انحراف عجوز ! ( الجزء الثاني )


بسم الله الرحمن الرحيم
السلام عليكم ورحمة الله وبركاته

انحراف عجوز ! الجزء الاول

صباح الخير ياشباب << وجه متلطم

بالله تشوفون وشلون البرد ؟

قسم إن البرد ماهوب طبيعي ، هذا وأنا لابسن أنواع الفنايل وفوقهن فروة بس برضو برد ، أنا توقعت إن الفروة تستهبل
، وأجي أفصخها وأحطها فوق الكرسي وأجلس أقزها قز بحقد وأرجع ألبسها مرة ثانية ونفس الحكاية ماعاد تدفي ،
وأفصخها وأقعد أقلبها قلت يمكن فيها فيش ولازم تشغل تشغيل … الله يعين بس .

تصدقون اليوم يوم طلعت لصلاة الفجر لقيت بطريق عند بابنا ؟ … قلت : وش جابك بذا ؟ ، قال أنا أدري عنك أنا الي
أتسذب وإلا أنت .

مالكم بالطويلة موضوعنا اليوم هو الجزء الثاني من قصة ( انحراف عجوز ) والي تأخر بسبب إنشغالي وليتكم تعذروني
على التأخير ، وهذا الجزء الأول للي ماقراه :
 


انحراف عجوز

( الفصل الثالث )

رحت لشرطة العليا ، وطلعت المشكلة إن أم مرزوق وجدتي ساداتن مواقف أسواق العويس بالجمس الأخضر حق أم مرزوق
ومشغلاتن المسجل على آخر شي وقاعداتن يرقصن .

أنا يوم عرفت القضية انحرجت من جد من الضابط وحاولت أخلص الإجراءات بأسرع وقت خصوصاً إن مدمن شاهي طلع هو
القهوجيحق الضابط الي ماسك القضية والله يستر لا يصير درى وش السالفة والله إن يفضحني بين الله وخلقه .

كفلتها وطلعنا من مركز الشرطة ورحنا للبيت ويوم جاء العصر اتصلت علي وقالت لي جب لي معك قلم خطاط أخضر ، قلت
وش تبين فيه ؟ ، قالت : أبطبع صورة كرستن ردوالدو على زندي ، قلت : يعني تبي تسوين وشم ؟ ، قالت : ايه تبي نطبع لك
صورته بعد ؟ ترى ماهنا ملحه ملعون الوالدين .

قلت : لا مابيها ويصير خير إن شاء الله .

أول ماقفلت السماعة قلت لابد إني أتدخل تدخل إيجابي هالمرة ، وعلى طول توجهت للبيت ، وناديتها وجلسنا أنا وإياها بالملحق
ويوم جلسنا قلت : يا أميمتي هالحين وش الي أنت قاعدتن تسوينه ؟ ، قالت : أنا هالحين صرت متطورة مانيب مثل أمك القروية
إلا يالجنط ورى ماتصير متطور مثلنا ؟ ، قلت : يا أميمتي التطور ماهوب كذا ، قالت : إلا أم مرزوق تقول إنه تسذا لازم نصير
مثل المريكانيين .

قلت : يا أميمتي التطور ماهو ينمسخ الإنسان من كل شي ، التطور إن الإنسان يصير منتج ومبتكر ومفكر ويعتز بقيمه وتاريخه وثقافته
ماهوب بس يلبس لبس فاصخ ويوشم جسمه ويقلد السفلة من كل مجتمع ويقول تراي تطورت .

الجنط : يا أميمتي أنت لازم تتركين أم مرزوق ولازم ترجعين للديرة وترجعين لجدي وتعيشين حياتك بكل سلام بين عيالاك وأحفادك
، قالت : وشو جدك ؟! أنت ماتدري إني طلقت جدك ؟! ، قلت : وشلون تطلقينه ؟! وهي العصمة بيدك ؟ ، قالت : إيه أم مرزوق
تقول إن المتطورين حريمهم هن الي يطلقن ، قلت : لا ماهوب على كيفك ، العصمة بيد جدي وأنت هالحين إن شاء الله تبي تضفين
أغراضك وإن شاء الله ما نصلي العشاء إلا بالديرة وترجعين لرجلتس وأهلتس.

قالت : أنت الي ماهوب على كيفك ، وأنا أصلاً مطلقتن جدك وأبحط لي صديق مثل أم مرزوق ، هالحين أم مرزوق مطلقتن رجله
ومصادقتن أبوناصر الي بيته بأقصى الحارة .

قلت : أهااا إثر الدعوة تسذا ؟ ، قالت : إيه تسذا ، وأنت ياوليدي لا تصير معقد خلن أشوف لك صديقة من حريم الحارة وعش حياتك ،
وفي هاللحظة دق جوال أمي مزنة وقطع ، قالت : يالله أم مرزوق وصلت أبروح أجلس أنا وإياه بالمجلس ، قلت : الله يحفظتس .

وأول ماطلعت من الملحق وأنا أتصل على علي أبورجل مسلوخة وقلت تعال لي بأسرع وقت .

ربع ساعة إلا علي عندي بالملحق وأجي أقول له كل الحوار الي صار بيني وبين جدتي قبل شوي ، قال : إلا يالجنط ودي أسألك سؤال
من زمان بس ماجت له مناسبة .

قلت : سم اسأل .
قال: فيه ناس يقربون لكم نصارى ؟
قلت : لا ، بس ليه هالسؤال ؟
قال: لا ولا شي بس يا أخي ما أدري ليش أحس إنكم كفار !
قلت : ما أنت بعاقل يا أمير المؤمنين ، لا يكثر بس وشف لنا حل بهالمشكلة .
قال: هالحين وين جدتك ؟
قلت : داخل بالمجلس هي وأم مرزوق .
قال: تمام تمام ، أجل قم وشف لي درب أبدخل عليهن .
قلت : وش تبي بهن ؟
قال: لايكثر وقم شف لي درب بسرعة .

رحت وشفت الطريق ورجعت إلا علي واقف بنص الحوش وماسكن الزبيرية بيده ، قلت : ماقدامك أحد ، قال : أجل اصبر لي عشر
دقايق لما أجيك .

دخل علي ومن يوم دخل و صراخ العجز يسمعه الي بآخر الشارع ، وبعد ربع ساعة من الجلد المستمر طلع علي يسحب أم مرزوق بيد
والزبيرة باليد الثانية تقطر دم ، وقعد يسحبها لين فتح باب الشارع ورماها ، بعدين رجع وسحب جدتي وفتح الباب الي ورا بسيارتي ورماها
فيه وقال : يالله لا توقف إلا في بيت جدك .

وفعلاً أنا على طول رحت بجدتي للديرة وطول الطريق وهي ساكتة لين وصلنا الديرة ، نزلتها في بيت جدي ورجعت وانقطعت أخبارها عنا
أسبوع كامل ماندري وش الي صار فيه .

بعد أسبوع أخذت الوالدة ورحنا للديرة ، ويوم وقفنا على باب بيت جدي سمعنا ضحك بالحوش ، طقينا الباب وفتحت لنا الشغالة إلا الي يضحكون
جدي وجدتي … جالسين يتقهون ويضحكون ومستانسين .


انتهت القصة
دمتم بأحلى ابتسامة
أحسن واحد بالعالم
د. جنط السفينة



تعليقات 21

  1. السلام عليكم ورحمة الله وبركاته انا من اشد المعجبين فيك اخوي جنط ولكن يؤخذ عليك بعض العبارات اللتي تنقص من نجوميتك وجمهورك مثل شكلكم كفار وأمير المؤمنين ماعتقد لها اي علاقه بالموضوع وأدخالها بالموضوع مايضيف اي دعابه الا انه استهزاء بالدين اتمنى انك تقبل انتقادي بصدر رحب انتضر جديدك

  2. اخي العزيز .. ارى ان ماتكتبه نتيجة فراغ وكلام فارغ! .. يعني يجي شخص يتكتب (بالأسلوب الموحد في جميع المنتديات الساخره .. حقين تسذا ما تسذا ),ما يراه انه قصه او حتى عمل ادبي هزلي .. وهو بعيد كل البعيد حتى عن الخربشات! مع النهايه الفارغه! .. تقبل الرآي الآخر .. فطالما نشرت .. فهناك ايضاً من ينشر رآيه.:~

  3. ياجنط سفينه انت انسان نكته. ياليت لو يحطونك رئيس أدارة المتستسين. القروب هذا روعه روعه روعه وانا من اقدم الناس في هذا القروب من 2002. والله يعطينا طولت العمر ويعطي ابو نواف طيلة العمر عشان تدوم البسمه بوجوه العالم. وترا جدتك محفوله مكفوله هنا عندي بمريكا. وبعتبرها زي جدتي الله يسكنها فسيح جناته واخليها تتطور على اصول هههههههههههههههههههههه وبخليها تحط صورة جدك تاتو ( وشم). لكن ياخيي ودي اخش معكم بالقروب لكني ما اعرف كيف اسوي رساله والا ادري كيف ارسلها تكفى ساعدن ي اذا ماعليك امر واذا ودكم امسك قسم الرسائل الانجليزية ترا قدام . يلا الله يوفقكم ويوفقني.

  4. :مرررررررررررررررررررررره حلو يعطيك العافيه ونستني: تصلح مع طاش ماطاش..

  5. السلاااام عليكم وش رايك يالجنط اقتبس والا اثبت الموضوع اول خخخخخخخخخخخخخخخخخخخخخخ اووووما جدتك ذي شكلها فله ياليت من يصادقها والله:D ماشاء الله ماقصر علي حلال المشاكل :$ الا تعال غريبه مقصر الجزء بس تبي الحقيقه احسن اهم شي الزبده عواااافي يالجنط ماقصرت والله رسمت الضحكه على شفاهنا

  6. .. يالجنط.. مااش اليوم موب زي أول .. مدري البرد أثر على الاسلاك عندك

  7. أبورائد وعليكم السلام ورحمة الله وبركاته هلابك أخوي وصدقني أتقبل أي نقد وبصدر رحب ، لكن ودي تفهم شي واحد الاستهزاء بالدين كفر ، وأنا لو أشك ولو واحد بالمية إن ذا استهزاء كان ماقلته من البداية . عموماً ليتك تضيفني بالايميل أبغاك الله يبارك فيك . ******* No-name هلابك أخوي هالحين أنت اعتراضك على ايش ؟ يعني أنت تعترض على الكتابة بالعامية وإلا تعترض الأفكار والأسلوب ؟ إذا كنت تقصد الكتابة بالعامية فهذا موضوع طويل . وإذا كنت تقصد الأسلوب وإن القصة سخيفة فأنت تعلم قبلي إن الناس أذواق والأشياء الي تعتمد على الذوق تختلف من شخص لآخر . يعني حنا ماحنا في معادلة رياضية تقبل الصح والخطأ ، حنا في عمل يعتمد على الذوق والي مايعجبك يعجب غيرك . أنت ثقافتك ولهجتك وأفكارك تخليك ماتقبل هالعمل وغيرك تكوينه وثقافته ولهجته تخليه يقبل العمل . باختصار نحن بمسألة جمالية لاتقبل الأحكام المعيارية فخذ مما يليك ودع ما بعُد . وحياك الله وبياك

  8. أخو جنط السفينة خخخخخخ ويطول عمرك إن شاء الله بالنسبة للارسال للقروب شف الايميل الي يجيك مع الرسالة تلقاه تحت ، الي هو : أبونواف @ قروب ياهو خخخخخ ******** رنومة حياك الله ودوم الضحكة . ***** لمبة محترقة خخخخخخ وشلون دليتي القروب وأنت ماتدلين بيتكم ؟ خخخخخخخ حياتس والله ودوم هالضحتسة

  9. نهايه غير متوقعه للقصه كنت مره متحمسه للنهايه :~ بس تظل مبدددددددددددددددع في عيوني ننتظر جديدك ..

  10. اخ جنط السفيه انا ما انتظر من القروب كله الا ايميلاتك مبدعه وفيها روح حلوه اعتقد انك هنا مو في منتدى ادبي عشان يحكم على ادائك !! مع اني اعتقد انك لو فكرت تسوي روايه ادبيه بتكون مره روعه شكرا لك واتمنى اني دايم اشوف ايملاتك من جد احسن واحد بالعالم :$

  11. بسم الله الرحمن الرحيم في البداية ما اقول إلا بسم الله عليك بصراحة انت قمة مو قمة وبس إلا توب في الإبداع

  12. سلام يالمبدع ..!! والله كلامك روعة .. وفيه اسقاطات كبيرة وواضحة .. بس في طريقة حل المشكلة .. ماتوافقني انها كانت لاختصار القصة .. وانا من اشد المعجبين بقلمك يالغالي ..!! بس موضوع الخاتمة مب خاش مزاجي .. انت شكلك تبي تفتك من القصة ..

  13. بصراحة يا الجنط تنفع روائي برتبة آينشتاين والله علي أبو رجل مسلوخة صار له فايدة ننتظر جديدك

  14. اه اه من الانحراف وخصوصا الشيبان لانحرفوا ضيعوا الدنيا خخخخ وربي انك كاتب منت بسيط ياولد لكن الله يوفقك ناصر الحربي

  15. قصه حلوه صح اني ماشفت البارت الاول بس باين من الثاني ان الاول حلو مشكوووووووور اخوي على هالقصه

  16. السلام عليكم ورحمه الله وبركاته الله يعطيك العافيه اخوي الدكتور والبرفسور جنط صراحه انت مبدع واهنيك على الروح الحلوه بس تدري شنو اللي ناقصك بجميع قصصك ناقصك انا لاني لي فايده خطيره في جميع الامور الثقافيه خخخخخخخخخخخخخ مشكور والله يعطيك العافيه ننتظر جديدك

  17. ….أخيرآ دكتور نزلت الجزء الثاني؟؟؟:D ….الله يعطيك العافيه على هالمجهود!!! ….بصراحه روعه مثل ماتعودنا منك دكتور جنط؟؟!! ..بس؟؟؟ لي ملاحظه صغيروره؟؟؟ أحس هالجزء مختصرررر جدآآآآ؟؟؟ مدري أحداثه انتهت بسرعه…. …بس تظل روعة النص موجوده…. بالتوفيق!!!:$ تقبل تحياتي…

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

انحراف عجوز ! ( الجزء الثاني )

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول