام وشوي بقولكم انه ماعنده سالفه)

ناخذ جوله في السجن بالصور ::

بطاقة

اسلاك مكشوفه وفي متناول ايدي السجناء او الموقوفين وتقدر تحرق السجن بسهوله << راعي مشاكل

بطاقة

شركة النهبات السعوديه موجوده في كل مكان (تصدقون عاد اني استفدت من الجوال بس بقولكم شوي )

بطاقة

نجي لدور المياه اعزكم الله وساكتفي بصورة وحده حفاظا على مشاعر القراء

بطاقة

بالله وشلون توضي الحين ؟ اذا كان الصنبور (متعوب عليها الصنبور ترى) ماتقدر تفتحه

بطاقة

ازدحام اظطر معه هؤلاء للجلوس في هذا المكان

بطاقة

صلينا المغرب والعشاء وهذولاء نوم واخر مايفكرون فيه الصلاه المفروض ان فيه توعيه داخل السجن مو اهم شئ تسديد المخالفه بس

مجموعه صور بدون تعليق

بطاقة

بطاقة

بطاقة

وجبة العشاء

الغريب في الامر انهم جابو العشاء في الساعه السابعه والنصف والله لو انا ورعان

والاهم انه يوم قالوا عشاء طلعوا ناس مدري منين طلعوا واللي ماصلوا قاموا وكلهم يجرون جري

بس انتم شوفوا من جاب العشاء ومن يصرفه  وبعدين احكموا تاكلون منه والا لا

بطاقة

الله عاد الوجبه تفتح النفس (الله يديم النعمه بس فيه شئ ماتاكله الحمير خل الناس)

بطاقة

خبزه + ذ زبادي + مكرونه تحوم الكبد + حبيبات من التمر (فذات)

بطاقة

الناس منهمكين في الاكل والله من الجوع اللي فيهم

بطاقة

الصورة اعلاه لشخص جاء بعدنا في حالة رثه وشكله لما تشوفه تخاف اللي بدون شماغ
عاد انا كنت واقف خلفهم علشان اصوره وسمعته يسولف على اللي جنبه يقول انه مستعد يقعد شهر شهرين ثلاثه بس مايسدد المخالفه يقول اصلا ماوراي شئ اطلع له
انا بغيت اموت في 5 ساعات وانت مستعد تجلس بالشهور

نرجع لموضوعي انا كنت طول ماني في السياره وفي الحجز كنت اكلم كل اللي اعرفهم وناس كثير ماقصورا معي كلموا بس ماهنا فائده المهم انه في تمام الساعه التاسعه والنصف اتصلت في نسيبي وماقصر الرجال كلملي واحد من خوياه وجاني عند باب السجن وتذكرون العسكري اللي كنت اساله اقول كم عقوية السرعه ويقولي ثلاث ايام  جاء خويي وقاله الرجال هذا عندي وطلعت من عنده زي السلام عليكم وقلت له كم العقوبه قال خلاص انتهت

رحت انا وخويي واخذ مني بطاقة السجين الصفراء ورحت انا وياه لملف الموقوفين اليوم وقالي دور ورقتك وادور واحصل ورقتي واطلعا وياخذ الثنتين قدامي ويقطعم ويرميهم في الزباله , صحيح انه ماقصر وبيض الله وجهه بس يقطع الاوراق قدامي هذا يخليني افقد الثقه في المرور اصلا اذا هي موجوده من قبل ,,,,

مايستفاد مما ذكر اعلاه::
اولا::
خمس ساعات في السجن مرت علي كانها 10 سنين ,,
ثانيا :: ناس كثير وقفوا معي وحاولوا والحمدلله الدنيا فيها خير واصدقائي واجد ولله الحمد << قولوا ماشاء الله
ثالثا:: لاتسرع الا اذا عندك واسطه حط رجلك ولاعليك من احد,,
رابعا :: المرور عندنا الله بالخير ماعندك احد قرارات ارتجاليه بس مافيه نظام واضح ,,
خامسا :: سيارتي مرميه في الشارع في مكان مادري الناس اللي فيه صاحين والا حراميه ولنفرض اني اخذت يومين في السجن او ثلاثه هل من المعقول ان سيارتي تبقى في الشارع كذا والله لو اني حرامي واشوف سياره واقفه كذا لاسرقها << طلع على حقيقته

تحياتي لكم ولهذ القروب الرائع ولابونواف
اريجاتو


اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

بطاقة سجين

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول