باريس، قصة عشق لاتنتهي ج3


عودة مع الجزء الثالث في باريس

في يوم الجمعة اللي هو اليوم الثالث لنا هناك
تخطيطنا كان : زيارة متحف الشمع + جوله بـ نهر السين + برج إيفل والطلعه فوق

صحينا الصباح وافطرنا بالفندق وطلعنا لـ محطة المترو اللي جمبنا George V
وانطلقنا لـ محطة Grand Boulevards واللي عندها متحف غريفن للشمع

هذي بوابة المتحف


الدخول للـ متحف بـ 19 يورو للـ شخص
وهذا موقعهم للي حاب يعرف معلومات أكثر :Grevin Museum

اول مادخلنا سووا عرض خطييييييييييييييييير و يخقققق
فيه مكان زي المساحة الدائرية واطرافها كلها مرايات وقفنا فيه شوي
بعدين الدنيا ظلمت و بدت الميوزك والاضاءة بالالوان والاستعراض
يعيشونك جو معين مثلاً يحطون ميوزك افريقية والتماثيل افريقية وزينتها كل شي افريقي
بعدين ميوزك هندي وتتحول التماثيل هندية وهكذا
بس بصراحه العرض كان مجنوووون .. لكن للأسف ممنوع التصوير

بعد العرض دخلنا للمتحف و تماثيل الشمع
اول تمثال كان للـ ممثل الأمريكي المشهور Bruce Willis

والممثل Arnold Schwarzenegger

وهنا مسوين زي المسرح والتماثيل تتفرج واللي يطل من فوق

الممثل Harrison Ford

Jackie Chan

رؤساء دول و شخصيات سياسية

يوم وصلنا هنا تسدحنا ضحححك

طبعا هذولا كلهم تماثيل
لكن تشوفون اللي لابسه احمر .. هذي صدقيه موب تمثال
جالسه كذا مسويه نفسها مع التماثيل واللي يمر و يقلط في خشتها
تقوم تصفق بيدينها في وجهه << ترى ماهبلت فيني كذا
وقفنا شوي عندها نبي نشوف اللي يجون كان ورانا ولد عمره يمكن 15
يوم جاء وقرب منها و تهبل فيه المسيكين من الروعه طاح بالارض خخخخ
لا وبنت اللذينا على طووول ترجع لـ وضعها الاول حتى مايدرون عنها اللي جايين

هذا الممثل Jean Reno

نجم فرنسا زين الدين زيدان
بس قهر هو الوحيد اللي ماضبطوه صح

* اعتذر عن رداءة جودة الصور القادمة
لان بطارية الكاميرا خلصت فـ اضطريت اصور بـ الجوال !

منتخب فرنسا واحتفالهم بـ كأس العالم عام 1998

نابليون و مجسمات للـ جيوش وتوزيعها

ليوناردو دافنشي

هنا وصلنا منطقة كأنه سجن تشوف الزنزانة والسجين يطل منها
وحاطين اصوات ناس تبكي وتتوجع

وهذي رقاصه

الجوهرة السوداء بيليه

آينشتاين

آلفيس برسلي

مهاتما غاندي

مايكل جاكسون
مدري وراه بطنه مربع

الملكة إليزابيث

وهذي صورة مقربه أكثر
مهتمين بـ أدق التفاصيل في ملامحها والشعر وتجاعيد الوجه !

هذا البابا يوحنا بولس
وشكل اللي جنبه شغالتهم

شاروخان

سيلين ديون

طبعاً غير استعراض الشخصيات المشهورة
موجود بـ المتحف استعراض لـ حقبات تاريخية و أحداث أثرت في مجرى التاريخ
مثل فترة انتشار مرض الطاعون و فترة الاستعباد و اغتيالات الشخصيات السياسية


خلصنا من المتحف
طبعاً فيه شخصيات كثيرة بس حاولت اختار أكثرهم شهرة
طلعنا مع جهة ثانيه وسط سوق صغير

تمشينا شوي ثم قلنا بـ نرجع للـ فندق عشان نشحن الكام
لان ورانا يوم طويييل و حافل و الكام ضرورية جداً
المشكله اني كنت شابكها بالليل واحسبها تشحن صار السلك مرتخي وماشحنت شي

بـ انتظار المترو

يوم طلعنا ع الشانز لقينا الدنيا مطر والجو خققآآآآآآآآن

أكلنا و ريّحنا وتمشينا شوي .. يوم شحنت بطارية الكاميرا
طلعنا متجهين لـ نهر السين عشان ناخذ جوله في الكروز

رحنا بـ المترو لـ محطة Alma Marceau في الخط 9
تطلعك قريب من الشعله و النفق اللي توفت فيه الأميرة ديانا

هذا النفق
شوفوا التعازي والشخابيط المكتوبه عليه

مشينا فوق الجسر لان الكروز بالجهه الثانية
وهذي أول اطلالة لـ برج ايفل

في الطريق أعجبني منظر الشجر كذا

وصلنا

شرينا التذاكر سعر الوحده بـ 11 يورو

انطلقنا في الجوله

طبعاً موجوده سماعة عند كل كرسي
وفيه ست لغات تقدر تختار اللي تبي
حتى يشرح لك كل الاماكن السياحية اللي نمر من عندها

هذا متحف اللوفر
جايينك بكرا ان شاءالله

وفيه عالم متسدحه على ضفاف النهر << متعوووب عليها خخ

أحلى شي العالم اللي يتفرجون علينا من فوق الجسور والا ع اليمين واليسار
اول ما نأشر لهم يتحمسوووون معنا اللي يصارخ واللي يصفر خخخ
شوفوا هذا ولد صغير عيا يمشي مع ابوه وقف متحممس يأشر

هذي لقطة على الكروز تبعنا << شاريه بفلوسك الظاهر خخ
شوفوا بالله الحرمه السمرا هذيك اللي هنااااااك
من اول ماركبت وهي ضاربتها نوووومه
كان جلستي في بيتكم احسن لك خخخخ

اللي هناك كاتدرائية نوتردام .. نجيها في آخر يوم ان شاءالله
هذولا قروب جابانيز تحمسوا بقووووه معنا وقاموا يأشرون و يصارخون
حسيتهم بـ يطبون في النهر من الحماس

الجو كان خيآآآآلي ذاك اليوم


هذا يقولون انه سجن قديم والحين قلبوه متحف

وهذا أقدم جسر في نهر السين

والحين بـ طريق رجعتنا



مروراً في برج ايفل

نزلنا من الكروز ومتجهين لـ برج ايفل .. مشي خطوتين بينهم

فيه درج و عنده رسامين و زحمه شوي
لقينا هذي تشحذ بس بـ طريقة فنية

مسويه كنها من الفراعنة وحاطه العلبه قدامها
اي واحد يحط لها فلوس تركع
كانوا موجودين بزران هبلوا فيها المسيكينه
شافوها ماتقدر تتحرك ولاتسوي لهم شي
صاروا يحطون فلوس واذا ركعت رجعوا اخذوها
قسم بالله رحمتها

بـ كذا نكون وصلنا لـ نهاية الجزء الثالث من رحلتي إلى باريس
و أتمنى يكون نال إعجابكم واستحسانكم

أشوفكم يوم الاربعاء القادم ان شاءالله مع الجزء الرابع
و مع تحفة باريس الفنية برج ايفل !

كونوا بـ القرب دائماً


تعليقات 17

  1. استمتعت كثيييييييييييييييييييييييييييير بالتقرير وقريت ال3 تقارير بنفس الوقت 😀 اسلوب مشوق وصور راااااااااائعه ننتظر الجديد وبالتوفيق

  2. اشكرك اخوي على الصور الرائعه اكثر شي اعجبني هو المتحف صراحة فن لايعلى عليه في نحت الشخصيات ..!!

  3. ياليت اخي وفقك الله تطمس على صور النساء علشان ما تتحمل سيئات غيرك بارك الله فيك

  4. ( هذا النفق شوفوا التعازي والشخابيط المكتوبه عليه) تتوقعون هذا النفق فيه موية مثل نفق الدمام ؟ وصحيح كيف الانفاق عندهم تنشف بلحظات على كثر الامطار ؟ ماسبب . قبل الاختام نشكر صاحب الموضوع على هذا المجهود الجميل

  5. الله يعطيك العافيه على المجهود الرائع وفعلا المتحف جنان وفيه ابداع غير طبيعي وارضهم تجنن وانشا الله انتو تكونو مرتاحين في الدولة اتمنى لكم رحلة سعيده وعوده حميده تحياتي انثى بلاحدود

  6. اعجبني الجو يهبل التقرير حلو عشت الجو معاكم ضحكت ع هذي الي مسويه كنها من الفراعنة هههههههههههه

  7. ايميل اليوم رائع انبسطت على متحف الشمع 😀 وكل الصور سبحان الله طبيعتهم جناان شكراً جزيلاً بانتظار برج ايفل :$

  8. والله أول مره اقرا موضوع وانا اتشقق من الفرح:D لأني حسيتني في عالم ثاااااني مع الصور>>>على بالي كنت معكم:$ هذا كله لأني اعشق باريس من صغري و مشتهيه اروح لها>>>ماحزنتك بالله:( بس مشكور اتمنى من كل من يقرا تعليقي انه يدعيلي اتزوج واحد فله يوديني شهر العسل لباريس…وشكرا(والله كسبت اجر و فرحتني):D

  9. الحمدلله على سلامتك اعجبني كثيرا متحف الشمع ولكن استغربت انهم عبروا عن العرب براقصة اجزم انك لم تعلم عن ذلك

  10. ذكرتني بايام مضت المتحف نفس فكرتي لما رحت الاختلاف انه جابوا ساركوزي بدل شيراك رائع التقرير واصل

  11. وش خليت لنا من صور وتعليق , وصحيح فرنساعشق يتجدد وتسلم الايادي , وسلمني على ميلوز وستراسبورغ

  12. الله يعطيك ألف ألف ألف مليون عافية والله الذي لا إله إلا هو إني يوم أطفش من النت أدخل على إيميلي وأستنى تقاريرك أنا متابع أعمالك بشغف وأسلوبك رااااااااااااااااااااااااائئئئئئععععع الله يدخلك جنات النعيم الله يوفقك ونتمنى المزيد من التقارير يارب يكزن في تقرير 7 و 10 و 1000000 مرة أخرى يعطيك العافية

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

باريس، قصة عشق لاتنتهي ج3

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول