الكلية التقنية و ما أدراك ما الكلية التقنية..


بسم الله الرحمن الرحيم
في البداية اشكر القائمين على هذا الصرح الكبير ، والذي يعتبر متنفس للجميع ..
فمهما أطلت بالمديح .. لن أوفيه حقه ..

لذلك ندخل بالموضوع ( دوغري ) ..
 
أول أيام التخرج من الثانوية العامة لم أكن أتوقع انه سينتهي بي المآل إلى كلية التقنية الموقرة !!
لكن هذا حال الدنيا تحلم تصير طيار وبالأخير تصير جندي !! >> عادي تحصل بأرقى العوائل !
توكلت على الله وسجلت بكلية التقنية بعد علمية مشاورات دامت لمدة أسبوع بين مؤيد ورافض الفكرة… لكن على قولة المثل ( وش يحدك على المر .. قال إلي أمر منه !! )

** دخلنا الكلية وللأسف من أول وهله حسيت انك من طلاب الروضة .. زي موحد !!
يعني الشباب كلهم طقم واحد ( بنطلون اسود × قميص ابيض ) !!
ماعلينا نتحمل كلها أربع سنوات ونتخرج << اسمعوا وش يقول أربع سنوات هههههههههه حبيب على نياته ..

الحمدلله بما إن النسبة كانت حلوه انقبلت في القسم إلي كنت أبيه ( تقنية المعلومات ) ..
** وللأسف لا يوجد إلا تخصص وحيد بكلية التقنية بالرياض وهو ( دعم فني ) علماً بأنه يوجد تخصصين في كلية التقنية بالخرج ( دعم فني & شبكات ) !!!!!!!!!!!!!!!!!!!!!!!!! .. الخ
** على حسب معرفتي بالنظام الأكاديمي أن الطالب هو من يختار جدوله من ناحية إسقاط بعض المواد وإضافة أخرى ..
لكن مع احترامي لكليتنا العزيزة تتبع نظام ( انا أبخص ) ما تدري كل بداية فصل دراسي إلا وتجي تصف سرا كأنك واقف عند مخبز في ممر BE لحد مايجي دورك وتستلم جدولك !!
وإذا جيت تعدل جدولك تلقى الموظف يرد عليك بالمقولة السائدة في اغلب منشأتنا الحكومية (النظام ما يسمح) !

**ولا تستغرب إذا كانت عندك محاضره الساعة 7.30 إلى 9.00 وبعدها يكون عندك فراغ .. فجأة الساعة 2.45 الظهر محاضره ثانيه !!
طيب يا كليتنا العزيزة ما فكرتي بطلابك إلي أنتي مستخدمه معهم نظامك ( انا أبخص ) باختيار جدولهم اليومي بما يناسبك أنتي وليس هم !!
ما فكرتي إن فيه أشخاص يجوون من خارج الرياض وجداولهم للأسف من سيئة إلى أسوء !
ويا كثر ما نشوفهم بالمصلى وقت الصباح.. طبعاً ما فيه صلاة الساعة 9 الصبح !! لكن للأسف نلقاهم نايمين مالهم مكان يروحون له بوقت الفراغ إلي يمتد إلى أكثر من 5 ساعات .. لكن وش نقول .. حيل الله أقوى!!
ما علينا مثل ما قلنا نتحمل كلها أربع سنوات ونخلص.. >>> ما قلت لكم على نياته هالولد ؟؟

** بعيداً عن هذه المشاكل والتي تعتبر غصة ولكنها قد ( تـُبـلع ).. ندخل في لـُب الموضوع ..**
خلصنا أول سنه وثاني سنه وبعدها تطبق !! طيب والشاب اللي طموحه يكمل ويصير مهندس ( آآآد الدونيا )؟؟
لا يا حبيب قلبي ليش مستعجل ؟؟
أنت تخرج الحين من الدبلوم واحصل على معدل فوق 4.. وطبق في اقرب منشأة حكومية .. بعدين قدم علينا !! وبعدها نختبرك وإذا اجتزت الاختبار يمكن نقبلك !!

مو مشكله نقدم وندفع لكم رسوم80 ريال في حسابكم في بنك الراجحي ونجيب لكم الإيصال الأصفر الذي (مهما حاولت لن تدخل الاختبار بدونه )!!!!!!
( سؤال خارج الموضوع ) 80 ريال من كل طالب يقدم لدخول اختبار البكالوريوس وين تروح وبأي حق يجب علينا دفعها ونحن لا نعلم هل نقبل ام لا !!؟؟؟
** طيب على عيني وراسي نقدم وندفع وكل شي.. بس خريجي الدبلوم يتجاوزون حاجز 1000 نقطه قصدي خريج في كل سنه!! ومقاعد البكالوريوس 50 مقعد فقط لكل فصل دراسي!!
كيف تقبلوني إذا خريجي دفعتي بس يتجاوزون 400 خريج ؟؟ والمتقدمين من الكليات الأخرى والدفعات السابقة عددهم يفوق 5000 متقدم ؟؟

لماذا لا تتوفر لنا مقاعد في مرحلة البكالوريوس ؟؟

أليس من الظلم أن لا نستطيع أن نواصل ونكمل طموحنا ونحصل على شهادة البكالوريوس ؟؟
أليس حقاً من حقوقنا ؟؟
ألا تعلمون انه لا يوجد أي مجال أخر سوى كلية التقنية بالرياض فقط لنواصل السنتين المتبقية لإكمال مرحلة البكالوريوس !!
والتي وللأسف يتقدم لها كل فصل دراسي أكثر من 4000 نعم أربعة آلاف طالب..من شتى كليات التقنية حول المملكة !!
وهل تعلمون ايضاً كم هو عدد المقاعد المتوفرة ؟؟ 65 مقعد فقط في هذا الفصل !!
( قد يعتقد البعض بأنني ابالغ لكني اقسم بالله ان هذا هو عدد المقاعد لاخر فصل دراسي وان الفصل الذي سبقه كان عددهم لا يتجاوز 45 مقعد ) !!!
ولكي تعيشون معنا هذه المعاناة.. سأخبركم بشيء آخر .. (هل تعلمون أن اغلب المقبولين هذا الفصل ليسوا من كلية التقنية بل من خريجي كلية الاتصالات) !!
وبالنسبة لبقية الجامعات للأسف لا تقبل بنا ؟؟

لا أريد أن أتطرق إلى الأسباب وماهو الفرق بين المؤسسة العامة والتعليم العالي والصلاحيات التي قد تسحب وما الى ذلك ..
لكن ليس هناك سوى الجامعة العربية المفتوحة وعلى حسابنا الخاص.. لكن المصيبة انه ينقضي من عمرك 3 سنوات دراسة دبلوم في كلية التقنية وإذا أردت أن تلتحق بها سيعادلون لك فقط 14 ساعة وهي ساعات اختياريه ليست بتلك الأهمية بل سوف تعود مرة أخرى لتدرس جميع المواد التي درستها سابقاً في سنواتك الثلاث الماضية.. ومدة الدراسة قد تمتد إلى خمس سنوات ( كل واحد على حسب ميزانيته ) !!
وغير ذلك الأسعار المبالغ فيها خصوصاً بعد الزيادة المفاجأة التي طرأت عليها وهي زيادة 40% فلكم أن تتخيلوا أن سعر الساعة الواحدة في المواد يتراوح مابين 400 إلى 900 ريال !!
والطامة الأكبر تصنيف برنامجها لتقنية المعلومات على المرتبة السادسة من قبل وزارة الخدمة المدنية ومرشحين لشغل وظائف مراقب مطبوعات .

ندااااء و رجاااااء لمن يستطيع أن يغير في أحوالنا ومعاناتنا .. فلقد سئمنا من هذا الاحتكار..فنحن نطمح لأن نرتقي بأنفسنا وبلادنا ..
نتمنى ونرجو نحن خريجي الدبلوم من كليات التقنية أن يرى المسئولون بعين الاعتبار لوضعنا الحالي !!
حتى ولو كان باب القبول وإكمال البكالوريوس في كلية التقنية على حسابنا الخاص فلا مانع لدينا من ذلك لكن دون ضياع تلك السنوات الثلاث..

وصدقوني هذا لسان حال اغلب الخريجين الطموحين الذين يتمنون.. مواصلة المشوار
نرجوكم .. فنحن على شفا حفرة من الضياع وتحطم الآمال والطموح..
فما أجمل ان تنادى بمسمى.. ( مهندس فلان ) ..

عبدالله آلمانع


Comments 45

  1. انا طالبه من كلية التقنيه قسم محاسبه مستوى رابع شهر واخلص كنت اطمح لتكميل دراستي بجامعة سعود بس بعد الي سمعته ما اتوقع في أمل.. لازم اجيب معدل وليشششB ولا تنسين فتمين واو

  2. اصعب شيئ عندما تكون هناك عثره تقف امام احلامنا وطموحاتنا .. وقهر عندما تكون الواسطه هى الاساس .. يعني بااختصار شديد لو فيه واسطه لو معدلك 2.5 من 5 راح اتكون من احد طلاب الـ 65 مقعد للاسف وانا اقراء موضوعك ذكرتني بطلبه المقدمين لدراسة الماجستير في جامعة طيبه فو ق400- 500 طالب متقدم وفي النهايه 20= او اقل من ذلك المقبولين وبمعدلات اقل من المطلوب للاسف … الخ اخ عبدالله اسال الله العلي القدير ان يسهل لك طريق العلم لتحقيق وانجاز اهدافك تحيتي تسبق إحتراماتي

  3. 😀 انا على باب التخرج .. انشاء الله الترم الي بعده خريج من كلية الأتصالات والمعلومات .. بس مثل ما قلت مشكلة اذا كان طموحك اكبر من طموح مسؤوليك .. :>:> ليش ماتدري :(:( خذ شهادتك .. الظاهر يبونك تاخذ وثيقتك وتبروزها وتحطها بمدخل بيتكم تتجمل بها .. يامسؤولين :> :> 🙁 والله طموحنا عالي .. افتحوا لنا المجال ..

  4. لقد اسمعت لو ناديت حياً ولكن لا حياة لمن تنادي ياخوي سبقناك ووصلنا المعاناه للجرايد لكن (مكانك راوح) خريج لي سنه حاليا حاسب دعم فني كلية التقنيه بالطائف وجالس ارتب البيت مع الوالده

    1. وانا خريج برمجيات بالترتيب الثاني وما جاتني ولا وظيفه ويوم قدمت على بعثه التقنيه ما قبلوني لا انا ولا الاول قبلو فيتامين واو متخرج لي سنتين ولا قديم يعاد ولا جديد يذكر

    2. وانا خريج برمجيات بالترتيب الثاني وعاطل والاول في البرمجيات يشتغل في فندق عشر ساعات ب١٢٠٠ ريال بس الله يعين بس الله يعين

  5. ياأخوك عبدالله انا خريج معهد ثانوي صناعي وبعد ماتخرجت وبنسبة جيدة قررت أكمل والشكوى لله مافيه إلا الكلية التقنية حاولت بالابتعاث خارج السعودية مثل الخريجين السابقين بس ماكان عندي واسطه وكملت تقنية حتى كليتنا أنواع التشدد لازم تلبس بالطو وتلبس قميص أبيض وسروال أسود وكنادر وانتم بكرامه وباقي لي 23 ساعة واتخرج من غير التدريب التعاوني والحين ابحث عن الإبتعاث ومالقيت شيء هذا حالنا على المرتبة الخامسة نسوا إن عندهم شباب تقني طموح وشاكر لك ياعبدالله

  6. أرجو أنك تحط الموضوع هذا في منتدى منسوبي المؤسسة العامة للتدريب التقني والمهني لأن محافظ المؤسسة على أطلاع على المنتدى

  7. انا توني مسجل في الكليه التقنية اللي في الرياض قسم محاسبه بس بصراحه خوفتوني ابي اخذ هامكافئه واغير جو لين الله يفرجها

  8. أنا خريج لي أربع سنوات وبصراحة والله ندمت إني دخلتها وأنا كملت بـ الجامعة العربية المفتوحة ونصيحة كمل تعليمك ولا تتحسر على ما فاتك لأن لو بتتحسر بتضيع آمالك .. أخوك علي القرني

  9. اخوي عبدالله المانع اتمنى لك التوفيق في حياتك الدينيه والدنيويه عندي لك نصيحه اذا حبيت تكمل بكالريوس واحد من الشباب نفس وضعك تخرج من الكلية التقنية دبلوم وحب يكمل بكالريوس ما قبلوه قدم على جامعة في بريطانيا الظاهر انها مشهوره عند طلاب الكلية التقنية لانهم يعادلون لك ثلاثة ارباع دراستك وعلى حسب علمي هو مخلص 90 ساعه عادلو له 70 ساعه يعني ما بقى له غير سنتين ويرجع مهندس من بريطانيا واتمنى لك التوفيق

  10. انا متخرج من الكليه التقنيه ونسبتي 3,5 وانتهى بي المطاف عسكري جندي لا فرق بيني وبين الذي يحمل الشهاده المتوسطه حسافه على الوقت الي ضاع في الدراسه لكن ان شاء الله يتداركون الوضع ويفتحون فرص وظيفيه للي باقي ماخذ مقلب في التقنيه

  11. أعرف واحد خلص دبلوم دعم فني بالتقنية بحفرالباطن وقدم على الأردن ..أول شهر على حسابه والباقي على الحكومة..إلى أن تخرج وكمل السنتين الباقيات ..والحين ملازم بقاعدة الملك خالد العسكرية ..عسى الله يوفقه

  12. انا طالبة تقنية وبتخرج هالايام قسمي دعم فني تهقى نهاية مطاف البنات زي نهاية مطافكم من جد اذا مب مهتمين بنا من الاساس ليش يحطونها انا بصراحة احمل المسئولية للمؤسسه العامه ياخي انتم طقيتوا صدوركم وافتحتوا هالمجال .. عطونا المجال عشان نكمل والا وضفونا

  13. بصراحه معاناه .. والله انا اقراء موضوعك او معاناتك فعلاً شئ يقهر شاب طموح وينظر للأعلى لا يستطيع تحقيق مراده ارجوا منك اخي ان لا تتأثر .. ايعقل ليس بالأستطاعه الأهتمام بالشباب ويتكلمون عن البطاله .. وهم من يقف وراء البطاله .. والله اقولها من جد انا ناوي اخش التقنية بس بعد ما سمعت منك هونت ..

  14. فما أجمل ان تنادى بمسمى.. ( مهندس فلان ) .. 🙁 اخوي عبدالله .. كلامي نفس ومعاناتي نفس معاناتك وكليتنا نفس كليتكم نسخة بالكربون اللهم الفرق الوحيد ان البكالوريوس بتقنية الرياض لجميع مناطق المملكة .. B ناهيك عن المكافآآآت الي ياالله يصرفونها لك بعد 3 شهور .. والمشكلة اذا جيت تسألهم ليش المكافآآت متأخره يقولون لك ( والله ما ندري ) .. :~ أجل من الي يدري ؟؟؟ من المسؤول ؟؟؟ ليش كل هذا ؟؟؟ وماخفي كان أعظم … :(:(:(

  15. قلبت المواجع من جد كلية التقنية بالاحساء اعظم من كذا مافيه الا كم قسم وقصو علي هذي المره مش ربعي ولا اصدقاء السوء هذه المره الدكتور الفلاني حين شرح لي وضع القسم بانه له مستقبل باهر وفي التخرج راح تحصل وظيفه على طول بوجهك مايحتاج اتدور وظيفه الوظيفه مظمونه ومن هالكلام المعسول الجميل اللي يقنع خصوصا انو جاي من قبل دكتور حتى بدلت قسمي من قسم المحاسبه الى تسويق فما تخرجت الا اني وجدت نفسي من الشباب الهايت وكنت ابغى اكمل بكالوريوس لكن من بعد هالمقال الظاهر مافيه امل

  16. الله يكون بعونك اخوي عبدالله .. وترا طموحك في غاية الروعه .. لاتتحطم .. ان شاء الله توصل مبتغاك وترى طموحك مثل طموحي ..يقولون ( المهندس فلان ) وانا الان ادرس بالكلية(اول سنه ) قسم التقنية المدنية والمعمارية .. تخصص مدني .. يخرج مساعد مهندس مدني.. حاصلة لي وظيفه حاليا .. لكن متررد وخايف .. مدري بيفتحون باب البكالوريس والا لا .. اخاف اطلع ويفتحون الباب واندم .. واخاف اقعد وتضيع سنتين ع الفاضي .. والله ان كلامك واقعي .. وبجد زود حيرتي .. مدري وش اسوي .. !! يااااااااليت احد يفيدنا من الناس الفاهمه ..

  17. بسم الله الرحمن الرحيم السلام عليكم ورحمة الله وبركاته أنا شاب سعودي من أب سعودي وأم سعودية والأجداد سعوديين ألتحقت بكلية التقنية ثم تخرجت منها عام 1425هـ بمعدل 4..4 من 5 قسم حاسب آلي تخصص دعم فني وانتظرت بعض الأشهر دون عمل أو وظيفة ثم سمعت بحملة السعودة الخاصة لمساعدة الشباب السعودي لإيجاد الرزق الحلال ثم ألتحقت بالحملة وكلي أمل بالقائمين عليها راجي من الله كل خير وألتحقت بدورة في الثانوية التجارية تابعة للحملة وأجزتها بحمدالله ثم بدأت قصتي مع مكتب العمل وياهي من قصة من الروحه والجيه على أمل أن أجد وظيفة تتناسب مع تخصصي أوقريبه منه بأي حال من الأحوال ولكن مع الاسف مع كل هذه المراجعة…. بكرة ..وبكرة..وبكرة ……….. وتعرفون الباقي حتى طفشت. وقالوا فيه وظيفة (بائع قطع غيار سيارات) براتب 2000 ريال فرحت بها كثيراً (ما عندي خيار) قلت مجال آخر قد يفيدنا في المستقبل و نتعلم مجال آخر وصنعه أخرى مفيده. ولكن للأسف طلع المحل صغير جداً ولا يوجد فيه جهاز حاسب … قلنا ما فيه مشكلة نتعلم الشغل من العامل ولكن للأسف العامل أخالقه طيبه معي ولكن للأسف ما يبي أن أتعلم منه الشغله قلت ما هو مشكلة نستفيد الراتب نسد به الحاجة ولكن صار راتبي عندهم 1000 ريال…… بحجة أن المحل لم يستلم الدعم من الموارد البشرية (لا أعرف أسمها جيداً) المهم ما طولت معهم ولم أكمل العام معهم …..هذا عام هـ وقبل أن أترك المحل ألتحقت في دبلوم اللغة الإنجليزية من كلية المعلمين وحصلت عليه بمعدل 4.54 من 5 . وفي عام هـ ألتحقت بوظيفةإدارية بالتعاقد مع خدمة المجتمع في كلية التقنية ثم أتى قرار المؤسسة (الفاجع والمؤلم ) بإنهاء نظام التعاقد…. فرحت به كثيراً قلت إن شاء الله فيه ترسيم مثل الدوائر الأخرى (كلنا شباب سعودي.. وأفتخر) ولكن للأسف… ما صار شئ … لماذا …. لا أعلم . فجميع المتعاقدين السعودين ا لذين كانوا يتمنون الترسيم فمنهم من تزوج ويعول أسره ومنهم من خطط للزواج ومن ومن……..إلخ وأنا أعلم أن قصتي هذه أهون بكثير من قصص الشباب السعودي أصحاب المؤهلات الطيبة والتي تؤهلهم للعمل أفضل من……… الرجاء النظر في أمرهم بعين الأعتبار ……….. ولكم منا جزيل الشكر والعرفان يامسؤلين……… مع تحيات شاب سعودي

  18. الترم الجاي بإذن الله بطبق قسم محاسبة في التقنية بالقصيم الرس الطموح راح بين جدران المدارس الله يرحم الحال والبكالريوس بالرياض وماتدري يقبلونك او مايقبلونك معدلي فوق الاربعه وبالنسبة للمعادلة جامعه في بريطانيا ماتعادلك شهادتك لان التعليم عندك مش ولابد لازم تبدأ من الصفر مادة التخصص (العملي) البرنامج اللي نتدرب عليه مانشوفه الا بالقاعه مايمدي نراجع ولا ندرس ولا نسوي بروفات اسمه سماك ايييييييييييييييه الله يرحم الحال

  19. اقول والله اني عانيت فيها مكاافاائات من متى الى متى:( حنا طلاب محتاجين الى مكافئات ومحتاجين الى كتب الله يخسهم بس وش تسوي لا حياه لمن تنادي انا لي شهرين وطفشت من الكليه بس والله لا اسوي فيهم حركه لا اخليهم يحقدون يا انا الموقع حقهم يطير ياني اسحب لاب توب واحلا قووووب هههههههههههههههههههههههههههه بــــــــــــــــــــــــــــــــرـب

  20. انااا خريجه تقنيه قسم محااااااااااسبه ماااااااافي امل اكمل بكالوريوس , جاامعه الملك سعوود سمعت انهاا تعاادل صح ووووولا؟

  21. انااااااااااااااا طالبه بالكليه وبتخرج قريب جاامعه الملك سعود سمعت انهاا تعادل البكالوريووووووووس صح ولااااا؟

  22. ههههههههههههههههه وش السالفة اليوم بروح اعطيهم ملفي قبلوني بقسم التقنية الادارية بس الله اعلم بعد ذا الكلام الظاهر الواحد يختصر الطريق ويخش عسكرية تحياتي للشباب العاطل

  23. انا طالب مستجد في كلية التقنيه و تخصصي دعم فني ومن بعد ما سمعت كلامكم بديت أخاف على مستقبلي .. وش تنصحوني به اسحب و أكمل جامعه لأني باقي صغير و عمري ١٨

  24. اخوي مع احترامي لك لكن انت كذا جالس تحطم امال ناس كان عندها طموح وانا احب اقولك ان لك مجتهد نصيب انت لو شاد حيلك وجايب معدل واجتزت اختبار الانجليزي وخلصت البكالريوس كان الحين انت زيي معيد بكلية التقنية بالمدينة المنورة

    1. السلام عليكم

      انا طالب ف الكليه التقنيه باقي الترم ذَا واغلق والحمد لله معدلي حلو … سوالي
      هل يوجد بعثات لطلاب الكليه التقنيه. اتمنى تفيدوني وجزاكم الله خير الجزء

  25. السلام عليكم . انا بالتوم الاخير واتخرج من الكلية التقنيه قسم محاسبه معدلي 4.80 تنصحوني بعد ما اخلص اكمل جامعه من جديد ما اوقف اذا مافي !! وظايف مرموقه

  26. حسبي الله ونعم الوكيل بذا الكليه واللي ماسكينها … انا خريج من 5 سنوات تقريبا وجبت معدل قريب من ال5 اول ماتخرجت جلست ادور وظيفه وماحصلت الى ان انتهى بي المطاف ودخلت الدوره الانجليزيه حقتهم ع اساس احصل بعثه فعلا اخذت اللغه وحصلت البعثه لكن المشكله وين ؟
    انا تخصصي دعم فني اول مابتعث طلع القبول المشروط انه تخصصي هندسه حاسب !
    بعد ماخلصت اللغه وجبت درجه اختبار الايلتس المطلوبه جاني القبول غير المشروط انه تخصصي حوسبه!
    بحجه انه اقرب لتخصصي طبعا لا هذا ولا ذاك قريبين من التخصص
    المشكله الاكبر انه انا وزملائي المبتعثين اللي معي وكان تخصصهم دعم فني نفسي يوم سألناهم ليه حطونا بذا التخصص قالوا لنا انه هو الاقرب لكم
    اللي اكتشفناه انه في طالبه نفس تخصصنا بس حطوها شبكات !
    والان الغوا البعثه عنا انا وزملائي باستثناء طالبين اللي قدروا يمشون بالتخصص
    و8 رجعوهم من ضمنهم انا
    مافيه نظام واضح يمشون عليه
    والحين رجعت مثل ماكنت اول ماتخرجت من الكليه
    عاطل ):

  27. ي ناس اللي منزل هلكلام عام 2009 😂 الحين حنى 2016 الناس تطورو الحين تخصص الدعم الفني من افضل التخصصات 😁 * سبحان مغير الاحوال

  28. انا خريج تقنيه تخصص اجهزة طبية معدل 4،57 خريج عام 1436 ونصدمت بعد التخرج ان التخصص غير مرغوب ..لكن اللي اقول ان التقنيه كلها فاشله بجميع تخصصاتها وانصح الجميع بالابتعاد

  29. انا خريجه كلية التقنية تخصص تجميل متخرجه من شهر 😊 انصح الي مسجلين يكملون ولا يسحبون يشدو حيلهم وتوفيق من الله الله يوفق الجميع ويكتب لكم الخير ويحقق امنياتكم

    1. انا خريجة تجميل ومتخرجه وابغى بكالوريس كيف اقدم والا انتهى مشواري مع الدبلوم الي يعرف الطريقه لايبخل علينا محتاره 😔😔😔

  30. السﻻم عليكم انا حالياً ادرس. في كلية اﻻتصاﻻت بالرياض. تقنية الحاسب تقنية شبكات. وش رأيكم بالتخصص. مطلوب باسووق العلم

  31. ي اخواني ابي جواب للي عنده خبره انا ابي اكمل بكالوريوس مسائي ان شاءلله ومادري كم تكلفة الترم اذا مبالغ فيها فما اقدر حنا ناس غلابه

  32. انا خريج كلية تقنيه برمجيات ومستعد اني اتنازل عن الكلية وادرس جامعه من جديد
    حتى الجيش ما يبغى برمجيات ليه فاتحين التخصص اذا ماله مجالات وظيفيه

  33. وانا تخرجت من التقنية قبل 5 شهور تخصصي الآت ومعدات دبلوم طبعاً الى الان الأمور ماهي واضحة بالشكل المطلوب للأسف لكن تفائلوا بالخير و ربنا يرزقنا بإذن الله..

    ” لو أنكم توكلتم على الله حق توكله لرزقكم كما يرزق الطير تغدو خماصا وتروح بطانا “

  34. اناخريج الثانويه العامه من قسم شرعي والله لا يبارك في الي وقفولي قدم طريقي من المدرسين وشردوني من العلمي والله يافيه مدرسين حتى الحمير وانتوا بكرمه افضل منهم وانا طموحي اكون طيار المهم اكبر عقبه الي وقفه قدمنا هم المسؤولين خايفين على الكرسي يكسرونها الطلاب الجدد بتفوقهم وجديتهم في العمل وطموحهم الي ماله مثيل ولا لو يبغون يفيدونا كانو وجهونا لي الاقسام المتوفرة والي عليها طلب لكن ما يبغون الموطن الطموح والمجتهد يتفوق عليهم ويرفع من اقتصاد البلاد الي يتمنى يرفعه فوق ويرتفع معه ويقولون الشباب عطلان متجاهلين انهم هم ام العطاله والبطاله حتى كل الي متخرج يشتكي من عدم وجود العمل لانه اساسن يبغون يحتكرون كل شيئ حتى الوظائف والجامعات ومايبغون يوقفون شيء الى محتكرينه ويفكون لي الشباب مجالة اي امل حتى لو جاب امتياز ليش ويش الفايده غير ذا الشيء ولا لو ودهم وامنيتهم انهم يغيرون من اقتصاد البلد يقفلون التخصصات الي ماله لزمه ويسون درسة جدوا لي التخصصات المطلوبه يفكونهاوبدل ما يجيبون الا جنبي يشتغل في دولتهم يخلون ولد البلد يشتغل فيها حتى لو التخصص صعب مع تحيات ارفع راسك يسعودي انت ترقص من العطاله واحنا نقودك الى الفشل ونجيب غيرك يشتغل هذي وجهت نظري الخاصه واتوقع فيه ناس كثير تايدني غير المسؤلين لا اوصيكم يا الدوله سوا درسة جدوا وخلو اتصال بينكم وبين جميع اماكن العمل سنوين او كل3 سنوات عشين لا تخصرون اقتصاد البلد وكمان لو تجي تخصصات جديده وتكون بجد محتاجه الدوله موا بس تدريس وتوجهوا الشباب عليها بتنجح الدوله وترتقي وبدل البدلات العاليه والطمع الزيد وبعد ما يتخرج الشخص لزم ينحط اسئله عشين تتفك عقدة تقدم الدوله وفشلها وكمان على معا انا شايف فيه دكاتره كمان موا فاهمه عملها وفوق ذا كله المسؤل الاول والاخير الاستاذ لنه ما وصلة المعلومه لي الطالب وسباب طريقة شرحه لي المادة وكانها اخبار والمدرسين الي وجهتهم عقبات بعد التخرج ومدرسين الجامعات الي كل وحد فيهم يقول هذا التخصص المطلوب والوزراء الي جالسين يرمون الوم على شباب اليوم والحرف والي اصبح اكبر من الدوله الي عايشين فيها وحتى اذا ماكن الطالب الي حاصل على حرف ويستحقه ويستهاله وهذا كل سار مضر لي اقتصاد البلد لو يحطون على حرف وعقوبات قويه وصارمه ما كان احد تجري واستخدم الفتمين و في نجاحه ولو ينفك مكتب موا لزم يكون مرموق زي المكاتب الان وما منها فايده بس الاهم من المكتب انه يقدر يعرف ايش الاحتياجات البلد من جامعين وموظفين وكمان لزم يساعدونهم جميع اصحاب العمل ويكونون اصحاب العمل قبل ما يطرحون مواعيد التقديم الوظائف الى مكتب العمل ومكتب الي زي ما قلت الي يسوى الاحتجات البلد بدل الاجنبي الي منهم متخصصين في اشياء حلوه عادي نخليهم لكن يعلمون الطالب السعودين عشين حصار البطاله يلتغي

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

الكلية التقنية و ما أدراك ما الكلية التقنية..

تسجيل الدخول

كن جزءا من مجتمعنا!
ليس لديك حساب؟
سجل

اعادة تعيين كلمة السر

الرجوع لـ
تسجيل الدخول

سجل

اشترك معنا

الرجوع لـ
تسجيل الدخول