باريس .. عشقتك قبل ما شوفك .. وشفتك صرت كلي حلم (ج3)


مساااااااااااااء الخير لكل الأحباب ..
مسااااااااااااء الورد لكل الأصحاب …
مساااااااااااء ما يليق إلا بأحبابي … انت .. وأنتي …
كيفكم يا حلوين .. وش مسوين … ان شاء الله بخير وعااااااافيه …


نبدا حلقه اليوم ..!! …
طبعا ما راح اسألك … … اذا كل امور جنبك والا ل … عن عني الثلاجه اليوم مليتها بباسي (جمع ببسي ) …
مفرحاتك يمك … جوالك عطه اخوك الصغير يلعب فيه … شغل لك ميوزك خفيفه … عطني ذهنك .. وبالك .. وتفكيرك .. وكل حواسك .. وخلك معي شوي بس … اوكي !!! … يالله يا قمر …

هيا بنا …

اليوم اول ما صحيت الصباح … وطبعا هالعاده … حطيت المنبه 8 الا 7 دقايق … عشان شسمه .. تم شرحه في الحلقه الثانيه ….
تحممت وصليت ولبست وعينت من الله خير … وطلعت لستار بكس … وطولت شوي فيه …
بعدها قلت اليوم بروح اسوي شوبينق … بعدها راح اروح لشارع الشانز …
الاسواق في باريس .. مو ذيك الكثر … لكن تشتهر بالماركات .. يعني كل ابو الماركات في الكره الارضيه راح تلاقيها … ….
اول شي اخترت سوق .. بعيد شوي عن وسط باريس … اسمه ( اوت ليت فيليج ) ….

اول ما توصله تدخل مثل السوق كبيررررر



وهذه برضو من جوا … كانت الساعه تقريبا 9 … فاضي السوق …



هذا يا طويل العمررررررر .. سوق فيه ماركات عالميه اوكي .. لكن مخفضه بشكل كبير … ليش مخفضه .. لأنها ستايل العام الماضي .. يعني تلاقيها طرحت في العام الماضي .. فيجيبونها هنا ..
ويسوون عليها تخفيض … طبعا اللي تبي تشوفه .. توه ما وصلن … حنا يوصلنا قديمهم دااااااااائم …
طبعا هالسوق فيه ماركات كثيره وعالميه ومشهور .. اول ما وصلت هناك اخذت لي لفه على المحلات ..



فيه اشياء كويسه .. واكثر الاشياء خاصه للبنات … ما خلو لنا شي هالبنات حتى في اللبس ….
وهذه اول ما توصل له .. لوحه ترحيبيه …



بعدين لفيت على كم محل … ما خقيت الا مع الماركه اللي عمبعشأها كتير كتير … وهي …



ارماااااااااااااني ….

كان عنده بعض الحاجيات مرررررره حلوه .. لو اجيبها للمحل اللي على العليا هنا … قال يووووه من وين لك هذه …
عذبني هالارماني … لأن كان عنده جزمه الله يكرمكم مسوي عليها تخفيض .. وطالعه بـ 700 ريال .. وسعرها الاصلي في حدود 1800 ريال .. لكن وشو .. جزمه تهبـــــــــــل …

سودااااااااااا …. وفيه علامه ارماني .. وخفيفه … من جد روووووووعه … لكن هبل فيني يوم قال مافيه مقاسي … بغيت اصيح … لا صراحه صحت شوي …. قلت دور من هنا من هن … قال مافيه والله .. (طبعا ما قال والله .. بس حسيته صادق ) ….
السوق هذا انصح انك تمره .. لكن انتبه … اذا تبي تضبط جدول حلو لرحلتك .. حط هالسوق من ضمن اليوم اللي تبي تروح فيه لديزني … لانه قريب مرررررره من ديزني … تتسوق فيه ودز لديزني .. وبروضو حط في بالك .. انك ما تجيه في يوم الاحد … لأن معظم المحلات مسكره ….
بعد ما تسوقت من هالسوق .. طلعت لسوق ثاني … اسمه ( لافيت) … اول ما قريت اسمه قلت ( لا فليت ) .. لا فليت .. لا بف باف .. لا للحشرات ….
هذه صوره له ….



السوق كبير صراحه .. وادواره وااااااااجده … لكن برضو معظمها للحريم … عارفين ما يدفعون الا هم جعلهم الصلاح اللي يصلح قليبهم

وهذه صوره من جوا …



اخذت لي لفه في هالسوق .. واعجبني قسم الالكترونيات .. والعطوووور .. يا قلبي يالعطور
بعدها طلعت من عندهم .. واخذت الاندرقراوند …



والحين وصلنا لشارع الشاااااانز
ايووووووووووووه بدينا في شارع الشانز …
اسمه شارع الشانزليزيه … انا بسميه شارع الترزيزيه …. ( يعني من الترزز ) …

هذا يعتبر من افخم الشوارع في العالم .. شارع كله كوفيات .. ومحلات ماركات عالميه … تحلو الجلسه فيه في كل وقت … .. فأحلى شي لك الليل …
امممممممممممم خلوني اكون صريح معكم قبل ما ناخذ لفه على هالشارع …
الشارع اوكي .. حلو .. وروعه .. ومحلاته تفتح النفس .. والقهاوي حقته مره تجنن … لكن يعيبه بعض الحركات

معليش على صراحتي … لا يعني فيه من يروح هناك .. عشان بس ابي اغازل … طبعا كلامي مو على الشباب .. لالالالا .. هذاك اووووول .. كلامي على الشباب والبنات …
اول ما وصلت … قلت بلفه كله تقريبا .. وعادي احلى شي المشي هناك …
خلونا نمر على كم محل مع بعض .. اوكي .. يالله …



هذه وكاله مرسيديس …. منزلين سيارات اول مره اشوفها عندهم .. وبمواصفات خاصه …



اعجبني هالجيب .. بس لو فيه لون بيج من داخل … ما ردك يعني الا اللون !!

نشوف محل ثاني …



هذا محل تويوتا … عندهم كم سياره برضو حلوه … شوفو هذه ….



يا عيني على الجنوط …
وهذه من على جنب …



وكان المحل منزل سياره جديده .. سياره صغيره … لكن مسوي حركه .. ان أي واحد يجي ويكتب عليها .. … حاط اقلام جنب السياره .. تعال واكتب اللي تبي وامش .. وناسه من جد … طبعا كل ساعه تقريبا يمسحون الكتابات اللي على السياره .. شوفو معي ..



العالم تكتب في كل مكان .. عاد انا ابيت الا ان اكتب .. . ( قويه ابيت ) …. المهم قلت بكتب .. لكن في مكان مافيه كتابات … اخذت القلم .. وكتبت فوق سقف السياره



ما احب الزحمه

وهذه كم صوره للشارع .. ناس تمشي وفي حاااااااااله .. وموسعتن صدرها ..

بعدها دخلت محل سيارات .. وكاله بيجو … خلونا نشوفها مع بعض …



عندهم سياره .. تجننننننننن صراحه … بوص معايا …



جالسين يخضونها فوق هالبيست … وطبعا من جوا شكلها رووووووووعه .. بوص يبني …



خشت مزااااااااجي ….

بعدها مشيت شوي .. لقيت محل يبيع شرائح جوال …



دخلت عندهم .. وطلعت لي شريحه برقم …
خلونا نشوف كم صوره برضو من الشارع …



و هذا محل …



ايش اسمه !!! ؟؟؟ …

بوس .. !! ( انت هيييييه .. وش تبوس بعد انت … المحل اسمه بوس ) …. برررررى
وهذا كوفي .. جالسين لسى يضبطون فيه …



انت بس شف كيف الاناقه في تضبيط المكان واحترام اذواق الناس … لوه محل عندنا .. كان تشوف كوووومه رمل قدام المحل ..وكم كيس سمنت مجدعات في كل مكان … وهندي يدخن في الزاويه …

وهذا مطعم عنده لازانيا روووووعه… يعشق اللازانيا



بعدها وصلت لنهاااااااااايه شارع الشانز من الجهه اليمين … طبعا الحين نبي نسوي يوتيرن .. ( نديور ) .. نهايه الشارع .. فيه قوس النصر …



هذا سالفته ان فيه ناسن تطاقو ومدري كيف .. واللي تطاقو فيه من اللي فاز .. وفيه من مات ودفنو واحد هناك .. وكتبو اسماءهم في الجدار .. … واضح انه يعرف السالفه لكن ما عرف يوصله ….
هذولي اسماء شسمه … اللي ماتو …



بعدها قطعت الشارع .. وصورت من نص الشارع



طبعا السيارات تمر يمي … اوووووووف … ووووووف … .. بس قلت مصور مصور ……

بعدها وصلت لقهوه فوكيت …



لصاحب السمو الملكي الامير الوليد بن طلال … …. راح يلبس شماغه قبل ما يكتبها ….
طبعا هالكوفي جايينه قبل مشاهير .. يعني ممثلين وشخصيات كبيره … طبعا هالمشاهير جايين قبلي … عشان اكون صادق معكم بس .. … بشويش يابو .. ….
هذه اشهر الاسماء …



طبعا طلبو مني سبيلنق اسمي .. لكن اني عيت .. تكفى عطنا لو الاسم الاول .. وانا اقول لالالالا .. طيب لو بالعربي .. وانا اقول لالالا.. ما ابي الاحراج .. لا تحدوني مره ثانيه ما اجيكم … وخافو من الكلمة الاخيره هذه . ولا لزمو علي
بعد الكوفي بشوي .. ( مدري بعده والا قبله ) … المهم … فيه لفه يمين .. اذا لفيتها … تمشي شوي .. تشوف فندق جورج الخامس … اللي هو فندق الفورسيزين .. حق… الوليد بن طلال
المهم قلت بمر هالفندق شوي … وانا في الشارع … شفت مبنى .. دوووووخني .. شوفوه معي …



أولما شفت هالمنظر .. قلت وش فيها نظارتي الشمسيه خبطتطبعا هالمبنى جالسين يسوون ترميم .. بس سوو هالحركه … من جد نااااااس مبدعه
مشيت شوي .. ولقيت الفندق



لا يفوتك بس راعي الهمر الاسود .. من شارع التحليه للفندق على طوووووول
قلت بدخل هالفندق .. نشوف وش قصته من جوا …



صورت هالورده وطلعت

لا بس حسيته عااااااادي من جوا .. يعني مو ذاااااك الفخامه الفخامه … لا عادي جدا …
اول ما تطلع من الفندق .. تشوف محل الخطوط السعوديه قدامك …



بعدين مشيت ورجعت لنفس شارعنا .. شارع الشانز ..

ولقيت ابو الشباااااااااااااااااااااب هذا



ههههههههههههههههههـ … هذا سكرااااااااااااان .. واصل الدور الـ 423424 … تحسه عاااااااااايش جوه … مريت يمه .. وقربت مرررره يمه .. ابيه يلتفت .. يتحرك .. ياولد .. يا هو .. … ابداااااااا .. كان هالشاشه اللي قدامي تحركت .. فهو تحرك … ابي استهبل عليه شوي .. ابداااااااا .. ما تحرك ….

اصلا جلسه الروقان هذه … ما تشوفها الا قدام بحر.. او نهر … لكن بس كان ودي ودي ودي .. اعرف وش يفكر فيه .. .. احسه يقول . يااااااااربيه .. من وين بجيب ثلج اليوم ههههههههههـ …

طبعا هذا معروف في الشارع .. واللي يروح دايم بيلاقيه .. فيه هو .. وفيه عجوز شمطاء … برضو نفس وضعه …. بس مالحقت اصورها

بعدها رحت لمحل مررررره حلو .. بس قبل ما تدخله شف كم في مخباك من دراهم
المحل هو …

لويس فيتو …..
عاد صورت لكم شناط …



يالله كل وحده تختار اللي تبي …. الزيييييين حولنا .. والشين حوالينا .. قرررررب قرررررب

وهذه برضو صوره ثانيه …



وطبعا مو شناط بس .. لالالا .. فيه اشياء كثيره كلها نفس الماركه …



لقيت عندهم محفظه … كنت بتهور واشتريها .. قلت بكم .. قال مبلغ .. المهم انا ما اهتميت في اللي بعد الفاصله .. يوم حسبتها في راسي .. طلعت بـ 7900 ريال .. … قلت اربط فلوسي في مغاط ولا اشتريها

طلعت من المحل … وكانت رجيلاتي يااااااااااالله تشيلني .. من جد مشيت مشي مو طبيعي … …
قلت بروح اريح شوي .. قلت بحضر لي فلم … عاد وانا امشي في شارع الشانز .. كان فيه دعايه قويه لفلم عاد امام

كان اسمه مرجان او حاجه زي كيذا .. بس لسى ما نزل …
كان فيه فلم ثاني .. اليوم اول يوم عرض له .. فلم لبناني … اسمه كراميل … كان اول يوم له .. قلت اجل بحضره …

الفلم حلو .. وغيرت جو معه …
بعدها رجعت الفندق .. وريحت كثيررررررررررر …
بعدين … اممممممم .. جت الساعه 1 وشوي بالليل … كان الجو هاااااااادي.. وكان الجو راااااااايق .. وكان برى هدوووووووووء … الناس نامت تقريبا … والجو روعه … والسما صااااااااافيه .. اخذت جاكيتي .. والام بي ثري … وطلعت اتمشى في الظلاااااااااام … .
شوف معي درجه الحراره والساعه ..



بعدين ما عشت جوي … رجعت للفندق .. وحطيت راسي .. ونمت …


اليوم يا حلوين .. نكون وصلنا لنهايه حلقتنا الثالثه …
اتمنى من كل قلبي … انك تكون مستمتع … وغيرت جو شوي على حالك …
اممممممممممممم
في الحلقه الجايه .. راح نزور مع بعض …

برج ايفيل …
يوم رومانسي .. يوم في عمري … يوم غير عادي .. كان كل نهاري فيه .. يوم لن انساه طول حياتي ...
اتمنى انك تكون متابع معنا دااااااااااائما …



عشاني تأخرت عليكم اليوم .. … لا احد يجيب شوكته معه .. انا اعطيكم اياها … امممممممممممممم

يالله قرب شوي .. بس شوي … بعد شوي …



من جوا شوكولاته ساااااااااااايحه .. وباااااااااااااارده … بس شوف .. انتبه لملابسك … لأنها يمكن توسخها شوي ….

وياحلوها .. لو جت مع كاس ببسي … وفيه ثلجه تسبح .. وتلعب .. مثل كيذا …



اللللللله .. باااااااااااااااااارد الببسي .. تاخذ كل شوي من كيكه الشوكولاته .. ولا تبلعها .. لالالالا .. تخليها في فمك .. بعدين تشرب شوي ببسي … وتسمع صوت الببسي جوا .. يقول تشتشتشتششش .. الله الله الله .. عااااااااااالم ثاااااااااااااني


اشوفكم على خير …
دمتم في أمان الله وحفظه
لكـــ …. انت بس … مو لغيركـ……
المايسترو::
::
::

متنفسـســــ

قلتي لي أنسى ..
ومن يومها وأنا كل ليلة ..
قدامي البرواز …
حبر العيون ودمع القلم ..
في دفتري ..
وصورتك رغم الألم ..
ورغم أنها خذت من أطباعك كثير ..
وخانت البرواز ..
أشوفها في خاطري ..
حبيبتي ما بيدي حيلة ..
لا صرتي الصورة ..
وعيوني البرواز ..
وشلون ابنسى ..!
.


WwW.Al-Maistro.Com


تعليقات 30

  1. براعة في التصوير امتاع في الشرح فكاهة في الطرح رحلة مميزة امتعتنا بها اشكرك كم تمنيت زيارتها وعشقت سيرتها لم اجد موضوعا كموضوعاتك اوفى واجمل في السرد منها شكرا لك

  2. ماشاء الله عليكم وربي مبدع …….. مواضيعك شي شي شي بالتوفيق يا مسترووو وننتظر الباقي [

  3. كم انسى نفسي ومن حولي واندمج وانا أقرأ سطورك سرد رائع أخذني إلى حيث كنت .. ….. نحن بأشتياق لما تكتب فلا تتأخر

  4. اتابعك من زمان…حلوه رحلاتك… والفوكيت احلى واحلى.. والاجمل الشانز,,, وباريس هي متنفسي وعشقي وملفاي.. خاطره: مجنون بك وأعترفلك صرت مجنونك لا الذنب ذنبي ولا ذنب الهوى ذنبك لو كل هالناس بعيوني يشوفونك إن كان ذاب بغلاك العالم و حبك طبعا اقصد باريس(:

  5. رووووعة احلا شيء في الموضوع كله..السوووووووووووق هههه امزح صراحة الموضوع رهيب اسلوبك شدني لين تقطعت نفسي اروح هناك واشتري السوق كله وارجع السعودية

  6. بارك الله فيك يا المايسترو بس في تنبيه أحب أقول لك عليه ترى البيتزا في مطاعم أوروبا حتى لو اخترت من دون لحم خنزير فالأنواع اللي بلحم الخنزير يسيل منها دهن من شحم الخنزير فتختلط الزيوت ببعضها ويجي على بقية أنواع البيتزا منها لأنها كلها تطبخ في فرن واحد

  7. جد حد عشت جور هييييييييييب تحيلتني فيها يسلمووو على الصوور وانتظر جديدك لاتتاخر عليا

  8. الله عليك ياحظك والله باريس جنااااااااااااان انا نفسي اطلع من السعودية لو البحرين مفيش الله يعطيك الف عافية وانشاء الله تكون دايما مستمتع

  9. تحية إعجاب توصلها الرياح لك أخي المبدع على هذه الرحلة الرائعة شجعتني << بكرة بحجز لهناك لووول نترقب الجديد بشوق

  10. خطييييييييير .. ومزاااااااجي . وكلك كلك على بعضك (حلم ) إلا طلبتك … حركة الوجبة إلا بالنهاية .. المرة الجاية جيب شي نلقاه ( بالبطحة ) اشغلت عيالنا الله يصلحك .!!!

  11. يعطيك العافيه مايسترو بس واللي يخليك لاتحط شوكلا بالاخير ترا سعابيلنا ساحت منها ..يسلمواعالصور اللي كلها ابداع

  12. هلا اخى بجد تغطية حلوة اشركتنا فى زيارتك باريس وكأننا معك حلوة كمان جدا الصور والتغطية الشاملة اللى عملتها

  13. Very creative Report beautiful I like photography very And wonderful style of presentation Forward Thank you

  14. الي يعجبني اكثر شي فيك, انك كل ماتطفش تفك علبة بيبسي مو اي شي ثاني خخخخخ قلنا لايكون الشيطان لعب في راسه ماشاء الله عليك يكاد اسلوب طرحك يفوق جمال الصور الطبيعيه الجميلة احلى شي عجبني في هالحلقه كتابة المايسترو على سقف السياره رووووعه ننتظر حلقاتك بفارغ الصبر,,,,,

  15. انا نجم ماأحب أسافر خارج المملكه أبي الر باض و بس الرياض وبس الرياض وبس ماأفصرت أبونواف على الصور باريس

  16. الله يعطيك العافيه حنا شباب كنامجمعين قطه بنطلع البحرين وماقد اختلفنا لاكن بعدماشفنا المناضر الحين ندور كفيل يطلعنا من قسم الشرطه مطاقين الله لايهينك استعجل علينا كلن راح يطلب القطه الي لــــه……

  17. جد جد ماشالله عليك خلاص الصيفيه هذي يبيلناا طلعه زيك وبخلي مواضيعك هي الخريطه ربي يحميك وربي كاني معااك بالرحله وصفك واسلووبك حلوو ربي يسعدك (ورده) << تخيل هههه

  18. اخي الكريم تقرير جميل وصور مميزة واسلوب عرض رائع لكن لو تترك كلمة عشق فقط لانك مسلم والمسلم لا يعشق بلد كافر قال – عليه الصلاة والسلام – في الحديث الصحيح : « من أحب لله وأبغض لله ، وأعطى لله ومنع لله ، فقد استكمل الإيمان » [ أخرجه أبو داود ] . السفر والسياحه جميله لكن اعلم بعض ماكتبته يتنافى مع عقيدة الولاء والبراء المؤمن لايعشق ابدا بلد كافر وفقك الله لكل خير

  19. يوم غير عادي.. يوم رومانسي… وقلووب حب افا يامايستروا لاتكون العجوز اللي فب الشانز.. اخذت عقلك….ههههههه يعطيك العافية يامبدع

  20. هايووو كيفك خيوو انا كنت اتابع الرحلة قلبا وقالبا هع والرحلة عوجااااااااااابة << مين .؟ بس وش فيك ماكليت فليك في هذا الجزء << لقافة .! ومتى انت تنزل الاجزاء الربوع ؟

  21. يعني كل مرة أعيش جو ثاني ..وبنهاية الحلقة ألقى نفسيبالرياض..وما أدراك… أما باريس كنت أستنى حلقاتها من بداية لندن .. فعلاً كل شي أعجبني.. أسلوبك .. تصويرك.. المفرحات أهم شي شكراً لك على مجهودك

  22. من جد ياااااااااااااااااااااااااااااااااااااااااي مره مره مررررررررررررررررررررررره ابي ارووووووووووووووح ياااااااااااارب اروحلها بالقريب العاجل<<رحمتني بس مشاءلله تبارك الله سفره حلووووووووووووووووووووه مررررررررررررررره وتصوير خياااااااااااااااااااااااااااالي والله والاحلى والاحلى من هذا كله اسلووووبك مرررررررررررره يجننن دمك عسسسسل سمالله عليك 🙂 بصراحه اكثر شيء خقيت معه محلاتهم 🙁 وانشاءلله تلف العالم كله وتنبسط اكثرر واكثررر (*_*)

  23. جولة ممتعة بالصور…يعطيك العافية وبانتزار بقية الاجزاء .. ماشاءالله وش نوع كاميرتك؟

  24. الله يعطيك العافيه مره قطعت قلووووووووووبنا يالله ان شاء الله يرزقنا ربي بفرصه ونروح هالاماكن

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

باريس .. عشقتك قبل ما شوفك .. وشفتك صرت كلي حلم (ج3)

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول