انبراشة ثقافية‎


بسم الله الرحمن الرحيم
السلام عليكم ورحمة الله وبركاته

هذا المقال موجه للنخبة فقط و إذا كنت ملحط مثلي ، فالله لايهينك امسك الباب

أول شي خلوني أعرفكم بنفسي ، أنا الدكتور جنط السفينة border=0 ، إنسان ملحط وغير مثقف يعني من الرعاع -زي ما تسمونهم-
أو من البسطاء أو من الجحلط أو رويبضة أو أي شي تبونه .

الي خلاني أكتب هالمقال إنكم دبلتوا كبودنا وضيعتوا حقوقنا وقروشتوا أمنا بخرابيطكم وصراعاتكم الغبية ، ولا تحسبون إن الوضع
معجبنا -حنا يالرعاع- بس المشكلة إننا مانعرف نشخبط مقالات مثلكم ولا نعرف نبيع كلام .

طبعا المقال هذا موجه لأغلب النخبة يعني تقريبا 90٪ من نخبنا الموقرة ، أما الباقي فهم مثقفين (بحأ و حئيئي) ويحملون همومنا مثل الغذامي
و العودة والرطيان والأحيدب ونجيب الزامل لكنهم مع الأسف قليل و أستثنيهم هم و أمثالهم من هالمقال .

يعني بعد ما تقرا المقال شف أنت من العشرة بالمية أو من التسعين بالمية ، وإذا كنت من التسعين بالمية فلا ترد علي ولا تعلق ، الي أبيه منك
إنك توقف تفكر شوي بوضعك و إذا كان كلامي صحيح فياليت تغير نفسك وتحاول تطور نفسك عشان تكون شخص مفيد بدل المصخرة الي قاعد تسويها أنت ووجهك الي تقل الساعة سبع الصبح .

وترى عادي الواحد يراجع نفسه و يحاول يتطور بشكل إيجابي ، مثلاً أنا يوم كنت صغير كنت جنط مشّاية ، وكان أقصى طموحي إني أصير جنط سيكل سطعش جبلي ، بس بديت أتابع إبراهيم الفقي -الله يرحمه- إلين صرت زي ماتشوفون : جنط سفينة أد الدونيا و إن شاء الله بيوم من الأيام بصير جنط مكوك فضائي border=0 .

المشكلة :

وش مشكلتكم ؟
مشكلتكم ببساطة : إنكم زلايب -مثلنا يالرعاع- بس الفرق إنكم أنتم ماخذين مقلب بأنفسكم ولا تدرون للحين إنكم زلايب ، ولا عمره جاكم
أحد وقال لكم : تراكم زلايب ، ولا تغرك الألقاب ترى عادي تجي دكتور وزلابة بنفس الوقت .

يعني أنتم على بال أمكم إنكم النخبة و إنكم تمثلون قضايانا و همومنا و إنكم تتحركون نحو الإصلاح ، والواقع إنكم عكس ذا كله ، وبالنسبة لنا
يالرعاع فأنتم عقبة في طريق حقوقنا نتمنى زوالها بأسرع وقت border=0.

قضايانا و حقوقنا الحقيقية : ( الصحة ، التعليم ، الأمن ، الإسكان ، المخدرات ، البطالة … ) والقضايا الي تتكلمون وتتهاوشون عندها :
( الهيئة ، الجنادرية ، بهو الماريوت ، رضاع الكبير ، قيادة المرأة للسيارة … )
يعني بالله فيه أحد يقارن بين ما تسويه وزارة التعليم بنا بقضية رضاع الكبير ؟!!!!

وزارة التعليم بتخرج لنا أربع ملايين معاق فكريا ، و أنتم تقولون لنا نعناع وما نعناع !!!
وزارة الصحة لاعبتن بحسبة أم أمنا ، و أنتم بهو الماريوت وما بهو الماريوت !!!
ثلاثة أرباع الشعب متلحط بدون سكن ، و أنتم قاعدين تبربرون هنيا !!!

أنتم ما تمثلوننا ، أنتم تمثلون المقلب الي آكلينه بأنفسكم ، واحد مسوي نفسه ابن تيمية والثاني مسوي جان جاك روسو !

من كثر ما أنتم زلايب ما أنتم قادرين تكتشفون الحقيقة للحين ، أنتم من أكبر خدم الفساد ، أنا لو كنت وزير الصحة أو الإسكان أو غيره
كان مشيت لكم رواتب على المرتبة الثامنة بمسمى : زلابة أول و زلابة ثاني … ، وإلا مشيت لكم بدل وسميته : بدل إشغال الناس عن قضاياهم الحقيقة border=0 .

الحوار :
مشاكلكم الغبية كوم و طريقة حواركم كوم ثاني ، الظاهر إنكم فاهمين إن الحوار هو البعير لاصار بثاني متوسط ، و إلا فيه
بني آدم يتحاور بهالشكل ؟!!

مرة كنت بتحاور مع اثنين ، واحد ليبرالي والثاني إسلامي ، قبل نبدا الحوار قلت لهم : اسمعوا ، ترى أنا متخلف ورجعي وتغريبي
وعميل للسفارات وطالباني وإرهابي ومتشدد ورويبضة …
مادريت إلا يوم قاموا بيمشون ، قلت : على وين ؟ ، قالوا : خلاص انتهى الحوار ماعندنا شي نقوله .

بعد ثلاثة أيام اتصل على الإسلامي ، قلت : سم ، قال : يا أخي لي ثلاثة أيام مواصل وعجزت أنام ، لكن الحمد لله فتح الله علي
ولقيتها ، قلت : وشو ؟ ، قال : يازنديق طوط طوط طوط …..

بالمختصر هذي طريقتكم بالحوار : تخوين ، تشكيك ، اتهام ، دخول بالنوايا ، انعدام للمصداقية ، انعدام للإنصاف ، تصنيف ،
كلام بذيء ، انتصار للذات والتيار …
بس باقي نعطيكم دورة بمجلس الشورى عشان تتعلمون وشلون تقولون لبعض : كل تبن ، وتتعلمون الحركة الخطافية
لفك المايك إذا كنت على الهواء مباشرة

يعني زيكم زي ردود اليوتيوب بس أنتم تدخلون كلمات تحسس المتابع إنكم فاهمين وأنتم من جنبها ، مثل : أيدلوجية ،
سيكولجي ، إسقاطات ، المشهد الثقافي ، السياق …

أنتم تخرجتوا من مدرسة صحافتنا التافهة ، ونقلتوا أسلوبها الغبي لتويتر والفيسبوك ومواقع النت ، و أنا ما ألومكم لكن ودي تنتبهون
عشان ما تخرجون جيل من تحت يديكم بنفس مواصفاتكم الخايسة .

أنتم رزحتوا تحت رؤساء التحرير فترة طويلة لين تشربتوا أسلوبهم وصرتوا مثلهم ، أجل فيه رئيس تحرير له أربعين سنة
رئيس تحرير و ماشي على هالأسلوب !!

يقطع أم الحالة يا حسااااام ، يخرب بيته أربعين سنة !! عيا يخلص … لدرجة إن واحد يقول لي : إنه هو و صباح
وملك الموت متراهنين من يموت أول .

الحل :

لازم تراجعون أنفسكم وتستحون على وجيهكم لو شوي ، يكفي مصخرة يا هوووه ، بوضعكم هذا ترى الأمور مدحرة والوضع كذا :
الوطن : من جرف لدحديرة ، وبفضلكم بننتقل من العالم الثالث للعالم السابع .
حنا يالرعاع : خاسرين مع كل الجهات وحقوقنا مهدرة.
أنتم : تضيعون وقت وجهد وتعيقون الإصلاح .
والمفسدين : هم المستفيدين وتلقاهم هالحين مبسوطين وقاعدين يلعبون ضومنة << كلهم شيبان

و إن ماتعدلتوا ولله إني لأ…….. و …………. يا ………….. العالم تقدموا وحنا من جرف لدحديرة ، لا وتتكلم وكأنك
أنت المنقذ ، عطني فيصل أبو اثنين << عصب الجنط

لا من جد يا عيال ، إلى متى و أنتم كذا ؟ ، والله العظيم ما راح تتعدل أوضاعنا لين تتعدلون أنتم ، أنا و أمثالي من
الرعاع كنا معلقين الآمال عليكم لكن مع الأسف صرتوا امتداد للصحافة وخيبتوا ظنوننا
يا شباب اتركوا القضايا الجانبية أو الفرعية حتى لو كانت قضايا حقيقية ، فيه قضايا أكبر بكثير منها ، عندنا ألوف مؤلفة من
الناس يومياً يتسولون العلاج أو الوظيفة أو أو أو …

تخيلوا لو استقعدتوا لوزارة الصحة ، مثل ما استقعدتوا للي قفطوه بماليزيا ، أو مثل ما استقعد طلاب جامعة الملك خالد لمديرهم ،
هل بنلقى أحد يطرد من باب المستشفى أو مايلقى سرير أو علاج أو يدرس بمطبخ أو مايلقى سكن أو أو أو ؟!
تخيلوا لو صرفتوا وقتكم وجهدكم لهموم المواطن البسيط مثلي الي بس يبغى يعيش عيشة كريمة .
آهـ لو يجي ذاك اليوم الي نشوفكم تهتمون فينا وفي قضايانا .

خاتمة :

أدري إن فيه ناس بتقعد ترد وتسب وفيه واحد بيألف كتاب اسمه ( إبراز السكينة على الضال جنط السفينة ) إو ( إتحاف الفاهر والمارج بإثبات أن جنط السفينة من الخوارج ) أو ناس بتسوي عني خبر صحفي ( ودخل جنط السفينة مع أفراد من الهيئة على المجمع التجاري وقاموا بضرب النساء البريئات وقاموا بتعليق الأطفال بأرجلهم ومزقوا حجاب
بعض العجائز وكل ذلك بحجة إنكار الاختلاط ، وقد اعتذر جنط السفينة عن مابدر منه وقدم للنساء 32 حزمة كراث ، وكرتون “توفي لك” للأطفال ) أو بيطلعون عني خبر بالبنط العريض إني أطالب بهدم الكعبة …

لكن زي ما قلت لكم أنا إنسان داج و ملحط وبسيط من البسطاء أقصى اهتاماتي إني أنتظر شهر أكتوبر عشان أشتري شريط ( pes 2013 ) ، ولا عمري فكرت بحوارات أو أمور سياسية إلا يوم قفطوا حسني مبارك وصارت مصر بدون رئيس ، فكرت إني أروح لمصر و أصير رئيسهم بما إني عاطل ، بس آخر شي هونت لأني ماعندي جواز<< وإلا بس ذا الي ردك ؟

زي ماقلت لكم أنا ملحط و لا يهمني سبكم وردودكم علي ، بس الي أتمناه منكم أن توقفوا وقفة صدق مع أنفسكم وتفكرون بكلامي
وبمصلحة شعب ملعوب في حسبة أم أمه ولا زال يظن فيكم الخير .
أرجوكم وقفوا ذا البثارة ، حرام عليكم ، يكفي إننا نعيش مع حسن عسيري بنفس الكوكب .

هذا ما لدي فإن كان صواباً فمن الله و إن كان خطأ فمن علي أبو رجل مسلوخة والشيطان


حسابي على تويتر
صفحتي في الفيسبوك

شخبطهُ و أملاه :
آية الله العظمى الدكتور جنط السفينة قدس الله تسبده
37/ حزيران الثاني / 2012
منفوحة


تابعوا جديد شبكة أبونواف على فيس بوك وتويتر

   


تعليقات 20

  1. يكفي إننا نعيش مع حسن عسيري بنفس الكوكب :$:$ حسن هو نفسه ابو رجل مسلوخه

  2. تران قريت الموضوع وفهمته جعلي اموت اني ما اتسذب ,, اللي فهمته انك مشبهه علي ابو رجل مصلوخه بالشيطان خخخخخ ….. مبدع كعادتك يالجنط وبطل يالبى خشمك اللي كنه سر جدي صالح … لاهنت يابعدي وتحداك تعرفن << طيب وش المطلوب ؟!!

  3. اول لمن تتكلم عن حمزة هذا لازم يتعاقب عبرة وعظه لمن يتطاول على ديننا وهذا ابسط حقوقنا ومافي شيء اسمو إسلامي نحنا كلنا مسلمين هذي مسميات اخترعها الاعلام عشان يفرقنا بين بعض ولا نحنا كلنا واحد ومافي لا اسلامي او سلفي او وهابي فيه مسلم على مذهب أهل السنة والجماعه وبس غير عن كذا ياخي لمن كاتب رجل مسلوخه وقدس الله كبده مايجوز الاستهزاء بالدين ياخي واني لك مجرد ناصح بس

  4. يخليلياكن يا حبايبيني …… الحربي ـجدة يا عزيزي يا حبيبي يابعد قلبي تكفى اقرأ الموضوع مرة ثانية وشل سوء الظن و تصيد الزلات والإنشغال بالصغائر عن راسك وراح تستفيد والله العظيم إنك ضحية وللحين مادريت إنك ضحية ، كيف استهزاء بالدين ؟ ترى قدس بمعنى طهّر ، يعني ماتبي الله يطهر جوارحي ؟ :$ يابعد قلبي يالحربي اصحى ، خلاص يكفي 🙁

  5. بصراحة كلام على الجرح و يصف الواقع بأدق تفاصيله لكن المشكلة أني اعرف انك مانت من الرعاع ولو ان الرعاع كانوا على مستوى عقلية جنطنا الموقر لكنا بخير.

  6. بصراحة سلام كليم ، وفي مقتل مثل ما يقولون، عريتهم وجليت الصورة القذرة لأصنام الثقافة المريضة. لكن المشكلة اننا نعرفك انك مانت من الرعاع و ( ياليت) الرعاع على مستوى عقلية جنطنا الموقر ، لو كانوا فعلا كذا ، حنا بخير. تحية من تلميذك نابليون الدرعية

  7. المراد أني لن أطيل ولكن قول القائل(قدس الله كرشك) و (قدس الله بطنك) هذا إما استهزاء بالدعاء، أو أنه من التألي على الله عز وجل ومن باب الإستهزاء أيضا، راجع فتاوى العلماء وأسالهم وهذا من باب الاستهزاء وحتى لمن قلت من خطاء فمن نفسي والشيطان وعلي ابو رجل مسلوخه انت تستهزي بان الشيطان يوسوس لبني ادم ويخليه يخطي وعشاني نصحتك قمت تقول اصحى واني ضحية صار اللي ينصح ضحية وغافل !! ولاتأخذك العزة بالإثم الدين مافيه مجاملة أو مداهنة أو مسايرة رب كلمة تهوي بصاحبها سبعون خريفا في جهنم هداني الله وهداك واصلحني واصحلك والجميع

  8. نابليون بونوبارط خخخخخ لا والله أنا أرعع الأرععين خخخ …. الحربي جزاك الله ألف خير و كثر الله من أمثالك الي أبغى أوصله لك إن إنشغالنا ببعض ضيع كل شي و أول الخاسرين : الدين . تجاوز الجزئيات الله يجعلني و إياك ووالدينا في الجنة تقل ودي و احترامي /I\ << وردة I

  9. صح لسانك اخوي . الكل يشتم الاخر والكل يحمل الاخر ..صار العالم كا برنامج الاتجاه المعاكس طحن ومشاحن وصراع والنتيجه ما فيه شيء الا تسبود مشتبه للمشاهدين بس .. جيدين بالسباب وكيل الحقد واشغال الناس ..المصالح تعطلت والفساد انتشر المريض يموت ولا يحصل من يكشف عليه ..الطالب يدفع ما وراه ودونه بلدراسه ..على امل وظيفه ويجلس كم سنه وبالاخير قطاع خاص ويستقدم من الفلبين من يستلم راتب 24 الف.. اللحم الكيلو ضرب رقم قياسي والبركه با ام رقيبه والمزايين .صار مايربون الا المزايين والناس تموت وتاكل لحم .ايش نقول وايش نخلي .. الله يستر بس لا يكون للدجاج مزايين :(:( مثل ما قلت مدحدره ودبور ومن جرف لدحديره مالها قاع .. يهتمون بمعارضتك اذا اكلت بطبق واحد صنفين من الاكل ..(كل كل واحد لحاله) طيب كلهن بيجتمعن بطن واحد ولا .. الله يحفظنا من الفتن ماظهر منها وما بطن .. لو كل واحد وضع بين عينيه مكانه لبدايه الاخره وما سوف يلقى ..اكيد راح نتغير للافضل لكن كل مسؤول يعمل للدنيا وكانه مخلد بها دون حساب ومحاسبه .طمع النفوس خرب النفوس .. اما حسن عسيري الله يهديه بس ويفكنا من عسر الهظم..8) اللهم ارزق حكامنا و ولاه امرنا البطانه الصالحه من تعينهم على الخير وما فيه صلاح امر المواطن والوطن والله يحفظ بلادنا من كل شر شكرا لك اخوي والله يوفقك

  10. أخي المكرم (جنط السفينة),,, لا أدري هل ستقبل مشاركتي هذه بدون أن تميزني سواء من العشرة بالمئة أو التسعين، وأظن أنني لست منهم بل مسيكين يتبع الحق،، لن أجاملك بأنني أشعر بما تشعر به من هم وإن كنت تصيغه بمقال ساخر، ولكن يا أخي في نظري القاصر جدا جدا أنك لعلك جانب الصواب، وأرجو أن لا تتهور وترد على الضعيف حامد كابلي بمقال ساخر تنسفه فيه 🙂 ، ولكن قصدي أن ما انتقدته أو غالبه يدور حول قضايا تبعاتها هي من أساس الإصلاح والتنمية وإلا فما فائدة التنمية أو السكن الجيد أو أو إذا كان الأساس منحل وسامحني، أنا أقصد انظر إلى التجربة الإماراتية مثلا، فبمقاييس البشر أنها تجربة ناجحة مئة بالمئة، فلقد أصبحت دولة الإمارات من الدول التي يشار إليها بالبنان، هذا إذا أردنا الوصول فقط، ولكن يا أخي العزيز أليست الوسيلة من المطلوب أن تكون شرعية ، أقصد أن من دعامات الاقتصاد الإماراتي هو السياحة، وأنت أدرى ماذا تعني هذه الكلمة، خلاصة ردي أننا نحاول أنا وأنت وغيرك والعشرة بالمئة والتسعين غيرهم الإصلاح ما استطاعوا مع الأخذ في الاعتبار بالأخذ بالأولويات دون التنازل عن الشرع، وطبعا لا تفهم بأنني أقصد بأن جنط السفينة يدعو للتنازل عن الشرع، عموما أتمنى أن تكون فهمتني، وإلا فاعتبرني لم أعلق هنا، وكما قلت أنت عن بعضهم (امسك الباب) 🙂

  11. هلا والله ومرحبا بأستاذي العزيز حامد أول شي خلني أعبر عن وناستي إنك قريت شي من شخابيطي :$ والله إني أتشرف بالي مثلك يا أستاذي . قياسك على الإمارت بظني إنه غير صحيح من جهة وصحيح من جهة أخرى ، فأنا أطالب أن يطبق النظام عندنا مثل ما يطبق بالإمارات ولا أقول أن يطبق نظامهم عندنا . نظامنا واضح وصريح والأغلبية الساحقة بظني متفقة عليه ، لكن السؤال : هل هو مطبق ؟ لو كان مطبق كان مابلشنا بواحد سب الرسول صلى الله عليه وسلم ، بكل بساطة لو فيه تطبيق كان أي واحد من الشعب اتجه للمحكمة ورفع قضية عليه وعوقب بدون تدخل من أحد أو الرأي العام . الي حاصل إن مثقفينا يتناقشون بالجزئيات هذي ومعرضين عن أصل المشكلة ، وإذا قلت شي قالوا تؤيد سب الرسول صلى الله عليه وسلم !! أنا أقول لو مثقفين اجتهدوا للإصلاح الحقيقي ما احتجنا لهالصراعات الي لها أول ولا لها آخر ولا لها أي فائدة بل ترجعنا ورا وتشغلنا عن قضايانا الحقيقية . وهذا الي خلاني أكتب المقال .

  12. أخي الحبيب (أبو جنيط) ( لا أعرف كنيتك الحقيقية 🙂 ) : ثالثاً: تحملني إن أطلت 🙂 خامساً: شكرا لقلبك على حسن استقبالك، وتواضعك 🙂 . ثانياً: أنا بمثابة التلميذ اتعلم من كل ذي علم ما يفيدني،، أولاً: أخي الحبيب كون بعض أهل العلم يغيرون المنكر الذي ترى أنت أن غيره أكبر منه، هذا ليس بخطأ فالمنكر الصغير والكبير يغير ولا يقال قشور وغيرها، يا أخي ديننا متكامل، أم بخصوص كون بعضهم لا يتكلمون فيما تظنه أولى فلعله وسوف أكون صريحا معك وهذا ما أعرفه عن بعضهم لعله يا أخي الحبيب تكلم مع ولاة الأمر في الأمور التي تراها أنت دون أن يعلم أحد. رابعاً: تقول: ( لو كان مطبق كان مابلشنا بواحد سب الرسول صلى الله عليه وسلم )، فأقول لك يا أبا فلان… لو سلمنا بأن هذا الواقع فهل نترك الإنكار على الكشغري وأمثاله لأن هناك أمور لم تطبق في نظرك ؟!! عاشراً: كلام البعض حول تحويرك لبعض العبارات الشرعية، كأخ ناصح لك اتمنى منك أخذه بعين الاعتبار، وإن لم تقتنع بكلامي فدونك سؤال أهل العلم الذين تثق في دينهم وورعهم،، ثامناً: رفعك من قيمة (الغذامي) في نفسي منه شيء (أنا حر أليس كذلك 🙂 ). وأخيراً شكرا لتحملك,,,, انتبهت للترقيم؟ 🙂 أخوك/ أبو أنس

  13. هلا والله أبو أنس 😀 يبدو لي إن ما أعرف أوصل المعلومة بشكل جيد ، أغلب الكلام الي قلته أنت أنا ما أقصده :

  14. أبداً يا أبو جنيط 🙂 صدقني فاهمك وردي لك (أظن) أنك فاهمة، ولكنك (أحاول تصغير كلمة عنيد) شويتين ,,, هداني الله وإياك

  15. تخيل يوجد عدد (1) إعجاب بردك وقولك (كتبت رد طويل وين راح)!! حاول أن تفسرها يا أبو جنيط، أو فسرها لمن وضع الإعجاب،،

  16. هلا والله أبو أنس وصدقني إني ما أنت فاهمني للحين يبدو لي إن ما أعرف أوصل المعلومة بشكل جيد ، أغلب الكلام الي قلته أنت أنا ما أقصده : حنا نظامنا الشريعة ، وهذا ما اختلفنا عليه ، أنا أختلف بطريقة التطبيق يعني أنا ما أبي النظام يتغير أبي طريقة التطبيق تتغير وتصير مثل التطبيق البريطاني مثلا . ولو انشغل المثقفين بالطلب هذا فقط كان ما احتجنا لقضاينا الجانبية ، يعني يوم صارت حادثة الماريوت لو فيه تطبيق للنظام كان راح واحد للمحكمة ورفع قضية وتعاقبوا المشاركين في الاختلاط بحكم النظام . لكن الي يصير إننا منشغلين بقضايا فردية أصلا هي محسومة مسبقا . تخيل لو فيه نهار وفي أول النهار تداخل بين مياه النهر ومياه المجاري -الله يكرمك- وفيه ناس بأسفل النهر يحاولون تطهير المياه لاستخدامها . حماقة كبيرة صح ؟! الحل إنهم يطلعون فوق وينهون التداخل وبس . يعني لوفيه تطبيق للنظام ما احتجنا لقضايا كثيرة جدا من الي مشغلين الراي العام فيها ، وحقوقه الشرعية والمدنية تنتهب يوميا 🙁 إنكار المنكر واجب سواء صغير أو كبير وكان المفروض يكون بحكم النظام الشرعي ماهو جهد فردي . مقالي بكبره إنكار لمنكر تضييع الحقوق . بالنسبة للغذامي أو غيره فأنا أختلف معه ومع غيره من المثقفين والشرعيين بجوانب عديدة واتفق معه بجوانب ثانية ، و أبو القاسم صلى الله عليه وسلم علمنا نقبل الحق حتى لو من الشيطان . وياليت صاحب اللايك يجاوب ويفسر لي لأني زي ماقلت لك أنا من الرعاع ولا أعرف أقراء ما وراء السطور

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

انبراشة ثقافية‎

تسجيل الدخول

كن جزءا من مجتمعنا!

ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول